खासदार क्रीडा महोत्सवातंर्गत शरीरसौष्ठव स्पर्धेला उत्स्फूर्त प्रतिसाद

पुणे, ता. ३ – एबीएस जिमच्या आकाश दडमल याने केंद्रिय सहकार व नागरी विमान वाहतूक राज्यमंत्री आणि पुण्याचे खासदार मुरलीधऱ मोहोळ यांच्या पुढाकाराने होत असलेल्या पहिल्या खासदार क्रीडा महोत्सवातील शरीरसौष्ठव स्पर्धेतील मा ना खासदार श्रीचा किताब मिळवला.
खासदार क्रीडा महोत्सवात एकूण ३५ क्रीडा स्पर्धांचा समावेश आहे. त्याचा एक भाग म्हणजे महाराष्ट्र बॉडी बिल्डर्स असोसिएशन संलग्न, पुणे जिल्हा हौशी शरीर सौष्ठव संघटनेच्या मान्यतेने, पिंपरी-चिंचवड शरीर सौष्ठव संघना, फेडरेशन ऑफ बॉडीबिल्डिंग अँड फिजिक्स स्पोर्ट्स, पुणे यांच्या संयुक्त विद्यमाने शरीरसौष्ठव स्पर्धेचे आयोजन करण्यात आले होते. गणेश कला क्रीडा येथे ही स्पर्धा झाली. या स्पर्धेत एकूण १४५ स्पर्धक सहभागी झाले होते.
स्पर्धकांना मोफत प्रवेश देण्यात आला होता. सर्व गटातील पहिल्या सहा स्पर्धकांना रोख पारितोषिक देण्यात आले. प्रत्येक गटातील विजेत्यास पाच हजार, उपविजेत्यास तीन हजार रुपये आणि तिस-या क्रमांकास दोन हजार रुपये देण्यात आले. चौथ्या ते सहाव्या क्रमांकावरील प्रत्येकास एक हजार रुपयांचे पारितोषिक देण्यात आले. सहभागी प्रत्येक स्पर्धकाला टी-शर्ट देण्यात आला. त्याचबरोबर इतरही रोख वैयक्तिक पारितोषिके होती.
यात खासदार श्री किताबाचा मानकरी ठरलेल्या आकाश दडमल याला २१ हजार रुपये, मानाचा बेल्ट, मानचिन्ह, प्रशस्तिपत्र देण्यात आले. उद्योन्मुख बॉडिबिल्डर विजेत्याचा पुरस्कार बी. बी. फिटनेसच्या पांडुरंग भोसलेने पटकावला. त्याला दोन हजार रुपये रोख, मानचिन्ह देऊन गौरविण्यात आले. बेस्ट पोझर पुरस्कार यूएफसी जिमच्या विनोद कागडेने मिळवला. त्याला तीन हजार रुपये आणि मानचिन्ह प्रदान करण्यात आले. मोस्ट इम्प्रूव्हड बॉडिबिल्डर हा किताब खालसा जिमच्या भरत चव्हाणने मिळवला. त्यालाही तीन हजार रुपयांचे पारितोषिक मिळाले.
शरीर सौष्ठव स्पर्धेत जास्त करून सर्वसामान्य घरातील मुले असतात. तरुण तंदुरुस्त राहिला, तर देश तंदुरुस्त राहील. त्यासाठीच या स्पर्धांचे आयोजन करण्यात आले आहे. सहभागी प्रत्येक खेळाडूने आपल्या आजूबाजूला असलेल्या मुला-मुलींनाही खेळासाठी प्रोत्साहित केले पाहिजे. जेणेकरून पुण्यातील क्रीडा संस्कृतीचा विकास होईल, असे खासदार मुरलीधर मोहोळ म्हणाले. त्यांनी विजेत्या सर्व खेळाडूंचे अभिनंदन केले.
या वेळी विनोद नायडू, सागर येवले, प्रशांत जगताप, दिलीप धुमाळ, सलीम सय्यद, श्रीकांत टकले, मयूर मेहेर, गौतम तांबे यांनी पंच म्हणून काम पाहिले.
मेन्स फिजिक्स श्री विजेता निखिल चांदगुडे
गल्यास्की फिटनेस जिमचा निखिल चांदगुडे हा स्पर्धेतील मेन्स फिजिक्स श्री या किताबाचा विजेता ठरला. त्याला रोख अकरा हजार रुपये, ट्रॉफी, मानाचा बेल्ट, प्रशस्तिपत्रक देऊन गौरविण्यात आले. विजेत्यांना शिवछत्रपती पुरस्कार विजेते मंदार चावरकर अनिल शिंदे, राजेश इरले, महादेव सपकाळ आणि राजेश सावंत, मनीष पोकळे यांच्या हस्ते गौरविण्यात आले.

निकाल : ५५ किलो गट – १) अभिषेक खरात २) नीलेश गजमल ३) मंगेश गावडे ४) रेहमान नालबंद ५) मयूर गायकवाड ६) समीर साठे.
६० किलो गट – १) ओंकार माने २) प्रकाश मिंडे ३) रोशन विश्वकर्मा ४) विशाल खुडे ५) साहिल वाड ६) हूजेज अंसारी.
६५ किलो गट – १) पांडुरंग भोसले २) अक्षय खोमणे ३) हर्षल काटे ४) प्रतिक पाटील ५) विनय पांचाळ ६) अमित चौगुले.
७० किलो गट – १) सचिन सावंत २) अक्षय वाडीकर ३) अजय रक्ताटे ४) अभिषेक पाटील ५) महेश चौधरी ६) सलिम शेख
७५ किलो गट – १) आकाश दडमल २) विजय सरोज ३) श्रीनाथ गडदे ४) मुस्तकीन ढालाइत ५) ऋषिकेश बेलमकर ६) धीरज लेकावळे
८० किलो गट – १) तुषार चोरगे २) शुभम गिरी ३) प्रशांत धोंडे ४) विनोद कागडे ५) शिवम वडार ६) अजिंक्य सुपेकर
८० किलो वरील – १) भारत चव्हाण २) फिरोज शेख ३) ऋषिकेश बिरेदार ४) साईनाथ सूर्यवंशी ५) संतोष मोहिते ६) सूरज जुगेल
………

वुमेन्स – २०२५ – १) यशोदा भोर २) प्रतिमा कांबळे ३) प्राजक्ता पाटील ४) ज्योस्त्ना डाळिंबकर
मेन्स फिजिक्स (१७० सेमीपर्यंत) १) निखिल चांदगुडे २) अभिषेक सणस ३) अक्षय कोंढरे ४) किरण कोरे ५) प्रतिक पाटील ६) मयूर गायकवाड
मेन्स फिजिक्स (१७० सेमीवरील) १) रुपेश कसबे २) सुशांत जाधव ३) निलेश कलंगगोट ४) श्रीनाथ गदादे ५) सूरज पाटील ६) मुस्तकीन धलाईत

सहकार करंडक क्रिकेट स्पर्धेला सुरुवात ; पुणे नागरी सहकारी बँक्स असोसिएशनच्या वतीने आयोजन

पुणे : पुणे पीपल्स को ऑपरेटिव्ह बँकेने पुणे नागरी सहकारी बँक्स असोसिएशनच्या वतीने पुणे जिल्ह्यातील सर्व नागरी सहकारी बँकांसाठी आयोजित आंतरसहकारी बँक सहकार करंडक क्रिकेट स्पर्धेत पुणे अर्बन को-ऑपरेटिव्ह बँकेवर ३७ धावांनी मात केली.

सहकारनगर येथील शिंदे हायस्कूलच्या मैदानावर ही लढत झाली. पुणे पीपल्स बँकेने निर्धारित ८ षटकांत सहा बाद ८१ धावा केल्या. लक्ष्याचा पाठलाग करताना पुणे अर्बन को-ऑपरेटिव्ह बँकेला ७ बाद ४४ धावाच करता आल्या. यात मंगेश वाडकरने अष्टपैलू कामगिरी केली.

दुस-या लढतीत साधना सहकारी को-ऑपरेटिव्ह बँकेने धर्मवीर संभाजी अर्बन को-ऑपरेटिव्ह बँकेवर ८० धावांनी मात केली. साधना सहकारी बँकेने २ बाद ११६ धावा केल्या. धर्मवीर बँकेला ५ बाद ३६ धावाच करता आल्या.

‘सहकार करंडक क्रिकेट स्पर्धा २०२५’ चे उद्घाटन राज्याचे सहकार आयुक्त दीपक तावरे यांच्या हस्ते झाले. आंतरराष्ट्रीय सहकार वर्ष (२०२५) निमित्ताने आयोजित स्पर्धेचा उद्घाटन समारंभ पंडित नेहरू स्टेडियम येथे पार पडला. यावेळी असोसिएशनचे अध्यक्ष निलेश ढमढेरे, उपाध्यक्ष रमेश वाणी, मानद सचिव अॅ’ड. सुभाष मोहिते, मुख्य कार्यकारी अधिकारी चंद्रकांत शेळके, संचालक प्रल्हाद कोकरे, राजेश कवडे, सय्यद मोहम्मद गौस शेर अहमद, संजय शेवाळे, कांतीलाल गुजर, बाबुराव शितोळे, प्रिया महिंद्रे, नंदा लोणकर, युवराज वारघडे आणि इतर बँकेचे वंदना काळभोर, कमल व्यवहारे, गौतम कोतवाल, अनिरुद्ध देसाई, दीपक घाडगे, अजय रजपूत, जितेंद्र पायगुडे आदी उपस्थित होते. 

धावफलक : १) पुणे पीपल्स को-ऑपरेटिव्ह बँक – ८ षटकांत ६ बाद ८१ (मंगेश वाडकर २५, किशोर तुपे नाबाद २१, उमेश कोतकर २१, मोरेश्वर ढमढेरे २-०-११-२, किरण चौबोरे २-०-१९-१, तुषार साबळे १-०-१५-१) वि. वि. पुणे अर्बन को-ऑपरेटिव्ह बँक – ८ षटकांत ७ बाद ४४ (आदित्य ढमढेरे ५, मंगशे वाडकर २-०-६-२, संतोष साबळे २-०-११-१, चंद्रकांत पवार २-०-४-१, प्रतिक गुजराती १-०-१०-१).

२) साधना सहकारी को-ऑपरेटिव्ह बँक – ८ षटकांत २ बाद ११६ (रोहन तिखे ४५, सुमीत गावडे नाबाद ३४, गोपाळ मुंडे नाबाद २०) वि. वि. धर्मवीर संभाजी को-ऑपरेटिव्ह बँक – ८ षटकांत ५ बाद ३६ (सचिन कडू १२, गोपाळ मुंडे १-०-३-१, सागर माथवड १-०-२-१).

पुणे -अनेक वर्षांपासून रखडलेल्या चांदणी चौक ते पाषाण दरम्यान मुख्य रस्त्याकडे प्रशासनाचे लक्ष वेधून येथे प्रत्यक्ष अधिकाऱ्यांना पाचारण करून माजी नगरसेवक दिलीप वेडेपाटील यांनी नागरिकांच्या भावना त्यांच्या निदर्शनास आणून दिल्या . बावधन परिसरातील चांदणी चौक ते पाषाण दरम्यानचा 36 मीटर मुख्य रस्ता, ड्रेनेज व पावसाळी लाईनचे अनेक वर्षांपासून रखडलेले आहे या ठिकाणी अतिरिक्त आयुक्त ओमप्रकाश दिवटे यांनी प्रत्यक्ष भेट देऊन पाहणी केली.

या कामाच्या विलंबामुळे परिसरातील नागरिकांना वाहतुकीची मोठी गैरसोय, साचलेल्या पाण्यामुळे अस्वच्छता आणि आरोग्यविषयक समस्या भेडसावत होत्या. विशेषतः पावसाळ्यात रस्त्यावर चिखल व पाणी साचल्याने वाहनचालक व पादचारी दोघांनाही त्रास सहन करावा लागत होता.या पार्श्वभूमीवर माजी नगरसेवक दिलीप वेडेपाटील यांनी अनेक वर्षांपासून या कामासाठी सातत्यपूर्ण आणि ठामपणे पाठपुरावा केला आहे. त्यांनी प्रशासनाच्या विविध स्तरांवर बैठक घेत कामाची गती वाढविण्याचा सातत्याने आग्रह धरला.या प्रयत्नानंतर अतिरिक्त आयुक्त ओमप्रकाश दिवटे यांनी आज स्थळ पाहणी करून संबंधित विभागांना काम तात्काळ सुरू करण्याच्या स्पष्ट सूचना दिल्या.

पाहणीदरम्यान पथ विभागाचे अजित आंबेकर, भुताडा, सुनिल भोंगळे,मालमत्ता विभागाचे उपआयुक्त प्रशांत ठोंबरे, अभिषेक घोरपडे
बांधकाम विभागाचे बोबडे, महेश शेळके,भू संपादन विभागाचे मोरे,कोथरूड-बावधन क्षेत्रीय कार्यालयाचे सहाय्यक आयुक्त विजय नायकल, आरोग्य अधिकारी व अभियंता,ड्रेनेज विभागाचे सुभाष फावरा, अजिक्य वानखडे, रुचिता बावणकर अशी अधिकाऱ्यांची मोठी फौजच अवतरली होती त्यामुळे आता नगरसेवक दिलीप वेडेपाटील यांनी हे अनेक वर्षांपासून रखडलेले मुख्य रस्ता, ड्रेनेज व पावसाळी लाईनचे काम आता लवकरच सुरू होणार आहे असा विश्वास व्यक्त केला आहे .

कविसंमेलनास उत्स्फूर्त प्रतिसाद : पुणे बुक फेअरचा समारोप
पुणे : कविता माणसाला जगण्याचे बळ देते. सामाजिक जाणिवेच्या व वेदनांवर फुंकर घालणाऱ्या कविता सादर करून कवींनी आपल्यातील प्रतिभा सिद्ध केली आहे, असे प्रतिपादन महाराष्ट्र साहित्य परिषदेच्या पिंपरी-चिंचवड शाखेचे अध्यक्ष राजन लाखे यांनी अध्यक्षपदावरून बोलताना व्यक्त केले.
एक्सपो सेंटर, महाराष्ट्र साहित्य परिषद, आकाशवाणी, महाराष्ट्र राज्य शिक्षण विभाग प्रोफेशनल टीचर्स असोसिएशन व सूर्यदत्ता ग्रुप ऑफ इन्स्टिट्यूट यांच्या सहकार्याने कविसंमेलनाचे आयोजन करण्यात आले होते. आपटे रोडवरील सेंट्रल पार्क येथे 23व्या पुणे पुस्तक जत्रा व मराठी साहित्य मेळा येथे कविसेंमलन रंगले. पुणे बुक फेअरचे आयोजक पी. एन. आर. राजन, महाराष्ट्र साहित्य परिषद पुणेचे कार्यवाह शिरीष चिटणीस उपस्थित होते. कविसंमेलनाने पुणे बुक फेअरचा समारोप झाला.
कविसंमेलनामध्ये अंजली कुलकर्णी, मृणालिनी कानिटकर, जोत्स्ना चांदगुडे, वि. दा. पिंगळे, माधव राजगुरू, सविता कुरुंदवाडे, रुद्रांश जगताप, डॉ क्षितिजा पंडित, रूपाली अवचरे, प्रशांत निकम, डॉ प्रेरणा उबाळे, शरयू पवार, डॉ. राहुल भोसले, विनोद अष्टूळ, रमेश जाधव, दशरथ दूनधव, डॉ मृणालिनी गायकवाड, डॉ. लता पाडेकर, डॉ. गोविंद सिंग राजपूत, ज्योत्स्ना बिडवे, आकांक्षा अग्रवाल आदी मान्यवर कवी सहभागी झाले होते. कवींनी सादर केलेल्या कवितांवर मार्मिक भाष्य करत राजन लाखे यांनी कार्यक्रम रंगवत नेला. आभारप्रदर्शन सूर्यदत्ता ग्रुप ऑफ इन्स्टिट्यूटचे प्रा. सुनील धनगर यांनी केले. कविसंमेलनास उपस्थित प्रेक्षकांनी उत्स्फूर्त प्रतिसाद दिला.

पुणे : पिंपरी पोलीस दलातील आर्थिक गुन्हे शाखेतील पीएसआयवर लाच लुचपत प्रतिबंधक विभागाने केलेल्या सापळा कारवाईची देशपातळीवर गंभीर दखल घेण्यात आली आहे. सीबीआयच्या लाच लुचपत प्रतिबंधक विभागाने या प्रकरणाची चौकशी केली आहे. त्यात पोलीस उपनिरीक्षक प्रमोद चिंतामणी याने तुम्ही दिलेल्या रक्कमेत आम्ही आमचे बघुन घेऊ. सीपी, डिसीपी यांना मॅनेज करु, असे म्हणाल्याने पिंपरी चिंचवड पोलीस लाच लुचपत प्रतिबंधक विभागाच्या रडारवर आले आहे. दरम्यान, पोलीस उपनिरीक्षक प्रमोद चिंतामणी याला शिवाजीनगर येथील विशेष न्यायालयात हजर करण्यात आले. विशेष न्यायालयाने अधिक तपासासाठी ६ नोव्हेंबरपर्यंत पोलीस कोठडी मंजूर केली आहे.

पोलीस उपनिरीक्षक प्रमोद चिंतामणी याला २ कोटी रुपयांची लाच मागून त्यातील पहिला हप्ता म्हणून ४६ लाख ५० हजार रुपये घेताना सापळा कारवाईत पकडण्यात आले.४ कोटी रुपयांच्या फसवणुकीच्या गुन्ह्यात अटक करण्यात आलेल्या आरोपीच्या जामीन अर्जावर से देण्यासाठी अगोदर चिंतामणी याने २ लाख रुपयांची मागणी तक्रारदार यांच्याकडे पोलीस निरीक्षक संदिप सावंत यांच्या केबिनमध्ये केली. तसेच तक्रारदार वकील यांना संदिप सावंत व चिंतामणी यांनी त्यांच्या केबिनमध्ये अरेरावीची भाषा केली असल्याचे फिर्यादीमध्ये नमूद करण्यात आले आहे.

चिंतामणी याने मला एक कोटी व साहेबांना १ कोटी रुपये द्या, अशी मागणी केली. वर साहेबांना हा विषय बोलू नका, असे म्हणाले. त्यानंतर अशिलाविरुद्ध दाखल असलेल्या गुन्ह्याबाबत चर्चा झाली. त्यावेळी चिंतामणी हे तक्रारदार यांना ‘‘तुम्ही दिलेल्या रक्कमेत आम्ही आमच बघुन घेऊ, सीपी, डिसीपी यांना मॅनेज करु, असे म्हणाले, असे फिर्यादीत नमूद करण्यात आले आहे. त्यानंतर चिंतामणी याचे तक्रारदार वकीलांच्या अशिलाशी बोलणे झाले. त्यानंतर चिंतामणी हे तक्रारदार ‘‘ त्याला उदया दोन कोटी पोहोचवायला लावा’’असे म्हणाले.

त्यानंतर चिंतामणी याने पोलीस निरीक्षक संदिप सावंत यांची भेट घडवून आणली तेव्हा लाच लुचपत प्रतिबंधक विभागाचे पंच समवेत होते . तेव्हा पोलीस निरीक्षक सावंत तक्रारदार यांना म्हणाले, फिर्यादीचे पैसे मिळत असतील तर ठिक आहे, किती दिवसात पाठवताय सांगा, असे म्हणाले. त्यावर तक्रारदार यांनी त्यांना तीन चार दिवसात असे म्हणाले, त्यानंतर त्यांच्यात अशिलाच्या जामीन अर्जावरील सुनावणीबाबत चर्चा झाली. त्यावेळी चिंतामणी यांनी सावंत यांना आपण म्हणल्याप्रमाणे मी त्यांना १ सीआरचे बोललो, की एक कराच तुम्ही, असे म्हणाले. त्यावर पोलीस निरीक्षक सावंत तक्रारदार यांना ‘‘म्हटल्याप्रमाणे प्रश्नच नाही, त्यावरती काही विश्वास नाही’’ असे बोलले. तक्रारदार व पंच यांच्याबरोबर बोलताना पोलीस निरीक्षक संदिप सावंत यांनी प्रत्यक्ष लाचेची मागणी केली नाही.

त्यानंतर तक्रारदार यांनी चिंतामणी याला अशिलाने ४५ लाख रुपयांची सोय केली आहे. माझ्याकडील दीड लाख रुपये असे ४६ लाख ५० हजार रुपये देतो, असे सांगितले. त्यानंतर दीड लाख रुपयांची रोकड आणि ४५ लाखांच्या बनावट नोटा असे ४६ लाख ५० हजार रुपयांचे बंडल तयार करण्यात आले. चिंतामणी याला रास्ता पेठेतील पुना कॅफेमध्ये वरील मजल्यावर बोलवले. ते तिथे आले व त्यांनी इथे नको, इथे कॅमेरे आहेत, असे म्हणाले. त्यानंतर तक्रारदार व पंच चालत उंटाड्या मारुती मंदिरासमोर पोहचले. तेथे चिंतामणी याने रिक्षा केली. रिक्षाच्या मागील बाजूला लाचेची रक्कम असलेली पिशवी ठेवली. चिंतामणी रिक्षामध्ये बसत असताना त्याने लाचेची रक्कम असलेली पिशवी एका हाताने उचलत असताना सापळा पथकाने त्याला ताब्यात घेतले.

या कारवाईत चिंतामणी याने पोलीस आयुक्त, पोलीस उपायुक्त यांचे नाव घेतले. तसेच पोलीस निरीक्षक संदिप सावंत यांच्या केबिनमध्ये चर्चा झाल्याचा उल्लेख करण्यात आला आहे. एखादा पीएसआय इतकी मोठी लाच कशी मागू शकतो, असा प्रश्न उपस्थित करुन सीबीआयने या कारवाईची दखल घेतली आहे. त्यामुळे पिंपरी चिंचवड पोलीस दल रडारवर आले आहे.

पुणे, दि. ३- जिल्ह्यातील पदवीधर व मान्यताप्राप्त माध्यमिक तसेच उच्च माध्यमिक शाळांमधील शिक्षकांनी मतदार नोंदणीसाठी येत्या ६ नोव्हेंबरपर्यंत अर्ज दाखल करावेत, असे आवाहन जिल्हाधिकारी जितेंद्र डुडी यांनी केले आहे.

जिल्हाधिकारी जितेंद्र डुडी यांनी आज व्हिडिओ कॉन्फरन्सद्वारे पदवीधर व शिक्षक मतदार नोंदणीच्या प्रगतीचा आढावा घेतला. या बैठकीस निवडणूक उपजिल्हाधिकारी मीनल कळसकर, तसेच जिल्ह्यातील सर्व प्रांताधिकारी व तहसीलदार उपस्थित होते.

जिल्ह्यातील एकही शासकीय अधिकारी वा कर्मचारी पदवीधर मतदार नोंदणीपासून वंचित राहू नये, यासाठी तालुकास्तरावर मिशन मोडमध्ये नोंदणी मोहीम राबवावी, अशा सूचना जिल्हाधिकाऱ्यांनी दिल्या. यासाठी प्रांताधिकारी यांनी तात्काळ तालुकास्तरीय अधिकाऱ्यांची बैठक घेऊन प्रलंबित नोंदणी पूर्ण करण्यावर भर द्यावा, असेही त्यांनी सांगितले.

पदवीधर मतदार नोंदणीसाठी राजकीय पक्ष, महाविद्यालये तसेच शैक्षणिक संस्था यांचे सहकार्य घेण्याचे निर्देश देत, शिक्षकांनाही पदवीधर मतदार म्हणून नोंदविण्यावर भर द्यावा, असे जिल्हाधिकाऱ्यांनी स्पष्ट केले.

मान्यताप्राप्त माध्यमिक व उच्च माध्यमिक शाळांमधील शिक्षकांची माहिती घेऊन नोंदणी करावी आणि एकही शिक्षक नोंदणीपासून वंचित राहू नये, यासाठी प्राचार्य व मुख्याध्यापकांची बैठक आयोजित करावी, अशा सूचनाही जिल्हाधिकारी जितेंद्र डुडी यांनी दिल्या.

पुणे, दि. ३ नोव्हेंबर : पुणे येथे होणाऱ्या ७१ व्या सवाई गंधर्व संगीत महोत्सव सन २०२५ या कार्यक्रमास जिल्हाधिकारी जितेंद्र हुडी यांनी, त्यांना प्राप्त झालेल्या अधिकारानुसार ध्वनी प्रदूषण (नियमन व नियंत्रण) सुधारीत नियम २०१७ च्या नियम ५ उपनियम (३) नुसार १३ डिसेंबर २०२५ रोजी सकाळी ६.०० वाजेपासून रात्री १२.०० वाजेपर्यंत ध्वनीक्षेपक व ध्वनीवर्धक यंत्रणेचा वापर करण्यास परवानगी दिली आहे. या कालावधीत ध्वनीची विहीत मर्यादा काटेकोरपणे पाळावी, असेही आदेशात नमूद करण्यात आले आहे.

पुणे, दि. ३ : पुणे शहरातील काळेपडळ वाहतूक विभागांतर्गत वाहतूक सुरक्षित व सुरळीत होण्यासाठी महाराष्ट्र शासन गृह विभागाच्या आदेशानुसार (क्र. एम.व्ही.ए. ०११६/८७१/सीआर ३७/ठीआरए २, दिनांक २७ सप्टेंबर १९९६) आणि मोटार वाहन कायदा कलम ११५, ११६(१)(२)(बी), ११६(४) व ११७ अन्वये पोलीस उपायुक्त (वाहतूक शाखा) हिंमत जाधव यांनी आपल्या अधिकाराचा वापर करून कात्रज मंतरवाडी रोड व हांडेवाडी चौक परिसरात प्रायोगिक स्वरूपात खालीलप्रमाणे तात्पुरते वाहतुकीचे बदल लागू करण्याचे आदेश निर्गमित केले आहेत.
काळेपडळ वाहतूक विभागाच्या कार्यक्षेत्रात करण्यात आलेल्या या प्रायोगिक बदलांनुसार – श्रीराम चौक (जे.एस.पी.एम. कॉलेज) ते हांडेवाडी चौक मार्गावरून होळकरवाडी व कात्रजकडे जाणारी दुचाकी, चारचाकी व हलकी मोटार वाहने डावीकडे वळतील. कात्रजकडून येणाऱ्या वाहनांनी मंतरवाडीच्या दिशेने १०० मीटर पुढे जाऊन जोगेश्वरी मिसळ हॉटेलसमोरून उजवीकडे वळून ‘यू-टर्न’ घेऊन इच्छित स्थळी जाता येईल.
त्याच मार्गावरील जड व अवजड मोटार वाहनांनी मंतरवाडीच्या दिशेने २५० मीटर अंतरावर असलेल्या इंडियन ऑइल पेट्रोल पंपासमोरील हॉनेस्टी स्टील दुकानाजवळून उजवीकडे वळून ‘यू-टर्न’ घ्यावा.
होळकरवाडी व मंतरवाडी येथून येणारी दुचाकी व हलकी वाहने हांडेवाडी चौकातून कात्रजच्या दिशेने १०० मीटर पुढे जाऊन शिवेंद्र हॉटेलसमोरून उजवीकडे वळून ‘यू-टर्न’ घेऊन श्रीराम चौक, सय्यदनगर, हडपसर या दिशेने जाता येईल.
होळकरवाडी व मंतरवाडी येथून येणाऱ्या जड व अवजड वाहनांना कात्रजच्या दिशेने २५० मीटर पुढे जाऊन मयुरी वजनकाटा परिसरातून घृव शाळेसमोर उजवीकडे वळून ‘यू-टर्न’ घेऊन पुढे इच्छित स्थळी जाता येईल.
नागरिकांना कळविण्यात येते की, या तात्पुरत्या प्रायोगिक वाहतूक बदलांबाबत आपल्या सूचना व हरकती १६ नोव्हेंबर 2025 दरम्यान लेखी स्वरूपात पोलीस उपायुक्त (वाहतूक नियंत्रण शाखा), बंगला क्र. ६, एअरपोर्ट रोड, येरवडा पोस्ट ऑफिससमोर, पुणे येथे सादर करता येतील. प्राप्त सूचनांचा विचार करून अंतिम आदेश जाहीर करण्यात येतील. अत्यावश्यक सेवेतील वाहने (उदा. फायर ब्रिगेड, पोलीस वाहने, रुग्णवाहिका इ.) यांना सूट देण्यात आली आहे, असे पोलीस उपायुक्त हिंमत जाधव यांनी पत्रकान्वये कळविले आहे.