पुणे : जनता सहकारी बैंक लि., पुणे या बँकेची स्थापना १८ ऑक्टोबर १९४९ रोजी विजयादशमीच्या शुभमुहूर्तावर रा.स्व. संघाच्या प्रेरणेतून आणि श्रध्येय मोरोपंत पिंगळे यांच्या संकल्पनेतून झाली. बँकेचे हे ७५ वे वर्ष असून अमृत महोत्सवी वर्ष असून अमृत महोत्सवी वर्ष सांगता समारंभ, शनिवार, दि. २२ फेब्रुवारी, २०२५  दुपारी ०२.०० वाजता स्व. विठ्ठल तुपे पाटील नाट्यगृह, माळवाडी, हडपसरयेथे आयोजित करण्यात आलेला असून या कार्यक्रमाच्या प्रमुख स्थानी केंद्रीय गृह आणि सहकार मंत्री अमितभाई शहा असणार आहेत, अशी माहिती बँकेचे  अध्यक्ष रवींद्र हेजीब यांनी पत्रकार परिषदेत दिली. 
पत्रकार परिषदेला बँकेच्या उपाध्यक्ष अलका पेटकर, संचालक मकरंद अभ्यंकर, मंदार फाटक, मुख्य कार्यकारी अधिकारी जगदीश कश्यप, उपमहाव्यवस्थापक निलेश देशपांडे आदी उपस्थित होते. 
सांगता समारोह कार्यक्रमाच्या अध्यक्षस्थानी महाराष्ट्राचे मुख्यमंत्री देवेंद्र फडणवीस, उपमुख्यमंत्री  एकनाथ शिंदे, उपमुख्यमंत्री अजित पवार, केंद्रीय सहकार आणि नागरी विमान वाहतूक राज्यमंत्री मुरलीधर मोहोळ, राज्याचे उच्च व तंत्र शिक्षण आणि संसदीय कार्य मंत्री चंद्रकांत पाटील, सहकारमंत्री बाबासाहेब पाटील आदी उपस्थित राहणार आहेत. 
अमृत महोत्सवी शुभारंभ कार्यक्रम दि. १८ ऑक्टोबर २०२३ रोजी महाराष्ट्र राज्याचे मुख्यमंत्री देवेन्द्र‌ फडणवीस, उच्च तंत्रज्ञान व शिक्षणमंत्री चंद्रकांत पाटील व सज्जनगड पूज्यनीय भुषण स्वामीजी यांच्या उपस्थित संपन्न झाला होता. 

महाराष्ट्रातील १३ जिल्हे व गुजरात मधील जिल्हा येथे आजमितीस बँकेच्या एकूण ७१ शाखा व २ विस्तारीत कक्ष कार्यरत आहेत. बँकेच्या एकूण ठेवी रु. ९६२६ कोटी व कर्जे रु. ५६६४ कोटी एवढी असून एकूण मिश्र व्यवसाय १५,२९० कोटी एवढ़ा झालेला आहे. बँकेचा सीआरएआर १४.२७% एवढा आहे तसेच अग्रक्रम व दुर्बल क्षेत्रातील कर्ज पुरवठा अनुक्रमे ६६.८८% व ७.०४% एवढा आहे.

बँकेच्या संचालक मंडळावर १७ संचालक असून त्यामध्ये चार्टर्ड अकाऊंटंट, निवृत्त बैंकर, कायदेतज्ञ, शेती, सहकार इ. विविध क्षेत्रातील तज्ञ व्यक्तींचा समावेश आहे. संचालक मंडळात ९४% पेक्षा जास्त प्रोफेशनल डायरेक्टर्स कार्यरत आहेत. नागरी सहकारी बँक क्षेत्रात १९७८ साली बँकेने देशात सर्वप्रथम रत्नागिरी अर्बन कॉ. ऑपरेटीव्ह बँक या नागरी बँकेचे विलीनीकरण करून रत्नागिरी जिल्ह्यातील ठेवीदारांचा सहकारी बँकिंग वरील विश्वास कायम ठेवण्यात यश मिळवले, यानंतर बँकेने अनेक बँकांचे विलीनीकरण समाधानकारकरित्या पूर्ण केले.

सन १९८८ मध्ये रु. १०० कोटींपेक्षा जास्त व्यवसाय करून बँकेला शेड्युल्ड दर्जा प्राप्त झाला. संपूर्ण देशामध्ये नागरी सहकारी बँक म्हणून सन १९९८ पासून डीपॉजीटरी सेवा देण्यास सर्व प्रथम प्रारंभकेला. आजमितीस सीडीएसल आणि एनएसडीएल या दोन्ही डीपी संदर्भात डीपॉजीटरी सेवा बँक देत आहे. बँकेने सन २००३ पासून स्वतःचे अद्‌यावत डेटा सैंटर सुरु केले आहे. त्यास आय.एस.ओ. २००१ व २५००१ ही मानांकने प्राप्त केलेली आहेत.
त्यांनतर सन २०१२ मध्ये बँकेने गुजरात राज्याच्या साबरकांठा जिल्ह्‌यातील खेडब्रम्हा नागरी सहकारी बँकेचे विलीनीकरण करून जनता बँकेने मल्टीस्टेट बँकेचा दर्जा प्राप्त केला. पारंपारिक बैंकिंग सेवांबरोबरच बैंक सर्व प्रकारच्या टेक्नो बेस सव्हींसेस ग्राहकांना देत आहे. यामध्ये इंटरनेट बैंकिंग, मोबाईल बैंकिंग, भौम जेट पे, डी-मॅट, मुच्युअल फंड, ट्रेजरी, डीजीटल बँकिंग, विदेश विनिमय व्यवहार, इन्शुरन्स सेवा, अटल पेन्शन योजना व प्रधान मंत्री सुरक्षा व जीवनज्योती विमा योजना इ. विविध सरकारी योजना सेवांचा समावेश आहे.

सध्याच्या परिस्थितीत जनता बँकेच्या एकूण व्यवहारापैकी ५०% व्यवहार है डिजीटल व्यवहारातून होत आहेत. बँकेला २०२३-२४ या आर्थिक वर्षात, अर्थमंत्रालय‌द्वारा अटल पेन्शन योजना अंतर्गत संपूर्ण भारतात (in Urban Co-operative Bank Category) सर्वाधिक खाते उघडण्यासाठी बँकेच्या CEO ना वित्त मंत्रालयाने जनता बँकेला केंद्र सरकारच्या पेन्शन फंड रेग्युलेटरी अॅन्ड डेवलपमेंट ऑथोरिटी (PFRDA) द्वारे उत्कृष्ट नेतृत्वाचा (Excellent Leadership) पुरस्कार प्रदान करण्यात आला आहे. आणि त्यासोबतच, जजता मध्ये Beat the Best and Be the Best पुरस्काराने सन्मानित करण्यात आले. तसेच जनता बँकेला CIBIL (क्रेडीट इन्फोर्मेशन कंपनी) कडून सर्वोत्कृष्ट डेटा गुणवत्ता पुरस्कार प्रदान करण्यात आला आहे.

बँकेच्या भविष्यकालीन पथ मार्गक्रमणामध्ये मुख्यता AI चा उपयोग करून तंत्रज्ञानाची सुधारणा करणे, वित्तीय सामावेशनाच्या माध्यमातून नरेंद्र मोदी यांच्या “हर घर विकास” या स्वप्नाचा साकार होण्यात योगदान देणे, अप्रयुक्त बैंकिंग क्षेत्रांमध्ये बँकिंग सेवा उपलब्ध करणे, सुलभ बैंकिंग, सामाजिक जबाबदारीची भावना जपून, तसेच उच्चत्तम पारदर्शकता आणि उत्कृष्ट व्यावसायिक वाढ सुनिश्चित करणे याचा समावेश आहे.

पुणे-पुणे महानगर परिवहन महामंडळाच्या “Apli PMPML” या मोबाईल अॅपच्या बनावट अॅप ची जाहिरात यु-
ट्युब वरील काही चॅनल्स, टेलिग्राम, फेसबुक, इन्स्टा या समाजमाध्यमांवर काही अपप्रवृत्तीच्या व्यक्तींकडून
पीएमपीएमएल प्रवाशांची दिशाभूल व आर्थिक फसवणुकीचा प्रयत्न केला जात आहे.त्यांच्या पासून प्रवाशांनी सावध राहावे असे आवाहन PMPMLने केले आहे. या संदर्भात PMPML असे सांगितले कि,’ “Apli PMPML” या मोबाईल
अॅपच्या बनावट अॅप ची जाहिरात करणाऱ्या अज्ञात व्यक्तींविरूद्ध पोलीस प्रशासनाच्या सायबर सिक्युरिटी सेल
विभागाकडे तक्रार दाखल करण्यात आलेली आहे. सायबर सिक्युरिटी सेल व पीएमपीएमएल ची तांत्रिक विश्लेषण टीम
बनावट अॅपच्या जाहिरातींवर बारीक लक्ष ठेवत असून यामध्ये दोषी आढळणाऱ्या व्यक्तींवर आय.टी. अॅक्टनुसार कडक
कायदेशीर कारवाई केली जाणार आहे.यु-ट्युब, टेलिग्राम, फेसबुक, इन्स्टा या समाजमाध्यमांवर बनावट अॅप ची जाहिरात करणाऱ्या अपप्रवृत्तीच्या
व्यक्ती, आम्ही तुम्हाला “Apli PMPML” चे बनावट अॅप देतो त्यावरून तुम्ही पैसे न देता पास काढू शकता अशा
भूलथापा देवून बनावट अॅप ची विक्री करण्याचा प्रयत्न करीत आहेत. यामुळे पीएमपीएमएल प्रवाशांची आर्थिक
फसवणूक होण्याची शक्यता आहे. तरी प्रवाशी नागरिकांनी समाजमाध्यमांवरील “Apli PMPML” या मोबाईल
अॅपच्या बनावट अॅपच्या जाहिरातींना बळी पडू नये, असे आवाहन पीएमपीएमएल कडून करण्यात येत आहे.
तसेच पीएमपीएमएल चे बनावट अॅप वापरताना कोणी आढळल्यास अशा व्यक्तींविरूद्ध देखील कडक कायदेशीर
कारवाई केली जाईल याची नोंद घ्यावी.

पुणे-महात्मा फुले चौक, मुंढवा येथे उड्डाणपूल उभारण्यासाठी महापालिकेच्या अर्थसंकल्पात पूर्णतः तरतूद करावी अशी मागणी शिवसेनेचे शहर प्रमुख संजय मोरे,तसेच समीर तुपे,दिलीप व्यवहारे,गिरीष गायकवाड यांनी केली आहे.
महात्मा फुले चौक, मुंढवा या ठिकाणी मोठ्या प्रमाणात सतत वाहतूक कोंडी होत असते. यामुळे वारंवार अपघात होउन शेकडो लोक जखमी झाले, आणि अनेक लोक मुत्युमुखी पडले आहेत. तसेच सदर महात्मा फुले चौक, मुंढवा येथून १०० मी अंतरावर लोणकर माध्यमिक विद्यालय व १५० मी अंतरावर राजर्षी शाहू महाराज विद्यालय आहे. शाळा भरण्याच्या व सुटण्याच्या वेळेला तेथील विद्यार्थ्यांना महात्मा फुले चौक पार करण्यासाठी जीव मुठीत धरून रस्ता पार करावा लागतो. पालकही मुले घरी येईपर्यंत तणावाखाली असतात. त्याचप्रमाणे केशवनगर मधील रहिवाशी किंवा खराडी येथील रहिवासी यांची अडचण तसेच नगर रोडवरील वाहतूक सोलापूर रोडकडे जाण्यासाठी याच चौकामधून जात असल्याने येथे मोठी वाहतूक कोंडी निर्माण होत आहे. त्यांना अर्धा तास महात्मा फुले चौकातील सिग्नलला थांबणे अनिवार्य आहे.यासर्व समस्यांवर उपाय म्हणजे याठिकाणी वाहनांसाठी उड्डाणपूल होणे आवश्यक आहे. तसेच पादचाऱ्यांसाठी व्यवस्थित रित्या मार्गक्रमण होण्यास तशी सोय यामधे उपलब्ध असणे अतिशय गरजेचे आहे. महापालिकेच्या सन 2025 -26 च्या अंदाजपत्रकामधे जनतेच्या आग्रहास्तव तरतूद करण्यात यावी. अशी मागणी करीत आहोत. वारंवार होणाऱ्या वाहतूक कोंडीतून पुणे महानगरपालिकेला वेळेवर मिळकतकर भरणार्‍या नागरिकांची सुटका करावी हि विनंती. अन्यथा वर्षानुवर्ष त्रास सहन करणाऱ्या सर्वसामान्य जनतेच्या सुरक्षेसाठी शिवसेना उद्धव बाळासाहेब पक्षाला तीव्र आंदोलन करण्याशिवाय पर्याय नसेल याची नोंद घ्यावी.

२३ फेब्रुवारी  रोजी  गांधी भवन येथे पुरस्कार वितरण सोहळा 

पुणे:बाबा आमटे एकता अभियान ट्रस्टतर्फे दिला  जाणारा ‘बाबा आमटे जीवनगौरव राष्ट्रीय पुरस्कार २०२५’ ज्येष्ठ सामाजिक कार्यकर्ते आणि युवक क्रांती दलाचे संस्थापक डॉ. कुमार सप्तर्षी यांना जाहीर झाला असल्याची माहिती ट्रस्टचे सचिव डॉ.अशोक बेलखोडे, समन्वयक डॉ.सोमनाथ रोडे यांनी पत्रकाद्वारे दिली.हा पुरस्कार वितरण सोहळा रविवार,दि.२३ फेब्रुवारी  रोजी  सायंकाळी  ४ वाजता गांधी भवन (कोथरूड, पुणे) येथे होणार आहे. 
जेष्ठ स्वातंत्र्यसैनिक जी.जी.पारीख आणि जेष्ठ सामाजिक कार्यकर्त्या सुहिता थत्ते, रुकय्या जोशी यांच्या हस्ते ज्येष्ठ लेखक डॉ.अच्युत गोडबोले यांच्या उपस्थितीत पुरस्कार वितरण होणार आहे. महारोगी सेवा समिती, आनंद वन चे अध्यक्ष डॉ विकास आमटे या कार्यक्रमाच्या अध्यक्षस्थानी असतील.
याच  कार्यक्रमात ‘बाबा आमटे सामाजिक कार्यकर्ता राष्ट्रीय पुरस्कार’ देवून ओरिसा येथील सामाजिक कार्यकर्ते मधुसूदन दास आणि कोल्हापूर येथील हसन फत्तेखान देसाई यांना संयुक्तपणे गौरविण्यात येणार आहे.  देसाई हे बाबा आमटे यांच्या दोन्ही भारत जोडो सायकल अभियानातील सायकल यात्री आहेत.
ज्येष्ठ सामाजिक कार्यकर्ते,विचारवंत, युवक क्रांती दलाचे संस्थापक  म्हणून ओळखल्या जाणाऱ्या डॉ. सप्तर्षी यांनी अनेक दशके महात्मा गांधी यांच्या विचारांनी प्रेरित होऊन कार्य केले आहे.  ते ‘महाराष्ट्र गांधी स्मारक निधी’ या संस्थेचे अध्यक्ष असून ‘सत्याग्रही विचारधारा’ या मासिकाचे ते संपादक आहेत. तसेच दास हे प्रसिद्ध गांधीवादी ‘एस. एन. सुब्बाराव’ यांच्या पासून प्रेरित ‘राष्ट्रीय युवा योजना’ या संघटनेचे संचालक आहेत तर देसाई हे राष्ट्र सेवा दलाचे सक्रिय कार्यकर्ते आणि समाजसेवक आहेत.

 बीव्हीजी परिवार हळहळला

पुणे (प्रतिनिधी) : बीव्हीजी इंडियाचे चेअरमन हणमंतराव गायकवाड व त्यांना साथ देणारे बंधु डॉ. दत्तात्रेय गाकवाड यांच्या मातोश्री सिताबाई रामदास गायकवाड (वय ७०) यांचे नुकतेच निधन झाले. त्यांच्या निधनाने गायकवाड परिवारावर दु:खाचा डोंगर कोसळला आहे. उद्या दि. २१ रोजी सकाळी ८:३० वा. पिंपळे गुरव स्मशान भुमी येथे त्यांचा तिसरा विधी संपन्न होणार आहे.

गायकवाड परिवारासाठी मोठा धक्का

सिताबाई गायकवाड यांचे निधन हे गायकवाड परिवारासाठी मोठा  भावनिक धक्का आहे. पुणे महानगर पालिकेच्या शिक्षण मंडाळामध्ये सिताबाईंनी प्राथमिक शिक्षिका म्हणून सेवा बजावली होती. पती रामदास यांच्या निधनानंतर अत्यंत हलाकीच्या परिस्थितीमध्ये त्यांनी मोठा मुलगा हणमंतराव यांना अभियांत्रिकी विभागाचे शिक्षण दिले. धाकटा मुलगा दत्तात्रेय  यांना डॉक्टर बनवले होते. आईच्या मार्गदर्शनामुळे भारत विकास गृप (बीव्हीजी) हा १ लाख नागरिकांना रोजगार देण्यात यशस्वी ठरल्याचे हणमंतराव गायकवाड नेहमी त्यांच्या भाषणाद्वारे सांगत असतात. आईच्या निधनानंतर बीव्हीजी परिवाराने हळहळ व्यक्त केली आहे.

सांप्रदायिक क्षेत्रात उल्लेखनीय कार्य

सेवा निवृत्तीनंतर पिंपळे गुरव परिसरात सिताबाई या सांप्रदायिक क्षेत्रात उल्लेखनीय कार्य करत होत्या. महिला भजन  मंडळाच्या माध्यमातून त्यांनी सुधारणावादी उपक्रम राबवले. सांगवी परिसरातील बहुसंख्य नागरिकांना अयोध्येतील प्रभू श्री राम मंदीराचे दर्शन स्व:खर्चाने घडवले होते.

विविध क्षेत्रातून श्रद्धांजली

देश विदेशातील उद्योग, आरोग्य, शिक्षण क्षेत्रातील त्याचबरोबर राजकीय नेत्यांनी गायकवाड कुटूंबीयांना आधार देण्यासाठी संवेदना व्यक्त केल्या आहेत.

पुणे, दि. २० फेब्रुवारी २०२५:एकूण महसूली गरज व प्रस्तावित वीजदराच्या निश्चितीकरणासाठी महावितरण कंपनीने दाखल केलेल्या बहुवर्षीय वीजदर याचिकेवर मा. महाराष्ट्र विद्युत नियामक आयोगाच्या वतीने गुरूवारी, दि. २७ फेब्रुवारीला पुणे येथील महाराष्ट्र शासकीय तंत्रज्ञान विद्यापीठाच्या (सीओइपी) मुख्य सभागृहात (ई-सुविधा केंद्रात) जाहीर ई-सुनावणी होणार आहे. या सुनावणीला सकाळी १०.३० वाजता प्रारंभ होईल.

       महाराष्ट्र राज्य विद्युत वितरण कंपनी मर्यादित (महावितरण कंपनी) आर्थिक वर्ष २०२२-२३ व आर्थिक वर्ष २०२३-२४ चे अंतिम अचूक समायोजन, आर्थिक वर्ष २०२४-२५ चे तात्पुरते समायोजन व आर्थिक वर्ष २०२५-२६ ते आर्थिक वर्ष २०२९-३० या पाचव्या नियंत्रण कालावधीसाठी महाराष्ट्र वीज नियामक आयोगासमोर दाखल केलेल्या बहुवर्षीय वीजदर याचिकेवर ही जाहीर ई-सुनावणी होणार आहे.

पुणे प्रादेशिक संचालक श्री. भुजंग खंदारे यांचे प्रतिपादन

पुणे, दि. २० फेब्रुवारी २०२५:छत्रपती शिवाजी महाराज यांच्या जीवनाचे वैशिष्ट्य म्हणजे अत्यंत प्रतिकूल परिस्थिती असताना त्यांनी प्रत्येक वेळी ती स्थिती अनुकूल केली आणि एकाच वेळी विविध संकटांवर मात करीत रयतेसाठी स्वराज्य निर्माण केले. शिवरायांचा हा आदर्श प्रत्येकाच्या जीवनासाठी मार्गदर्शक आहे असे प्रतिपादन महावितरणचे पुणे प्रादेशिक संचालक श्री. भुजंग खंदारे यांनी बुधवारी (दि. १९) केले.

महावितरण व महापारेषणच्या वतीने रास्तापेठ येथील प्रशासकीय इमारतीच्या प्रांगणात छत्रपती शिवाजी महाराज यांची जयंती साजरी करण्यात आली. यावेळी कार्यक्रमाचे अध्यक्ष म्हणून श्री. भुजंग खंदारे बोलत होते. प्रमुख पाहुणे म्हणून मुख्य अभियंता श्री. राजेंद्र पवार (महावितरण) व अनिल कोलप (महापारेषण) यांची उपस्थिती होती. यावेळी शिवचरित्रावरील प्रबोधनात्मक पोवाड्याचा कार्यक्रम झाला. वडूज (सातारा) येथील शिवशाहीर श्री. राजेंद्र सानप तडवळेकर व सहकाऱ्यांनी पोवाडे सादर करून उपस्थितांना मंत्रमुग्ध केले.

पुणे प्रादेशिक संचालक श्री. खंदारे म्हणाले की, स्वराज्य स्थापनेसाठी जाती, पंथ, धर्मापेक्षा छत्रपती शिवाजी महाराजांनी सहकाऱ्यांच्या गुणवत्तेला सर्वोच्च प्राधान्य दिले. संधी देऊन त्यांच्या क्षमतेचा विकास केला. आत्मविश्वास निर्माण केला. शूरवीर माणसं घडवली. यासोबतच रयतेसाठी निर्माण केलेल्या स्वराज्याला माणूसकीच्या मूल्यांचे अधिष्ठान दिले. लोकाभिमुख व सर्वसामान्यांना न्याय देणाऱ्या प्रशासनाचा आदर्श शिवाजी महाराज यांच्या प्रशासकीय यंत्रणेतून आपल्याला मिळतो. तो आदर्श समोर ठेऊन वीजग्राहकांना सेवा देण्याचे आवाहन श्री. खंदारे यांनी यावेळी केले. कार्यक्रमाचे प्रास्ताविक श्री. विनोद रणदिवे यांनी तर सूत्रसंचालन श्री. बाबा शिंदे यांनी केले. श्री. शिवाजी शिवनेचारी यांनी आभार मानले. कार्यक्रमाला महावितरण, महापारेषणमधील अभियंते, अधिकारी, कर्मचारी व सर्व संघटनांचे पदाधिकारी, सदस्य उपस्थित होते. आयोजनासाठी सर्व कर्मचारी संघटनांच्या संयुक्त आयोजन समितीने पुढाकार घेतला.

२,७८,०००/- रु चा मुद्देमाल जप्त.

पुणे-अल्टो कारमधून होणारी हातभट्टी दारुची वाहतुक लोणी काळभोर पोलीसांनी पकडली असून मुबारक जाफर गड्डे वय ४३ रा. पाषाणकर गॅस एजन्सीजवळ, लोणी काळभोर, पुणे यास ताब्यात घेतले आहे .

या संदर्भात पोलिसांनी सांगितले कि,’लोणी काळभोर पोलीस ठाणेचे वरिष्ठ पोलीस निरीक्षक राजेद्र पन्हाळे यांनी पोलीस आयुक्त, पुणे शहर अमितेश कुमार, अपर पोलीस आयुक्त, पूर्व प्रादेशिक विभाग, मनोज पाटील, पोलीस उप आयुक्त, परिमंडळ ०५, डॉ. राजकुमार शिंदे, सहाय्यक पोलीस आयुक्त, हडपसर विभाग, श्रीमती अनुराधा उदमले यांचे आदेश व मार्गदर्शनाप्रमाणे लोणी काळभोर पोलीस ठाणे हद्दीतील अवैध धंद्यांवर धडक कारवाई मोहिम सुरु केली आहे. या मोहिमे दरम्यान दि.२०/०२/२०२५ रोजी पहाटे ०५/०० वा.चे सुमारास १२ फाटा, पुणे सोलापुर माहामार्ग, कुंजीरवाडी, ता. हवेली, जि.पुणे या ठिकाणी सार्वजनीक रोडवरुन अवैध गावठी दारुचे कॅन्ड पुण्याचे दिशेने वाहुन नेले जात असल्याची बातमी प्राप्त झाली.
त्यावर वरिष्ठ पोलीस निरीक्षक राजेंद्र पन्हाळे, पो. उप निरीक्षक अनिल जाधव, पोलीस अमंलदर गाडे, कर्डीले यांनी सदर ठिकाणी सापळा रचुन अवैध गावठी दारु वाहुन नेली जाणारी चारचाकी मारुती सुझुकी कंपनीची अल्टो कार पकडली. त्या गाडीमध्ये लोणी काळभोर पोलीसांना हातभट्टी गावठी दारु भरलेली एकुण ८ कॅन्ड, २८० लीटर दारु मिळुन आली सदर कारवाई दरम्यान अवैध गावठी हातभट्टी दारुचे कॅन्ड वाहुन नेणारे इसम नामे मुबारक जाफर गड्डे वय ४३ रा. पाषाणकर गॅस एजन्सीजवळ, लोणी काळभोर, पुणे यास ताब्यात घेवुन त्याचे विरुध्द महाराष्ट्र दारुबंदी अधि.क.६५ (अ) प्रमाणे गुन्हा दाखल करणेत आला आहे. सदर कारवाई दरम्यान आरोपीं कडुन एकुण २,७८,०००/-रुपचे किंमतीचा मुद्देमाल जप्त करणेत आला आहे.
सदरची कारवाई पोलीस उप आयुक्त, परिमंडळ ०५, डॉ. राजकुमार शिंदे, मा. सहाय्यक पोलीस आयुक्त, हडपसर विभाग, अनुराधा उदमले यांचे आदेशाने वरिष्ठ पोलीस निरीक्षक लोणी काळभोर पोलीस ठाणेचे राजेंद्र पन्हाळे यांचे मार्गदर्शना खाली पोलीस अमंलदार गाडे, कर्डीले यांनी केली आहे.