मुंबई – पंतप्रधान नरेंद्र मोदी यांचे अमेरिकेतील मॅडिसन चौकातील भाषण वृत्तवाहिन्यांवरून प्रक्षेपित करण्याच्या प्रकाराला पेड न्यूज मानले जावे, अशी मागणी काँग्रेसने केंद्रीय निवडणूक आयोगाकडे केली आहे.भाजपने रविवारी विविध वर्तमानपत्रांमध्ये जाहिराती देऊन मोदी यांचे भाषण रविवारी व सोमवारी विविध मराठी वृत्तवाहिन्यांवर पाहण्याचे आवाहन केले आहे.
सूत्रांनी दिलेल्या माहितीनुसार काँग्रेसने आयोगाकडे पत्र पाठवले असून त्यात या भाषणाबाबत तक्रार केली आहे. मोदी यांचे भाषण लाइव्ह दाखवले जात नसून ते आता पुनर्प्रक्षेपित होतेय. त्यामुळे तिला पेड न्यूज ठरवले जावे, अशी मागणी काँग्रेसने आयोगाला पाठवलेल्या पत्रात केली आहे.
कोणतीही वृत्तवाहिनी एखाद्या नेत्याचे भाषण अर्धा -अर्धा तास दाखवत नाही. त्यामुळे मोदींचे भाषण हे स्पष्टपणे पेड न्यूजच आहे. मोदी यांचा अमेरिका दौरा हा केंद्र सरकारच्या खर्चाने झाला होता. त्यांना मिळालेल्या सुविधा वा स्वागत हे पंतप्रधान म्हणून मिळाले. त्यामुळे पंतप्रधान म्हणून केलेले भाषण हे एखाद्या पक्षाच्या प्रचारासाठी वापरणे चुकीचे असून हा आदर्श आचारसंहितेचा भंग आहे,’अशी तक्रार काँग्रेसने केली आहे.
पंतप्रधान म्हणून केलेले भाषण अशा राजकीय प्रचारात वापरण्यास आडकाठी केली नाही तर उद्या लाल किल्ल्यावरून केलेल्या वा संसदेत केलेल्या भाषणाचा वापरही राजकीय प्रचारासाठी करतील,अशी भीतीही काँग्रेसच्या सूत्रांनी व्यक्त केली आहे.

पुणे – पुण्याचा पाणीप्रश्न सोडविण्यासाठी भामा आसखेडचे पाणी आणू‘‘ अशी ग्वाही देत ज्यांनी सत्ताधाऱ्या वर सतत भ्रष्टाचाराचे आरोप करून बदनामीचे षड्यंत्र रचले त्या भाजपा सारख्या विरोधी पक्षाकडे जाहिरातबाजी साठी एवढा पैसा आला कुठून ? असा सवाल माजी उपमुख्यमंत्री अजित पवार यांनी रविवारी येथे केला राष्ट्रवादीचे उमेदवार बाबूराव चांदेरे यांच्यासाठी कोथरूड येथील सभेत ते बोलत होते.
खासदार वंदना चव्हाण, अंकुश काकडे, बाबूराव चांदेरे, विजय डाकले, गणेश माथवड, गोविंद थरकुडे व्यासपीठावर उपस्थित होते.
पवार म्हणाले, “जुने पुणे, नवे पुणे या सर्वांचा विचार केला पाहिजे. कोणालाही कचऱ्याचा त्रास होणार नाही, अशी जागा निवडली आहे. पुणे देशातील महत्त्वाचे शहर असा नावलौकिक वाढावा, यासाठी राष्ट्रवादी प्रयत्न करेल. भाजप नकारात्मक, चुकीच्या पद्धतीच्या जाहिराती दाखवत आहेत.
‘कुठे नेऊन ठेवलाय महाराष्ट्र माझा. “अरे… इथेच आहे महाराष्ट्र माझा.‘ जाहिराती करण्याकरिता एवढा पैसा आला कसा. टीव्हीवर दहा मिनिटांच्या बातम्यांत सहा मिनिटे जाहिराती असतात. महागाई कमी होईल. “अच्छे दिन‘ येतील असे जनतेला वाटले होते; पण सहा महिने झाले तरी आज काय परिस्थिती आहे. शंभर दिवसांत काळा पैसा आणणार होता त्याचे काय झाले.
देशाची जबाबदारी बघण्याऐवजी पंतप्रधान घसा बसेपर्यंत सभा घेत आहेत.विदर्भाच्या मुद्द्यावरून लोकांनी कोणाचे खरे मानावे. पंतप्रधानांचे, की पक्षाच्या प्रदेशाध्यक्षाचे की त्या पक्षाच्या राष्ट्रीय नेत्यांचे. उद्धव ठाकरेंच्या विचारात सातत्याने बदल होतात. कधी म्हणतात सरकारमधून बाहेर पडणार, दुसऱ्या दिवशी म्हणतात नाही पडणार. एकदा म्हणतात मुख्यमंत्री होणार, नंतर म्हणतात नाही होणार.‘‘ असाही मुद्दा त्यांनी उपस्थित केला

दाभोळ – जैतापूर प्रकल्पातून निर्माण होणारी वीज इतर राज्यांना विकली जाणार आहे. आपल्या राज्याच्या वाट्याला केवळ 2 टक्‍के वीज मिळणार आहे. असे असताना केवळ 2 टक्‍के विजेसाठी मी येथील जनतेच्या जिवाशी 100 टक्‍के कोणालाही खेळू देणार नाही. हा प्रकल्प जर एवढा चांगला असेल तर तो प्रकल्प इतरत्र न्यावा, असे मत शिवसेना पक्षप्रमुख उद्धव ठाकरे यांनी व्यक्त केले.
दापोलीतील शिवसेनेचे उमेदवार आमदार सूर्यकांत दळवी यांच्या प्रचारार्थ शहरातील आझाद मैदानात ठाकरे यांची प्रचार सभा झाली. ते म्हणाले, “”हिंदवी स्वराज्याचे संस्थापक छत्रपती शिवरायांनी आम्हाला स्वाभिमान शिकवला आहे. महाराष्ट्राची अस्मिता मोठी आहे; मात्र राज्याचा मुख्यमंत्री दिल्लीच्या नेतृत्वाचा जर सेवक म्हणून राहणार असेल, त्यांच्यापुढे गुडघे टेकून नतमस्तक होत आपली शेपूट हलविणार असेल, तर महाराष्ट्रातील स्वाभिमानी जनता हे कदापि सहन करणार नाही. राज्याला अतिउच्च शिखरावर नेण्यासाठी राज्याचा मुख्यमंत्री कोण हे दिल्ली ठरविणार नसून राज्यातील जनताच ठरवेल.‘‘
“”मी राज्यभर प्रचारसभांच्या माध्यमातून दौरा करतोय. पण राज्यातील जनता कॉंग्रेस सरकारच्या नावाने आक्रोश करतेय, न्याय मागतेय, गांजलेली, पीडित जनता आता शिवसेनेकडे मोठ्या आशेने पाहत आहे. या माझ्या राज्यातील आशावादी जनतेला न्याय देण्यासाठी माझ्या हातात ताकद द्या,‘‘ असे आवाहन त्यांनी केले.

मुंबई – दोन वर्षांत किमान ५0 योजना पूर्ण करण्याची ग्वाहीमुंबई : विदर्भ वेगळा करून महाराष्ट्र तोडणार्‍यांना विरोध तर राहणारच; पण कर्नाटकव्याप्त महाराष्ट्रालाही महाराष्ट्रात आणण्याची घोषणा शिवसेनेचे पक्षप्रमुख उद्धव ठाकरे यांनी रविवारी मुंबईत झालेल्या एका जाहीर सभेत केली. येत्या २0१६ साली शिवसेनेचा सुवर्ण महोत्सव माझा मुख्यमंत्री साजरा करेल आणि त्या वेळी माझ्या कमीत कमी ५0 योजना पूर्ण झालेल्या असतील, असेही त्यांनी या वेळी जाहीर केले.
या सभेत उद्धव ठाकरे महत्त्वाची घोषणा करणार असल्याचे जाहीर करण्यात आले होते. त्यामुळे शिवसैनिकांची उत्सुकता शिगेला पोहोचली होती. आपल्या सभेची सुरुवात करतानाच ठाकरे यांनी पंतप्रधान नरेंद्र मोदी यांना लक्ष्य करण्यास सुरुवात केली. संपूर्ण भाषणात त्यांनी भारतीय जनता पार्टी तसेच मोदी यांच्यावरच टीका करण्यावर भर दिला. बडी बडी माणसे प्रचारासाठी मुंबईत आली आहेत. कानाकोपर्‍यात सभा घेत आहेत. गुजरातमधून बसेस भरून माणसे आणली गेली आहेत, असे ते म्हणाले. युती भाजपाने तोडली. तेव्हापासून केंद्रातील मंत्रिमंडळ महाराष्ट्रात फिरत आहे. या सगळ्यांचे मोबाईल नंबर लिहून ठेवा. निवडणुकीनंतर कोण फोन उचलतो का बघा. शिवसेनेचे प्रेम अनुभवले, आता धग सोसा. संकटे येवोत, वाटेत निखारे असोत, ज्वाळा असोत, हात सोडायचा नसतो. आता ‘अच्छे दिन’ आले तर साथ सोडली. महाराष्ट्रातील जनतेने ताट वाढून ठेवले होते. तुम्ही कर्मदरिद्रीपणा केला. आता एकट्याने सरकार बनवणार
असे ते म्हणाले.
भाजपात मुख्यमंत्रीपदाबाबत एकवाक्यता नाही. पंतप्रधान मोदी महाराष्ट्राचे तुकडे होणार नाहीत म्हणतात तर त्यांचे प्रदेशाध्यक्ष फडणवीस स्वतंत्र विदर्भाचा मुद्दा कायम असल्याचे सांगतात. केंद्रात मनमोहन सिंग यांचे सरकार असताना मोदी गुजरातचे मुख्यमंत्री होते. त्यांनी विकास केलाच ना. सरकार कोणाचे हे महत्त्वाचे नाही तर मुख्यमंत्री महत्त्वाचा आहे. महाराष्ट्राचा मुख्यमंत्री दिल्लीची भांडी घासणार नाही. दिल्लीपुढे झुकणार नाही. शेपूट हलवणार नाही. युती टिकवण्यासाठी यांच्या अटी स्वीकारल्या असत्या तर शिवसेना संपली असती. शिवसैनिक मला प्यारा आहे. जिंकल्यावर तर आपल्यासमोर नतमस्तक होणारच आहे; पण आता लढायला हिंमत दिल्याबद्दलही नतमस्तक आहे, असेही ठाकरे म्हणाले.
पृथ्वीराज चव्हाण स्वत:ला स्वच्छ म्हणतात. मग साबणाच्या जाहिरातीत काम करा. बिनकामाचे मुख्यमंत्री. गारपीट झाली, दुष्काळ पडला तरी यांच्या डोक्यावरचा कोंबडा हलत नाही. सिंचनाची फाईल उघडली असती तर अजित पवार यांची जयललिता झाली असती, असे ते म्हणतात. मग का नाही उघडली? राष्ट्रवादीचे उमेदवार वाघ यांच्यावर बलात्काराचे आरोप झाले. लक्ष्मण माने, लक्ष्मण ढोबळे यांच्यावरही बलात्काराचे आरोप झाले. सगळे राष्ट्रवादीचे. तेव्हा पृथ्वीराज झोपले होते का? त्या वेळी का नाही दिला राजीनामा? तेव्हा राजीनामा दिला असता तर आम्ही तुम्हाला पुन्हा मुख्यमंत्री बनवले असते, असेही ठाकरे म्हणाले. अजित पवार यांना पाठिंबा देण्यासही आपण तयार आहोत; पण एका सोप्या अटीवर. त्यांच्या घरी जायचे आणि एक ग्लास पाणी प्यायचे, असे म्हणत ठाकरे यांनी अजित पवार यांच्या पाण्यासंदर्भातील वादग्रस्त वक्तव्याची आठवण करून दिली.

मुंबई – छत्रपती शिवाजी महाराज यांच्याविषयी नरेंद्र मोदी यांनी गुजरातमधील शाळेतल्या मुलांना चुकीचा इतिहास शिकवला, त्या मोदींना महाराष्ट्राची जनता माफ करणार नाही. विधानसभा निवडणुकीत “छत्रपतींचा आशीर्वाद, चलो चले मोदी के साथ‘, अशी जी घोषणा दिली आहे त्याची राष्ट्रवादी कॉंग्रेसचे अध्यक्ष शरद पवार यांनी आज खिल्ली उडविली. तर उद्धव-राज एकत्र आल्यास आनंद होईल याअगोदरही मी या दोघांना एकत्र येण्याचे आवाहन केल्याचे त्यांनी सांगितले. दोन्ही भाऊ एकत्र येऊन बंधुत्व सांभाळणार असतील तर आम्हाला आनंद आहे. दोघे एकत्र आल्यास इतरांचाही त्रास कमी होईल, अशी कोपरखळी पवार यांनी मारली. लोकसभा निवडणुकीत भाजपच्या यशामध्ये शिवसेनेचेही योगदान मोठे आहे. आजपर्यंत भाजपला ज्या ज्या वेळी सत्तेत जाण्याची संधी मिळाली, त्या त्या वेळी शिवसेनेचा आधार त्यांना होता, असे पवार यांनी या वेळी स्पष्ट केले.
निवडणूक प्रचाराच्या अखेरच्या टप्प्यात मंत्रालय आणि विधिमंडळ वार्ताहर संघाच्या वतीने आयोजित वार्तालापात पवार बोलत होते. गुजरातमध्ये सातवीच्या पुस्तकात शिवाजी महाराज यांचा जन्म 1603 मध्ये शिवनेरी या राजवाड्यात झाल्याचे नमूद केले आहे; तर दादोजी कोंडदेव हे शिवाजी महाराजांचे आजोबा होते, अशी चुकीची माहिती देण्यात आल्याचे स्पष्ट करून पवार म्हणाले, की देशाच्या इतिहासात पहिल्यांदाच राष्ट्रीय स्वयंसेवक संघाचे सरसंघचालक मोहन भागवत यांचे दसऱ्याच्या दिवशीचे भाषण दूरदर्शनवरून दाखवण्यात आले. दूरदर्शन हे देशाच्या जनतेच्या मालकीचे आहे. कोणाचेही सरकार घटनेनुसार धर्मनिरपेक्ष असते. मात्र, मोदी सरकारला याचा विसर पडला आहे. दसऱ्याच्या दिवशीच नागपूर येथे दीक्षाभूमीवर लाखो आंबेडकरी अनुयायी डॉ. बाबासाहेब आंबेडकर यांना अभिवादन करण्यासाठी जमा झालेले असताना या सोहळ्याकडे सरकारचे लक्ष गेले नसल्याची खंत पवार यांनी व्यक्‍त केली.
याशिवाय, देशाचे पंतप्रधान परदेशात जातात तेव्हा ते भारताचे प्रतिनिधित्व करत असतात; पण मोदी यांच्या अमेरिकेतल्या भाषणाचा वापर भाजप प्रचारासाठी करत आहे. हा सत्तेचा गैरवापर असल्याची टीकाही त्यांनी केली. माजी पंतप्रधान मनमोहनसिंग शांतपणे योजना तयार करायचे, निर्णय घ्यायचे; पण त्याबाबत भाषण करून वाहवा मिळवत नव्हते. त्याउलट नरेंद्र मोदी यांनी घेतलेले निर्णय दिसत नाहीत; पण भाषणबाजी मात्र जोरात करत आहेत. या दोन पंतप्रधानांमध्ये हा फरक असून, लोकसभेत जनता या भाषणबाजीला बळी पडली. या वेळी महाराष्ट्राची जनता मात्र बळी पडणार नाही, असा विश्‍वास पवार यांनी व्यक्‍त केला.

रामटेक -पंतप्रधान नरेंद्र मोदी गांधी जयंतीच्या दिवशी महात्मा गांधीजींच्या पुतळ्यासमोर नतमस्तक होतात, सरदार वल्लभभाई पटेल यांचा भव्य पुतळा बांधण्याचे जाहीर करतात. परंतु मोदींचे वर्तन हे गांधी आणि पटेल यांच्या विचारांच्या विसंगत असल्याची टीका काँग्रेसचे उपाध्यक्ष राहुल गांधी यांनी विदर्भातील दौऱ्यात केली. रामटेक आणि बुलढाणा येथे आज, रविवारी राहुल गांधी यांच्या प्रचार सभा झाल्या.
छत्रपती शिवाजी महाराज, डॉ. बाबासाहेब आंबेडकर, महात्मा फुले, शाहू महाराज यांचे नाव सर्वच घेत आहे. त्यांची स्मारके उभे करण्याची घोषणा केली जात आहे. पंतप्रधान मोदींचा उल्लेख टाळून राहुल गांधी म्हणाले, गुजरातमध्ये सरदार पटेलांचे स्मारक उभारण्याची घोषणा जे करत आहेत, ते आयुष्यभर त्यांच्या विचारांच्या विरोधात वागत आले आहेत, अशी टीका काँग्रेस उपाध्यक्ष राहुल गांधी यांनी रामटेक येथील सभेत केली. रामटेक येथे काँग्रेस उमेदवारांच्या प्रचारार्थ आयोजित सभेत राहुल गांधी यांनी मोदींवर जोरदार टीका केली. ते म्हणाले, ‘दोन ऑक्टबरला त्यांनी महात्मा गांधीच्या समाधीचे दर्शन घेतले. पण त्यांचे विचार ते आत्मसात करु शकलेले नाहीत.’ महात्मा गांधी, सरदार पटेल, डॉ. बाबासाहेब आंबेडकरांच्या विचाराने फक्त काँग्रेस चालत असल्याचा दावा काँग्रेस उपाध्यक्षांनी यावेळी केला.
राहुल पुढे म्हणाले, ‘महाराष्ट्र गुजरातपेक्षा सर्वच क्षेत्रात आघाडीवर आहे. राज्याच्या जडणघडणीत जनतेचे मोठे योगदान आहे. येथील जनतेने परिश्रमातून आणि रक्त आटवून महाराष्ट्राला घडवले आहे. असं असताना देखील गेल्या साठ वर्षांत येथे काहीच न झाल्याचे सांगणारे मोदी राज्यातील जनतेवरच प्रश्नचिन्ह उपस्थित करत आहेत’ असंही राहुल गांधी म्हणाले.
रामटेकमध्ये जागतिक दर्जाचे पर्यटन केंद्र व्हावे यासाठी काँग्रेस आग्रही असून त्यासाठी २०० कोटींची तरतूदही करण्यात आल्याचे सांगून राहुल गांधी म्हणाले , पंतप्रधान लोकसभेच्या निवडणूकीत सांगत होते, मी पंतप्रधान झालो तर चीन आणि पाकिस्तानला धडा शिकवेल. पण सध्या देशात जे सुरु आहे, ते तुम्ही पाहात आहात. चीनचे राष्ट्राध्यक्ष भारतात आले तेव्हा त्यांचे सैन्य लडाखमध्ये घुसखोरी करत होते. पाकिस्तान रोज आपल्या जवानांवर हल्ले करत आहे. त्यावर आपले पंतप्रधान आता म्हणत आहेत, की लवकरच सर्वकाही ठिक होईल. बोलणे सोपे असते, काम करणे आवघड असते, असा टोला त्यांनी हाणला.

मुंबई- राष्ट्रवादीचे नेते आर.आर.पाटील यांचे वक्तव्य अत्यंत निदंणीय आहे. आबांचे वक्तव्य चुकीचेच असून पक्षाच्या धोरणाशी विसंगत आहे भावनेच्या भरात वक्तव्य केल्याची पाटील यांची कबुली दिली आहे. एवढेच नव्हे तर त्यांनी केलेल्या वक्तव्याबाबत माफीही मागितली, त्यामुळे विषय वाढवू नये, असेही राष्ट्रवादी कॉंग्रेसचे अध्यक्ष शरद पवार यांनी म्हटले आहे.
तसेच राज्यातील मतदार गोंधळलेला नसून तो अधिक सजग झाला आहे, त्यामुळे मतदार राज्याच्या हिताचा निर्णय घेतील, याची खात्री असल्याचे शरद पवार यांनी पत्रकार परिषदेत सांगितले. पवार यांनी मुंबईत पत्रकारांशी वार्तालाप केला.
पवार म्हणाले, यंदा स्वतंत्र लढत असल्याचे ही महत्त्वाची निवडणूक आहे. आतापर्यंत 60 गुणांचे काम केले असून 40 गुण मतदारांच्या हातात असल्याचेही शरद पवार यांनी पत्रकार परिषदेत सांगितले.
दरम्यान विधानसभा निवडणुकीची रणधुमाळी रंगात आली असताना राष्ट्रवादीचे नेते आणि राज्याचे माजी गृहमंत्री आर.आर.पाटील यांनी आक्षेपार्ह वक्तव्य करून नवा वाद ओढवून घेतला आहे. आबांनी आपल्याच तासगाव मतदारसंघातील मनसेच्या उमेदवार सुधाकर खाडेने ‘निवडणूक होईपर्यंत तरी बलात्कार करायला नको होता’ असे म्हणत खळबळ माजवून दिली आहे.