पुणे-पाण्याच्या मुख्य जललाईनवरील बेकायदेशीर नळजोडणी घेतल्याने धायरी गाव व परिसरातील पाणी टंचाईची समस्या गंभीर बनली आहे ‌ वांरवार बेकायदा नळजोडणी तोडूनही अनेक समाजकंटक पुन्हा बेकायदा नळजोडणी करून मुख्य लाईनवरून पाणी घेत आहेत. त्यामुळे पाणी पुरवठा प्रशासन हतबल झाले आहे बेकायदा नळजोडणी घेणाऱ्यांवर प्रशासनाचा वचक नसल्याने असे प्रकार वारंवार घडत आहेत. बेकायदा नळजोडणी तातडीने तोडण्यात यावीत तसेच काढून टाकलेली नळ जोडणी पुन्हा करणाऱ्यांवर कठोर कायदेशीर कारवाई करण्यात यावी अशी मागणी पुणे शहर आम आदमी पक्षाचे शहराध्यक्ष धनंजय बेनकर यांनी केली आहे.
या बेनकर यांनी पालिका आयुक्त राजेंद्र भोसले यांना निवेदन दिले आहे.धायरीला पाणी पुरवठा करणाऱ्या बारांगणी मळा विहीर ते धारेश्वर मंदिर पाण्याची टाकी पर्यंत तसेच धनगर वस्ती लाईनवर बेकायदेशीर नळजोडण्या करण्यात आल्या आहेत. त्यामुळे अधिकृत पाणी पुरवठा होणाऱ्या ग्राहकांना तीव्र पाणीटंचाईचा सामना करावा लागत आहे .पाणी कमी दाबाने येत आहे तसेच कधी दिवसाआड तर कधीकधी ३ ते ४ दिवसाने पाणी मिळत आहे. त्यामुळे एक लाखांवर रहिवाशांना
बाराही महिने तीव्र पाणीटंचाईला तोंड द्यावे लागत आहे.

पाणी पुरवठा विभाग वरवर बेकायदा नळजोडणी तोडण्याची कारवाई करत आहे. मात्र बेकायदेशीर नळजोडण्या काढून टाकण्यासाठी कोणतीही ठोस कारवाई येत नसल्याने पाणी टंचाईची समस्या गंभीर बनली आहे.याकडे आम आदमी पक्षाचे शहराध्यक्ष धनंजय बेनकर यांनी पालिका आयुक्तांचे लक्ष वेधले आहे.

आम आदमी पक्षाचे शहराध्यक्ष धनंजय बेनकर म्हणाले,
बेकायदा नळजोडणी तोडण्याची ठोस कायदेशीर कारवाई करण्यात यावी. यास जबाबदार असलेल्या दोषींवर कठोर कारवाई करण्यात यावी. पाणीपुरवठा सुरळीत व योग्य दाबाने होईल यासाठी कायमस्वरूपी उपाययोजना येत्या १० दिवसांत कराव्यात.
अन्यथा पालिका कार्यालयासमोर तीव्र आंदोलन करण्यात येणार आहे

पुणे, दि.३१: ‘वाचन संकल्प महाराष्ट्राचा’ या वाचन पंधरवडा उपक्रमानिमित्त शासकीय विभागीय ग्रंथालय, शनिवार पेठ न.वि. गाडगीळ शाळा, पुणे येथे १ ते १५ जानेवारी २०२५ या कालावधीत ग्रंथ प्रदर्शन आयोजित करण्यात आलेले आहे. या ग्रंथ प्रदर्शनाचे उद्घाटन पुणे जिल्हा मराठी भाषा समितीचे सदस्य सचिव तथा उपजिल्हाधिकारी रामहरी भोसले यांच्या हस्ते करण्यात येणार आहे.

उच्च व तंत्र शिक्षण विभागाच्या अधिपत्याखालील विद्यापीठे, महाविद्यालये, सार्वजनिक ग्रंथालयांमध्ये १ ते १५ जानेवारी २०२५ या कालावधीत विद्यार्थ्यांसाठी ‘वाचन संकल्प महाराष्ट्राचा’ हा उपक्रम शासन स्तरावर राबविण्याबाबत कळविण्यात आले आहे. त्या अनुषंगाने शासकीय विभागीय ग्रंथालय, पुणे मार्फत स्वच्छता, ग्रंथ प्रदर्शन, वाचक सभासद नोंदणी यासारख्या उपक्रमांचे आयोजन करण्यात आले आहे.
शासकीय विभागीय ग्रंथालय, पुणे या कार्यालयातील नामांकित ग्रंथ, वर्तमान पत्रे व नियतकालिकांचे प्रदर्शन प्रामुख्याने भरविण्यात येणार आहे. तसेच दुर्मिळ ग्रंथांचे डिजीटायझेशन कशाप्रकारे करण्यात येते त्याचे प्रात्यक्षिकही यानिमित्त पहावयास मिळणार आहे. तरी सर्व वाचक सभासद, विद्यार्थी व नागरिकांनी ग्रंथ प्रदर्शनाचा लाभ घ्यावा, असे आवाहन शासकीय विभागीय ग्रंथालयाचे ग्रंथपाल सुरेश रिद्दीवाडे यांनी प्रसिद्धीपत्रकान्वये केले आहे.

पुणे दि. ३१: पुणे जिल्हा कोषागार कार्यालयाकडून निवृत्तिवेतन घेणाऱ्या निवृत्तीवेतनधारकांसाठी १६ जानेवारी २०२५ रोजी दुपारी ३.३० ते ५.३० वा. गांधी सभागृह, अधिष्ठाता, ससून सर्वोपचार रुग्णालय पुणे येथे पेन्शन मेळावा आयोजित केला आहे.

या मेळाव्यामध्ये जिल्हा कोषागाराच्यावतीने निवृत्तिवेतनधारकांचे निवृत्तिवेतन विषयक प्रश्नांविषयी विचार विनिमय व शंकांचे निरसन करण्यात येणार आहे. तरी पुणे जिल्ह्यातील सर्व सेवानिवृत्तीवेतनधारकांना पेन्शन मेळाव्यासाठी उपस्थित राहण्याचे आवाहन जिल्हा कोषागार कार्यालयाचे सहायक संचालक (निवृत्तीवेतन) यांच्यामार्फत प्रसिद्धीपत्रकान्वये करण्यात आले आहे.

 उस्ताद डागर बंधु यांच्या हस्ते एमआयटी सांस्कृतिक संध्याचे उद्घाटन

पुणे, दि. ३१ डिसेंबर: ” सांस्कृतीक संध्या ही संगीताच्या साधनेतून शांतरसाची अनुभूती देणारी आहे. त्यातूनच प्रत्येकाला ईश्वरीय दर्शन घडते. वैश्विक भारतीय संस्कृती ही मानवतावादी आहे. आजच्या तरुण पिढीला भारतीय संस्कृतीचा विसर पडत चालला आहे. त्यांच्यामध्ये भारतीय संस्कृती रुजविण्यासाठी भारतीय संगीत महत्वाची भूमिका बजावत आहे.” असे विचार एमआयटी वर्ल्ड पीस युनिव्हर्सिटीचे संस्थापक अध्यक्ष विश्वधर्मी प्रा.डॉ. विश्वनाथ दा. कराड यांनी व्यक्त केले.
विश्व शांती केंद्र (आळंदी), माईर्स एमआयटी, पुणे भारततर्फे लोणी काळभोर येथील विश्वराज बंधारा, विश्वशांती गुरूकुल, राजबाग येथे आयेाजित केलेल्या दोन दिवसीय ‘एमआयटी सांस्कृतिक संध्या’ संगीत महोत्सावाच्या उद्घाटन प्रसंगी ते बोलत होते.
यावेळी उस्ताद नफीसुद्दीन डागर व उस्ताद अनीसुद्दीन डागर हे प्रमुख पाहुणे म्हणून उपस्थित हेाते. तसेच पं. उध्दवबापू आपेगांवकर, विश्वशांती कला अकादमीचे महासचिव आदिनाथ मंगेशकर, दूरदर्शनेचे माजी संचालक डॉ. मुकेश शर्मा, नागपूर विद्यापीठाचे माजी कुलगुरू डॉ. एस.एन.पठाण आणि प्रसिद्ध गप्पाष्टककार डॉ. संजय उपाध्ये उपस्थित होते.
प्रा.डॉ. विश्वनाथ दा. कराड म्हणाले,” भारतीय युवक ज्या मार्गाने जात आहे तो योग्य नाही. येथील संस्कृती ही सर्वश्रेष्ठ असून ती विश्वशांतीचा मार्ग दाखविणारी आहे.”
डॉ. मुकेश शर्मा म्हणाले,” भारतीय संस्कृती ही संस्कार देणारी आहे. नव वर्षात प्रवेश करतांना आपण संस्कृतीचे जतन करावे. संगीत साधना ही सर्व शास्त्रांमध्ये सर्वोच्च आहे. यात नाद व ताल आहे. ही संगीत संध्या नसून संस्कृती आहे.”
या संगीत महोत्वसावाच्या उद्घाटनानंतर भारतरत्न श्रीमती लता मंगेशकर विश्वशांती संगीत अकादमीचे विद्यार्थ्यांनी शिव वंदना आणि गणेशवंदना सादर केली. प्राचार्या श्रेयसी पावगी यांचे गायन झाले. त्यानंतर ज्येष्ठ व्हायोलिन वादक तेजस उपाध्ये यांचे व्हायोलिनवादन झाले. तसेच ज्येष्ठ गायिका कल्याणी बोद्रें यांचे गायन आणि मा. उस्ताद नफीसुद्दीन डागर व उस्ताद अनीसुद्दीन डागर यांचे धृपद गायन झाले. यांना पखवाजवर पं. उद्धवबापू आपेगांवकर यांनी साथ संगत दिली.
आदिनाथ मंगेशकर यांनी स्वागतपर भाषण केले.
डॉ. संजय उपाध्ये यांनी सूत्रसंचालन केले.

ईश्वराबाबत मी अज्ञेयवादी : डॉ. श्रीपाल सबनीस
‌‘विवेकनिष्ठ प्रज्ञावंत डॉ. श्रीपाल सबनीस‌’ गौरवग्रंथाचे प्रकाशन

पुणे : डॉ. श्रीपाल सबनीस हे संवेदनशील मन जपणारे परंतु त्याच वेळी चळवळी वृत्ती असणारे समाजाच्या वेदना, प्रश्नांना पाहून त्यांच्या परिहारार्थ झटणारे, दु:ख-दैन्याला वाचा फोडण्यासाठी कार्यरत असणारे साहित्यिक आहेत, अशा शब्दात रयत शिक्षण संस्थेचे चेअरमन चंद्रकांत दळवी यांनी डॉ. सबनीस यांचा गौरव केला. बुद्धीवादी आणि बुद्धवादी याने जात मानू नये. संतत्वामधील चांगुलपणाची बेरीज करत मर्यादा वजा करणारा मी ईश्वराबाबत अज्ञेयवादी आहे, अशा भावना डॉ. श्रीपाल सबनीस यांनी व्यक्त केल्या.
दीपलक्ष्मी नागरी सहकारी पतसंस्थेतर्फे अखिल भारतीय मराठी साहित्य संमेलनाचे माजी अध्यक्ष डॉ. श्रीपाल सबनीस यांच्या अमृत महोत्सवानिमित्त ‌‘विवेकनिष्ठ प्रज्ञावंत डॉ. श्रीपाल सबनीस‌’ या गौरवग्रंथाचा प्रकाशन सोहळा मंगळवारी (दि. 31) आयोजित करण्यात आला होता. गौरवग्रंथाचे प्रकाशन रयत शिक्षण संस्थेचे चेअरमन चंद्रकांत दळवी (भा. प्र. से.) यांच्या हस्ते झाले. त्या वेळी ते बोलत होते. शिक्षणतज्ज्ञ अ. ल. देशमुख अध्यक्षपदी होते.

डॉ. श्रीपाल सबनीस, ललिता सबनीस, पुणे महापालिकेचे माजी अतिरिक्त आयुक्त श्याम देशपांडे (भा. प्र. से.), दै. केसरीचे सहसंपादक रामदास नेहुलकर, संस्कार मंदिर संस्थेच्या कला, वाणिज्य महाविद्यालयाचे सहयोगी प्राध्यापक स्वप्नील गायकवाड गौरव ग्रंथांचे संपादक शिरीष चिटणीस, यशोदीप पब्लिकेशनच्या प्रा. रुपाली अवचरे, निखिल लंभाते मंचावर होते.
चंद्रकांत दळवी पुढे म्हणाले, सबनीस यांचे व्यक्तीमत्व साधेपणाला मर्यादा नसणारे आहे. त्यांना पाहण्यापेक्षा त्यांचे साहित्य वाचणे महत्त्वाचे आहे. आपल्या वडिलांचा लढवैय्या वारसा घेऊन ते पुढे आलेले आहेत. गौरवग्रंथात समाविष्ट असलेल्या विविध लेखकांच्या लेखांविषयी दळवी यांनी याप्रसंगी टिप्पणी केली.
अध्यक्षपदावरून बोलताना डॉ. देशमुख यांनी सबनीस या नावाची ‌‘स‌’ म्हणजे सर्वोत्तम साहित्यिक, ‌‘ब‌’ म्हणजे बहाद्दूर, ‌‘नी‌’ म्हणजे निरलस आणि निगर्वी तर ‌‘स‌’ म्हणजे समयसूचक आणि समीक्षक अशी फोड करत ते पुढे म्हणाले, साहित्याचे उत्तम समीक्षण व सत्य मांडणारे प्रेरणादायक साहित्यिक आहेत. डॉ. श्रीपाल सबनीस हे साहित्यावर निष्ठा असणारे मानवतावादी अष्टपैलू लेखक आहेत. ज्वलंत ज्ञानकोश असलेल्या डॉ. सबनीस यांना वाचक, सुहृदांतर्फे साहित्यरत्न पदवी बहाल करावी, असे आवाहनही केले. त्यास उपस्थितांनी टाळ्यांच्या गजरात मान्यता दिली.
डॉ. श्रीपाल सबनीस म्हणाले, मी मांडत असलेल्या भूमिकेवर सर्व जाती-धर्म-पंथातील व्यक्तींनी प्रेमच केले हे आनंददायी आहे. मानवतावादाच्या भूमिकेतून मी प्रत्येक समाजातील चांगुलपणाची, ज्ञानाची, सत्याची, संचिताची, शहाणपणाची बेरीज करायला शिकलो आहे.
रामदास नेहुलकर म्हणाले, सामाजिक प्रबोधन घडविणारा, माणसात राहणारा, वावरणारा ज्ञानवंत, विचारवंत असा साहित्यिक म्हणजे श्रीपाल सबनीस होय.
जीवननिष्ठेप्रती प्रामाणिक असणारे, शोषित वर्गाबद्दल कणव असणारे आणि देशाला, समाजाला दिशा देताना स्पष्टपणे मते मांडणारे डॉ. श्रीपाल सबनीस आहेत, असे मत श्याम देशपांडे यांनी व्यक्त केले.
स्वप्नील गायकवाड म्हणाले, समाजात अनेक साहित्यिक असले, त्यांची साहित्यिक मूल्ये मोठी असली तरी श्रीपाल सबनीस हे या गुणांव्यतिरिक्त मानवतावादी, प्रेमळ, संवेदनशील व्यक्ती आहेत. आजच्या काळात भावनांक कमी होत असताना देखील सहवेदना आणि संवेदना जपणारे आहेत.
स्वागतपर प्रास्ताविकात शिरीष चिटणीस म्हणाले, हा गौरवग्रंथ हे समाजाचे धन असून शहरांचा इतिहास आहे. डॉ. श्रीपाल सबनीस यांचे विचारधन सामान्यांपर्यंत पोहोचावेत, समाजप्रबोधन व्हावे या विचाराने या गौरवग्रंथाची निर्मिती करण्यात आली आहे. रुपाली अवचरे यांनी मनोगत व्यक्त केले.

पुणे : कर्जबाजारी झाल्याने तरुणाने पिस्तुलातून स्वत:वर गोळी झाडून आत्महत्येचा प्रयत्न केल्याची घटना कात्रज भागात घडली. याप्रकरणी भारती विद्यापीठ पोलिसांकडून गुन्हा दाखल करण्यात आला आहे. गोळीबारात जखमी झालेल्या तरुणावर ससून रुग्णालयात उपचार सुरू आहेत.
याप्रकरणी भारती विद्यापीठ पोलीस ठाण्यात गुन्हा दाखल करण्यात आला. तरुणावर ससून रुग्णालयात उपचार सुरू असल्याची माहिती भारती विद्यापीठ पोलीस ठाण्यातील वरिष्ठ पोलीस निरीक्षक दशरथ पाटील यांनी दिली. कात्रज घाटात सोमवारी रात्री दहाच्या सुमारास एक तरुण जखमी अवस्थेत पडल्याची माहिती गस्त घालणाऱ्या पोलिसांना मिळाली. त्यानंतर पोलिसांनी त्यांला तातडीने रुग्णालयात दाखल केले. कात्रज घाटात चोरट्यांनी अडविले. पैसे न दिल्याने चोरट्यांनी पिस्तुलातून गोळीबार केल्याची माहिती तरुणाने पोलिसांना दिली.

त्यानंतर पोलिसांनी तातडीने तपास सुरू केला. कात्रज घाटातील सीसीटीव्ही कॅमेऱ्यांनी केलेले चित्रीकरण तपासले. तरुणाने दिलेली माहिती संशयास्पद वाटल्याने पोलिसांनी त्यांची चौकशी केली. चौकशीत कर्जबाजारी झाल्याने आत्महत्येचा प्रयत्न केल्याची माहिती त्याने दिली. त्याच्यावर ससून रुग्णालयात उपचार सुरू आहेत. संबंधित तरुणाने बाळगलेले देशी बनावटीचे पिस्तूल कोठून आणले, यादृष्टीने तपास सुरू आहे, असे पोलीस निरीक्षक पाटील यांनी सांगितले.

पुणे : आम्ही पहाटे पाच वाजेपर्यंत हॉटेल सुरू ठेवणार आहोत. तसेच खबरदारी म्हणून आम्ही एखाद्या व्यक्तीनं जास्त ड्रिंक केल्यास त्याला ड्रिंक सर्व्ह करणं बंद करणार आहे. तसेच त्यांच्या ग्रूपमधील लोकांना देखील आम्ही सांगणार आहोत की, यांना आता ड्रिंक करणे तुम्ही थांबवा. त्याचबरोबर आम्ही आमच्या स्टाफला देखील सूचना दिल्या आहेत की, कोणीही वादविवाद करू नये सर्वांनी शांततेत आपली ड्युटी करावी. तसेच आम्ही आमच्या ग्रूपमधील कार चालकांना देखील सांगितलं की, ३१ डिसेंबरला रात्री एक ते दीड नंतर आपण तयार रहा. कारण एखाद्या व्यक्तीने जास्त ड्रिंक केली तर त्याला आम्हीच कारने घरी सोडणार आहोत. मग जरी त्यांनी त्यांची दुचाकी किंवा कार आणली असेल तरी, आम्ही त्यांना घरी सोडणार आहोत. कारण हे लोक आमचे ग्राहक असून एक दिवस ग्राहकांसाठी असा निर्णय आम्ही घेतला आहे.” अशी माहिती हॉटेल्स असोसिएशनचे अध्यक्ष गणेश शेट्टी यांनी दिली.

नवीन वर्षाच्या स्वागतासाठी ठिकठिकाणी मोठी जय्यत तयारी करण्यात आलीय. तर दुसरीकडं पोलिसांकडून देखील कोणताही अनुचित प्रकार घडू नये, यासाठी जवळपास ३ हजार पोलीस तैनात करण्यात आले आहेत. असं असताना आता हॉटेल चालकांनी देखील खबरदारी घेतली आहे. शासनाकडून ३१ डिसेंबर रोजी हॉटेल पहाटे ५ वाजेपर्यंत सुरू ठेवण्याचे आदेश दिले आहेत. यामुळं मोठ्या उत्साहात नागरिकांकडून नवीन वर्षाचं स्वागत केलं जाणार आहे. मात्र असं असलं, तरी खबरदारी म्हणून हॉटेल असोसिएशननं देखील नियमावली बनवली आहे, अशी माहिती गणेश शेट्टी यांनी दिली.

मंगळवारी ३१ डिसेंबरच्या रात्री पुणे शहरासह सर्वच ठिकाणी नवीन वर्षाच्या स्वागतासाठी जय्यत तयारी करण्यात आली आहे. नवीन वर्षाच्या स्वागतासाठी हॉटेल, पब चालकाकडून मोठी तयारी करण्यात आली आहे. मात्र असं असलं, तरी ३१ डिसेंबरच्या रात्री पार्टी करून ड्रिंक पिऊन अनेकवेळा ‘ड्रिंक अँड ड्राईव्ह’च्या घटना घडतात. हीच बाब लक्षात घेता आता पुणे शहरातील हॉटेल्स असोसिएशनच्या वतीनं एक नियमावली बनवण्यात आल्याची माहिती, हॉटेल्स असोसिएशनचे अध्यक्ष गणेश शेट्टी यांनी दिली.

याबाबत हॉटेल्स असोसिएशनचे अध्यक्ष गणेश शेट्टी म्हणाले की, “सर्वप्रथम आम्ही शासनाला धन्यवाद देतो की त्यांनी पहाटे ५ वाजेपर्यंत हॉटेल्स सुरू ठेवण्याचा निर्णय घेतला. या निर्णयानुसारच आम्ही पहाटे पाच वाजेपर्यंत हॉटेल सुरू ठेवणार आहोत. तसेच खबरदारी म्हणून आम्ही एखाद्या व्यक्तीनं जास्त ड्रिंक केल्यास त्याला ड्रिंक सर्व्ह करणं बंद करणार आहे. तसेच त्यांच्या ग्रूपमधील लोकांना देखील आम्ही सांगणार आहोत की, यांना आता ड्रिंक करणे तुम्ही थांबवा. त्याचबरोबर आम्ही आमच्या स्टाफला देखील सूचना दिल्या आहेत की, कोणीही वादविवाद करू नये सर्वांनी शांततेत आपली ड्युटी करावी. तसेच आम्ही आमच्या ग्रूपमधील कार चालकांना देखील सांगितलं की, ३१ डिसेंबरला रात्री एक ते दीड नंतर आपण तयार रहा. कारण एखाद्या व्यक्तीने जास्त ड्रिंक केली तर त्याला आम्हीच कारने घरी सोडणार आहोत. मग जरी त्यांनी त्यांची दुचाकी किंवा कार आणली असेल तरी, आम्ही त्यांना घरी सोडणार आहोत. कारण हे लोक आमचे ग्राहक असून एक दिवस ग्राहकांसाठी असा निर्णय आम्ही घेतला आहे.” अशी माहिती हॉटेल्स असोसिएशनचे अध्यक्ष गणेश शेट्टी यांनी दिली.

शहरातील हॉटेल्स व्यवसायिकांकडून नवीन वर्षाच्या स्वागतासाठी मोठी तयारी करण्यात आली आहे. पुणे शहरात फक्त पुणे नव्हे तर आजूबाजूच्या शहरातील लोक देखील नवीन वर्षाच्या स्वागतासाठी दाखल झाले आहेत. त्या अनुषंगाने विविध ऑफर वेगवेगळ्या हॉटेल्समध्ये ठेवण्यात आल्या आहेत. काही हॉटेलमध्ये तर दुसऱ्या दिवशीपर्यंत थांबण्याची व्यवस्था देखील करण्यात आलेली आहे. जेणेकरुन कोणताही अनुचित प्रकार घडू नये, यासाठी ग्राहकांची पूर्ण खबरदारी हॉटेलकडून घेण्यात आली आहे, असं देखील यावेळी शेट्टी यांनी सांगितलं.

पुणे, दि. ३०: विभागीय आयुक्त डॉ. चंद्रकांत पुलकुंडवार तसेच पोलीस आयुक्त अमितेश कुमार यांनी पेरणे येथे विजयस्तंभ अभिवादन कार्यक्रमाच्या अनुषंगाने सुरू असलेल्या तयारीची पाहणी केली. यावेळी पोलीस सह आयुक्त रंजन कुमार शर्मा, अतिरिक्त पोलीस आयुक्त मनोज पाटील, पोलीस उपायुक्त डॉ. राजकुमार शिंदे, उप विभागीय अधिकारी यशवंत माने आदी उपस्थित होते.

यावेळी त्यांनी विजयस्तंभाचे सुशोभीकरण, गर्दी व्यवस्थापन, रांगा व्यवस्थापनाच्या अनुषंगाने केलेले नियोजन, आजूबाजूच्या जागेचे सपाटीकरण तसेच उभारण्यात येत असलेली शौचालये, उभारलेले पेंडाल, पोलीस सूचना मनोरे आदींच्या उभारणीची तयारी आदीची पाहणी करून संबंधितांना सूचना दिल्या. उपस्थित विविध संघटनांचे प्रतिनिधींशीही त्यांनी संवाद साधून त्यांच्या सूचना जाणून घेतल्या.

जयस्तंभ अभिवादन कार्यक्रमाकरिता वाहनतळासाठी खासगी जागा अधिग्रहित करण्याचे आदेश जारी

पेरणे (ता. हवेली) पेरणे येथे विजयस्तंभ अभिवादन कार्यक्रमासाठी १ जानेवारी २०२५ रोजी मोठ्या प्रमाणावर जनसमुदाय येत असतो. याठिकाणी येणाऱ्या वाहनांकरिता तात्पुरत्या स्वरुपात वाहनतळ उभारण्यासाठी तसेच अन्य बाबीसाठी खासगी मालकीच्या मोकळ्या मिळकती तात्पुरत्या स्वरुपात २ जानेवारी २०२५ पर्यंत अधिग्रहित करण्यात आल्याचे आदेश प्रा. जिल्हाधिकारी आणि जिल्हादंडाधिकारी संतोष पाटील यांनी जारी केले आहेत.

जयस्तंभाजवळ वाहनांची मोठी गर्दी होऊ नये यासाठी केंद्रीय आपत्ती व्यवस्थापन कायदा कलम ६५ अन्वये प्रभारी जिल्हादंडाधिकारी आणि जिल्हा आपत्ती व्यवस्थापन प्राधिकरणाचे अध्यक्ष पाटील यांनी हे आदेश जारी केले आहेत. या आदेशानुसार मौजे वढू खुर्द ता. हवेली येथील गट क्र. १४४ मधील अनिल रामचंद्र चोंधे व इतर यांचे क्षेत्र ३.०३ हे. आर ‘शेतकरी मिसळ’ शेजारील जागा मिळकत अधिग्रहित करुन अनुयायांच्या वाहनांसाठी वाहनतळ म्हणून वापरण्यात येणार आहे.

विजयस्तंभास अभिवादन कार्यक्रमाच्या अनुषंगाने उभारण्यात आलेल्या वाहनतळाच्या ठिकाणी वाहने बंद पडल्यास किंवा अपघात घडल्यास तात्काळ वाहनांना हलविण्याकरीता उत्कृष्ट क्षमतेचे क्रेन्स अधिग्रहन करण्याचे जिल्हाधिकारी तथा जिल्हादंडाधिकारी यांनी आदेश जारी केले आहेत.

वफ्फ बोर्ड वाहनतळ, अहिल्यानगर मार्ग, शिक्रापूर, टोरंट गॅस वाहनतळ, चाकण रोड, जातेगाव खुर्द, चाकण चौक, शिक्रापूर, सणसवाडी चौक, हॉटेल ग्रीन गार्डन पिकअप पाईंट, डिंग्रजवाडी कोरेगाव भिमा, कोरेगाव भिमा बाजारतळ आणि महाराणी येसूबाई कमान वढू बु या ठिकाणाकरीता 10 क्रेन्स अधिग्रहण करण्याबाबत आदेश जारी करण्यात आले आहेत.