शेतमाल तारण कर्ज योजने अंतर्गत बाजार समित्यांना पुरस्कार प्रदान

पुणे, दि. 14: शेतमालाची मागणी आणि पुरवठ्याचा समतोल राखायचा असेल तर शेतमाल तारण कर्ज योजना अत्यंत उपयुक्त आहे, असे प्रतिपादन  सहकार, पणन व वस्त्रोद्योग मंत्री सुभाष देशमुख यांनी केले.

येथील लोकशाहीर अण्णाभाऊ साठे सभागृहात झालेल्या कृषी उत्पन्न बाजार समिती कार्यशाळा व शेतमाल तारण कर्ज योजना 2016-17 पुरस्कार वितरण कार्यक्रमा दरम्यान ते बोलत होते. यावेळी महाराष्ट्र राज्य बाजार समिती सहकारी संघ सभापती दिलीप मोहिते, आ. माधुरी मिसाळ, महाराष्ट्र राज्य कृषी पणन मंडळाचे कार्यकारी संचालक सुनिल पवार, सरव्यवस्थापक दिपक शिंदे, सहाय्यक व्यवस्थापक एम. एल. लोखंडे, पणन संचालक डॉ. ए.बी. जोगदंड, कृषी व पणन विभागाचे प्रधान सचिव विजय कुमार, कृषी पणन मंडळाचे व्यवस्थापक जे.जे जाधव उपस्थित होते.

श्री. सुभाष देशमुख म्हणाले, राज्यातील शेतकऱ्यांनी उत्पादित केलेल्या शेतमाल काढणी हंगामात कमी भावाने विक्री न करता तो शेतमाल बाजार समितीच्या गोदामामध्ये  तारणात ठेवून शेतकऱ्यांना तारण कर्जाच्या स्वरुपात कमी व्याजदराने त्वरित सुलभ निधी उपलब्ध करुन देण्यासाठी ही योजना अत्यंत उपयोगी आहे. यामुळे कमी भावात शेतमाल विकून शेतकऱ्यांचे होणारे नुकसान कमी होणार आहे. शेतकऱ्यांचे तारण करता बाजार समिती आहे. त्यांनी शेतकऱ्यांना  वेळोवेळी माहिती देवून मदत करा व योग्य मार्गदर्शन करुन प्रामाणिकपणे काम करा, अशाही सूचना श्री देशमुख यांनी बाजार समितीच्या सदस्यांना दिल्या.यावेळी त्यांनी कोकणातील शेतकऱ्यांना काजूसाठी शेतमाल तारण योजनेचा लाभ घेण्याचे आवाहन केले. तसेच या योजनेची माहिती राज्यातील सर्व शेतकऱ्यांपर्यंत पोहचवण्याच्या सूचना संबंधित अधिकाऱ्यांना देवून पुरस्कार प्राप्त बाजार समित्यांना शुभेच्छा दिल्या.

चार्टर्ड अकाऊंटन्ट डॉ. संजय बुरड यांनी जी.एस.टी कायदा व बाजार समित्या या विषयावर मार्गदर्शन केले, सरव्यवस्थापक दिपक शिंदे यांनी शेतमाल तारण कर्ज योजेची सविस्तर माहिती दिली, सहाय्यक व्यवस्थापक एम. एल. लोखंडे यांनी बाजार समित्यांमधील ई-ट्रेर्डींग व ई-ऑक्शन बाबत माहिती दिली तसेच डॉ. ए. बी. जोगदंड यांनी बाजार समिती कायद्यातील प्रस्तावीत बदलांबाबत माहिती दिली.

दरम्यान सन 2016-17 मध्ये शेतमाल तारण कर्ज योजने अंतर्गत जिल्हा स्तरांवर अकोला, लातूर, अमरावती, वाशिम वर्धा, परभणी, सोलापूर, अहमदनगर येथील बाजार समित्यांना पुरस्कार देण्यात आले.तसेच विभागीय स्तरावर अमरावती, नागपूर, लातूर, पुणे, नाशिक व औरंगाबाद या कार्यालयांना देखील पुरस्कार देण्यात आला. यावेळी महाराष्ट्र राज्य कृषी पणन मंडळाचे सदस्य, राज्यातील सर्व बाजार समिती सहकारी संघटनेचे प्रतिनिधी व शेतकरी मोठ्या संख्येने उपस्थित होते.

0000000000

पुणे : धान्य वितरणात पारदर्शकता यावी,या उद्देशाने राज्य अन्न व नागरी पुरवठा विभागाने ‘सप्लाय चेन मॅनेजमेंट’ ही संगणकीकृत यंत्रणा विकसित केली आहे.या प्रणाली मुळे अन्नधान्य वाहतूक आणि वितरण यंत्रणेमध्ये पारदर्शकता  येणार असून संपूर्ण माहिती आता मोबाईलवरसुद्धा  उपलब्ध होणार आहे.अशी माहिती अन्न व नागरी पुरवठा आणि ग्राहक संरक्षण, अन्न आणि औषध प्रशासन, संसदीय कार्य मंत्री गिरीश बापट यांनी दिली.

ऑनलाइन प्रणाली बद्दल माहिती देताना श्री बापट म्हणाले, यामुळे प्रत्येक गोडाऊन मधील अन्नधान्याचे व्यवस्थापन करता येवू शकते. तसेच कोणत्याही सर्वसामान्य व्यक्तीला अन्न व पुरवठा विभागाकडून रास्त भाव दुकानदारांना किती अन्नधान्य वाटप केले हे पाहता येईल. धान्य वाहतूक करणाऱ्या ट्रकचे चलन ही ऑनलाइन काढले जाईल ज्यामुळे धान्य वाहतूक करणारा ट्रक भारतीय अन्न महामंडळ  ते राज्य शासनाचे गोदाम तसेच गोदाम  ते रास्त भाव दुकान किती वेळात पोहचतो याच्या नोंदी ठेवणे सोपे जाईल तसेच ट्रक चालकाचे नाव, मोबाईल नंबर याची ही नोंद विभागातील अधिकाऱ्यांना ठेवता येईल. यामुळे धान्य घेवून जाणारा ट्रक कोठे थांबल्यास त्याची माहिती संबंधित अधिकाऱ्यांना समजेल. धान्य गोदामामध्ये येण्याआधी त्याचे वजन केले जाईल त्यानंतर मागणीनुसार ज्या त्या रास्त भाव दुकानांना त्याचे वाटप केले जाईल. ऑनलाइन प्रणाली असल्याने या मध्ये काही तफावत असल्यास लगेच लक्षात येईल. या प्रणालीमुळे अधिकारी अन्य ठिकाणाहून मिळवलेल्या नोंदीही ठेवू शकतात. सध्या ही प्रणाली आपण साखरेच्या बाबतीत वापरत आहोत.‘सप्लाय चेन मॅनेजमेंट’  मुळे रास्त भाव दुकानांसाठी परवाना घेण्यासाठी ऑनलाईन अर्ज करता येईल.

या प्रणाली द्वारे वेगवेगळ्या कार्यालयासाठी म्हणजेच जिल्हा अधिकारी कार्यालय,गोदाम  कार्यालय, विभागीय कार्यालय यासाठी स्वतंत्र अर्ज करण्याची सुविधा उपलब्ध होईल. ऑनलाइन प्रणाली असल्याने सर्व लाभार्थींना धान्य घेतल्या नंतर एसएमएस येईल. ट्रक चलन निर्मितीमध्ये  देखील कोणतीही अवघड कार्यपद्धती अवलंबली गेली नसून पटकन चलन काढता येईल.  येत्या महिन्यामध्ये Government Receipt Accounting System(GRAS) प्रणाली बसवली जाणार असून अन्न धान्य विभागासाठी एक खिडकी योजना कार्यान्वयित करण्यात येणार आहे. यामुळे धान्याची चोरी आणि काळाबाजार बंद होऊन योग्य आणि गरजू व्यक्तींपर्यंत धान्य पोहचेल. असे ही मंत्री बापट म्हणाले.

क्रेडाई पदाधिकारी आणि सभासद यांचा  दिल्ली अभ्यास दौरा संपन्न

पुणे ता. १४:- बांधकाम क्षेत्रातील अद्यावत तंत्रज्ञान व वस्तुमान संकल्पनात्मक गृहनिर्माण व परवडणारी घरे यांचा प्रत्यक्ष अभ्यास करण्याच्या उद्देशाने, क्रेडाई महाराष्ट्राच्या सभासदांचा दिल्ली येथे अभ्यास दौरा संपन्न झाला. राज्यातील १९ शहरामधील एकूण १६१ सभासदांनी यात सहभाग घेतला होता.

याविषयी क्रेडाई महाराष्ट्रचे अध्यक्ष शांतीलाल कटारिया म्हणाले की, या भेटीदरम्यान आशियाना ग्रुपचा खास ज्येष्ठ नागरिकांकरिता तयार करण्यात आलेल्या कन्फर्ट होम्स या प्रकल्पास क्रेडाईच्या सभासदांनी भेट दिली. याबरोबरच वस्तुमान संकल्पनात्मक गृहनिर्माण प्रकल्पाविषयी जाणून घेण्यासाठी भारत सिटी होम व प्री हॅब फॅक्टरी या प्रकल्पासोबतच परवडणारी घरांच्या माहितीसाठी सिग्नेचर ग्लोबल यांच्या बांधकाम प्रकल्पाला भेट देऊन तेथील तंत्रज्ञानाची व कामाची माहिती घेतली.

ते पुढे म्हणाले की, एखादी संकल्पना साकारताना प्राथमिक पातळीपासून कसे काम करावे याचा प्रत्यक्ष अनुभव घेण्याची संधी या निमित्ताने क्रेडाई सदस्यांना मिळाली. प्रकल्पाचे नियोजन करताना सुपरवायझरचा सहभाग,संपूर्ण कर्मचाऱ्यांची एकत्रित काम करण्याची पद्धत, याचा प्रकल्पावर व पर्यायाने बांधकाम क्षेत्रावर होणारा सकारात्मक  परिणाम यांसारख्या बारकाव्यांचाही सदस्यांना अभ्यास करता आला. एटीएस यांच्या बांधकाम प्रकल्पाला दिलेल्या भेटी दरम्यान बांधकाम क्षेत्रातील अद्यावत तंत्रज्ञानाची सखोल माहिती घेता आली.

सिग्नेचर ग्लोबल यांच्या बांधकाम प्रकल्पाला भेट दिल्यावर परवडणाऱ्या घरांच्या निर्मितीविषयी सदस्यांना मायवन या नवीन तंत्रज्ञानाचा उपयोग करून घेता येईल.  या तंत्रज्ञानाचा द्वितीय व तृतीय श्रेणीतील शहरातील प्रकल्पांना याचा फायदा होईल. दिल्लीमध्ये बांधकाम क्षेत्राला पुरविल्या जाणाऱ्या  सरकारी पायाभूत सुविधांचा सकारात्मक परिणाम येथील बांधकाम विश्वावर झालेला दिसून आला. तसेच येथील विकसक निवासी कल्याणकारी संस्थेच्या माध्यमातून तसेच विकासकांकडून प्रकल्पांची देखभाल व्यावसायिकरित्या वर्षानुवर्षे केली जाते. त्यामुळेच २५ ते ३० वर्षे जुन्या झालेल्या इमारतीसुद्धा अगदी नव्यासारख्या दिसतात, असेही कटारिया यांनी सांगितले.

यावेळी आशियाना समूहाचे अध्यक्ष विशाल गुप्ता, एटीएसचे अध्यक्ष गीतांबर आनंद, भारत प्री हॅबचे अध्यक्ष एस पी सिंग, सिग्नेचर ग्लोबलचे अध्यक्ष प्रदीप अगरवाल यांना भेटून त्यांच्याशी चर्चा करण्याची संधी क्रेडाईच्या सदस्यांना मिळाली. त्यांनी दिलेल्या माहितीचा सभासदांना त्यांचे पुढील प्रकल्प राबविताना भविष्यात फायदा होईल, असा विश्वासही कटारिया यांनी व्यक्त केला.

      प्रस्थानपूर्व विद्यार्थी पालक मेळावा पुण्यात संपन्न

 पुणे : ‘ए. के. एज्युकेशनल कन्सल्टंट्स’च्या (एकेईसी) विद्यार्थ्यांची रशियात एमबीबीएस शिक्षणासाठी जाणारी बॅच येथील अरोरा टॉवर्समध्ये नुकत्याच झालेल्या प्रस्थानपूर्व विद्यार्थी पालक मेळाव्यासाठी एकत्र आली होती. संस्थेच्या विद्यार्थ्यांच्या बॅचेस ‘निझ्नी नोव्हगोरोड स्टेट मेडिकल ॲकॅडमी’ व ‘कझान स्टेट मेडिकल युनिव्हर्सिटी’ येथे वैद्यकीय शिक्षणासाठी रवाना होत आहेत. कार्यक्रमात डॉ. अमित कामले व पोर्णिमा कामले यांनी विद्यार्थी व पालकांचे स्वागत केले. मेळाव्याची सुरवात दीपप्रज्ज्वलनाने झाली व पाठोपाठ विद्यापीठांचे सादरीकरण झाले. कार्यक्रमाचे प्रमुख वैशिष्ट्य म्हणजे ‘हिप्पोक्रॅटिक ऑथ’ ज्यामध्ये विद्यार्थ्यांनी उत्तम व महान डॉक्टर्स बनण्याची प्रतिज्ञा केली. ‘एकेईसी’चे संचालक डॉ. अमित कामले यांनी पालक व विद्यार्थ्यांना संबोधित केले आणि प्रवासाचे कानमंत्र, शहरातील सुरक्षा व विद्यापीठाचा परिसर, नोंदणी व व्हिसाचे नियम, अभ्यासक्रम, परीक्षा, सुट्या, पालक व विद्यार्थ्यांची वर्तणूक व जबाबदारी आदी पैलूंवर मार्गदर्शन केले. “एकेईसीच्या सर्व विद्यार्थ्यांनी भारताचे रशियातील उत्तम राजदूत बनावे,” असे आवाहन डॉ. कामले यांनी केले. भाषणानंतर त्यांनी पालक व विद्यार्थ्यांच्या शंकांना उत्तरे देण्यासाठी संवाद साधला.

 मुंबईची आकांक्षा कोकरे म्हणाली, “मी माझी बारावीची परीक्षा रामनिवास रुईया कनिष्ठ महाविद्यालयातून ६०.६२ टक्के गुणांनी उत्तीर्ण झाले. ‘ए. के. एज्युकेशनल कन्सल्टंट्स’ आणि त्यांच्या चांगल्या कामाविषयी मी जाणून होते. त्यामुळे मी संस्थेशी व डॉ. कामले सरांशी संपर्क साधला. त्यांच्या संघाने मला व माझ्या कुटूंबियांना योग्य मार्गदर्शन केले. मी आता ‘निझ्नी नोव्हगोरॉड स्टेट मेडिकल ॲकॅडमी’मध्ये शिक्षण घेणार आहे. भवितव्याबाबत मी खूप उत्सुक असून या प्रस्थानपूर्व मेळाव्याला उपस्थित राहताना मला खूप आनंद झाला. हा मेळावा विद्यार्थी व पालकांचे शंकासमाधान करण्यासाठी आणि सर्वांत महत्त्वाचे म्हणजे परस्परांशी संवाद साधण्यासाठी मदत करणारा आहे.”

 साताऱ्याचा आशुतोष कातवटे म्हणाला, “ मी माझी एनईईटी परीक्षा यंदा उत्तीर्ण झालो, पण तरीही मी ‘निझ्नी नोव्हगोरॉड स्टेट मेडिकल ॲकॅडमी’मध्ये शिकण्याचा निर्णय घेतला. तेथे मी अधिक प्रगत अनुभव घेईन, जो मला माझी उद्दिष्ट्ये साध्य करण्यासाठी साह्यभूत ठरेल.”

 पुण्याचा विश्वास अरुडे म्हणाला, “मी बारावीला ८१.५४ टक्के गुण मिळवले असून माझी ‘कझान स्टेट मेडिकल युनिव्हर्सिटी’मध्ये शिक्षणासाठी निवड झाली आहे. मी माझे शिक्षण उत्तम गुणांनी पूर्ण करेन आणि ‘एमसीआय’ची चाचणी पहिल्या प्रयत्नात पूर्ण करेन, याची खात्री आहे.” 

 पुण्याचा रोहन वाळुंज म्हणाला, “मी वर्ष २०१४ मध्ये बारावीत ७०.४६ टक्के गुण मिळवले. मी भारतात प्रवेश घेण्याचा प्रयत्न करत होतो, परंतु मला डोनेशन परवडत नव्हते. डॉ. कामले यांनी प्रेरणा देऊन माझे नीतिधैर्य उंचावले. मी आता ‘कझान स्टेट मेडिकल युनिव्हर्सिटी’मध्ये शिक्षण घेणार असून त्याचा खूप आनंद झाला आहे.”

 भुसावळच्या पूजा चौधरी या विद्यार्थिनीची आई सौ. मीनाक्षी चौधरी म्हणाल्या, “मी ग्रामीण पार्श्वभूमीतून आले आहे. आपल्या मुलीला रशियामध्ये शिक्षण द्यावे, अशी आमची कधीही योजना नव्हती, पण डॉ. कामले यांची भेट घेऊन मला खूप आनंद झाला. केवळ मीच नव्हे, तर भारतभरातील लाखो पालकांचा त्यांच्यावर विश्वास आहे. माझी मुलगी सुरक्षित हातांत आहे, इतकेच मी म्हणून शकते.”

 वसईच्या निनाद धुरी या विद्यार्थ्याची आई सौ. प्रियांका धुरी म्हणाल्या, “माझा मुलगा ‘निझ्नी नोव्हगोरॉड स्टेट मेडिकल ॲकॅडमी’मधून यंदा पदवीधर होईल. ही अत्यंत नामवंत व शिस्तशीर ॲकॅडमी असून तेथे भारतीय विद्यार्थ्यांना इंग्रजी माध्यमातून प्रशिक्षण दिले जाते. चालू वर्षी प्रस्थान करणाऱ्या विद्यार्थ्यांना माझ्या शुभेच्छा.”