पुणे, दि. 7: शासनाकडून देण्यात येणाऱ्या सेवा नागरिकांना जलदगतीने उपलब्ध करुन नागरिकांचे जीवन अधिक सुखकर बनविण्यासाठी तसेच उपलब्ध असलेल्या ऑनलाईन सेवांमध्ये वाढ करून विभागाच्या सेवा ऑनलाईन पद्धतीने नागरिकांपर्यंत पोहोचवण्याचे शासनाचे धोरण आहे, असे प्रतिपादन महाराष्ट्र माहिती तंत्रज्ञान महामंडळाचे व्यवस्थापकीय संचालक संजय काटकर यांनी केले

जिल्हाधिकारी कार्यालयात मंगळवारी (6 मे) आयोजित जिल्ह्यातील आपले सरकार सेवा केंद्र चालकांच्या बैठकीत ते बोलत होते. यावेळी अप्पर जिल्हाधिकारी पुणे सुहास मापारी, हवेलीचे तहसीलदार किरण सुरवसे, पिंपरी चिंचवड तहसीलदार जयराज देशमुख, सर्वसाधारण शाखेचे तहसीलदार श्वेता पवार , नायब तहसीलदार सुयोग बेंद्रे, माहिती तंत्रज्ञान कक्षातील अधिकारी व कर्मचारी उपस्थित होते.

श्री.काटकर म्हणाले, आपले सरकार सेवा केंद्र चालकांना नागरिकांना सौजन्याची वागणूक द्यावी. इयत्ता दहावी व बारावीच्या निकालानंतर विद्यार्थ्यांना शैक्षणिक प्रवेशाकरीता लागणारे दाखले विहित काल मर्यादेत उपलब्ध करून द्यावे. आपले सरकार सेवा केंद्र चालकांकडून संकेतस्थळावर कामकाज करतांना येणाऱ्या तांत्रिक अडचणींबाबतची माहिती घेतली. त्यावर संबंधितांनी उचित कार्यवाही करावी. क्षमता बांधणीसाठी शासकीय अधिकारी, कर्मचारी व आपले सरकार सेवा केंद्र चालक यांना विशेष प्रशिक्षण देण्याचा प्रयत्न आहे.

नागरिकांना सर्व प्रकारच्या सेवा एकाच एकाच ठिकाणाहून मिळण्याकरीता महानगरपालिकांच्यावतीने देण्यात येणाऱ्या सेवांचासुद्धा समावेश आपले सरकार सेवा केंद्र चालक यांच्या लॉगिनला करण्यात येईल, असेही श्री. काटकर म्हणाले.

श्री. मापारी यांनी जिल्हा प्रशासनामार्फत नागरिकांसाठी सुरू करण्यात आलेल्या ‘सेवादूत’ उपक्रमाबाबत माहिती दिली. जिल्हा प्रशासनाकडून नागरिकांना अधिकाधिक सेवा विहित कालमर्यादेमध्ये घरपोच देण्याबाबतचे प्रशासनाचे नियोजन असल्याचे त्यांनी यावेळी सांगितले.

पुणे, दि. ७ : केंद्र शासनाच्या निर्देशानुसार जिल्ह्यात विधानभवन, पुणे महानगरपालिका, पिंपरी चिंचवड महानगरपालिका, वनाज औद्योगिक परिसर, तळेगाव, मुळशी या सहा ठिकाणी ‘ऑपरेशन अभ्यास’ अंतर्गत मॉक ड्रिल घेण्यात आले. या सर्व ठिकाणी मॉक ड्रिल यशस्वीपणे पार पडल्यानंतर विधानभवनाच्या प्रांगणात जिल्हाधिकारी जितेंद्र डुडी यांनी माहिती दिली.

यावेळी विधान भवन परिसरात विभागीय आयुक्त डॉ. चंद्रकांत पुलकुंडवार, नागरी संरक्षण दलाचे उपनियंत्रक कर्नल प्रशांत चतुर, अपर आयुक्त अरुण आनंदकर, जिल्हा शल्यचिकित्सक डॉ. नागनाथ यमपल्ले, जिल्हा आपत्ती व्यवस्थापन अधिकारी विठ्ठल बनोटे तसेच विविध विभागांचे अधिकारी उपस्थित होते.

श्री. डुडी म्हणाले, या मॉक ड्रिलमध्ये सर्व गोष्टींचा समावेश करण्यात आला होता. सुरुवातीला भोंगा वाजविण्यात आला. त्यानंतर कृत्रिम पद्धतीने स्फोट करण्यात आला, त्यानंतर अश्रू धूराच्या नळकांड्या फोडण्यात आल्या. याप्रसंगी परिसरातील इमारतीत काही लोक अडकले होते, त्यांना एनडीआरएफच्या मदतीने बाहेर काढण्यात आले. परिस्थितीचे गांभीर्य ओळखत आरोग्य विभाग, अग्निशमन दल व नागरी संरक्षण दल यांनी समन्वयाने काम केले. यानुषंगाने सर्व उपाययोजनेत प्रतिसादाची वेळ योग्य होती. सर्व यंत्रणांनी तात्काळ प्रतिसाद दिला. आरोग्य यंत्रनेने आरोग्य सुविधा रुग्णवाहीका सेवा वेळेत उपलब्ध करुन देण्याचे प्रात्यक्षिक दाखविले. अग्निशमन वाहनाने आपली जबाबदारी योग्य रितीने पार पाडली. मॉक ड्रिलची सर्व प्रक्रिया २५ ते ६० मिनिटात पूर्ण करण्यात आली.

ग्रामीण भागातील लोकांमध्ये या मॉक ड्रिलद्वारे जनजागृती होण्यासाठी तेथील सरपंच, ग्रामसेवक व स्थानिक नागरिक यांनीही यात सहभाग घेतला होता. या मॉक ड्रिलमध्ये खूप कमी वेळात प्रशासनाने तयारी करुन सर्व विभागांनी आपाआपली जबाबदारी, नेमून दिलेले काम योग्य पद्धतीने पार पाडले.

विधानभवन प्रांगण, पुणे महानगरपालिका प्रशासकीय इमारत, पिंपरी चिंचवड महानगरपालिका प्रशासकीय इमारत, वनाज औद्योगिक परिसर, मुळशी पंचायत समिती आणि तळेगाव नगरपरिषद या शहरी व ग्रामीण भागात एकाच वेळी दुपारी चार वाजता मॉक ड्रिल घेण्यात आले. या मॉक ड्रिलमध्ये संरक्षण दल, नागरी संरक्षण दल, एनडीआरएफ, पोलीस, महसूल, आरोग्य, नगरपालिका, महानगरपालिका, अग्निशमन दल, आपत्ती व्यवस्थान विभाग, रेड क्रॉस सोसायटी, तसेच संबंधित शासकीय विभागातील अधिकारी व कर्मचारी, राष्ट्रीय छात्रसेना, राष्टीय सेवा योजनेचे विद्यार्थी, नेहरु युवा केंद्राचे विद्यार्थी आणि महाविद्यालयीन विद्यार्थी सहभागी झाले होते. ही मॉक ड्रिल दक्षता म्हणून घेण्यात आल्याचे जिल्हाधिकारी जितेंद्र डुडी यांनी यावेळी सांगितले.
०००००

पुणे-पुण्यात जुगार, मटका अड्डा चालविण्याचे ६३ गुन्हे दाखल असलेला सराईत नंदू उर्फ नंदकुमार नाईक याच्याविरुद्ध पुणे पोलिसांनी झोपडपट्टी दादा प्रतिबंधक कायद्यान्वये (एमपीडीए) कारवाई केली होती. मुंबईत गृहविभागाने आठ दिवसात ही कारवाई रद्द केल्यानंतर नागपूर कारागृहातून बाहेर पडलेला नंदू नाईकने पुन्हा मटका अड्डा सुरू केल्याचे उघडकीस आले. खडक पोलिसांनी पुन्हा मटका अड्ड्यावर कारवाई करुन नाईकसह साथीदारांविरुद्ध गुन्हा दाखल केला.

याप्रकरणी नंदू नाईक (वय ७०, रा. शाहू चौक, छत्रपती शिवाजी रस्ता, शुक्रवार पेठ), विजय रंगराव शिंदे (वय ६९, रा. शाहू चौक, छत्रपती शिवाजी रस्ता), शंकर सायअण्णा मॅडम (वय ६५, रा. महात्मा फुले पेठ) यांच्यासह एका अल्पवयीनाविरुद्ध याबाबत गुन्हा दाखल करण्यात आला आहे. पोलीस नाईक आशिष चव्हाण यांनी याप्रकरणी खडक पोलीस ठाण्यात आरोपी विरोधात तक्रार दिली आहे. पोलिसांनी दिलेल्या माहितीनुसार, नंदू नाईक याच्याविरुद्ध मटका, तसेच जुगार अड्डा चालविण्याचे ६३ गुन्हे दाखल झाले आहेत. गुन्हेगारी क्षेत्रात तो ‘मटका किंग’ नावाने ओळखला जातो. त्याच्याविरुद्ध वेळोवेळी पोलिसांनी कारवाई केली होती.परंतु त्याच्या वर्तणुकीत सुधारणा झाली नव्हती. महापालिकेेने त्याच्या छत्रपती शिवाजी रस्त्यावरील इमारतीवर अतिक्रमण केल्याप्रकरणी कारवाई केली होती. त्याच्याविरुद्ध झोपडपट्टी दादा प्रतिबंधक कायद्यान्वये (एमपीडीए) कारवाई करण्याचा प्रस्ताव पोलीस आयुक्त अमितेश कुमार यांनी मंजूर केला होता. त्यानंतर १७ मार्च रोजी नाईक याला वर्षभरासाठी नागपूर कारागृहात स्थानबद्ध करण्याचे आदेश दिले होते. नाईक याने ही कारवाई रद्द करण्यासाठी त्याच्या नामांकित वकिलांमार्फत गृहविभागात प्रयत्न केले. गृहविभागाने ही कारवाई नुकतीच रद्द केली होती . नाईक कारागृहातून बाहेर पडला आणि त्याने छत्रपती शिवाजी रस्त्यावरील इमारतीत पुन्हा मटका अड्डा सुरू केला. याबाबतची माहिती खडक पोलिसांना मिळाली. त्यानंतर पोलिसांच्या पथकाने छापा टाकला. या कारवाईत नाईक याच्यासह साथीदार, तसेच अल्पवयीनाला ताब्यात घेण्यात आले. त्यांच्याकडून मोबाइल , मटका खेळण्याच्या चिठ्ठया जप्त करण्यात आल्या. पोलीस हवालदार एस घोलप पुढील तपास करत आहेत.

द इन्स्टिट्यूट आॅफ कॉस्ट अकाउंटंट्स आॅफ इंडिया या देशातील अग्रगण्य संस्थेच्या पुणे विभागाच्या स्थापनेला ६० वर्षे पूर्ण

पुणे : द इन्स्टिट्यूट आॅफ कॉस्ट अकाउंटंट्स आॅफ इंडिया या देशातील अग्रगण्य संस्थेच्या पुणे विभागाच्या स्थापनेला ६० वर्षे पूर्ण होत आहेत, त्यानिमित्त हीरक महोत्सव साजरा करण्यात येत आहे. दिनांक ९ ते ११ मे दरम्यान तीन दिवसांचा भव्य सोहळा आयोजित करण्यात आला आहे. या सोहळ्यात औद्योगिक क्षेत्रातील सभासदांसाठी विशेष सत्र, व्याख्याने, मान्यवरांचा सत्कार आणि सांस्कृतिक कार्यक्रमांचे आयोजन करण्यात आले आहे, अशी माहिती इन्स्टिट्यूट आॅफ कॉस्ट अकाउंटंट्स आॅफ इंडिया, पुणे शाखा अध्यक्ष निलेश भास्कर केकाण  यांनी पत्रकार परिषदेत दिली.

पत्रकार परिषदेला माजी अध्यक्ष, इन्स्टिट्यूट आॅफ कॉस्ट अकाउंटंट्स आॅफ इंडिया (आयसीएमए) माजी अध्यक्ष सीएमए अमित आपटे, केंद्रीय समिती सदस्य सीएमए नीरज जोशी, वेस्टर्न इंडिया रिजनल कौन्सिल माजी अध्यक्ष सीएमए चैतन्य मोहरीर, माजी केंद्रीय समिती सदस्य सीएमए संजय भार्गवे, इन्स्टिट्यूट आॅफ कॉस्ट अकाउंटंट्स आॅफ इंडिया, पुणे शाखा माजी अध्यक्ष सीएमए नागेश भागणे, पुणे शाखा सदस्य सीएमए विश्वनाथ जोशी उपस्थित होते.

शुक्रवार (दि.९) आणि शनिवारचे (दि.१०) सत्र कर्वेनगर येथील सीमए भवन येथे तर रविवारचे (दि.११)  सत्र एरंडवणे येथील डॉ. कलमाडी शामराव शाळेच्या शकुंतला शेट्टी आॅडिटोरियम मध्ये पार पडणार आहे. महोत्सवात दिनांक ९  मे रोजी रक्तदान शिबिराचे आयोजन करण्यात आले आहे. यासोबतच तीन दिवसात विविध विषयांवर सत्रे होणार आहेत.

दिनांक १० मे रोजी मेंबर्स इन इंडस्ट्री कॉन्क्लेव आयोजित करण्यात येत आहे. या कार्यक्रमाचे मुख्य अतिथी म्हणून महाराष्ट्र चेंबर आॅफ कॉमर्स, इंडस्ट्रीज अँड अ‍ॅग्रिक्लचर (एमसीसीआयए) चे २०२२-२०२४ कालावधीतील अध्यक्ष दीपक करंदीकर उपस्थित राहणार आहेत. या कॉन्क्लेवमधील मुख्य आकर्षण म्हणजे ६० हून अधिक ज्येष्ठ सीएमए यांचा सीएमए अचिव्हर्स म्हणून गौरव केला जाणार आहे. तसेच, दिनांक ११ मे रोजी प्रमुख पाहुणे म्हणून भारतीय सैन्याचे माजी लष्कर प्रमुख मनोज नरवणे, किशोर पंप प्रायव्हेट लिमिटेड चे व्यवस्थापकीय संचालक किशोर देसाई उपस्थित राहणार आहेत. कार्यक्रमात गुरुदेव श्री श्री रविशंकर हे आॅनलाइन माध्यमातून संवाद साधणार आहेत.

सन १९६५ साली पुण्यात स्थापन झालेल्या या विभागाने आजवर ४० हजार पेक्षा अधिक विद्यार्थ्यांना मार्गदर्शन दिले असून २२०० हून अधिक विद्यार्थी प्रमाणित कॉस्ट अकाउंटंट्स म्हणून घडवले आहेत. सल्लागार समितीतील द इन्स्टिट्यूट आॅफ कॉस्ट अकाउंटंट्स आॅफ इंडिया पुणेचे माजी अध्यक्ष डॉ. नरहर निमकर,  पुणे विभाग माजी अध्यक्षा मीना वैद्य, उपाध्यक्ष श्रीकांत इप्पलपल्ली, मानद सचिव राहुल चिंचोलकर, खजिनदार हिमांशू दवे, सदस्य नागेश भागणे, अमेय टिकले, तनुजा मंत्रवादी, अनुजा दाभाडे, निखिल अग्रवाल, विद्यार्थी प्रतिनिधी जयदीप माने देशमुख यांसह कार्यक्रमाच्या आयोजनासाठी माजी अध्यक्ष सीमए डॉ. धनंजय जोशी मार्गदर्शक असून विविध मान्यवर सल्लागार व कार्यकारी मंडळ यासाठी सक्रिय आहेत. सध्याचे अध्यक्ष सीमए निलेश भास्कर केकाण यांच्या नेतृत्वाखाली पुणे विभागाचा महोत्सव होत आहे.

इन्स्टिट्यूट आॅफ कॉस्ट अकाउंटंट्स आॅफ इंडिया ही संस्था जागतिक स्तरावरील उद्योगांच्या आर्थिक नेतृत्वासाठी संसाधने आणि व्यावसायिकांची प्राधान्याने निवडलेली स्त्रोत संस्था असेल, हे संस्थेचे व्हिजन आहे, तर कॉस्ट अँड मॅनेजमेंट अकाउंटंट व्यावसायिक जागतिक स्तरावर नैतिकतेने उद्योग चालवतील आणि धोरण, व्यवस्थापन व लेखा यांचे एकत्रित कौशल्य वापरून सामाजिक-आर्थिक संदर्भात भागधारकांसाठी मूल्यनिर्मिती करतील हे संस्थेचे ध्येय आहे.

पुणे : पुणे येथे महावितरणचे मुख्य अभियंता या पदावर कार्यरत असताना राजेंद्र पवार यांनी अतुलनीय योगदान देत आपल्या कार्याचा ठसा उमटविला. त्यांची पदोन्नतीवर महावितरणच्या मुख्य कार्यालयात संचालकपदी (मानवसंसाधन विभाग) नियुक्ती झाली आहे. त्यानिमित्त आडकर फौंडेशनतर्फे त्यांच्या सत्कार सोहळ्याचे आयोजन करण्यात आले आहे.
सत्कार समारंभ रविवार, दि. 11 मे रोजी सायंकाळी 5:30 वाजता पत्रकार भवन, नवी पेठ येथे आयोजित करण्यात आला असून सत्कार डॉ. डी. वाय. पाटील विद्यापीठाचे कुलपती डॉ. पी. डी. पाटील यांच्या हस्ते करण्यात येणार आहे. महाराष्ट्र आर्थिक विकास मंडळाचे उपाध्यक्ष सचिन ईटकर आणि ज्ञान फौंडेशनचे अध्यक्ष मनोहर कोलते यांची प्रमुख उपस्थिती असणार आहे, अशी माहिती आडकर फौंडेशनचे अध्यक्ष ॲड. प्रमोद आडकर यांनी निवेदनाद्वारे कळविली आहे. सन्मानपत्र, शाल, श्रीफळ आणि ग्रंथ असे पुरस्काराचे स्वरूप आहे.

पुणे, दि. ७ : केंद्र सरकारच्या निर्देशाप्रमाणे युद्धजन्य परिस्थितीत काळजी घेण्याच्यादृष्टीने विधानभवन, मुळशी पंचायत समिती, तळेगाव नगरपरिषद, वनाज औद्योगिक वसाहत, पुणे व पिंपरी-चिंचवड महानगरपालिका या ठिकाणी आज (दि.७ मे)दुपारी चार वाजता ‘मॉक ड्रिल’घेण्यात येणार आहे; मॉक ड्रिलची गांर्भियता लक्षात घेता सर्व संबंधित यंत्रणांनी अतिशय शिस्तबद्ध पध्दतीने काम करावे, नागरिकांनी घाबरुन जाऊ नये, कुठल्याही अफवांवर विश्वास ठेवू नये, असे आवाहन जिल्हाधिकारी जितेंद्र डुडी यांनी केले आहे.

जिल्हाधिकारी कार्यालयात मॉक ड्रीलबाबत आयोजित आढावा बैठकीत ते बोलत होते. यावेळी नागरी संरक्षण दलाचे उपनियंत्रक कर्नल प्रशांत चतुर, एनसीसी पुणे मुख्यालयाचे कमांडिग ऑफीसर कर्नल निशाद मंगरुळकर, विशेष शाखेचे पोलीस उपायुक्त मिलींद मोहिते, पुणे ग्रामीणचे पोलीस उपअधीक्षक रमेश चोपडे, यांच्यासह सर्वसंबंधित विभागाचे अधिकारी उपस्थित होते.

श्री. डुडी म्हणाले, केंद्र सरकारने युद्धजन्य परिस्थितीत देशाच्या सुरक्षिततेच्यादृष्टीने मॉक ड्रिल करण्याचे सर्व राज्यांना निर्देश दिले आहेत. युद्धजन्य परिस्थिती उद्भवल्यास कमीत कमी वेळेत अधिकाधिक नागरिकांपर्यंत मार्गदर्शन आणि मदत पोहोचविण्यासाठी खबरदारी घेण्याच्यादृष्टीने दक्षता म्हणून मॉक ड्रील घेत आहोत. यावेळी आपत्कालीन परिस्थिती निर्माण झाल्यास जीवितहानी टाळण्याच्यादृष्टीने विविध प्रात्यक्षिके केली जाणार आहेत,त्यामुळे नागरिकांनी घाबरुन जाण्याची गरज नाही.

केंद्रीय संरक्षण दल, राष्ट्रीय आपत्ती प्रतिसाद दल (एनडीआरएफ), राज्य आपत्ती प्रतिसाद दल (एसडीआरएफ), जिल्हा प्रशासन, पोलीस, महानगरपालिका, नगरपालिका, आरोग्य, अग्निशमन दल, महाविद्यालयीन विद्यार्थी, राष्ट्रीय छात्रसेना, राष्ट्रीय सेवा योजना आणि नेहरु युवा केंद्राचे समन्वयक आदी या मॉक ड्रीलमध्ये सहभागी होणार आहेत.