पुणे-मंगेशकर रुग्णालयाने पैशांअभावी उपचारास नकार दिल्याने गर्भवतीचा मृत्यू झाल्याचा दावा करण्यात आला आहे. या प्रकरणी राज्याच्या आरोग्य विभागाने चौकशीसाठी नेमलेल्या समितीने गर्भवतीच्या घरी जाऊन रविवारी तिच्या नातेवाइकांचे जबाब नोंदविले. दरम्यान, या प्रकरणी समितीने प्राथमिक अहवाल आरोग्य संचालकांकडे पाठविला असून, अंतिम अहवालाविषयी आज राज्य महिला आयोगाच्या अध्यक्षा रुपाली चाकणकर यांनी सविस्तर माहिती दिली. या अहवालानुसार गर्भवती महिलेच्या मृत्यूला जबाबदार असल्याचं त्यांनी म्हटलं आहे.

रुपाली चाकणकरांनी आज वैद्यकीय आणि पोलीस अधिकाऱ्यांसमवेत आढाव बैठक घेतली. याबाबत ते म्हणाले, “आढावा बैठक घेण्याआधी मी भिसे कुटुंबियांची घरी जाऊन भेट घेतली. कोणताही व्यक्ती किंवा रुग्ण डॉक्टरांशी अनेक गोष्टी शेअर करतात. जेणेकरून डॉक्टरांकडून उत्तम उपचार मिळावेत. १५ मार्च रोजी पहिल्यांदा रुग्ण डॉ. घैसास यांना भेटले होते. रुग्णाची संपूर्ण मेडिकल हिस्ट्री फक्त डॉक्टरांना माहीत होती. परंतु, ही घटना घडल्यानंतर रुग्णालयाने चौकशीसाठी जी अंतर्गत समिती नेमली होती, त्या समितीचा अहवाल दिला त्यात स्वतःला वाचवण्यासाठी जाहीररित्या रुग्णाची गोपनिय माहिती सोशल मीडियावर मांडल्या. ही माहिती गोपनिय ठेवण्याचा नियम आहे. याप्रकरणी आम्ही रुग्णालयाचा निषेध करतो.”

“रुग्णालायात ९ वाजून १ मिनिटांनी रुग्णाची एन्ट्री आहे. रुग्णाला २ एप्रिलला बोलावलं होतं. पण २८ मार्चला गर्भवती महिलेला रक्तस्राव होऊ लागल्याने त्यांनी डॉक्टरांशी संपर्क साधला. त्यानुसार त्यांनी रुग्णालयात येण्यास सांगितलं. संबंधित स्टाफला डिलिव्हरीसाठी तयारी करण्यास सांगितलं. त्यानुसार स्टाफने ऑपरेशनचीही तयारी केली. रुग्णाला ऑपरेशन थिएटरमध्ये घेऊन जाण्याअगोदर त्यांच्याकडून १० लाखांची मागणी केली. हे सर्व रुग्णासमोरच सुरू होतं. ते तीन लाख रुपये भरायला तयार होते. इतर पैशांची व्यवस्था आम्ही उद्यापर्यंत करू, असंही म्हणाले. मग मंत्रालयातून आणि विभागातून फोन गेले. तरीही याची दखल घेतली नाही. त्यामुळे रात्री अडीच वाजता रुग्ण बाहेर पडला. मोठ्या प्रमाणात रक्तस्राव होत असतानाही रुग्णावर कोणतेही उपचार झाले नाहीत. उलट तुमच्याकडे असलेली औषधं असतील ते घ्या आणि तुमच्या पद्धतीने रुग्णावर उपचार करण्यास रुग्णालयाने सांगितलं. या सर्व कालावधित रुग्णाची मानसिकता खचून गेली”, असं रुपाली चाकणकर यांनी स्पष्ट केलं.रात्री अडीच वाजता ससून रुग्णालयात नातेवाईकांनी घेऊन जाण्याचा निर्णय घेतला. या काळात रुग्णाची मानसिकता खचली होती, त्यामुळे रुग्ण १५ मिनिटांत बाहेर आला. ते रुग्णालयात कोणालाही भेटले नाहीत. तिथून ते सूर्या रुग्णालयात गेले, चांगल्या पद्धतीचा प्रतिसाद मिळाला. खचलेली मानसकिता आणि रक्तस्राव यामुळे रुग्णाचा मृत्यू झाला”, असं रुपाली चाकणकर म्हणाल्या.

एक अहवाल आला, दोन अहवाल बाकी
चार सदस्यीय समिती स्थापन करण्यात आली असून त्यांचा अहवाल आला आहे. डॉ. राधाकिशन पवार, डॉ. प्रशांत वाडिकर, डॉ. कल्पना कांबळे, डॉ नीना बोऱ्हाडे या सदस्यांनी हा अहवाल सादर केला आहे. दीनानाथ रुग्णालय, ससून रुग्णालय आणि सूर्या रुग्णालयाचा अहवाल यात दिला आहे. हा मृत्यू माता मृत्यू असल्याने यासंदर्भातील सखोल चौकशी माता मृत्यू अन्वेषण समितीअंतर्गत करण्यात येणार आहे. यामध्ये सर्व बाबींचा अहवाल अंतिम अहवाल आज सायंकाळी जाहीर होईल. धर्मादाय आयुक्तांच्या अध्यक्षतेखाली समिती स्थापन करण्यात आली असून त्याचा अहवाल उद्या सकाळपर्यंत सादर होईल.

पुणे-तनिषा भिसे मृत्यू प्रकरण बाबत सरकारने नेमलेल्या समितीचा अहवाल सादर केला आहे. डॉ. सुश्रुत घैसास हे रुग्णालयाचे मानद प्रसुती तज्ञ आहे. मागील दहा वर्ष ते रुग्णालयात काम करत आहे त्यांनी आज आपल्या पदाचा राजीनामा दिला आहे. राजीनामा मध्ये त्यांनी सांगितले की, माझ्यावर सध्याच्या परिस्थितीत दबाव निर्माण झाला आहे. मला माझ्या कुटुंबाची चिंता आहे, माझ्या कामावर देखील परिणाम होत आहे, मी रात्री झोपू शकत नाही, रुग्णालयाची देखील बदनामी होत आहे त्यामुळे मी पदाचा राजीनामा देत आहे. विश्वस्त मंडळ यांच्या समोर त्यांचा राजीनामा ठेवून मंजूर केला जाईल. गुरवार पासून ते सेवेतून बाजूला होतील. त्यांच्याकडील रुग्ण इतर डॉक्टर यांच्याकडे वर्ग करण्यात येईल असे मत दीनानाथ मंगेशकर रुग्णालयाचे अधिष्ठाता डॉक्टर धनंजय केळकर यांनी पत्रकार परिषदेत व्यक्त केले.

यावेळी डॉ. केळकर म्हणाले, रुग्णालय स्टाफ यांनी योग्यप्रकारे बोलावे त्याकरीता त्यांचे प्रशिक्षण सुरू करण्यात येईल. शासनाचे तीन अहवाल आल्यावर याबाबत आम्ही आमची भूमिका मांडू. मनपाने आईचा मृत्यूस जबाबदार कोण याबाबत बैठक घेतली आहे. गुंतागुंतीच्या आणि मोठ्या खर्चाच्या प्रकरणात डिपॉझिट निधी घेतला जातो. रुग्णालय यांच्याकडून डिपॉझिट रक्कम कधी लिहिली जात नाही, पण त्यादिवशी राहू, केतू मध्ये आले माहिती नाही डॉक्टर यांच्याशी बोलणे करून संबंधित यांनी एका चौकटीत रक्कम लिहिली. हॉस्पिटलने टॅक्स थकवला नसून याबाबत न्यायालयात केस सुरू आहे त्याठिकाणी आम्ही कर भरू. मनपाची टॅक्स आकारणी पद्धत ही कमर्शियल केली आहे त्याबाबत आम्ही न्यायालयात याचिका दाखल करून दाद मागितली आहे. व्यावसायिक दराने कर लावला जाऊ नये अशी आमची भूमिका आहे. चॅरिटेबल आम्ही काम करतो की नाही याबाबत धर्मदाय आयुक्त यांना दर महिन्याला आम्ही अहवाल सादर करतो.

असंवेदनशील म्हणजे कामाच्या गर्दीत मनुष्याला जो न्याय मिळाला पाहिजे तो मिळत नाही. आपल्या वागण्यातून संवेदनशीलता दिसून आली पाहिजे. रुग्ण साडेपाच तास रुग्णालयात होते त्यावर उपचार झाले की नाही याबाबत संबंधित चौकशी समिती समोर निवेदन झाले. मला सीएमओ कार्यालय मधून फोन आला होता त्याबाबत मी रुग्ण नातेवाईक यांच्याशी बोलणे करून त्यांना जितके पैसे असतील तेवढा भरा सांगितले होते. एखादा रुग्ण ओपीडी मध्ये आला आणि अचानक निघून गेला तर त्याबाबत पोलिस तक्रार दिली जात नाही. अनेकदा आमच्याकडे बेड उपलब्ध नसते. अनेक रुग्ण रुग्णालयात उपचारासाठी येत असतात रोज इमर्जन्सी असतात.

तनिषा भिसे मृत्यू प्रकरणात सापडले होते वादात; प्रसूतीसाठी 10 लाख डिपॉझिट मागितल्याचा ठपका

पुणे- येथील दीनानाथ मंगेशकर रुग्णालयाचे वादग्रस्त डॉक्टर सुश्रुत घैसास यांनी अखेर आपल्या पदाचा राजीनामा दिला आहे. ते तनिषा भिसे मृत्यूप्रकरणी वादाच्या भोवऱ्यात सापडले होते. त्यांच्यावर टीकेची चौफेर झोड उठत होती. अखेर या प्रकरणी राज्य सरकारच्या समितीचा अहवाल सादर झाल्यानंतर त्यांनी आपल्या पदाचा राजीनामा दिला.

तनिषा भिसे नामक गरोदर महिलेला दीनानाथ रुग्णालयात गंभीर स्थितीत प्रसूतीसाठी आणण्यात आले होते. पण रुग्णालय प्रशासनाने त्यांना 10 लाखांचे डिपॉझिट भरल्यानंतरच दाखल करून घेण्याची भूमिका घेतली होती. यासंबंधीच्या रिसिप्टवर डॉक्टर सुश्रुत घैसास यांची स्वाक्षरी होती. त्यामुळे त्यांच्यावर चौफेर टीकेची झोड उठली होती. या प्रकरणी सत्ताधारी महायुतीसह विरोधी बाकावरील महाविकास आघाडीच्या सर्वच घटकपक्षांनी दीनानाथ रुग्णालयाबाहेर निदर्शने केली होती. त्यानंतर सरकारनेही या प्रकरणी चौकशी समिती स्थापन करून जनतेचा रोष कमी करण्याचा प्रयत्न केला. या समितीचा सोमवारी अहवाल आला. त्यानंतर काही तासांतच डॉक्टर घैसास यांनी दीनानाथ रुग्णालयातील आपल्या पदाचा राजीनामा दिला.

डॉक्टर सुश्रुत घैसास हे दीनानाथ रुग्णालयातील अत्यंत अनुभवी डॉक्टर म्हणून ओळखले जात होते. त्यांच्या विरोधात झालेले आरोप तथा त्यानंतर वैयक्तिक आणि व्यावसायिक पातळीवर निर्माण झालेला ताण-तणाव आणि रुग्णालयाच्या प्रतिमेला झालेली हानी लक्षात घेता त्यांनी आपल्या पदाचा राजीनामा देणे पसंत केले. ते आपल्या राजीनामा पत्रात म्हणाले की, या संपूर्ण प्रकरणामुळे रुग्णालयाच्या नावलौकिकावर गालबोट लागत आहे. विशेषतः माझ्या उपस्थितीमुळे परिस्थिती अधिक बिघडण्याची शक्यता असल्यामुळे मी स्वेच्छेने राजीनामा देत आहे. रुग्णसेवा हे माझे सर्वोच्च कर्तव्य असून, त्यात कोणतीही अडचण निर्माण होऊ नये, हीच माझी भूमिका आहे.

तनिषा भिसे यांच्या मृत्यूचे राज्यभरात संतप्त पडसाद उमटले होते. सत्ताधारी भाजप महिला आघाडीच्या कार्यकर्त्यांनी या प्रकरणी डॉक्टर घैसास यांच्या नातेवाकांच्या पुण्यातील नवसह्याद्री सोसायटीतील एका हॉस्पिटलची तोडफोड केली होती. या प्रकरणी भाजपच्या महिला पदाधिकाऱ्यांवर दंगलीच्या आरोपासह महाराष्ट्र मेडिकेअर सर्व्हिस पर्सन अँड मेडिकेअर सेवा संस्था (हिंसा प्रतिबंध आणि मालमत्तेचे नुकसान किंवा नुकसान) कायदा, 2010 च्या कलम 3 आणि 4 अंतर्गत अलंकार पोलिस ठाण्यात गुन्हा दाखल करण्यात आला आहे.

डॉक्टर घैसास यांची कृती काळीमा फासणारी -आमदार अमित गोरखे

भाजप आमदार अमित गोरखे यांनीही घैसास यांच्या राजीनाम्यावर भाष्य केले आहे. ते म्हणाले, भिसे कुटुंबियांचे सुरुवातीपासून हेच म्हणणे होते की, या घटनेला डॉ. घैसास हेच जबाबदार आहेत. दीनानाथ मंगेशकर हॉस्पिटल प्रशासन अत्यंत चांगल्या पद्धतीने काम करत होते. ते पुढेही करत राहील. ज्या उदात्त भावनेने आमच्या सरकारने आणि मंगेशकर परिवाराने हे हॉस्पिटल चालू केले त्याला कुठेतरी काळीमा फासण्याचे काम डॉ. घैसास यांच्या कृतीने झाले. त्यामुळे आम्ही सुरुवातीपासूनच त्यांच्यावर गुन्हा दाखल करण्याची मागणी केली. आज त्यांनी राजीनामा दिला आहे. याचा अर्थ त्यांना त्यांच्या चुकीची जाणीव झाली आहे. आत्ता एक अहवाल आला आहे. आणखी दोन अहवाल येतील. त्यानंतर पुढील कायदेशीर प्रक्रिया होईल.

ज्येष्ठ गिर्यारोहक तज्ज्ञ उमेश झिरपे : जंगली महाराज पुण्यतिथी महोत्सवात गिर्यारोहण आणि माउंट एव्हरेस्ट या विषयावर व्याख्यान

पुणे: केवळ भटकंती करणे म्हणजे पर्यटन, असा सर्वसामान्यांमध्ये गैरसमज निर्माण झालेला आहे. भटकंती कोणीही करू शकतो, परंतु गिर्यारोहणासाठी ठराविक प्रशिक्षण आणि त्याचा सराव असणे गरजेचे असते. गिर्यारोहण हे आयुष्य जगण्यासाठी सकारात्मक ऊर्जा देते. त्यामुळे सर्वसामान्य नागरिकांनी गिर्यारोहण करणे गरजेचे असून, त्याची माहिती सर्वांपर्यंत पोहोचली पाहिजे, असे मत ज्येष्ठ गिर्यारोहक तज्ज्ञ आणि ‘गिरीप्रेमी’ संस्थेचे प्रमुख उमेश झिरपे यांनी व्यक्त केले.

सद्गुरु श्री जंगली महाराज मंदिर ट्रस्टतर्फे आयोजित करण्यात आलेल्या सद्गुरु श्री जंगली महाराज यांच्या १३५व्या पुण्यतिथी महोत्सवात उमेश झिरपे यांचे “एव्हरेस्ट आणि गिर्यारोहण” या विषयावर व्याख्यान आयोजित करण्यात आले होते. त्यावेळी ते बोलत होते. ट्रस्टचे अध्यक्ष  राजेंद्र तांबेकर यांच्या हस्ते उमेश झिरपे यांचा सत्कार करण्यात आला.

उमेश झिरपे म्हणाले, एव्हरेस्ट सर करणे हे प्रत्येकाचे स्वप्न असते. परंतु प्रत्येक गिर्यारोहकाने एव्हरेस्ट सर केलेच पाहिजे, असे नाही. मात्र गिर्यारोहण करताना आयुष्यामध्ये जे सकारात्मक बदल आपल्याला अनुभवायला मिळतात, ते अनुभवण्यासाठी प्रत्येकाने गिर्यारोहण करणे गरजेचे आहे. आपल्या शारीरिक आणि मानसिक क्षमतेनुसार आपण जर गिर्यारोहण केले, तर त्याचा उपयोग आपल्याला आरोग्य चांगले राहण्यासाठी होऊ शकतो.

शारीरिक आणि मानसिक क्षमतेमध्ये वाढ होणे, आपल्या क्षमतांची जाणीव होणे, तसेच संकटांना सहज तोंड देण्यासाठी प्रेरणा मिळणे, असे महत्त्वाचे बदल आपल्या आयुष्यात गिर्यारोहणाच्या माध्यमातून होऊ शकतात. त्यामुळे प्रत्येक सर्वसामान्य नागरिकांनी आयुष्यामध्ये गिर्यारोहणाचा छंद जोपासला पाहिजे,असेही उमेश झिरपे यांनी यावेळी सांगितले.

पुणे : माझ्यातील खिलाडू वृत्तीला मुंबईतील गणेश मंडळात चालना मिळाल्याने खेळाडू म्हणून जडण-घडण झाली. पदकमंचापर्यंत पोहोचणारा एकच खेळाडू असतो. त्याच्या यशप्राप्तीसाठी मेहनत, जिद्द या बरोबरीनेच सुहृदांच्या शुभेच्छा आणि आशीर्वाद महत्त्वाचे असतात, असे प्रतिपादन जागतिक कीर्तीच्या नेमबाज अंजली भागवत यांनी केले. आजच्या काळात समाज एकत्र राहण्यासाठी हिंदुत्व टिकविण्याची गरज आहे. ते कार्य गणेश मंडळांमार्फत घडावे. कारण गणेश मंडळे फक्त सामाजिक कामच नाही तर वैचारिक देवाणघेवाणीचे कार्यही मोठ्या प्रमाणात करतात, असे गौरवोद्गारही त्यांनी काढले.

जागतिक कीर्तीच्या नेमबाज अंजली भागवत यांचा साईनाथ मंडळ ट्रस्टतर्फे साई पुरस्काराने आज (दि. 6) गौरव करण्यात आला. पुरस्काराचे वितरण आमदार हेमंत रासने, महाराष्ट्र राज्य साहित्य आणि संस्कृती मंडळाचे अध्यक्ष डॉ. सदानंद मोरे, भारतीय महिला हॉकी संघाच्या माजी कर्णधार, अर्जुन आणि महाराष्ट्र गौरव पुरस्कार प्राप्त रेखा भिडे यांच्या प्रमुख उपस्थितीत करण्यात आले. साईनाथ मंडळ ट्रस्टचे अध्यक्ष पियूष शहा, श्रीमंत दगडूशेठ हलवाई मंडळ ट्रस्टचे अध्यक्ष सुनील रासने मंचावर होते. बुधवार पेठेतील श्री साईबाबा मंदिरच्या आवारात कार्यक्रमाचे आयोजन करण्यात आले होते. तिरंगी पुणेरी पगडी, शाल, मानपत्र आणि स्मृतिचिन्ह असे पुरस्काराचे स्वरूप होते. पुरस्काराचे यंदाचे 18वे वर्ष आहे. सुरुवातीस सुवासिनींनी मान्यवरांचे औक्षण केले.

साईंच्या नावाने मिळालेला पुरस्कार हा माझा भाग्ययोग आहे, असे सांगून अंजली भागवत म्हणाल्या, पुरस्कार कुठले आणि कुठे मिळतात याचे महत्त्व आहे. श्री साई पुरस्कार हा माझ्यासाठी बहुमूल्य आहे. सिडनी ऑलिंपिकमध्ये माझी निवड होण्याकरीता बरीच वाट बघावी लागली. त्यावेळी माझ्या वडिलांना शिर्डीला जाऊन साईंकडे प्रार्थना केली आणि दुसऱ्याच दिवशी निवड झाल्याचे समजले, अशी आठवणही त्यांनी सांगितली.

डॉ. सदानंद मोरे म्हणाले, पुण्यातील गणेश मंडळांना खूप मोठी परंपरा आहे. गणेश उत्सवातच नव्हे तर वर्षभर गणेश मंडळे आदर्शवत काम करीत असतात. अंजली भागवत यांना रेखा भिडे यांच्या हस्ते साई पुरस्काराचे वितरण होत आहे हा मणिकांचन योग आहे, असे सांगून डॉ. मोरे पुढे म्हणाले, साई म्हणजे सावली किंवा छाया. या पुरस्काराच्या माध्यमातून साईंच्या कृपेची सावली लाभली आहे.

रेखा भिडे म्हणाल्या, मी साईभक्त असून लहानपणापासून अनेकदा शिर्डीला गेले आहे. साईनाथ मंडळाचे कार्यकर्ते अत्यंत उत्स्फूर्ततेने सामाजिक कार्य करत आहेत ही कौतुकास्पद गोष्ट आहे. आयुष्यात पुढे जाण्यासाठी श्रद्धा आणि सबुरी असणे अत्यंत आवश्यक आहे. अंजली भागवत या अतिशय निष्ठावान खेळाडू असून युवा पिढीला मार्गदर्शन करीत आहेत, याचे कौतुक आहे.

आमदार हेमंत रासने म्हणाले, नेमबाजीत उच्च यश प्राप्त केलेल्या अंजली भागवत यांना हॉकी या क्रीडा प्रकारातील महनीय खेळाडू रेखा भिडे यांच्या हस्ते साई पुरस्काराने सन्मानित केले ही गौरवास्पद बाब आहे. या निमित्ताने व्यासपीठावर क्रीडा क्षेत्रातील रणरागिणी उपस्थित आहेत.

साईनाथ मंडळ ट्रस्टच्या कार्याची माहिती देताना प्रास्ताविकात पियूष शहा म्हणाले, पुण्यात सामाजिक क्षेत्रात गणपती मंडळांचे काम मोठे असून ही मंडळे म्हणजे पुण्याच्या रक्तवाहिन्याच आहेत. या पुरस्काराच्या माध्यमातून एका हृदयापासून दुसऱ्या हृदयापर्यंत जाण्यासाठी गौरव सोहळा आयोजित केला जातो.

मान्यवरांचे स्वागत पियूष शहा, प्रविण गोळवडेकर, प्रशांत पंडित, प्रसाद भोयरेकर यांनी केले. सूत्रसंचालन आणि मानपत्राचे वाचन जतीन पांडे यांनी केले. अमर राव, नरेंद्र व्यास, प्रवीण वळवडेकर, शंकर निंबाळकर, प्रसाद भोयरेकर, अमित दासानी, संकेत निंबाळकर, प्रशांत पंडित यांनी कार्यक्रमाच्या यशस्वीतेसाठी परिश्रम घेतले. आभार पियूष शहा यांनी मानले.

पुणे : कसबा पेठेतील चव्हाण श्रीराम मंदिर येथे आज (दि.6) श्रीराम जन्मसोहळा पारंपरिक पद्धतीने, भक्तीभावाने आणि जनसेवा फाऊंडेशनच्या वृद्धाश्रमातील वृद्ध आणि अनाथाश्रमातील लहान मुलांसमवेत साजरा करण्यात आला. समाजभान जपत चव्हाण परिवारातर्फे दरवर्षी आगळ्या वेगळ्या पद्धतीने रामजन्मोत्सवाचे आयोजन केले जाते.
या सोहळ्यानिमित्त सामाजिक जाणिवेच्या बांधिलकीतून नागरिकांची मोफत आरोग्य तपसाणी करण्यात आली. सामाजिक, शैक्षिणक, क्रीडा आणि वैद्यकीय क्षेत्रात उल्लेखनीय कार्य करणाऱ्यांचा श्रीराम सन्मान पुरस्कार देऊन गौरव करण्यात आला.
संत साहित्याचे अभ्यासक, ज्येष्ठ विचारवंत डॉ. सदानंद मोरे यांची प्रमुख उपस्थिती होती. सामाजिक, शैक्षणिक आणि वैद्यकीय क्षेत्रात अतुलनिय कामगिरी केल्याबद्दल डॉ. विनोद शहा यांचा विशेष सत्कार डॉ. मोरे यांच्या हस्ते करण्यात आला. त्यांनी स्थापन केलेल्या जनसेवा फाऊंडेशनमधील विद्यार्थ्यांच्या शिक्षणाकरिता चव्हाण परिवाराच्या वतीने 21 हजार रुपयांची मदत देण्यात आली. शाल आणि सन्मानपत्र असे पुरस्काराचे स्वरूप होते.
श्रीराम चव्हाण मंदिर ट्रस्टचे अध्यक्ष गणेश चव्हाण, बापू गायकवाड, दत्ता सागरे, डॉ. नितीन भालेराव, मारुतराव देशमुख, अप्पासाहेब गायकवाड, सामाजिक कार्यकर्ते भोला वांजळे आदी मान्यवर उपस्थित होते.
भारतीय खो-खो संघाचे कर्णधार प्रतिक वाईकर, उपकर्णधार सुयश गरगटे, खो-खो खेळातील उल्लेखनीय कामगिरीबद्दल आदित्य गणपुले तसेच भारतीय खो-खो पुरुष संघाचे प्रशिक्षक शिरीन गोडबोले, भारतीय खो-खो महिला संघाच्या प्रशिक्षिका प्राची वाईकर यांचा श्रीराम सन्मान पुरस्काराने गौरव करण्यात आला.
मोफत आरोग्य तपासणी शिबिराचा 260 नागरिकांनी लाभ घेतला.

श्रीराम जन्मसोहळ्यानिमित्त विद्या यंदे यांनी कीर्तनसेवा सादर केली. त्यांना अशोक मोरे (तबला), प्रणव तळवलकर (संवादिनी), धनंजय साळुंके (तालवाद्य), डॉ. अनघा धायगुडे, कल्याण हुद्दार (सहगायन) यांनी साथसंगत केली. कार्यक्रमाचे सूत्रसंचालन डॉ. अनघा धायगुडे यांनी केले.

पुणे- सुट्टीच्या काळात प्रवाश्यांची लूट करणाऱ्या खासगी बस मालकांच्या वर कडक कारवाई करा असे आदेश परिवहन राज्यमंत्री माधुरी मिसाळ यांनी RTO आणि पोलीस या दोहोंना दिले आहेत .

या संदर्भात भाजपा प्रवक्ते संदीप खर्डेकर यांनी सांगितले कि,’दिनांक 1 एप्रिल रोजी खासगी बस ने प्रवासासाठी ऑनलाईन वेबसाईट ची तपासणी केली असता आजचे दर आणि मे महिन्यातील सुट्टीतील दर यात मोठी तफावत असल्याचे दिसून आले. ह्या अन्यायाविरुद्ध आणि ग्राहकांच्या लुटी विरुद्ध कारवाई करण्याबाबतचे पत्र सप्रमाण परिवहन राज्यमंत्री ना. माधुरी मिसाळ यांना सादर केले.त्यांचे स्वीय सहाय्यक मंदार रांजेकर यांनी अत्यन्त सौजन्याने संवाद साधून नेमका प्रश्न समजून घेतला. त्यानंतर मंत्री महोदयांचे ओ एस डी संजय शिंदे यांनी तत्परतेने हालचाल करून ना. माधुरी मिसाळ यांच्याशी चर्चा करून परिवहन आयुक्तांना प्रवाश्यांची लूट करणाऱ्या खासगी बस चालकांवर कारवाई चे निर्देश दिले.माधुरीताईंच्या कार्यालयातील लिपिक उत्तम आव्हाड यांनी ते पत्र मला प्रेषित केले. गतिमान प्रशासनाचे हे उत्तम उदाहरण असून मुख्यमंत्री देवेंद्र फडणवीस यांच्या नेतृत्वाखालील टीम किती संवेदनशीलतेने सर्व प्रश्न हाताळते हे ह्यावरून दिसून येते.
आता प्रत्यक्ष कारवाई ची प्रतीक्षा असून ह्या कार्यतत्परते बद्दल माधुरी मिसाळ यांचे अभिनंदन व आभार.
खर्डेकर म्हणाले कि,’ उन्हाळ्याची सुट्टी असो व सणासुदीची, ह्या काळात नागरिक मोठ्या प्रमाणावर प्रवास करतात. मूळ गावी जाणे असो नातेवाईकांना भेटण्यासाठीचा प्रवास असो अथवा सहलीला जाण्याचे नियोजन करतात अशा वेळी रेल्वे, राज्य परिवहन अश्या सर्वच ठिकाणी बुकिंग फुल्ल असते. अश्या वेळी बहुतांश नागरिक प्रवासासाठी खासगी बस चा वापर करतात.त्या काळात दुप्पट टिप्पट दर आकारून ग्राहकांची लूट केली जाते.

पुणे-आज रामनवमीचे औचित्य साधून मुख्यमंत्री महोदय १०० दिवस ७ कलमी उपक्रमाच्या अनुषंगाने ,उप आयुक्त , परिमंडळ क्र. ४ व उप आयुक्त घनकचरा व्यवस्थापन विभाग पुणे महानगरपालिका यांचे मार्गदर्शनाखाली विक्रांत सिंह , ब्रँड अँबेसिडर , पुणे महानगरपालिका व VIIT कॉलेज – कोंढवा यांच्या माध्यमातून सकाळी ७ ते १० या वेळेत ऐतिहासिक पेशवे तलाव व परिसरात स्वच्छता अभियानाचे आयोजन कण्यात आले होते. त्यामध्ये जवळपास २५० विद्यार्थी तसेच क्षेत्रिय कार्यालय कडील ४० अधिकारी / कर्मचारी यांचे मार्फत परिसर स्वच्छ करणेत आला. १ कॉम्पॅक्टर व २ छोटा हत्ती या वाहनामार्फत अंदाजे २ टन १५० किलो कचरा गोळा करण्यात आला.
स्वच्छता अभियान दरम्यान नागरिकांमध्ये उघड्यावर्ती कचरा न टाकने , सिंगल use प्लास्टिक वापर न करणे , सार्वजनिक ठिकाणी थुंकू नये इत्यादी बाबत विक्रांत सिंह व राजू दुल्लम यांनी नागरिकांमध्ये जनजागृती करण्यासाठी सहाय केले
सदर स्वच्छता मोहिमेदरम्यान महापालिका सहाय्यक आयुक्त लक्ष्मण कादबाने यांनी स्वच्छतेबाबत माहिती देवून या वर्षी संपूर्ण देशात अमृत महोत्सव निमित्त विविध उपक्रमाचे आयोजन करणेत येत असून त्याबाबत मार्गदर्शन करुन संविधान उद्देशिकाचे वाचन करणेत आले. सदर अभियाना दरम्यान कोंढवा येवलेवाडी कार्यालयातील प्रशासन अधिकारी सुनिल मोरे , वरिष्ठ आरोग्य निरीक्षक राजू दुल्लम व अधिकारीकर्मचारी मोठया प्रमाणात उपस्थित होते.