मुंबई, : पुणे शहरात दळणवळण गतिमान करण्यासाठी येरवडा ते कात्रज भुयारी मार्ग तयार करावा. हा भुयारी मार्ग ‘ट्वीन टनल’ पद्धतीचा असावा. यासाठी नवीन तंत्रज्ञानाचा उपयोग करावा. याबाबतचा प्रस्ताव तातडीने सादर करण्यात यावा, असे निर्देश मुख्यमंत्री देवेंद्र फडणवीस यांनी पुणे महानगर प्रदेश विकास प्राधिकरणाच्या सह्याद्री अतिथीगृह येथे काल (दि. १२)झालेल्या बैठकीत दिले. पुणे महानगर प्रदेश विकास प्राधिकरणाची बैठक त्यांच्या अध्यक्षतेखाली पार पडली.

प्रस्तावित नवीन पुरंदर विमानतळ रस्ते जाळ्यांसाठी 636.84 कोटी, रांजणगाव आणि हिंजवडी औद्योगिक क्षेत्रातील सिमेंट रस्त्यांसाठी बैठकीत २०३ कोटी रुपयांचा निधी मंजूर करण्यात आला. ‘अर्बन ग्रोथ सेंटर’ करीता रस्त्यांचे जाळे तयार करण्यासाठी 1526 कोटी रुपयांची तरतूद करण्यात आली. पुणे शहर वळण मार्ग, पुणे सातारा आणि पुणे नगर रस्त्यापासून पुरंदर विमान तळाला चांगली ‘ कनेक्टिव्हिटी ‘ तयार करण्याचे निर्देशही मुख्यमंत्री फडणवीस यांनी दिले.

नवीन शहर करताना रस्ते 18 मीटर रुंदीचे करावे. भविष्यातील लोकसंख्येचा विचार करीत पायाभूत सुविधांचा अंतर्भाव करावा. प्रदेश विकास प्राधिकरणाने पिण्याच्या पाण्यासाठी पाणीपुरवठा योजनांची कामे तातडीने पूर्ण करावी. प्राधिकरणांनी अद्ययावत संकेतस्थळ सुरू करावे. संकेतस्थळावरून जास्तीत जास्त ऑनलाईन सुविधा देण्यात याव्यात. विकास शुल्क नागरिकांना परवडेल अशा पद्धतीने ठेवण्याच्या सूचनाही मुख्यमंत्री फडणवीस यांनी दिल्या.

मुख्यमंत्री म्हणाले, विकास योजना तयार करताना लागत असलेला कालावधी लक्षात घेता प्राधिकरणांनी विकास योजना दोन टप्प्यात करावी. पहिल्या टप्प्यात रस्ते, मलनिस्सारण, पाणीपुरवठा, विज पुरवठा, स्मशान भूमी, दफन भूमी आदींचा समावेश असावा. त्यानंतर दुसऱ्या टप्प्यात अन्य सुविधांचा समावेश करावा.

सह्याद्री अतिथीगृहात झालेल्या पुणे महानगर प्रदेश विकास प्राधिकरणाच्या बैठकीला उपमुख्यमंत्री अजित पवार, उच्च व तंत्र शिक्षण मंत्री चंद्रकांतदादा पाटील, नगर विकास राज्यमंत्री माधुरी मिसाळ, पुणे महानगर प्रदेश विकास प्राधिकरणाचे महानगर आयुक्त डॉ. योगेश म्हसे आदींसह अधिकारी उपस्थित होते.

प्राधिकरणांना आवश्यकतेनुसार आकृतीबंध मंजूर करून देण्यात आलेला आहे. सध्या प्रतिनियुक्तीवर पदभरती करून या नियुक्त्या नियमित करून घ्याव्यात. प्राधिकरणांना विकासात्मक कामांचे नियोजन करण्यासाठी उपलब्ध असलेली शासकीय जमीन विनामूल्य देण्याचा निर्णयही बैठकीत घेण्यात आला.

विकास योजनेत रस्ते 18 मीटर रुंदीचे करण्यासाठी नियमात बदल करण्याच्या सूचना करीत मुख्यमंत्री फडणवीस म्हणाले, विकास योजनांचे नियोजन करताना चांगल्या दर्जाची सल्लागार एजन्सी नियुक्त करावी. प्राधिकरणांनी भविष्यातील लोकसंख्येचा विचार करता पाण्याचा पुनर्वापर करण्यावर भर द्यावा, यासाठी नवनवीन तंत्रज्ञानाचा उपयोग करीत प्रकल्प कार्यान्वित करावे. पाण्याचे उपलब्धता बघूनच बांधकाम परवानगी देण्यात यावी.

मुख्यमंत्री म्हणाले, पुणे महानगर परिवहन महामंडळाला प्राधिकरणाने बसेस देताना त्यांच्याकडील मनुष्यबळ, दुरुस्तीची व्यवस्था आणि लोकसंख्येचा विचार करावा. सुरुवातीला पुणे महामंडळाला इलेक्ट्रिक बसेस दिल्या होत्या. या बसेसमुळे अत्यंत कमी दरात नागरिकांना वातानुकूलित प्रवास करता आला. महामंडळांने प्राधिकरणाकडे ५०० बसेसची मागणी केली आहे. या बसेस सीएनजी असाव्यात. भविष्यात कुठल्याही प्रकारे व्यवस्थापनाचा प्रश्न येणार नाही, याची काळजी घ्यावी. पुणे राजभवन आवारातील जागा मेट्रोच्या उड्डाणपूल सेवेसाठी देण्याची कारवाई तातडीने पूर्ण करावी.

पुणे: “कथा, कादंबऱ्या आणि कवितांमध्ये दुःख व्यक्त करता येते, पण तुम्ही जे दुःख जगता, ते वेगळेच असते. शोषित, पीडित आणि दुःखी व्यक्तींसाठी अहोरात्र झटणाऱ्या समाजसेवकांचे कार्य दीपस्तंभासारखे आहे,” असे प्रतिपादन ज्येष्ठ लेखिका डॉ. माधवी वैद्य यांनी केले.

मानव्य संस्थेच्या संस्थापिका कर्मयोगिनी कै. विजयाताई लवाटे यांच्या २०व्या स्मृतिदिनानिमित्त आयोजित पुरस्कार सोहळ्यात ‘कर्मयोगिनी कै. विजयाताई लवाटे पुरस्कार’ डॉ. इरा शहा (एम.डी. पेडियाट्रिक्स) आणि ‘कै. डॉ. अरुंधती सरदेसाई स्मृती पुरस्कार’ स्वयंप्रेरित संस्थेचे संस्थापक अध्यक्ष संतोष पवार यांना प्रदान करण्यात आला. भांडारकर इन्स्टिट्यूटमधील नवलमल फिरोदिया सभागृहात मंगळवारी झालेल्या या कार्यक्रमात डॉ. माधवी वैद्य यांच्या हस्ते पुरस्कार वितरण करण्यात आले.

कर्मयोगिनी कै. विजयाताई लवाटे पुरस्काराच्या विजेत्यांना रुपये १५,००० रोख, स्मृतिचिन्ह, शाल आणि श्रीफळ, तर कै. डॉ. अरुंधती सरदेसाई स्मृती पुरस्कारासाठी रुपये १०,००० रोख, स्मृतिचिन्ह, शाल आणि श्रीफळ असे पुरस्काराचे स्वरूप होते. यंदा कै. डॉ. अरुंधती सरदेसाई स्मृती पुरस्काराचे पहिले वर्ष होते.

कार्यक्रमाच्या अध्यक्षस्थानी मानव्य संस्थेचे अध्यक्ष शिरीष लवाटे होते. यावेळी संस्थेचे विश्वस्त डॉ. गिरीश कुलकर्णी, विनया देसाई आणि अन्य मान्यवर उपस्थित होते.

यावेळी बोलताना डॉ. माधवी वैद्य म्हणाल्या, “दुसऱ्याच्या दुःखाचा शोध घेऊन त्यांच्या आयुष्यासाठी कार्य करणे हे सोपे काम नाही. स्वतःच्या अस्तित्वाचा विसर पाडून तुम्ही समाजसेवेत झोकून देता, ही बाब प्रेरणादायी आहे. आमच्यात दुसऱ्याच्या दुःखात आनंद शोधण्याची क्षमता नाही; आम्ही फक्त संवेदना व्यक्त करू शकतो. विजयाताईंच्या कार्यातून माणसांमधील देवत्व पाहण्याची दृष्टी मिळते. त्यामुळे समाजाने त्यांच्या कार्याला हातभार लावला पाहिजे.”

सत्काराला उत्तर देताना डॉ. इरा शहा म्हणाल्या, “जीवन आनंदाने जगावे. भविष्याची चिंता करत राहिल्यास वर्तमानाचा आनंद घेता येत नाही. २००१ मध्ये मी वैद्यकीय क्षेत्रात कार्य सुरू केले. एड्सबाबत जनजागृती नव्हती, औषधे नव्हती, पण आज संशोधनामुळे हा आजार नियंत्रणात आला आहे. मात्र, समाज आजही एड्सग्रस्तांना स्वीकारायला तयार नाही, ही खंत आहे.”

संतोष पवार यांनी सांगितले, “हा पुरस्कार माझ्या कार्याला आणि संस्थेला मिळालेला सन्मान आहे. यामुळे आमच्या कार्याला नवे बळ मिळेल. स्वयंप्रेरित संस्थेच्या माध्यमातून आम्ही गेली २५ वर्षे एड्सग्रस्त व गरजू विद्यार्थ्यांच्या पुनर्वसनासाठी झटत आहोत. या प्रवासात अनेक अडचणी आल्या, पण समाजाच्या पाठिंब्यामुळे आम्ही पुढे जात आहोत.”

डॉ. गिरीश कुलकर्णी यांनी सांगितले, “विजयाताईंच्या कार्यामुळे आम्हाला नवी चेतना मिळते. मानव्य आणि स्नेहालय संस्था त्यांच्याच प्रेरणेने कार्यरत आहेत. त्यांच्या स्वप्नातील कार्य पूर्ण करण्यासाठी आम्ही कटिबद्ध आहोत.”

अध्यक्षीय भाषणात शिरीष लवाटे म्हणाले, “मानव्य संस्थेच्या माध्यमातून मुलांसाठी आणि महिलांसाठी विविध उपक्रम राबवले जातात. संस्कारक्षम पिढी घडवण्यासाठी विशेष प्रयत्न करणे गरजेचे आहे. ‘माहेरवासिमाहेरवाशीणीनी’साठी ‘नवांकुर’ उपक्रम सुरू केला जाणार आहे.”

कार्यक्रमाचे सूत्रसंचालन विनया देसाई यांनी केले, तर आभार प्रदर्शन ढवळे यांनी केले.

पुरस्कार विजेते आणि त्यांचे कार्य डॉ. इरा शहा – बी.जे. वाडिया हॉस्पिटल फॉर चिल्ड्रन, मुंबई येथे बाल संसर्गजन्य आजार आणि यकृत-गॅस्ट्रो विभागाच्या प्रमुख, तसेच नानावटी हॉस्पिटलमध्ये सल्लागार.

संतोष पवार – संगमनेर येथे स्वयंप्रेरित संस्था स्थापन करून गरीब, गरजू व एचआयव्ही संसर्गित विद्यार्थ्यांसाठी शिक्षण व पुनर्वसन कार्य. ते व त्यांच्या पत्नीने गेली २५ वर्षे शाळेत राहून विद्यार्थ्यांच्या आरोग्य व शिक्षणाची जबाबदारी सांभाळली.

विवेकानंद इन्स्टिट्यूट ऑफ टेक्नॉलॉजीचे पद्मभूषण डॉ. वसंतदादा पाटील कॉलेज ऑफ आर्किटेक्चर तर्फे आयोजन

पुणे: विवेकानंद इन्स्टिट्यूट ऑफ टेक्नॉलॉजी, पद्मभूषण डॉ. वसंतदादा पाटील कॉलेज ऑफ आर्किटेक्चरच्या वतीने आर्किटेक्चर महाविद्यालयाच्या आंतरमहाविद्यालयीन स्पोर्ट्स लीग शिअरफोर्सचे आयोजन करण्यात आले आहे. या स्पोर्ट्स लीगमध्ये फुटबॉल, बास्केटबॉल आणि व्हॉलीबॉल स्पर्धा होणार आहेत. वानवडी येथील एस.आर.पी. एफ. मैदानावर दिनांक १४ ते १६ फेब्रुवारी दरम्यान या स्पर्धा होणार आहेत, अशी माहिती विवेकानंद  इन्स्टिट्यूट ऑफ टेक्नॉलॉजीचे सचिव जितेंद्र पितळीया आणि प्राचार्य प्रसन्न देसाई यांनी दिली.

यावेळी अध्यक्ष अभय छाजेड, क्रीडा संघ सदस्य समीक्षा वानवे, सनी गुंजाळ, ऋचा बाणकर, पायल जयस्वाल, प्रथम चांडक, कार्तिक हादके, नमन पारेख, आदित्य पवार, कर्ण तोरस्कर, कविता ताजने उपस्थित होते.

बास्केटबॉल, फुटबॉल आणि व्हॉलीबॉल या स्पर्धांमध्ये १८ ते २३ या वयोगटातील सुमारे ६०० पेक्षा अधिक विद्यार्थी खेळाडू खेळणार आहेत. यामध्ये मुलांचे आणि मुलींचे एकूण ४३ संघ सहभागी होतील. स्पर्धेचे उद्घाटन १४ फेब्रुवारी रोजी सकाळी १० वाजता होणार आहे आणि पारितोषिक वितरण समारंभ दिनांक १६ फेब्रुवारी रोजी होणार आहे.

स्पर्धेमध्ये पुण्यातील १४ वास्तुकला महाविद्यालयातील संघाचा समावेश आहे. यामध्ये  मराठवाडा मित्रमंडळ कॉलेज ऑफ आर्किटेक्चर (एम.एम. सी. ओ. ए.) , डाॅ. ज्ञानदेव यशवंतराव पाटील  स्कूल ऑफ आर्किटेक्चर, आकुर्डी (डी. वाय. पी. सी. ओ. ए.), डाॅ. ज्ञानदेव यशवंतराव पाटील कॉलेज ऑफ आर्किटेक्चर, लोहेगाव (डी. वाय. पी. सी. ओ. ए.), भानूबेन नानावटी कॉलेज ऑफ आर्किटेक्चर (बी. एन. सी. ए.), अलाना कॉलेज ऑफ आर्किटेक्चर (ए. सी. ओ. ए.),  डाॅ. ज्ञानदेव यशवंतराव पाटील कॉलेज ऑफ आर्किटेक्चर (डी. वाय. पी. सी. ओ. ए.), ब्रिक स्कूल ऑफ  आर्किटेक्चर (बी. एस. ओ. ए.), आयोजन स्कूल ऑफ डीझाईन (ए. एस. ए. डी.) , भारती विद्यापीठ डीम्ड युनीव्हर्सिटी  कॉलेज ऑफ  आर्किटेक्चर (बी. व्ही. डी. यू.), सिंहगड कॉलेज ऑफ आर्किटेक्चर (एस. सी. ओ. ए.),एस. बी. पाटील कॉलेज ऑफ आर्किटेक्चर पिंपरी चिंचवड (एस.बी.पी. सी.ओ.ए.),मराठवाडा मित्र मंडळ इन्स्टिट्यूट ऑफ एन्विरॉन्मेंटल डिझाईन,डी.वाय.पी.सी.ई.टी. कोल्हापूर,श्रीमती काशीबाई नवले कॉलेज ऑफ आर्किटेक्चर,पद्मभूषण डॉ. वसंतदादा पाटील कॉलेज ऑफ आर्किटेक्चर (पी. व्ही.पी. सी. ओ. ए.)आदी महाविद्यालये स्पर्धेत सहभागी होणार आहेत.

पुणे:  अनास इंडिया द्वारे आयोजित अखिल भारतीय १६ व्या राष्ट्रीय सांस्कृतिक नृत्य स्पर्धेत नृत्य दर्पण या नृत्य प्रकारात ध्रुव ग्लोबल स्कूलची पाचवी ची विद्यार्थीनी मायरा मुतागीने प्रथम क्रमांक पटकावला.
या यशाबद्दल ध्रुव ग्लोबल स्कूलचे संचालक यशवर्धन मालपाणी व प्रिन्सिपल संगीता राउत यांनी भावी जीवनासाठी शुभेच्छा दिल्यात.
मायराच्या पायातील घंगरुचा आवाज आणि चेहर्‍यावरील सुंदर स्मित हास्याने उपस्थितांच्या मनाचा ठाव घेतला. नृत्यांगणा मायराचे घुंगरू आणि स्मित हास्य दोन्ही एकाच सुरात डोलत होते. ती आपल्या नृत्यातून सुंदर झंकार निर्माण करीत होती. सूर, लय, वेग, मुद्रा प्रत्येक अभिव्यक्तीमध्ये तीची एक लय होती. उत्कृष्ट सादरीकरणाबरोबरच तीचे नृत्य एक अदभूत संयोजन आणि अभिव्यक्ती असून याच जोरावर तीने प्रथम क्रमांक पटकाविला. मायरा मुतागीने भारतीय शास्त्रीय ओडिसी नृत्य प्रकारातील कनिष्ठ वयोगटातील एकल नृत्यात भाग घेऊन प्रथम क्रमांक पटकावला. तसेच तिला सत्रातील सर्वोत्कृष्ट कलाकार म्हणूनही गौरविण्यात आले.
तीने शुभश्री राऊतराय यांच्या मार्गदर्शनाखाली नृत्याची तयारी केली होती.

पुणे- दगदगीच्या आणि धावपळीच्या आयुष्यातून विरंगुळा म्हणून किंवा थोडे थांबून पुन्हा स्फूर्ती मिळावी म्हणून पोलिसांसाठी पुनीत बालन ग्रुप ने तरंग-२०२५ हा मनोरंजनपर कार्यक्रम आयोजित केला आहे.

पुणे शहर पोलीस आयुक्तालय अंतर्गत पोलीस दलामध्ये कार्यरत असलेल्या पोलीस अधिकारी व अंमलदार हे सतत विविध बंदोबस्त, निवडणुका, मोर्चे, अधिवेशन, इ. कर्तव्यावर तैनात असल्याने पोलीस अधिकारी/अंमलदार समवेत त्यांचे कुटूंबिय देखील ताणतणावामध्ये असतात मागील २०२४ हे वर्षे लोकसभा/विधानसभा निवडणुका विविध महत्वाचे बंदोबस्त, व्हिव्हिआयपी दौरे यामध्ये व्यस्त गेल्याने पोलीस अधिकारी व अंमलदार यांना त्यांच्या कुटुंबियासोबत आनंदाचे क्षण व्यतित करता यावेत व उत्साहाचे वातावरण मिळावे यासाठी पोलीस आयुक्त पुणे शहर यांचे संकल्पनेतुन तरंग-२०२५ हा मनोरंजनपर कार्यक्रम दि.१५/०२/२०२५ रोजी सांय.०५/३० ते १०/०० वा.चे पर्यत पोलीस मुख्यालय शिवाजीनगर पुणे येथे आयोजित करण्यात आलेला आहे. सदर कार्यक्रमाचे प्रायोजक पुनित बालन (पुनित बालन ग्रुप) हे आहेत.

तरंग-२०२५ या कार्यक्रमास प्रमुख पाहुणे म्हणून मुख्यमंत्री देवेंद्र फडणवीस, उप मुख्यमंत्री अजितदादा पवार, केंद्रीय राज्यमंत्री, सहकार व नागरी विमान वाहतूक,मंत्री चंद्रकांत (दादा) पाटील, माधुरी मिसाळ,इतर मान्यवर उपस्थित राहणार असुन सदर कार्यक्रमांतर्गत ‘अजय अतुल लाईव्ह’ संगीत रजनी हा मनोरंजनपर कार्यक्रम ठेवण्यात आलेला असुन बॉलिवुड व मराठी सिने सृष्टीतील कलाकार उपस्थित राहणार आहेत. या कार्यक्रमास पुणे शहरातील सर्व शांतता कमिटी / मोहल्ला कमिटी सदस्य व इतर महत्वाचे व्यक्ती तसेच सर्व प्रिंट व इलेक्ट्रानिक मिडीयाचे संपादक व प्रतिनिधी यांना देखील आमंत्रित करण्यात आले आहे.

पुणे, १२ फेब्रुवारी: पुण्यातील लोकप्रिय युवा सामाजिक कार्यकर्ते आणि माजी नगरसेवक सनी विनायक निम्हण यांच्या वाढदिवसानिमित्त सोमेश्वर फाउंडेशनच्या वतीने १५ ते २३ फेब्रुवारी २०२५ या कालावधीत “सुपर सनी विक” या क्रीडा महोत्सवाचे आयोजन करण्यात आले आहे. पत्रकार परिषदेत अधिक माहिती देताना सोमेश्वर फाउंडेशनचे आणि या स्पर्धांचे मुख्य समन्वयक प्रताप जाधव यांनी सांगितले की गुणवान व उदयोन्मुख खेळाडूंना प्रोत्साहन देण्यासाठी सनी विनायक निम्हण यांच्या वाढदिवसानिमीत्त या क्रीडा महोत्सवाचे आयोजन करण्यात आले आहे. व्यसनमुक्तीचा संदेश समाजामध्ये देण्यासाठी, तरुणांमध्ये व्यायामाची आवड निर्माण करणे या उद्देशाने या स्पर्धा होणार असल्याचे समन्वयक उमेश वाघ यांनी सांगितले.
या सप्ताहात पुणे व पिंपरी चिंचवड शहरास जोडणारी, व्यसनमुक्तीचा संदेश देणारी पुणे ट्वीन सिटी मॅरेथॉन, रन फॉर अमृतकाल स्पर्धेचे आयोजन पुणे जिल्हा हौशी ॲथलेटिक संघटनेच्या मान्यतेने व सहकार्याने रविवार, २३ फेब्रुवारी रोजी करण्यात आले आहे. शिक्षणाचे माहेर घर असलेले पुणे शहर व औद्योगिक क्रांतीचे प्रतिनिधित्व करणारे पिंपरी चिंचवड यांच्यातील सहकार्य व सामंजस्यचा दुवा दर्शवणारी ही स्पर्धा असेल.
ही मॅरेथॉन स्पर्धा २१ किमी, १० किमी, ५ किमी आणि ३ किमी प्रकारात होणार आहे. महाळुंगे – बालेवाडी येथील श्री शिवछत्रपती क्रीडा संकुलमध्ये पहाटे ५ वाजता सुरू होणाऱ्या या स्पर्धेमध्ये २५,००० हुन अधिक धावपटूंनी आपला सहभाग निश्चित केला आहे. या मॅरेथॉन मधील सर्व सहभागी धावपटूंना टी शर्ट, गुडी बॅग, पदक, ई टायमिंग प्रशस्तिपत्रक, वैद्यकीय सुविधा विनामूल्य देण्यात येणार आहेत. तसेच या स्पर्धेसाठी ५,५५,५५५ रुपयांची पारितोषिक देण्यात येताल. या स्पर्धेची तांत्रिक नियोजन यश रायकर पाहणार आहेत. इच्छुक स्पर्धकांना या स्पर्धेची नांव नोंदणी दि. १४ फेब्रुवारीपर्यंत www.sunnynimhan.com या संकेतस्थळावर करता येईल.
आंतरराष्ट्रीय प्रशिक्षक मा. देविदास जाधव यांच्या मार्गदर्शनाखाली जिल्हास्तरीय १४ वर्षाखालील मुले आणि मुलींसाठी आंतर शालेय निमंत्रित व्हॉलिबॉल स्पर्धेचे आयोजन करण्यात आलेले आहे. डेक्कन जिमखाना मैदानावर ही स्पर्धा शनिवार, १५ फेब्रुवारी आणि रविवार १६ फेब्रुवारी रोजी रंगणार आहे. युवा खेळाडूंना प्रोत्सहण देण्याच्या सनी विनायक निम्हण यांच्या धोरणानुसार होणा-या या स्पर्धेत एकूण ७०,५५५ रुपयांची बक्षिसे, प्रशिस्तपत्र आणि विजेत्यांना चषक देण्यात येणार आहेत. यामध्ये प्रत्येक सामना जिंकणा-या संघास रुपये १००० आणि हरणा-या संघास रुपये ५०० रुपये उत्तेजनार्थ देण्यात येणार असून या स्पर्धेचे हे आकर्षण ठरले आहे. सर्व सहभागी स्पर्धकांना प्रशस्तीपत्र देण्यात येणार आहेत.

स्केटिंग अस्सोसिएशन पुणे यांच्या मान्यतेने व सहकार्याने रविवार, १६ फेब्रुवारी रोजी हॉटेल शिवांजली पाषाण समोरील रोड, सूस येथे रोलर स्केटिंग च्या रोड रेस स्पर्धा घेण्यात येणार आहेत. या स्पर्धांचे आयोजन जिल्हा असोसिएशनचे सचिव मा. अशोक गुंजाळ यांच्या मार्गदर्शनाखाली होत असून ह्या स्पर्धा ६ वर्षाखालील , ६ ते ८ वर्षे, ८ ते १० वर्षे , १० ते १२ वर्षे , १२ ते १४ वर्षे व १४ वर्षावरील मुले आणि मुलींसाठी घेण्यात येणार आहेत. क्वाड , इनलाइन , रेक्रिएशनल इनलाईन ह्या प्रकारात ह्या स्पर्धा घेण्यात येतील. तसेच विशेष मुले आणि मुलींसाठी विशेष वेगळी स्पर्धा घेण्यात असल्याची माहीती समन्वयक उमेश वाघ यांनी दिली.
विनर्स कराटे असोसिएशनच्या मान्यतेने व सहकार्याने राज्यस्तरीय कराटे चँम्पियनशिप २०२५ चे आयोजन करण्यात आले आहे. या स्पर्धेत राज्यभरातील सुमारे ४०० कराटेपट्टूंनी आपला सहभाग निश्चित केला असल्याची माहिती सेनसेई संतोष पवार यांनी दिली. मुले व मुलींसाठी या स्पर्धा २३ फेब्रुवारी रोजी लाईफ स्पोर्टस्, सोमेश्वर वाडी येथे होणार आहेत. या स्पर्धा ६, ८, १०, १२, १४ वर्षाखालील आणि १४ वर्षावरील मुले व मुलींसाठी होतील.
सोमेश्वर चषक २०२५ बॅडमिंटन स्पर्धेचे आयोजन १५ आणि १६ फेब्रुवारी रोजी करण्यात आले आहे. द लाईफ स्पोर्टस्, सोमेश्वर वाडी, पाषाण येथे या स्पर्धा ११, १३, १५, १७ वर्षे वयोगटात मुले आणि मुलींसाठी होतील. तर वरीष्ठ गटात पुरुष व महिलांसाठी दुहेरीच्या स्पर्धा रंगणार आहेत. मंत्रेशी सागर यांच्या मार्गदर्शनाखाली या स्पर्धा होत असून विजेत्यांना रोख पारितोषीकांसह सर्व सहभागी खेळाडूंना प्रशस्तीपत्र देण्यात येणार आहेत.
याशिवाय स्वच्छ भारत या विषयावर १५ आणि १६ फेब्रुवारी रोजी चित्रकला स्पर्धेचे आयोजन करण्यात आहे आहे. इयत्ता १ ली आणि २ री, इयत्ता ३री, ४थी आणि ५वी व इयत्ता ६ वी , ७वी आणि ८वी अशा तीन गटात ही स्पर्धा होणार आहे. मा. अमित मुरकुटे यांनी या स्पर्धेची जबाबदारी स्वीकारली असून एकाच वेळी छत्रपती शिवाजी महाराज उद्यान, बोपोडी, आनंदबन क्लब, औंध, कै. संजय निम्हण ग्राम संस्कृती उद्यान, पाषाण आणि राणी लक्ष्मी गार्डन, खडकी येथे चित्रकला स्पर्धा रंगणार आहे. या स्पर्धेत एकूण ३५०० विद्यार्थ्यांनी सहभाग निश्चित केला असून प्रत्येक स्पर्धकाला प्रशस्तीपत्र, मेडल देण्यात येणार आहेत तर विजेत्यांना विविध स्वरुपात बक्षिसे देण्यात येतील.

महाराष्ट्रातून ३०० हून अधिक उद्योजकांचा सहभाग ; मराठा आंत्रप्रेन्युअर्स असोसिएशनतर्फे आयोजन
पुणे : मराठा आंत्रप्रेन्युअर्स असोसिएशनतर्फे मराठा उद्योजकांचे ‘बिझनेस कार्निव्हल २.०’ चे आयोजन पुण्यातील हॉटेल शेरेटन ग्रँड येथे करण्यात आले होते. यामध्ये महाराष्ट्रातील ३०० हून अधिक उद्योजकांनी सहभाग घेतला. व्यवसाय हा समाजामध्ये अमूलाग्र बदल घडवू शकतो, यासाठी सगळ्यांनी एकत्र यायला हवे, ही धारणा ठेवून परिषदेचे आयोजन करण्यात आले.  

कार्यक्रमात यशस्वी व उल्लेखनीय कार्य केलेल्या उद्योजकांचा विशेष सन्मान करण्यात आला. यावेळी असोसिएशनचे अध्यक्ष अरुण निम्हण,  भारती मुरकुटे, ऋतुजा मोरे, किशोर जगताप, गौरव मोरे, देवेंद्र कानवडे, रोहित माने, चैत्राली कोंढरे, रेश्मा थोपटे यांसह अनेक मान्यवर उपस्थित होते. कार्यक्रमात  ‘बिझनेस कार्निव्हल २.०’ च्या विषेशांकाचे प्रकाशन झाले.

बांधकाम, पायाभूत सुविधा, उत्पादन आणि शिक्षण व व्यावसायिक सेवा क्षेत्रातील दिग्गज सहभागी झाले होते. विविध क्षेत्रातील दिग्गज व नामवंत उद्योजकांना एकत्र आणून त्यांच्या विचारांची देवाणघेवाण व्हावी. तसेच यातून देशांतर्गत व्यवसायवृद्धी व्हावी, हा यामागील उद्देश होता.

अरुण निम्हण म्हणाले, सन २०१४ साली या असोसिएशनची स्थापना झाली असून. देशाच्या विकासासाठी उद्योगांचा विकास होणे गरजेचे आहे, ही धारणा ठेवून हा एकत्रीकरणाचा प्रयत्न करण्यात आला आहे. मराठा समाजातील उद्योजकांनी इतर संस्थांसोबत संलग्न होत कशा प्रकारे व्यवसायवृद्धी करता येईल, हे पाहणे देखील गरजेचे आहे. व्यवसायात अनेक आव्हाने असून एकमेकांच्या सोबतीने पुढे जायला हवे, असेही त्यांनी सांगितले.