मुख्यमंत्री देवेंद्र फडणवीस यांच्या हस्ते होणार ‘हिंदवी स्वराज्य महोत्सव २०२५’चे उद्घाटन: पर्यटन मंत्री शंभूराज देसाई यांची माहिती

मुंबई, दि.१५ : छत्रपती शिवरायांच्या ३९५ व्या जयंती निमित्त महाराष्ट्र राज्य पर्यटन विभाग,पर्यटन संचालनालय व पुणे जिल्हा प्रशासनाच्या वतीने पुणे जिल्ह्यातील जुन्नर येथील शिवनेरी किल्ल्यावर, शंकरराव बुट्टे-पाटील विद्यालय मैदानाच्या प्रांगणात दि. १७ ते १९ दरम्यान ‘हिंदवी स्वराज्य महोत्सव २०२५’ चे आयोजन करण्यात आले आहे.१७ फेब्रुवारी २०२५ रोजी सकाळी १० वाजता या सोहळ्याचे उद्धाटन मुख्यमंत्री देवेंद्र फडणवीस यांच्या हस्ते होणार आहे.

छत्रपती शिवाजी महाराज यांच्या जयंतीनिमित्त दि. १९ फेब्रुवारी २०२५ रोजी त्यांच्या जयंतीनिमित्त १७ ते १९ फेब्रुवारी २०२५ पर्यंत महाराष्ट्राची संस्कृती, कला, लोककला, सभ्यता आणि परंपरा दाखवणाऱ्या विविध कार्यक्रमांचा समावेश असलेल्या ‘शिवजन्मोत्सवाचे’ आयोजन करण्यात आले आहे. या महोत्सवासाठी उपमुख्यमंत्री एकनाथ शिंदे ,उपमुख्यमंत्री तथा पुणे जिल्हा पालकमंत्री अजित पवार , सहकार आणि नागरी विमान वाहतूक केंद्रीय राज्यमंत्री मुरलीधर मोहोळ ,उच्च व तंत्रशिक्षण मंत्री चंद्रकांत (दादा) पाटील, क्रीडामंत्री दत्तात्रय भरणे, विधानपरिषद उपसभापती नीलम गोऱ्हे, राज्यमंत्री माधुरी मिसाळ, इंद्रनील नाईक, राज्यसभा सदस्य मेधा कुलकर्णी, सुनेत्रा पवार, लोकसभा सदस्य सुप्रिया सुळे, श्रीरंग बारणे, डॉ. अमोल कोल्हे, पुणे जिल्ह्यातील सर्व विधानपरिषद विधानसमा सदस्य आदि मान्यवर उपस्थित राहणार आहेत.

महोत्सवातंर्गत दि.१७ फेब्रुवारी सकाळी १० ते रात्री ९ पर्यंत राज्यातील महिला बचतगटांच्या उत्पादनांना चालना देण्यासाठी विविध बचतगटांची उत्पादने व खाद्य पदार्थाच्या स्टॉलचे प्रदर्शन लावण्यात येणार आहे. सकाळी ९ ते सायंकाळी ६ पर्यंत महाराष्ट्राच्या जिद्दीचे प्रतीक असलेली शिवनेर महोत्सव बैलगाडा शर्यत घेण्यात येणार असून मराठी मातीतील भव्य कबड्डी स्पर्धा सकाळी ११ वाजता असणार आहे. रात्रौ. ८ वाजता शिवस्पर्श शिवसह्याद्री सरसेनापती उमाबाई दाभाडे प्रतिष्ठान च्या वतीने (शिवसह्याद्री ऐतिहासिक महानाटयाचा) प्रयोग सादर करण्यात येणार आहे.

दि. १८ फेब्रुवारी २०२५ रोजी सकाळी १० ते रात्रौ ९ पर्यंत विविध बचतगटांची उत्पादने व खाद्य पदार्थाच्या स्टॉलचे प्रदर्शन असणार आहे तर स्वरांजली कलामंच, पुणे निर्मित(गौरव माझ्या महाराष्ट्राचा) हा सांस्कृतिक कार्यक्रम रात्रौ ८ वाजता सादर करण्यात येणार आहे. तसेच शिवजयंतीच्या पार्श्वभूमीवर रात्री १२ वाजता छत्रपती शिवरायांना मानवंदना देण्यात येणार आहे.

दि. १९ फेब्रुवारी २०२५ रोजी सकाळी १० ते दुपारी ४ पर्यंत जुन्नर तालुक्यातील गुणवंत कलाकार शिवकालीन खेळांची प्रात्यक्षिके सादर करतील. सायंकाळी ५ वाजता छत्रपती शिवरायांची महाआरती व सायंकाळी ६ वाजता भव्य शोभायात्रा काढण्यात येणार आहे. सायंकाळी ७ वाजता सुप्रसिद्ध पार्श्वगायिका वैशाली सामंत यांचा संगीत रजनी कार्यक्रम होणार आहे.

दि. १७ ते १९ फेब्रुवारी २०२५ दरम्यान हा शिवजन्मोत्सव जुन्नर येथील शंकरराव बुट्टे-पाटील विद्यालय मैदानाच्या प्रांगणात पार पडणार असून महाराष्ट्रातील तमाम नागरिक आणि शिवप्रेमींनी या महोत्सवाला आवर्जून उपस्थित राहावे असे आवाहन महाराष्ट्र राज्य पर्यटन विभागाचे प्रधान सचिव अतुल पाटणे, विभागीय आयुक्त डॉ. चंद्रकांत पुलकुंडवार, पुणे जिल्हाधिकारी जितेंद्र डूडी, पर्यटन संचालक डॉ.बी.एन. पाटील यांनी केले आहे.

पुणे-देशातील वाढत्या बेरोजगारीबद्दल केंद्र सरकार व राज्य सरकार विरोधात युवक कॉंग्रेस हल्लाबोल आंदोलन सुरु करणार आहे अशी माहिती येथे पुणे शहर युवक कॉंग्रेस अध्यक्ष सौरभ अमराळे यांनी पत्रकार परिषदेतून दिली .

ते म्हणाले,’महाराष्ट्रात प्रामुख्याने पुण्यात विविध प्रकारचे अंमली पदार्थ खुले आम पणे विक्री होत आहे‌. तसेच केंद्र व राज्य सरकारच्या नाकर्तेपणामुळे देशातील व प्रामुख्याने महाराष्ट्रात बेरोजगारी वाढत आहे.वाढती महागाई, बेरोजगारी, व्यसनाधीनता आणि भविष्याची अनिश्चितता यातून बरेच युवक गुन्हेगारीकडे वळत असून यातून अनेक कुटुंबे उद्ध्वस्त होत आहेत.

अनेक विविध स्थानिक पातळीवरील विषयांवर भारतीय युवक काँग्रेसचे राष्ट्रीय अध्यक्ष उदय भानु चिब व महाराष्ट्र प्रदेश युवक काँग्रेसचे कार्याध्यक्ष शिवराज दादा मोरे यांच्या नेतृत्वाखाली अनेक युवक आंदोलनात सामील‌ होणार असून या आंदोलनाबाबत महाराष्ट्र युवक कॉंग्रेस सहप्रभारी एहसानखान, महाराष्ट्र प्रदेश सोशल मिडीया चेअरमन अक्षय जैन, प्रदेश सचिव विवेक कडू आणि पुणे युवक कॉंग्रेस अध्यक्ष सौरभ अमराळे यानी हि माहीती दिली उद्या १६ फेब्रुवारी २०२५ रोजी दुपारी ४ वाजता कॉंग्रेस भवन पुणे येथून हल्लाबोल आंदोलनाची सुरुवात होतं आहे.या पत्रकार परिषदेस महाराष्ट्र युवक कॉंग्रेस सहप्रभारी एहसानखान, महाराष्ट्र प्रदेश सोशल मिडिया चेअरमन अक्षय जैन , प्रदेश सचिव विवेक कडू , प्रदेश सचिव प्रथमेश आबनावे ,अमोल दौंडकर आणि पुणे शहर युवक कॉंग्रेस अध्यक्ष सौरभ अमराळे उपस्थित होते

पुणे-जुन्या महापालिका हद्दीत नित्याने होणारी वाहतूक कोंडी आणि वायू व ध्वनी प्रदूषण कमी करायचे असेल तर महापालिकेने बॅटरीवरील छोट्या रिक्षा ,बस मोफत उपलब्ध करून द्याव्यात आणि खाजगी वाहनांना या परिसरात NO ENTRY करावी असा पर्याय आम आदमी पक्षाने सुचविला आहे.महापालिकेला आणि लाडक्या बहिणीला २१०० रुपये देणाऱ्या राज्य सरकारला हे अवघड नाही असेही म्हटले जाते आहे.

पुणे शहराची लोकसंख्या ही झपाट्याने वाढत असून त्याबरोबर वाहनांची संख्या देखील लक्षणीय प्रमाणात वाढत आहे आणि या सर्व प्रकारामुळे वाहतूक कोंडीचा प्रश्न गंभीर झाला आहे. शहराच्या मध्यवस्तीत अनेक बाजारपेठा असल्याने शहराच्या उपनगरातून अनेक नागरिक खरेदी करता आपले वैयक्तिक वाहन घेऊन शहराच्या मध्यवर्ती भागात येत असतात, त्यामुळे शहराच्या मध्यवर्ती भागात असलेल्या अरुंद रस्त्यांवर मोठ्या प्रमाणात वाहतूक कोंडी होते व त्यातून वायु प्रदूषण, ध्वनी प्रदूषण, पार्किंगची दुरावस्था यासारख्या समस्या निर्माण होत आहेत. पुणे महानगरपालिकेला सध्या तरी या समस्यांवर नियंत्रण मिळवणे शक्य झालेले नसून भविष्यात देखील या सर्व समस्यांवर नियंत्रण मिळवणे शक्य होईल का? असा मोठा प्रश्न उपस्थित झाला आहे. यावर तोडगा काढण्यासाठी आम आदमी पक्षाच्या वतीने शहराच्या मध्यवर्ती भागातील रस्त्यांवर जास्तीत जास्त प्रमाणात सार्वजनिक वाहतूक व्यवस्था वापरली जावी ज्यात छोट्या बस तसेच ऑटो रिक्षा यांचा समावेश केला जावा अशी मागणी करण्यात आली आहे. महापालिकेच्या माध्यमातून नागरिकांना ऑटोरिक्षा मोफत उपलब्ध करून दिल्यास अनेक नागरिक पी एम पी एम एल ने प्रवास करून मध्यवर्ती भागापर्यंत येऊ शकतात व मध्यवर्ती भागातील प्रवास हा महापालिकेच्या माध्यमातून चालवल्या जाणाऱ्या ऑटो रिक्षाने करू शकता. आम आदमी पक्षाचे उपाध्यक्ष चेंथिल अय्यर म्हणाले, मोफत ऑटो रिक्षा करण्यासाठी पुणे महानगरपालिकेने ऑटो रिक्षाचे मीटर प्रमाणे दर ठरवून त्यांची महानगरपालिकेच्या माध्यमातून नेमणूक करावी. जेणेकरून रिक्षा चालकांना देखील मारलेल्या फेऱ्या प्रमाणे योग्य मोबदला महिन्याकाठी मिळू शकेल व रोजगाराची संधी उपलब्ध होईल, तसेच नागरिकांना देखील चांगला प्रवास मिळाल्याने शहरातील वाहतूक कोंडी कमी होण्यास मदत होईल.

वाढत्या शहरीकरणामुळे प्रवासाचे वेगवेगळे उपाय शोधणे गरजेचे असून त्याचाच एक भाग म्हणून ज्या ठिकाणी बस जाऊ शकणार नाही अशा ठिकाणी मोफत रिक्षा उपलब्ध करून दिल्यास नागरिकांना मोठ्या प्रमाणात फायदा होणार असल्याचे पुढे बोलताना त्यांनी सांगितले.

सदर सुविधा ही नागरिकांना प्रायोगिक तत्त्वावर शहरातील काही भागात उपलब्ध करून दिल्यास त्याला मिळणारा प्रतिसाद पाहून शहराच्या इतर भागात देखील हा प्रकल्प राबवता येऊ शकतो. त्यामुळे आम आदमी पार्टीच्या या मागणीचा पुणे महानगरपालिकेने सकारात्मक विचार करून लवकरात लवकर इलेक्ट्रिक रिक्षा किंवा सीएनजी रिक्षा नागरिकांच्या सेवेसाठी मोफत उपलब्ध करून द्याव्यात, या सर्व सेवांसाठी महापालिकेने एक ॲप तयार करावे ज्याच्या अनुषंगाने प्रत्येक ट्रीप ची माहिती महापालिकेपर्यंत पोहोचली जाऊ शकेल. वाढत्या वाहतूक समस्येला आळा घालण्याचा प्रयत्न करण्यासाठी अशा प्रकारे वेगवेगळे पर्याय शोधणे जरुरी असल्याने आम्ही ही मागणी करत आहोत असे यावेळी पक्षाच्या वतीने सांगण्यात आले.

पुणे: सुमारे २५ वर्ष मोफत वीज देणाऱ्या प्रधानमंत्री सूर्यघर मोफत वीज योजनेचा जागर करण्यासाठी पुणे व पिंपरी चिंचवड शहरातील विविध भागांमध्ये डिजिटल सौर रथाच्या माध्यमातून आठवड्याभरात तब्बल ५० हजारांवर वीजग्राहकांशी महावितरणकडून थेट संवाद साधण्यात आला तसेच डिजिटल स्क्रीनद्वारे संवाद, सादरीकरण व माहिती पत्रकांद्वारे या योजनेची माहिती देण्यात आली.

घरगुती ग्राहकांना घराच्या छतावर १ ते ३ किलोवॅट क्षमतेच्या अनुदानित सौर ऊर्जा निर्मिती प्रकल्पाद्वारे दरमहा सुमारे १२० ते ३६० युनिटपर्यंत वीज मोफत मिळविण्याची संधी प्रधानमंत्री सूर्यघर मोफत वीज योजनेत आहे. या योजनेचा जागर करण्यासाठी महावितरण व महाराष्ट्र सोलर मॅन्युफॅक्चरर्स असोशिएशन (मास्मा) यांच्या सहकार्याने सौर रथाचे आयोजन करण्यात आले होते. केंद्रीय राज्यमंत्री ना. श्री. मुरलीधर मोहोळ यांच्याहस्ते सौर रथाचे उद्घाटन करण्यात आले. यावेळी मुख्य अभियंता श्री. राजेंद्र पवार, आमदार श्री. सिद्धार्थ शिरोळे, अधीक्षक अभियंता श्री. सिंहाजीराव गायकवाड, मास्माचे अध्यक्ष श्री. शशिकांत वाकडे, खजीनदार श्री. समीर गांधी यांची प्रमुख उपस्थिती होती.

आधुनिक तंत्रज्ञानाने सज्ज सौर रथाच्या डिजिटल स्क्रिनद्वारे योजनेची माहिती देताना मुख्य अभियंता श्री. राजेंद्र पवार, अधीक्षक अभियंता श्री. सिंहाजीराव गायकवाड, ‘मास्मा’चे श्री. समीर गांधी यांनी नागरिकांशी आठवडाभर संवाद साधला. तसेच उपकार्यकारी अभियंता डॉ. संतोष पाटणी यांनी या योजनेचे फायदे, ऑनलाइन अर्ज, मिळणारे अनुदान आदींचे संगणकीय सादरीकरण केले. हीच माहिती पत्रकांद्वारे देखील देण्यात आली.

आठवडाभर प्रामुख्याने दररोज दुपारी २ ते रात्री ९ वाजेपर्यंत या सौर रथासोबत संबंधित अतिरिक्त कार्यकारी अभियंते, सहायक अभियंते व जनमित्रांनी सोसायट्या, अपार्टमेंट्समधील नागरिकांशी संवाद साधला. योजनेची माहिती दिली. यात शिवाजीनगर, बावधन, बाणेर, बालेवाडी, औंध, पाषाण, पिंपळे सौदागर, सांगवी, वाकड, काळेवाडी, भोसरी, मोशी, चऱ्होली, वारजे, कोथरूड, स्वारगेट, धनकवडी, पद्मावती, पर्वती, सिंहगड रस्ता, मार्केटयार्ड, हिंगणे, धायरी, नऱ्हे, एरंडवणे आदी भागात या सौर रथाद्वारे जागर करण्यात आला. या सौररथाच्या जागर मोहिमेत महावितरणचे कार्यकारी अभियंता श्री. शेखर मुरकुटे यांच्यासह अभियंते, जनमित्रांसह ‘मास्मा’चे रोहन उपासनी, संदीप गदबरे, नरेंद्र पवार, स्वप्निल बाथे आदींनी सहभाग घेतला.

पुणे 15: महिलांवरील वाढत्या हिंसाचाराला लक्षात घेता हिंसेला प्रेमानेच उत्तर दिले जाऊ शकते, हा संदेश देत सर्व व्यक्ती एकमेकांच्या व्हॅलेंटाइन्स आहेत, हे सांगत निर्भीड साऱ्या बनू ग… या थीमवर ओपन माईक सेशनमध्ये तरुणाईने उत्स्फूर्त सहभाग नोंदवला. याला निमित्त होते 14 फेब्रुवारी हा प्रेमाचा दिवस. या प्रेमाच्या दिवशी फर्ग्युसन रस्त्यावर संध्याकाळी 6 वाजता रंगलेल्या या कार्यक्रमाच्या संयोजक समितीच्या सदस्य संगीता पाटणे यांनी सांगितले की हे रस्ते आमचेही आहेत, मात्र संध्याकाळ झाले की ते भेदभाव करायला लागतात. हे मोडीत काढत स्त्री पुरुष दोघांनीही हिंसेच्या विरोधात उभे राहिले पाहिजे, तेव्हाच ही परिस्थिती बदलेल. श्रद्धा रेखा राजेंद्र यांनी सांगितले की ‘वन बिलियन रायझिंग’ म्हणजे ‘हिंसेच्या विरोधात 100 कोटी’. संयुक्त राष्ट्रसंघाच्या अभ्यासानुसार जगभरात प्रत्येक तीनपैकी एक स्त्री हिंसा सहन करते. म्हणजेच जगभरात 100 कोटी महिला हिंसा सहन करतात. म्हणून महिलांवर होणाऱ्या हिंसेच्या विरोधात जगभरातून आपण 100 कोटी उभे राहू या-One Billion Rising! हिंसामुक्त आणि न्यायपूर्ण समाजासाठी दरवर्षी हा दिवस साजरा केला जातो. यावेळी महाविद्यालयीन तरुण तरुणींनी आपल्या वैयक्तिक अनुभवांपासून, नाटक, कविता, डान्स, ग्रुप डान्स, गाणी सादर करत हिंसेला विरोध केला. फुलपाखराच्या प्रतिकृती समोर ‘मी निर्भीड मी मुक्त’, ‘सहना नहीं, कहना सिखो’ असे संदेश देणारे प्लाकार्ड हातात घेऊन तरुणांनी सेल्फी आणि फोटो काढले. चळवळीच्या गाण्यांनी कार्यक्रमात रंगत आणली. यावेळी महिला जागर समितीच्या संगीता तिवारी, शोभा करंडे, असुंता पारधे, शशिकला ढोलेपाटील, नीता रजपूत, अलका जोशी आणि इतर सदस्य उपस्थित होत्या. कार्यक्रमाचे सूत्रसंचालन अरुणा देशपांडे आणि गीतांजली प्रकाश अंजली यांनी केले. 

जागतिक रेडिओ दिनानिमित्त ‘नागझिरा’ अभिवाचन
‘पीसीइटी इन्फिनिटी ९०.४ एफएम’ चा उपक्रम
पिंपरी, पुणे- १३ फेब्रुवारी या जागतिक रेडिओ दिनानिमित्त साधून ‘पीसीइटी इन्फिनिटी ९०.४ एफएम’ च्या वतीने निगडी, प्राधिकरण येथील वीर सावरकर उद्यानात ‘आदिम’ प्रस्तुत व्यंकटेश माडगूळकर लिखित ‘नागझिरा’ या निसर्गवर्णनाच्या अभिवाचनाचा कार्यक्रम आयोजित केला होता.
यावेळी देवराई फाऊंडेशनचे संस्थापक आणि पीसीएमसी स्मार्ट सिटी कमिटीचे सदस्य धनंजय शेडबळे, पीसीईटी च्या मीडिया अँड ब्रँडिंग विभागाचे प्रमुख डॉ. केतन देसले, प्रा. आनंद बिराजदार, डेक्कन कॉलेजच्या प्रा. डॉ. प्रज्ञा कुलकर्णी आदी उपस्थित होते.
‘रेडिओ आणि हवामान बदल’ ही यंदाच्या जागतिक रेडिओ दिनाची मध्यवर्ती संकल्पना होती. सामान्य माणसाच्या मनात निसर्गाबद्दल आपलेपणाची भावना आणि जबाबदारीची जाणिव निर्माण व्हावी या उद्देशाने भंडारा जिल्ह्यातल्या नागझिरा जंगलात राहून व्यंकटेश माडगूळकर यांनी लिहिलेल्या जंगलातले दिवस या सचित्र नोंदवहीचे हे अभिवाचन डॉ. विनया केसकर आणि विराज सवाई यांनी केले. यासाठी चैतन्य जोशी यांनी पुरक असे पार्श्वसंगीत संयोजन केले होते. झाडावर लटकवलेला कंदील, तिरोडा ३२ किमी हा मैलाचा दगड, पितळी तांब्या भांडे, बैठकीवर टाकलेली कांबळ, नागझिरा जंगलाचा नकाशा अशा वस्तूंनी साधलेल्या वातावरणनिर्मितीने कार्यक्रमाची उंची वाढवली. विविध वयोगटातील उपस्थित निसर्गप्रेमी प्रेक्षकांनी वाचनास भरभरून प्रतिसाद दिला.
“तळ्यापलीकडे, डोंगराच्या उतारावर जी वृक्षराजी होती, तिच्यात काळ्या डोक्याचे पिवळे हळदुले पक्षी पुष्कळ होते. पिवळ्यारंजन रंगाची ही पाखरं जेव्हा या वृक्षावरून त्या वृक्षावर भरारत, तेव्हा पिवळ्या शाल्मलीच्या फुलांनाच पंख फुटले आहेत असं, वाटे.”
“समोरच्या हिरवळीवर नाना कीटक होते. हे कीटक टिपण्यासाठी नाना पाखरं येत. एक नीलकंठ पाखराचं जोडपं येई, हे नीळंगर्द पाखरू पंख पसरून अधांतरी झेप घेई तेव्हा माझ्या मनात येई, की स्वातंत्र्य या वस्तूचा रंग बहुधा निळा असावा” अश्या अनेक मार्मिक वाक्यांना प्रेक्षकांनी उत्स्फूर्त प्रतिसाद दिला.
माणसाच्या हस्तक्षेपामुळे निसर्गातल्या अन्य घटकांवर होत असलेला परिणाम, आपल्या चुकीच्या सवयींमुळे निसर्गाची होत असलेली अपरिमित हानी आणि एक जबाबदार नागरिक म्हणून आपण काय करू शकतो याविषयी शेडबळे यांनी मार्गदर्शन केलं.

‘पीसीइटी इन्फिनिटी ९०.४ एफएम’ निर्मिती प्रमूख माधुरी ढमाले-कुलकर्णी यांनी प्रस्ताविक केले, निर्मिती सहाय्यक विद्या राणे यांनी स्वागत केले. कार्यक्रम यशस्वी होण्यासाठी पीसीसीओईच्या ‘आर्ट सर्कल’च्या विद्यार्थ्यांनी संयोजनात सहभाग घेतला.
पीसीईटीच्या वतीने अध्यक्ष ज्ञानेश्वर लांडगे, उपाध्यक्ष पद्मातई भोसले, सचिव विठ्ठल काळभोर, खजिनदार शांताराम गराडे, विश्वस्त हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांनी सर्वांना जागतिक रेडिओ दिवसाच्या शुभेच्छा देण्यात आल्या.

केळकर संग्रहालयामध्ये रविवारी होणार दाखल

पुणे :मराठी,हिंदी चित्रपट संगीताच्या दुनियेत ३ दशकांहून अधिक काळ आपल्या सुमधूर संगीताने,रसिकांच्या मनावर राज्य करणारे गायक व संगीतकार स्व.सी.रामचंद्र तथा रामचंद्र नरहर चितळकर यांच्या वापरातील पियानो हा राजा दिनकर केळकर संग्रहालयात देणगी स्वरुपात दाखल होत आहे.राजा दिनकर केळकर संग्रहालयाचे संचालक सुधन्वा रानडे यांनी पत्रकाद्वारे ही माहिती दिली.

सी.रामचंद्र तथा अण्णांनी अनेक गाणी याच पियानोवर बसून संगीतबद्ध केली होती.सी.रामचंद्र अण्णांच्या मृत्यूनंतर त्यांची पत्नी बेन यांनी हा पियानो मुंबईस्थित सुरेश यादव यांच्या कुटुंबियांकडे त्याची जपणूक करण्यासाठी सुपूर्द केला. या कुटुंबानेही तो जीवापाड सांभाळला, त्याची पूजा-अर्चा केली.१९७५ मध्ये अण्णांनी सुरू केलेल्या ‘मुलाये न बने’ या वाद्यवृंदात श्री.यादव यांनी सॅक्सोफोन वाजविण्यास सुरुवात केली होती. श्री.यादव यांची दोन्ही मुले सुशांत आणि संदेश हेही याच पियानोवर शिकले.

या पियानोचे सुयोग्य जतन राजा दिनकर केळकर संग्रहालयामध्ये होईल व पुढील पिढ्यांना तो पाहता येईल या स‌द्भावनेने सुरेश यादव यांनी तो संग्रहालयास सुपूर्द करण्याचा निर्णय नुकताच घेतला. रविवार,दि.१६ फेब्रुवारी, २०२५ रोजी सकाळी ११ वाजता संग्रहालयामध्ये होणाऱ्या छोटेखानी समारंभामध्ये हा पियानो सुप्रसिद्ध अॅकॉर्डियन वादक इनॉक डॅनियल यांचे हस्ते स्वीकारण्यात येणार आहे. संगीत सहाय्यक रचनाकार इनॉक डॅनियल यांनी सी.रामचंद्र यांचेसह इतर विविध संगीतकारांसोबतही अप्रतिम अॅकॉर्डियन वादन केले आहे.

या छोटेखानी समारंभास सुरेश यादव हे सपत्नीक,त्यांच्या स्नेह्यांसह उपस्थित रहाणार आहेत असून संग्राहक दिनकर केळकर यांचे पुतणे ज्येष्ठ नेत्रतज्ञ डॉ.श्रीकांत केळकर, संगीत क्षेत्रातील जाणकार अभ्यासक डॉ.प्रकाश कामत , मेलडी मेकर्सचे सुहासचंद्र कुलकर्णी हे विशेषकरून उपस्थित रहाणार आहेत.

आपल्या यशस्वी हिंदी चित्रपट कारकीर्दीत पाश्चिमात्य संगीताचा उत्तम वापर करणारे सी. रामचंद्र हे पहिले संगीतकार होत. सी. रामचंद्र यांनी आपल्या यशस्वी संगीत कारकीर्दीत ११८ हिंदी, ७ मराठी, १ तमीळ व १ तेलगू चित्रपटांना उत्तम संगीत दिले. शहनाई, आशा, अनारकली, अलबेला, आझाद अशा निवडक व लोकप्रिय चित्रपटांचा उल्लेख वानगीदाखल करता येईल.

सर्कस मधील कलाकारांना शासनाने पेंशन व प्रधानमंत्री घरकुल योजनेतून घर द्यावे – संदीप खर्डेकर

पुणे-सर्कस ही एक कला असून मनोरंजनासाठी चा एक जिवंत खेळ आहे म्हणून ही कला आणि यातील कलाकार जगले पाहिजेत असे उद्गार नगरविकास, अल्पसंख्यांक विकास व औकाफ, वैद्यकीय शिक्षण, सामाजिक न्याय व परिवहन राज्यमंत्री नामदार माधुरीताई मिसाळ यांनी काढले. सर्कस मधील कलाकारांच्या मागण्या शासनाकडे निश्चितच मांडू असेही त्या म्हणाल्या.
आज सिंहगड रस्त्यावरील रॅम्बो सर्कस मधील अगदी खरा वाटणारा “डिजिटल हत्ती” चे व सर्कस चे औपचारिक उदघाटन करण्यात आले त्या प्रसंगी त्या बोलत होत्या.तीस वर्षांपूर्वी मी माझे पती कै.सतीशशेठ मिसाळ, संदीप खर्डेकर, रॅम्बो सर्कस व हॅन्डलूम हॅंडीक्राफ्ट फेयर चे संचालक पी. टी. दिलीप, ओमप्रकाश कोहली यांच्या सोबत सर्कस बघायला यायचे व येथे कलाकारांसोबत आम्ही जेवायचो अश्या ह्रद्य आठवणी ही त्यांनी सांगितल्या.
यावेळी भाजपा चे प्रदेश प्रवक्ते संदीप खर्डेकर, रॅम्बो सर्कस चे संचालक सुजीत दिलीप, श्री. जॉन, श्री. अरुल होरायझन,भाजयुमो क्रीडा आघाडी अध्यक्ष प्रतीक खर्डेकर,सामाजिक कार्यकर्त्या सौ. सोनाली गुप्ते,भाजपा च्या महिला आघाडी च्या उपाध्यक्ष सौ.कल्याणी खर्डेकर, प्रा. चेतन दिवाण व इतर मान्यवर उपस्थित होते.
पूर्वी सर्कस मध्ये प्राण्यांचे विविध खेळ दाखविले जायचे आता मात्र प्राणीमित्रांच्या भूमिकेमूळे आणि कायद्यातील बदलामुळे सर्कशीतून प्राणी गायब झाले आणि आता देशातील विविध भागातील स्त्री पुरुष कलाकार जीवापाड मेहनत घेऊन आपली कला सादर करतात असे संदीप खर्डेकर म्हणाले. तसेच पूर्वी चित्रपटांच्या बरोबरीत सर्कस बघायला गर्दी होत असे, मात्र आता परिस्थिती बदलली आहे त्यामुळे आता शासनाने सर्कशीतील कलाकारांकडे लक्ष देणे गरजेचे असून ह्या कलाकारांना पंतप्रधान घरकुल योजनेतून अल्प दरात घर उपलब्ध करून देणे व त्यांना पेन्शन देणे गरजेचे असल्याचे ही संदीप खर्डेकर म्हणाले.
सुजीत दिलीप यांनी सर्कशीतील जोकर व अन्य कलाकारांसोबत ना. माधुरीताईंचा सत्कार केला व येणाऱ्या काळात आमच्या समस्या सोडविण्यासाठी मदत करावी असे आवाहन केले.सर्कस चा व्यवसाय कठीण काळातून जात असून तंबू ठोकण्यासाठी जागा मिळविण्यापासून अडचणीना सुरुवात होते असे ही सुजीत दिलीप यांनी सांगितले. लहान मुलांपासून ज्येष्ठ नागरिकांपर्यंत सर्वांनाच आवडतील असे खेळ असून पुणेकर सर्कस च्या प्रयोगांना उत्स्फूर्त प्रतिसाद देतील असा विश्वास देखील त्यांनी व्यक्त केला.