मुंबई-मोहम्मद अली जिना यांना जे जमले नाही, ते भाजपने करून दाखवले, अशा जहाल शब्दांत गुरुवारी उद्धव ठाकरे यांनी वक्फ सुधारणा विधेयकाबद्दल मोदी सरकारवर टीका केली. वक्फ विधेयक मुस्लिमांच्या हिताचे असेल, तर तुम्ही हिंदुत्व सोडले का, सवालही त्यांनी केला. पत्रकार परिषद घेऊन त्यांनी आपली भूमिका सविस्तर मांडली.

उद्धव ठाकरे म्हणाले की, आम्ही बिलाला विरोध केला नाही तर भाजपच्या ढोंगाला आणि भ्रष्टाचाराला विरोध केला. वक्फ बोर्ड सुधारणा विधेयकाचे आणि हिंदुत्वाचे काय देणे घेणे? असा प्रश्नही त्यांनी उपस्थित केला. तुम्ही मुसलमानांचे लांगुलचलन करत असाल तर हिंदूंनी काय केले? असा प्रश्न देखील त्यांनी उपस्थित केला.

नुकतीच रमजान ईद झाली आहे. ईदच्या या सर्व लोकांनी मेजवान्या झोडल्या आहेत. ईदच्या मेजवान्या झोडून या लोकांनी काल वक्फ बोर्ड सुधारणा विधेयक मांडले आहे. मात्र, यामध्ये मंत्री किरण रिजिजू यांनी हे विधेयक मांडले हा योगायोग आहे. याच किरण रिजिजू यांनीच एकेकाळी गोमांस खाण्याचे समर्थन केले होते. त्यामुळे हा योगायोग घडवून आणला आहे का? असा प्रश्न त्यांनी उपस्थित केला. नेमके भारतीय जनता पक्ष काय करतोय, हे देखील मला अद्याप कळाले नसल्याचे उद्धव ठाकरे यांनी म्हटले आहे.

वक्फ सुधारणा विधेयक आज राज्यसभेत सादर
नवी दिल्ली-राज्यसभेतील विरोधी पक्षनेते मल्लिकार्जुन खरगे यांनी भाजप खासदार अनुराग ठाकूर यांच्यावर लावण्यात आलेले आरोप सिद्ध करावेत किंवा त्यांनी पदाचा राजीनामा द्यावा अशी मागणी केली.

अनुराग ठाकूर यांच्या आरोपांमुळे त्यांची प्रतिमा खराब झाली आहे, असे खरगे म्हणाले. खरगे यांनी अनुराग ठाकूर यांना आव्हान देत म्हटले की, जर त्यांच्या आरोपांमध्ये तथ्य असेल तर त्यांनी पुरावे सादर करावेत अन्यथा त्यांनी राजीनामा द्यावा.खरं तर, बुधवारी वक्फ दुरुस्ती विधेयकावर बोलताना काँग्रेस अध्यक्ष अनुराग ठाकूर यांनी खरगे यांच्यावर घोटाळ्याचा आरोप केला होता. ते म्हणाले- कर्नाटकात काँग्रेसचे सरकार आहे. कर्नाटकातील मंदिरे दरवर्षी ४५० कोटी रुपये जमा करतात. ते त्यांचे पैसे कुठे खर्च करतात याचे उत्तर कोण देते?ठाकूर पुढे म्हणाले- तुम्ही कोणत्याही मशिदीतून पैसे घेतले का? तुम्ही कोणत्याही वक्फ बोर्डाकडून पैसे घेतले का? पण कर्नाटकात झालेल्या घोटाळ्यांमध्ये त्यांचे राष्ट्रीय अध्यक्ष मल्लिकार्जुन खरगे यांचेही नाव आहे.अनुराग ठाकूर यांनी खरगे यांचे नाव घेताच सभागृहात गदारोळ सुरू झाला. मात्र, गदारोळ वाढत असताना अनुराग ठाकूर यांनी खरगे यांचे नाव मागे घेतले. हे विधान सभागृहाच्या नोंदींमधूनही काढून टाकण्यात आले.

शिवरायांच्या सैन्यात मुस्लिम सैनिक
दिल्ली-छत्रपती शिवाजी महाराज हे 100 टक्के सेक्युलर होते, छत्रपती शिवाजी महाराज आदर्श शासक होते, न्यायप्रिय होते, कल्याणकारी राजे होते, आदर्श पिताही होते, असे केंद्रीय मंत्री नितीन गडकरी यांनी म्हटले आहे. तर छत्रपती शिवाजी महाराजांनी त्यांच्या संपूर्ण कारकिर्दीत अनेक लढाया जिंकल्या पण त्यांनी कधीही मशिदीवर हल्ला केला नाही. लढाई जिंकल्यानंतर महिला शरण आल्या त्यावेळी ते सन्मानाने वागले.

नितीन गडकरी पुढे बोलताना म्हणाले की, छत्रपती शिवाजी महाराज यांचे जीवनचरित्र इंग्रजीत येत आहे ही आनंदाची बातमी आहे. आमच्या मनात आई-वडिलांपेक्षा शिवाजी महाराजांचे स्थान मोठे आहे. प्रसिद्ध कादंबरीकार विश्वास पाटील यांनी लिहिलेल्या दोन इंग्रजी पुस्तकांचा प्रकाशन सोहळा केंद्रीय मंत्री नितीन गडकरी यांच्या हस्ते झाला. यावेळी ते बोलत होते.

नितीन गडकरी म्हणाले की, अफजल खान आणि शिवाजी महाराज यांची प्रतापगडावर भेट झाली. तेव्हा शिवाजी महाराज यांच्यावर अफजल खान याने वार केला. तेव्हा शिवाजी महाराज यांनी अफजल खानाचा वध केला. त्यानंतर शिवाजी महाराज यांनी आदेश दिला की अफजल खानाची कबर सन्मानाने झाली पाहिजे. आजकाल सेक्युलर हा शब्द खूप प्रचलित आहे. या शब्दाचा इंग्रजी डिक्शनरीत दिलेला अर्थ धर्मनिरपेक्षता नाही. सेक्युलर शब्दाचा अर्थ आहे सर्वधर्मसमभाव. सगळ्या धर्मांशी न्यायाने वागणे हा सेक्युलर शब्दाचा अर्थ आहे. छत्रपती शिवाजी महाराज हे असे राजे होते जे 100 टक्के सेक्युलर होते.

नितीन गडकरी म्हणाले की, जात पात धर्म पंथ याने व्यक्ती मोठा होत नाही तर पराक्रमाने मोठा होतो. शिवाजी महाराज यांचं कार्य फक्त महाराष्ट्र पुरत मर्यादित न राहता जगभर जायला हवे. त्यांच्या सैन्यात सैन्यात मुस्लिम सैनिक देखील होते. कल्याणच्या सुभेदाराच्या सुनेला सन्मानाने माघारी पाठवले. वेळ प्रसंगी शिवाजी महाराज यांनी मुलाला शिक्षा करायला देखील मागे पुढे पाहिले नाही. नाहीतर राजकारणात आजकाल सगळे आपली मुले, मुली आणि पत्नी यांना तिकीट मागतात.

मुंबई- वक्फ बोर्डाच्या जमिनी आम्ही विक्री करू, असे काल अमित शहाच्या तोंडून निघाले, असा आरोप उद्धव ठाकरे गटाचे खासदार संजय राऊत यांनी केला आहे. कालपर्यंत आम्ही वक्फच्या संपत्तीला हात लावणार नाही, आम्ही त्याचे रक्षण करते आहोत, असे ते सांगत होते. मात्र, त्यांच्या तोंडून काल नकळत खरे बाहेर पडले, असा आरोप संजय राऊत यांनी केला आहे. वक्फ बोर्डाच्या जमिनीतून त्यांना पैसे मिळवायचे आहेत. या जमिनीचा त्यांना व्यापार करायचा आहे. दोन लाख कोटी रुपयांच्या वरती या जमिनी आहेत. त्या जमिनीवर डोळा असल्यामुळेच हे विधेयक मंजूर करण्यात आले असल्याचा आरोप संजय राऊत यांनी केला आहे. वक्फ बोर्ड मध्ये होणारा हा भ्रष्टाचार आहे. आम्ही या भ्रष्टाचाराच्या विरोधातच मतदान केले असल्याचे संजय राऊत यांनी म्हटले आहे.

वक्फ बोर्ड संदर्भातील आमच्या पक्षाच्या भूमिकेविषयी शिवसेना पक्षप्रमुख उद्धव ठाकरे आज पत्रकार परिषद घेणार आहेत. ते या पत्रकार परिषदेमध्ये या संदर्भातील भूमिकेवर स्पष्टपणे बोलणार असल्याचे संजय राऊत यांनी म्हटले आहे. हे विधेयक मंजूर झाले, या माध्यमातून देशभरात फार मोठी क्रांती करत आहोत, अशा प्रकारचे वातावरण तयार करण्यात आले. मात्र, ते बिल मंजूर झाले आणि पंतप्रधान परदेश दौऱ्यावर गेले आहेत. या बिलामुळे या देशांमध्ये काय होणार? यापूर्वी काय झाले? असा प्रश्न त्यांनी उपस्थित केला. हा सर्व व्यवहार मुस्लिमांच्या संपत्तीवर कब्जा मिळवण्यासाठी असल्याचा आरोप देखील त्यांनी केला. गरीब मुसलमानांचा यातून उद्धार होणार आहे, अशी भाषा काल सरकारच्या वतीने करण्यात आली. ही पूर्णपणे धुळफेक असल्याचा आरोप संजय राऊत यांनी केला आहे.

२०२५ पर्यंतच्या मशिदी, दर्गा यांना आम्ही हात लावणार नाही. मात्र रिक्त जमिनीची विक्री करणार असल्याचे अमित शहा यांनी काल लोकसभेत सांगितले. म्हणजेच ते खरेदी विक्रीच्या मुद्द्यावर आले आहेत, अशा प्रकारे संजय राऊत यांनी अमित शहा यांच्यावर निशाणा साधला. त्यांच्या तोंडातून नकळत हे सत्य बाहेर पडले असल्याचे संजय राऊत यांनी म्हटले आहे. वक्फ बोर्डाच्या मोकळ्या जमिनीची किंमतच दोन लाख कोटी रुपये आहे. त्यांचा सौदा करण्याची भाषा काल त्यांनी केली. त्यांच्या पोटात जे होते ते काल बाहेर आले. या मोकळ्या जमिनी कोण कोणाला विकणार? आणि कशा पद्धतीने विकणार? असा प्रश्न त्यांनी उपस्थित केला. धारावी आणि मुंबईतील विमानतळ आणि देशभरातील विमानतळे विकल्या गेले आहेत. या देशात विक्री करणारे देखील दोघेच आहे आणि खरेदी करणारे देखील दोघेच आहे, असा आरोप त्यांनी केला आहे.

या देशाचा राष्ट्रीय खेळ हा हॉकी होता. मात्र जय शहा हे क्रिकेटचे सूत्रधार झाले, त्यानंतर क्रिकेट हा देशाचा राष्ट्रीय खेळ झाला आहे. त्यामध्ये देखील हिंदू मुसलमान केले जात आहे. देशात हिंदूंच्या विरुद्ध हिंदूला लढवले जाते आणि मुस्लिमांच्या विरोधात मुस्लिमांना लढवले जात आहे. या माध्यमातून हा नवा राष्ट्रीय खेळ या लोकांनी सुरू केला आहे, असा आरोप संजय राऊत यांनी केला आहे. काल विधेयकावर झालेली भाषण ऐकल्यानंतर त्यामध्ये केवळ संपत्ती – संपत्ती – संपत्ती असल्याचा आरोप त्यांनी केला. सरकारला झोपेत देखील संपत्ती दिसत असल्याचा आरोप त्यांनी केला. मग ती संपत्ती ही धार्मिक असो की राष्ट्राची असो, सरकारला केवळ सर्व संपत्ती दिसत असल्याचा आरोप संजय राऊत यांनी केला आ

मध्यरात्री १२ वाजता देखील संसद सभागृह कामकाज सुरूच

नवी दिल्ली- अल्पसंख्याक व्यवहार मंत्री किरेन रिजिजू यांनी बुधवारी लोकसभेत वक्फ दुरुस्ती विधेयक 2024 सादर केले. रिजिजू यांनी याला उम्मीद (युनिफाइड वक्फ मॅनेजमेंट एम्पॉवरमेंट, एफिशियन्सी अँड डेव्हलपमेंट) असे नाव दिले आहे.AIMIM खासदार असदुद्दीन ओवेसी यांनी वक्फ विधेयकाला विरोध केला. ते म्हणाले- हे कलम २५, २६ चे उल्लंघन आहे. हे विधेयक मुस्लिमांवर अन्याय करणारे आहे.

एआयएमआयएमचे खासदार असदुद्दीन ओवैसी म्हणाले की, या विधेयकाचा उद्देश मुस्लिमांना अपमानित करणे आहे. मी गांधींसारखे वक्फ बिल फाडतो. विधेयक फाडल्यानंतर ओवेसी संसदेच्या कामकाजातून निघून गेले.

ओवेसी यांनी या विधेयकावर आपली भूमिका मांडली. यावेळी त्यांनी भाजपा देशात संघर्ष निर्माण करत असल्याचा आरोप केला. तसेच महात्मा गांधी यांनी जसे आफ्रिकेत कायदा फाडलेला तसे मी हे वक्फ विधेयक फाडत असल्याचे सांगत लोकसभेत वक्फ विधेयक फाडत विरोध दर्शविला आहे.

या विधेयकाचा उद्देश मुस्लिमांना अपमानित करणे आहे. हे कलम २५, २६ चे उल्लंघन आहे. हे विधेयक मुस्लिमांवर अन्याय करणारे आहे, असा आरोप त्यांनी केला.