पुणे ः संविधान सन्मान समितीच्यावतीने संविधान दिनाचे औचित्य साधून रविवारी (ता.26) काढण्यात येणाऱ्या भव्यदिव्य स्वरुपाच्या “संविधान सन्मान रॅली’ची तयारी अंतिम टप्प्यात पोहोचली आहे. मार्गांची रचना, स्वच्छता, रॅलीत सहभागी होणाऱ्यांसाठी सोई-सुविधा, संविधान रथ, पार्कींगपासून ते रॅलीच्या कार्यक्रमाचे स्वरुप अशा सर्व कामांची माहिती घेऊन समितीच्या पदाधिकाऱ्यांनी शुक्रवारी पाहणी केली.अशी माहिती नगरसेवक अविनाश बागवे यांनी दिली .

संविधान दिनानिमित्त भव्यदिव्य स्वरुपाची संविधान रॅली व्हावी, यासाठी राजकीय, सामाजिक, सांस्कृतिक अशा वेगवेगळ्या क्षेत्रातील नागरीकांनी एकत्रीत येऊन “संविधान सन्मान समिती’ या अराजकीय व्यासपीठाची निर्मिती केली. या समितीमार्फत मागील एक महिन्यापासून संविधान सन्मान समितीच्यावतीने “संविधान सन्मान रॅली’ची तयारी सुरू होती. शुक्रवारी या तयारीची पाहणी समितीच्या पदाधिकाऱ्यांनी केली. रमेश बागवे, महेंद्र कांबळे, बाळासाहेब जानराव, अशोक शिरोळे, रोहिदास गायकवाड आदी सदस्यांनी शुक्रवारी महात्मा फुले वाडा, जिल्हाधिकारी कार्यालयासमोरील डॉ.बाबासाहेब आंबेडकर पुतळ्यासह संविधान सन्मान रॅलीच्या मार्गाची पाहणी केली. स्वच्छता, व्यासपीठाची रचना अशा विविध कामांची पाहणी करण्यात आली.

संविधान सन्मान रॅलीमध्ये जास्तीत जास्त नागरीकांनी सहभागी व्हावे, यासाठी समितीच्या सदस्य अनेक दिवसांपासून रचनात्मक पद्धतीने काम करत आहेत. बैठक, कोपरा सभा, घरोघरी भेटी देऊन या रॅलीमधील सहभाग वाढविण्यासाठी सदस्य प्रयत्नशील आहेत.

…अशी असेल संविधान सन्मान रॅली !

* रॅलीचे कार्यक्रमाचे स्वरुप ः रविवारी सकाळी दहा वाजता महापौर मुक्ता टिळक व लहान मुलांच्या हस्ते महात्मा फुले वाड्यातील सावित्रीबाई फुले व महात्मा फुले यांच्या पुतळ्यास पुष्पहार अर्पण करण्यात येईल. संविधानाच्या उद्देशिकेचे वाचन झाल्यानंतर रॅलीस प्रारंभ होईल. त्याप्रारंभी युवती-महिला, विद्यार्थी, पुरूष व अखेरीस कार्यकर्ते या पद्धतीने रॅलीमध्ये सहभागी होतील. जिल्हाधिकारी कार्यालयासमोरील डॉ.बाबासहेब आंबेडकर पुतळ्यासमोर रॅलीचा समारोप होईल.

* रॅलीचा मार्ग ः महात्मा फुले वाडा येथुन सकाळी दहा वाजता प्रारंभ. नेहरू रस्ता, रामोशी गेट पोलिस चौकी, ए.डी.कॅम्प चौक-संत कबीर चौक, जिल्हा परिषद इमारतीसमोरुन जिल्हाधिकारी कार्यालयासमोरील डॉ.बाबासाहेब आंबेडकर यांच्या पुतळ्यासमोर समारोप.

* पार्कींगची सुविधा ः
दुचाकी वाहने – गंज पेठेतील सावित्रीबाई फुले सांस्कृतिक भवन, रामोशी गेट येथील सावित्रीबाई फुले शाळा, मोहम्मद किडवई शाळा.
चारचाकी वाहने – डॉ.बाबासाहब आंबेडकर हायस्कुल (अहिल्याश्रम), क्वार्टर गेट, नाना पेठ.
——————-
संविधान सन्मान रॅलीची वैशिष्ट्ये

* प्रमुख आकर्षण “संविधान रथ’ ः देशातील सर्वसामान्य नागरीकाला संविधानामुळे बळ मिळाले. म्हणुनच स्वातंत्र्य, समता, बंधुता, न्याय यांसारखी संविधानाची मुलतत्वांची माहिती या रथाद्वारे देण्यात येणार आहे. रथावर राष्ट्रचिन्ह असलेले सिंहाचे चित्र असेल. याबरोबरच संविधानाची उद्देशिकाही असेल. संविधान दिनाची वैशिष्ट्ये सांगणारी चित्रे या रथावर असतील. याबरोबरच तत्कालीन राष्ट्रपती राजेंद्रप्रसाद यांच्याकडे संविधान सुपुर्द करताना डॉ.बाबासाहेब आंबेडकर यांची छायाचित्रांनी हा रथ सजविलेला असणार आहे. तर रथाच्या मध्यभागी तिरंगी ध्वज असेल.

* संविधान रॅलीसाठी नवकोरं गाणं ः “वुई द पिपल ऑफ डेमोक्रेटिक इंडिया’ या शब्दांनी सुरू होणारे नितांत सुंदर गीत खास संविधान सन्मान रॅलीसाठी तयार करण्यात आले आहे. उत्कृष्ट संगीत, गायन व शब्दरचना, अशा वैशिषाट्यांमुळे हे गाणे नागरीकांच्या मोबाईलमध्ये काही दिवसांपासुन वाजु लागले आहे. विशेषतः तरूणांना या गीताने अक्षरशः वेड लावले आहे.

* सर्वधर्मीय धर्मगुरुंचाही सहभाग ः संविधान सन्मान रॅलीमध्ये सर्व धर्मांच्या धर्मगुरूंनीही सहभागी व्हावे, यासाठी समितीने प्रयत्न केला आहे. त्यादृष्टीने शहरातील सर्व धर्मांच्या धर्मगुरूंना समितीने विशेष आमंत्रण दिले आहे. त्यामुळे या रॅलीमध्ये सर्वधर्मीय धर्मगुरूंचा महत्वपुर्ण सहभाग असणार आहे.

* शंभरहुन अधिक बैठका ः संविधान सन्मान रॅलीमध्ये शहरातील सर्व स्तरातील नागरीकांनी उत्स्फुर्तपणे सहभागी व्हावे, यासाठी समितीच्या पदाधिकाऱ्यांनी आत्तापर्यंत शंभरहून अधिक बैठका घेतल्या आहेत. त्यामध्ये शहरातील विविध वस्त्या, सोसायट्यांसह सर्व ठिकाणी बैठका आयोजित करण्यात आल्या होत्या. समितीच्या पदाधिकाऱ्यांनी या बैठकांना उपस्थिती लावुन नागरीकांना मोठ्या संख्येने सहभागी होण्याचे आवाहन केले. याबरोबरच प्रसिद्धीसाठी चाळीस हजार पॉम्पलेटचे वाटप करण्यात आले आहे. शंभरहून अधिक होर्डींग्जसवर जागृती करण्यात आली आहे.

* तीन हजार “मिस्ड कॉल’ ः रॅलीमध्ये सहभागी होणाऱ्या नागरीकांनी आपला सहभाग कळवावा, यासाठी समितीतर्फे 18001206235 हा टोल फ्री क्रमांक देण्यात आला होता. या क्रमांकावर शुक्रवारी सायंकाळपर्यंत तीन हजार जणांनी मिस्ड कॉल दिला होता. त्यामुळे हजारो नागरीक या रॅलीमध्ये सहभागी होण्याची शक्‍यता आहे.

पुणे: महापालिकेच्या पिण्याच्या पाण्याच्या वाहिनीस विदयुत पंप जो़डून पिण्याचे पाणीझटपट मिळवू पाहणाऱ्या नागरिकांना झटका द्यायला गेलेल्या   लष्कर पाणी पुरवठा विभागाच्या पथकाने ३५ विजेच्या मोटारी जप्त तर केल्या ,मात्र आम्हाला पुरेसे व नियमित पाणी दया, नंतरच कारवाई करा, असा महिलांनी आक्रोश केला. संतप्त महिलांनी आक्रोश करीत लष्कर पाणी पुरवठा विभाग कार्यालयावर धडक मोर्चा नेला व अधिका-यांना घेराव घातला. अखेर अधिका-यांनी माघार घेत विदयुत पंप नागरिकांना परत केले.

यावेळी काय म्हणाले नागरिक

– आम्हला नियमित व पुरेशे पाणी दया, नंतरच कारवाई करा.
– विदयुत पंप विकत घेणे व महिन्याला अधिकचे वीज बील आम्ही का भरू ?
– उंच भागात नळाला पाणीच येत नाही.
– विदयुत पंपाने उपसा केला तरच थोडेफार पाणी मिळते.
– 48 टक्के केलेली पाणी कपात करून आमच्यावर अन्याय करू नका.
– पंपाद्वार पाणी उपसा करण्यास नागरिकांची इच्छा नाही, याला महापालिकाचा जबाबदार आहे.
– आम्ही नियमित कर भरतो, हक्काचे पाणी मिळालेच पाहिजे. अन्याय सहन करणार नाही.

लष्कर पाणी पुरवठा विभागाच्या पथकाने गुरुवारी (ता. 23) रात्री धडक मोहिम राबवीत जलवाहिनीला विदयुत पंप लावून पाणी उपसा करणा-या 35 मोटारी जप्त केल्या. त्यानंतर लष्कर पाणी पुरवठा कार्यालयावर महिलांनी थेट मोर्चा काढला. मोर्चा नेल्यानंतर महिलांनी हडपसर प्रभाग समिती अध्यक्ष योगेश ससाणे यांच्याशी संपर्क साधला. कारवाईबाबत त्यांना माहिती दिली. ससाणे थेट लष्कर पाणी पुरवठा कार्यालयात पोहचले. त्यांनी अधिका-यांना धारेवर धरले. ते म्हणाले, हडपसर परिसराला 48 टक्के पाणी पुरवठा कमी होत आहे. उंच भागात नळाला आठ-आठ दिवस पाणी येत नाही. पाण्याची वेळ नियमित नाही. पाण्याला प्रेशर कमी आहे. त्यामुळे नागरिक पिण्याच्या पाण्यासाठी हैराण झाले आहेत. अनेक सोसायटयांना वर्षभर टॅंकरचे पाणी विकत घ्यावे लागते. त्यामुळे सोसायटयांची अर्थव्यवस्था कोलम़डली आहे. नागरिक महापालिकेला प्रामाणिकपणे कर भरतात. मग त्यांना पाणी देण्याची जबाबदारी महापालिकेची आहे. आधी पाणी पुरवठा सुरळीत करा, नंतरच कारवाई करा. अन्यथा कारवाई करायला आलात तर तुमचे काही खर नाही असा दम त्यांनी अधिका-यांना भरला. तसेच कारवाई करायची असेल तर शहरातील अनअधिकृत नळजोड अगोदर तोडा. शहरात अनेक ठिकाणी 24 तास पाणी पुरवठा होतो. हडपसरवासीयांवर अन्याय करू नका, असे कार्यकारी अभियंता संतोष पवार यांना सुनावले.

पुणे – डेक्कन एज्युकेशन सोसायटीच्या अहिल्यादेवी प्रशालेत संविधानदिनानिमित्त मु‘याध्यापिका सुलभा शिंदे यांच्या हस्ते संविधान व डॉ. बाबासाहेब आंबेडकरांच्या प्रतिमेचे पूजन करण्यात आले. घटनेने दिलेल्या अधिकारांबाबत आपण जागरुक असतो, त्याप्रमाणेच कर्तव्याचे पालन करण्यासाठी कटिबध्द होण्याची गरज असल्याचे मत श्रीमती शिंदे यांनी व्यक्त केले.
शिक्षिका सुवर्णा शिंदे यांनी संविधानाचा उद्देश, वैशिष्ट्ये, घटना समितीचे सदस्य, निर्मितीसाठी लागलेला कालावधी याची सविस्तर माहिती दिली. यावेळी विद्यार्थिनींनी संविधानाच्या उद्देशिकेचे वाचन केले. मु‘याध्यापिका सुलभा शिंदे यांच्या मार्गदर्शनाखाली उपशालाप्रमुख दर्शना कोरके, पर्यवेक्षिका अनघा डांगे, स्मिता करंदीकर, सुवर्णा परदेशी, दीपाली पवार, मेघना वनासरे, सिमा हेंद्रे, रोहिणी पानसे, अपर्णा गरुड यांनी संयोजन केले.

पुणे-श्री. संत सावता माळी युवक संघाच्यावतीने राज्यस्तरीय शैक्षणिक क्षेत्रात उल्लेखनीय कार्य केल्याबद्दल विष्णु  राजाराम बनकर  हे ‘संत सावता भूषण पुरस्कार-२०१७ ने सन्मानित करण्यात आले .

या पुरस्कार सोहळ्यास   संत शिरोमणी सावता महाराजांचे वंशज हभप रमेश महाराज वसेकर, अडव्होकेट धनंजय जाधव , श्री. संत सावता माळी युवक संघ महाराष्ट्र राज्याचे  अध्यक्ष सचिन गुलदगड, राज्य सचिव सुनिल गुलदगड आदि मान्यवर उपस्थित होते .

 विष्णु  राजाराम बनकर हे  बजाज ऑटो लि. चाकण, पुणे या जागतिक दर्जाच्या दुचाकी निर्माण करणार्‍या कारखान्यात काम करीत आहे . विविध क्षेत्रात उल्लेखनीय कामगिरी केल्याबद्दल त्यांना  ‘संत सावता माळी युवक संघ, महाराष्ट्र राज्य’ आयोजित ‘संत सावता भूषण पुरस्कार- २०१७’ ने सन्मानित करण्यात आले .

शिक्षण घेत असताना वर्गप्रतिनिधी, कवायत, प्रभातफेरी, स्नेहसंमेलन, पारितोषिक वितरण समारंभ, महापुरुषांच्या जयंती-पुण्यतिथी, गणेशोत्सव, शिक्षकदिन, अभियंता दिन, कामगार दिन, स्वातंत्र्य दिन, प्रजासत्ताक दिन, अंधश्रद्धा निर्मूलन, वृक्षारोपण, ग्रामस्वच्छता अभियान, सर्व शिक्षा मोहीम, निबंध स्पर्धा, वक्तृत्व स्पर्धा, अंताक्षरी, इत्यादी उपक्रमांमध्ये वैयक्तिक व सांघिक कार्ये केलेली आहेत. तसेच  ‘कलागंध’, क्रीडासप्ताह, आनंदमेळावा, हौजी, विज्ञान प्रदर्शन, नियतकालिका प्रकाशन, वसतिगृह स्वच्छता मोहीम, इत्यादी उपक्रम राबविले.नियतकालिकांमध्ये लेख, चारोळ्या, विनोद आदि साहित्य प्रकाशित झाले.

 विष्णु बनकर  याना केटीएम् नॉर्थ अमेरिका या कंपनांचे अध्यक्ष आदरणीय जॉन इरिक बुर्लिसन सर यांचेकडून अमेरिका अभ्यास दौर्‍यासाठी दोन वेळा आमंत्रण असून अपंग तसेच पितृछत्र हरपलेल्या विद्यार्थ्यांना आर्थिक मदतकार्य, महिला मेळावा, वृक्षारोपण, अनाथ आश्रम व वृद्धाश्रमामध्ये फळेवाटप, रक्तदान, नैसर्गिक आपत्ती मदतनिधी, स्वच्छ भारत अभियान, डॉ. नरेंद्र दाभोलकर हत्या निषेध, न्यायहक्कांसाठी संघटन, आंदोलने, मोर्चे, इत्यादि कार्ये केलेली आहेत . विद्यार्थ्यांनी अथक परिश्रम करून सातत्याने ज्ञान घ्यावे यासाठी प्रयत्नशील असतात. शारीरिक व मानसिक ताण-तणावातून मुक्ती व्हावी यासाठी ‘योगा’ तसेच ‘ए.एम्.आय्.ई’ या अभियांत्रिकीच्या पदवीचे ‘विनामूल्य’ मार्गदर्शनकरतात . पर्यावरण रक्षण, व्यायाम व आर्थिक बचत डोळ्यासमोर ठेवून, आजही घाम पुसत सायकलीवर वैयक्तिक व शैक्षणिक कामे करून समाजाला पर्यावरण रक्षणाचा संदेश देतात.

पुणे: श्री सत्य साई लोक सेव ट्रस्ट द्वारे “श्री सत्य साई मानव श्रेष्ठता पुरस्कारा” चा कार्यक्रम सत्य साई ग्राम, मुड्डेनहल्ली , कर्नाटक येथे २३ नोव्हेंबर २०१७ रोजी आयोजित केला गेला. सिस्टर लूसी कुरियन, पुणे यांना “श्री सत्य साई मानव श्रेष्ठता पुरस्कार प्रदान करण्यात आला असून, त्यांना हा पुरस्कार “धर्मांच्या एकजुटी” या श्रेणीकरता देण्यात आला आहे. हा पुरस्कार यांच्या हस्ते देण्यात आला असून यापुर्वी विविध क्षेत्रातील ८ महिलांना हा पुरस्कार बहाल करण्यात आलेला आहे.

सिस्टर लूसी कुरियन यांनी ९१९७ साली “माहेर” ची निर्मीती केली, ज्याचा अर्थ आहे माझ्या आईचे घर असा होतो. ही संस्था पुणे, महाराष्ट्र येथे कार्यरत असून कोणत्याही जाती, धर्म किंवा सांप्रदायाच्या निराश्रित, महिलांकरता कार्य करते. या केंद्रा द्वारे काही सेवा देखील प्रदान केल्या जातात ज्या जागरूकता अभियानापासून कुबड्यांचे वाटप, बालवाडी (शिशु मंदिर), शिकवण्या, कार्यशाळा, आणि स्वयं-चलित समूह राबविले जातात ज्यामुळे येथील महिलांना एक स्वतंत्र आणि मानाचे आयुष्य जगता येऊ शकेल. गेल्या पंधरावर्षात, माहेर द्वारे १५,००० पेक्षा अधिक महिला आणि मुलांना एक सामान्य आयुष्य जगण्याकरता मदत केली गेलेली असून सध्य स्थितीमध्ये ८६० पेक्षा अधिक रस्त्यावरील मुले आणि ३२० निराश्रित महिलांना छप्पर उपलब्ध करून देण्यात आलेले आहे.

टॅफ़ेच्या अध्यक्षा आणि सीईओ, असलेल्या कु. मल्लिका श्रीनिवासन, या परितोषिकाच्या आयोजन समितीच्या बाजूने बोलताना म्हणाल्या,” या आदर्श महिला जगाकरता आणि येथील महिलांकरता एक शक्तीशाली असा आशेचा किरण आहेत. प्रेरणास्थान, अनुकरणास पात्र, हिमतीचे उदाहरण, निशष्ठा आणि त्यागाचे प्रतिक असून त्यांनी आपापल्या क्षेत्रात श्रेष्ठता तर सिद्ध केलीच आहे पण त्याही पलिकडे जाऊन; लाखो लोकांना आपल्या अथक आणि ध्येय निष्ठ प्रयत्नांनी समाजाचे रूपांतरण, जगाला समृद्ध करून आशेचा, आनंदाचा एक किरण दर्शविलेला आहे. यांच्यातील प्रत्येकाचा मार्ग हा एक आगळा वेगळा आणि कल्पक असा आहे, ज्यामधून आपल्या सगळ्यांना कालात्मकता, दया, प्रेम आणि कष्टाने सगळ्यांकरता एका चांगल्या जगाची निर्मीती होऊ शकते हेच शिकायला मिळते.”

पारितोषिके मिळणाऱ्या व्यक्ती यांनी सामाजिक संदर्भ असलेल्या क्षेत्राकरता आपले आयुष्य वेचले असून आपले संपूर्ण कार्य हे जीवन बदलून टाकण्याच्या आपल्या ध्येयाकरता समर्पित केले आहे. श्री सत्य साई जीवन श्रेष्ठता पुरस्कार हा सात क्षेत्रातील विविध प्रसिद्ध व्यक्तींना देण्यात येतो: शिक्षण, पर्यावरण, आरोग्य, संगीत आणि कला, धर्मांची एकजुट, महिला व बाल कल्याण आणि खेळ. हे पारितोषिक प्रदान करण्याकरता नावाजलेल्या पंच समितीची नेमणूक केली जाते ज्यात उपस्थित असलेले सदस्य काळजीपुर्व पारितोषिकाच्या वर्गीकरणाचे मूल्यांकन करतात आणि नामांकित व्यक्तींची पारख करतात.

अशा प्रकारचे अलौकिक काम केल्याबद्दल सन्मानित केलेल्या इतर व्यक्तींची नावे:

§  डॉ. सकीना यकुबी, अफ़गाणिस्तान, शिक्षण क्षेत्र

§  कु. लोर्ना रुट्टो , केनिया, पर्यावरण

§  डॉ. एम. शारदा मेनन, भारत, आरोग्य

§  प्रा. प्रेमा पांडुरंग, भारत, संगीत आणि कला

§  कु. लेयम्हा रॉबर्टा ग्बोवी, लिबेरिया, धर्मांची एकजुट

§  कु. कौसल्या पेरियासामी, भारत, महिला आणि बाल कल्याण

§  कु. अनुराधा कोईराला, नेपाळ, महिला व बाल कल्याण

§  कु. मीनाक्षी राघवन, भारत, खेळ