पुणे : रंगत-संगत प्रतिष्ठानचा काव्य विभाग आणि काव्यशिल्प यांच्या संयुक्त विद्यमाने ज्येष्ठ कवी जयंत भिडे यांचा रविवारी कृतज्ञता सन्मान करण्यात येणार आहे.
ज्येष्ठ कवी जयंत भिडे यांच्या काव्य लेखन प्रवासाची 50 वर्षे पूर्ण होत आहेत, त्यानिमित्त सत्कार सोहळा आयोजित करण्यात आला असल्याची माहिती रंगत-संगत प्रतिष्ठानचे अध्यक्ष ॲड. प्रमोद आडकर, काव्यशिल्पच्या अध्यक्षा स्वाती यादव यांनी निवेदनाद्वारे कळविली आहे. कार्यक्रम रविवार, दि. 19 रोजी सकाळी 10:30 वाजता भारत स्काऊट ग्राऊंड, उद्यान प्रसाद कार्यालयासमोर, सदाशिव पेठ येथे आयेजित करण्यात आला आहे. शाल, श्रीफळ आणि ग्रंथ असे पुरस्काराचे स्वरूप आहे.
सन्मान सोहळ्यानिमित्त निमंत्रितांचे कविसंमेलन आयोजित करण्यात आले असून यात अश्विनी पिंगळे, भारती पांडे, मीरा शिंदे, प्रभा सोनवणे, प्रतिभा जोशी, सुधीर कुबेर, सीताराम नरके, तनुजा चव्हाण, डॉ. अनिता जठार, स्वप्नील पोरे, कर्नल वसंत बल्लेवार, अजय जोशी, नूतन शेटे, जयश्री श्रोत्रिय, शिरीष सुमंत, मकरंद कुलकर्णी, रवींद्र गाडगीळ, सुरेश शेठ, चंचल काळे, डॉ. नयना कुलकर्णी, अपर्णा आंबेडकर, मनिषा सराफ, आनंद महाजन, साजन पिलानी यांचा सहभाग असणार आहे, असे रंगत-संगत प्रतिष्ठानच्या कार्याध्यक्ष मैथिली आडकर, काव्यशिल्पच्या सचिव राजश्री सोले यांनी सांगितले.

पुणे: परमपूज्य सद्गुरू श्री गंगाधर स्वामी महाराज यांच्या १८ व्या पुण्यतिथीनिमित्त श्री देशमुख महाराज फाउंडेशन व डीएम फाउंडेशन यांच्या संयुक्त विद्यमाने गुरुनाम सप्ताह सोहळ्याचे आयोजन केले आहे. सामाजिक बांधिलकीचे व्रत, धार्मिक व अध्यात्मिक उपक्रमांतून रविवार, दि. १९ जानेवारी ते शनिवार, दि. २५ जानेवारी २०२५ या कालावधीत हा सप्ताह होणार आहे, अशी माहिती फाउंडेशनचे संस्थापक विजय महाराज देशमुख व उपाध्यक्ष कुमारी सुवर्णा बालेघाटे यांनी पत्रकार परिषदेत दिली. प्रसंगी संस्थेचे पदाधिकारी नरहर शिदोरे, जयमाला अनारसे, प्रतिभा साखरे, संजय देशमुख, धनश्री लोणकर, गणेश अनारसे, किरण खरात, शुभम अनारसे, मृणाल सरडे, ऋग्वेदी साखरे, अनुष्का सरडे आदी उपस्थित होते.

विजय महाराज देशमुख म्हणाले, “सद्गुरु श्री गंगाधर स्वामी महाराज यांच्या पुण्यतिथीचा हा सप्ताह यंदा साधनाश्रम, गिवशी गाव, पानशेत पुणे येथे होणार आहे. भजन, कीर्तन, प्रवचन, जप संकल्पाचे शतांश हवन, लघुरुद्र अभिषेक, संजीवनी पादुका पालखी सोहळा, पायी दिंडी, ग्रामदैवत शिरकाई देवी भेट, गुरुचरित्र पारायण, महाभोज आदी कार्यक्रम या सप्ताहात होणार आहेत. समारोपाच्या दिवशी पहाटे ६ वाजता संजीवनी पादुकांवर लघुरुद्र अभिषेक, सकाळी ७ वाजता परमपूज्य श्री गंगाधर स्वामी महाराज संजीवन पादुका पालखी सोहळा प्रारंभ होऊन ग्रामदैवत शिरकाई देवीच्या भेटीला जाईल. सकाळी ९ वाजता शिरकोली गावात भजन, रिंगण, अभिषेक व प्रसाद होईल. चूल बंद गाव जेवण महाप्रसादाने सप्ताह सोहळ्याची सांगता होईल.”
सुवर्णा बालेघाटे म्हणाल्या, “पहिल्या दिवशी ५१ लाख जप संकल्पाचे शतांश हवन होईल. त्यानंतर हभप गुरूश्री प्रिया मालवणकर यांचे गुरुचरित्रावर प्रवचन होईल. हभप वेदमूर्ती मंदार खळदकर गुरुजी यांचे सोमवारी सायंकाळी ५ ते ८ या वेळेत नामसंकीर्तन होईल. बुधवारी सायंकाळी हभप गुरुदास श्री देशमुख महाराज यांचे ‘सद्गुरुवीण सापडेना सोय’ यावर प्रवचन होईल. भागवताचार्य हभप चंद्रकलाताई आळंदीकर, पासलकर शिक्षण संस्था दासवे येथील हभप शाम पासलकर, फलटण येथील हभप देविदास महाराज शिळीमकर यांची कीर्तनसेवा, तर गव्यसिद्ध चंद्रकांत विचारे यांचे गोमातेवर मार्गदर्शनपर व्याख्यान होणार आहे. अखेरच्या दिवशी दत्तधाम सिंदगाव येथील बाळकृष्ण महाराज, मठाधीश महेश महाराज व प्रख्यात भविष्यवेत्ता निशांत भारद्वाज ‘देश आणि सनातन धर्म’ यावर मार्गदर्शन करतील.”

ग्लोबल ग्रूप तर्फे वाघजाई देवीला 5 किलो चांदीचे दागिने समर्पित – संदीप खर्डेकर

पुणे:

सत्तेचा किंवा मिळालेल्या पदाचा वापर हा लोककल्याणासाठी केला पाहिजे या भावनेने मी राजकारणात कार्यरत असतो अशी भावना ना.चंद्रकांतदादा पाटील यांनी व्यक्त केली.मला कोथरूडकरांनी विक्रमी मतांनी विजयी केले आणि माझ्यावर विश्वास दाखविला याबद्दल मी कृतज्ञ तर आहेच पण कोथरूड मतदारसंघातीलच नव्हे तर पुण्यातील सर्व समस्या सोडविण्यासाठी मी कटीबद्ध असल्याचेही मा. ना. चंद्रकांतदादा पाटील म्हणाले.
ग्लोबल ग्रूप च्या वतीने संचालक श्री. संजीव अरोरा यांनी क्रिएटिव्ह फाउंडेशन आणि कै. विश्वनाथ भेलके प्रतिष्ठान संचालित कोथरूड नवरात्र उत्सवाच्या श्री वाघजाई देवीस 5 किलो चांदीचे दागिने समर्पित करताना मा. चंद्रकांतदादा व संजीव अरोरा यांचा सत्कार करण्यात आला,यावेळी उपस्थित कार्यकर्त्यांशी संवाद साधताना त्यांनी ह्या भावना व्यक्त केल्या.
यावेळी ग्लोबल ग्रुपचे संचालक संजीव अरोरा,क्रिएटिव्ह फाउंडेशन चे अध्यक्ष संदीप खर्डेकर, विश्वस्त व मा. नगरसेविका मंजुश्री खर्डेकर,कै.विश्वनाथ भेलके प्रतिष्ठान चे अध्यक्ष विशाल भेलके, विश्वस्त उमेश भेलके, सौ. श्वेताली भेलके,सौ. अक्षदा भेलके, मा. नगरसेविका वासंती जाधव, शहराचे भाजपा उपाध्यक्ष प्रशांत हरसूले,शहर उपाध्यक्ष मंदार बलकवडे, कामगार आघाडी चे राज्य सरचिटणीस बाळासाहेब टेमकर,नवनाथ जाधव,उद्योजक सारंग राडकर, अक्षय मोरे, सुरेश जपे, संदीप मोकाटे, किरण उभे यासह समीर ताडे,गजानन माजिरे, मोहित भेलके व इतर मान्यवर उपस्थित होते.
क्रिएटिव्ह फाउंडेशन नवरात्र उत्सव साजरा करत असतानाच वर्षभर समजपयोगी उपक्रम राबवत असते व संस्थेस मिळालेला सर्व निधी गरजू व्यक्तींच्या साठी मदतकार्यात खर्च करत असते असे संदीप खर्डेकर म्हणाले.मात्र हे करत असताना देवीच्या साज शृंगाराकडे आम्ही कधीच लक्ष दिले नाही असेही संदीप खर्डेकर म्हणाले. मात्र ग्लोबल ग्रूप चे संचालक आणि क्रिएटिव्ह फाउंडेशन चे हितचिंतक संजीव अरोरा यांच्या लक्षात ही बाब आली व त्यांनी देवीच्या चरणी 5 किलो चांदीचे दागिने समर्पित केले व त्यायोगे देवीच्या सुबक मूर्तीचे तेज शतपटीने वाढल्याचे ही खर्डेकर म्हणाले.
संजीव आरोरांसारखे उद्योगपती जे आपल्या कडे असलेले अतिरिक्त पैसे हे समाजासाठी खर्च करतात हे कौतुकास्पद असल्याचे सांगतानाच ना. चंद्रकांतदादा पाटील यांनी संजीव अरोरा यांना पुणेरी पगडी, शाल व भेटवस्तू देऊन त्यांचा सन्मान केला. भविष्यात ही आपण समाजोपयोगी कार्य करत राहू असे संजीव अरोरा म्हणाले.
यावेळी दागिने घडविणारे कलाकार नितीन कर्डे यांना ना. चंद्रकांतदादा पाटील यांच्या हस्ते गौरविण्यात आले तर वाढदिवसाच्या निमित्ताने उद्योगपती सारंग राडकर व मा. नगरसेविका वासंती जाधव यांचा सत्कार करण्यात आला.
देवीच्या आरतीने ह्या कार्यक्रमाचा समारोप करण्यात आला.

पीसीईटी आणि सिंगापूर येथील गोविंद होल्डिंग्स यांच्यामध्ये शैक्षणिक सामंजस्य करार

पिंपरी, पुणे – भारतातील स्टार्टअप्स, एमएसएमई उद्योगांना जागतिक पातळीवरती प्रचंड संधी आहेत. याचा फायदा घेण्यासाठी युवकांनी औद्योगिक विकासाची कास धरावी. यामुळे अनेक रोजगार निर्माण होतील. भारताची अर्थव्यवस्था पाच ट्रिलियन तर महाराष्ट्राची अर्थव्यवस्था तीन ट्रिलियन डॉलर होण्यासाठी चाकोरी बाहेरच्या कल्पनांना मूर्त स्वरूप देत रोजगार निर्मिती करावी. त्यामुळेच देशाच्या आणि राज्याच्या आर्थिक विकासाला गती मिळेल असे प्रतिपादन गोविंद होल्डिंग्स सिंगापूरचे संस्थापक संचालक आणि समूह कार्यकारी अधिकारी डॉ. आनंद गोविंदालुरी यांनी केले‌.
आधुनिक विज्ञान – तंत्रज्ञानाचा वापर औद्योगिक, व्यावसायिक क्षेत्रात वाढत आहे. महाराष्ट्रातील नव उद्योजक, व्यावसायिक, स्टार्टअप्स यांना जागतिक पातळीवरील नव्या बदलांची माहिती व्हावी. तसेच या क्षेत्रातील तज्ज्ञांशी चर्चा, संवाद साधता यावा या उद्देशाने पिंपरी चिंचवड एज्युकेशन ट्रस्ट (पीसीईटी) संचलित पिंपरी चिंचवड विद्यापीठ (पीसीयु), गर्जे मराठी ग्लोबल, महाराष्ट्र इकॉनॉमिक डेव्हलपमेंट कौन्सिल यांच्या संयुक्त विद्यमाने बालेवाडी येथे ‘ग्लोबल एंटरप्रेन्युअर्स कॉन्क्लेव्ह २०२५’चे आयोजन करण्यात आले होते. यावेळी पिंपरी चिंचवड एज्युकेशन ट्रस्ट आणि गोविंद होल्डिंग्स, सिंगापूर यांच्यामध्ये शैक्षणिक सामंजस्य करार करण्यात आला. पीसीईटीच्या वतीने कार्यकारी संचालक डॉ. गिरीश देसाई यांनी आणि या करारावर गोविंद होल्डिंग च्या वतीने डॉ. गोविंदालुरी यांनी सह्या केल्या. यावेळी ॲक्शन अगेन्स हंगर फ्रान्सचे ग्लोबल चेअरमन अश्विनी कक्कर, स्टॅटर्जी अँड डेव्हलपमेंट फिनलँडचे हेरंब कुलकर्णी, ट्रेड इंडिया डॉट कॉम चे सीईओ संदीप छेत्री, डीआयसीसीआयचे मिलिंद कांबळे, फाईव्ह एफ डिजिटलचे अध्यक्ष गणेश नटराजन, बीव्हीजीचे संस्थापक अध्यक्ष हनुमंत गायकवाड, राजेंद्र जगदाळे, मकरंद फडके सी.ए. वृषभ पारक, दुबई वीज आणि जल प्राधिकरण चे व्यवस्थापक सोमनाथ पाटील, समीर वाघ, डॉ. सानिध पाटील, गर्जे मराठी ग्लोबलचे संस्थापक अध्यक्ष आनंद गानू, एमएडीसीचे उपाध्यक्ष सचिन इटकर, गर्जे मराठी ग्लोबलचे संचालक विनय तळेले, उद्योजक नरेंद्र लांडगे, अजिंक्य काळभोर आदी उपस्थित होते.
या शैक्षणिक करारामुळे विद्यार्थी, प्राध्यापकांना जागतिक स्तरावरील उच्च दर्जाचे शिक्षण तसेच उद्योग जगतातील तांत्रिक आणि आर्थिक विषयक माहिती मिळणार आहे. पीसीईटी गुणवत्तापूर्ण दर्जेदार आधुनिक तंत्रज्ञानाचा वापर अभ्यासक्रमामध्ये करत आहे. अल्पावधीतच पीसीईटीने आंतरराष्ट्रीय स्तरावर दर्जेदार शिक्षण देणारी संस्था म्हणून नावलौकिक प्राप्त केला असून जगातील ३३ पेक्षा अधिक विद्यापीठे, संस्था यांच्याबरोबर शैक्षणिक सामंजस्य करार केले आहेत, असे डॉ. गिरीश देसाई यांनी सांगितले.
पिंपरी चिंचवड एज्युकेशन ट्रस्टचे अध्यक्ष ज्ञानेश्वर लांडगे, उपाध्यक्षा पद्मा भोसले, सचिव विठ्ठल काळभोर, खजिनदार शांताराम गराडे, विश्वस्त तथा पीसीयुचे कुलपती हर्षवर्धन पाटील, उद्योजक नरेंद्र लांडगे, अजिंक्य काळभोर, कार्यकारी संचालक डॉ. गिरीश देसाई यांच्या मार्गदर्शनाखाली कार्यक्रमाचे आयोजन करण्यात आले होते.

मुंबई :- चंद्रपूर जिल्ह्याच्या वरोरा येथील आनंदवन महारोगी सेवा समिती संस्थेला कुष्ठरुग्णांचे उपचार आणि पुनर्वसनासाठी 1 कोटी 86 लाख रुपये तर, आनंद अंध, मुकबधीर आणि संधीनिकेतन दिव्यांग कार्यशाळेसाठी 1 कोटी 22 लाख रुपये असे एकूण 3 कोटी 8 लाख रुपयांचा निधी तातडीने वितरीत करण्याचे निर्देश राज्याचे उपमुख्यमंत्री तथा वित्तमंत्री अजित पवार यांनी दिले असून उपमुख्यमंत्र्यांच्या निर्देशानंतर निधी वितरीत करण्याची कार्यवाही तातडीने पूर्ण करण्यात आली आहे. उपमुख्यमंत्री अजित पवार यांनी तातडीने दखल घेऊन केलेल्या या कार्यवाहीमुळे थोर समाजसेवक दिवंगत बाबा आमटे आणि साधनाताई आमटे यांनी 75 वर्षांपूर्वी स्थापन केलेल्या महारोगी सेवा समितीसमोरील आर्थिक अडचणी दूर होण्यास मदत होणार आहे.

दिवंगत बाबा आमटे आणि साधनाताई आमटे यांनी कुष्ठरुग्णांच्या सेवेसाठी 75 वर्षांपूर्वी 1949 मध्ये चंद्रपूर जिल्ह्याच्या वरोरा तालुक्यातील आनंदवन येथे महारोगी सेवा समितीची स्थापना केली आहे. संस्थेचं यंदा अमृतमहोत्सवी वर्ष असून संस्था आर्थिक अडचणीत असल्याची बाब संस्थेचे सचिव डॉ. विकास आमटे यांनी उपमुख्यमंत्री अजित पवार यांच्या लक्षात आणून दिली. डॉ. विकास आमटे यांच्या मागणीची तातडीने दखल घेत उपमुख्यमंत्री अजित पवार यांनी संस्थेस 3 कोटी 8 लाख रुपयांचा निधी तातडीने वितरीत करण्याचे निर्देश प्रशासनाला दिले. त्यानुसार तातडीने कार्यवाही करीत हा निधी संस्थेस तात्काळ वितरीत करण्यात आला आहे.

थोर समाजसेवक दिवंगत बाबा आमटे आणि साधनाताई यांनी स्थापन केलेली ही संस्था गेली 75 वर्षे सामाजिक बांधिलकीच्या जाणीवेतून कुष्ठरुग्णांचे उपचार, पुनर्वसनाच्या माध्यमातून त्यांची सेवा करत आहे. संस्थेतर्फे ग्रामीण भागांतील प्रकल्पांत पुनर्वसित दिड हजार कुष्ठरोग मुक्त दिव्यांग-निराधार ,वृद्ध, अनाथ, परित्यक्ता, मानसिकदृष्ट्या अपंग बांधवांची आणि त्यांची मुलांची काळजी घेतली जाते. विशेष शाळा आणि व्यावसायिक प्रशिक्षण केंद्रात निवासी तीनशे दिव्यांग विद्यार्थी-प्रशिक्षणार्थींना शिक्षण-प्रशिक्षण दिले जाते. आर्थिकदृष्ट्या दुर्बल घटकांसाठी अनिवासी विज्ञान, कला, वाणिज्य साडेतीन हजार विद्यार्थी-विद्यार्थिनींच्या शिक्षणाची सोयही संस्थेमार्फत केली जात आहे. संस्थेच्या या सामाजिक बांधलकी आणि सेवाकार्याची दखल घेत उपमुख्यमंत्री अजित पवार यांनी राज्य शासनाकडून देय 3 कोटी 8 लाख रुपयांचा निधी संस्थेस तात्काळ वितरीत केला आहे.

नागरिकांनी सहकार्य करण्याचे वाहतूक पोलीस उपायुक्ताचे आवाहन

पुणे: गणेशखिंड रोडवरील पुणे विद्यापीठ चौक ते शिवाजीनगर न्यायालयादरम्यान टाटा मेट्रोचे काम सुरू असून वाहतूक सुरक्षित व सुरळीतपणे सुरू राहण्याकरीता वाहतूकीत तात्पुरत्या स्वरुपात बदलाबाबतचे आदेश पुणे शहर वाहतूक शाखेचे उप आयुक्त अमोल झेंडे यांनी जारी केले आहे.
बाणेर कडुन शिवाजीनगर कडे जाणारी वाहतुक :- बाणेरकडून येणारी वाहतुक औध रोडवर वळवून राजभवन समोरील पंक्चर मधून युटर्न घेवून पुन्हा विद्यापीठ मार्गे शिवाजीनगर इच्छितस्थळी जातील.
शिवाजीनगरकडून औंध कडे जाणारी वाहतुक:- शिवाजीनगरकडून औंधकडे जाणारी वाहतूक ही पुणे विद्यापीठ चौकातून सरळ औंधरोड मार्गे इच्छितस्थळी जातील.
औंधकडून शिवाजीनगर कडे जाणारी वाहतुक:- औंधकडून शिवाजीनगरकडे जाणारी वाहतुक ही मिलेनियम गेट चतुःश्रृंगी पोलीस स्टेशनच्या गेटमधून पुणे विद्यापीठ परिसर-उजवीकडे वळून-वाय जंक्शन- विदयापीठ मुख्य प्रवेशव्दारातून बाहेरपडून इच्छितस्थळी जातील. नागरीकांनी वाहतूक बदल मार्गाचा वापर करुन वाहतूक शाखेचे कर्मचारी, स्वयंसेवक यांना सहकार्य करावे, असे आवाहन श्री. झेंडे यांनी केले आहे.

पुणे : पुण्यातील अनुग्रह फौंडेशनतर्फे दिव्यांगांसाठी मोफत आरोग्य तपासणी शिबिराचे आयोजन करण्यात आले होते. कोथरूड येथील उत्सव हॉलमध्ये आयोजित शिबिरात 110 पेक्षा जास्त दिव्यांगांची तपासणी करण्यात आली.
अनुग्रह फौंडेशन गेल्या 11 वर्षांपासून दिव्यांगांसाठी कार्यरत आहेत. संस्थेतर्फे प्रथमच मोफत आरोग्य तपासणी शिबिराचे आयोजन करण्यात आले होते, असे संस्थेच्या संचालक मंडळ सदस्या सीमा पाटील यांनी सांगितले. या शिबिरात मतिमंद मुलांचा जास्त सहभाग होता. शिबिरात बालरोगतज्ज्ञ डॉ. ईशा देशमुख, विशेष मुलांच्या तज्ज्ञ डॉ. जाई जोशी, हृदय विकार तज्ज्ञ डॉ. राजेंद्र पाटील, स्त्री रोग तज्ज्ञ डॉ. अपर्णा देवधर, मेंदूरोग तज्ज्ञ डॉ. चिन्मय कुंभार, दंतचिकित्सक डॉ. रणजीत फाळके, डॉ. प्रतिभा पंडित, फिजिशियन डॉ. वृषाली नाईक, नेत्र विकार तज्ज्ञ डॉ. अरविंद भावे, डॉ. शिल्पा पाटील, डॉ. जयेश पाटील यांनी दिव्यांगांची तपासणी केली.
वैशाली भीमपुरे, दिपाली विद्वांस, माधुरी पटवर्धन व बबिता शुक्ल यांनी दिव्यांग मुलांच्या थेरपी, शिक्षण व व्यावसायिक प्रशिक्षणाबद्दल माहिती दिली. पालक समुपदेशक पल्लवी इनामदार व आनंद कुलकर्णी यांनी पालकांना मार्गदर्शन केले. सर्व मुलांना मोफत औषधे, काही वस्तू व पालकांसाठी मार्गदर्शक हस्तपुस्तिकेचे वाटप करण्यात आले. तसेच आयुष गुरव या मुलाला व्हिलचेअर देण्यात आली. दिव्यांगांसाठी असणाऱ्या शासकीय योजनांची माहिती या वेळी देण्यात आली.
यूडीआयडी कार्ड, निरामय विमा योजना, महापालिकेकडून मिळणारे पेंशन, कायदेशिर पालकत्व याचे अर्ज या वेळी भरून घेण्यात आले. एका छताखाली 18 विविध सोयी उपलब्ध करून देण्यात आल्या होत्या. अशा पद्धतीचा शहरात पहिल्यांचा उपक्रम राबविण्यात आला.
शिबिरास चांगला प्रतिसाद मिळाल्याने भविष्यात शहराच्या विविध भागात आरोग्य तपासणी शिबिर आयोजित केले जाणार असल्याचे रुपाली परांजपे आणि डॉ. वृषाली देहाडराय यांनी सांगितले.