णे :

गांधी जयंती (दिनांक 2 ऑक्टोबर) हा दिवस ‘जागतिक अहिंसा दिन’ म्हणून पाळला जातो. या निमित्ताने ‘महाराष्ट्र गांधी स्मारक निधी’ आणि ‘युवक क्रांती दल’ यांच्या संयुक्तपणे आज  सकाळी  ‘शांती मार्च’चे आयोजन करण्यात आले होते.

सेनापती बापट पुतळा, अलका चौक, सीटी पोस्ट अशा मार्गे ​​शनिवार वाडा येथे शांती मार्च चा समारोप झाला. शनिवार वाडा येथे ‘थाळीनाद’ करण्यात आला. जाहेदभाई, चित्रलेखा जेम्स् हे धर्मगुरू शांती मार्च मध्ये सहभागी झाले होते. संदीप बर्वे, अप्पा अनारसे, श्रीपाद ललवाणी, मयुरी शिंदे, यल्लपा धोत्रे, सचिन पांडोळे, अजय हाप्पे, अतूल पोटफोडे, जांभुवंत मनोहर आदी कार्यकर्त्यांनी शांतीमार्चचे संयोजन केले. माहेर संस्थेचे सदस्य, ‘कोपरे गाव’ चे ग्रामस्थ, मोहोळ विद्यालयाचे विद्यार्थी उपस्थित होते.

‘युध्द नको बुद्ध हवा’, ‘हम सब एक है’  अशा घोषणा देण्यात आल्या.प्रसंगी बोलताना संदीप बर्वे म्हणाले, ‘भारतीय राज्य घटनेवर निष्ठा असणार्‍या सर्व नागरिकांनी एकत्र येऊन दंगलमुक्त समाजासाठी रस्त्यावर उतरले पाहिजे. यासाठी हा ‘शांती मार्च’ आयोजित करण्यात आला होता. पुणे शहर दंगलमुक्त राखण्याचा आमचा संकल्प व ठाम निर्धार आहे. समाजात अमन सर्वांत महत्त्वाचे असते. ‘ चित्रलेखा जेम्स म्हणाल्या, ‘हिंसामुक्त समाज हा प्रत्येक नागरिकाला अपेक्षित आहे. परंतु दुर्देवाने समाजातील काही घटकांच्या अविचारी कृत्यांमधून समाजातील शांतता ढळते. अशावेळी महात्मा गांधीचे विचार समाजात रुजण्याची आवश्यकता लक्षात येते. त्या दृष्टीने महात्मा गांधींच्या विचारांचे स्मरण व्हावे म्हणून 2 ऑक्टोबर राष्ट्रपिता महात्मा गांधी यांचा जन्मदिन. हा दिवस जगभर ‘जागतिक अहिंसा दिन’ म्हणून साजरा केला जातो. धर्म, जात, रंग, भाषा आणि अनेक कारणांसाठी भिन्न असणारे आपण भारतीय म्हणून एक आहोत. शेकडो वर्षांपासून एकोप्याने राहण्याची आपली समृद्ध परंपरा आहे.’

‘गांधी जयंती व जागतिक अहिंसा दिनाच्या निमित्ताने दंगलमुक्त, हिंसामुक्त समाजाच्या निर्मितीचा सामूहिक संकल्प करण्यासाठी या शांती मार्च चे आयोजन करण्यात येते’​.

पुणे :- गोयल गंगा फौंडेशनच्या वतीने गांधी जयंतीनिमित्त रक्तदान शिबीर आणि ज्येष्ठ नागरिकांसाठी मोफत आरोग्य तपासणी शिबिराचे आज आयोजन करण्यात आले.  गोयल गंगा इंटनैशनल स्कुलमध्ये आज सकाळी ८ पासूनच नागरिकांचा प्रचंड प्रतिसाद मिळाला. यावेळी गोयल गंगा फौंडेशनच्या विश्वस्त गीता गोयल, जयप्रकाश गोयल उपस्थित होते.

याशिवाय गोयल गंगा फौंडेशनच्या विश्वस्त गीता गोयल यांच्या हस्ते कोंढव्यातील डॉ. बांदोवाल्ला सरकार कुष्ठरोगाचे हॉस्पिटल, सिंहगड इन्स्टिटूट या ठिकाणी मोफत औषधवाटप करण्यात आले होते.

यावेळी त्या म्हणाल्या कि समाजासाठी  ‘रक्तदान हेच श्रेष्ठ दान’ आहे. रक्‍तदान करा, हे जीवनदान देण्‍यासाठी आवश्‍यक आहे. समाजात रक्‍तदानाविषयी असणारे गैरसमज दूर करुन जास्‍तीत जास्‍त लोकांमध्‍ये जनजागृती करुन रक्‍तदान वाढवणे ही आजच्‍या काळाची गरज आहे. आजच्‍या धकाधकीच्‍या युगात वाढते औद्योगिकरण व त्‍यांच्‍याशी संबंधित शारीरिक व्याधी वाढत आहेत त्यामुळेच वेळीच याला प्रतिबंध घातला गेला पाहिजे. यासाठी आरोग्य तपासणी अत्यंत आवश्यक आहे.

कोणत्याही गरजू व्यक्तीला औषधांच्या कमतरतेमुळे आपला जीव गमवावा लागू नये यासाठी जास्तीत जास्त समाजसेवी संस्थांनी पुढे येण्याची गरज असल्याची भावना देखील जयप्रकाश गोयल यांनी मांडली.

पुणे ः‘प्रथम डाव्या विचारसरणीचे असणारे मजरूह सुलतानपुरी नंतर काळानुसार बदलत गेल्यानेच प्रथितयश गीतकारांमध्ये सर्वाधिक लाँग इनिंग पूर्ण करणारे गीतकार म्हणून शेवटपर्यंत लिहिते राहिले’, असे मत प्राचार्य व संगीतकार कमलाकर परचुरे यांनी व्यक्त केले.

‘रसिक मित्र मंडळा’च्या वतीने आयोजित केलेल्या एक कवी -एक भाषा कार्यक्रमात ‘वारी’ प्रसिद्ध शायर व गीतकार मजरूह सुलतानपुरी यांच्या विषयी परचुरे बोलत होते. नौशाद शकील बदायुनी, बेगम अख्तर तसेच मजरूह आदींशी परचुरे यांचे कौटुंबिक संबंध होते. त्यामुळेच परचुरे यांनी त्यांच्या विषयीच्या अनेक संस्मरणीय आठवणींना उजाळा दिला. यावेळी अध्यक्षस्थानी अनिस चिश्ती, मंडळाचे संस्थापक सुरेशचंद्र सुरतवाला व गझलकार प्रदीप निफाडकर उपस्थित होते. हा कार्यक्रम पुणे श्रमिक पत्रकार संघ, गांजवे चौक येथे झाला.

मजरूह यांचे खरे नाव असरार अलद्रसन खान असे होते मजरूह म्हणजे घायाळ, जखमी, लहानपणी लोक त्यांना मजरूह नावाने संबोधित असत. त्यामुळेच चित्रपट गीत लेखनासाठी त्यांनी स्वतःचे नाव मजरूह असे ठेवून जन्म ठिकाण सुलतानपूर हे आडनाव घेतले, अशी माहिती परचुरे यांनी दिली.

1942 च्या शहाजहाँ या नौशाद यांच्या बरोबरच्या चित्रपटांपासून अगदी अलीकडच्या जतीन-ललित, आनंद मिलिंद पर्यंत मजरूह यांनी गीत- लेखन केले. साधी सोपी, हलकी फुलकी भाषा वापरल्याने मजरूह यांची गीते लोकप्रिय झाली. सुमारे 300 चित्रपटांमधून त्यांनी 3000 गाणी लिहिली. त्यांच्या या लोकप्रिय कारकीर्दीसाठी त्यांना प्रतिष्ठेचा दादासाहेब फाळके पुरस्कारही मिळाला.

मजरूह हे प्रथम डाव्या विचारसरणीचे होते. त्यांनी प्रस्थापित व्यवस्थेविरुद्ध लेखन केल्याने त्यांना दोन वर्षांचा तुरूंगवास ही झाला होता. त्यावेळी त्यांच्या कुटुंबियांचे खूप आर्थिक हाल झाले होते. तेव्हा राज कपूर यांनी ‘दुनिया बनानेवाले’ या गीताचे त्यांना 1000 रूपये मानधन त्यांच्या कुटुंबियांना दिले. कारण मजरूह यांनी त्या व्यतिरिक्तची मदतही नाकारली, असेही परचुरे म्हणाले. परचुरे यांनी यावेळी मजरूह यांची ‘गम दिये मुस्तकिल’, ‘जब दिल ही टूट गया’ आदी गीतांचे गायन ही केले.

अनिस चिश्ती म्हणाले, ‘चित्रपट गीतकार म्हणून त्यांच्याकडे इतके काम होते की , त्या व्यस्ततेमुळे त्यांचे बाकीचे लेखन खूपच कमी झाले. पण जे लिहिले ते दर्जेदार लिहिले. मजरूह, शकील, साहीर सारख्या आभिजात शायरांमुळे हिंदी चित्रपट पडले तरी त्यातील गाणी लोकप्रिय होत असत. त्याचे श्रेय या गीतकारांनाच जाते,’ असे मत ही अनीस चिश्ती यांनी व्यक्त केले.

‘साहित्य अकादमी’ने सन्मानित साहित्यिक व उर्दू कवी नझीर फतेपुरी व ‘आझम एज्युकेशन ट्रस्ट’चे माजी अध्यक्ष मुनव्वर पीरभॉय यांचा यावेळी विशेष सत्कार करण्यात आला.

कार्यक्रमाचे प्रास्ताविक सुरेशचंद्र सुरतवाला यांनी केले तर सूत्रसंचालन प्रदीप निफाडकर यांनी केले.

पुणे, ता. २ – डेक्कन एज्युकेशन सोसायटीच्या डीईएस प्री-प्रायमरी स्कूलच्या मातृमंदिरमध्ये ज्येष्ठ नागरिक दिनानिमित्त आजी-आजोबांच्या मेळाव्याचे आयोजन करण्यात आले होते. विद्यार्थी विशेष उत्साहात आजी-आजोबांना शाळेत घेऊन आले. शाळा, शाळेचा परिसर, मैदान, ग‘ंथालय, शिक्षक, शिक्षकेतर कर्मचारी यांची ओळख करून देत होते.
अमृता भोईर, कल्याणी कदम यांनी देवीस्तुती व रामायणातील सिताहरण या प्रसंगांवर नृत्यकथा सादर केल्या. अनिता गोडबोले, कल्पना बालाजी यांनी रामायणातील काही प्रसंग गीतरामायणातील गीतांच्या तालावर नृत्याद्वारे सादर केली. नवरात्रीनिमित्त झाशीची राणी लक्ष्मीबाईचा प्रेरणादायी जीवनपट नृत्याद्वारे उलगडून दाखविला.
एकत्र कुटुंब पध्दती, लहान मुलांवर आजी-आजोबांकडून होणारे संस्कार, नात्यातील जिव्हाळा याची माहिती शिक्षिका प्रियांका बालगुडे यांनी सांगितली. आजी-आजोबांनीही नातवंडांसाठी काही कार्यक‘म सादर केले. संचालिका माधुरी बर्वे यांनी स्वागत केले. मनाली कुलकर्णी यांनी आभार प्रदर्शन केले.

पुणे,:  संपूर्ण देशभरात राबविण्यात येते असलेल्या स्वच्छ भारत अभियानातून  स्वच्छतेची क्रांती घडल्या शिवाय राहणार नाही. असा विश्वास जिल्हाचे पालकमंत्री गिरीश बापट  यांनी केला.

महात्मा गांधी जयंती निमित्त  चतु :श्रृंगी मंदिराच्या परिसरात आयोजित करण्यात आलेल्या स्वच्छता अभियाना प्रसंगी पालकमंत्री बोलत होते. भारतीय इतिहासात महात्मा गांधी यांचे मोठे स्थान आहे. गांधीजींनी अंहिसेच्या मार्गाने आंदोलन करुन जगभरात नाव मिळविले. त्यामुळे त्यांना आदरांजली वाहतांना सुमनांने नव्हे तर श्रमदान करुन  श्रध्दांजली वाहणे हे संयुक्तीक ठरेल असे, सांगून ते पुढे म्हणाले, स्वच्छतेची सुरुवात स्वत: पासून करुन ती सवय म्हणून रुजायला पाहिजे. सर्वांनी संकल्प करायला हवा की, आपला देश स्वच्छ करणे ही आपली जबाबदारी आहे. सरकार तसेच महापालिका स्वच्छतेच्याबाबतीत गंभीर आहे. प्रत्येकाने स्वच्छतेचे महत्व जाणणे गरजेचे आहे. स्वच्छता हा एक संस्कार आहे.

यावेळी पालक मंत्र्यांनी विद्यार्थ्यांसमवेत मंदिराच्या परिसराची साफ सफाई केली. खुद्द मंत्री महोदय हातात झाडू घेवून मंत्री पदाचा कोणताही अभिनिवेश न बाळगता आपल्या बरोबरीने श्रमदान करत असल्याचे पाहून विद्यार्थ्यांचाही उत्साह वाढला होता. पालकमंत्र्या समवेत ‘मी अस्वच्छता करणार नाही – आणि करु देणार नाही ‘अशा घोषणा विद्यार्थ्यांनी यावेळी दिल्या.

यावेळी   चतु :श्रृंगी मंदिर ट्रस्टचे अध्यक्ष डॉ. गंगाधर अनगळ, भारतीय जैन संघटनेचे शांतीलाल मुथा,सरला मुथा,प्रफुल्ल पारेख आणि शिक्षक तसेच विद्यार्थी मोठया संख्यने उपस्थित होते.

खासदार काकडेंतर्फे ‘स्वच्छ भारत अभियानांतर्गत’ स्वच्छता मोहिमेचे आयोजन!

पुणे रेल्वे स्टेशन ते मालधक्का चौक व ससूनमध्ये केली स्वच्छता

राज्यमंत्री कांबळे, महापौर टिळक, खासदार शिरोळे, आमदार कुलकर्णी व काळे, 40 नगरसेवक व हजारो नागरिकांची उपस्थिती

पुणे, दि. 2 ऑक्टोबर :महापालिकेतील पदाधिकारी आणि खासदार काकडे यांचे काही तरी आहे वाकडे .. असे वाटण्याजोगी परिस्थिती या पूर्वी दिसून आलेली आहे . पण शेवटी दसऱ्याचा नाही तर महात्मा गांधी जयंतीचा च करिष्मा दिसला . खासदार संजय काकडे यांच्या समवेत चक्क महापौर ,सभागृहनेते आणि खासदार शिरोळे ,यांच्यासह आमदार मेधा कुलकर्णी,विजय काळे, आणि राज्यमंत्री कांबळे व सुमारे ४० नगरसेवक स्वच्छता अभियानाच्या निमित्ताने एकत्र दिसले . ‘स्वच्छ भारत, सुंदर भारत’चा नारा देत भाजपचे सहयोगी सदस्य व खासदार संजय काकडे यांनी आयोजित केलेल्या स्वच्छता मोहिमेला उदंड प्रतिसाद मिळाला. सामाजिक न्याय राज्यमंत्री दिलीप कांबळे यांच्यासह महापौर मुक्ता टिळक, खासदार अनिल शिरोळे, आमदार मेधा कुलकर्णी व विजय काळे यांच्यासह 40 नगरसेवक व हजारो कार्यकर्त्यांनी आज पुणे रेल्वे स्टेशन ते मालधक्का हा रस्ता व ससून रुग्णालयाच्या परिसरात स्वच्छता केली.

पंतप्रधान नरेंद्र मोदी यांच्या महत्त्वाकांक्षी स्वच्छ भारत अभियानानिमित्त आज महात्मा गांधी यांच्या जयंती दिनी पुणे रेल्वे स्टेशन येथील महात्मा गांधी यांच्या पुतळ्याला खासदार संजय काकडे व खासदार अनिल शिरोळे यांनी हार घातला व स्वच्छता मोहिमेला प्रारंभ झाला. रेल्वे स्टेशन ते मालधक्का चौकापर्यंतचा रस्ता आणि त्यानंतर ससून रुग्णालयातील परिसराची स्वच्छता यावेळी करण्यात आली. खासदार काकडे, खासदार शिरोळे, महापौर टिळक, आमदार कुलकर्णी, आमदार काळे आणि इतर मान्यवरांनी प्रत्यक्षात हातात झाडू घेऊन परिसरातील कचरा गोळा केला. राज्यमंत्री दिलीप कांबळे, सभागृह नेते श्रीनाथ भिमाले, 40 नगरसेवक व सुमारे 3 हजार नागरिकांनी स्वच्छता मोहिमेत सहभाग घेतला.

पंतप्रधान नरेंद्र मोदी यांनी स्वच्छ भारताचे स्वप्न पाहिले आहे. स्वच्छता ही आरोग्याशी निगडीत आहे. आपला परिसर स्वच्छ असेल तर आपले आरोग्यही सुदृढ राहणार आहे. म्हणून देश स्वच्छ झाला तर, संपूर्ण देशाचे आरोग्य सुदृढ होईल. पंतप्रधान मोदी यांचे स्वच्छ भारताचे स्वप्न वास्तवात आणण्यासाठी सारा देश एकवटला आहे. ही आनंदाची बाब आहे, असे सांगून पुण्याचा कचरा प्रश्नही लवकरच सुटेल, असा विश्वास खासदार संजय काकडे यांनी व्यक्त केला.

खासदार संजय काकडे यांनी स्वच्छता अभियानाचा उपक्रम राबविला आणि त्याला हजारो नागरिकांनी सहभागी होऊन पाठिंबा दिला. हा अत्यंत चांगला उपक्रम असून पुणे शहर हे स्वच्छतेच्या बाबतीत अग्रभागी राहील व पुण्याचा कचरा प्रश्नही सुटेल, असे महापौर मुक्ता टिळक यांनी सांगितले.

स्वच्छ भारत झाला तर, सुदृढ भारत बनेल. हे पंतप्रधान मोदी यांचे स्वप्न वास्तवात येईल. खासदार काकडे यांनी आयोजिलेल्या उपक्रमाला हजारोंच्या संख्येने लोक आले. त्यामुळे स्वच्छ भारताचे स्वप्न नक्कीच वास्तवात येईल असे वाटते, असे खासदार अनिल शिरोळे म्हणाले.

स्वच्छ भारत अभियानात नगरसेवक राजेंद्र शिळीमकर, प्रकाश ढोरे, शंकर पवार, बापु कर्णे गुरुजी, राहुल भंडारे, दिनेश धाडवे, धीरज घाटे, विष्णू हरिहर, मनीषा लडकत, मंगला मंत्री, कालिंदा पुंडे, राजाभाऊ लायगुडे, अमोल बालवडकर, किरण दगडे पाटील, विजय शेवाळे, दिलीप वेडेपाटील, प्रसन्न जगताप, जोत्स्ना एकबोटे, सरस्वती शेडगे, तुषार पाटील, हरिभाऊ चरवड, राजश्री काळे, नीता दांगट, राजश्री नवले, परशुराम वाडेकर, भरत वैरागे, हरिश परदेशी, ज्योती कळमकर, उमेश गायकवाड, अशोक लोखंडे, सुशील मेंगडे, चंद्रकांत चौधरी, रायबा भोसले, संतोष आरडे, अजय सावंत, धनराज घोगरे, सुनील कांबळे आदी सहभागी झाले होते.