पहिल्या आठवड्यात महाराष्ट्रातील तमाम रसिक प्रेक्षकांची मने जिंकणा-या आणि बॉक्स ऑफिसवर कोटी कोटी उड्डाणे घेणा-या एस्सेल व्हिजन प्रस्तुत ‘किल्ला’ चित्रपटाने दुस-या आठवड्यात आगळा वेगळा विक्रम केला आहे. या आठवड्यात किल्लाच्या चित्रपटगृहांची संख्या वाढली असून ती २२५ वरून ३०० वर गेली आहे शिवाय रोजच्या खेळांची संख्या ७२० तर आठवड्याच्या खेळांची संख्या ५०४२ एवढी झाली आहे. महाराष्ट्रासह किल्लाची घोडदौड दिल्ली, गोवा, कर्नाटक, गुजरात आणि आंध्रप्रदेशातही सुरू असून अनेक अमराठी भाषिकही या चित्रपटाचा आनंद घेत आहेत. चित्रपटाची कथा चांगली असली की प्रेक्षक त्याला भरभरून प्रतिसाद देतात हे किल्लामुळे परत एकदा सिद्ध झालं आहे. किल्लाला मिळणा-या या प्रचंड प्रतिसादामुळे किल्ला टीममध्ये आनंदाचं वातावरण आहे.
मागच्या आठवड्यात प्रदर्शित झालेला ‘किल्ला’ प्रदर्शनापूर्वीच अनेक कारणांनी चर्चेत होता. आंतरराष्ट्रीय चित्रपट महोत्सवांत आणि विविध पुरस्कार सोहळ्यांत मिळालेले मानाचे पुरस्कार आणि तेथील प्रेक्षकांच्या आणि मान्यवरांच्या प्रतिक्रियांमुळे किल्लाबद्दल उत्सुकतेचं वातावरण होतं. या वातावरणात ‘किल्ला’ प्रदर्शित झाला आणि प्रेक्षकांनी त्यावर प्रेमाचा वर्षाव केला. पहिल्या आठवड्यात ‘किल्ला’ महाराष्ट्रात आणि महाराष्ट्राबाहेर २२५ चित्रपटगृहांमधून प्रदर्शित झाला होता. यावेळी रोजच्या खेळांची संख्या ४२५ एवढी होती. दुस-या आठवड्यात अनेक मोठे चित्रपट प्रदर्शित होत असताना ‘किल्ला’ दुस-या आठवड्यात किती चित्रपटगृहांमध्ये बघायला मिळेल याबद्दल अनेकांच्या मनात उत्सुकता होती. परंतू रसिक प्रेक्षकांचा मिळणारा प्रचंड प्रतिसाद आणि चित्रपटाबद्दल तयार झालेलं सकारात्मक वातावरण यामुळे दुस-या आठवड्यात किल्लाच्या चित्रपटगृहांची संख्या वाढून ती ३०० वर पोहचली. चित्रपटाला सब टायटल्स असल्यामुळे अनेक अमराठी भाषिक प्रेक्षकही हा चित्रपट बघून त्याबद्दल सोशल नेटवर्क साइट्सवर भरभरून बोलत असल्याचं चित्र बघावयास मिळत आहे.
