पुणे – सुडबुद्धीनेच  कॉंग्रेस अध्यक्षा सोनिया गांधी आणि उपाध्यक्ष राहुल गांधी यांना नॅशनल हेरल्ड प्रकरणात गोवण्यात येत असल्याचा आरोप करत, पुणे शहर कॉंग्रेसच्या वतीने रविवारी शहरातील सर्व विधानसभा मतदारसंघांत भाजप सरकारच्या सूडनीतीचा निषेध करण्यासाठी आंदोलन करण्यात आले.

नॅशनल हेरल्डप्रकरणी सोनिया आणि राहुल शनिवारी न्यायालयात हजर झाले होते. त्याचे पडसाद शहरातही उमटले. या घटनेच्या निषेधार्थ शहर कॉंग्रेसच्या वतीने आंदोलन करण्यात आले. केंद्रातील भाजप सरकारचा निषेध करत त्यांच्याविरोधात घोषणा देण्यात आल्या. पक्षाचे शहराध्यक्ष अभय छाजेड, युवक कॉंग्रेसचे प्रदेशाध्यक्ष विश्‍वजित कदम, पक्षाचे निरीक्षक प्रकाश सातपुते, माजी आमदार उल्हास पवार, मोहन जोशी, रमेश बागवे, बाळासाहेब शिवरकर, उपमहापौर आबा बागूल, रोहित टिळक, नीता रजपूत यांच्यासह पक्षाचे पदाधिकारी, नगरसेवक आणि कार्यकर्ते मोठ्या संख्येने सहभागी झाले होते.
पर्वती मतदारसंघातर्फे पुणे-सातारा रस्त्यावर दुपारी केलेल्या आंदोलनात सचिन आडेकर, प्रकाश आरणे यांच्यासह पक्षाचे कार्यकर्ते सहभागी झाले होते. शिवाजीनगर मतदारसंघातर्फे ज्ञानेश्‍वर पादुका चौकात झालेल्या आंदोलनात माजी महापौर दत्तात्रेय गायकवाड, नगरसेवक दत्ता बहिरट, मुकारी अलगुडे सहभागी झाले होते. कसबा मतदारसंघात स्वाती कथलकर यांच्या नेतृत्वाखाली महिला आघाडीने केंद्र सरकारचा निषेध केला. पुणे कॅंटोन्मेंट मतदारसंघातर्फे संत कबीर चौकात आंदोलन करण्यात आले. त्यात माजी आमदार रमेश बागवे, नगरसेवक अविनाश बागवे, नुरुद्दीन सोमजी, रशीद शेख, लता राजगुरू सहभागी झाल्या होत्या. वडगाव शेरीत पर्णकुटी चौकात पक्षाच्या पदाधिकाऱ्यांनी आंदोलन केले. संगीता देवकर, नगरसेविका सुनीता गलांडे, शीतल सावंत, सुनील मलके, हुलगेश चलवादी सहभागी झाले होते.

हडपसर मतदारसंघातर्फे गाडीतळ परिसरात झालेल्या आंदोलनात माजी राज्यमंत्री बाळासाहेब शिवरकर, प्रशांत तुपे, नगरसेवक सतीश लोंढे, विजया वाडकर, कविता शिवरकर, चंद्रकांत मगर सहभागी झाले होते. माजी उपमहापौर प्रसन्न जगताप यांच्या नेतृत्वाखाली सिंहगड रस्त्यावर आंदोलन करण्यात आले. त्यात हरिदास चरवड, आबा जगताप, किशोर कुलकर्णी आदींनी सहभाग घेतला. कोथरूड, कसबा, खडकवासला या विधानसभा मतदारसंघांतही पक्षाच्या पदाधिकाऱ्यांनी आंदोलन केले.

बेंगळुरू-

ज्ञानज्योति ऑडिटोरिअममध्ये आदरणीय शरद पवार यांच्या ७५ व्या वाढदिवसाचा नयनरम्य सोहळा बेंगळुरू शहरात दि. १८ डिसेंबरच्या सायंकाळी दिमाखात संपन्न झाला. या सोहळ्याला कर्नाटकचे मुख्यमंत्री सिद्दराम्मया, माजी पंतप्रधान एच. डी. देवे गौडा, कर्नाटकचे माजी मुख्यमंत्री येड्डीयुरप्पा तसेच ज्येष्ठ काँग्रेस नेते सी. के. जाफर शरीफ उपस्थित होते.
श्री. पवार यांच्या अमृत महोत्सवी सत्कार समारंभानंतर बोलताना कर्नाटकचे मुख्यमंत्री सिद्दराम्मया म्हणाले, “मी कृषी विषयाशी निगडित कोणताही अडचण आली की नेहमीच पवारसाहेबांची भेट घेण्यासाठी धाव घेत असे. त्यांनी कधीच अपेक्षाभंग केला नाही. त्यांनी केंद्रातून नेहमीच मदतीची भूमिका घेतली.”
माननीय पवारसाहेबांकडे देशाचे पंतप्रधानपद किंवा सर्वोच्च असे पद  भूषवण्याची क्षमता आहे असे गौरवोद्गारही या प्रसंगी कर्नाटकचे मुख्यमंत्री सिद्दराम्मया यांनी काढले. कर्नाटकच्या मुख्यमंत्र्यांच्या याच विधानाचे सूत्र घेऊन माजी पंतप्रधान देवेगौडा म्हणाले, “येत्या २०१६-१७ मध्ये देश राजकीय ध्रुवीकरणाचा साक्षीदार राहील आणि हे ध्रुवीकरण कुणीच हे थांबवू शकणार नाही. माजी पंतप्रधान या नात्याने मी निरीक्षण नोंदवत आहे आणि म्हणूनच श्री. पवार हे पंतप्रधानपदासाठी सक्षम आहेत असं मी म्हणू शकतो.”
कर्नाटकचे माजी मुख्यमंत्री येड्डीयुरप्पा यांनीही आदरणीय पवार हे पंतप्रधानपदाच्या शर्यतीत नेहमीच आघाडीवर असल्याचं नमूद केलं, मात्र केवळ काही घटनांमुळे ते पंतप्रधान होऊ शकले नाहीत. मात्र राष्ट्रवादी काँग्रेस पार्टीच्या या सर्वोच्च नेत्याला देशाची सेवा करण्याची संधी मिळाली असे त्यांनी नमूद केले.
ज्येष्ठ काँग्रेस नेते सी. के. जाफर शरीफ यांनीही त्यावेळी १९९१ साली ज्येष्ठ काँग्रेस नेत्यांनी शरद पवार यांनाच पंतप्रधानपदाचे दावेदार म्हणून शिक्कामोर्तब केले होते, असे आवर्जून सांगितले. मात्र काही अचानक उद्भवलेल्या घटनाक्रमामुळे पी. व्ही. नरसिंह राव यांची निवड झाल्याचे नमूद केले.
माननीय शरद पवार यांनी या सत्काराला उत्तर देताना विनम्रपूर्वक सांगितले की देशातील जनता राजकीय नेत्यांपेक्षाही चतुर आहे आणि योग्य वेळी योग्य तो निर्णय घेईल. आपल्या कृषि मंत्रालयातील कारकीर्दीचा आढावा घेताना त्यांनी कर्नाटकातील जनतेला आवर्जून सांगितले की आपण एकेकाळी अन्नाची आयात करणारा देश होतो. आज फळं, भाज्या आणि गव्हाची निर्यात करणारा मोठा देश म्हणून जगात आपले स्थान आहे.
मात्र सद्यस्थितीतील संसदीय कामकाजाविषयीही त्यांनी विशेष टिप्पणी केली. एक दिवस सोडला तर यावेळी अधिवेशनात राज्यसभेचे कामकाज चालू शकले नाही. याची खंत व्यक्त करून पवार साहेब म्हणाले की दरदिवशी हंगामा असायचा. आपण कोणता संदेश देशाच्या जनतेला देत आहोत. लोकांना संसद सदस्यानी योग्यरीतीने काम करण्याची अपेक्षा आहे. संसदीय लोकशाही टिकवण्यासाठी सर्व सुज्ञांनी प्रयत्न करणे आवश्यक आहे.
कर्नाटकचे माजी मंत्री पी.जी.आर. सिंधिया यांनी या सोहळ्याचे आयोजन केले