पुणे: चॅम्प एन्ड्युरन्स टीम यांच्या तर्फे साई आंतरराष्ट्रीय मॅरेथॉन शिर्डी स्पर्धेचे शिर्डी येथे  11फेब्रुवारी रोजी आयोजन  करण्यात आले आहे. ही मॅरेथॉन 3,5,10,21 व 42किलोमीटर प्रकारात होणार आहे.

स्पर्धेत एकूण 10लाख रुपयांची पारितोषिके देण्यात येणार आहे. श्री साई बाबा हे सर्वधर्मियांचे श्रद्धास्थान असल्यामुळे शिर्डी हे अतिशय पवित्र असे तीर्थक्षेत्र बनले आहे. साई बाबांच्या समाधी वर्षाची यंदा शताब्दी साजरी होत असून या मॅरेथॉनच्या माध्यमातून श्रद्धा व सबुरी हा श्री साई बाबांचा संदेश सर्वदूर पसरविणायचा उद्देश आम्हाला साध्य करायचा आहे. तसेच भारताचे पहिले आर्यनमन सनदी अधिकारी कृष्णा प्रकाश (आयपीएस आयजी व्हीआयपी सेक्युरीटी)यांच्या स्वप्नातील मेकिंग इंडिया रन या भव्य मोहिमेचा प्रारंभ या मॅरेथॉनच्या माध्यमातून होत आहे. शिर्डी आणि संभोवतालच्या परिसरासाठी पर्यटन आणि सुविधा यांना प्रोत्साहन देण्यासाठीही या मॅरॅथॉनचा उपयोग होणार आहे.

मॅरेथॉन शर्यतीस व्दारावती भक्त निवास येथून प्रारंभ होणार असून काकडी गाव (एअरपोर्ट पोर्ट) येथे या शर्यती चा समारोप होणार आहे. या मॅरेथॉनचे वैशिष्ट म्हणजे सर्वाधिक अंतराची अनवाणी शर्यत असून याची नोंद गिनीज वर्ल्ड रेकॉर्ड मध्ये केली जाणार आहे आणि यासाठी नावनोंदणी मोफत असणार असल्याचे त्यांनी सांगितले.

तसेच, याशिवाय सहभागी स्पर्धकांना पदक, नाश्ता, टी-शर्ट, गुडी बॅग आणि टाईम बीब देण्यात येणार आहे. इच्छुकांनी नावनोंदणीसाठी या वेबसाईटवर संपर्क साधावा. स्पर्धेसाठी आतापर्यंत देशभरांतून 800हुन धावपटूंनी आपला सहभाग नोंदविला असून कमीतकमी 15000हुन अधिक  स्पर्धक व 15आंतरराष्ट्रीय इलाईट धावपटू सहभागी होण्याची आशा असल्याचे त्यांनी नमूद केले.

पत्रकार परिषदेला माउंट एव्हरेस्ट सर करणा-या  अपर्णा प्रभुदेसाई,  आंतरराष्ट्रीय मॅरेथॉनचे ट्रेनर अमोद भाटे, चॅम्प एन्ड्युरन्सचे संचालक निखिल शहा, अरविंद बिजवे, रविंद्र वाणी, तसेच अनवाणी धावपटू प्रविण झेले आदी मान्यवर उपस्थित होते.

नवी दिल्ली- ल मेरिडियन हॉटेलमध्ये नुकतेच ‘बीडब्ल्यू बिझनेसवर्ल्ड यंग आंत्रप्रेन्युअर समिट’ या परिषदेचे आयोजन करण्यात आले. ही परिषद असे संवादात्मक आणि उद्बोधक व्यासपीठ ठरले ज्याने भारतीय नवउद्योजकीय परिसंस्थेशी संबंधित विषयांवर रंजक विचारमंथन घडवून आणले.या प्रतिष्ठित परिषदेत एक प्रमुख वक्त्या म्हणून ‘किर्लोस्कर सिस्टिम्स लिमिटेड’च्या कार्यकारी संचालक व मुख्य कार्यकारी अधिकारी मानसी किर्लोस्कर यांना आमंत्रित करण्यात आले होते. ‘यशस्वी कुटूंब व्यवसायाला (फॅमिली बिझनेस) चालना देणे किती अवघड/किती सोपे?’ या विषयावर त्यांनी व्याख्यान दिले.

त्या म्हणाल्या, “ताकद ही स्पर्धात्मकता आणि कामगिरी यांचे फलित असून स्पर्धात्मक व आव्हानात्मक वातावरणच त्याची मागणी करते. त्यामुळे कुटूंब व्यवसाय उदयाला यायला हवेत. वारसा पुढे नेण्याच्या इच्छेतून अनेक कुटूंब व्यवसायांचे छोट्या गटांत विभाजन होते, परंतु त्यांनी स्वतःची व्यवसाय प्रारुपे व पद्धती विकसित कराव्या लागतात. संशोधनातून असे दिसून आले आहे, की कुटूंब चालवत असलेल्या व्यवसायांपैकी ३० टक्क्यांहून कमी व्यवसायच तिसऱ्या पिढीपर्यंत टिकून राहतात. मी तर दीडशे वर्ष जुन्या व्यवसाय समूहातील पाचव्या पिढीतील आहे. तरीही माझे ठाम मत आहे, की सदैव काळाशी सुसंगत राहणे फार महत्त्वाचे असते. काळानुसार व्यवसाय प्रारुपे, व्यूहरचना, प्रक्रिया व नवउद्योगांची निर्मिती सुरुच राहील. वारसा पुढे चालवणे महत्त्वाचे असते, पण त्याची चाकोरी मोडणेही अत्यावश्यक असते.”

या परिषदेत दिवसभर चाललेल्या सत्रांना विविध उद्योगांतील दिग्गज, सदस्य व आमंत्रितांनी उपस्थिती लावून प्रचंड प्रतिसाद दिला.

मुंबई : केंद्र आणि राज्य सरकारच्या एकत्रित सहभागातून मुंबईत आकाश, पाताळ, जल आणि स्थळ अशा सर्वच ठिकाणी पायाभूत सुविधांच्या विकासाची कामे होत आहेत. केंद्रीय मंत्री नितीन गडकरी यांच्या पुढाकाराने मुंबईच्या पूर्व समुद्री किनाऱ्याचा मोठा कायापालट होत आहे. पूर्वी फक्त खास लोकांसाठी खुला असलेला मुंबई पोर्ट ट्रस्टचा भाग आता सामान्य लोकांसाठी खुला होत आहे. आंतरराष्ट्रीय क्रुझ टर्मिनल, कोस्टल रोड, सी प्लेन, रोरो सेवा, प्लोटींग रेस्टॉरन्ट अशा विविध प्रकल्पांच्या माध्यमातून महाराष्ट्राकडे देश – विदेशातील पर्यटक आकर्षित होण्याबरोबरच राज्याच्या जीडीपी वाढीमध्ये मोठे योगदान मिळेल, असे प्रतिपादन मुख्यमंत्री देवेंद्र फडणवीस यांनी केले.

मुंबई पोर्ट ट्रस्ट येथे नवीन आंतरराष्ट्रीय क्रुझ टर्मिनलचे आज मुख्यमंत्री श्री. फडणवीस व केंद्रीय जहाज आणि रस्ते वाहतूक मंत्री नितीन गडकरी यांच्या हस्ते भूमिपूजन झाले. यावेळी राज्याचे पर्यटन मंत्री जयकुमार रावल, खासदार अरविंद सावंत, अनिल देसाई, आमदार राज पुरोहित, आशिष शेलार, मुंबई पोर्ट ट्रस्ट अध्यक्ष संजय भाटिया आदी उपस्थित होते.

मुख्यमंत्री म्हणाले, प्रधानमंत्री नरेंद्र मोदी यांनी पोर्टच्या माध्यमातून देशाच्या विकासाला गती देण्याचे स्वप्न बघितले होते. सागरमाला अभियानाच्या माध्यमातून ते साकार होत आहे. मुंबईतील रोरो टर्मिनलचे काम 25 मार्चपर्यंत पूर्ण करण्यात येईल. साधारण एप्रिलपासून ही सेवा सुरू करण्यात येईल. मांडवा, नेरुळ येथे रोरो सेवेच्या माध्यमातून वाहने गेल्यास वेळ आणि इंधनाची बचत होण्याबरोबरच रस्त्यांवरील गर्दी कमी होऊ शकेल. जेएनपीटी येथे सेझच्या माध्यमातून मोठी गुंतवणूक येत आहे. महाराष्ट्राच्या जीडीपी वाढीसाठी याचा फार मोठा लाभ होईल, असे त्यांनी सांगितले.

मेट्रोच्या कामातून निघणाऱ्या मातीचा उपयोग करून सागरी भराव तयार करून उद्यान तयार करण्याची सूचना नितीन गडकरी यांनी केली आहे. मुंबईच्या विकास आराखड्यास मान्यता देताना या प्रकल्पाला निश्चित मान्यता देऊ. ‘वेस्ट पासून वेल्थ’ तयार करण्याचा हा अभिनव उपक्रम ठरेल. या प्रकल्पासाठी मुंबई पोर्ट ट्रस्टला प्लॅनिंग ॲथॉरिटीचे अधिकार देऊ, असे मुख्यमंत्र्यांनी यावेळी सांगितले.

क्रुझ पर्यटनाला मुंबईत मोठी चालना – नितीन गडकरी
केंद्रीय मंत्री नितीन गडकरी यावेळी म्हणाले, अरबी समुद्र आणि त्याचा सागरी किनारा ही मुंबईची सर्वात मोठी ताकद आहे. पण आतापर्यंत त्याचा योग्य वापर होऊ शकला नाही. राज्याच्या विकासाला मोठी गती देऊ शकेल अशा क्रुझ पर्यटनाकडे लालफितीच्या कारभारामुळे मोठे दुर्लक्ष झाले होते. पण आता त्यातील अडथळे दूर करण्यात आले असून मुंबईत क्रुझ पर्यटनाला मोठी चालना देण्यात येईल. सागरमाला प्रकल्पांतर्गत महाराष्ट्राला मोठा लाभ मिळत आहे. या प्रकल्पांतर्गत २.४१ लाख कोटींच्या ८६ प्रकल्पांना मान्यता देण्यात आली आहे. जेएनपीटी मधील सेझ प्रकल्पात मोठी गुंतवणूक येत असून तिथे येत्या काळात दीड लाख नवीन रोजगार निर्माण होतील. यातील ८० ते ९० टक्के रोजगार हे स्थानिकांना देण्यात येतील, असे ते म्हणाले.

क्रुझ पर्यटनाला मुंबईत मोठा वाव आहे. सध्या मुंबईत दरवर्षी फक्त ८० क्रुझ येतात. त्यातून फक्त २ लाख पर्यटक येतात. भविष्यात ही संख्या वार्षिक साधारण ९५० क्रुझेस आणि ४० लाख पर्यटकांपर्यंत वाढविण्याचे आमचे ध्येय आहे. त्यासाठीच आंतरराष्ट्रीय दर्जाच्या क्रुझ टर्मिनलचे काम आम्ही हाती घेतले आहे. हे काम लवकरात लवकर पूर्ण करुन महाराष्ट्राच्या आणि मुंबईच्या विकासात महत्त्वाचे योगदान दिले जाईल, असे श्री. गडकरी म्हणाले. मिठी नदीची स्वच्छता आणि मुंबईतील समुद्रात जाणारे सांडपाणी रोखण्याच्या दृष्टीने केंद्र शासनामार्फत मदत करण्यात येईल, असेही त्यांनी यावेळी सांगितले.

मुंबईला क्रुझ पर्यटनाचे होम पोर्ट बनवू – जयकुमार रावल
राज्याचे पर्यटन मंत्री श्री. रावल यावेळी म्हणाले, जगातील चांगले आंतरराष्ट्रीय विमानतळ मुंबईत आहे. त्याच धर्तीवर आंतरराष्ट्रीय क्रुझ टर्मिनल येथे उभे केले जाईल. भविष्यात राज्याच्या आर्थिक विकासात पर्यटन क्षेत्र महत्त्वाची भूमिका निभावणार आहे. त्यादृष्टीनेच केंद्र आणि राज्य शासनाच्या एकत्रित सहभागातून पर्यटनविषयक विविध प्रकल्प हाती घेण्यात आले आहेत. महाराष्ट्राला मोठा सागरी किनारा, वन्यजीव, जंगले, गड किल्ले, लेण्या, ऐतिहासिक वारसा लाभलेल्या इमारती असा पर्यटनाचा मोठा वारसा आहे. राज्याचा हा मोठा वारसा जागतिक पर्यटकांपर्यंत पोहोचविण्यासाठी प्रयत्न करण्यात येत आहेत. मुंबईला क्रुझ पर्यटनाचे होम पोर्ट बनविण्यात येईल, असे ते म्हणाले.

यावेळी कोचीन शीप यार्ड आणि मुंबई पोर्ट ट्रस्ट यांच्यामध्ये जहाज दुरुस्तीबाबत सामंजस्य करार करण्यात आला.

क्रुझ टर्मिनलची वैशिष्ट्ये
आज भूमिपूजन करण्यात आलेल्या नवीन आंतरराष्ट्रीय क्रुझ टर्मिनलची अनेक वैशिष्ट्ये असणार आहेत. याची अंदाजित किंमत सुमारे ३०० करोड रुपये इतकी असून त्याचे क्षेत्रफळ हे साधारण ४.१५ लाख वर्गफूट इतके असेल. वर्षातील सर्व दिवशी ते कार्यान्वित असेल. जून २०१९ पर्यंत याचे काम पूर्ण करण्याचे उद्दीष्ट आहे. देशातील ८० टक्के क्रुझ प्रवाशांची या टर्मिनलमधून ने-आण करण्यात येईल. तळमजला अधिक तीन मजले असे या टर्मिनलचे स्वरुप असेल. आंतरराष्ट्रीय दर्जाच्या या टर्मिनलमुळे मुंबईतील आयकॉनिक इमारतींमध्ये अजून एका भव्य इमारतीची भर पडणार आहे.