पुणे, दि. २४ : ग्राहकांना कायदे व हक्कांची माहिती व जाणीव व्हावी या उद्देशाने राष्ट्रीय ग्राहक दिनानिमित्त आयोजित प्रदर्शनाचे अपर जिल्हाधिकारी डॉ. सुहास मापारी यांच्या हस्ते उद्घाटन करण्यात आले.

यावेळी जिल्हा पुरवठा अधिकारी महेश सुधळकर, जिल्हा माहिती अधिकारी डॉ. रवींद्र ठाकूर, अन्नधान्य वितरण अधिकारी प्रशांत खताळ, अखिल भारतीय ग्राहक पंचायतीचे उपाध्यक्ष विलास लेले, पुणे जिल्हा ग्राहक संरक्षण परिषदेचे सदस्य तुषार झेंडे पाटील, सायबर क्राईम सेलचे पोलीस उपनिरिक्षक तुषार भोसले उपस्थित होते.

श्री. लेले म्हणाले, आर्थिक शोषण टाळण्यासाठी ग्राहकांनी सजग राहून संघटित होणे गरजेचे आहे. फसवणुकीचे प्रकार बदलले आहेत. त्यामुळे ग्राहकांनी संघटित झाल्याशिवाय न्याय मिळणार नाही, असे सांगितले.

श्री. भोसले यांनी सायबर क्राईमबद्दल सविस्तर माहिती देताना सांगितले की, सध्या ऑनलाईन पद्धतीने लोकांची आर्थिक फसवणूक होत असून ती कशी थांबवता येईल, याबाबत सायबर क्राईमपासून वाचण्यासाठी काय काळजी घ्यावी यासंदर्भात मार्गदर्शन केले.

प्रदर्शनात विधी सेवा प्राधिकरण, भारतीय जीवन विमा, वाहतूक नियंत्रण, पीएमपीएमएल, प्रादेशिक परिवहन अधिकारी, एसबीआय इन्शुरन्स, हिंदुस्थान पेट्रोलियम कॉर्पोरेशन, बीएसएनएल, जिल्हा कृषी अधिकारी, महाराष्ट्र राज्य विद्युत वितरण कंपनी, भारत पेट्रोलियम कॉर्पोरेशन, अग्रणी बँक, इंडियन ऑइल कॉर्पोरेशन, राज्य आरोग्य प्रयोगशाळा, अन्नधान्य वितरण कार्यालय, जिल्हा आरोग्य अधिकारी, वैधमापन शास्त्र, पोलीस सायबर सेल, जिल्हा व सत्र न्यायालय, भारतीय मानक ब्युरो, अन्न व औषध प्रशासन कार्यालयाच्या वतीने स्टॉल लावण्यात आले होते.

पुणे, दि. 23: राज्याचे उपमुख्यमंत्री तथा वित्त मंत्री अजित पवार यांनी शिवाजीनगर येथे नव्याने बांधण्यात आलेल्या छत्रपती शाहू महाराज संशोधन, प्रशिक्षण व मानवविकास संस्था (सारथी) मुख्यालयाच्या इमारतीची पाहणी केली. यावेळी उपमुख्यमंत्री यांनी नवीन इमारतीच्या कामाबाबत माहिती जाणून घेतली. यावेळी संस्थेचे अध्यक्ष अजित निंबाळकर यांनी श्री. पवार यांचे स्वागत केले.
यावेळी श्री. पवार म्हणाले सारथी संस्थेच्या अडीअडचणीबाबत लवकरच मार्ग काढण्यात येईल व संस्थेस आवश्यक असणारा निधी लवकरच उपलब्ध करुन देण्यात येईल. सारथी संस्थेच्या विकासासाठी मुख्यमंत्री देवेंद्र फडणवीस सकारात्मक असल्याचे त्यांनी यावेळी सांगितले.
सारथी संस्थेचे अध्यक्ष श्री. निंबाळकर यांनी संस्थेच्या स्थापनेपासून ते आजपर्यंत झालेल्या प्रगतीचा व संस्था राबवीत असलेल्या विविध उपक्रमांची माहिती दिली. यावेळी सारथी संस्थेचे संचालक मधुकर कोकाटे, उमाकांत दांगट, नवनाथ पासलकर, व्यवस्थापकीय संचालक अशोक काकडे, निबंधक संजीव जाधव आदी उपस्थित होते.

प्राचीन आणि आधुनिकतेचा संगम साधून छत्रपती संभाजी महाराज यांचे बलिदान स्थळ उभारावे-उपमुख्यमंत्री

पुणे, दि.२३: श्री क्षेत्र तुळापूर येथील स्वराज्य रक्षक धर्मवीर छत्रपती संभाजी महाराज यांचे बलिदान स्थळ प्राचीन आणि आधुनिकतेचा संगम साधून महाराजांचा गौरवशाली इतिहास जगासमोर येईल तसेच जगाला हेवा वाटेल अशा स्वरूपात उभारण्यात यावे, असे निर्देश उपमुख्यमंत्री अजित पवार यांनी दिले.

स्वराज्य रक्षक धर्मवीर छत्रपती संभाजी महाराज यांचे तुळापूर (ता. हवेली) येथील बलिदान स्थळ विकास कामांची त्यांनी पाहणी केली. याप्रसंगी आमदार ज्ञानेश्वर कटके, प्रभारी जिल्हाधिकारी तथा जिल्हा परिषदेचे मुख्य कार्यकारी अधिकारी संतोष पाटील, सार्वजनिक बांधकाम विभागाचे मुख्य अभियंता अतुल चव्हाण, अधीक्षक अभियंता बाप्पा बहीर, कार्यकारी अभियंता अमोल पवार, तुळापूरच्या सरपंच ॲड. गुंफा इंगळे, वढू बुद्रुकच्या सरपंच अंजली शिंदे आदी उपस्थित होते.

श्री. पवार म्हणाले, छत्रपती संभाजी महाराज यांचे बलिदान स्थळ विकासकामे करताना ऐतिहासिक दृश्यस्वरुपातील आणि दर्जेदार साहित्याचा वापर करावा. विकासकामे गुणवत्तापूर्ण, दर्जेदार, टिकाऊ आणि वेळेत पूर्ण होतील, याकडे लक्ष द्यावे. कोणतीही कामे प्रलंबित राहणार नाहीत, याबाबत दक्षता घ्यावी. विकासकामे करताना दगडी कातीव, कोरीव बांधकाम, मातीच्या वैविध्यपूर्ण विटा आदींचा वापर करत बांधकामाला मजबुती येईल अशा पद्धतींचा अवलंब करावा.

स्वराज्य रक्षक छत्रपती संभाजी महाराज यांचे बलिदान स्थळ व समाधी स्थळ स्मारक वढू (बु.) विकास आराखडा अंतर्गत दुसऱ्या टप्प्यातील एकूण २६४ कोटी रुपयाच्या कामाबाबत सादर करण्यात आलेल्या प्रस्तावास शासनस्तरावर बैठक घेऊन त्वरित मंजूरी देण्यात येईल. या कामांचे सविस्तर आराखडे व अंदाजपत्रक तयार करुन निविदा काढण्याची कार्यवाही करावी.

नदीच्या कडेला बांधकाम करताना नदीच्या नैसर्गिक प्रवाहाला कोणताही बाधा येणार नाही यासाठी सर्व पर्यावरणाच्या नियमांचे पालन करावे; तसेच नदीच्या अनुषंगाने लाल रेषा, निळी रेषाबाबतच्या अटींचे काटेकोर पालन करावे. परिसरात अधिकाधिक वृक्षारोपण करावे, अशा सूचना उपमुख्यमंत्री श्री. पवार यांनी दिल्या.

यावेळी श्री. पवार यांनी छत्रपती संभाजी महाराज समाधीस्थळ वढू बु. (ता. शिरुर) स्मारक विकास आराखड्याबाबत माहिती घेतली तसेच अधिकाऱ्यांना सूचना केल्या.

मुख्य अभियंता श्री. चव्हाण, अधीक्षक अभियंता श्री. बहीर आणि कार्यकारी अभियंता श्री. पवार यांनी सुरु असलेल्या विकासकामांबाबत माहिती दिली.
0000

पुणे : महाराष्ट्रीय कलोपासक आयोजित पुरुषोत्तम करंडक स्पर्धेच्या महाअंतिम फेरीचे लॉटस्‌‍ गुरुवार, दि. 26 डिसेंबर रोजी काढण्यात येणार असून स्पर्धेला शुक्रवार दि. 27 रोजी सुरुवात होणार आहे.
महाअंतिम स्पर्धा दि. 27 ते दि. 29 डिसेंबर 2024 या कालावधीत पुण्यात होणार आहे. अंतिम स्पर्धेत पोहोचलेले सर्व संघ शुक्रवारी (दि. 26) पुण्यात दाखल होणार आहेत. त्यानंतर स्पर्धेचे लॉटस्‌‍ काढण्यात येणार आहे. पुण्यासह अमरावती, रत्नागिरी, संभाजीनगर आणि कोल्हापूर विभागातील पारितोषिकप्राप्त एकांकिकांचे सादरीकरण होणार असून यातून महाअंतिम फेरीतील विजेता ठरणार आहे. महाअंतिम फेरी भरत नाट्य मंदिर येथे पाच सत्रात होणार आहे. दि. 27 आणि दि. 28 रोजी सकाळी 9 ते 1 आणि सायंकाळी 5 ते 9 आणि दि. 29 रोजी सकाळी 9 ते 1 या वेळात स्पर्धा होणार आहे. पारितोषिक वितरण सभारंभ दि. 29 डिसेंबर 2024 रोजी सायंकाळी 5 वाजता आयोजित करण्यात आला असून पारितोषिकांचे वितरण ज्येष्ठ अभिनेते मनोज जोशी यांच्या हस्ते होणार आहे.

पुणे / पिंपरी (दि.२३) : पुणे महानगर प्रदेश विकास प्राधिकरणाकडून नवले ब्रिज भागातील वाहतूक कोंडी रोखण्यासाठी सोमवारी (द‍ि.२३) न‍िष्कासनाची कारवाई करण्यात आली. सकाळी ७ वाजेच्या सुमारास अनधिकृतपणे उभारलेले २५ पत्राशेड गाळे काढून टाकण्यात आले. रहदारीचा व‍िचार करुन संबंध‍ितांसह इतरांनी सुद्धा अनधिकृत बांधकाम नये, असे आवाहन पीएमआरडीएच्या अध‍िकारी, कर्मचारी यांनी केले.

पीएमआरडीएच्या अनधिकृत बांधकाम निर्मुलन विभागाच्या वतीने गत काही द‍िवसांपासून अनधिकृत बांधकामांवर कारवाई होत असून संबंध‍ित बांधकामे न‍िष्कास‍ित करण्यात येत आहे. सोमवारी पीएमआरडीएच्या पथकाने नवले ब्रिज भागात सातत्याने होणारी वाहतूक कोंडी रोखण्यासाठी द‍िलीप दादा नवले, वैशाली दांगट, सारंग नवले, अतुल चाकणकर, व‍िकास नाना दांगट यांच्यासह आदींचे अनधिकृतपणे उभारलेले २५ पत्राशेड गाळे काढून टाकण्यात आले.

सदरीची कारवाई महानगर आयुक्त डॉ. योगेश म्हसे, पोलिस अधिक्षक तथा दक्षता अधिकारी अमोल तांबे यांच्या मार्गदर्शनाखाली सह आयुक्त डॉ. दीप्ती सूर्यवंशी-पाटील, उपजिल्हाधिकारी प्रमोद कुदळे, तहसीलदार सच‍िन म्हस्के, रविंद्र रांजणे, पोलीस न‍िरीक्षक महेशकुमार सरतापे, कनिष्ठ अभियंता विष्णू आवाड, गणेश जाधव, अभ‍िनव लोंढे यांच्यासह पोलीस कर्मचारी, अग्न‍िशमन व‍िभागाचे कर्मचारी यांनी केली. पीएमआरडीएच्या हद्दीतील अनधिकृत होर्डिंगसह बांधकामांचा सर्वे सुरु असून न‍िष्कासनाची कारवाई करण्यात येत आहे. मालमत्ताधारकांनी परवानगी घेवूनच बांधकामे करावीत, यासह चालू असलेली अनधिकृत बांधकामे तात्काळ थांबवावीत, असे आवाहन करण्यात येत आहे. नवले ब्रिज भागातील आजच्या कारवाईमुळे न‍िश्व‍ितच वाहतूक कोंडीचा प्रश्न मार्गी लागेल, असा व‍िश्वास पीएमआरडीएचे महानगर आयुक्त डॉ. योगेश म्हसे यांनी व्यक्त केला.

पुणे -प्रत्येक वर्षी २५ डिसेंबर हा दिवस “सुशासन दिन” म्हणून साजरा केला जात असून केंद्र शासनामार्फत जिल्ह्यात सुशासन सप्ताहाचे आयोजन करण्यात आले आहे.
१९ डिसेंबर ते २४ डिसेंबर २०२४ या कालावधीत हा सप्ताह साजरा करण्यात येत आहे. या अनुषंगाने आज २३ डिसेंबर २०२४ रोजी पुणे महानगरपालिकेमध्ये जुना जी. बी. हॉल मुख्य इमारत, तिसरा मजला या ठिकाणी परिसंवाद आणि प्रशिक्षणचे आयोजन करण्यात आले होते. या परिसंवादाला मा. आयुक्त राज्य सहकारी निवडणूक प्राधिकरण, महाराष्ट्र राज्य श्री. अनिल कवडे हे प्रमुख वक्ते म्हणून लाभले होते. “सुशासन” या विषयावर त्यांनी उपस्थितांना मार्गदर्शन केले.
यावेळी पुणे महानगरपालिकेच्या सह आयुक्त उल्का कळसकर, उप आयुक्त सामान्य प्रशासन प्रतिभा पाटील, उप आयुक्त संजय शिंदे, मुख्य कामगार अधिकारी नितीन केंजळे, उप आयुक्त परिमंडळ क्रमांक ४ जयंत भोसेकर, उप आयुक्त परिमंडळ क्रमांक ३ आशा राऊत, उप आयुक्त परिमंडळ क्रमांक ५ डॉ. चेतना करूरे, माहिती व तंत्रज्ञान प्रमुख, राहुल जगताप आणि इतर अधिकारी व कर्मचारी उपस्थित होते. कार्यक्रमाचे प्रास्ताविक उप आयुक्त राजीव नंदकर यांनी केले.
यावेळी बोलतांना अनिल कवडे यांनी पुणे महानगरपालिकेच्या विभाग प्रमुख आणि कर्मचाऱ्यांना स्थानिक पातळीवरील प्रशासन आणि सार्वजनिक सेवा वितरण सुधारण्यासाठी सुप्रशासन कशा पद्धतीने करता येऊ शकते याविषयी मार्गदर्शन केले. प्रशासन म्हणजे सेवा, सुविधा आणि लाभ यांचे मिश्रण आहे. यामध्ये सुलभता, पारदर्शकता आणि विश्वासार्हतेचे महत्व त्यांनी उपस्थितांना पटवून दिले. या सर्व सुविधा शाश्वत असायला हव्यात आणि पुणे महानगरपालिकेने सतत नागरिकांच्या दृष्टीने विचार करून योग्य त्या सेवा आणि सुविधा पुरवल्या पाहिजेत. असे ते यावेळी म्हणाले.
पुढे बोलतांना ते म्हणाले, प्रशासनात काम करत असतांना लोकांमध्ये मानवी मूल्य, चांगले विचार रुजवण्याची जबाबदारीही आपलीच असते. नागरिकांना सेवा, सुविधा पुरवत असतांना योग्य त्या माध्यमाचा वापर व्हायला हवा यासाठी सतत प्रयत्न केले पाहिजे. या सुविधा आणखी महानगरपालिकेच्या विभाग प्रमुख आणि कर्मचाऱ्यांना स्थानिक पातळीवरील प्रशासन आणि सार्वजनिक सेवा वितरण सुधारण्यासाठी सुप्रशासन कशा पद्धतीने करता येऊ शकते याविषयी मार्गदर्शन केले. प्रशासन म्हणजे सेवा, सुविधा आणि लाभ यांचे मिश्रण आहे. यामध्ये सुलभता, पारदर्शकता आणि विश्वासार्हतेचे महत्व त्यांनी उपस्थितांना पटवून दिले. या सर्व सुविधा शाश्वत असायला हव्यात आणि पुणे महानगरपालिकेने सतत नागरिकांच्या दृष्टीने विचार करून योग्य त्या सेवा आणि सुविधा पुरवल्या पाहिजेत. असे ते यावेळी म्हणाले. सुलभ करण्यासाठी तंत्रज्ञानाचा वापर केला पाहिजे. तसेच शासकीय अधिकाऱ्यांनी आत्मचिंतन
करून नागरिकाभिमुख विचार केले पाहिजे असेही ते म्हणाले. कार्यक्रमाचे सूत्रसंचालन सामान्य प्रशासन विभागाचे ऋषिकेश जगताप यांनी केले.

पुणे-

पुणे आंतरराष्ट्रीय विमानतळावरील जुन्या टर्मिनलवरुन होणारी सर्व उड्डाणे आता नव्या टर्मिनल वरून होणार असून याची अंमलबजावणी आजपासून करण्यात आली आहे, अशी माहिती केंद्रीय नागरी हवाई वाहतूक राज्यमंत्री मुरलीधर मोहोळ यांनी दिली. उड्डाणांसाठी आवश्यक असलेल्या तांत्रिक तयारीचा आढावा मंत्री मोहोळ यांनी विमानतळाच्या विविध विभागाच्या अधिकाऱ्यांकडून घेतला.

पुणे विमानतळावरील नवीन टर्मिनल काही महिन्यांपूर्वी सुरु करण्यात आले असून या टर्मिनलवरुन होणाऱ्या उड्डाणांची संख्या टप्प्याटप्प्याने वाढवण्यात आली आहे. मात्र इमिग्रेशनच्या यंत्रणेबाबतची निर्माणाधीन प्रक्रिया आता पूर्णत्वास गेली आहे. मंत्री मोहोळ यांनी या सर्व प्रक्रियेचा आढावा घेतला आणि तांत्रिक बाबींसंदर्भात माहितीही घेतली.

याबाबत माहिती देताना केंद्रीय मंत्री मोहोळ म्हणाले, ‘पुणे विमानतळावरुन आताच्या घडीला एकूण ३ मार्गांवरून ५ आंतरराष्ट्रीय उड्डाणे सुरु असून ही सर्व उड्डाणे नव्या टर्मिनलकडे स्थलांतरित करण्यात आली आहेत. आंतरराष्ट्रीय विमान प्रवासासाठी पुणेकर प्रवाशांसाठी आजवर जुनेच टर्मिनल वापरले जात होते, ज्यावर अद्ययावत सुविधांचा अभाव होता. आता मात्र आंतरराष्ट्रीय प्रवासाची सुरुवात सुखकर होणार आहे.’

‘इमिग्रेशन संदर्भातील तांत्रिक प्रक्रिया पूर्णत्वास नेऊन नवे टर्मिनल आंतरराष्ट्रीय प्रवासासाठी उपलब्ध करून देण्यात आले आहे. पुणे विमानतळाच्या विकासासाठी मोदी सरकार कटिबद्ध असून अद्ययावत सुविधा उपलब्ध करुन देण्याची मालिका अशीच अखंडित राहील’, असेही केंद्रीय मंत्री मोहोळ म्हणाले.

पुणे – मेट्रो च्या कामामुळे स्थलांतरित झालेले शिवाजीनगर एसटी स्थानक लवकरच पूर्वीच्या जागी उभे राहील, अशी माहिती आमदार सिद्धार्थ शिरोळे यांनी आज (सोमवारी) प्रसारमाध्यमांना दिली.

या स्थानकाच्या स्थलांतराबाबत उपमुख्य मंत्री अजित पवार यांच्यासमवेत सिद्धार्थ शिरोळे यांनी आज सविस्तर चर्चा सर्कीट हाऊसवर झालेल्या बैठकीत केली. एसटी स्थानकाचे स्थलांतर लवकरच मूळ जागी करावे, अशी विनंती शिरोळे यांनी, उपमुख्य मंत्री पवार यांना केली. लगेचच पवार यांनी परिवहन मंत्री प्रताप सरनाईक यांच्याशी फोनवर चर्चा केली. त्यानंतर एसटी स्थानक हलविण्याचे काम लवकर करण्याचे निर्देश महा मेट्रोच्या प्रशासनाला पवार यांनी दिले.

एसटी स्थानक स्थलांतर प्रकल्पाबाबत महाराष्ट्र राज्य परिवहन महामंडळ (एसटी) आणि महा मेट्रो (पुणे) यांच्यात करार अंतिम टप्प्यात असून, महा मेट्रो हे काम पूर्ण करणार आहे. हा प्रकल्प लवकर व्हावा, यासाठी दोन्ही बाजू प्रयत्न करणार आहेत, असे आमदार शिरोळे यांनी सांगितले.

हिंदू आध्यात्मिक सेवा संस्थेतर्फे आयोजित हिंदू सेवा महोत्सवाची संत संमेलनाने सांगता 
पुणे : छत्रपती शिवाजी महाराजांनी महाराष्ट्र धर्म टिकवला आणि वाढविला. त्याच महाराष्ट्रात संत चरणांचे आशीर्वाद मिळणे हे प्रत्येकाचे भाग्य आहे. पैसा, अपत्य किंवा लॉटरी हे भाग्य नाही. संत दर्शन हेच खरे भाग्य आहे. आपल्याकडे प्रत्येकाची प्रार्थना पद्धती वेगळी असली तरी धर्म व देशाप्रती भाव असायला हवा, असा सूर संत संमेलनात उमटला. 
हिंदू आध्यात्मिक सेवा संस्थेतर्फे हिंदू सेवा महोत्सवाचे आयोजन स.प.महाविद्यालयाच्या मैदानावर करण्यात आले होते. याचा समारोप संत संमेलनाने झाला. यावेळी नाशिकच्या महंत वेणा भारती, ह.भ.प.चिदंबरम महाराज साखरे, कीर्तनकार गणेश महाराज भगत, इस्कॉन चे बलभद्रकृपा प्रभू, रासपती प्रभू, परमात्मा प्रभू, हिंदू आध्यात्मिक सेवा संस्थेचे राष्ट्रीय संयोजक गुणवंत कोठारी, संस्थेचे अध्यक्ष अशोक गुंदेचा, संस्थेचे महामंत्री किशोर येनपुरे, उपाध्यक्ष पंडित शिवकुमार श्री, इस्कॉनचे संजय भोसले, स्वामीनारायण मंदिरचे राधेश्याम अग्रवाल, चरणजितसिंग सहानी, श्रीमंत दगडूशेठ हलवाई सार्वजनिक गणपती ट्रस्टचे महेश सूर्यवंशी आदी उपस्थित होते.
वेणा भारती म्हणाल्या, विश्वाला एकत्र करण्याची मोहीम भारताने मांडली आहे. पुण्यातील महोत्सवात असेच कार्य झाले असून येथे मठ मंदिरांचे साधू संत यांचे दर्शन झाले. अध्यात्म ही वीरश्री असून महाबळ वाढविणारी आहे. अध्यात्म्यात स्वतःची ओळख करून परमेश्वरापर्यंत ते आपल्याला पोहोचवत असते.  
चिदंबरम महाराज साखरे म्हणाले, महाराष्ट्रात असे महोत्सव होणे गरजेचे आहे. पुढील १० ते १५ वर्षात कीर्तन परंपरा चालेल की नाही, अशी शंका काहींना वाटत होती. मात्र अशा महोत्सवातून विश्वास निर्माण होत आहे. तसेच आपल्या परंपरेची ओळख देखील होत आहे. 
बलभद्रकृपा प्रभू म्हणाले, परमेश्वराकडे पाठ फिरवली तर आपण अधर्मि होऊ आणि दुःख सुरु होईल. साधू संतांचे हेच काम आहे की अशा लोकांना परमेश्वराशी जोडणे. त्याकरिता गीता, भागवत वाचन आणि नामजप रोज करायला हवे. आपण परमेश्वराला मार्गदर्शक बनविले, तरच योग्य दिशेला जाऊ शकतो. 
कृष्णकुमार गोयल म्हणाले, देवस्थानाच्या सामाजिक कार्यातून सर्वाना प्रेरणा मिळेल. सेवा, कर्तव्य, त्याग याची महती महोत्सवात पाहायला मिळाली, असेही ते म्हणाले. अशोक गुंदेचा म्हणाले, धर्मावर विश्वास व एकता वाढविणे यासाठी महोत्सवाच्या माध्यमातून प्रयत्न करण्यात आला. शालेय मुला-मुलींमध्ये संस्कार रुजावे, याकरिता देखील अनेक उपक्रम राबविण्यात आले होते. धर्माबद्दल सर्वांच्या मनात प्रेम वाढविणे हाच उद्देश होता, असेही त्यांनी सांगितले. किशोर येनपुरे यांनी सूत्रसंचालन केले. 

लोढा जिनियस प्रोग्राम आणि अशोका विद्यापीठाची भागीदारी;  9 वी ते 12 वीच्या हुशार विद्यार्थ्यांसाठी अर्ज प्रक्रिया सुरू· ‘व्हॉट अनलॉक्स युअर जिनियस?’ या डिजिटल कॅम्पेनची सुरुवात· कुटुंबाकडून मिळालेल्या ₹20,000 कोटींच्या निधीनंतर लोढा फाऊंडेशनचा उपक्रम अधिक व्यापक

 पुणे : लोढा फाउंडेशनच्या नुकत्याच स्थापन झालेल्या लोढा जिनियस प्रोग्रामतर्फे अशोका विद्यापीठाच्या भागीदारीने 9वी ते 12वीच्या हुशार विद्यार्थ्यांसाठी पूर्णतः प्रायोजित बहुवर्षीय शैक्षणिक कार्यक्रमासाठी अर्ज मागविण्यात आले आहेत. अर्ज प्रक्रिया 1 डिसेंबर 2024 पासून 15 जानेवारी 2025 पर्यंत सुरू राहणार आहे. अभिषेक लोढा आणि त्यांच्या कुटुंबाने लोढा फाउंडेशनला दिलेल्या निधीनंतर लगेच हा उपक्रम जाहीर करण्यात आला आहे. लोढा जिनियस प्रोग्राम हा बहुवर्षीय उपक्रम आहे, ज्यामध्ये दरवर्षी अशोका विद्यापीठात चार आठवड्यांचा कॅम्पस अनुभव आणि वर्षभर सुरू राहणारे शिक्षण यांचा समावेश आहे. हा कार्यक्रम सर्व प्रमुख परीक्षा मंडळांशी सुसंगत आहे आणि विद्यार्थ्यांना त्यांच्या अभ्यास अधिक सखोल करण्यास व निवडलेल्या क्षेत्रात करिअरच्या विविध मार्गांचा शोध घेण्यास याची मदत होते. या उपक्रमात सखोल विज्ञान व गणिताचे अभ्यासक्रम, उपयुक्त जीवनकौशल्ये, सातत्यपूर्ण मार्गदर्शन, आणि विशेष इंटर्नशिप या संधींचा समावेश आहे. हा कार्यक्रमांतर्गत नोबेल पुरस्कार विजेत्यांसह नामांकित शिक्षणतज्ज्ञांचा सहभाग असून विद्यार्थ्यांना माध्यमिक शाळेपासून त्यांच्या पहिल्या नोकरीपर्यंत मदत करण्यात येते. काही निवडक विद्यार्थ्यांना अमेरिकेत शिक्षण घेण्यासाठी किंवा आंतरराष्ट्रीय STEM कार्यक्रमांमध्ये सहभागी होण्यासाठी शिष्यवृत्ती संधी देखील उपलब्ध करून दिल्या जातात. या कार्यक्रमावर प्रतिक्रिया देताना लोढा फाउंडेशनच्या हेड ऑफ एज्युकेशन महिका शिशोदिया म्हणाल्या, “लोढा जिनियस प्रोग्रॅम हा नव्यानेच स्थापन करण्यात आलेल्या लोढा फाउंडेशनचा फ्लॅगशिप कार्यक्रम आहे. भारतभरातील विशेष प्रतिभावान मुलांसाठी, त्यांच्या उत्पन्नाच्या पार्श्वभूमीची पर्वा न करता, शिक्षणाचा दर्जा उंचावणे हा या कार्यक्रमाचा मुख्य उद्देश आहे. मुलांचे मूल्यमापन एका प्रवेश परीक्षेद्वारे केले जाते. या परीक्षेत विशिष्ट अभ्यासक्रमावर न भर देता वैज्ञानिक तर्कशक्ती, गणित आणि लॉजिक यावर या परीक्षेत भर देण्यात येतो. त्यानंतर त्यांच्या समस्या-निवारणाच्या क्षमतेनुसार आम्ही विद्यार्थ्यांची निवड करतो आणि प्रतिभावान विद्यार्थी निश्चित करण्यासाठी त्यांची मुलाखत घेतो आणि त्यांना ‘जिनियस’ म्हणतो. या कार्यक्रमाच्या तिसऱ्या वर्षात या प्रतिभावान विद्यार्थ्यांना वेगाने प्रगती करण्यासाठी सुयोग्य व्यक्तींशी संपर्क साधून देतो, संधी आणि आयडिया उपलब्ध करून देतो. उद्याचे परिवर्तनकर्ते, नेतृत्व आणि समाजसेवकघडवणे हा लोढा जिनियस कार्यक्रमाचा उद्देश आहे; असे विद्यार्थी जे भारताला शाश्वत भविष्याकडे नेतील आणि राष्ट्र व समाजाच्या विकासासाठी योगदान देतील. “लोढा जिनियस प्रोग्राम हा कठोर शैक्षणिक अध्ययन, मार्गदर्शन आणि वास्तविक जगातील अनुभव यांचा अनोखा संगम आहे. लोढा फाउंडेशनसोबत या उपक्रमात सहभागी होताना आम्हाला अभिमान वाटतो. हा उपक्रम यंदा अधिक पुढे नेऊन शिक्षण क्षेत्र व समाजासाठी महत्त्वपूर्ण योगदान देण्याचे आमचे ध्येय आहे. गेल्या वर्षापासून भारतातील हुशार विद्यार्थ्यांचा मोठ्या प्रमाणावर सहभाग पाहायला मिळत आहे. ही भागीदारी म्हणजे शिक्षणाच्या माध्यमातून भारताचे भविष्य घडवण्याच्या आमच्या सामूहिक बांधिलकीचे प्रतीक आहे,” असे अशोका विद्यापीठाचे कुलगुरू सोमक रायचौधरी यांनी सांगितले. अशोका विद्यापीठाच्या सायन्स अॅडव्हायजरी कौन्सिलचे अध्यक्ष प्रो. के. विजयराघवन म्हणाले, “लोढा जिनियस प्रोग्राम हा केवळ एखाद्या सामान्य उन्हाळी कार्यक्रमापुरता मर्यादित नाही. तो एक सर्वसमावेशक आणि नावीन्यपूर्ण शैक्षणिक उपक्रम आहे. अशोकामधील आकर्षक उन्हाळी उपक्रमाच्या अनुभवासोबतच, या कार्यक्रमाच्या माध्यमातून वर्षभर सखोल शिक्षण, मार्गदर्शन आणि विकासाच्या संधी उपलब्ध होतात. अशोका विद्यापीठ आणि लोढा फाउंडेशन यांची भागीदारी शिक्षणाच्या माध्यमातून भारतातील भविष्यातील नेतृत्व आणि परिवर्तनकर्त्यांना सक्षम बनवण्याच्या आमच्या सामूहिक वचनबद्धतेचे प्रतीक आहे.” संपूर्ण कोर्स आणि त्यातील उपक्रमांचा सर्व खर्च लोढा फाउंडेशन उचलत असल्यामुळे विद्यार्थ्यांवर, त्यांच्या पालकांवर किंवा शाळांवर कोणताही आर्थिक भार येत नाही.देशभरातील प्रतिभावंत मुलांना सहभागी होण्याची संधी मिळावी यासाठी लोढा फाउंडेशनने ‘व्हॉट अनलॉक्स युअर जिनियस?’ या नावाने एक डिजिटल कॅम्पेन सुरू केले आहे. हे कॅम्पेन पालक, विद्यार्थी, शाळा, शिक्षक (प्रशिक्षक, मार्गदर्शक इ.) आणि सरकारी शिक्षण मंडळांवर लक्ष केंद्रित करते. कॅम्पेनच्या व्हिडिओमध्ये या अनोख्या कार्यक्रमाची झलक पाहायला मिळते आणि तो यूट्यूब व इंस्टाग्रामवर पाहता येऊ शकतो. हा कॅम्पेनमध्ये ‘व्हॉट अनलॉक्स युअर जिनियस? > पीपल, अपॉर्च्युनिटीज अँड आयडियाज’ या संदेशावर भर देण्यात आला आहे. कार्यक्रमाची रूपरेषा· पात्रता : मे 2025 पर्यंत 9वी ते 12वीमधील विज्ञान आणि गणितातील असामान्य कामगिरी केलेले विद्यार्थी.· स्थळ : अशोका विद्यापीठ, सोनीपत येथे वार्षिक कॅम्पस अनुभव, तसेच ऑनलाइन आणि ऑफलाइन माध्यमातून सुरू राहणारे शिक्षण.· महत्त्वाच्या तारखा: अर्ज प्रक्रिया 1 डिसेंबर 2024 पासून 15 जानेवारी 2025 पर्यंत | कॅम्पस अनुभव मे 2025 च्या मध्यापासून जून 2025 च्या मध्यापर्यंत.· शुल्क: विद्यार्थ्यांच्या कार्यक्रमाचा सर्व खर्च पूर्णतः प्रायोजित.· अध्ययन निष्पत्ती : सखोल आणि बहुविषयक शिक्षणाद्वारे विज्ञान आणि गणिताच्या क्षितिजाचा विस्तार. · अर्जासाठी भेट द्या : www.lodhageniusprogramme.com