राज्याचे मंत्री चंद्रकांत पाटील,केंद्रीय मंत्री मुरलीधर मोहोळ यांच्या हस्ते सायंकाळी पाच वाजता उद्घाटन

पुणे : मुलांना वाचनाची गोडी लावण्यासोबत इतिहास, कला, साहित्य व संस्कृतीची माहिती सांगणाऱ्या; तसेच विविध प्रयोगशील उपक्रमांतून मुलांचे मनोरंजन करत कल्पकता-कुतूहल-उत्सुकतेचा आनंद देणाऱ्या भव्य पुणे बाल पुस्तक जत्रेला येत्या गुरुवारपासून (२२ मे) गणेश कला क्रीडा मंच, स्वारगेट येथे सुरुवात होणार आहे.

केंद्रीय नागरी विमान वाहतूक व सहकार राज्यमंत्री मुरलीधर मोहोळ, राज्याचे उच्च व तंत्र शिक्षण मंत्री चंद्रकांत दादा पाटील, राष्ट्रीय पुस्तक न्यासाचे अध्यक्ष मिलिंद मराठे आणि पुणे महापालिकेचे आयुक्त राजेंद्र भोसले यांच्या हस्ते सायंकाळी पाच वाजता पुणे बाल पुस्तक जत्रेचे उद्घाटन होणार आहे. या प्रसंगी डी. वाय. पाटील विद्यापीठाचे कुलपती डॉ. पी. डी. पाटील, लोकमान्य मल्टिपर्पज को-ऑपरेटिव्ह सोसायटीचे संस्थापक-अध्यक्ष किरण ठाकूर, खडकी शिक्षण संस्था आणि कोहिनूर ग्रुपचे अध्यक्ष कृष्णकुमार गोयल आणि बुलडाणा अर्बन को-ऑपरेटिव्ह क्रेडिट सोसायटीचे मुख्य कार्यकारी अधिकारी शिरीष देशपांडे, लेखिका संगीता बर्वे, लेखक-चित्रकार-प्रकाशक ल. म. कडू आणि बाल साहित्यकार राजीव तांबे हे उपस्थित राहणार आहेत, असे राष्ट्रीय पुस्तक न्यासाचे विश्वस्त आणि पुणे पुस्तक महोत्सवाचे मुख्य संयोजक राजेश पांडे यांनी सांगितले.

राष्ट्रीय पुस्तक न्यास, पुणे पुस्तक महोत्सव, पुणे महापालिका आणि संवाद पुणे यांच्या वतीने पुणे बाल पुस्तक जत्रा या विनामूल्य उपक्रमाचे आयोजन करण्यात आले आहे. अभिजात दर्जा लाभलेल्या मराठी भाषेत समृद्ध बाल साहित्य आहे. या पुस्तकांची माहिती मुलांना देऊन भविष्यातील चांगले वाचक घडविण्याचा प्रयत्न या जत्रेतून केला जाणार आहे. मुलांचे लेखन-वाचन-आकलन कौशल्य वाढविणारी ही प्रक्रिया हसत-खेळत करण्यावर जत्रेचा भर आहे. त्यासाठी बाळगोपाळांसमवेत पालक आणि शिक्षकांसाठीही नावीन्यपूर्ण कार्यक्रम, उपक्रम, परिसंवाद व कार्यशाळा आयोजित करण्यात येणार असून, खाऊगल्लीत मुलांना चमचमीत खाद्यपदार्थांचा आस्वादही घेता येणार आहे, असेही राजेश पांडे यांनी सांगितले.

वाचा, खेळा, करा धम्माल

‘पुणे बाल पुस्तक जत्रेत भव्य पुस्तक प्रदर्शनांसोबत बाल साहित्य लेखन स्पर्धा, कविसंमेलन, जादूचे व बाहुल्यांचे खेळ, पथनाट्य, विमान विज्ञान कार्यशाळा अशा विविध नावीन्यपूर्ण उपक्रमांची रेलचेल आहे. अधिकाधिक पुणेकरांनी आपल्या मुलांसमवेत पुणे बाल पुस्तक जत्रेला भेट देऊन साहित्य संस्कृतीच्या अभिनव बालमेळ्याचा अनुभव घ्यावा,’ असे आवाहन राजेश पांडे यांनी केले आहे.

बालपणीचे खेळ विनामूल्य खेळण्याची संधी

‘आपले अंगण’ या उपक्रमात मुलामुलींना विटी दांडू, चाक फिरवणे, भोवरा फिरवणे, भातुकली असे १६ प्रकारचे जुने खेळ विनामूल्य खेळण्याची संधी मिळणार आहे. या खेळांशी संबंधित साहित्य तेथे विक्रीसाठी उपलब्ध असेल. या उपक्रमाची झलक जंगली महाराज रस्त्यावरील छत्रपती संभाजी महाराज उद्यानात आज (मंगळवार, २० मे) दुपारी ४ वाजता बाल साहित्यकार राजीव तांबे, कवी संदीप खरे, अभिनेते प्रवीण तरडे, माजी नगरसेविका माधुरी सहस्त्रबुद्धे, मिलिंद भोई, अभिनेत्री पूर्वा शिंदे, तेजस्विनी लोणारी अशा विविध मान्यवरांच्या उपस्थितीत पाहता येणार आहे. हे सर्व मान्यवर अंगणातल्या खेळांचा अनुभव घेत ‘आम्ही खेळलो, तुम्ही या खेळायला’ या असा संदेश देणार आहेत. त्यानंतर हा उपक्रम २२ ते २५ मे या कालावधीत गणेश कला क्रीडा मंच येथे विनामूल्य.अनुभवता येणार आहे. या निमित्ताने जुन्या खेळांची माहिती देणाऱ्या पुस्तिकेचे प्रकाशन केले जाणार आहे. रेवा पांडे यांनी हे पुस्तक संकलित केले आहे. त्यासाठी अनिल बेलकर यांनी सहकार्य केले आहे. या पुस्तिकेचे प्रकाशन उद्या (बुधवारी २१ मे) होईल,’ अशी माहिती ‘संवाद पुणे’चे सुनील महाजन यांनी दिली.

: बहुरंग आयोजित 18व्या आदिवासी चित्रपट महोत्सवाचे उद्घाटन

पुणे : आदिवासी समाजासंदर्भातील संवेदना, जाणिवा प्रगल्भ झाल्यास आदिवासी समाज, त्यांची संस्कृती टिकण्यासाठी मदत होईल, असे मत स्वामी रामानंदतीर्थ मराठवाडा विद्यापीठाचे माजी कुलगुरू पंडित विद्यासागर यांनी व्यक्त केले. विद्यापीठांमधील भाषा विभाग, ललित कला केंद्रांच्या माध्यमातून आदिवासी समाजाची संस्कृती, बोलीभाषा टिकविण्यासाठी प्रयत्न व्हावेत, अशी अपेक्षाही त्यांनी व्यक्त केली.

बहुरंग, पुणेतर्फे दोन दिवसीय 18व्या आंतरराष्ट्रीय चित्रपट महोत्सवाचे आयोजन करण्यात आले असून महोत्सवाचे उद्घाटन आज (दि. 19) पंडित विद्यासागर यांच्या हस्ते झाले. त्या वेळी ते बोलत होते. महोत्सव पंडित जवाहरलाल नेहरू सांस्कृतिक भवन, घोले रोड येथे आयोजित करण्यात आला आहे. बहुरंग, पुणेचे अध्यक्ष डॉ. कुंडलिक केदारी, आदिवासी संस्कृती अभ्यासक ग. श. पंडित मंचावर होते. माडीया गोंड लोक शिरस्त्राण म्हणून वापरत असलेले ‌‘शीरमोर‌’ हे यंदाच्या महोत्सवाचे बोधचिन्ह आहे. राज्य शासनाअंतर्गत असलेला सांस्कृतिक कार्य विभाग, महाराष्ट्र चित्रपट रंगभूमी आणि सांस्कृतिक विकास महामंडळ यांच्या सहकार्याने महोत्सवाचे आयोजन करण्यात आले आहे.

पंडित विद्यासागर म्हणाले, विस्थापन, मुलभूत सुविधा, आर्थिक प्रश्न, आरोग्य, शिक्षण हे आदिवासी समाजासमोरील मुख्य प्रश्न आहेत. आदिवासी समाजाला मुख्य प्रवाहात आणण्याविषयी दोन प्रवाह आहेत. आदिवासी समाजाला मुख्य प्रवाहात आणल्यास त्यांची संस्कृती कशी टिकणार, आदिवासी समाजाला मुख्य प्रवाहात न आणल्यास त्यांचा विकास कसा साधणार असे प्रश्न उपस्थित केले जातात. आदिवासी प्रश्नांवर प्रकाश टाकण्यासाठी, त्यांच्या समस्या सोडविण्यासाठी विद्यापीठाच्या माध्यमातून उपाययोजना राबविल्या जाऊ शकतात.

आदिवासी समाजाची ओळख पुसण्याचाच प्रयत्न..

प्रास्ताविकात डॉ. कुंडलिक केदारी म्हणाले, देश-विदेशातील आदिवासी जमातींची सामाजिक, सांस्कृतिक वैशिष्ट्ये, वेगळेपणा, बोलीभाषा, चालीरिती, जीवनशैली, धार्मिक कार्ये, देवदेवता, रूढी-परंपरा तसेच कला, संगीत, नृत्य, नाट्य या विषयी माहिती व्हावी या उद्देशाने दरवर्षी आंतरराष्ट्रीय आदिवासी चित्रपट महोत्सवाचे आयोजन केले जाते. शासनस्तरावर आदिवासी विभाग आहेत पण आदिवासी समाजाची संस्कृती टिकविण्यासाठी या विभागाकडून कुठल्याही उपाययोजना राबविल्या जात नाहीत. मात्र आदिवासींची ओळख पुसण्याचाच प्रयत्न या विभागाद्वारे होत असल्याबद्दल डॉ. केदारी यांनी खंत व्यक्त केली.

उद्घाटन समारंभानंतर विविध लघुपट दाखविण्यात आले. महोत्सवात सहभागी झालेल्या चित्रपट निर्मात्यांचा या वेळी सन्मान करण्यात आला. ग. श. पंडित यांनी मनोगत व्यक्त केले. कार्यक्रमाचे सूत्रसंचालन श्रीकृष्ण देशमुख यांनी केले तर आभार धीरज केदारी यांनी मानले.

क्रिएटिव्ह फाउंडेशन आणि ग्लोबल ग्रूप तर्फे खेळाडूंना वॉटर डिस्पेन्सर व स्पीकर सेट भेट – संदीप खर्डेकर.

पुणे-वर्षभर रोलबॉल च्या विविध वयोगटातील खेळाडूंच्या शहर, जिल्हा, राज्य, विभाग, व राष्ट्रीय तथा आंतरराष्ट्रीय स्पर्धा देशात सुरु असतात, ह्या स्पर्धांसाठी पंच आणि प्रशिक्षक हे दोघेही महत्वाचे असतात असे रोलबॉल असोसिएशन ऑफ महाराष्ट्र चे अध्यक्ष संदीप खर्डेकर म्हणाले.शिबिराच्या समारोप समारंभात ते बोलत होते.यावेळी रोलबॉल खेळाचे जनक राजू दाभाडे,मा. नगरसेविका मंजुश्री खर्डेकर, इराणी कॅफे चे मालक अलिभाई इराणी,पदाधिकारी आनंद यादव, अशोक काळे, चेतन भांडवलकर, दादासाहेब भोरे, प्रमोद काळे, शैलेंद्र पोतनीस व इतर मान्यवर उपस्थित होते.
प्रशिक्षक हा गुरु समान असतो आणि त्याने उत्तमोत्तम खेळाडू घडवायचे असतात तर निष्पक्ष पंच हा कुठल्याही खेळाची आत्मा असतो. निरपेक्ष पणे स्पर्धेदरम्यान मैदानावर न्याय देणारा पंच आणि खेळाडूंचे गुण दोष हेरून त्यांना प्रोत्साहित करणारा प्रशिक्षक हे दोघेही महत्वाचे असतात असेही संदीप खर्डेकर म्हणाले.

रोलबॉल फेडरेशन ऑफ इंडिया तर्फे रोलबॉल खेळाचा प्रचार आणि प्रसार सतत सुरु असतो व खेळाडूंसाठी सातत्याने नवीन कोच व स्पर्धेसाठी नवीन पंच (रेफ्री) तयार करण्याची प्रक्रिया सुरु असते, त्यालाच अनुसरून देशभरातून आलेल्या पंच व प्रशिक्षक यांचे प्रशिक्षण शिबीर पुण्यातील बालेवाडी येथील रोलबॉल स्टेडियम येथे पार पडले असे या खेळाचे जनक राजू दाभाडे यांनी सांगितले. खेळातील तज्ज्ञ व्यक्तींनी चार दिवस सुरु असलेल्या शिबिरात मार्गदर्शन केले व प्रशिक्षण दिले असेही त्यांनी स्पष्ट केले.
लवकरच ज्युनियर विश्वकप स्पर्धा केनिया येथे होणार असून ( 17 वर्षाखालील ) आंतरराष्ट्रीय स्तरावरील सामन्यासाठी उत्तम पंच व प्रशिक्षक तयार करण्याचे कार्य सुरु असल्याचेही सर्व पदाधिकाऱ्यांनी स्पष्ट केले.
यावेळी खेळाडूंच्या सोयीसाठी क्रिएटिव्ह फाउंडेशन आणि ग्लोबल ग्रुपच्या वतीने रोलबॉल स्टेडियम साठी स्पीकर सेट आणि थंड व गरम पाण्याची व्यवस्था असणारा वॉटर डिस्पेन्सर भेट देण्यात येत असल्याचे क्रिएटिव्ह फाउंडेशन चे अध्यक्ष संदीप खर्डेकर म्हणाले.ग्लोबल ग्रूप ह्या वर्षी खेळांना व खेळाडूंना प्रोत्साहन देण्यासाठी विविध उपक्रम राबविणार असून सर्वतोपरी मदत देणार असल्याचे संचालक संजीव अरोरा व मनोज हिंगोरानी यांनी स्पष्ट केले.
लवकरच पुणे मनपा आणि स्मार्ट सिटी प्रकलपांतर्गत मां. बालेवाडी येथील स्टेडियम आच्छादित करण्यात येणार असून त्यामुळे बारा महिने खेळाडूंना खेळाचा आनंद लुटता येईल. त्यादृष्टीने बजेट मध्ये तरतूद करण्यात आली असून लवकरच हे काम सुरु होईल असेही रोलबॉल असोसिएशन ऑफ महाराष्ट्र चे अध्यक्ष संदीप खर्डेकर यांनी स्पष्ट केले.

पुणे दि. १९ : जिल्ह्यातील युवक-युवतींना भारतीय सैन्यदल, नौदल व वायुदलामध्ये अधिकारी पदावर भरती होण्यासाठी पात्र होण्याच्यादृष्टीने कंम्बाईन्ड डिफेन्स सिर्व्हिसेस (सीडीएस) या परीक्षेची तयारी करून घेण्यासाठी छात्रपूर्व प्रशिक्षण केंद्र, नाशिक रोड, नाशिक येथे १६ जून २०२५ ते २९ ऑगस्ट २०२५ या कालावधीत मोफत प्रशिक्षण आयोजित करण्यात येत आहे, या संधीचा लाभ घेण्याकरीता जिल्हा सैनिक कार्यालय येथे १२ जून २०२५ रोजी मुलाखतीस उपस्थित राहावे, असे आवाहन करण्यात येत आहे.

मुलाखतीस येतांना सैनिक कल्याण विभागाच्या www.mahasainik.maharashtra.gov.in संकेतस्थळावरील सीडीएस-६५ अभ्यासक्रमाकरीता (संबंधित जिल्हा सैनिक कल्याण कार्यालयाकडील मुद्रित) प्रवेशपत्र व त्यासोबत असलेली परिशिष्टाची तीन मुद्रीत प्रती सोबत घेऊन यावे. इच्छुक उमेदवार हा कोणत्याही शाखेचा पदवीधर असावा. उमेदवार लोकसंघ आयोग नवी दिल्ली यांच्यामार्फत घेण्यात येणाऱ्या सीडीएस (या परीक्षेकरिता ऑनलाईनपद्धतीने अर्ज केलेला असावा.

अधिक माहितीसाठी प्रभारी अधिकारी, छात्रपूर्व प्रशिक्षण केंद्र, नाशिक रोड, नाशिक यांचा ईमेल आय डी training.pctcnashik@gmail.com व दुरध्वनी क्रमांक ०२५३-२४५१०३२ किंवा व्हॉटस्ॲप क्र. ९१५६०७३३०६ (प्रवेशपत्र मिळविण्याकरीता) कार्यालयीन वेळेत प्रत्यक्ष अथवा दूरध्वनीवर संपर्क साधावा, असे आवाहन जिल्हा सैनिक कल्याण अधिकारी लेफ्टनंट कर्नल स. दै. हंगे (निवृत्त) यांनी केले आहे.

शुक्रवार पेठेतील दोनशे वर्षांहून अधिक पुरातन मंदिरात मोगऱ्याची आरास
पुणे : मोगऱ्याची सुवासिक फुले, झेंडूची फुले आणि केळीचे खुंट वापरून सुशोभित करण्यात आलेल्या शुक्रवार पेठेतील दोनशे वर्षांहून अधिक पुरातन असलेल्या श्री उमा महेश्वर मंदिरात वासंतिक चंदन उटी सोहळा आयोजित करण्यात आला. चंदन उटी सोहळ्यासह मुक्त द्वार भंडारा देखील मंदिरात पार पडला.

श्री उमामहेश्वर मंदिर विश्वस्त मंडळ व व्यवस्थापक, आदिमाया प्रतिष्ठान स्वामी भक्त परिवार, नादब्रह्म ढोल ताशा ध्वज पथक ट्रस्ट आणि सर्व वादक मित्रपरिवार यांच्यातर्फे या सोहळ्याचे आयोजन करण्यात आले होते. यावेळी मंदिराला आकर्षक सजावट करण्यात आली होती.

हिंदुस्तान जागरण न्यासाच्या श्री उमामहेश्वर मंदिर विश्वस्त मंडळातील विनायक थोरात, कैलास सोनटक्के, गुरुनाथ शिरोडकर, महेश करपे, अमोल देशपांडे, प्रसाद डोईफोडे, आनंद कुलकर्णी, मंदिर व्यवस्थापक राजेंद्र टिपरे यांसह आदिमाया प्रतिष्ठान आणि नादब्रह्म ढोल ताशा ध्वज पथक ट्रस्ट चे  कमलेश कामठे, आनंद खंडेलवाल, स्वप्निल जोशी, अक्षय ढाकुळ आदी यावेळी उपस्थित होते.

पुणे, दि. १९: दक्षिण मुख्यालयाअंतर्गत आशा शाळेकरीता कंत्राटी तत्वावर मुख्याध्यापक पदासाठी अर्ज मागविण्यात येत असून इच्छुक उमेदवारांनी २६ मे २०२५ अखेर अर्ज सादर करावेत.

अर्जदार प्राधान्याने पदव्युत्तर पदवी, विशेष शिक्षणात पदवीधर आरसीआय नोंदणीकृत असावा. विशेष समावेशक शाळेचे , मुख्यध्यापक , विशेष शिक्षक म्हणून पूर्वीचा अनुभव असल्यास प्राधान्य दिले जाईल. नियुक्तीच्या तारखेला अर्जदाराचे वय ५५ वर्षांपेक्षा कमी असावे.

इच्छुक उमेदवारांनी साध्या कागदावर अनुभवाच्या तपशीलासहित बायोडाटा, अलीकडील पारपत्र आकाराचा फोटो, अनुभव प्रमाणपत्र, प्रशस्ताऐवजांच्या प्रती तसेच संबंधित तपशीलांसह ‘आशा स्कूल, पुणे येथील मुख्याध्यापक पदासाठी अर्ज’ असे लिहिलेल्या सीलबंद लिफाफ्यात नोंदणीकृत किंवा शीघ्रगती टपालाद्वारे (स्पीड पोस्ट) संचालक, आशा शाळा, ८ जिजामाता रोड मुख्यालय दक्षिण महाराष्ट्र आणि गोवा उपक्षेत्र जवळ, पुणे-४११००१ या पत्त्यावर अर्ज सादर करावे. अर्जासोबत सर्व शैक्षणिक पात्रता, गुणपत्रिका, अनुभव, कामगिरी यांच्या साक्षांकित प्रती जोडाव्यात.

अधिक माहितीसाठी ७७७०००४५३८ या क्रमांकावर संपर्क साधावा, असे आवाहन जिल्हा सैनिक कल्याण अधिकारी लेफ्टनंट कर्नल स. दै. हंगे (निवृत्त) यांनी केले आहे.
000