पुणे, दि. २४ : जम्मू काश्मीर येथे अडकलेल्या ६५७ पर्यटकांनी जिल्हा आपत्ती नियंत्रण कक्षास संपर्क साधला असून २७ एप्रिल २०२५ पर्यंत एकूण १४८ पर्यटक पुण्यात येणार आहेत, अशी माहिती जिल्हाधिकारी जितेंद्र डूडी यांनी दिली आहे.
आज सकाळी १० वाजता पुण्यात विमानाने ११ प्रवासी पोहचले असून आणखीन १९ प्रवासी विमानाने येत आहेत. २५ एप्रिल रोजी ७७ तर २६ एप्रिल रोजी १२ प्रवासी विमानाने येणार आहेत. २७ एप्रिल रोजी २९ पर्यटक रेल्वेने येणार आहेत. नियंत्रण कक्ष सर्व पर्यटकांच्या संपर्कात असून पर्यटकांकडून माहिती घेण्याची कार्यवाही सुरू आहे, असेही जिल्हाधिकारी श्री.डूडी यांनी कळविले आहे.

वनमंत्री गणेश नाईक यांची भेट घेऊन निवेदन सादर

पुणे-: वडगावशेरी मतदारसंघातील निरगुडी व वडगाव शिंदे या गावात असलेल्या वनविभागाच्या जागेत उच्च दर्जाचे वन उद्यान उभारावे, अशी मागणी आमदार बापूसाहेब पठारे यांनी वनमंत्री गणेश नाईक यांच्याकडे केली. मुंबई येथे (ता. २३) पठारे यांनी वनमंत्री गणेश नाईक यांची भेट घेऊन त्यासंबंधी निवेदन दिले.

निरगुडी व वडगाव शिंदे गावात वन विभागाच्या जवळपास २२९ हेक्टर जागेत वन उद्यान उभारण्याच्या संदर्भाने विस्तृत चर्चा यावेळी पार पडली. “मौजे निरगुडी येथील गट क्र. ५३, १३६ व १६३-अ मध्ये वनविभागाची २२९ हेक्टर जागा आहे. सदर जागा वन उद्यानासाठी वापरात आल्यास नागरिकांना चांगला फायदा होईल. झपाट्याने वाढत्या लोकसंख्येचा तसेच वाढत्या तापमानचा विचार करता वन उद्याने उभी राहणे सर्वच बाजूंनी खूप गरजेचे आहे. पर्यावरणाचा समतोल राखणे ही आपले कर्तव्य आहे आणि त्याच दृष्टीतून सदर वनविभागाच्या जागेत वन उद्यान विकसित व्हावे”, असे मत बापूसाहेब पठारे यांनी मांडले आहे.

यापूर्वीही पठारे यांनी उपमुख्यमंत्री अजित पवार यांच्याकडे प्रस्ताव दिला होता. त्यावर पवार यांनी सकारात्मक प्रतिसाद दिला असल्याचे समजते. गणेश नाईक यांनीही सकारात्मक प्रतिसाद दिला असून लवकरात लवकर हे वन उद्यान उभारण्याच्या संदर्भात सकारात्मकता दाखवली असल्याचे सांगण्यात आले आहे.

PAHALGAM TERROR ATTACK

पुणे : जम्मू-काश्मीरच्या पहलगाममध्ये झालेल्या दहशतवादी हल्ल्यात 26 जणांचा मृत्यू झाला. यामध्ये महाराष्ट्रातील पाच पर्यटकांचा समावेश आहे. यात पुण्यातील संतोष जगदाळे (Santosh Jagdale) आणि कौस्तुभ गणबोटे (kaustubh Ganbote) या दोघांचा मृत्यू झाला. तर संतोष जगदाळे यांची मुलगी आसावरी जगदाळे हिनं हृदय पिळवटून टाकणारी संपूर्ण घटना सांगितली.

”अजान पढो” म्हणत केली फायरिंग : “मी, माझे आई-वडील आणि वडिलांचे मित्र कौस्तुभ गणबोटे आणि त्यांची पत्नी असे आम्ही पाचजण जम्मू काश्मीर येथे फिरायला गेलो होतो. पहलगाममध्ये बायसरण व्हॅली अर्थात मिनी स्विझर्लंड नावाची जागा आहे. तिथं आम्ही फिरायला गेलो होतो. नॉर्मल टुरिस्ट सारखं आम्ही देखील तिथं फिरत होतो आणि फोटोग्राफी करत होतो. अचानक डोंगरातून फायरिंगचा आवाज आला. आम्ही तेथील लोकल लोकांना विचारलं तेव्हा ते म्हणाले की, “शेर आता है तो ऐसी फायरिंग होती है…” ही गोष्ट आमच्यासाठी नवीन होती. पण काही वेळाने गोळीबाराचे आवाज आले. आम्ही प्रचंडघाबरलो आणि खूप धावपळ सुरू झाली. काही लोक पळायला लागले तर काही लोक हे लपायला लागले. तिथं जे टेंट होते तिथं आम्ही लपायचा प्रयत्न केला. तिथल्या सगळ्यांना दहशतवाद्यांनी गुडघ्यावर बसवलं आणि म्हणाले ”अजान पढो.” त्या ठिकाणी फायरिंग करून ते माझ्या वडिलांकडे आले आणि म्हणाले, “अजान पढो.” तेव्हा वडील म्हणाले की, आप बोलो वैसे हम करते है. पण ते रागात होते आणि त्यांनी माझ्या वडिलांवर 3 गोळ्या झाडल्या.” काळीज पिळवटून टाकणारा प्रसंग आसावरी जगदाळे हिनं साश्रू नयनांसह सांगितला.

वैकुंठ स्मशानभूमीत अंत्यसंस्कार : पुढे आसावरी म्हणाली, “त्यानंतर कौस्तुभ गणबोटे यांना उठवलं पण ते उठले नाही तर त्यांच्यावर देखील फायरिंग करण्यात आली. तिथे जे पुरुष होते त्यांच्यावरच गोळ्या झाडण्यात आल्या, त्यानंतर आम्ही पळून गेलो. काही वेळानं आर्मीचे लोक आले आणि त्यांनी लपलेल्या लोकांना बाहेर काढलं आणि आर्मी कॅम्पमध्ये घेऊन आले. रात्री आम्हाला कळलं की माझ्या वडिलांचा आणि काकांचा मृत्यू झाला आहे. त्यानंतर तिथली प्रोसेस करून आज डेड बॉडी पुण्यात आणली आणि वैकुंठ स्मशानभूमीत अंत्यसंस्कार करण्यात आले.

“पर्सनल प्लॅनिंग करून जम्मू-काश्मीरला गेलो होतो : “आम्ही कोणत्याही टूरने गेलेलो नव्हतो. आम्ही आमचं पर्सनल प्लॅनिंग करून एका एजंटच्या माध्यमातून तिकीट बुक करून जम्मू-काश्मीरला गेलो होतो. तसंच त्यांनी आम्हाला एक ड्रायव्हर देखील दिला होता. पहिल्या दिवसापासून ड्रायव्हर आम्ही पुण्यात येऊपर्यंत आमच्या सोबत होते आणि आजही त्यानी कॉल करून विचारपूस केली असं आसावरी जगदाळे हिनं सांगितलं.

पुणे : पुण्यातील चंदननगर येथील झोपडपट्टीमध्ये बुधवार (दि.२३) रोजी लागलेल्या भीषण आगीत ९० हन अधिक कुटुंबांचे संसार उद्ध्वस्त झाले असून, शेकडो नागरिक उघड्यावर आले आहेत. या पार्श्वभूमीवर महाराष्ट्र विधान परिषदेच्या उपसभापती डॉ. नीलम गोऱ्हे यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री तथा पालकमंत्री अजित पवार, जिल्हाधिकारी, पुणे मनपा आयुक्त यांना त्वरीत मदत आणि पुनर्वसनाच्या उपाययोजना करण्याची मागणी केली आहे.

डॉ. गोऱ्हे यांनी म्हटले आहे की, बुधवारी पहाटे चंदन नगर येथील सुंदराबाई मराठे शाळेच्या बाजूला असलेल्या डॉ. बाबासाहेब आंबेडकर वस्तीमध्ये आग लागली होती. या आगीत ९० हून अधिक झोपड्या जळाल्याचे प्राथमिक दिसून येत आहे.
यात अनेकांचे कुटुंब उघड्यावर आले असून त्यांचा उदरनिर्वाहाचा प्रश्न निर्माण झाला आहे. आगीत झालेल्या नुकसानीचा तत्काळ पंचनामा करून नुकसानग्रस्तांना भरपाई देण्याची, तात्पुरत्या निवाऱ्याची, अन्न-पाण्याच्या पुरवठ्याची, तसेच दीर्घकालीन पुनर्वसन करण्याची मागणी डॉ. गोऱ्हे यांनी केली आहे. तसेच, भविष्यात अशा दुर्घटना टाळण्यासाठी झोपडपट्टी भागातील वीज व गॅससारख्या मूलभूत सुविधांमध्ये सुधारणा करून अग्निसुरक्षा उपाययोजना राबवण्याचे आवाहनही केले आहे.

“या घटनेची तातडीने दखल घेऊन शासनाने नागरिकांच्या सुरक्षेसाठी पावले उचलावीत,” असे स्पष्ट मत डॉ. गोऱ्हे यांनी व्यक्त केले आहे.

पुणे, दि. 24: जिल्हाधिकारी जितेंद्र डुडी यांच्या आदेशानुसार पुणे शहर तहसिल कार्यालयामार्फत संजय गांधी निराधार व श्रावणबाळ सेवा राज्य निवृत्तीवेतन योजनेअंतर्गत लाभार्थ्यांचे आधार नोंद अद्ययावतीकरण शिबीराचे बुधवारी, (22 एप्रिल) रोजी घोलेरोड क्षेत्रिय कार्यालय, पुणे महानगरपालिका, शिवाजीनगर येथे आयोजित करण्यात आले. या शिबारात एकूण 56 दिव्यांग नागरिकांच्या थेट खात्यात रक्कम जमा करण्यात आली.

यावेळी सेवा हक्क आयोगाचे राज्य आयुक्त दिलीप शिंदे, महापालिका सहाय्यक आयुक्त,गोविंद दांगट, संजय गांधी योजना तहसिलदार सुधाकर मागाडे, नायब तहसिलदार प्रशांत मिस्त्री यांच्यासह आदी उपस्थित होते.

श्री.शिंदे यांनी शिबीराचे निरिक्षण करुन महाराष्ट्र लोकसेवा हक्क अधिनियम, 2015 बाबत लाभार्थ्यांना मार्गदर्शन केले.

पुणे : एमआयटी वर्ल्ड पीस युनिव्हर्सिटीच्या विज्ञान आणि पर्यावरण अभ्यास शाळेतील बायोसायन्सेस आणि तंत्रज्ञान विभागातर्फे ‘शाश्वततेसाठी विज्ञानाचे समन्वय स्वच्छ ऊर्जा, लवचिक शेती आणि वर्तुळाकार अर्थव्यवस्था’ या विषयावर तीन दिवसीय राष्ट्रीय परिसंवादाचे आयोजन करण्यात आले आहे. तीन दिवसीय परिसंवाद २४ ते २६ एप्रिल दरम्यान कोथरूड येथील डब्ल्यूपीयूच्या कॅम्पसमधील चाणक्य बिल्डिंगमधील तोरणा हॉल मध्ये होणार आहे. अशी माहिती एमआयटी डब्ल्यूपीयूचे प्र कुलगुरू डॉ. मिलिंद पांडे यांनी पत्रकार परिषदेते दिली.
या परिसंवादाचे उद्घाटन राष्ट्रीय विज्ञानाचे अध्यक्ष पद्मश्री प्रा.डॉ. गणपती डी.यादव यांच्या हस्ते सकाळी १० वाजता होणार आहे. अध्यक्षस्थानी एमआयटी डब्ल्यूपीयूचे संस्थापक अध्यक्ष डॉ. विश्वनाथ कराड हे असतील. तसेच समारोप २६ एप्रिल रोजी दुपारी ३ वाजता होणार आहे. यावेळी आयसीएआर-डीआयएफआरचे संचालक डॉ.के.व्ही. प्रसाद आणि जेनोव्हा बायोफार्मास्युटिकल्स चे मेजर विशाल कराड उपस्थित राहणार आहेत.
हा कार्यक्रम एमआयटी डब्ल्यूपीयूचे कार्यकारी अध्यक्ष डॉ. राहुल कराड यांच्या मार्गदर्शात संपन्न होत आहेे.
या परिसंवादात परवडणारी आणि स्वच्छ ऊर्जा, हवामान-लवचिक शेती, वर्तुळाकार अर्थव्यवस्था आणि नैसर्गिक संसाधने आणि नैसर्गिक उत्पादने आणि कार्यात्मक अन्न या चार विषयांवर चर्चा होणार आहे. ज्यामध्ये खरगपूर आयआयटीचे डॉ. आदिपुण्य मित्र, एमआयटी डब्ल्यूपीयूचे डॉ. भरत काळे, एसपीपीयूचे डॉ. विठ्ठल बरवकर, आयसीएआर-एनआरसीजीचे डॉ. सुजॉय साहा, माजी वरिष्ठ शास्त्रज्ञ डॉ. मालती वेंकटेशन, आयसीजीईबीचे डॉ. शशी कुमार रोड, बीएआयएफ डेव्हलपमेंट रिसर्च फाउंडेशनचे डॉ. राजश्री जोशी, आयडब्ल्यूएमआयच्या डॉ. मानसी त्रिपाठी, सायरिओचे डॉ. समथा मॅथ्यू, डॉ. आनंद घोसाळकर, आयसीएआर एनआरसीजीचे संचालक डॉ. कौशिक बॅनर्जी, बिट्स पिलानीचे डॉ. उत्पल रॉय, लोयोला कॉलेजच्या डॉ. किरण कुमारी आणि आयसीटीच्या डॉ. रेखा सिंघल हे विचार मांडणार आहेत.
या कार्यक्रमाचा मुख्य उद्देश्य आंतरविद्याशाखीय सहकार्यांना व नाविन्यपूर्ण विचारांना चालना देणे आणि शाश्वत भविष्यासाठी प्रभावी भागीदारी निर्माण करणे हे आहे.
येथे तळागळातील उदयोन्मुख नवोपक्रम आणि संशोधनाला प्रोत्साहन देणारे संशोधन विद्वान आणि तरूण शास्त्रज्ञांचे मौखिक आणि पोस्टर सादरीकरण देखील असेल.
या परिसंवादात शिक्षणतज्ज्ञ, संशोधक, उद्योग तज्ञ आणि तरूण वैज्ञानिक विचारांना आणि काही सर्वात महत्वाच्या शाश्वत आव्हानांना तोंड देण्यासाठी सहकार्य करण्यासाठी आणि विचारांची देवाणघेवाण करण्यासाठी एक संगम म्हणून कार्य करणार आहे.
या कार्यक्रमाला भारत सरकारच्या अनुसंधान राष्ट्रीय संशोधन फाउंडेशनचे पाठबळ आहे. तसेच शाश्वत ग्रामीण विकास, स्वच्छ ऊर्जा आणि वर्तुळाकार जैव अर्थव्यवस्थेला प्रोत्साहन देण्यासाठी अग्रणी असलेल्या बायफ डेव्हलपमेंट रिसर्च फाउंडेशनची भागीदारी आहे. नेक्स्ट जेन सायन्सेस हे उद्योग प्रायोजक आहे.
या पत्रकार परिषदेत डब्ल्यूपीयूच्या स्कूल ऑफ सायन्स अँड एर्न्व्हामेंटल स्टडीजचे डीन इनचार्ज डॉ. अनुप काळे, डॉ. शिल्पा चापडगावकर आणि सहयोगी प्रा. डॉ. मानसी मिश्रा उपस्थित होत्या.

‘लोकपरंपरा पुरस्कार’ शिवाजीराव गोपाळे यांना प्रदान

शनिवार पेठेतील वीर मारुती मंदिर : ‘वीर’ परंपरेच्या जतनासाठी केलेल्या कार्याबद्दल सन्मान

पुणे :  आपण खऱ्या अर्थाने आजही धर्मनिरपेक्ष झालो नाही. शिक्षा आणि पुरस्कार हे धर्म बघूनच दिले जातात. मणिपूर मध्ये हिंसाचार झाला तेव्हा अनेक जण बोलत होते परंतु आज पश्चिम बंगाल मधल्या हिंसाचाराबद्दल ते लोक बोलत नाहीत. मुस्लिम मेले तर संविधान संकटात येते हिंदू मेले तर येत नाही का? , असे मत राष्ट्रीय कीर्तनकार ह.भ.प. चारुदत्त आफळे यांनी व्यक्त केली.

शनिवार पेठेतील वीर मारुती चौक येथे पेशवे काळापासून सुरू असलेली आणि आजही अखंडपणे जपली जाणारी कीर्तन परंपरा यंदाही हनुमान जयंतीपासून अक्षयतृतीया पर्यंत सलग १८ दिवस साजरी होत आहे. महाराष्ट्रातील सलग १८ दिवस कीर्तन उत्सव सुरु असणारे हे बहुधा एकमेव मारुती मंदिर मानले जाते. 

‘शनिवार वीर मारुती उत्सव मंडळा’च्या पुढाकाराने आणि गुरुवर्य श्री श्रीराम धोंडूराम दहाड यांच्या स्मृतिप्रित्यर्थ ‘लोकपरंपरा पुरस्कार’ शिवाजीराव गोपाळे यांना राष्ट्रीय कीर्तनकार चारुदत्त बुवा आफळे यांच्या हस्ते शनिवार पेठेतील वीर मारुती चौक येथे प्रदान करण्यात आला. यावेळी राम दहाड, महेश पानसे, सचिन दाते, मयुरेश जोशी, प्रवीण जोशी व सहकारी मंडळी उपस्थित होते.

ह. भ. प. चारुदत्त बुवा आफळे म्हणाले, पानिपतचे युद्ध मराठ्यांनी जिंकावे यासाठी मारुतीला नवस करण्यात आला. ज्या ज्या वीरांच्या कुटुंबीयांनी नवस केला ते शनिवार पेठेतील मंदिरात आजही येतात. अशा वीरांच्या कुटुंबाचे संकलन शिवाजीराव गोपाळे यांनी केले, त्यांचे काम मोठे आहे. तब्बल २५ वर्षापेक्षा जास्त काळ ते झटले आणि २०० सरदारांची नावे पुढच्या पिढीपर्यंत दिली, अशा तपोवृद्ध माणसाचा सन्मान करायला मिळणे हा आमचा सन्मान आहे, अशी भावना आफळे यांनी व्यक्त केली.

राम दहाड म्हणाले, कीर्तन उत्सवाच्या या पावन परंपरेत चारुदत्त बुवा आफळे, वासुदेव बुवा बुरसे, मकरंद बुवा दीक्षित यांसारख्या नामवंत कीर्तनकारांनी सहभाग घेतला असून, आजही ही परंपरा अखंड सुरू आहे.  हा उत्सव कोणतीही वर्गणी न घेता, लोकवर्गणीतून साजरा केला जातो. महाराष्ट्रातील लोप पावत चाललेल्या परंपरांना जपणे आणि पुढील पिढीपर्यंत पोहोचविण्यासाठी काम करणाऱ्या व्यक्तींना ‘लोकपरंपरा पुरस्कार’ देण्यात येतो.  

ही परंपरा अधिक जिवंत राहावी म्हणून राम दहाड, महेश पानसे, सचिन दाते, मयुरेश जोशी, प्रवीण जोशी व सहकारी मंडळी ही उत्साहाने प्रयत्नशील आहेत.

मुख्य अभियंता श्री. पवार यांच्याहस्ते बक्षिसांचे प्रातिनिधिक वितरण

पुणे, दि. २५ एप्रिल २०२५: सलग तीन किंवा किंवा त्यापेक्षा अधिक महिन्यांपासून वीजबिल ऑनलाइन भरणाऱ्या लघुदाब वीजग्राहकांसाठी महावितरणने जानेवारी ते मे महिन्याच्या कालावधीसाठी ‘लकी डिजिटल ग्राहक योजना’ सुरु केली आहे. यात पहिल्या ड्रॉमध्ये पुणे परिमंडलातील २३० वीजग्राहकांना बक्षिसे जाहीर झाली आहे. गुरुवारी (दि. २५) मुख्य अभियंता श्री. राजेंद्र पवार यांच्याहस्ते प्रातिनिधिक स्वरूपात ५ वीजग्राहकांना स्मार्ट फोन व स्मार्ट वॉच बक्षिसांचे वितरण करण्यात आले.

‘लकी डिजिटल ग्राहक योजने’त प्रत्येक उपविभागस्तरावर ५ बक्षिसे असून एकूण तीन लकी ड्रॉ काढण्यात येणार आहे. प्रत्येक उपविभागासाठी प्रथम – एक स्मार्ट फोन, द्वितीय – दोन स्मार्ट फोन आणि तृतीय बक्षिस म्हणून दोन स्मार्ट घड्याळ असे प्रत्येकी पाच बक्षिसे ठेवण्यात आली आहेत. त्यानुसार पुणे परिमंडलातील ४६ उपविभागांसाठी एकूण २३० बक्षिसांसाठी पहिला लकी ड्रॉ ऑनलाईन पध्दतीने दि. ७ एप्रिलला काढण्यात आला. या योजनेतील प्रातिनिधिक विजेते अनिल माने, मारूती मगर, छगनलाल सोळंकी, विद्या देशपांडे, एनरीच एनर्जी लिमिटेड यांना मुख्य अभियंता श्री. राजेंद्र पवार यांच्याहस्ते स्मार्ट फोन व स्मार्ट वॉच बक्षिसांचे वितरण करण्यात आले. उर्वरित विजेत्यांना विभाग व उपविभागस्तरावर बक्षिस वितरीत करण्यात येत आहे.

ग्राहकांना येत्या दि. १ जानेवारी ते ३१ मे २०२५ पर्यंत सलग तीन किंवा त्यापेक्षा अधिक महिन्यांत नेटबँकिंग, डेबिट कार्ड, क्रेडिट कार्ड, यूपीआय, वॉलेट, कॅश कार्ड, एनएसीएच, क्यूआर कोड, एनईएफटी, आरटीजीएस आदींद्वारे ऑनलाइन वीजबिल भरून योजनेत सहभागी होता येईल. तसेच मागील महिन्याच्या वीजबिलाची १० रुपयांपेक्षा अधिक थकबाकी नसावी. ऑनलाइन व संगणकीय पद्धतीने लकी ड्रॉ काढण्यात येणार असून योजनेच्या कालावधीत ग्राहक/ ग्राहक क्रमांक फक्त एकाच बक्षिसासाठी पात्र राहील.

या योजनेत यापुढे मे आणि जून महिन्यात संगणकीय पद्धतीने लकी ड्रॉ काढण्यात येणार आहे. त्याचा निकाल संबंधित महिन्यांच्या पहिल्या आठवड्यात महावितरणच्या वेबसाईटवर जाहीर होईल. तसेच संबंधित विजेत्या ग्राहकांच्या नोंदणीकृत मोबाईल क्रमांकावर बक्षिस जिंकल्याची माहिती देण्यात येईल. किंवा विजेते ग्राहक देखील तीन दिवसांच्या आत जवळच्या कार्यालयाशी संपर्क साधू शकतात. लकी डिजिटल ग्राहक योजनेबाबत महावितरणच्या www.mahadiscom.in वेबसाईट अधिक माहिती उपलब्ध आहे.

पुणे : ‌‘जय जिजाऊ‌’, ‌‘छत्रपती शिवाजी महाराज की जय‌’, ‌‘छत्रपती संभाजी महाराज की जय‌’ अशा घोषणा देत आणि रंगीबेरंगी फुगे आकाशात सोडून बालकुमार चित्रपट महोत्सवाचा आज (दि.24) शुभारंभ झाला. महोत्सवाच्या पहिल्या दिवशी ‌‘शिवरायांचा छावा‌’ या चित्रपटाद्वारे मुलांनी वीरश्रीची अनुभूती घेतली.
संवाद, पुणे, कोहिनूर ग्रुप व कावरे आईस्क्रीम यांच्या संयुक्त विद्यमाने गुरुवार, दि. 24 ते बुधवार, दि. 30 एप्रिल 2025 या कालावधीत कोथरूड येथील सिटी प्राईड चित्रपट गृहात बालकुमार चित्रपट महोत्सवाचे आयोजन करण्यात आले आहे. महोत्सवाच्या शुभारंभप्रसंगी प्रतिथयश युवा दिग्दर्शक दिग्पाल लांजेकर, प्रसिद्ध उद्योजक कृष्णकुमार गोयल, सिटी प्राईडचे अरविंद चाफळकर, प्रकाश चाफळकर, कावरे आईस्क्रीमचे राजूशेठ कावरे, जान्हवी कावरे, संवाद पुणेचे सुनील महाजन, निकिता मोघे, केतकी महाजन-बोरकर, प्रसाद मिरासदार यांची उपस्थिती होती. या महोत्सवात लांजेकर यांनी दिग्दर्शित केलेले पाच चित्रपट दाखविण्यात येत असल्याने त्यांचा या वेळी विशेष सन्मान करण्यात आला. महोत्सवाचे यंदाचे 27वे वर्ष आहे.

भविष्यात नवीन दिग्पाल दिसेल..
उद्घाटनप्रसंगी चित्रपट महोत्सवाच्या आठवणी सांगताना दिग्पाल लांजेकर म्हणाले, लहानपणापासून मी हा बालचित्रपट महोत्सव अनुभवला आहे. सातत्याने या महोत्सवाचे आयोजन करणे कठीण आहे. परंतु आम्हा बालगोपाळांना या चित्रपट महोत्सवातून उत्तमोत्तम चित्रपट दरवर्षी पहायला मिळत गेले आणि त्यातूचन माझ्यातील कलावंत-दिग्दर्शक घडला. हा महोत्सव वर्षांनुवर्षे अखंडितपणे बालकुमारांना आनंद देईल आणि यातूनच नवीन दिग्पाल उदयास आलेला दिसेल.

प्रास्ताविकात सुनील महाजन म्हणाले, बालगोपाळांसाठी त्यांच्या वयाला रुचतील असे चित्रपट दर्शविण्याचे काम कावरे आईस्क्रीम आणि कोहिनूर ग्रुपच्या सहकार्याने करण्यात येत आहे. या वर्षी चित्रपट महोत्सवात पहिल्यांदाच एकाच दिग्दर्शकाचे पाच चित्रपट दाखविण्यात येत आहे याचा आनंद आहे. महाराष्ट्रातील संत परंपरा आणि वैभवशाली इतिहास मुलांना कळावा या हेतूने ऐतिहासिक चित्रपट दाखविण्यात येत आहेत.

सुरुवातीस विद्या भोपे हिने छत्रपती संभाजी महाराज यांच्या कार्यकर्तृत्वाची माहिती विशद केली. मान्यवरांचे स्वागत राजूशेठ कावरे आणि सुनील महाजन यांच्या हस्ते करण्यात आले.

समारोपाला ‌‘संत ज्ञानेश्वरांची मुक्ताई‌’ चित्रपटातील कलावंतांची उपस्थिती..
शुक्रवार, दि. 25 रोजी ‌‘पावनखिंड‌’, शनिवार, दि. 26 रोजी ‌‘फर्जंद‌’, रविवार, दि. 27 रोजी ‌‘फत्तेशिकस्त‌’, सोमवार, दि. 28 रोजी ‌‘धर्मरक्षक महावीर छत्रपती संभाजी महाराज‌’, मंगळवार, दि. 29 रोजी ‌‘तेंडल्या‌’, बुधवार, दि. 30 रोजी ‌‘संत ज्ञानेश्वरांची मुक्ताई‌’ हे चित्रपट महोत्सवात दाखविले जाणार आहेत. समारोप समारंभास केंद्रीय नागरी वाहतूक राज्यमंत्री मुरलीधर मोहोळ, दिग्दर्शक दिग्पाल लांजेकर, प्रसिद्ध उद्योजक, कोहिनूर ग्रुपचे अध्यक्ष कृष्णकुमार गोयल, उद्योजक प्रवीण बढेकर, सिटी प्राईडचे अरविंद चाफळकर तसेच ‌‘संत ज्ञानेश्वरांची मुक्ताई‌’ या चित्रपटातील कलावंतांची प्रमुख उपस्थिती असणार आहे.