पुणे

राज्य माध्यमिक व उच्च माध्यमिक शिक्षण मंडळानं मार्चमध्ये घेतलेल्या दहावीच्या परीक्षेचा निकाल जाहीर झाला असून राज्यातील ९१.४६ टक्के विद्यार्थ्यांनी शालेय शिक्षणातील हा  टप्पा यशस्वीपणे पार केला आहे. कोकण विभागातील विद्यार्थ्यांनी निकालात बाजी मारली असून यंदाही मुलींनी मुलांना मागे टाकलं आहे.
यावर्षी राज्यभरातून १७ लाख ३२ हजार ८९८ विद्यार्थ्यांनी दहावीची परीक्षा दिली होती. त्यांच्या करिअरची दिशा ठरवणारा, या परीक्षेचा ऑनलाइन निकाल आज दुपारी १ वाजता जाहीर झाला .
दहावीच्या परीक्षेत ९१.४६ टक्के विद्यार्थी उत्तीर्ण झाले असून हा आजवरचा सर्वोत्तम निकाल आहे. गेल्या वर्षी दहावीचा निकाल ८८.३२ टक्के लागला होता. त्यात यंदा ३.१४ टक्क्यांची वाढ झाली आहे.  उत्तीर्ण मुलांची टक्केवारी ९०.१८ टक्के असून ९२.२४ टक्के मुली यशस्वी झाल्यात. २१ शाळांचा निकाल शून्य टक्के लागला आहे, तर ४,७३१ शाळांमधील सर्वच्या सर्व विद्यार्थी पास झाले आहेत.

मुंबई – माजी मंत्री आणि राष्ट्रवादी कॉंग्रेसचे ज्येष्ठ नेते गोविंदराव आदिक (वय 75) यांचे शनिवारी मध्यरात्री 12 वाजता येथील बॉम्बे हॉस्पिटलमध्ये निधन झाले.
फुफ्फुसातील संसर्गामुळे त्यांना मंगळवारी येथील बॉम्बे हॉस्पिटलमध्ये दाखल करण्यात आले होते. आज दुपारनंतर त्यांची प्रकृती जास्त खालावली. रात्री उशिरा सर्व अवयव निकामी झाल्यामुळे 12.01 वाजता त्यांचे निधन झाल्याचे डॉक्‍टरांनी सांगितले. रविवारी (ता. 7) सकाळी 9 वाजता श्रीरामपूर येथील आझाद मैदानावर त्यांचे पार्थिव अंत्यदर्शनासाठी ठेवण्यात येणार आहे. अशोकनगर येथे त्यांच्यावर दुपारी 2 ते 4 या वेळेत अंत्यसंस्कार करण्यात येणार आहेत. त्यांच्या मागे पत्नी पुष्पलता, राष्ट्रवादी कॉंग्रेसच्या मुंबई विभागाचे उपाध्यक्ष असलेले चिरंजीव अविनाश तसेच सुजाता, अनुराधा व अंजली या मुली तसेच ज्येष्ठ बंधू केशवराव असा परिवार आहे. दिवंगत माजी उपमुख्यमंत्री बॅरीस्टर रामराव आदिक यांचे ते कनिष्ठ बंधू होत. आपल्या कर्तुत्वाने ठसा उमटवलेले आदिक 45 वर्षे राज्याच्या राजकारणात सक्रीय होते. कॉंग्रेसच्या अध्यक्षा सोनिया गांधी, राष्ट्रवादीचे अध्यक्ष शरद पवार, माजी मुख्यमंत्री सुशिलकुमार शिंदे, माजी केंद्रीय मंत्री शिवराज पाटील चाकुरकर यांच्याशी त्यांचे घनिष्ठ संबंध होते. गेल्या वर्षी त्यांनी राजकारणातून निवृत्ती घेतली होती. विधी शाखेचे ते पदवीधर होते. आदिक यांनी 1966 ते 1970 च्या दरम्यान त्यांनी येथील न्यायालयात वकीली केली. येथील महाविद्यालयात काही काळ ते कायद्याचे प्राध्यापक होते. वकीली सुरु असताना ते तालुका कॉंग्रेसचे सरचिटणीस झाले. तेथून त्यांच्या राजकीय प्रवास सुरु झाला. माजी मुख्यमंत्री स्वर्गीय यशवंतराव चव्हाण यांच्या विचारांचा त्यांच्यावर पगडा होता. पुलोद सरकारच्या निर्मितीत माजी मुख्यमंत्री शरद पवारांचे ते साथीदार होते. राजकारणात पक्षसंघटनेत त्यांनी विविध पदे भुषविली. नगर जिल्हा कॉंग्रेस सोशालीस्ट फोरमचे अध्यक्ष, कॉंग्रेसचे सरचिटणीस व प्रदेशाध्यक्ष, राष्ट्रवादी कॉंग्रेसचे राष्ट्रीय सरचिटणीस म्हणून त्यांनी काम पाहिले. श्रीरामपूरातून दोनदा तर वैजापूरातून एकदा ते आमदार म्हणून निवडून आले. विधानपरिषद व राज्यसभेवर प्रत्येकी दोनदा निवड झाली. पुलोद सरकारमध्ये 1978 ते 1979 या कालावधीत ते पाटबंधारे, विधी, माहिती व जनसंपर्क खात्याचे मंत्री होते. 1989 ते 1992 पर्यंत परिवहन महामंडळाचे अध्यक्ष तर 2003 ते 2004 या कालावधीत कृषी व विधी खात्याचे मंत्री होते. मुळा प्रवरा विजसंस्थेचे संस्थापक उपाध्यक्ष होते. सात वर्षे अशोक साखर कारखान्याची सुत्रे त्यांच्याकडे होती कामगार चळवळीत त्यांचा सक्रीय सहभाग होता. ते राष्ट्रीय साखर कामगार फेड़रेशनचे 1995 पासून अध्यक्ष होते. इंटकचे राष्ट्रीय उपाध्यक्षपद व नॅशनल फेडरेशन ऑफ इंडियन ट्रेड युनियनचे जनरल सेक्रेटरी होते. शेतमजूरांच्या ट्रेड युनियनची त्यांनी राज्यात पहिली नोंदणी केली. कृषक समाजाची त्यांनी स्थापना केली. राष्ट्रीय किसान सभेचे ते अध्यक्ष होते. शेतकरी व शेतमजूरांच्या प्रश्‍नासाठी त्यांनी राज्यभर संघटन उभे केले.

पुणे : मॅगी नूडल्सच्या नमुन्यात परवानगीपेक्षा जास्त शिशाचे (लेड) प्रमाण आढळल्यामुळे राज्यात या पदार्थाच्या विक्रीवर शनिवारपासून बंदी घालण्यात येत असून त्याचे उल्लंघन केल्यास कठोर कारवाई करण्यात येईल, असे राज्याचे अन्न व औषध प्रशासनमंत्री गिरीश बापट यांनी शुक्रवारी जाहीर केले.
पुण्याच्या प्रयोगशाळेत राज्याच्या विविध भागांतून घेतलेले नमुने तपासणीसाठी देण्यात आले होते. रात्री उशिरा त्याबाबतचा अहवाल शासनाला प्राप्त झाला. बापट यांनी याबाबत तातडीने अन्न आणि औषध प्रशासन विभागाच्या अधिकार्‍यांशी चर्चा केली. त्यानंतर घेतलेल्या तातडीच्या पत्रकार परिषदेत त्यांनी राज्यात मॅगी विक्रीवर बंदी घालत असल्याचा निर्णय जाहीर केला. बापट म्हणाले, ” मॅगीच्या काही नमुन्यांमध्ये २.५ ऐवजी शिशाचे प्रमाण वेगवेगळे आढळले आहे. नागरिकांच्या आरोग्याच्या दृष्टीने विक्रीवर बंदी घालण्यात आली आहे.” अन्न औषध प्रशासन उद्यापासून दुकानांमध्ये तपासणी सुरु करणार आहे. या बंदीचे उल्लंघन करणा-यांवार नियमाप्रमाणे कारवाई केली जाईल असे सांगून बापट म्हणाले की, खरेदीदाराला पाकिटावरून त्यातील शिसाच्या प्रमाणाविषयी काही कळत नाही. त्यांच्या आरोग्यास शिसाचे जादा प्रमाण असलेली मॅगी घातक असून उद्यापासून कोणत्या विक्रेत्याने कंपनीला किती माल परत पाठविला याचा अहवाल घेतला जाणार आहे. पुण्यातील ६ नमुन्यांपैकी ३ अप्रमाणित पुण्यात घेतलेल्या सहा नमुन्यांपैकी तीन अप्रमाणित आढळले असून उत्तराखंडमधील कंपनीत बनलेल्या एका नमुन्यात २.५५ तर दुस-या नमुन्यात ४.६६ टक्के शिसे आढळले असून गोव्यातील कंपनीच्या नमुन्यात २. ५९ तर अन्य एका नमुन्यात 0.२४ टक्के शिसे आढळले आहे. मोनोसोडियम ग्लुटामेट (एम.एस.जी.)चे प्रमाण मिठाएवढे असावे. एम.एस.जी. असल्याचे पाकिटांवर नमूद आहे, पण प्रत्यक्षात तपासणीत ते आढळले नाही, अशी माहिती बापट यांनी दिली.

चेन्नई –
चार दिवस उशिरा का होईना, शुक्रवारी मान्सून केरळमध्ये दाखल झाला आहे. मान्सून पुढे सरकण्यासाठी परिस्थिती अनुकूल असून तो सात दिवसांच्या आतच संपूर्ण महाराष्ट्रात दाखल होण्याची शक्यता आहे.
पुढील ४८ तासांत मान्सून केरळच्या किनारपट्टीवर धडकेल, असा अंदाज हवामान खात्यानं बुधवारी वर्तवला होता. त्यानुसार केरळमध्ये गुरुवारी रात्रीपासून पावसाच्या सरी कोसळत होत्या. कालपासूनच आकाशात ढग जमू लागले होते. त्यामुळे मान्सून दाखल होण्यास अनुकूल परिस्थिती निर्माण झाली होती. अखेर आज उकाड्याने हैराण झालेल्यांची प्रतीक्षा संपवत केरळमध्ये पावसाने दमदार हजेरी लावली.
हवामान खात्याच्या अंदाजानुसार, अरबी समुद्रात लक्षद्विप बेटाजवळ शनिवारी कमी दाबाचा पट्टा तयार होण्याची अधिक शक्यता आहे. त्यामुळे पश्चिम किनारपट्टीवर जोरदार पाऊस पडण्याची शक्यता आहे. गेल्या ४८ तासांत केरळमध्ये पाऊस चांगलाच बरसला. राज्याच्या ७० टक्के क्षेत्रात सरासरी २.५ मिलिमीटरहून अधिक पावसाची नोंद झाली आहे. पुढील दोन दिवसांत केरळ आणि कर्नाटकच्या भागांत मुसळधार पाऊस कोसळणार असल्याचा इशारा हवामान विभागाने दिला आहे. दक्षिण अरबी समुद्रात मान्सून वेगाने पुढे सरकत आहे. बंगाल उपसागराच्या दक्षिण भागातही मान्सून वेगाने पुढे सरकत आहे, असे सूत्रांकडून सांगण्यात येत आहे. मान्सून पुढे सरकण्यास अनुकूल परिस्थिती असून तो सात दिवसांच्या आतच संपूर्ण महाराष्ट्रात दाखल होईल, असा अंदाज वर्तवण्यात येत आहे.