पुणे, दि.१४ एप्रिल : ” भारत देशाला नवी दिशा देण्याचे कार्य डॉ. बाबासाहेब आंबेडकर यांच्या कार्यांनी केले आहे. भारतीय संस्कृती, तत्वज्ञान आणि परंपरेचा धागा पकडून त्यांनी संपूर्ण मानव जातीचा उद्धार केला आहे. सदगुणांची पूजा हीच ईश्वर पूजा आहे.” असे विचार एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्वनाथ दा. कराड यांनी व्यक्त केले.
प्रबुद्धनायक महामानव भारतरत्न डॉ. बाबासाहेब आंबेडकर यांची १३४वीं जयंती एमआयटी वर्ल्ड पीस युनिव्हर्सिटीच्या वतीने कोथरूड येथील विद्यापीठाच्या परिसरात साजरी केली. या वेळी विश्वधर्मी प्रा.डॉ. विश्वनाथ दा. कराड यांनी आपले विचार व्यक्त केले.
या प्रसंगी एमआयटी डब्ल्यूपीयूचे कुलगुरू डॉ. आर.एम.चिटणीस, कुलसचिव प्रा. गणेश पोकळे, नागपूर विद्यापीठाचे माजी कुलगुरू डॉ. एस.एम.पठाण, सल्लागार डॉ. संजय उपाध्ये, डॉ. विश्वजीत नागरगोजे, प्रा.डॉ. दत्ता दंडगे, विद्यापीठाच्या डॉ. बाबासाहेब आंबेडकर अध्यासनाचे प्रमुख प्रा. विनोद जाधव उपस्थित होते.
डॉ. विश्वनाथ दा.कराड म्हणाले,” संपूर्ण जगात भारताची ओळख ही म. गांधी, भगवान गौतम बुद्ध आणि डॉ. बाबासाहेब आंबेडकर यांच्यामुळे आहे. त्यामुळे डॉ. बाबासाहेब आंबेडकर यांचे पंचशील जीवनात उतरावे.”
डॉ. एस.एन.पठाण म्हणाले,” युगपुरूष डॉ. आंबेडकर यांना केवळ ६५ वर्षांचे जीवन लाभले खरे परंतू त्यांचे कार्य अद्वितीय आहे. यातील ३५ वर्ष शिक्षणात गेले. त्यांना केवळ २५ वर्षे काम करण्यासाठी मिळाले. त्यात काळात त्यांनी शिक्षण संस्थेंची स्थापना, सत्याग्रह, नियतकालिकांची निर्मिती, पक्ष काढणे तसेच विपूल लेखन आणि सर्वात महत्वाचे २३ ग्रंथांचे लिखान केले आहे. शिक्षणा शिवाय पर्याय नाही त्यांचा हा संदेशच मानव जातीच्या उध्दारासाठी अत्यंत महत्वाचा आहे.”
डॉ. आर.एम.चिटणीस म्हणाले,” डॉ. आंबेडकर यांनी ३२ विषयांमध्ये पदव्या घेतल्या होत्या. ९ भाषा अवगत असणारे युगपुरूष डॉ. बाबासाहेब यांनी सतत कठोर परिश्रम, समर्पण, सतत शिकत राहणे या गुणांचा विसर होऊ दिला नाही.”
डॉ. संजय उपाध्ये म्हणाले,” शिक्षण हे शस्त्रा प्रमाणे आहे. त्याचा उपयोग कसा करावे हे ज्याने त्याने ठरवावे. प्रगती करावयाची असेल तर जुन्या गोष्टींचे विस्मरण हे उच्चत्तम बुद्धीमत्तेचे लक्षण आहे.”
डॉ. दत्ता दंडगे म्हणाले,” डॉ. आंबेडकर यांनी समतेसाठी चळवळ उभी केली होती. तसेच त्यांनी पाण्यासाठी सत्याग्रह केला. १४ तळ्यांची चळचळ ही इतिहासातील अत्यंत महत्वाची घटना आहे. समाजातील दांभिकतेला न्याय मिळवून देण्यासाठी त्यांनी आपले जीवन अर्पीत केले होते.”
यानंतर प्रा. गणेश पोकळे, डॉ. जोशी आणि प्रदिप चाफेकर यांनी डॉ. बाबासाहेब आंबेडकर यांच्या कार्याला उजाळा दिला तसेच कवितेचे वाचन केले.
प्रा. विनोद जाधव यांनी सूत्रसंचालन व आभार मानले.

सत्ताधारी व विरोधकांची ‘संविधानीक कर्तव्यपुर्ती’ हीच बाबासाहेबांना आदरांजली..!
⁃ काँग्रेस राज्य प्रवक्ते गोपाळदादा तिवारी
पुणे दि १४ –
प्रत्येकास समान मताचा अधिकार देणारे संविधान हीच भारताची ओळख असुन, संविधानाचे मुल्य जपले तरच खऱ्या अर्थाने श्रेष्ठ भारत, आत्मनिर्भर भारत होऊ शकतो.
संविधानीक मुल्यांची व देशाच्या स्वायत्त संस्थांची पायमल्ली रोखत देशाची वाटचाल ‘संविधान आधारित’ होण्याकडे लक्ष ठेवणे, हे विरोधी पक्षांचे कर्तव्य असुन विरोधी पक्षांची संविधानीक कर्तव्यपुर्ती ही डॅा बाबासाहेब आंबेडकरांना खरी आदरांजली ठरेल असे प्रतिपादन काँग्रेसचे राज्य प्रवक्ते गोपाळदादा तिवारी यांनी अभिवादनपर कार्यक्रमात बोलतांना केले.
“महाराष्ट्र प्रदेश काँग्रेस लिगल विभागा”च्या वतीने
महामानव, भारतरत्न डॅा बाबासाहेब आंबेडकर यांच्या जयंती दिनी, पुणे मनपा येथील डॅा आंबेडकरांचे प्रतिमेस पुष्पहार अर्पण करून अभिवादन कार्यक्रमात बोलतांना त्यांनी केले.
कार्यक्रमाचे संयोजक सरचिटणीस ॲड फैयाझ शेख यांनी स्वागत – प्रास्ताविक केले. ऊपध्यक्ष ॲड शहीद अख्तर यांनी मनोगत व्यक्त केले. या प्रसंगी ॲड श्रीकांत पाटील, ॲड सुरेश नांगरे, ॲड बाळासाहेब बामणे, ॲड विजय तिकोणे, ॲड अतुल गुंड पाटील, ॲड राजाभाऊ चांदेरे, ॲड इराफन शेख, ॲड सुरेश देवकर, ॲड आलीस सय्यद, इंटकचे मनोहर गाडेकर, जेष्ठ काँग्रेसजन सुरेश नांगरे, सुभाष जेधे, गणेश शिंदे, धनंजय भिलारे, विना कदम, अनिल धिमधीमे, विक्रांत धोत्रे इ उपस्थित होते…
या प्रसंगी संविधान प्रतींचे वाटप व सामुहीक वाचन करण्यात आले.
विविध धर्मिय स्वातंत्र्य सेनानींच्या प्रदीर्घ ब्रिटीश विरोधी लढ्यामुळे, बलीदानामुळे भारत लोकशाही प्रणीत प्रजासत्ताक देश म्हणून जगासमोर ऊभा राहिला. स्वातंत्र्या करीता वाहीलेल्या बलिदानाचे महत्व लक्षांत घेता, भविष्याची काळजी वहात ‘भारतिय संविधाना प्रती’ जागरूक राहून, भारतीय घटनेचे रक्षण करणे हे भारतीय नागरिकाचे देशाप्रती कर्तव्य ठरणार आहे. संविधानीक लोकशाहीत जागरुक नागरिकच् त्याच्या भविष्याचा शिल्पकार असून, भारताची संविधान आधारीत वाटचालीवर पहारा ठेवणे हीच खऱ्या अर्थाने डॅा बाबासाहेबांना आदरांजली ठरेल” अशा भावना उपस्थितींनी व्यक्त केल्या. ॲड राजेंद्र काळेबेरे यांनी आभार प्रदर्शन यांनी केले.

डॉ बाबासाहेब आंबेडकर जयंती निमित्त ‘भीम फेस्टिव्हल’

पुणे- ज्यांनी आपल्याला सामाजिक गुलामीतून मुक्त करून आपल्याला माणूस म्हणून जगण्याचा हिरावून घेण्यात आलेला हक्क मिळवून दिला अशा पद्धतीने मिळवून दिला कि त्यांच्या जीवनाचा हा आदर्श पिढ्यानपिढ्या पुढे चालणार आहे, आणि पिढ्यानपिढ्याच्या जीवनात या महापुरुषाच्या कार्याचे योगदान अढळ राहणार आहे असे सांगत काँग्रेस पक्षाचे ख्यातनाम ,आणि अभ्यासू नगरसेवक असा लौकिक प्राप्त नेते अविनाश बागवे यांनी येथे वंदनीय डॉ बाबासाहेब आंबेडकर यांना अभिवादन केले.आणि डॉ बाबासाहेब आंबेडकर यांच्या १३४ व्या जयंतीनिमित्त ‘भीम फेस्टिव्हल’ चे उद्घाटन केले.

यावेळी ते म्हणाले,’ डॉ आंबेडकरांच्या कार्यामुळेच आपल्या संविधानात न्याय, समानता आणि स्वतंत्रतेचे सिद्धांत समाविष्ट केले गेले. बाबासाहेबांच्या विचारांनी लाखो लोकांना हक्क दिले, त्यांच्या कष्टामुळेच शिक्षण, समानता, कष्ट याची जाणीव झाली. त्यांच्या जीवनाचा आदर्श पिढ्यानपिढ्या पुढे चालणार आहे. आज त्यांच्या कर्तृत्वाचा सन्मान म्हणून आपण त्यांची जयंती साजरी करतो. यानिमित्ताने पुणे कॅन्टोमेंट विधानसभा मतदार संघातील मंगळवार पेठेतील भीमनगर येथे वंदनीय डॉ बाबासाहेब आंबेडकर यांच्या १३४ व्या जयंतीनिमित्त ‘भीम फेस्टिव्हल’ चे आयोजन करण्यात आले होते. यावेळी याचे उदघाटन काँग्रेस पक्षाचे नेते अविनाश बागवे, व अल्पसंख्यांक विभागाचे पुणे शहराचे पदाधिकारी, माजी नगरसेवक मुक्तार शेख, तसेच या फेस्टिव्हल चे आयोजक किशोर भोसले, रवींद्र भिंगारे या कार्यक्रमास उपस्थित होते. यावेळी अत्यंत सुंदर पद्धतीने सांस्कृतिक कार्यक्रम सोहळा पार पडला. या कार्यक्रमाचे वैशिष्ट्य म्हणजे जेष्ठ नागरिक जे प्रत्येक परिसराचा आधारस्तंभ असतात, अशा जेष्ठ नागरिक ज्यांच्या लग्नाला २५ वर्ष होऊन गेली आहेत अशा नागरिकांचा जोडीने सत्कार समारंभ आयोजित करण्यात आला. यावेळी मोठ्या संख्येने नागरिकांनी उपस्थिती लावली व या कार्यक्रमाचे कौतुकही केले. यावेळी नागरिकांशी संवाद साधत वंदनीय डॉ बाबासाहेब आंबेडकर यांना अभिवादन केले.

पुणे – द्वेषावर आधारित राजकारण करून मिरवणाऱ्या तकलादू देशभक्तांच्या काळात सध्या डॉ.बाबासाहेब आंबेडकर यांचे विचार आणि संविधान देशाला योग्य दिशेला नेईल, असे प्रतिपादन माजी आमदार, महाराष्ट्र प्रदेश काँग्रेसचे उपाध्यक्ष मोहन जोशी यांनी केले.

भारतरत्न डॉ बाबासाहेब आंबेडकर यांच्या जयंतीनिमित्त अभिवादन करण्यासाठी काॅंग्रेस पक्षाच्या वतीने कार्यक्रम घेण्यात आला. डॉ बाबासाहेब यांनी क्रांतीकारी आणि दूरदृष्टीचे विचार मांडले. त्यातूनच लोकशाहीला बळकटी आली, असे या कार्यक्रमात बोलताना मोहन जोशी यांनी सांगितले.

या प्रसंगी सुनिल मलके, प्रशांत सुरसे, सुरेश कांबळे, प्रथमेश अबनावे, चेतन आग्रवाल, स्वाती शिंदे, साजीद शेख, विकास माने, पंकज बनसोडे, विक्रांत दिवेकर, व इतर मान्यवर पदाधिकारी उपस्थित होते.

पुणे-पंतप्रधान नरेंद्र मोदी हे सामान्यांना केंद्रस्थानी ठेऊन विविध योजनांची आखणी करत असतात. त्यांच्या ह्या दृष्टिकोणामुळेच ते लोकप्रिय झाले आहेत.विमानप्रवास हा सामान्य नागरिकांच्या आवाक्यात यावा यासाठीच्या प्रयत्नांना यश आले आहे. मात्र ,विमानतळावर मिळणारे खाद्यपदार्थ खूप महागडे विक्री केले जात असून त्याचे दर सामान्य ठेवण्यासाठी विमानतळावर स्वस्त दरातील उडान यात्री कॅफे सुरु करावेत अशी मागणी क्रिएटिव्ह फाउंडेशनचे अध्यक्ष आणि भाजप प्रवक्ते संदीप खर्डेकर यांनी केली आहे.तसेच विमानतळावरील प्रतीक्षा काळ कमी करणेसाठी नागरी हवाई राज्यमंत्री मुरलीधर मोहोळ यांना पत्र देखील पाठविण्यात आल्याचे त्यांनी सांगितले.

खर्डेकर म्हणाले, विमानतळावर मिळणाऱ्या खाद्य पदार्थांच्या किंमती सामान्यांच्या आवाक्याबाहेरच आहेत. नुकतेच पुणे ते हैद्राबाद ह्या विमानप्रवासात ते प्रकर्षाने जाणवले. पुणे विमानतळावर वडापाव 120 रुपये, सामोसा 130 रुपये तर ब्रेड पॅटिस 150 रुपये ह्या हवाई दरात विक्रीसाठी उपलब्ध आहेत. चहा तर 200 रुपये च्या घरात आहे. ब्रँडेड दुकानामध्ये तर दर गगनाला भिडलेलेच आहेत. अगदी चितळेची बाकरवडी 800 रुपये किलो तर लक्ष्मीनारायण चिवडा 900 रुपये किलोने उपलब्ध होता.आपण ,नुकतेच कोलकाता विमानतळावरील उडान कॉफी शॉपला भेट दिली होती.जेथे स्वस्त दरात चहा,कॉफी, पाणी व इतर पदार्थ उपलब्ध आहेत. याच धर्तीवर सर्वच विमानतळावर उडान यात्री कॅफे सुरु केल्यास सामान्य प्रवासी यांना दिलासा मिळेल. किमान केंद्रीय हवाई नागरी राज्यमंत्री यांनी गृहनगर पुणे येथून ही सुविधा त्वरित सुरु करावी अशी मागणी करण्यात आली.

तसेच प्रवाश्यांना विनाकारण तीन तीन तास आधीच विमानतळावर येण्यास सांगितलं जातं.त्यासाठी घरून विमानतळापर्यंतचा एक तास प्रवासाचा धरला तर अवघ्या अर्धा तास, किंवा 50 मिनिटांच्या प्रवासासाठी 4 तास प्रतीक्षा करावी लागते. हा कालावधी कमी करता आला तर योग्य होईल. त्यासाठी अधिकचे बॅगेज चेक इन कॉऊंटर व सुरक्षा तपासणी कॉऊंटर केल्यास लांबलचक रांगा व उड्डाणापूर्वीचा प्रतीक्षा कालावधी कमी करता येईल असे मत त्यांनी व्यक्त केले.

पुणे-विश्वरत्न डॉ. बाबासाहेब आंबेडकर यांच्या जयंती निमित्त रिपब्लिकन पक्षाच्या वतीने पुणे स्टेशन येथील पुतळ्यास प्रदेश सचिव बाळासाहेब जानराव यांच्या वतीने पुष्पहार अर्पण करण्यात आला व अभिवादन करण्यात आले.
मानवंदना देण्यास येणाऱ्या भीम अनुया्यांना रिपब्लिकन पक्षाच्या वतीने पंधराशे किलो व्हेज पुलाव, पाचशे किलो लाडू, पाणी बॉटल व देशी झाडाची रोप वाटप करण्यात आली. राज्याचे मंत्री चंद्रकांत दादा पाटील यांच्या हस्ते वाटप करण्यात आले, मंत्री मा. माधुरी ताई मिसाळ, मा. आमदार जयदेव रंधवे व अनेक पक्षाचे, संघटनेचे पदाधिकारी व कार्यकर्ते उपस्थित होते.
प्रदेश सचिव बाळासाहेब जानराव, शहराध्यक्ष संजय सोनवणे, शैलेंद्र चव्हाण, अशोक कांबळे, अशोक शिरोळे, रोहिदास गायकवाड, संघमित्रा गायकवाड, बाबूराव घाडगे, शाम सदाफुले, वसंत बनसोडे, महेंद्र कांबळे, महीपाल वाघमारे, शोभा झेंडे, निलेश रोकडे, सुन्नाबी शेख, रावसाहेब झेंडे, अतुल भालेराव, रमेश तेलवडे, अयुब जाहगीरदार, लियाकत शेख, भगवान गायकवाड, चिंतामन जगताप, शशिकांत मोरे व इतर कार्यकर्ते उपस्थित होते.
कार्यक्रमाचे हे सातवे वर्ष असून कार्यक्रम यशस्वी करण्यासाठी प्रदेश सचिव बाळासाहेब जानराव, संजय सोनवणे, अशोक कांबळे, शैलेंद्र चव्हाण, शाम सदाफुले, निलेश रोकडे यांनी प्रयत्न केले.

नू. म. वि. प्रशाला, जय गणेश व्यासपीठातर्फे डॉ. बाबासाहेब आंबेडकर यांना अभिवादन

पुणे : डॉ. बाबासाहेब आंबेडकर जयंती हा उत्सवाचा, गाणी लावून नाचायचा दिवस नाही. कारण डॉ. आंबेडकर यांचे नाव मनात आले की, नैतिकता व बौद्धिकतेतून येणारा विवेकच समोर येतो. या दिवशी डॉ. बाबासाहेब आंबेडकर यांचे विचार समजून घेण्यासाठी आत्मशोध घेणे आणि त्यातून आत्मसन्मान जागृत करणे आवश्यक आहे, असे परखड मत सावित्रीबाई फुले पुणे विद्यापीठातील डॉ. बाबासाहेब आंबेडकर अध्यासन केंद्राचे प्रमुख व प्रसिद्ध लेखक, समीक्षक, वक्ते डॉ. मनोहर जाधव यांनी व्यक्त केले.
नू. म. वि. प्रशाला आणि जय गणेश व्यासपीठ आयोजित भारतरत्न डॉ.बाबासाहेब आंबेडकर यांच्या १३४व्या जयंतीनिमित्त आज (दि. १४) नू. म. वि. प्रशालेतील केसकर सभागृहात अभिवादन कार्यक्रमाचे आयोजन करण्यात आले होते. या वेळी डॉ. आंबेडकर यांच्या भव्य रांगोळीभोवती गणेश मंडळांचे कार्यकर्ते तसेच प्राध्यापक व शिक्षक यांनी संविधानातील भागाचे वाचन केले. त्या वेळी डॉ. मनोहर जाधव बोलत होते. नू. म. वि. प्रशाला शाला समितीचे अध्यक्ष, ढोल-ताशा महासंघाचे अध्यक्ष पराग ठाकूर, शि. प्र. मंडळी नियामक मंडळाचे उपाध्यक्ष श्रीकृष्ण चितळे, रुग्णहक्क परिषदेचे संस्थापक अध्यक्ष उमेश चव्हाण, सदस्य राजेंद्र कदम, दगडूशेठ हलवाई ट्रस्टचे कोषाध्यक्ष महेश सूर्यवंशी, जय गणेश व्यासपीठ चे समन्वयक पियूष शहा, नू. म. वि. प्रशाला व कनिष्ठ महाविद्यालयाचे मुख्याध्यापक प्रकाश कांबळे, प्राथमिक शाळेच्या मुख्याध्यापिका माया सोयाम, संगीता काळे, राजेश्री हेंद्रे, स्मिता कांगुणे आदी उपस्थित होते.
जय गणेश व्यासपीठ मधील साईनाथ मंडळ ट्रस्ट, बुधवार पेठ, वीर शिवराज मित्र मंडळ, गुरुवार पेठ, एकता मित्र मंडळ, अरण्येश्र्वर, नवज्योत मित्र मंडळ, येरवडा, राष्ट्रीय साततोटी हौद मंडळ, कसबा पेठ, पोटसुळ्या मारुती मित्र मंडळ, गणेश पेठ, श्री शनि-मारुती बाल गणेश मंडळ, एरंडवणा, अष्टविनायक मित्र मंडळ, नवी पेठ, त्रिशुंड गणपती विजय मंडळ ट्रस्ट, सोमवार पेठ, संयुक्त मित्र मंडळ, सदाशिव पेठ आणि संजीवनी मित्र मंडळ, सहकार नगर यांच्यावतीने कार्यक्रमाचे आयोजन करण्यात आले होते.
डॉ. मनोहर जाधव पुढे म्हणाले, अनेक आघाड्यांवर संघर्ष करत समाजव्यवस्था मार्गी लावण्यासाठी डॉ. आंबेडकर यांनी महान कार्य केले. त्यांनी शिक्षण घ्या एवढाच उपदेश न करता प्रत्येक विद्यार्थ्याला शिक्षण उपलब्ध करून द्यायचा प्रयत्न केला. महापुरुषांना जातीमध्ये बंदिस्त करणे अयोग्य आहे. जात हे समाजातील वास्तव असले तरी भेदभाव करणे अयोग्य आहे.
उमेश चव्हाण म्हणाले, डॉ. आंबेडकर यांच्या जयंतीनिमित्त धर्मनिरपेक्षता दाखवत गणेश मंडळे एकत्र येऊन अभिवादन करत आहेत हे मोठे योगदान आहे. त्याग आणि समर्पणाच्या प्रत्येक व्याख्येत डॉ. बाबासाहेब यांचे नाव प्रकर्षाने पुढे येते.
पराग ठाकूर, महेश सूर्यवंशी यांनी मनोगत व्यक्त केले. नील महाजन, नेहा भिसे, श्रेया कदम या विद्यार्थ्यांनी डॉ. बाबासाहेब आंबेडकर यांच्या कार्याविषयी माहिती सांगितली. कार्यक्रमाच्या सुरुवातीस डॉ. आंबेडकर यांच्या प्रतिमेचे पूजन करून संविधानातील उद्देशिकेचे सामूहिक वाचन करण्यात आले. तर बाळासाहेब खरात यांनी बुद्धवंदना सादर केली.
कार्यक्रमाचे सूत्रसंचालन विद्या चाकणकर यांनी केले तर आभार पियूष शहा यांनी मानले.