: जनता सहकारी बॅंक लिमिटेड पुणे बँकेच्या अमृत महोत्सवी वर्ष सांगता समारोहाचे आयोजन
पुणे: नरेंद्र मोदी यांनी २०४७ पर्यंत देशाला पूर्ण विकसित राष्ट्र करणे आणि २०२७ पर्यंत त्याच्या अर्थव्यवस्थेला ५ ट्रिलियन डॉलर इकॉनॉमी करणे हे दोन संकल्प राष्ट्राच्या समोर ठेवले आहेत. सहकारी क्षेत्राच्या योगदानाने दोन गोष्टी साध्य करता येऊ शकतात. प्रत्येक व्यक्तीला त्याच्या क्षमतेनुसार काम देणे आणि प्रत्येक व्यक्तीला देशाच्या विकासाशी जोडणे, प्रत्येक कुटुंबाला समृद्ध करणे हे केवळ सहकारी चळवळीच्या माध्यमातून शक्य आहे. त्यामुळेच पंतप्रधानांनी केंद्रीय सहकार मंत्रालयाची सुरुवात केली आहे. देशाच्या विकासात योगदान द्यायचे असेल तर सहकार हा एकमेव मार्ग आहे. सहकाराच्या माध्यमातून छोटी छोटी रक्कम जमा करून मोठे काम होऊ शकते, असे मत केंद्रीय गृह आणि सहकार मंत्री अमित शहा यांनी व्यक्त केले.

जनता सहकारी बँक लिमिटेड पुणे बँकेच्या अमृत महोत्सवी वर्ष सांगता समारोहाचे आयोजन हडपसरमधील स्व. विठ्ठल तुपे पाटील नाट्यगृहात करण्यात आले होते. यावेळी कार्यक्रमाच्या प्रमुख स्थानी केंद्रीय गृह आणि सहकार मंत्री अमित शहा होते. सांगता समारोह कार्यक्रमाच्या अध्यक्षस्थानी मुख्यमंत्री देवेंद्र फडणवीस, उपमुख्यमंत्री  एकनाथ शिंदे, उपमुख्यमंत्री अजित पवार, केंद्रीय सहकार आणि नागरी विमान वाहतूक राज्यमंत्री मुरलीधर मोहोळ, राज्याचे उच्च व तंत्र शिक्षण आणि संसदीय कार्य मंत्री चंद्रकांत पाटील, बँकेचे अध्यक्ष रवींद्र हेजीब, उपाध्यक्ष अलका पेटकर, मुख्य कार्यकारी अधिकारी जगदीश कश्यप उपस्थित होते. जनता सहकारी  बँकेच्या स्मरणिकेचे प्रकाशन यावेळी करण्यात आले. अंब्रेला आॅर्गनायझेशनसाठी ५ कोटी चा धनादेश यावेळी बँकेच्या वतीने देण्यात आला.
अमित शहा म्हणाले,  छोट्या लोकांची मोठी बँक हा विश्वास जनता सहकारी बँकने  सार्थ केला आहे. देशातील पहिली को-अाॅपरेटीव्ह डिमॅट संस्था बनण्याचा बहुमान बँकेने प्राप्त केला आहे. ज्या बँकेचे लाभार्थी सगळ्यात जास्त ती बँक यशस्वी बँक आहे. आज जनता बॅंकेची ठेवी ९६०० कोटीपेक्षा अधिक आहे, हे बँकेचे यश आणि लोकांचा विश्वास आहे. सामाजिक कार्यात देखील बँक अग्रेसर आहे. कोणतीही संस्था जेव्हा सातत्यपूर्ण प्रगती करते तेव्हा त्यांचे संस्थापक, संचालक, सदस्य हे तिघे सगळ्या उद्देशांना पूर्ण करतात तेव्हाच ही प्रगती शक्य आहे, असेही त्यांनी यावेळी सांगितले.

अमित शहा म्हणाले, देशात १४६५ सहकारी बँका आहेत, आणि त्यापैकी ४०० हून अधिक फक्त महाराष्ट्रात आहेत. आम्ही एक अंब्रेला संस्था (UMBRELLA ) सक्रिय करत आहोत, जी सर्व सहकारी बँकांना शक्य त्या सर्व प्रकारे मदत करेल. अंब्रेला संस्थेसाठी सहकारी बँकानी  ३०० कोटी रुपयांचे भागभांडवल उभे केले आहे. यामध्ये केंद्र सरकारचे देखील सहकार्य आहे. शाह म्हणाले की पंतप्रधानांच्या नेतृत्वाखाली सहकार मंत्रालयाने शहरी सहकारी व्यवसाय वाढवण्यासाठी अनेक उपक्रम हाती घेतले आहेत. देशातील पहिले सहकारी संस्थांचे केंद्रीय निबंधक कार्यालय मुरलीधर मोहोळ यांच्या पुढाकाराने पुण्यात सुरु होत असल्याचेही त्यांनी सांगितले.
रविंद्र हेजीब म्हणाले, अनेक आव्हानांना तोंड देत समर्थपणे आपल्या विचारांचा वारसा जपत अमृतमहोत्सवी वर्षामध्ये केलेल्या कामगिरीचे सिंहावलोकन करण्याचा हा सुवर्णक्षण आहे. बँकेवर काम करणारे भागधारक, निष्ठावान खातेदार, निस्वार्थी संचालक आणि प्रामाणिक सेवक ही या बँकेची खरी शक्तीस्थाने आहेत. समाजातील सर्वसामान्यांचे जीवनमान उंचविण्यासाठी बँकेने मागील ७५ वर्षे आपली भूमिका अत्यंत प्रभावीपणे निभावली आहे, असे सांगत बँकेच्या योजना आणि सामाजिक कार्यातील उपक्रमांची माहिती दिली.

जगदीश कश्यप यांनी स्वागत केले. रवींद्र हेजीब यांनी प्रास्ताविक केले. अलका पेटकर यांनी आभार मानले.

पुणे-महाराष्ट्राच्या जनतेला धन्यवाद करण्यासाठी मी आज पुण्यात आलो असल्याचे केंद्रीय गृह मंत्री अमित शहा यांनी म्हटले आहे. विधानसभा निवडणुकीत महाराष्ट्रातील जनतेने महायुतीला आशीर्वाद दिला. भाजप, शिवसेना आणि राष्ट्रवादी काँग्रेसच्या नेतृत्वातील सरकार येथे स्थापन केले आहे. महायुतीला ऐतिहासिक बहुमत तर महाराष्ट्राच्या जनतेने दिलेच आहे मात्र, त्याच बरोबर कोणती शिवसेना असली आणि कोणती शिवसेना नकली तसेच कोणती एनसीपी असली आणि कोणती नकली, याचा निर्णय देखील महाराष्ट्रातील जनतेने केला असल्याचा दावा अमित शहा यांनी केला आहे.

दिल्लीमध्ये होणाऱ्या अखिल भारतीय साहित्य संमेलनाच्या निमित्ताने कालच पंतप्रधान नरेंद्र मोदी आणि शरद पवार हे एकाच व्यासपीठावर आले होते. यावेळी या दोन्ही नेत्यांमध्ये असलेली जवळीक सर्वांचे लक्ष वेधून घेत होती. मात्र, आज अमित शहा यांनी पुन्हा एकदा शरद पवार यांच्यावर निशाणा साधला आहे. खरी एनसीपी कोणाची हे आता महाराष्ट्राच्या जनतेने दाखवून दिले असल्याचे अमित शहा यांनी म्हटले आहे. पुण्यात केंद्रीय गृह व सहकार मंत्री अमित शहा यांच्यासह मुख्यमंत्री देवेंद्र फडणवीस यांच्या उपस्थितीत ‘प्रधानमंत्री आवास योजना (ग्रामीण) टप्पा 2 अंतर्गत लाभार्थींना मंजूरी पत्र व पहिल्या हप्त्याच्या वितरण कार्यक्रमा’त ते बोलत होते.

या वेळी अमित शहा म्हणाले की, 20 लाख कुटुंबीयांना घर देताना त्या सर्व कुटुंबीयांचे पंतप्रधान नरेंद्र मोदी, केंद्र सरकार आणि राज्य सरकारच्या वतीने मी अभिवादन तसेच अभिनंदन करतो. देशाच्या प्रगतीत विकासाचा पाया रचत असताना या सर्व कुटुंबांनी कामाला लागण्याचा संकल्प शहा यांनी व्यक्त केला.

महाराष्ट्रातील जनतेने पंतप्रधान नरेंद्र मोदी यांना तिसऱ्यांदा पंतप्रधान बनवले आहे. पंतप्रधान झाल्यानंतर पहिल्याच मंत्रिमंडळ बैठकीत मोदीजींनी प्रधानमंत्री आवास योजनेच्या टप्प्या दोनची सुरुवात केली आहे. देशभरात सर्वात जास्त घरे ही महाराष्ट्राला मिळाली असल्याचा दावा अमित शहा यांनी केला आहे. याचा आम्हाला सर्वांना आनंद आणि गौरव असायला हवा, असे देखील ते म्हणाले. घराचा अर्थ केवळ चार भिंती नाही तर विकासाच्या स्वप्नाला साकार करणे असल्याचे त्यांनी म्हटले आहे. प्रत्येकाचे घर हे स्वर्गा सारखे तर असतेच मात्र येणाऱ्या पिढीसाठी हा विकासाचा प्रथम टप्पा देखील असतो. गरिबांना घरासोबतच शौचालय देणे म्हणजे त्यांच्या सन्मानाची आणि स्वाभिमानीची रक्षा मोदीजींनी केली असल्याचे शहा यांनी म्हटले आहे.

प्रत्येकाला घर या योजनेअंतर्गत महिला, मागासवर्गीय, एसटी, एससी, गरीब समाजाला स्वतःचे घर देण्याचा कार्यक्रम तयार करण्यात आला. 2029 पर्यंत यात पाच कोटी घरे दिली जाणार आहेत. त्यातील तीन कोटी 50 लाख नागरिकांना आतापर्यंत घरे देण्यात आली आहेत. तर महाराष्ट्रात देखील आतापर्यंत तेरा लाख पन्नास हजार घरे देण्यात आली आहेत. आता 19 लाख 50 हजार घरे देण्यात येत आहेत. ही सर्व घरे वेळेत पूर्ण करण्याचे काम मुख्यमंत्री देवेंद्र फडणवीस यांनी निश्चित केले असल्याचे म्हणत अमित शहा यांनी मुख्यमंत्री देवेंद्र फडणवीस यांच्या कार्याचे देखील कौतुक केले.

बारामतीत सुरू झाला रुग्णसेवेचा नवीन आयाम

बारामती, दि. 22 : आर्थिक परिस्थितीमुळे उपचार घेऊ न शकणाऱ्या बालकांसाठी एक दिलासादायक उपक्रम बारामतीत सुरू झाला आहे. उपमुख्यमंत्री अजित पवार आणि राज्यसभा खासदार सुनेत्रा पवार यांच्या पुढाकाराने गरजू मुलांसाठी विनामूल्य शस्त्रक्रिया उपक्रमाची सुरुवात करण्यात आली आहे.

बारामतीतील मुथा हॉस्पिटलमध्ये बालरोगतज्ज्ञ डॉ. राजेंद्र मुथा आणि डॉ. सौरभ मुथा यांच्या सहकार्याने मुंबईतील प्रख्यात शल्यविशारद डॉ. संजय ओक आणि त्यांचे सहकारी हे बालकांवर सेवाभावी वृत्तीने मोफत शस्त्रक्रिया करत आहेत.

शनिवार व रविवार या दोन दिवसांत ३० बालकांवर विविध शस्त्रक्रिया केल्या जाणार असून, त्यात हर्निया, टाळूला चिटकलेली जीभ दुरुस्त करणे, तसेच शरीरावरील गाठी काढणे यासारख्या शस्त्रक्रियांचा समावेश आहे.

या उपक्रमाच्या उद्घाटनप्रसंगी पुण्यश्लोक अहिल्यादेवी होळकर शासकीय वैद्यकीय महाविद्यालयाचे अधिष्ठाता डॉ. चंद्रकांत म्हस्के, तालुका आरोग्य अधिकारी डॉ. मनोज खोमणे, तसेच डॉ. राजेंद्र मुथा, डॉ. सौरभ मुथा, अनिल नवरंगे, अनिल जोगळेकर, माजी नगराध्यक्षा भारती मुथा, प्रियांका मुथा, डॉ. अनिल मोकाशी, अजित पवार यांचे विशेष कार्यकारी अधिकारी नितीन हाटे, किरण तावरे आणि प्रशासकीय अधिकारी नंदकुमार कोकरे यांची उपस्थिती होती.

मोफत शस्त्रक्रियांचा उपक्रम नियमित राबवणार!

“उपमुख्यमंत्री अजित पवार आणि खासदार सुनेत्रा पवार यांच्या प्रेरणेतून बारामतीत हा उपक्रम सातत्याने राबवण्याचा संकल्प केला आहे. यामुळे गरजू बालकांना मोफत आणि दर्जेदार आरोग्यसेवा मिळेल,” असे डॉ. संजय ओक यांनी सांगितले.

उपचारांची नवी पहाट!

या अभिनव उपक्रमामुळे बारामतीतील गरजू कुटुंबांसाठी आरोग्यसेवेचे नवे दार खुले झाले आहे. आर्थिक अडचणींमुळे उपचारापासून वंचित राहणाऱ्या मुलांसाठी हा उपक्रम एक मोठी संधी ठरणार आहे.

पुणे :
बालेवाडी येथील सर्वे नं 23 या ठिकाणी विनापरवाना रस्ते खोदाई करून विद्युत केबल 350 मी टाकण्यात आली. पुणे महानगरपालिकेच्या हद्दीत कोणत्याही ठिकाणी विनापरवाना रस्ते खोदाई करून बालेवाडी येथील मालपाणी इस्टेट या बांधकाम व्यावसायिकाने विनापरवाना खोदाई केल्यामुळे त्यास आकारलेला 1,28,01,600₹ दंडाची नोटीस 27/12/2023 रोजी पाठवण्यात आली होती तो दंड आज एक वर्ष उलटून गेले तरी बांधकाम व्यावसायिकाने दंड मनपा कोषागारात भरला नाही. पुणे मनपाने व्यावसायिकास पुन्हा एकदा नोटीस देऊन दंड व्याजासहित वसूल करावा. अन्यथा या व्यावसायिकाचे शहरात चालू असणाऱ्या मालपाणी यांच्या इतर बांधकामांना Work Stop Notice द्यावी.या बांधकाम व्यावसायिकाची कृती ही मनपा स्ट्रेचिंग पाॅलिसी भंग करणारी आहे.या व्यावसायिकाने सार्वजनिक मालमत्तेचे नुकसान केल्यामुळे दंड वसुल करावा अन्यथा आम्ही येत्या काही दिवसांत न्यायालयाचा मार्ग अवलंबवू असा इशारा रयत विद्यार्थी परिषदेचे ऋषिकेश कानवटे यांनी दिला.

पुणे: पुणे महानगर प्रदेश विकास प्राधिकरणाच्या एकूण १३३७ शिल्लक असलेल्या सदनिकांच्या लॉटरीमध्ये १२ फेबुवारीला १०१५ लाभार्थी पात्र झाले आहेत. पात्र लाभार्थ्यांनी १७ ते २५ फेबुवारीपर्यंत सदनिका स्वीकारणे अथवा समर्पित करणेबाबत संबंध‍ितांच्या लॉग‍िनला पत्र पाठविण्यात आले आहे.

पात्र लाभार्थ्यांनी सदनिका स्वीकारल्यानंतर त्यांना तात्पुरते देकारपत्र देण्यात येणार येणार आहे. त्यामध्ये प्रथम टप्प्यातील २५% रक्कमेचा भरणा करण्याचा कालावधी संपुष्टात आल्यानंतर (तात्पुरत्या देकारपत्राच्या दिनांकापासून ४५ दिवसानंतर) SBI च्या MCLR दराप्रमाणे व्याज आकारणीच्या अधिनराहून १५ दिवसांची मुदतवाढ देण्यात येईल. या कालावधीतही (तात्पुरत्या देकारपत्राच्या दिनांकापासून ६० दिवसांत) प्रथम टप्प्यातील २५% रक्कम न भरल्यास सदनिकेचे वितरण कोणतीही पूर्वसूचना न देता रद्द करण्यात येईल.

टप्पा १ च्या मुदतीनंतर पुढील ६० दिवसांत सदनिकेची उर्वरित ७५% रक्कम भरणे बंधनकारक आहे. सदर कालावधीतही (७५% रक्कमेकरिता ६० दिवस) अर्जदाराने ७५% रक्कम भरणा न केल्यास, १०५ दिवसांचा विहित कालावधी संपुष्टात आल्यानंतर MCLR नियमाप्रमाणे व्याज आकारणीच्या अधीनराहून अर्जदारास अधिकतम ९० दिवसांची मुदतवाढ देण्यात येईल. ज्या अर्जदारांना १००% रक्कम एकाच वेळेस भरणा करावयाची आहे, असे अर्जदार सदर रक्कमेचा भरणा उपरोक्त नमूद केलेल्या टप्प्याच्या लिंकवर ऑनलाईन पद्धतीने त्याचा भरणा एकाच दिवशी करू येवू शकता.

पुणे (दि.२२) : वाहतूक व्यवस्थेला अडचणी निर्माण करणाऱ्या कोरेगाव भीमा आणि डाहुली भागातील अतिक्रमणावर पुणे महानगर प्रदेश विकास प्राधिकरणाच्या माध्यमातून निष्कासनाची कारवाई करण्यात आली. अनधिकृतपणे उभारलेल्या बांधकामावर पीएमआरडीएच्या अनधिकृत बांधकाम व न‍िर्मुलन विभागाच्या पथकाने शुक्रवारी संबंधित कारवाई केली.

अनधिकृत बांधकामे वाढत असल्याने याचा रहदारीस अडथळा ठरत असल्याच्या तक्रारी पुढे येत होत्या. याची पीएमआरडीएच्या पथकाने दखल घेत शुक्रवारी कोरेगाव भीमा (ता.शिरूर) येथे रस्त्याच्या दुतर्फा असलेले अतिक्रमण व अनधिकृत बांधकामावर निष्कासणाची कारवाई करण्यात आली. या कारवाईत जवळपास ३६ पत्राशेड काढण्यात आले असून काही नागरिकांनी स्वतःहून आपली अतिक्रमणे काढून घेतली. यासह डाहुली (ता. मावळ) येथील रवींद्र ओसवाल, चेतन शहा आणि विवेकानंद सोनावणे या सर्वांचे एकूण १२ हजार ९४७ चौ.फू. बांधकाम निष्कासित करण्यात आले.

पीएमआरडीएच्या अधिकारी यांचेमार्फत यापुढे अनधिकृत बांधकाम करू नये, असे आवाहन यावेळी करण्यात आले. संबंध‍ित कारवाई पीएमआरडीएचे महानगर आयुक्त डॉ. योगेश म्हसे, पोलिस अधिक्षक तथा दक्षता अधिकारी अमोल तांबे यांच्या मार्गदर्शनाखाली अनधिकृत बांधकाम व न‍िर्मुलन व‍िभागाच्या स‍ह आयुक्त डॉ. दीप्ती सूर्यवंशी – पाटील, उपजिल्हाधिकारी प्रमोद कुदळे, तहसीलदार सचिन मस्के, तहसीलदार रवींद्र रांजणे यांच्यासह कनिष्ठ अभियंता, पोल‍िस कर्मचारी यांनी पार पाडली. पीएमआरडीच्या हद्दीतील अनधिकृत बांधकामांचा सर्वे करण्यात येत असून अशा बांधकामांवर सातत्याने कारवाई होणार असल्याचे महानगर आयुक्त डॉ. योगेश म्हसे यांनी स्पष्ट केले आहे.

-भारतीय जनता मजदूर सेलच्या राष्ट्रीय सचिवपदी संजय आगरवाल तर महाराष्ट्र उपाध्यक्षपदी जयेश टांक यांची नियुक्ती

पुणे : देशाचे पंतप्रधान नरेंद्र मोदी कामगारांच्या हितासाठी कार्यरत आहेत. त्यांनी विविध योजनांच्या माध्यमातून संघटित आणि असंघटीत मजुर, कामगारांना न्याय देण्याचा प्रयत्न केला आहे. भारतीय जनता मजदूर सेल कायम कामगार हितासाठी प्रयत्नशील राहिला आहे. पंतप्रधान मोदी यांनी आणलेल्या कामगार हिताच्या १६७ योजना त्यांच्या पर्यंत पोहचवण्याचे काम आम्ही करत असून असंघटित कामगारांच्या समस्या सोडविण्यास प्राधान्य असल्याचे भारतीय जनता मजदूर सेलचे राष्ट्रीय चेअरमन विष्णुप्रिय रॉय चौधरी यांनी सांगितले.

भारतीय जनता मजदूर सेलच्या राष्ट्रीय सचिवपदी पुण्यातील संजय आगरवाल तर महाराष्ट्र प्रदेशच्या उपाध्यक्ष पदी जयेश टांक यांची नियुक्ती करण्यात आली, त्यांचा नियुक्ती पत्र प्रदान सोहळा आज शुभारंभ लॉन्स येथे आयोजित करण्यात आला होता, यावेळी आयोजित पत्रकार परिषदेत विष्णुप्रिय रॉय चौधरी बोलत होते. यावेळी अखिल भारतीय जनता मजदुर (सेल) अध्यक्ष अर्णब चॅटर्जी, युवा अध्यक्ष दीपक शर्मा, महाराष्ट्र महिला अध्यक्ष सविता पांडे, उमेश शहा,अशोक राठी,सुनील ज्यांज्योत,दिलीप आबा तुपे,नितीन शितोळे,राजेंद्र गिरे यांच्यासह मान्यवर उपस्थित होते.

पुढे बोलताना विष्णुप्रिय रॉय चौधरी म्हणाले, राज्य व केंद्रातील सरकार कामगारांचे हित जोपासण्यावर भर देत आहेत, मात्र कंत्राटी कामगार आणि असंघटीत कामगारांचे प्रमाण मोठे आहे, त्यांचे प्रश्न सोडविण्यासाठी आमचा सेल प्रयत्नशील आहे. देशात सरकारच्या विविध योजना असंघटीत कामगारांसाठी आहेत, परंतु त्यांच्या पर्यंत पोहचत नाहीत, त्या पोहचल्या पाहिजे यासाठी आम्ही प्राधान्य क्रमाने काम करण्याचे ठरवले आहे. पीएफ, इएसआय आदि बाबी कामगारांना मिळतात किंवा नाही हे तपासण्याचे काम आम्ही करत आहोत, कामगारांना विविध योजनांचा लाभ मिळावा आणि त्यांची पिळवणूक होऊ नये यासाठी आम्ही कटिबद्ध आहोत.

अर्णब चॅटर्जी म्हणाले, महाराष्ट्रात सेलचे काम चांगले सुरू आहे. मागील तीन वर्षात आम्ही राज्यात २०० पेक्षा अधिक जास्त शाखा सुरू केल्या आहेत. इतर कामगार संघटनेच्या तुलनेत आम्ही चांगले काम करत असल्याने विविध प्रकारच्या कामगार निवडणूक मध्ये चांगले यश मिळत असल्याचे त्यांनी नमूद केले.

राज्यातील, देशातील कामगारांचे हित जोपासण्यासाठी आणि संघटनेच्या वाढीसाठी व पंतप्रधान नरेंद्र मोदी यांच्या योजना कामगार, मजुर लोकांपर्यंत पोहवण्याचे काम करू असे संजय आगरवाल आणि जयेश टांक यांनी यावेळी मनोगत व्यक्त करताना सांगितले.