राज्यस्तरीय गो आधारित शेती प्रशिक्षक चिंतन आणि प्रशिक्षण नियोजन बैठक संपन्न ; महाराष्ट्र गोसेवा आयोग पुणे व पशुसंवर्धन विभाग महाराष्ट्र शासन यांच्या संयुक्त विद्यमाने आणि सोशल रिस्पॉन्सिबिलिटी यांच्या सहकार्याने आयोजन
पुणे : देशी गोवंश वाचला, तर शेतकरी वाचेल आणि तरच देश वाचेल. रासायनिक खते किंवा कीटक नियंत्रक यांच्यापेक्षा अधिक गुणवत्तापूर्वक उत्पादन देशी गो वंश आधारित नैसर्गिक शेती मधून येते. गरज आहे ती याविषयी डोळसपणे प्रयत्न करण्याची. शेती वरील वाढता खर्च नियंत्रित करण्यासाठी, जमिनीची पत सुधारण्यासाठी आज लाखो शेतकरी यांनी गोकृपामृत वापरून शेती पर्यायाचा वापर केला आहे, असे बन्सी गीर गो शाळेचे प्रमुख गोपाल सुतारिया यांनी सांगितले. 

महाराष्ट्र गोसेवा आयोग पुणे व पशुसंवर्धन विभाग महाराष्ट्र शासन यांच्या संयुक्त विद्यमाने आणि सोशल रिस्पॉन्सिबिलिटी यांच्या सहकार्याने राज्यस्तरीय गो आधारित शेती प्रशिक्षक चिंतन व महाराष्ट्र राज्य प्रशिक्षण नियोजन बैठकीचे आयोजन पशुसंवर्धन आयुक्तालय येथील सभागृहात करण्यात आले. यावेळी महाराष्ट्र गोसेवा आयोगाचे अध्यक्ष शेखर मुंदडा, पशु संवर्धन विभागाचे आयुक्त डॉ प्रवीणकुमार देवरे, राष्ट्रीय कर्तव्य अभियान महाराष्ट्राचे मुख्य संयोजक विजय वरुडकर, गोसेवा आयोगाच्या सदस्य सचिव मंजुषा पुंडलिक, गोसेवा आयोग सदस्य उद्धव नेरकर, सुनील सूर्यवंशी, मनीष वर्मा, गो कृषी तज्ञ तात्या मगर,ज्योत्स्ना वरुडकर, संजय भोसले, डॉ नितिन मार्कंडय, सनत गुप्ता आदी उपस्थित होते.

गो सेवा आयोग माध्यमातून गोमाता आधारित अशा १० वेगवेगळ्या विषयांवर महाराष्ट्रात काम सुरु आहे. गो आधारित शेती व गोपालन हे त्यातील महत्वाचे विषय आहेत. जमिनीची अवस्था अत्यंत वाईट झाली असून, ती सुधाकरण्याकरिता गो आधारित शेती करणे गरजेचे असल्याचे मत महाराष्ट्र गो सेवा आयोगाचे अध्यक्ष शेखर मुंदडा यांनी व्यक्त केले.

विजय वरुडकर म्हणाले, गो आधारित शेती किंवा नैसर्गिक शेती प्रशिक्षण, रासायनिक शेती आणि देशी गोवंश आधारित शेती याचा तुलनात्मक अभ्यास प्रशिक्षण, कामधेनु कृषी तंत्र, गोआधारित शेतीमधील विविध पद्धती, महाराष्ट्र गोहत्या बंदी अधिनियम माहिती यांसह गो आधारित कृषीतून सर्वांगीण ग्रामविकास, देशी गो वंशाचे नैसर्गिक शेतीतील आवश्यकता व महत्त्व गो आधारित शेतीतील यशोगाथा या विषयावर मार्गदर्शन करण्यात आले.

या उपक्रमाच्या माध्यमातून राज्यातील अनेक तालुक्यात नैसर्गिक शेती प्रशिक्षण नियोजन करण्यात येणार आहे. गो सेवा आयोग माध्यमातून डॉ. सुनील सूर्यवंशी जिल्हा निहाय गोशाळा यांचे प्रशिक्षण व नैसर्गिक शेती उत्पादन प्रशिक्षण विषयी आयोग सदस्य उद्धव नेरकर व विजय वरूडकर हे तालुका निहाय प्रशिक्षण सत्रांचे नियोजन करीत आहेत. या कार्यशाळा नोंदणी साठी ८४४६००४५८० या क्रमांक वर संपर्क साधावा, असे आवाहन संयोजक समिती द्वारे करण्यात आले आहे. सारिका शेठ, संतोष  सुरवसे,  पौर्णिमा इनामदार, राहुल जगताप, विशाल वरूडकर, विक्रमादित्य शिंदे, गौरी शिलोनीकर, यांनी कार्यक्रम व्यवस्थापन केले

डॉ. लिली जोशी लिखित काश्मीर नरेश ललितादित्य मुक्तापीड यांच्या जीवनावर आधारित कादंबरीचे प्रकाशन

पुणे : दंतकथांनाच इतिहास समजण्याची सवय लागली असल्यामुळे खऱ्या इतिहासाला जाणून घेण्याचा, पाहण्याचा दृष्टीकोनच समाजाकडे नाही. त्यामुळे खरा इतिहास समाजासमोर येत नाही. ‌‘बखर ललितादित्याची‌’ या कादंबरीच्या माध्यमातून काश्मीरच्या दडलेल्या इतिहासाला समाजासमोर आणण्याचे कार्य घडत आहे. इतिहासाचे भान ठेवून डॉ. लिली जोशी यांनी तथ्यात्मकता राखत कल्पनाशक्तीला ठराविक प्रमाणातच संधी देत, चिकित्सक वृत्तीने इतिहासाकडे पाहिले आहे, असे प्रतिपादन इतिहास संशोधक, लेखक संजय सोनवणी यांनी केले.

काश्मीर नरेश ललितादित्य मुक्तापीड यांच्या जीवनावर आधारित ‌‘बखर ललितादित्याची‌’ या डॉ. लिली जोशी लिखित ऐतिहासिक कादंबरीचे प्रकाशन रविवारी (दि. 15) ज्येष्ठ लेखिका मंगला गोडबोले यांच्या हस्ते झाले. त्या वेळी संजय सोनवणी बोलत होते. भांडारकर प्राच्यविद्या संशोधन संस्थेच्या नवलमल फिरोदिया सभागृहात कार्यक्रमाचे आयोजन करण्यात आले होते. विश्वकर्मा प्रकाशनचे सीईओ विशाल सोनी, संदीप तापकीर मंचावर होते.

पुस्तक लेखनामागील भूमिका मांडताना डॉ. लिली जोशी म्हणाल्या, काश्मीर नरेश ललितादित्य हा अज्ञाताच्या पडद्याआड गेलेला महान नायक आहे. या राजाविषयी फारशी कुणाला माहिती नाही. समाकालीन राजांच्या मांदियाळीत ललितादित्य हा स्वयंप्रकाशित राजा होता. तो फक्त रणवीरच नव्हे तर अत्यंत मुत्सद्दी होता. त्याला हिंदवी स्वराज्याची, लोककल्याणाची ओढ होती. हिमालयात वारंवार गेल्याने कादंबरी वर्णनात्मक लिहिण्यासाठी त्याचा उपयोग झाला. घटनाक्रम आणि कल्पनाशक्ती या दोन्हीची सांगड घालत, साधलेले ललित लेखन इतिहासातील सोनेरी पान ठरावे.

अध्यक्षीय मनोगत व्यक्त करताना मंगला गोडबोले म्हणाल्या, डॉ. जोशी यांनी कादंबरीची मांडणी करताना खूप तपशीलाने विचारपूर्वक चतुराईने लेखन करत आठवे शतक आणि एकविसावे शतक यातील नाते जोडले आहे. रुळलेली वाट सोडून त्यांनी केलेल्या लेखनातून प्राचीन भारताचा उज्ज्वल इतिहास समाजासमोर येत आहे. दोन शतकांची सांगड घालताना लेखिकेने योगे ते दुवे साधत लेखनाचा तोल यशस्वीरित्या सांभाळला आहे. डॉ. जोशी यांनी मानवी संबंधांचे ताण-तणाव विवेकाने सांभाळले असून शब्दसंपदेचा उत्तम रितीने वापर करत भाषेचे तारतम्यही राखले आहे.

संजय सोनवणी पुढे म्हणाले, काश्मीर नरेश ललितादित्य हा अत्यंत पराक्रमी व मुत्सद्दी राजा होता. त्याने आठव्या शतकात अनेक व्यापारी मार्ग मुक्त केले, भारताच्या सीमांचे रक्षण केले अशा सम्राटाची महती या कादंबरीतून कळणार आहे.

भारताचा इतिहास वाचकांसमोर यावा यासाठी ऐतिहासिक पुस्तकांची निर्मिती करत असल्याचे विशाल सोनी यांनी सांगितले. तर पुस्तकाच्या निर्मितीविषयी संदीप तापकीर यांनी माहिती दिली. डॉ. नरेंद्र जोशी यांनी मनोगत व्यक्त केले.

कार्यक्रमाचे सूत्रसंचालन आणि आभार प्रदर्शन संगीता पुराणिक यांनी केले. मान्यवरांचा सत्कार डॉ. लिली जोशी यांनी केला.

पुणे-पर्वती विधानसभा मतदार संघातून चौथ्यांदा निवडून आलेल्या कै. सतीश मिसाळ यांच्या पत्नी आणि स्व. केशवराव देशपांडे यांची नात आमदार माधुरी मिसाळ यांनाही मुख्यमंत्री देवेंद्र फडणवीस यांच्या मंत्रिमंडळात स्थान देण्यात आले आहे. आज सकाळी साडेदहा वाजता त्यांना मंत्रिपदासाठी शपथ घ्यायला या म्हणून फोन आला आहे.

नाव: श्रीमती. माधुरी मिसाळ
जन्मतारीख : 19. 04. 1964
शिक्षण : बी. कॉम.

~ कै. सतीश मिसाळ यांच्या पत्नी

~स्वातंत्र्य सेनानी केशवराव देशपांडे यांची नात.

~2007- कसबा मतदारसंघ, पुणे येथे नगरसेविका म्हणून निवड
~2009 ते आत्तापर्यंत – आमदार म्हणून निवड, पर्वती मतदारसंघात सलग 4 वेळा, 2009, 2014, 2019 आणि 2024.
~ सतीश मिसाळ एक समर्पित, विश्वासू आणि सर्वांचे लाडके, सामाजिक कार्यकर्ते, पुण्यात भाजपचे 4 वेळा नगरसेवक म्हणून निवडून आले. 1986 पासून कार्यरत.

राजकीय कारकीर्द
विधानसभा सदस्य (आमदार), पर्वती मतदारसंघ, पुणे
कार्यकाळ: 2009, 2014, 2019 आणि 2024 सलग. सलग चौथ्या टर्मसाठी पश्चिम महाराष्ट्रातील एकमेव महिला.
पुणे महापालिकेत 22 भाजप नगरसेवक निवडून आणले, त्यामुळे महापालिकेत भाजपची सत्ता येण्यास मदत झाली, त्याच भागातील मागील 3 भाजप नगरसेवकांपेक्षा ऐतिहासिक वाढ

प्रमुख प्रकल्प:
•स्वारगेट येथील मल्टी-मॉडल ट्रान्सपोर्ट हब
•(ESIC) 500 खाटांचे रुग्णालय
स्थानिक कामगार आणि सर्वसामान्य जनतेसाठी
. कलाकारांना प्रोत्साहन देण्यासाठी पु. ल. देशपांडे उद्यानातील कलाग्राम.
. स्वारगेट ते कात्रज मेट्रो,
खडकवासला ते खराडी मेट्रो
. सिंहगड रोड उड्डाणपूल

• गंगाधाम फ्लायओव्हर
  •स्वारगेट उड्डाणपूल
  . तळजाई वन नियोजन
  . पर्वती टेकडी संवर्धन आणि वारसा नियोजन
  . मराठी भाषेला अभिजात भाषेचा दर्जा मिळावा यासाठी चळवळ सुरू करणे.

इतर राजकीय भूमिका
-सचिव, महाराष्ट्र प्रदेश भाजप
-सदस्य, लोकलेखा समिती, महाराष्ट्र
-पुणे शहर भाजप अध्यक्ष
-माजी सदस्य, पुणे महानगरपालिका

-विधानसभा प्रतोद

भूषवलेली पदे
संचालिका, तीर्थ रिअल इस्टेट (शहरी विकास, बांधकाम आणि पायाभूत सुविधा)
अध्यक्षा, सतीश मिसाळ एज्युकेशनल फाउंडेशनच्या ब्रिक ग्रुप ऑफ इन्स्टिट्यूट (शिक्षण)
. संचालिका, उद्यम को-ऑप बँक लिमिटेड (बँकिंग)
. अध्यक्षा, सतीश मिसाळ फाउंडेशन (चॅरिटी) (सामाजिक कार्य)
. माजी अध्यक्षा,विद्या को-ऑप बँक लि. (बँकिंग)
. माजी विश्वस्त, शिक्षण प्रसारक मंडळी (शिक्षण)
.1989 पासून संचालक आणि अध्यक्ष म्हणून बँकिंग क्षेत्रात कार्यरत आहेत.
. 22 वर्षांपासून पायाभूत सुविधा विकास आणि बांधकाम क्षेत्रात काम करत आहे.

पुणे: पुण्यातून पुन्हा कोथरूड चे आमदार चंद्रकांत दादा पाटील यांना अपेक्षेप्रमाणे मुख्यमंत्री देवेंद्र फडणवीस यांच्या मंत्रिमंडळात स्थान देण्यात आले असून आजच त्यांचा शपथविधी होणार आहे.त्यांना कोणते खाते देण्यात येणार आणि पुण्याचे पालक मंत्री पद त्यांच्याकडे ठेवणार काय ? याबाबतच आता उत्सुकता राहिली आहे.

चंद्रकांतदादा पाटील यांचा परिचय..

वैयक्तिक

जन्म १० जून १९५९; प्रभूदास चाळ, रे रोड, मुंबई,
आई-वडील दोघेही मिल कामगार,
राजा शिवाजी वि‌द्यालय, दादर, मुंबई येथे शालेय शिक्षण
सिद्धार्थ महावि‌द्यालय, फोर्ट, मुंबई येथे बी. कॉम. पदवी शिक्षण.
पत्नी सौ. अंजली चंद्रकांत पाटील, बी. कॉम., आयसीडब्ल्यूए (कॉस्ट ऑडिटर)

• एकनाथ शिंदे यांच्या मंत्रिमंडळात उच्च व तंत्रशिक्षण वस्त्रो‌द्योग आणि संसदीय कार्य मंत्री पदाची जबाबदारी

-ऑगस्ट २०२२ ते ऑक्टोबर २०२३ पुणे जिल्हा पालकमंत्री; ४ ऑक्टोबर २०२३ पासून सोलापूर आणि अमरावती जिल्ह्याच्या पालकमंत्री पदाची जबाबदारी

उच्च व तंत्रशिक्षण मंत्री म्हणून घेतलेले महत्वपूर्ण निर्णय

१) मुलींना मोफत व्यावसायिक उच्च शिक्षण देण्याचा निर्णय.
२) नवीन शैक्षणिक धोरणाची प्रभावी अंमलबजावणी.

वस्त्रोद्योग मंत्री म्हणून घेतलेले महत्वपूर्ण निर्णय

राज्यात वस्त्रोद्योग धोरण लागू करण्यासाठी योगदान.

राज्याचे कॅबिनेट मंत्री

२०१४ ते २०१९ महसूल, सार्वजनिक बांधकाम, सहकार, पणन आणि वस्त्रो‌द्योग, मदत आणि पुनर्वसन, कृषी व फलोत्पादन या खात्यांची जबाबदारी. मराठा आरक्षणासाठीच्या मंत्रिमंडळ उपसमितीचे अध्यक्ष म्हणून जबाबदारी.

विधिमंडळ कार्य

जुलै २०१६ ते ऑक्टोबर २०१९ विधान परिषद सभागृह नेता म्हणून जबाबदारी. २००८ साली पुणे पदवीधर मतदारसंघातून विधान परिषद सदस्य म्हणून निवड, २०१४ साली पुणे पदवीधर मतदारसंघातून दुसऱ्यांदा आमदार म्हणून निवड. २०१९ आणि २०२४ साली कोथरूड, पुणे विधानसभा मतदारसंघातून आमदार म्हणून निवड. ऑगस्ट २०२२ पासून संसदीय कार्य मंत्री म्हणून प्रभावी कार्य.

भारतीय जनता पार्टी, प्रदेशाध्यक्ष दि. १६ जुलै २०१९ ते १२ ऑगस्ट २०२२ पर्यंत

• प्रदेशाध्यक्षपदाच्या काळात मुख्यमंत्री देवेंद्र फडणवीस यांच्या नेतृत्वात भाजपा शिवसेना युतीने विधानसभा निवडणुकीत १६१ जागा जिंकून पूर्ण बहुमत मिळविले.  प्रदेशाध्यक्ष पदाच्या कार्यकाळात प्रभावी कार्य

संघ परिवार

अखिल भारतीय वि‌द्यार्थी परिषदेचे समर्पित कार्यकर्ता. महाराष्ट्र संघटन महामंत्री आणि राष्ट्रीय महासचिव पदांवर काम केले. १९८० ते १९९४ ऐन तारुण्यात संघटनेसाठी पूर्णवेळ संपूर्ण समर्पणाने काम. त्यानंतर १९९५- १९९९ या कालावधीत रा. स्व. संघाचे पश्चिम महाराष्ट्र प्रांताचे सहकार्यवाह म्हणून तर सन १९९९-२००४ या कालावधीत पश्चिम महाराष्ट्रात रा. स्व. संघाच्यावतीने राबविण्यात येणाऱ्या विविध सेवा कार्यात योगदान.

सामाजिक बांधलकी

कोथरूड मध्ये समुत्कर्ष सोशल फाउंडेशन, मानसी उपक्रम यांसारख्या विविध उपक्रमांच्या माध्यमातून महिला सक्षमीकरणाला बळ. ज्येष्ठ नागरिकांसाठी निसर्ग छाया, आर्थिक दृष्ट्या दुर्बल कुटुंबातील नववधूंना झाल, सुकन्या समृद्धी योजनेच्या माध्यमातून आर्थिक दुर्बल मुलींचे पालकत्व, मोफत ई सेवा केंद्र, कोवीड काळातील सेवा कार्य, दिवाळी फराळ, एकांकिका स्पर्धा, गणेशोत्सव काळात सांस्कृतिक कार्यक्रम अशा विविध माध्यमांतून कोथरुड मधील प्रत्येक घटकाशी संपर्क स्थापन करण्यात यश.

संस्कृती प्रतिष्ठान आणि संवाद, पुणेतर्फे ‌‘मन का गीत‌’ कार्यक्रमाचे सादरीकरण
पुणे : ‌‘सम्बन्ध आएँ, आ-आ के बह जाएँ, छोड जाएँ आँखों में एकाध आँसू‌’, ‌‘मेरे आसपास खिची एक..‌’, ‌‘मनुष्य की टोली हो या मेला‌’, ‌‘जगत्‌‍ जननी‌’, ‌‘उत्सव‌’, ‌‘कारगिल‌’, ‌‘जिंदा दिल‌’, ‌‘भावमुद्रा बोले बसंत‌’, ‌‘अचानक‌’, ‌‘विस्मयकी सुबह‌’, ‌‘एकाध आँसू‌’ अशा विविध काव्यरचनांद्वारे पंतप्रधान नरेंद्र मोदी यांच्या कविमनाची ओळख आज पुणेकर रसिकांना झाली.
निमित्त होते संस्कृती प्रतिष्ठान आणि संवाद, पुणे यांच्या संयुक्त विद्यमाने आयोजित मा. पंतप्रधान नरेंद्र मोदी यांच्या ‌‘आँख ये धन्य है‌’ आणि ‌‘साक्षी भाव‌’ या पुस्तकांमधील कवितांवर ‌‘मन का गीत‌’ या विशेष कार्यक्रमाचे. हा कार्यक्रम शनिवारी (दि. 14) बालगंधर्व रंगमंदिरात आयोजित करण्यात आला होता. गीत, संगीत, नृत्य, अभिवाचन आणि दृकश्राव्य माध्यमातून सादर झालेला कार्यक्रम पुणेकरांना विशेष भावला.
माजी केंद्रीय मंत्री प्रकाश जावडेकर, माजी मंत्री, आमदार चंद्रकांत पाटील, मोनिका मुरलीधर मोहोळ, सुनील महाजन, निकिता मोघे, योगेश सोमण, डॉ. सलील कुलकर्णी, माधुरी सहस्रबुद्धे, हरिदास चरवड, आदित्य माळवे, प्रकाशक सु. वा. जोशी मंचावर होते.
या कार्यक्रमादरम्यान नरेंद्र मोदी यांच्या जयश्री जोशी यांनी अनुवादित केलेल्या आणि उत्कर्ष प्रकाशनने प्रकाशित केलेल्या मराठी कवितांच्या ‌‘नयन हे धन्य हे‌’ या पुस्तकाचे प्रकाशन करण्यात आले.
कार्यक्रमाच्या आयोजनाविषयी बोलताना मोनिका मोहोळ म्हणाल्या, पुण्यात आयोजित करण्यात आलेला हा शुभारंभाचा कार्यक्रम असून महाराष्ट्रासह देशाच्या विविध भागात या कार्यक्रमाचे आयोजन करण्यात येणार आहे. या कार्यक्रमातून पंतप्रधान मोदी यांची साहित्यिक, कवी म्हणून एक वेगळीच ओळख रसिकांसमोर येणार आहे.
प्रास्ताविकात सुनील महाजन यांनी कार्यक्रमाच्या आयोजनामागील भूमिका स्पष्ट केली.
‌‘मन का गीत‌’ या कार्यक्रमाची संकल्पना व निर्मिती सुनील महाजन यांची होती तर संहिता लेखन ज्येष्ठ साहित्यिका डॉ. माधवी वैद्य यांचे होते. दिग्दर्शनाची बाजू प्रसिद्ध अभिनेते योगेश सोमण यांनी सांभाळली. नृत्य दिग्दर्शन निकिता मोघे यांनी केले असून डॉ. सलील कुलकर्णी यांनी संगीत संयोजन केले आहे. प्रभावी अभिवाचन सुप्रसिद्ध अभिनेत्री शर्वरी जमेनिस आणि अक्षय वाटवे यांनी केले. विविध गीते, कवितांवर शिल्पा दातार, शर्वरी ओतरी, श्रुतिका अत्रे, अदिती देवधर, ईश्वरी बापट, प्राजक्ता सांभू, अंतरा बोरगावकर यांनी नृत्यविष्कार सादर केला. महेश लिमये (दृकश्राव्य), अक्षर वडके (प्रकाश योजना), अमन वरखेडकर (की बोर्ड) यांनी तांत्रिक बाजू सांभाळली. कार्यक्रमाचे संयोजन केतकी महाजन-बोरकर यांनी केले.
मोदीजी यांच्या शब्दांना संगीतबद्ध करण्याचा योग आला हे मी माझे भाग्य समजतो. मोदीजींच्या कविता ध्यासातून, देशात केलेल्या भ्रमंतीतून प्रकट झालेल्या आहेत, हे प्रकर्षाने जाणवते, अशा भावना डॉ. सलील कुलकर्णी यांनी व्यक्त केल्या.

संवेदनशील असल्याने मोदींजींकडून काव्यनिर्मिती : प्रकाश जावडेकर
माजी केंद्रीय मंत्री प्रकाश जावडेकर यांनी नरेंद्र मोदी यांच्याविषयीचे अद्भुत किस्से या वेळी सांगितले. मोदीजी हे अत्यंत संवेदनशील व्यक्ती असल्याने त्यांच्याकडून काव्यनिर्मिती झाली आहे. ते संन्यस्त कर्मयोगी आहेत. समोरील व्यक्तीचे म्हणणे प्रतिवाद न करता शांतपणे ऐकून घेणे हे त्यांचे स्वभाव वैशिष्ट्य असून त्यांची कार्यक्षमता अफाट आहे. पंतप्रधान म्हणूनच नव्हे तर एक संवेदनशील कवी म्हणून मी त्यांना जवळून पाहिलेले आहे. देश प्रथम हे मोदीजींच्या कामाचे तत्त्व आहे.