‘व्हॉट अबाऊट सावरकर?’ चित्रपटासाठी स्वीकारलं आव्हान

भूमिकांमधील आव्हान कलाकारांना नेहमीच खुणावत असतं. वास्तवात आपण जसे आहोत तसे पडद्यावर न दिसता आपल्यापेक्षा अगदी वेगळं पात्र साकारायला मिळावं अशी प्रत्येक कलाकाराची इच्छा असते. अभिनेत्री सारा श्रवण हिची आव्हानात्मक भूमिका साकारण्याची इच्छा ‘व्हॉट अबाऊट सावरकर?’ या चित्रपटाने पूर्ण केली आहे. या मराठमोळ्या अभिनेत्रीला कारकीर्दीच्या महत्त्वाच्या वळणावर ‘व्हॉट अबाऊट सावरकर?’ सारख्या मराठी चित्रपटात मणिपुरी तरुणीची  भूमिका साकारण्याची संधी लाभली.

रिटेक अनलिमिटेड फिल्म प्रॉडक्शन आणि औरस अवतार एंटरटेनमेंट प्रस्तुत रोहित शेट्टी, अतुल परब यांची  निर्मिती असलेल्या ‘व्हॉट अबाऊट सावरकर?’ हा सिनेमा स्वातंत्र्यवीर विनायक दामोदर सावरकर यांचे विचार मांडणारा आहे. सावरकरांच्या विचारांनी प्रेरित  होऊन समाजात नवी क्रांती घडवू पाहणाऱ्या ध्येयवेडया तरुणाची कथा या चित्रपटात मांडण्यात आली आहे. सावरकरांच्या विचारांनी केवळ महाराष्ट्रातीलच तरुणांना स्फूर्ती देण्याचं काम केलं नाही, तर भारताच्या कानाकोपऱ्यात त्यांच्या विचारांनी पेटून उठलेले तरुण-तरुणी आहेत. पंजाबपासून मणिपूरपर्यंत पसरलेल्या सावरकरांच्या वैचारिक महासागरातील पाईक होण्याचं भाग्य एका तरुणीला लाभलं, हेच पात्र सारा श्रवणने  ‘व्हॉट अबाऊट सावरकर?’ चित्रपटात साकारलं आहे.

‘व्हॉट अबाऊट सावरकर? मध्ये साराने सुनीती सिंग नावाच्या तरुणीची भूमिका साकारली आहे, या तरुणीच्या मनावर सावरकरवादी विचारांचा पगडा आहे. चित्रपटात मुख्य भूमिका साकारणाऱ्या अभिमान मराठेच्या वैचारिक लढ्यात ती ठामपणे उभी आहे. सारा म्हणते कि, सावरकर हे केवळ महाराष्ट्राचे नसून ते संपूर्ण भारताचे होते. त्यांच्या विचारांचा प्रभाव अमराठी लोकांवरही होता. मी साकारलेलं पात्र त्यांचंच प्रतिनिधित्व करणार आहे. तिरंग्यामुळे माझी आणि चित्रपटाच्या नायकाची भेट होते. त्यानंतर आम्ही एकजुटीने काम करतो. ‘व्हॉट अबाऊट सावरकर?’ मध्ये काम करण्याचा अनुभव अविस्मरणीय तर होताच, पण बरंच काही शिकवणारा होता. नवीन कलाकारांच्या जोडीला मराठीतील दिग्गजांसोबत काम करताना जो अनुभव गाठीशी आला तो भविष्यात नक्कीच कामी येईल.

१७ एप्रिल रोजी प्रदर्शित होणाऱ्या या चित्रपटात शरद पोंक्षे, विवेक लागू, अविनाश नारकर, अतुल तोडणकर, सारा श्रवण,श्रीकांत भिडे आदी कलाकारांच्या भूमिका आहेत. निलेश मालप ,गगन बाया आणि नीती सिंग या चित्रपटाचे सहनिर्माते असून नागेश पुजारी कार्यकारी निर्माते आहेत. किंदर सिंग यांनी साहसदृश्यांचे दिग्दर्शन केलं असून नृत्य दिग्दर्शन श्रीकांत अहिरे यांचे आहे.रंगभूषा किरण सावंत यांनी केली आहे, तर वेशभूषा रीना मदाने यांची आहे. ‘व्हॉट अबाऊट सावरकर?’ मध्ये एका ध्येयवेडया तरुणाचा प्रवास रेखाटतानाच स्वातंत्र्यवीर सावरकरांच्या महान कार्याचा आढावा आणि विचारांचा मागोवा घेण्यात आला आहे.

मराठी सिनेमांचा ओघ हा पूर्वीपेक्षा काही प्रमाणात वाढला असून नवनवीन निर्माते, दिग्दर्शक, कलाकार ह्यांची संख्या ही त्याचप्रमाणे वाढत आहे. अभिनेता बनण्याचे स्वप्न हे प्रत्येकाचेच असते. परंतु मनातील स्वप्न पूर्ण करण्यासाठी आपण जर अधिक मेहनत घेतली तर आपल्याला यशापासून नक्कीच कोणी लांब ठेवू शकत नाही याचा खराखुरा प्रत्यय आला आहे तो अभिनेता कैलास वाघमारेला.
जालना जिल्ह्यातील चांदई या छोट्याश्या गावात जन्माला आलेल्या कैलासने कॉलेजमध्ये असताना अनेक पथनाट्य, एकांकिका, लोकनाट्य यामध्ये सहभाग घेऊन अभिनेता बनण्याचे स्वप्न हे उराशी बाळगले होते. एम. ए मराठी पर्यंतचे शिक्षण घेऊन मुंबई येथे नाट्यशास्त्राचे दोन वर्षाचे शिक्षण हे त्याने श्री. वामन केंद्रे यांच्याकडून घेतले. शिक्षण पूर्ण झाल्यावर काही लहान-लहान नाटकातून भूमिका साकारण्यास त्याने सुरुवात केली. याच दरम्यान सुमित्रा भावे आणि सुनील सुखटणकर यांच्याशी त्याची भेट झाली आणि सह्याद्री वाहिनीवर त्यावेळी सुरु असलेल्या “माझी शाळा” या मालिकेत त्याला मुख्य भूमिका साकारण्याची संधी मिळाली. त्यानंतर संदेश भंडारे यांच्या “महादू” या चित्रपटात त्याने एक छोटीशी भूमिका साकारली होती. संभाजी भगत यांच्या “शिवाजी अंडरग्राउंड इन भीमनगर मोहल्ला” या नाटकामुळे कैलासला खऱ्या अर्थाने एक वेगळी ओळख मिळाली.
आनंद सागर प्रॉडक्शनच्या विजयश्री पाटील यांची निर्मिती असलेला, पांडुरंग जाधव यांचे दिग्दर्शन असलेल्या आगामी “मनातल्या उन्हात” या सिनेमात कैलास अभिनेता म्हणून पदार्पण करत आहे. मराठी सिनेसृष्टीत आज एवेढे मोठ-मोठे अभिनेते असताना या सिनेमासाठी दिग्दर्शक पांडुरंग जाधव यांनी माझ्यावर जो विश्वास ठेवला आणि संधी दिली त्यासाठी मी त्यांचा अत्यंत आभारी आहे. त्यांनी मला या चित्रपटातील अभिनयासाठी पूर्णपणे स्वातंत्र्य दिले होते. या चित्रपटातील माझी भूमिका ही अत्यंत आव्हानात्मक असून वय वर्ष २० ते ६५ वर्षापर्यंतची व्यक्तिरेखा मी या चित्रपटात साकारली आहे.चित्रपटातील भाषेचा लहेजाही पूर्णपणे वेगळा असल्याने मी त्यासाठी वेगळी मेहनत घेतली. एका सर्वसामान्य माणसाच्या आयुष्यात अशा काही घटना या सातत्याने घडत जातात आणि त्या परिस्थितीशी तो कसा समोर जातो याचे चित्रण “मनातल्या उन्हात” या सिनेमात तुम्हाला पाहता येणार असल्याचे अभिनेता कैलास वाघमारे यांनी सांगितले.
चित्रपटाची पटकथा विद्यासागर अध्यापक, पांडुरंग के. जाधव यांनी एकत्रितपणे लिहिली आहे असून संवाद विद्यासागर अध्यापक यांचे आहेत. या  चित्रपटात अभिनेते  किशोर कदम, समीर धर्माधिकारी, नागेश भोसले, रुचिता जाधव, छाया कदम, मिताली जगताप बालकलाकार हंसराज जगताप,  मंथन पाटील आणि ओवेशिक्षा पाटील यांच्या प्रमुख भूमिका आपल्याला पाहता येणार आहेत.विश्वराज जोशी यांनी लिहिलेल्या गाण्याला राहुल मिश्रा यांचे सुमधुर संगीत लाभले असून चित्रपटातील गाणी सुप्रसिद्ध गायक आदर्श शिंदे आणि गायिका रंजना जाधव- माने यांच्या आवाजात रेकॉर्ड करण्यात आली आहेत तर पार्श्वसंगीत अश्विन श्रीनिवासन यांचे लाभले आहे.नागराज दिवाकर यांनी या चित्रपटाचे उत्तम छायांकन केले असून निलेश नवनाथ गावंड यांनी या चित्रपटाचे संकलन केले आहे.
येत्या जून महिन्यात हा सिनेमा आपल्या भेटीस येणार आहे.

वयाच्या अवघ्या तेराव्या वर्षी चित्रपटसृष्टीत म्युझिशियन म्हणून दाखल झालेले आणि ‘ चेन्नई एक्स्प्रेस’, ‘शूटआइट अॅट वडाला’, ‘सिंघम रिटर्न्स’, ‘सरकार’, ‘एक हसीना थी’, यांसारख्या सुपरहिट चित्रपटांना आपल्या अविस्मरणीय पार्श्वसंगीताने चार चांद लावणारे हिंदीतील आघाडीचे संगीतकार अमर मोहिले आता निर्मिती क्षेत्रात पाऊल ठेवत आहेत. आपल्या ‘अमर मोहिले प्रॉडक्शन्स’ या बॅनरअंतर्गत ते ‘ए फायनल’ या आगळ्यावेगळ्या म्युझिकल चित्रपटाची निर्मिती करत आहेत. हिंदी चित्रपटांच्या दुनियेतील पार्श्वसंगीतातील एक आघाडीचं नाव असूनही अमर मोहिले यांनी आपल्या पहिल्यावहिल्या चित्रनिर्मितीसाठी आवर्जून मायमराठीची निवड केली आहे.

‘अर्जुन’फेम लेखक–दिग्दर्शक एफ. एम. इलियास यांनी ‘अमर मोहिले प्रॉडक्शन्स’च्या या पहिल्या चित्रपटाची धुरा उचलली आहे. कथा त्यांचीच असून त्यांनी व इब्राहिम अफगाण यांनी पटकथा लिहिली आहे. संवाद इब्राहिम अफगाण यांचे असून संगीत व पार्श्वसंगीताची बाजू स्वत: अमर मोहिले यांनी सांभाळली आहे व चित्रपटाच्या निर्मितीची जबाबदारी हरप्रीत मोहिले सांभाळत आहेत.

एका आंधळ्या व्हॉयलनिस्ट मुलीची संवेदनशील गोष्ट ‘ए फायनल’ मधून मांडण्यात येणार आहे. यासंदर्भात एफ. एम. इलियास म्हणाले की, “कितीही मोठं संकट आलं तरी आयुष्य कसं उत्फुल्लपणे जगायचं, हे सांगणारी ही गोष्ट आहे. प्रत्येकाच्याच आयुष्यात बरेवाईट प्रसंग येत असतात, पण आयुष्य ही खूप सुंदर गोष्ट आहे. त्यामुळे हिंमत न हारता आयुष्याला अतिशय प्रसन्नपणे सामोरं जायचं असतं, हे या कथेच्या माध्यमातून आपण सांगायचा प्रयत्न केला आहे.”

यातील आंधळ्या मुलीची मध्यवर्ती भूमिका साकारणं हे मोठं आव्हान असून त्यासाठी आपण योग्य अभिनेत्रीच्या शोधात आहोत. प्रस्थापित अभिनेत्रींपैकी काहींचा विचार सुरू असून काही नव्या मुलींचीही ऑडिशन घेत आहोत. संपूर्ण चित्रपट आपल्या खांद्यावर तोलून धरेल, अशी क्षमता असलेल्या अभिनेत्रीची आपल्याला गरज असल्याचे ते म्हणाले.

अमर मोहिले यांनी चित्रपटनिर्मितीत प्रवेश करत असल्याबद्दल आनंद व्यक्त केला. “ज्येष्ठ संगीतकार व दिवंगत वडील अनिल मोहिले यांच्याकडून संगीताचा वारसा मिळाला होताच. त्या जोरावर हिंदीत पार्श्वसंगीतकार म्हणून यशस्वी झालो. पण निर्माता झालो तर पहिला चित्रपट मराठीच करायचा, हे आपण ठरवलं होतं. एफ. एम. इलियास यांच्या ‘भाई कोतवाल’ या चित्रपटाचं संगीत करत असतानाच त्यांच्याकडून ही कथा ऐकली, तेव्हा या चित्रपटाची निर्मिती करण्याचा निर्णय आपण घेतला,” असं अमर मोहिले म्हणाले.

ज्येष्ठ नाटककार महेश एलकुंचवार यांना जीवनगौरव पुरस्कार प्रदान

संगीत नाटकांपासून सुरू झालेला मराठी रंगभूमीचा प्रवास आज व्यावसायिक आणि प्रायोगिक या वाटांवरून यशस्वीपणे पुढे जात आहे. आज मराठीमध्ये या दोन्ही रंगभूमींवरून नव्या कल्पना, नवे विषय आणि नवे नाट्याविष्कार प्रेक्षकांच्या भेटीस येत आहेत. या सा-या नाट्याविष्कारांची आणि त्याच्याशी संबंधित कलाकार तंत्रज्ञ यांच्या कामाची दखल घेत त्यांचा सन्मान करणारा पुरस्कार सोहळा म्हणजे झी गौरव. यावर्षीपासून मराठी प्रायोगिक आणि व्यावसायिक नाटकांसाठी स्वतंत्र असा झी नाट्यगौरव पुरस्कार सोहळा सुरू करण्यात आला. मराठी नाटकांचा सन्मान करण्यासाठी आयोजित करण्यात आलेला हा पहिलाच स्वतंत्र सोहळा मुंबईत २६ मार्चला नाट्यसृष्टीतील अनेक मान्यवरांच्या उपस्थितीत मोठ्या दिमाखात पार पडला. नाट्यसृष्टीमध्ये झालेले महत्त्वाचे बदल, घटना यांचा आढावा घेत गीत, नृत्य आणि प्रहसनांच्या माध्यमातून हा सोहळा उत्तरोत्तर रंगत गेला. व्यावसायिक नाटकांमध्ये केदार शिंदे दिग्दर्शित आणि भरत जाधव अभिनीत ‘ढॅण्टॅढॅण’ या नाटकाने ७ पुरस्कार मिळवत सरशी घेतली तर प्रायोगिक नाटकांमध्ये ‘एक बाकी एकाकी’ ने सर्वोत्तम नाटकाचा मान मिळवला. आपल्या लेखणीतून वाडा चिरेबंदी, मग्न तळ्याकाठी, पार्टी, वासांसि जिर्णानी यांसारखी अनेक महत्त्वपूर्ण नाटके मराठीच नव्हे तर जागतिक रंगभूमीला देणारे ज्येष्ठ नाटककार महेश एलकुंचवार यांना यावेळी जीवनगौरव पुरस्काराने सन्मानित करण्यात आले.

महाराष्ट्राची महावाहिनी असलेल्या झी मराठीचा झी गौरव हा पुरस्कार म्हणजे चित्रपट आणि नाट्यसृष्टीतील कलावंताच्या कार्याची योग्य दखल घेणारा एक मापदंड बनला आहे. यावर्षीपासून चित्रपटांसाठी  ‘झी चित्रगौरव’ आणि नाटकांसाठी ‘झी नाट्यगौरव’ असे दोन पुरस्कार सोहळे होणार असल्यामुळे त्याबद्दल विशेष उत्सुकता होती. चित्रगौरवच्या रंगतदार कार्यक्रमानंतर नाट्यगौरवचा सोहळाही तेवढ्याच देखण्या पद्धतीने पार पडला. यात व्यावसायिक नाटकांमध्ये ‘गोष्ट तशी गमतीची’, ‘कळत नकळत’, ‘त्या तिघांची गोष्ट, ‘बेगम मेमरी आठवण गुलाम’ आणि ‘सर्किट हाऊस’ यामध्ये सर्वोत्कृष्ट नाटकासाठीची चुरस रंगली त्यात ‘गोष्ट तशी गमतीची’ या नाटकाने हा मान मिळवत बाजी मारली. सर्वोत्कृष्ट  नेपथ्य, प्रकाश योजना, वेशभूषा, रंगभूषा, सहाय्यक अभिनेत्री, दिग्दर्शक आणि विशेष लक्षवेधी नाटक असे सात पुरस्कार मिळवत ‘ढॅण्टॅढॅण’ या नाटकाने आपलं वर्चस्व सिद्ध केलं. सर्वोत्कृष्ट लेखक मिहीर राजदा, अभिनेता मंगेश कदम आणि अभिनेत्री लीना भागवत असे महत्त्वाचे पुरस्कार मिळवत ‘गोष्ट तशी गमतीची’  हे नाटक यावर्षीचे सर्वोत्कृष्ट नाटक ठरले.

कार्यक्रमाचा परमोच्च बिंदू ठरला नाटककार महेश एलकुंचवार यांना जीवनगौरव प्रदान करतानाचा क्षण. ज्येष्ठ अभिनेत्री सुलभाताई देशपांडे यांच्या हस्ते आणि ज्येष्ठ दिग्दर्शक डॉ. जब्बार पटेल आणि कमलाकर सोनटक्के यांच्या उपस्थितीत हा जीवनगौरव पुरस्कार त्यांना प्रदान करण्यात आला. यावेळी बोलताना डॉ. पटेल म्हणाले की, “मी ज्या काळात नाटके दिग्दर्शित केली त्याकाळातल्या पिढीसाठी महेश एलकुंचवार जेवढे महत्त्वाचे नाटककार होते तेवढेच ते आजच्या पिढीसाठीही आहेत. त्यांच्या लेखणीतून साकार झालेल्या नाटकांचे केवळ मराठीतच नाही तर इतर भारतीय भाषांमध्ये आणि विदेशी भाषांमध्येही प्रयोग झाले त्यामुळे एलकुंचवार हे ख-या अर्थाने जागतिक रंगभूमीचे लेखक आहेत.” हा पुरस्कार स्वीकारल्यानंतर आपलं मनोगत मांडताना महेश एलकुंचवार म्हणाले की, “नाट्यलेखन हा कधीच माझा व्यवसाय नव्हता म्हणून नाटक लिहिणं हा माझ्या जगण्याचा अग्रक्रम बनला नाही. मला जगत राहण्यात प्रचंड मजा येते आणि ही मजा अनुभवतच मी नाट्यलेखन करतो. कारण लेखकपणाची झूल अंगावर पांघरली की जगणं बंद होतं मग आपण केवळ अनुभव  ‘शोधत’राहतो त्यात तांत्रिकपणा येतो आणि आपण अनुभव ‘घेणं’ विसरून जातो. अनुभवाचे एकेक झाड शोधण्याच्या नादात आपलं अरण्य हरवून जातं आणि ते अरण्य हरवण्याची मला जास्त भीती वाटते कारण एकदा का आपल्या जगण्यातलं नैसर्गिकपण हरवलं तर आपल्यातील सर्जकाची अखेर होते.” यावेळी बोलतांना त्यांनी ज्येष्ठ दिग्दर्शक विजया मेहता यांच्याबरोबरच्या तसेच मुंबईतील टोपीवाला लेनच्या शाळेत रंगणा-या नाटकांच्या आठवणी सांगितल्या.

मराठीतील विशेष नाट्यकृतींचा आढावा घेत हा गौरव सोहळा रंगला. दिग्दर्शक केदार शिंदे यांनी ‘महाराष्टाची लोकधारा’, ‘आंधळं दळतंय’ यातील प्रहसनं आणि ‘जय जय महाराष्ट्र माझा’गीत सादर करून शाहीर साबळे यांना भावपूर्ण आदरांजली वाहिली. यानंतर ‘संगीत सौभद्र’, ‘वा-यावरची वरात’, ‘वाडा चिरेबंदी’ पासून ते आजच्या ‘व्हाईट लिली नाईट रायडर’ पर्यंतच्या नाट्यकृतींना स्पर्श करत ह्या सोहळ्याची उत्तरोत्तर रंगत वाढत गेली. यावर कळस चढवला तो ‘संगीत कट्यार काळजात घुसली’ या नाटकाने. पं. वसंतराव देशपांडे यांच्या आवाजाने आणि अभिनयाने अजरामर झालेल्या या नाटकातील ‘घेई छंद मकरंद’ आणि ‘सूरत पियाकी’या गाण्यांची जुगलबंदी रंगली ख्यातनाम गायक शंकर महादेवन आणि शास्त्रीय गायक राहूल देशपांडे यांच्यात.या दोघांच्या गायकीने रसिक भारावून गेले. प्रसिद्ध अभिनेते आणि दिग्दर्शक संजय मोने आणि हृषिकेश जोशी यांनी या कार्यक्रमाचे खुमासदार पद्धतीने निवेदन केले. अनेक मान्यवराच्या उपस्थितीत रंगलेला हा  झी नाट्य गौरवचा सोहळा येत्या ५ एप्रिलला सायंकाळी ७ वा. झी मराठीवरून प्रेक्षकांना बघायला मिळेल.