पुणे-मौज मजेसाठी दुचाकी चोरी करणाऱ्या २ भामट्यांकडून पोलिसांनी दहा मोटार सायकल जप्त केल्या आहेत. या संदर्भात पोलिसांनी सांगितले कि,’विमानतळ पोलीस ठाणेचे तपास पथकातील अंमलदार दादासाहेब बर्डे व ज्ञानदेव आवारी यांना त्यांचे गोपनिय बातमीदारामार्फत बातमी मिळाली की, दुचाकी मोटार सायकल चो-या करणारे दोन इसम चोरीचे बुलेट मोटार सायकलसह संजयपार्क मध्ये आहेत. सदरची बातमी तपास पथकाचे सहा. पोलीस निरीक्षक विजय चंदन यांना कळविली असता,त्याप्रमाणे स्टाफचे मदतीने विमानतळ तपास पथकाने सापळा रचुन चोरीची बुलेट मोटार सायकल व त्यावरील दोन इसम नामे १) मनिषसिंग जितेंद्रसिंग भदोरिया वय २१ वर्ष रा. लेन नंबर ०५, महादेवनगर, अवधुत बंगल्याचे बाजुला संतनगर, लोहगाव पुणे २) कार्तिक अनिल फुलपगार वय २१ वर्ष रा. गुरुद्वारा कॉलनी, स्मशानभुमी जवळ लोहगाव पुणे यास ताब्यात घेतले त्याचेकडे गुन्हयाचे अनुषंगाने अधिक तपास करता एकुण दहा चोरीच्या मोटार सायकल मिळुन आल्या आहेत. त्यापैकी विमानतळ पोलीस स्टेशनचे हद्दीतील सात दुचाकी चोरीचे गुन्हे, कोथरुड पोलीस स्टेशनचे हद्दीतील एक दुचाकी चोरीचा गुन्हा उघड करण्यात आलेला आहे. तसेच उर्वरीत दोन मोटारसायकल बाबत तपास सुरु आहे. नमुद आरोपी यांचेकडुन एकुण ७,००,०००/-रु (सात लाख रुपये) किं. च्या दहा दुचाकी मोटार सायकल हस्तगत करण्यात आल्या आहेत.
सदरची कारवाई ही अपर पोलीस आयुक्त, पुर्व प्रादेशिक विभाग पुणे शहर, मनोज पाटील , पोलीस उपायुक्त परि-०४ , हिम्मत जाधव, सहा. पोलीस आयुक्त, येरवडा विभाग श्रीमती प्रांजली सोनवणे यांचे मार्गदर्शनाखाली विमानतळ पोलीस स्टेशनचे पोलीस निरीक्षक, गुन्हे श्रीमती आशालता खापरे सहा. पोलीस निरीक्षक विजय चंदन, पोलीस अंमलदार रुपेश पिसाळ, शैलेश नाईक, राकेश चांदेकर, अंकुश जोगदंडे, योगेश थोपटे, दादासाहेब बर्डे, ज्ञानदेव आवारी, हरीप्रसाद पुंडे, लालु कहे, गिरीष नाणेकर, रुपेश तोडेकर यांचे पथकाने केली आहे.

पद्मश्री दादा उर्फ भिकू रामजी इदाते यांचे मत : जनरल प्रॅक्टिशनर्स असोसिएशन पदग्रहण समारंभ

पुणे: वैद्यकीय विकास मोठ्या प्रमाणात झालेला दिसून येतो, परंतु हा विकास खेड्यापाड्यातील, दरी खोऱ्यातील आदिवासी पाड्यापर्यंत आजही पोहोचला नाही. त्यांच्या आरोग्याचे प्रश्न कसे सोडविणार. वसुधैव कुटुम्बकम असे आपण म्हणतो परंतु त्या कुटुंबाचे आपण काय करायचे. देश धर्म आणि संस्कृती सुस्थितीत राहण्यासाठी समाज सुदृढ असायला पाहिजे, असे मत पद्मश्री भिकू रामजी इदाते यांनी व्यक्त केले.

जनरल प्रॅक्टिशनर्स असोसिएशनचा पदग्रहण समारंभ टिळक रस्त्यावरील नीतू मांडके सभागृहात आयोजित करण्यात आला होता. यावेळी नॅशनल इन्स्टिट्यूट ऑफ वायरोलॉजी पुणेचे संचालक डॉ.नवीन कुमार, संघटनेच्या मावळत्या अध्यक्ष डॉ.शुभदा जोशी, नवनिर्वाचित अध्यक्ष डॉ. सुनिल भुजबळ, सचिव डॉ. भाग्यश्री मुनोत- मेहता तसेच विविध वैद्यकीय संघटनेचे प्रतिनिधी उपस्थित होते.

सन २०२५ – २०२६ या वर्षासाठी अध्यक्ष म्हणून डॉ. सुनिल भुजबळ, उपाध्यक्ष डॉ. अप्पासाहेब काकडे, खजिनदार डॉ.संदीप निकम, सचिव डॉ. भाग्यश्री मुनोत-मेहता, डॉ.राजेश दोशी, सहसचिव डॉ.दीपक गांधी, डॉ.सिद्धार्थ शिंदे यांची निवड झाली आहे.

डाॅ. नवीन कुमार म्हणाले, कोविड-१९ नंतर जगात अनेक गोष्टींमध्ये मोठे बदल झाले आहेत. आज २०२५ मध्ये १५ हजारपेक्षा अधिक विषाणू आहेत आणि २३४ विषाणू कुटुंबांची नोंद आहे, आणि प्रत्येक वर्षी तीनशे ते चारशे नवीन विषाणू निर्माण होत आहेत. नॅशनल इन्स्टिट्यूट ऑफ वायरोलॉजी सारख्या ४ इन्स्टिट्यूट भारताच्या विविध भागात स्थापन करण्यात येणार आहेत. जर आपण देशात होणाऱ्या संसर्गजन्य आजारांवर नियंत्रण आणायचे ठरवले तर ते शक्य नाही, यासाठी एकत्रित आणि एकसूत्री दृष्टिकोन असणे गरजेचे आहे. आपण विषाणूंना प्रतिबंध करू शकत नाही, परंतु नॅशनल इन्स्टिट्यूट ऑफ वायरोलॉजी च्या माध्यमातून त्यांचा प्रतिकार करण्यासाठी आपण तयार आहोत.

डॉ. सुनिल भुजबळ म्हणाले, आजारांना प्रतिबंध करा, संरक्षण करा आणि आरोग्य संस्कृतीला प्रोत्साहन द्या, हे ब्रीदवाक्य घेऊन यंदाच्या वर्षी जनरल प्रॅक्टिशनर्स असोसिएशन काम करणार आहे. डॉक्टरांच्या शारीरिक आणि मानसिक आरोग्याची काळजी यासोबतच सामाजिक आरोग्य जनजागृतीसाठी शिबिरे यांसह विविध सामाजिक उपक्रम यंदा राबविण्यात येणार आहेत. डॉ. भाग्यश्री मुनोत मेहता यांनी सूत्रसंचालन केले. 

पुणे : सुमधुर संगीत, गायकांचे अप्रतिम सादरीकरण, वादकांची चपखल संगत आणि जोडलेला रसिकांची दिलखुलास दाद, अशा आणि संगीताने नटलेल्या वातावरणात ‘दिल ने कहा दिल से’ हा रंगला.

स्वच्छंद पुणे ईगल इन्फ्रा ग्रुपच्या प्रस्तुत आणि हिंदीत ‘दिल ने दिल से’ हा जोडून मराठी संगीताचा कार्यक्रम कोथरूडमधील यशवंतराव नाट्यगृह येथे रंगला. या कार्यक्रमांमध्ये कलाकारांच्या अप्रतिम सादरीकरण रसिक हिंदी संगीताच्या सुवर्ण युगाल हरवले.

पलवी आनदेव यांनी ‘येलवी समाज आहे ये का’ गाण्याने कार्यक्रमाची प्यार केली. यानंतर रवींद्र शाळू यांनी ‘आणि हा हृदयात काय आहे’ हे गाणे सादर केले तसेच संजय कांबळे यांनी ‘मी शायर तो नही’ या गाण्याचे सादरीकरण आपल्या कार्यक्रमात रंगत आणली.

‘चांद सिफारिश जो करते हो’, ‘जादू तेरी नजर’, ‘दिल ने कहा है दिल से’, ‘करवते बदले’, ‘सुरज हुआ मद्ध’, ‘दिवाने है दिवानो को ना घर चाहिये’, ‘गाता है मेरा दिल’ अशा नवीन बहारदार हिंदी संगीतकारांनी रसिकांना मंत्रमुग्ध केले.

पल्लवी आनदेव ,संजय कांबळे, मनोज सेठिया, रवींद्र शाळू कार्यक्रमाचे खास आकर्षण असलेल्या मुंबईतील कलाकार व्हाईस ऑफ लतादी ओळखल्या जाणाऱ्या प्रताजक सातार्डेकर यांनी अटम गाणी सादर केली. प्राजक्ता सातार्डेकर यांनी गायलेल्या मोसे छेले जा, रंगीला रे या गाण्यांना विशेष दाद दिली. प्राजक्ता श्रावणे यांनी निवेदन केले. यश भंडारे यांनी संगीत संयोजन केले. केदार परांजपे, शैलेश देशपांडे, नागेश भोसेकर, आसीफ इनामदार, रोहित जाधव या सर्व वादक कलाकारांनी आपले वादन रसिकांना भारावून टाकले.

भाविकांची दर्शनासह सजावट पाहण्यासाठी मोठी गर्दी

पुणे :- हिंदुस्थानातील पहिला सार्वजनिक गणपती श्रीमंत भाऊसाहेब रंगारी गणपती बाप्पाला संकष्टी चतुर्थीच्या निमित्ताने द्राक्षाची सजावट करण्यात आली होती. ही सजावट पाहण्याबरोबरच बाप्पाच्या दर्शनासाठीही भाविकांनी गर्दी केली होती.

‘श्रीमंत भाऊसाहेब रंगारी गणपती ट्रस्ट’कडून विविध सामाजिक उपक्रमांचे आयोजन केले जाते. संकष्टी चतुर्थी निमित्ताने मंदिरात बाप्पाला निळ्या आणि काळ्या द्राक्षाचा नैवद्य वाढवून त्यातून आकर्षक सजावट करण्यात आली होती. या द्राक्षांचे पुण्यातील ‘सुर्योदय फाऊंडेशन’ या स्वयंसेवी संस्थेला वाटप करण्यात आले.

चिंचवड : पुणे जिल्हा शिक्षण मंडळाच्या बाबुरावजी घोलप महाविद्यालयातील फॅशन टेक्नॉलॉजी विभागाच्या विद्यार्थ्यांनी तयार केलेल्या वस्त्र आणि डिझाइन्स चा भव्य फॅशन शो “सृजन – द क्रिएटिव विंग्स २०२४-२५” आज मोठ्या उत्साहात संपन्न झाला.सामान्य घरातून आलेल्या विद्यार्थ्यांना राष्ट्रीय, आंतरराष्ट्रीय पातळीवरील फॅशन शो चा अनुभव देणे आणि त्यांना फॅशन, वस्त्र, डिझाईन क्षेत्रातील दिग्गजांशी संवाद साधता यावा यासाठी महाविद्यालयाने विद्यार्थ्यांसाठी हा फॅशन शो आयोजित केला होता. यंदाचा फॅशन शो हा खादी आणि ज्युट या भोवती गुंफन्यात आलेला होता.

एलप्रो सिटी स्क्वेअर मॉल ऑडिटोरियम,चिंचवड, पुणे​ येथे संपन्न झालेल्या या फॅशन शो प्रसंगी सावित्रीबाई फुले पुणे विद्यापीठाचे प्रा.कुलगुरू पराग काळकर, विद्यापीठाच्या कुलसचिव ज्योती भाकरे, सावित्रीबाई फुले विद्यापीठाचे परीक्षा नियंत्रक प्रभाकर देसाई,सावित्रीबाई फुले पुणे विद्यापीठाचे अधिसभा सदस्य,पुणे जिल्हा शिक्षण मंडळाचे मानद सचिव ॲड. संदिप कदम,प्राचार्य डॉ.संगीता व्ही. जगताप, विभागप्रमुख प्रा.प्रिती सदाशिव जोशी, ज्युरी दीपाली जोशी, पूजा वाघ, प्राजक्ता साळवे ,सावित्रीबाई फुले पुणे विद्यापीठ व्यवस्थापन परिषद सदस्य बागेश्री मंथळकर,डॉ नितीन घोरपडे, डॉ देविदास वायदंडे,डॉ.डी.बी. पवार, संदीप पालवे, प्राचार्य पंडित शेळके, डॉ तुषार शितोळे, डॉ. शर्मिला चौधरी, डॉ अंजली काळकर, सरोज पांडे,योगेश पवार आदि मान्यवर यावेळी उपस्थित होते. पुणे जिल्हा शिक्षण मंडळाचे अध्यक्ष तथा राज्याचे उपमुख्यमंत्री अजित पवार यांनी या उपक्रमाला शुभेच्छा दिल्या.

संदीप कदम म्हणाले, मुलांच्या कला गुणांना वाव देण्यासाठी या “सृजन – द क्रिएटिव विंग्स २०२४-२५” चे आयोजन करण्यात आले आहे. विद्यार्थ्यांना फक्त व्यासपीठ मिळवून न देता त्यांना प्रत्यक्ष इंडस्ट्री शी जोडण्याचे काम आम्ही या शो च्या माध्यमातून करत आहोत.

सावित्रीबाई फुले पुणे विद्यापीठ व्यवस्थापन परिषद सदस्य , प्राचार्य डॉ संगीता जगताप म्हणाल्या, अलीकडे एक दोन महीने कपडे वापरुन नवीन ट्रेंडचे कपडे वापरण्याकडे कल असतो. मात्र आमच्या विद्यार्थ्यांनी ज्युट आणि खादी यातून आधुनिक कपडे निर्माण केले आहेत. मुलांचा उत्साह वाढवण्यासाठी आज विविध क्षेत्रातील मान्यवर उपस्थित आहेत, यातूनच मुलांना भविष्याच्या संधी उपलब्ध होणार आहेत.

विभागप्रमुख प्रा. प्रीती सदाशिव जोशी म्हणाल्या, आमच्याकडे विविध कोर्सेस चालतात, हा फॅशन शो पदवीच्या विद्यार्थ्यांचा आहे. एका थीम वर रिसर्च करून या शो मध्ये सादरीकरण केले जाते. आजच्या शो मध्ये ज्युट ला पारंपारिकता जपत मॉडर्न लुक दिल्याचे बघायला मिळते

या फॅशन शोच्या यशस्वीतेसाठी फॅशन टेक्नॉलॉजी विभागाच्या वद्यार्थ्यांच्या मदतीसाठी आणि मार्गदर्शनासाठी फॅशन टेक्नॉलॉजीच्या विभाग प्रमुख प्रा प्रीती सदाशिव जोशी, वीणा करांडे, फातेमा सय्यद, अंजली बोंद्रे, ऋतुजा पाटसकर यांचे सहकार्य लाभले. विद्यार्थ्यांचे पालकही मोठ्या संख्येने यावेळी उपस्थित होते.यावेळी कार्यक्रमाचे सूत्रसंचालन आर जे बंड्या यांनी केले.

फॅशन शो स्पर्धेचा निकाल पुढीलप्रमाणे

सर्वोत्तम संग्रह श्रेणी 2 क्रम – कार्निवल्स ऑफ कलर्स
1) मोहिनी खेमनार
२) समिक्षा नवले
3) रोनीत तिकोणे

अनुक्रम – अर्थ एलिगन्स
1) आकांशा आखाडकर
२) कावेरी हिवरेकर
3) दीपाली गायकवाड
4) दिव्या पवार

सर्वोत्कृष्ट डिझाइन पुरस्कार

अनुक्रम – स्टिचरी फ्लोरेन्स
1) निवेदिता चव्हाण
२) स्मिता पडुल
3) अवंतिका मगरे

क्रम – लँड्स ऑफ डेनिम
१) मनीषा कोरे
२) कल्याणी गोसावी
3) सायली सरादे

सर्वोत्कृष्ट नाविन्यपूर्ण पुरस्कार
क्रम – ट्रीब ट्विस्ट
1) तन्वी बिबावे
२) दिपाली चव्हाण

ज्युरी विशेष पुरस्कार
देसी चार्म खादी
सर्व MVoc PG विद्यार्थी

ब्रह्मनाद कला मंडळ आणि धारेश्वर विद्या व क्रीडा प्रतिष्ठानतर्फे धायरीत आयोजन-युवा, ज्येष्ठ कलाकारांच्या सादरीकरणाने रसिक मंत्रमुग्ध

पुणे : नव्या पिढीतील आश्वासक गायक गंधार देशपांडे, प्रसिद्ध संवादिनी वादक सुधीर नायक आणि किराणा घराण्याच्या ज्येष्ठ गायिका विदुषी पद्माताई देशपांडे यांच्या बहारदार आणि सुश्राव्य सादरीकरणाने रौप्य महोत्सवाकडे वाटचाल करीत असलेल्या ब्रह्मनाद संगीत महोत्सवातील पहिला दिवस संगीत रसिकांसाठी आनंददायी ठरला.

ब्रह्मनाद कला मंडळ आणि धारेश्वर विद्या व क्रीडा प्रतिष्ठान, धायरी यांच्या संयुक्त विद्यमाने दोन दिवसीय 24व्या ब्रह्मनाद संगीत महोत्सवाचे आयोजन कै. बंडोजी खंडोजी चव्हाण विद्यालयातील राजमाता जिजाऊ माँसाहेब बहुउद्देशीय सभागृहात करण्यात आले आहे. महोत्सवाला युवा रसिक, कलाकारांसह ज्येष्ठांनी मोठ्या संख्येने हजेरी लावली होती.

सुरुवातीस धारेश्वर विद्या व क्रीडा प्रतिष्ठानचे अध्यक्ष काका चव्हाण, संचालक अनिकेत चव्हाण, डॉ. पंडित संजय गरुड, रागिणी गरुड, कॉसमॉस बँकेचे माजी संचालक मिलिंद पोकळे, सुभाष चाफळकर, ह. भ. प. विजय महाराज जगताप, माजी कामगार आयुक्त विकास पनवेलकर यांच्या हस्ते दीप प्रज्वलन आणि सरस्वती पूजन झाले. या प्रसंगी ब्रह्मनाद संगीत विद्यालयातील विद्यार्थ्यांनी सरस्वती वंदना सादर केली.

महोत्सवाच्या पहिल्या दिवसाची सुरुवात प्रसिद्ध शास्त्रीय गायक पंडित डॉ. राम देशपांडे यांचे सुपुत्र आणि शिष्य गंधार देशपांडे यांच्या गायनाने झाली. त्यांनी आपल्या मैफलीची सुरुवात धानी रागातील रचनेने केली. विलंबित आणि द्रुत तालावर आधारित भगवान शंकरांवरील पंडित राम देशपांडे यांनी रचलेली ‌‘शंभो महोदव‌’ ही बंदिश तयारीने सादर केली. त्यानंतर भगवान शंकरांच्या तांडव नृत्याचे वर्णन करणारी ‌‘डम डम डमरू बाजे‌’ ही रचना सादर करून शास्त्रीय संगीतावरील आपली पकड दर्शविली. ‌‘गाओ विद्या गुणी सम‌’ ही रचना सादर करून ‌‘अबिर गुलाल उधळीत रंग‌’ हे सुप्रसिद्ध भजन सादर करत रसिकांची मने जिंकली. अखेरीस ‌‘श्री राम जय राम जय जय राम‌’ आणि ‌‘विठ्ठल‌’ नामाचा गजर करताना गंधार यांना रसिकांनी टाळ्यांच्या गजरात साथ करत वातावरणात भक्तिरसाची निर्मिती केली. उदय कुलकर्णी (संवादिनी), ऋषिकेश जगताप (तबला), ज्ञानेश्वर दुधाणे (पखवाज), ओम देशमुख, सिद्धार्थ गोडांबे (सहगायन, तानपुरा) यांनी साथसंगत केली.
रसिकांशी संवाद साधताना गंधार देशपांडे म्हणाले, पुण्यातील उपनगरात पहिल्यांदाच गायनसेवा करीत आहे. पंडित संजय गरुड यांनी या परिसरात भारतीय अभिजात शास्त्रीय संगीताचा प्रचार व प्रसार मोठ्या प्रमाणावर केल्यामुळे रसिकांचाही उत्स्फूर्त प्रतिसाद मिळत आहे याचा आनंद आहे.

दुसऱ्या सत्रात पंडित तुळशीदास बोरकर यांचे शिष्य प्रसिद्ध संवादिनी वादक पंडित सुधीर नायक यांचे एकल संवादिनी वादन झाले. त्यांनी मैफलीची सुरुवात राग पूरिया कल्याण सादर करून केली. त्यानंतर गुरू पंडित तुळशीदास बोरकर यांची झपतालातील एक रचना ऐकविली. पंडित रामाश्रय झा रचित बंदिश सादर करून तिलक कमोद रागातील रचना ऐकविली. कार्यक्रमाची सांगता पिलू रागातील ठुमरीने केली. संवादिनीच्या सप्तकावर सहज फिरणारी बोटे आणि गायकी अंगाने सादर केलेले वादन हे वैशिष्ट्य रसिकांना विशेष भावले. शुभदा गायकवाड (स्वरमंडल), ऋषिकेश जगताप (तबला) यांनी साथसंगत केली.

महोत्सवाच्या पहिल्या दिवसाची सांगता किराणा घराण्याच्या ज्येष्ठ व सुप्रसिद्ध गायिका विदुषी पद्माताई देशपांडे यांच्या गायन मैफलीने झाली. त्यांनी सुरुवातीस राग चंद्रकंसमधील पारंपरिक ख्यालातील बंदिश सादर करून त्याला जोडून द्रुत एकतालातील ‌‘रुम झुम बिछुआ बाजे‌’ ही स्वरचित व स्वत: संगीतबद्ध केलेली रचना सादर केली. जगत्‌‍गुरू संत तुकाराम महाराज यांचा ‌‘बोलावा विठ्ठल पहावा विठ्ठल‌’ हा अभंग स्वत: रचलेल्या वेगळ्या चालीत सादर केला. मैफलीची सांगता भैरवीतील ‌‘श्याम बिन राधा भयी बावरी‌’ या बंदिशीने केली. या रचनेचे शब्द व संगीत विदुषी पद्माताई देशपांडे यांचेच होते. अनुभवाने परिपूर्ण कलाकाराला, त्याच्या गायन साधनेला समजून घेण्याची संधी पद्माताई देशपांडे यांच्या मैफलीने युवा कलाकारांना लाभली. तुषार केळकर (संवादिनी), रोहन पंढरपूर (तबला), माऊली दुधाणे (पखवाज), निषाद गरुड (टाळ) ऋतुजा बोऱ्हाडे आणि नात ऐश्वर्या देशपांडे यांनी गायनसाथ केली.

पुणे : पुण्याच्या भवतालच्या परिसरात होणारा रिंग रोड त्यासाठी होणारे भूसंपादन यांचे काम वेगाने होऊ लागले असले तरी या भूसंपादनाचा मोबदला देताना कोणते अधिकारी आणि एजंट शेतकऱ्यांकडून आणि जमिन्माल्कांकडून कमिशन खात आहेत याची चौकशी जिल्हाधिकारी यांनी करावी अशी मागणी गेल्या वर्षभरापासून होते आहे.मात्र यासाठी उघडपणे पुढे यायला कोणी धजावत नसल्याने या मागणीला म्हणावे तसे पाठबळ मिळेनासे झाले आहे. मात्र अशी चौकशी जर जिल्हाधिकारी जितेंद्र डुडी यांनी केली तर मोठ मोठे मासे गळाला लागतील आणि जमीन मालकांना दिलासा मिळेल अशीही निश्चिती दिली जाते आहे.

दरम्यान आतापर्यंत पुणे रिंग रोडच्या पश्चिम भागातील जमिनीचे संपादन पूर्ण होत आले आहे. त्या भागात कामांसाठी कंपन्यांना आदेश दिल्याने त्यांच्याकडून काम सुरू करण्यात आले आहे. पूर्व भागाच्या २६५ हेक्टर भूसंपादनापैकी आतापर्यंत ३० हेक्टरचे संपादन शिल्लक आहे. याबाबत सध्या हालचाली देखील सुरु करण्यात आल्या आहेत.याबाबत जिल्हाधिकारी कार्यालयात रिंग रोड संदर्भात आढावा बैठक घेतली. त्या बैठकीत ‘एमएसआरडीसी’चे सहसंचालक लक्ष्मीनारायण मिश्रा, जिल्हाधिकारी जितेंद्र डुडी यांच्यासह खेड, हवेली तालुक्यातील उपविभागीय अधिकारी उपस्थित होते. शहरातील वाहतूक कोंडीचा प्रश्न सोडवण्यासाठी ‘एमएसआरडीसी’तर्फे रिंग रोड केला जात आहे. या रोडसाठी हवेली, पुरंदर, खेड, भोर, मावळ आणि मुळशी या तालुक्यातील गावांमधली जमीन संपादित करण्यात आली आहे.याबाबत संपादनाचे निवाडे लवकर जाहीर करून संपादनाची प्रक्रिया लवकर पूर्ण करण्याचे आदेश देण्यात आले आहेत. हे निवाडे २५ एप्रिलपर्यंत पूर्ण करून येत्या पंधरा दिवसांत संपादन पूर्ण करण्यात येणार आहे. आता रिंग रोडचे नऊ टप्प्यांच्या कामांचे कार्यादेशही देण्यात आले आहेत.रिंग रोडजवळ सेवा रस्ते, विविध सुविधा तयार करण्यासाठी अतिरिक्त जमीन आवश्यक आहे. त्याकरिता महामंडळाने जिल्हा प्रशासनाकडे अतिरिक्त जमिनीची मागणी असल्याचा प्रस्ताव राज्य सरकारकडे दिला आहे. रिंग रोड साकारताना सेवा रस्ते, विविध सुविधांसाठी पूर्व आणि पश्चिम भागातील अनुक्रमे १० आणि २२ गावांमधील जमिनीचे अतिरिक्त संपादन करावे लागणार आहे.एमएसआरडीसीने याबाबतचा प्रस्ताव सरकारकडे पाठविला असून लवकरच त्याची अधिसूचना प्रसिद्ध होण्याची शक्यता आहे. याशिवाय पुरंदर तालुक्यातील चांबळी आणि हिवरे गावातील रिंग रोडची आखणी बदलल्याने दोन्ही गावांतील जमिनींचे संपादन केले जाणार आहे. यामुळे याकडे शेतकऱ्यांचे लक्ष लागले आहे.आखणीमध्ये चांबळी गावाचा समावेश होता. चांबळी गावातील जमीन संपादन करण्यासाठी मोठ्या प्रमाणात विरोध झाला होता. आता रिंग रोडसाठी जमीन देणाऱ्या शेतकऱ्यांना चांगले पैसे मिळाल्याने चांबळी, हिवरे या गावातील शेतकऱ्यांनी जमीन देण्याची तयारी दाखविली आहे. मावळ तालुक्यातील चांदखेड, उर्से, परंदवाडी, कासार आंबोली, मुळशी तालुक्यातील मुठे, घोटावडे, कातवडी, भोरमधील खोपी, हवेलीतील रहाटवडे, बहुली या गावांमधील काही प्रमाणात अतिरिक्त जमीन आवश्यक आहे.तसेच नानोली तर्फे आकुर्डी, वडगाव, सुदुंबरे, हवेली तालुक्यातील लोणीकंद, बिवरी, कोरेगाव मूळ, बकोरी, वळती या गावांचा समावेश आहे. पुरंदर तालुक्यातील पवारवाडी, गराडे, दिवे, चांबळी, सोनोरी, थापेवाडी, हिवरे या गावातील काही जमीन अतिरिक्त म्हणून संपादित केली जाणार आहे. खेड तालुक्यातील खालुंब्रे, कुरोळी, सोळे, निघोजे, धानोरे आणि भोरमधील शिवरे या गावांमधली जमीन घेण्याचा प्रस्तावात समावेश आहे.

मंदिरे सामाजिक ऐक्य आणि संस्काराचे केंद्र- ना. पाटील

पुणे-कोथरूडचे ग्रामदैवत श्री म्हातोबाचे मूळ ठिकाण असलेल्या एआरआय टेकडीवरील मंदिराकडे जाणे अधिक सुकर झाले आहे. ना. चंद्रकांतदादा पाटील यांच्या पुढाकारातून सदर मंदिराकडे जाणाऱ्या पायऱ्यांची पुनर्बांधणी करण्यात आली असून, त्यामुळे भाविकांना मोठा दिलासा मिळाला आहे.

कोथरूडचे ग्रामदैवत श्री म्हातोबा यांचे एआरआय टेकडीवरील मूळ ठाणे असून, मंदिराकडे जाणाऱ्या पायऱ्यांची अतिशय दुरवस्था झाली होती. सदर पायऱ्या अतिशय जीर्ण आणि भग्न झाल्याने मंदिरात दर्शनासाठी जाणाऱ्या भाविकांना मोठी कसरत करावी लागत होती. सदर पायऱ्यांची पुनर्बांधणी करुन; दर्शनासाठी जाणाऱ्या भाविकांची व्यवस्था व्हावी; अशी ग्रामस्थांची सातत्याने मागणी होती.

त्यामुळे ना. चंद्रकांतदादा पाटील यांनी पुढाकार घेत; या पायऱ्यांची पुनर्बांधणी केली असून; घडीव दगडी पायऱ्या बांधण्यात आल्या आहेत. त्यामुळे मंदिर परिसराचे वैभव देखील वाढले असून; दर्शनासाठी जाणाऱ्या भाविकांना मोठा दिलासा मिळाला आहे.

नामदार चंद्रकांतदादा पाटील म्हणाले की मंदिर हे सामाजिक ऐक्य आणि संस्कारांचं केंद्र आहे. त्यामुळे तिथे होणाऱ्या एकत्रिकरणातून सामाजिक ऐक्य जपले जाते. राज्याचा सार्वजनिक बांधकाम मंत्री असताना; अनेक मार्ग उभारले. पण मी लहानपणापासून ज्या देवस्थानात जायचो; त्या कोल्हापूरमधील तळे माऊली मंदिराकडे जाणारा मार्ग तयार केला.

ते पुढे म्हणाले की, कोथरुड मतदारसंघातील म्हातोबाचे मूळ ठिकाण असलेल्या एआरआय टेकडीवरील मंदिराकडे जाणाऱ्या पायऱ्यांची पुनर्बांधणी करण्याची मागणी सातत्याने होत होती. त्यामुळे हे काम करुन; म्हातोबांच्या चरणी अर्पण करतो. भविष्यात ही या परिसराच्या विकासासाठी एकात्मिक आराखडा तयार करावा; त्यासाठी आमदार निधीतून निधी उपलब्ध करून देऊ, अशी ग्वाही यावेळी दिली. दरम्यान, नामदार चंद्रकांतदादा पाटील यांच्या पुढाकाराबद्दल म्हातोबा सेवक संघाच्या वतीने समाधान व्यक्त केले.