पुणे-मुंबई शहरात पाण्याचा अतिवापर : लक्ष्मीकांत देशमुख यांची टीका : रंगत-संगत प्रतिष्ठानतर्फे जलदूत देवांग जानी यांचा गौरव
पुणे : पाण्याविषयी सरकारचा नाकर्तेपणा आणि शहरांमधील बेजबाबदार नागरिकांमुळे पाणीसमस्या उद्भवली आहे. मोठ्या शहरांमध्ये पाण्याचा अपव्यय सुरू राहिल्यास खेड्या-पाड्यांमधील भेडसावणारा भीषण पाणीप्रश्न भविष्यात शहरांमध्ये निर्माण होऊ शकतो, असा इशारा ज्येष्ठ निवृत्त सनदी अधिकारी, अखिल भारतीय मराठी साहित्य संमेलनाचे माजी अध्यक्ष लक्ष्मीकांत देशमुख यांनी दिला. पाणी टंचाईची भीषण परिस्थिती समजून न घेता पुणे-मुंबईसारख्या शहरातील नागरिक अमाप आणि अयोग्य पद्धतीने पाणी वापर करीत असल्याचे परखड मत त्यांनी व्यक्त केली.
पाणीविषयक मोलाचे कार्य करणारे नाशिक येथील गोदाप्रेमी समितीचे अध्यक्ष, जलदूत देवांग जानी यांचा रंगत-संगत प्रतिष्ठानच्या काव्य विभागातर्फे आज (दि. 5) पुरस्कार देऊन गौरव करण्यात आला. पुरस्काराचे वितरण लक्ष्मीकांत देशमुख यांच्या हस्ते झाले. त्या वेळी ते बोलत होते. रंगत-संगत प्रतिष्ठानचे अध्यक्ष ॲड. प्रमोद आडकर, काव्य विभागाच्या संचालिका प्रज्ञा महाजन मंचावर होते. शाल, सन्मानपत्र असे पुरस्काराचे स्वरूप होते. पत्रकार भवन येथे कार्यक्रम झाला.
देशमुख पुढे म्हणाले, मानवाने प्रत्येक नदीशी खेळ केला आहे. नदी कोरडी होणे म्हणजे जणू स्त्री अब्रू घेणे आहे. जसजशी शहरे श्रीमंत होत गेली तसतशा नद्या कोरड्या पडत गेल्या. हे समजून घेताना नदीने आत्महत्या केली की, दुराग्रही माणसाने त्यांचा खून केला याचा विचार होणे आवश्यक आहे. लोकसंख्या वाढीमुळे पाण्याची गरज व तहान वाढली आहे. परंतु पिण्याचे पाणी हे अक्षय नाही. पाणी वापराबरोबरच त्याचे पुनर्भरण होते की नाही याकडे लक्ष वेधणे आवश्यक आहे. पाणी मुबलक आहे म्हणून उधळू नका. विहिरी, तलाव, हौद, उपनद्या पुनर्जिवित करा, अशी सूचनाही त्यांनी केली.
पुणेकर हट्टी
पुणे शहरात मुबलक पाणी उपलब्धी आहे म्हणून त्याचा अविवेकी वापर केला जात आहे. याविषयी जागृती करूनही पुणेकर पाण्याचा निष्काळजीपूर्वक वापर करीत आहेत. आम्ही पैसे देतो त्यामुळे आम्हाला पाहिजे त्या वेळी आणि पाहिजे तेवढे पाणी मिळावे अशी पुणेकरांची दुराग्रही आणि हट्टी भूमिका आहे, अशी टीका लक्ष्मीकांत देशमुख यांनी केली.

नद्यांमध्ये मानवी हस्तक्षेप वर्जित : देवांग जानी
आपल्या कार्याची माहिती देताना देवांग जानी म्हणाले, नाशिक महापालिकेने गोदावरी पात्रातील 17 प्राचीन कुंडे बुजविल्याने नदीतील जीवंत पाण्याचे स्रोत नष्ट झाले होते. त्याविरुद्ध शासनाशी लढा देत नदीपात्रातील पाच कुंडातील सुमारे पाच लाख किलो सिमेंट काढण्यात यश आले. त्यातून स्रोत जीवंत झाले. गोदावरी नदी ही नाशिक शहराचे हृदय आहे तर उपनद्या म्हणजे वाहिन्या आहेत. उपनद्या जीवंत राहिल्यास मुख्य नदी जीवित राहते, या करिता पाण्याचे नैसर्गिक स्रोत, उपनद्या जीवंत ठेवण्यासाठी कार्य करणे आवश्यक आहे. भारतीय संस्कृतीनुसार नद्यांना आईचा दर्जा दिला जातो, त्यामुळे नद्या प्रदुषित करणे म्हणजे आईचा आपमान करण्यासारखे आहे. पावसाच्या पाण्याचे पुनर्भरण, नैसर्गिक स्रोतांचे पुनरुज्जीवन करणे आवश्यक आहे. निसर्गाकडून आपण फक्त ओरबाडून घेत आहोत त्याला परत काहीच देत नाही ही मानवाची मोठी चूक आहे. नद्या निसर्गनिर्मित आहेत, त्यांच्यात मानवी हस्तक्षेप वर्जित आहे.
ॲड. प्रमोद आडकर यांनी प्रास्ताविकात देवांग जानी यांच्या कार्याची माहिती दिली. ध्येयाने प्रेरित होऊन कार्य करणाऱ्या व्यक्तींचे काम समाजापुढे आणावे, ज्या योगे सकारात्मकता निर्माण होईल, यासाठी उपक्रमांचे आयोजन केले जाते.
भविष्यात कुणालाही पाणी फुकट मिळणार नाही. तर पाण्यासाठी पैसा मोजावा लागेल, असे प्रज्ञा महाजन म्हणाल्या. मानपत्राचे वाचन आणि सूत्रसंचालन वैजयंती आपटे यांनी केले. कार्यक्रमाच्या उत्तरार्धात निमंत्रितांचे पाणी या विषयावर कविसंमेलन आयोजित करण्यात आले होते.

पुणे : पुणे कॉटन कंपनी, देहम्‌‍ नेचर क्युअर आणि कृतार्थ यांच्या संयुक्त विद्यमाने दि. 8 ते 10 मे या कालावधीत हौशी छायाचित्रकारांच्या ‌‘प्रतिबिंब‌’ या छायाचित्र प्रदर्शनीचे आयोजन करण्यात आले आहे.
छायाचित्र प्रदर्शनी बालगंधर्व कला दालनात भरविण्यात येणार असून उद्घाटन दि. 8 रोजी सकाळी 10:30 वाजता सुप्रसिद्ध पक्षी छायाचित्रकार डॉ. सुधीर हसमनीस यांच्या हस्ते होणार आहे. देहम्‌‍ नेचर क्युअरचे संचालक डॉ. सुजय लोढा, डॉ. कोमल लोढा, कृतार्थचे संचालक निलेश शुक्ला, दिपाली शुक्ला, क्रिकेट विश्लेषक-समालोचक सुनंदन लेले यांची प्रमुख उपस्थिती असणार आहे. प्रदर्शन तीनही दिवस सकाळी 10 ते रात्री 8 या कालावधीत सर्वांसाठी खुले असणार आहे.
अमर अतितकर, अमेय वाळवेकर, ओंकार मुळगुंद, केदार दंडगे, विलास तोळसंकर, समीर अय्यर, विश्वेश बेहरे, अनंतप्रसाद देशपांडे, अमोद फडके आणि सागर मुथा यांची व्यन्यजीव, पक्षी, निसर्ग या विषयांवरील अनोखी छायाचित्रे प्रदर्शनात असणार आहेत. प्रदर्शनात हसभागी छायाचित्रकार वेगवेगळ्या क्षेत्रात कार्यरत असून छायाचित्रणाची आवड जोपासत आहेत. प्रदर्शनाची रचना ओंकार मुळगुंद यांची आहे. हौशी, प्रतिभावान छायाचित्रकारांची वैविध्यपूर्ण छायाचित्रे अनुभवण्याचा आनंद पुणेकरांना मिळणार आहे.

पुणे महानगरपालिकेत बांधकाम सल्लागार म्हणून काम करणाऱ्या विपुल कुमार चाँदकुमार गर्ग (वय- ५४) यांच्या बाणेर परिसरातील पॅनकार्ड क्लब रस्त्यावर उच्चभ्रू सोसायटी असलेल्या सुप्रीम अॅमडोर येथील फ्लॅट क्रमांक १४०२ मध्ये मागील चार महिन्यापासून एक ३० वर्षीय महिला घरकाम करत होती. सदर महिलेने गर्ग यांच्या घरातील बेडरूम मधील कपाटाच्या ड्रावर मध्ये ठेवलेले २५ लाख ८० हजार रुपयांचे सोन्याचे दागिने लंपास केल्याचा धक्कादायक प्रकार उघडकीस आला आहे.

याप्रकरणी विपुलकुमार गर्ग यांनी बाणेर पोलीस ठाण्यात आरोपी महिलेविरोधात तक्रार दाखल केली आहे. सदरचा प्रकार २७/२/२०२५ ते २७/४/२०२५ यादरम्यान घडला आहे. पोलिसांनी दिलेल्या माहितीनुसार, संबंधित घरकामगार महिला ही गर्ग यांचे घरी मागील चार महिन्यापासून काम करत आहे. तिने घरातील लोकांचा विश्वास संपादन करुन घरातील बेडरूम मध्ये नियमित साफसफाई करत होती. यादरम्यान तिने घरातील लोकांची नजर चुकवून बेडरूममधील कपाटाच्या ड्रावर मध्ये ठेवलेले सोन्याचे दागिने घरात काम करत असताना, टप्प्याटप्प्याने चोरी केल्याचा प्रकार घडला आहे. गर्ग कुटुंबीय एका लग्नासाठी जाताना त्यांनी कपाटातील दागिन्यांची पाहणी केली असता ते मिळून आले नाही. त्यामुळे घरकामगार महिलेची विचारपूस केली असता ती पसार झाल्याचे दिसून आले आहे. याप्रकरणी आरोपी महिलेवर गर्ग कुटुंबीयांच्या संमतीशिवाय लबाडीच्या इराद्याने दागिने चोरी केल्याचा गुन्हा बाणेर पोलीस ठाण्यात दाखल करण्यात आल्याची माहिती वरिष्ठ पोलीस निरीक्षक चंद्रशेखर सावंत यांनी दिली आहे.

पुणे-पुरंदर विमानतळ प्रकल्पाला स्थानिक शेतकऱ्यांचा तीव्र विरोध आहे. या विरोधासाठी शनिवारी झालेल्या आंदोलनाने हिंसक वळण घेतले. या पार्श्वभूमीवर सरकारने सध्या तरी पुरंदर विमानतळाच्या सर्वेक्षणाची प्रक्रिया तात्पुरती थांबवण्याचा निर्णय घेतला आहे, अशी माहिती भाजपचे प्रदेशाध्यक्ष आणि महसूल मंत्री चंद्रशेखर बावनकुळे यांनी दिली. आम्ही शेतकऱ्यांना ऑफर देऊ, शेतकऱ्यांनी आम्हाला ऑफर द्यावी. त्यांनी विमानतळ होऊ न देण्याचा हट्ट सोडावा, असेही बावनकुळे म्हणाले.

पुरंदर येथे होणाऱ्या विमानतळाला 7 गावातील ग्रामस्थांचा मोठा विरोध आहे. दोन दिवसांपूर्वी विमानतळाच्या जागेचे सर्वेक्षण करण्यासाठी पथक आले होते. त्यावेळी ग्रामस्थांनी पथकाला सर्वेक्षण करण्यास विरोध करत आंदोलन केले. या दरम्यान, पोलिस आणि ग्रामस्थ यांच्यात धक्काबुक्की होऊन आंदोलनाला हिंसक वळण लागले. यावर आज चंद्रशेखर बावनकुळे यांनी प्रतिक्रिया दिली आहे.

पुरंदर विमानतळाबाबत सुरू असलेले सर्वेक्षण थांबवण्यात आलेले आहे, अशी माहिती बावनकुळे यांनी दिली. शेतकऱ्यांच्या मुळावर उठून आम्हाला काही करायचे नाही. मी याबाबत मुख्यमंत्र्यांशी बोलणार आहे. आमची शेतकऱ्यांना ऑफर आहे, त्यांनी विमानतळ होऊ देणार नाही हा हट्ट सोडावा, असेही ते म्हणाले. पुरंदर विमानतळाच्या भूसंपादनाला विरोध असणाऱ्या अनेक मान्यवरांशी आम्ही चर्चा केली. परवा जी घटना घडली त्याचासुद्धा आम्ही आढावा घेतला असून शेतकऱ्यांवर जे गुन्हे दाखल झाले आहेत ते कमी केले पाहिजे, अशी त्यांची मागणी आहे, असे चंद्रशेखर बावनकुळे म्हणाले.

बावनकुळे म्हणाले, पुरंदर विमानतळामुळे पश्चिम महाराष्ट्राचे चित्र बदलणार आहे, शेतकऱ्यांचा माल निर्यात होऊ शकतो, पुण्याच्या विकासाबाबत मुंबई, दिल्लीनंतर नाव येते. त्यामुळे हे संभाव्य विमानतळ करण्याचा मानस आहे आणि ती भूमिका शासनाची बदलणार नाही. मी शेतकऱ्यांना विनंती करतोय की, 7 दिवसात तुम्ही तुमच्या मागण्या काय आहेत हे आम्हाला कळवा. जास्तीत जास्त शेतकऱ्यांच्या खिशात काय टाकता येईल, अशी भूमिका आम्ही मांडली आहे.

शासन एखादी घोषणा करेल तेव्हा सरकारने आमचे चांगले केले, असे शेतकऱ्यांना वाटेल. आम्ही शेतकऱ्यांना ऑफर देऊ, शेतकऱ्यांनी आम्हाला ऑफर द्यावी, टेबलवर बसून तिढा सुटेल. पुढील 15 दिवसात पुन्हा चर्चा करू, असेही चंद्रशेखर बावनकुळे यांनी स्पष्ट केले.

परवा घडलेल्या घटनेचा सुद्धा आढावा आम्ही घेतल्याचे बावनकुळे यांनी सांगितले. शेतकऱ्यांवर जे गुन्हे दाखल झाले आहेत ते मागे घेतले पाहिजे अशी त्यांची मागणी आहे. गुन्ह्यात जे लोक प्रत्यक्ष सहभागी आहेत, त्यांचा वेगळा विचार करायला लागेल. जे निरपराध आहेत त्यांचे गुन्हे मागे घ्यावेत, अशी मागणी आहे. मी मुख्यमंत्री देवेंद्र फडणवीस यांच्याशी उद्या याबाबत चर्चा करेन. असेही बावनकुळे म्हणाले.

पुणे, ५ मे – भारत सरकारच्या संरक्षण मंत्रालय आणि परराष्ट्र मंत्रालयाने मंजूर केलेल्या आंतरराष्ट्रीय हिंदी ऑलिंपियाड २०२४-२५ मध्ये पुण्यातील ध्रुव ग्लोबल स्कूलच्या विद्यार्थ्यांनी उल्लेखनीय यश मिळवले आहे. इयत्ता पाचवीच्या वरद मांडे ने स्पर्धेत पाचवा क्रमांक पटकावला, तर इयत्ता चौथीच्या आर्यंश कंसलने आठवा क्रमांक मिळवून शाळेचा आणि देशाचा अभिमान वाढविला.
स्पर्धेत उत्कृष्ट कामगिरी केल्याबद्दल दोन्ही विद्यार्थ्यांना विशेष गुणवत्ता प्रमाणपत्र आणि प्रोत्साहन पुरस्कार देण्यात आला. हे यश त्यांच्या कठोर परिश्रम, समर्पण आणि हिंदी भाषेवरील प्रेमाचे फळ आहे.
या यशाबद्दल आनंद व्यक्त करताना शाळेचे संचालक यशवर्धन मालपाणी म्हणाले, “आमच्या विद्यार्थ्यांनी या आंतरराष्ट्रीय स्तरावरील स्पर्धेत उत्कृष्ट भाषिक प्रतिभा दाखवली आहे. ही आमच्यासाठी अभिमानाची बाब आहे आणि आम्हाला विश्वास आहे की भविष्यातही ते जागतिक स्तरावर हिंदी भाषेला आदर मिळवून देत राहतील.”
मुख्याध्यापिका संगीता राऊत  म्हणाल्या, “या मुलांचे हे यश इतर विद्यार्थ्यांसाठी प्रेरणादायी आहे, जे त्यांना भाषा आणि साहित्यात रस वाढवण्यास प्रोत्साहित करेल.”
तसेच यांनी विद्यार्थ्यांचे अभिनंदन केले आणि त्यांना प्रमाणपत्रे प्रदान केली.
हे यश केवळ शाळेसाठी अभिमानाची गोष्ट नाही तर समर्पण आणि वचनबद्धता असेल तर भाषेतील अडथळे देखील पार करता येतात हे देखील ते दर्शवते.

पुणे : ब्राह्मण कार्यालय संस्था  शताब्दी वर्ष साजरे करीत आहे. या निमित्ताने विविध सामाजिक उपक्रमांचे आयोजन करण्यात येत आहे. शताब्दी वर्षानिमित्त पुण्यातील जनकल्याण रक्तपेढी या संस्थेला त्यांच्या आवश्यकतेनुसार साडेसहा लाख रुपये किमतीचा ८०० लिटर साठवण क्षमतेचा आणि दोन अंश तापमानापर्यंत कार्यक्षम असणारा मोठा रेफ्रिजरेटर  भेट म्हणून देण्यात आला.

स्वारगेट येथील जनकल्याण रक्तपेढी येथे कार्यक्रमाचे आयोजन करण्यात आले होते. यावेळी ब्राह्मण कार्यालय संस्थेचे उपाध्यक्ष रमेश भागवत उपस्थित होते. या प्रसंगी जनकल्याण रक्तपेढी तर्फे डॉ. अतुल कुलकर्णी यांनी संस्थेचे आभार मानले. डॉ. माधुरी बर्वे यांनी रक्तपेढीच्या संपूर्ण कामकाजाची माहिती दिली.

डॉ. अतुल कुलकर्णी म्हणाले, ब्राह्मण कार्यालयाच्या वतीने देण्यात आलेल्या नवीन रेफ्रिजरेटरमुळे रक्त साठवणुकीची क्षमता लक्षणीय वाढणार आहे. परिणामी पुणे शहरातील रक्तसाठा व्यवस्थापन अधिक सक्षम होईल. पैशाअभावी रक्त मिळणार नाही, याची आम्ही विशेष काळजी घेतो. थॅलेसेमिया ग्रस्त लहान मुलांना दरवर्षी ४ हजार रक्तपिशव्या रक्तपेढीच्या वतीने विनामूल्य दिल्या जातात, असेही त्यांनी यावेळी सांगितले.

रमेश भागवत म्हणाले , ब्राह्मण कार्यालय संस्थेच्या शताब्दी वर्षानिमित्त विविध समाजोपयोगी उपक्रमांचे आयोजन करण्यात येत आहे. जनकल्याण रक्तपेढी यांना त्यांची गरज ओळखून केवळ रक्त पेढीसाठी उपयुक्त असणारा रेफ्रिजरेटर देण्यात आला. नेताजी सुभाषचंद्र बोस शाळेलाही सुरक्षा कॅमेरा बसविण्यात आर्थिक मदत संस्थेमार्फत करण्यात आली आहे. समाजाच्या कल्याणासाठी अशा कार्यात सहभागी होणे ही आमच्यासाठी अभिमानाची गोष्ट आहे. भविष्यातही ब्राह्मण कार्यालय संस्था अशाच कार्यासाठी पुढे राहील, असेही त्यांनी सांगितले.

पुणे ग्रामीण पोलिस अधीक्षक पंकज देशमुख यांना नीलम गोऱ्हे यांचे निर्देश

पुणे जिल्हय़ातील बारामती तालुक्यातील महादेव मळा येथे राहणाऱ्या एका अल्पवयीन मुलीची छेडाछेड केल्याच्या घटनेतील आरोपींवर पॉस्को आणि एट्रॉसिटीचा गुन्हा दाखल करण्यात आला आहे.तर त्या प्रकरणातील आरोपींना तात्काळ अटक करण्यात यावी,असे निर्देश उपसभापती नीलम गोऱ्हे यांनी ग्रामीण अधीक्षक पंकज देशमुख यांना दिले.
पुणे जिल्हय़ातील बारामती तालुक्यातील महादेव मळा येथे राहणाऱ्या एका अल्पवयीन मुलीची छेडछाड केल्याची घटना 13 एप्रिल रोजी घडली.त्यावेळी पीडित मुलीच्या कुटुंबियांनी स्थानिक पोलिसांकडे याबाबतची तक्रार देताच, आरोपी विरोधात विविध कलम लावून पॉस्को आणि एट्रॉसिटी चा गुन्हा दाखल केला.पण त्या आरोपींना अटक करण्यात आली नाही.यामुळे पीडित कुटुंबियांनी नाराजी व्यक्ती केली आहे.पीडित मुलीसोबत घडलेला प्रकार आणि सध्या गावातील एकूणच वातावरण, याबाबत पिडीत मुलींच्या कुटुंबियांनी मला सविस्तर माहिती दिली आहे.
या घटनेचे गांभीर्य लक्षात घेऊन उपसभापती नीलम ताई गोऱ्हे यांनी तात्काळ ग्रामीण अधीक्षक पंकज देशमुख यांना फोन लावून,त्या घटनेतील सध्याची माहिती जाणून घेतली.त्यावेळी पोलीस तपास पथकाच्या कामगिरीवर नाराजी व्यक्त करीत,पीडित मुलीच्या प्रकरणातील आरोपींना तात्काळ अटक करून कडक शासन केले पाहिजे,असे निर्देश यावेळी त्यांनी दिले.