मदरसा, मस्जिद ॲक्शन कमिटीच्या प्रतिनिधींची आयुक्तांसमवेत समवेत बैठक संपन्न

पुणे -पिंपरी चिंचवड महानगरपालिकेने कुदळवाडी, चिखली परिसरातील अनधिकृत मंदिर, मस्जिद, मदरसा व इतर धार्मिक स्थळांना अतिक्रमण बाबत नोटीस दिली आहे. या बाबत मदरसा, मस्जिद ॲक्शन कमिटीच्या वतीने आक्षेप घेण्यात आला होता. तसे पत्र समन्वयक राहुल डंबाळे आणि प्रतिनिधींनी आयुक्त शेखर सिंह यांना दिले होते. याविषयी मंगळवारी आयुक्त शेखर सिंह यांच्या दालनामध्ये बैठक आयोजित करण्यात आली होती. मा. सर्वोच्च न्यायालय व राज्य सरकारच्या मार्गदर्शक सूचनांचे पालन मनपाने करावे. तसेच आक्षेप घेण्यात आलेल्या व प्राप्त झालेल्या पत्रांवर सुनावणी घेण्यात यावी अशी मागणी यावेळी आयुक्तांकडे करण्यात आली.
या बैठकीस ॲक्शन कमिटीचे समन्वयक राहुल डंबाळे, फजल शेख, अजीज शेख, शहाबुद्दीन शेख, नियाज सिद्दीकी, बाळासाहेब भागवत, बाबा कांबळे, गुलजार शेख, युसुफ कुरैशी, मौलाना नय्यर नुरी, कारी इक्बाल उस्मानी, सय्यद गुलाम रसुल, याकुब शेख, रशिद सय्यद, शक्रुल्ला पठाण, वाहीद कुरैशी, पोलीस उपायुक्त शिवाजी पवार, सहाय्यक पोलीस आयुक्त सचिन हिरे आदी उपस्थित होते.
या बैठकीनंतर माध्यम प्रतिनिधींशी संवाद साधताना समन्वयक राहुल डंबाळे व शहाबुद्दीन शेख यांनी सांगितले की, आयुक्त शेखर सिंह यांनी या बैठकीत सकारात्मक प्रतिसाद दिला. यावेळी आयुक्तांच्या निदर्शनास आणून देण्यात आले की, सर्व मशिदी, मदरसे हे खाजगी जागेवर असून त्या राज्य शासनाच्या धोरणानुसार नियमित होण्यास पात्र आहेत. तशी कार्यवाही कमिटीच्या वतीने सुरुवात करण्यात आली आहे. त्यामुळे ही धार्मिक स्थळे अधिकृत करून द्यावी अशी विनंती केली. राज्य शासनाने यापूर्वीच छत्रपती, कोल्हापूर, मीरा-भाईंदर, मुंबई, नागपुर आदी महानगरपालिका क्षेत्रांमधील हजारो धार्मिक स्थळे नियमित केल्याची बाब आयुक्तांच्या निदर्शनास आणून देण्यात आली. त्यानंतर या सर्व बाबींची सविस्तर माहिती घेऊन जी धार्मिक स्थळे नियमानुकूल होणे शक्य असेल त्यांच्याबाबत सकारात्मक निर्णय घेऊ असे आश्वासन आयुक्तांनी शिष्टमंडळास दिले आहे अशी माहिती डंबळे यांनी दिली.
इतर महापालिकांप्रमाणे धार्मिक स्थळे नियमित करण्यासाठी प्राधान्य देणे आवश्यक असल्याचे मत यावेळी शिष्टमंडळातील सर्वच पदाधिकाऱ्यांनी व्यक्त केले. दरम्यान महानगरपालिकेने एकतर्फी कारवाई केल्यास कायदा सुव्यवस्थेचा प्रश्न निर्माण होऊ शकतो अशी भीती देखील यावेळी व्यक्त केली. भारत-पाक युद्धाची पार्श्वभूमी लक्षात घेऊन शहरांमध्ये अन्य कोणताही तणाव निर्माण होऊ नये या पार्श्वभूमीवर ही कारवाई रद्द करावी अशीही विनंती करण्यात आली होती. दरम्यान नोटीस दिलेल्यांपैकी पाच मशिदींना छत्रपती संभाजी नगर येथील वक्फ ट्रीब्युनल बोर्डाने मनपाने कारवाई करण्यास स्थगिती आदेश दिलेले आहेत हे देखील आयुक्त शेखर सिंह यांच्या निदर्शनास आणून देण्यात आले. याविषयी शहर अभियंता मकरंद निकम यांच्याशी पुढील कामाबाबत समन्वय साधण्यात यावा असेही आयुक्त शेखर सिंह यांनी सांगितले असल्याचे शहाबुद्दीन शेख यांनी सांगितले.

पुणे दि. १४ मेः  तीर्थक्षेत्र विकासाच्या नावाखाली आळंदी येथील इंद्रायणी नदीच्या उत्तर तीरावर सुरू असलेले अत्यंत सुंदर व देखण्या घाटांचे शासनातर्फे रात्री-अपरात्री केले जाणारे विद्रूपीकरण ताबडतोब थांबवून, या मागील तथाकथित भ्रष्टाचाराची सखोल चौकशी केली जावी, अशी मागणी महाराष्ट्रातील समस्त वारकरी संप्रदायातर्फे महाराष्ट्राचे जाणकार व माननीय मुख्यमंत्री देवेंद्र फडणवीस यांच्याकडे करण्यात येत आहे. यासाठी महाराष्ट्राच्या वारकरी संप्रदायातील नामवंत संत, कीर्तनकार, प्रवचनकार इ. मुख्यमंत्र्यांना प्रत्यक्ष भेटून निवेदन सादर करणार आहेत. अशी माहिती विश्व शांती केंद्र (आळंदी) व कार्याध्यक्ष, श्री क्षेत्र आळंदी-देहू परिसर विकास समितीचे अध्यक्ष डॉ. विश्वनाथ दा. कराड यांनी पत्रकार परिषदेत दिली.

दि. ५ जुलै १९८८ रोजी ह्या घाटांच्या बांधणीची सुरुवात झाली. त्यापूर्वी, इंद्रायणीचे तीर अत्यंत गलिच्छ आणि ओंगळवाण्या अवस्थेत होते. त्याचे सुशोभीकरण आणि वारकर्‍यांना सुरक्षित व स्वच्छ घाटांच्या माध्यमातून इंद्रायणी नदीत स्नान व इतर उपचार करून देण्याचे स्वप्न, अनेक संत सज्जनांनी पाहिले. त्यात वारकरी परंपरेचे अध्वर्यू ह.भ.प. वै. धुंडा महाराज देगलूरकर, ह.भ.प. वै. शंकरबापू शिंदे-आपेगांवकर, ह.भ.प. वै. बाळासाहेब भारदे, ह.भ.प. वै. किसन महाराज साखरे, पुणे विद्यापीठाचे तत्कालीन कुलगुरु डॉ. पी.जी. भिडे आणि महाराष्ट्र लोकसेवा आयोगाचे अध्यक्ष श्री. माधवराव सूर्यवंशी, आळंदीचे तत्कालीन नगराध्यक्ष श्री. सुरेश गांधी आणि त्यांचे सहकारी व महाराष्ट्रातील इतर हजारो वैष्णव वारकरी इ.चा समावेश होता.
वाट खडतर होती, अनेक अडथळे येऊन सुध्दा महाराष्ट्रातील लाखो वारकर्‍यांच्या प्रत्यक्ष सहभागाने, सुमारे १८ – २० वर्षांच्या कालावधीत हे कार्य पूर्ण झाले आणि नदीच्या दुतर्फा अत्यंत देखण्या आणि टिकाऊ अशा घाटांची निर्मिती झाली. घाट बांधून झाल्यावर, इंद्रायणी नदीच्या दक्षिण तीरावर विश्वरूप दर्शन मंच देखील उभारण्यात आला.
योगायोगाने, या कार्यासाठी भारताचे तत्कालीन शिक्षणमंत्री व संत वृत्तीचे शास्त्रज्ञ असलेले डॉ. मुरली मनोहर जोशी तसेच तत्कालीन मुख्यमंत्री वसंतदादा पाटील, शंकरराव चव्हाण, आंतरराष्ट्रीय कीर्तीचे संगणक शास्त्रज्ञ डॉ. विजय भटकर आणि ज्येष्ठ शास्त्रज्ञ डॉ. रघुनाथ माशेलकर यांचे सहकार्य व मार्गदर्शन लाभले. हे संपूर्ण कार्य श्रीक्षेत्र आळंदी-देहू परिसर विकास समिती आणि विश्वशांती केंद्र (आळंदी) यांच्या संयुक्त विद्यमाने पूर्णत्त्वास नेण्यात आले.
  परंतु, सुमारे महिन्याभरापूर्वी रात्रीच्या वेळी अचानक आळंदी इंद्रायणी नदीच्या उत्तर तीरावरील घाट फोडण्याच्या कामास सुरूवात झाली. चौकशी करता असे सांगण्यात आले की, तीर्थक्षेत्र विकासाच्या आराखड्याखाली सांडपाण्याचे पाईप टाकण्याचे काम जिल्हाधिकार्‍यांच्या आदेशानुसार केले जात आहे. अधिक चौकशी असे लक्षात आले की, सदरील आदेश हा सुमारे १३ महिन्यांपूर्वीचा म्हणजे १५ मार्च २०२४ चा असून, सुमारे १२ कोटी रुपयांचे हे काम एक वर्षाच्या विलंबाने का सुरू झाले आहे, हे कळू शकले नाही.
या प्रकरणांमुळे खालील प्रश्न निर्माण होतात.
१. कार्याची एकूण व्याप्ती बघता त्यासाठी १२ कोटी रुपयांचा खर्च खरंच आवश्यक आहे का?
२. हे घाट सुमारे १५-२० वर्षाच्या कालावधीमध्ये पुण्यातील श्री क्षेत्र आळंदी-देहू परिसर विकास समिती आणि विश्वशांती केंद्र (आळंदी) या दोन संस्थांच्या संयुक्त पुढाकाराने आणि महाराष्ट्रातील समस्त वारकरी भाविकभक्तांच्या प्रत्यक्ष अप्रत्यक्ष योगदानाच्या माध्यमातून बांधले गेले आहेत. सदरील घाटांचे सर्व संमतीप्राप्त नकाशे वरील संस्थांकडे उपलब्ध असताना देखील अशा प्रकारचे कार्य अचानकपणे आणि त्यांना विश्वासात न घेता का सुरू करण्यात आले?
३. घाट बांधतानाच त्यांच्याखाली सुमारे ६ फूट उंच व ४ फूट रुंदीची काँकीटची गटारं बांधण्यात आली होती, जी आळंदी शहराचे सांडपाणी वाहून नेण्यास समर्थ होती, असे असतानादेखील नवीन सांडपाण्याची व्यवस्था करण्याची काय गरज होती?
४. हे कार्य शक्यतोवर रात्रीच्या वेळेतच करण्यात आले, त्यामागचे कारण काय?
५. सदरील घाटावर वारकरी संप्रदायातील अनेक अध्वर्यू संतमंडळींच्या समाध्या आहेत. या समाध्यांना बांधकामा दरम्यान हानी पोहोचली असून, या समाध्यांची शासनातर्फे कशा प्रकारे दुरुस्ती करण्यात येणार आहे?
या सर्व प्रकारामुळे वारकरी संप्रदायाच्या श्रद्धेला व भावनेला तडा गेलेला आहे. तसेच माऊलींच्या आणि जगद्गुरूंच्या पवित्र कार्याला काळीमा फासला गेला आहे, अशी भावना समाजामध्ये निर्माण झाली आहे. या व अशा अनेक महत्त्वपूर्ण प्रश्नांबाबत चर्चा करण्यासाठी आणि या किळसवाण्या प्रकाराची चौकशी करून यावर समाधानकारक तोडगा काढण्यासाठी महाराष्ट्रातील नामवंत वारकरी, कीर्तनकार, प्रवचनकार जसे ह.भ.प. श्री. बापूसाहेब मोरे, ह.भ.प. श्री.  धर्मराज महाराज हांडे, ह.भ.प. श्री. बाळासाहेब बडवे, ह.भ.प. श्री. यशोधन महाराज साखरे, ह.भ.प. श्री. चंद्रकांत महाराज वांजळे, ह.भ.प. श्री. शालीकराम खंदारे, ह.भ.प. श्री. महेश महाराज नलावडे,  माईर्स एमआयटी विश्वशांती विद्यापीठाचे कुलगुरु डॉ. रवीकुमार चिटणीस, प्रकुलगुरू डॉ. मिलींद पांडे, कुलसचिव श्री. गणेश पोकळे, डॉ. महेश थोरवे   इ. मा. मुख्यमंत्र्यांकडे भेटण्याची वेळ मागून, त्यांना प्रत्यक्ष भेटून सविस्तर निवेदन देणार आहेत.
या परिषदेला डॉ. स्वाती कराड-चाटे, हभप यशोधन साखरे महाराज, नागपूर विद्यापीठाचे माजी कुलगुरू डॉ. एस.एम.पठाण, एमआयटी डब्ल्यूपीयूचे कुलगुरू डॉ. आर.एम.चिटणीस, प्र कुलगुरू डॉ. मिलिंद पांडे, डॉ. संजय उपाध्ये व डॉ. महेश थोरवे  उपस्थित होते.

पुणे :’विचारवेध असोसिएशन’च्या पुढाकाराने आंतरजातीय विवाह संकल्पनेला पाठिंबा देण्यासाठी नवे उपक्रम हाती घेण्यात आले आहेत. ज्येष्ठ सामाजिक कार्यकर्ते आनंद करंदीकर यांच्या अध्यक्षतेखाली  पुण्यात झालेल्या बैठकीत या उपक्रमांची घोषणा करण्यात आली.या उपक्रमांत इच्छुक युवक-युवतींसाठी समुपदेशन व मार्गदर्शन, आर्थिक सहाय्याचे सल्ला, जोडपे एकत्र आणण्यासाठी कार्यक्रम, व्याख्याने तसेच सुरक्षित निवासासाठी ‘सेफ हाऊस’ यांचा समावेश आहे. समाजात आंतरजातीय विवाहाबाबत असलेले गैरसमज दूर करून, विवाह करणाऱ्यांना आधार देण्याचा यामागचा मुख्य उद्देश आहे. ‘विचारवेध असोसिएशन’च्या वतीने सरिता आव्हाड यांनी पुण्यात प्रसिद्धीपत्रकाद्वारे ही माहिती दिली. 

या उपक्रमांद्वारे केवळ विवाहासाठी आधारच नव्हे, तर सामाजिक बदलाची प्रक्रिया गतिमान करण्याचीही अपेक्षा आहे. इच्छुकांनी या उपक्रमांमध्ये सहभागी होण्यासाठी अनिकेत साळवे  ८७९६४०५४२९  या क्रमांकावर संपर्क साधावा, असे आवाहन करण्यात आले आहे.

पुणे,- राज्य शाशनाने ११ मार्च २०२४ महिन्यात महिला दिनाच्या निमित्तानं चौथं महिला धोरण लागू केलं. त्याअंतर्गत महिला व बालकल्याण विभागाअंतर्गत झालेल्या बैठकीत शासकीय कागदपत्रांवर आईचं नाव लावणं बंधनकारक करण्यात आले. मात्र पुण्यातील यशवंत क्लासेसच्या वतीने मातृनाम प्रथम हा उपक्रम गेल्या चार वर्षांपासून सुरु करण्यात आला होता. दरवर्षी जागतिक मातृदिनाच्या निमित्ताने यशवंत क्लासेस यांच्यावतीने “मातृनाम प्रथम” या कार्यक्रमाचे आयोजन केले जाते. यंदाच्या या उपक्रमाच्या पाचव्या वर्षी “मातृनाम प्रथम” कार्यक्रमाद्वारे उपमुख्यमंत्री अजितदादा पवार यांचा विद्यार्थी व पालक यांच्याहस्ते विशेष सत्कार करण्यात येणार आहे. शनिवार, १७ मे रोजी सकाळी ७:३० वाजता सातारा रोडवरील अण्णाभाऊ साठे सभागृहामध्ये हा कार्यक्रम होणार असल्याची माहिती यशवंत क्लासेसचे संचालक प्रा. शीतल पाटील यांनी पत्रकार परिषदेमध्ये दिली.

राष्ट्रशक्ती प्रतिष्ठानचे अध्यक्ष व पुणे महानगरपालिकेचे माजी महापौर दत्तात्रय धनकवडे आणि यशवंत क्लासेस बालाजी नगर पुणे यांच्या संयुक्त विद्यमाने हा सोहळा संपन्न होत आहे. यावेळी कार्यक्रमाचे प्रमुख पाहुणे आणि यशवंत क्लासेसचे ब्रँड अँबेसिडर संकर्षण कऱ्हाडे त्यांच्या “आई” या कवितेचे सादरीकरण करून विद्यार्थ्यांशी आई विषयी हितगुज करणार आहेत. खडकवासला विधानसभा मतदारसंघाचे आमदार यांचीही या कार्यक्रमाला उपस्थितीत असणार आहे.

शीतल पाटील म्हणाले की, आईला अविस्मरणीय भेट देण्यासाठीचा विशेष कार्यक्रम म्हणजे “मातृनाम प्रथम” यशवंत क्लासेस चे विद्यार्थी या दिवशी आपल्या नावामध्ये आईचे नाव आणि नंतर वडिलांचे नाव असा बदल करून आपले नाव, सोशल मीडियावरचे नाव हे सर्व बदलतात आणि आपल्या आईला मी भरपूर अभ्यास करून माझ्या करिअरचा स्वराज्य निर्माण करेल आणि तुझं नाव लावून अभिमानाने मिरवेल अशा आशयाची शपथ ग्रहण करतात. या शपथविधी सोहळ्याला कार्यक्रमाचे प्रमुख पाहुणे उपमुख्यमंत्री अजितदादा पवार हे उपस्थित राहणार आहेत. आईच्या नावाची व तिच्या कामाची दखल सरकार तर्फे देखील घेण्यात आल्यामुळे व अजितदादा यांच्या नेतृत्वाखाली हे शक्य झाल्यामुळे आमचे सर्व विद्यार्थ्यांनी त्यांचे पालक आणि माता अजितदादांच्या अभिनंदनचा ठराव मांडणार आहेत. याच कार्यक्रमांमध्ये यशवंत क्लासेसचे ब्रँड अँबेसिडर संकर्षण कऱ्हाडे त्यांच्या “आई” या कवितेमुळे सर्व महाराष्ट्रातील प्रत्येक घराघरात आणि विद्यार्थी आणि मातांच्या हृदयात पोहोचलेले आहेत. ते आपली कविता सादर करणार असून विद्यार्थ्यांबरोबर आई या विषयाशी संबंधित हितगुज करणार आहेत.

आईवर प्रेम करणाऱ्या प्रत्येकाने देण्याची इच्छा असलेल्या प्रत्येक विद्यार्थ्याने या कार्यक्रमात सहभागी व्हावे असे आवाहन यशवंत क्लासेस आणि राष्ट्रशक्ती प्रतिष्ठान तर्फे करण्यात येत आहे.

पुणे–बांधकामावर कारवाई होत नसल्याने उच्च न्यायालयाने पुणे महापालिकेला फटकारले आहे. कायद्याची अंमलबजावणी करण्यासाठी न्यायालयाच्या आदेशाची गरज नाही, महापालिकेने स्वतःहून ही कार्यवाही करायला हवी, असे न्यायालयाने ठणकावले.हडपसर येथील अवैध बांधकामावर कारवाई होत नसल्याने महेश तुपे व श्रीनिवास इंदलकर यांनी याचिका दाखल केली आहे. न्या. अजय गडकरी व न्या. कमल खाथा यांच्या खंडपीठासमोर या याचिकेवर सुनावणी झाली. संबंधित बांधकाम अवैध असल्याचे स्पष्ट झाले आहे. तरीही पुणे पालिकेने त्यावर कारवाई केलेली नाही. याचा खुलासा पुणे पालिका आयुक्तांनी प्रतिज्ञापत्र सादर करून करावा, असे आदेश न्यायालयाने दिले. यावरील पुढील सुनावणी 16 जून 2025 रोजी होणार आहे.

बेकायदा बांधकामांवर कारवाई झालीच पाहिजे हे सर्वोच्च न्यायालयाचे आदेश पुणे पालिकेला लागू होतात की नाही हेही आयुक्तांनी प्रतिज्ञापत्रावर स्पष्ट करावे. सर्वोच्च न्यायालयाचे आदेश बंधनकारक असतील तर हडपसर येथील अवैध बांधकामांवर कारवाई न होण्यामागे कोणता अधिकारी जबाबदार आहे याचा खुलासा आयुक्तांनी करावा, असेही न्यायालयाने आदेशात नमूद केले आहे.
अवैध बांधकामांवर कारवाई झालीच पाहिजे असे आदेश वारंवार सर्वोच्च न्यायालयाने दिले आहेत. या आदेशाचे पालन सर्वांनीच करायला हवे.
यामध्ये दुमत असू शकत नाही, असेही न्यायालयाने बजावले आहे.
कारवाई करण्याचे आदेश असतानाही अनधिकृत बांधकाम करणाऱयांवर जाणीवपूर्वक कारवाई होत नाही, असे गंभीर निरीक्षण खंडपीठाने नोंदवले.

• पुणे: पुणे महानगर परिवहन महामंडळाने (पीएमपी) तिकीट दरवाढ करण्याचा निर्णय मंगळवारी संचालक मंडळाच्या बैठकीत घेतला आहे. तिकीट जवळपास दुटीने वाढल्याने असल्याने प्रवास महागणार असला तरी दोन किलोमीटरच्या टप्प्याऐवजी पाच किलोमीटरचा टप्पा असणार आहे.
• त्यामुळे लांबचा प्रवास करणाऱ्यांना काही प्रमाणात दिलासाही मिळणार आहे.

पीएमपीचा संचलनातील तोटी दरवर्षी जात असून, गेल्यावर्षी तब्बल ७६६ कोटी रुपयांचा तोटा झाला होता. पीएमपीने गेल्या ११ वर्षात तिकीट दरवाढ केलेली नव्हती, त्यातुलनेत पगार, सीएनजी, डिझेल व देखभाल दुरुस्तीचा खर्च वाढलेला आहे. त्यामुळे गेल्या काही महिन्यापासून तिकीट दरवाढीसंदर्भात चर्चा होती.

आज अखेर संचालक मंडळाच्या बैठकीत त्यावर शिक्कामोर्तब केले आहे. पीएमपीची सेवा ही पुणे, पिंपरी-चिंचवड शहर आणि पुणे महानगर क्षेत्र विकास प्राधिकरण (पीएमआरडीए) हद्दीमध्ये दिली जाते. रोज १२ लाख प्रवासी प्रवास करत आहेत.

पाच ऐवजी १० रुपये तिकीट

यापूर्वी पीएमपीचे पहिल्या टप्प्यासाठी सर्वात कमी तिकीट हे पाच रुपये होते. पण आता सर्वात कमी तिकीट हे १० रुपये असणार आहे. पहिला टप्पा हा पाच किलोमीटरचा असणार आहे. पूर्वी हा दोन किलोमीटरचा टप्पा होता. पाच किलोमीटरसाठी १० रुपये तिकीट असणार आहे.

४२ ऐवजी ११ टप्पे

यापूर्वी पीएमपीचे ४२ टप्पे होते, हे टप्पे कमी करून केवळ ११ केले आहेत. अंतर वाढविल्याने टप्पे कमी झाले आहेत. त्यामुळे त्याचा फायदा लांबचा प्रवास करणाऱ्यांना होणार आहे. यापूर्वी १ ते ७८ किलोमीटरसाठी २ किलोमीटरच्या अंतराने १ ते ४० पर्यंत टप्पे होते.

नव्या निर्णयानुसार १ ते ३० किलोमीटर अंतरासाठी ५ किलोमीटरच्या अंतराने ६ टप्पे केले आहेत. त्यापुढे ३० ते ८० किलोमीटरच्या अंतरासाठी १० किलोमीटरच्या अंतराने ५ टप्पे असे एकूण ११ टप्पे केले आहेत. या टप्प्यानुसार तिकिटाची रचना केली आहे.

विद्यार्थी, ज्येष्ठ नागरिकांच्या पासमध्ये बदल नाही

तिकीट दर फेरबदलामध्ये पुणे आणि पिंपरी-चिंचवड महापालिका हद्दीसाठी प्रचलित असलेल्या दैनिक पास ४० रुपये (एक महापालिका हद्दीसाठी) आणि मासिक पास ९०० रुपये (एक महापालिका हद्दीसाठी) असा होता. आता दोन्ही महापालिकांसाठी एकच पास असणार आहे. पण त्याचा दर वाढला आहे.

दैनिक पास ७० रुपये व मासिक पास १,५०० रुपयांचा असणार आहे. पीएमआरडीएच्या हद्दीसाठी दैनिक पास १२० रुपये ऐवजी १५० रुपयांचा असणार आहे. विद्यार्थी, ज्येष्ठ नागरिक, दिव्यांग नागरिकांच्या दैनंदिन व मासिक पासच्या दरामध्ये कोणताही बदल केलेला नाही.

अशी आहे दरवाढ

प्रस्तावित स्टेज- प्रस्तावित किलोमीटर.. – प्रस्तावित दर रुपये – ३ ते १२ वर्ष वयोगटासाठी दर

१ – १ ते ५ -१० – ५

२ – ५.१ ते १० – २० – १०

३ – १०.१ ते १५ – ३० – १५

४ – १५.१ ते २० – ४० – २०

५ – २०.१ ते २५ – ५० – २५

६ – २५.१ ते ३० – ६० – ३०

७ – ३०.१ ते ४० – ७० – ३५

८ – ४०.१ ते ५० – ८० – ४०

९ – ५०.१ ते ६० – ९० – ४५

१० – ६०.१ ते ७० – १२० – ६०

११ – ७०.१ ते ८० -१२० – ६०

‘पीएमपीने तिकीट दरात वाढ करताना, प्रवासाच्या टप्प्यांचे अंतर वाढवले आहे. विद्यार्थी, ज्येष्ठ नागरिक, दिव्यांगाच्या पासच्या दरात वाढ केलेली नाही. ११ वर्षानंतर ही तिकीट दरवाढ केली आहे.’

• दीपा मुंडे-मुधोळ, व्यवस्थापकी संचालक, पीएमपी

पुणे : गजा मारणे कैदेत असताना त्याची मटण पार्टी झोडणाऱ्या पुणे पोलिस दलातील १ अधिकाऱ्यासह ४ कर्मचाऱ्यांचे निलंबन करण्यात आले आहे. गजा मारणेला पुण्याहून सांगली कारागृहात घेऊन जाताना मारणे याने पोलिसांच्या समक्ष ढाब्यावर मटण पार्टी केल्याचा धक्कादायक प्रकार समोर आला होता.मकोकाचा आरोपी असूनही ढाब्यावर पोलिस व्हॅन थांबवून त्याला मटण खाऊ दिल्याने एकच खळबळ उडाली होती. यामुळे पुणे पोलिसांवर प्रश्नचिह्न उभे राहिले होते.

या प्रकरणी सहायक पोलिस निरीक्षक सुरज राजगुरु यासह हवालदार महेश बामगुडे, हवालदार सचिन मेमाणे, हवालदार रमेश मेमाणे, पोलिस शिपाई राहुल परदेशी यांना निलंबित करण्यात आळे आहे. मोक्का कारवाई अंतर्गत गजा मारणे पुण्यातील येरवडा कारागृहात शिक्षा भोगत होता. त्याला सांगली तुरूंगात नेण्यात येत होते

गजा मारणेला पुण्यातील येरवडा कारागृहातून सांगली कारागृहात पाठवण्याचा निर्णय घेण्यात आला. त्याला घेऊन पोलीस व्हॅन सहाय्यक पोलिस निरीक्षक व चार पोलीस कर्मचाऱ्यांसोबत सांगलीच्या दिशेने निघाली. मात्र थेट कारागृहात पोहोचण्याआधी साताऱ्यात असलेल्या ढाब्या वर व्हॅन थांबली पोलिस कर्मचाऱ्यांनी तिथे जेवण केले.

दरम्यान पोलीस व्हॅनच्या मागावर असलेल्या मारणे टोळीची गाडी सुद्धा त्याठिकाणी येऊन थांबली. मारणेच्या गॅंगच्या गुंडांनी ढाब्या मधून एक मटण प्लेट आणली आणि थेट व्हॅन मध्ये बसलेल्या मारणे याला दिली. ही सगळी घटना ढाब्यावर असलेल्या सीसीटीव्हीमध्ये कैद झाली. पुणे पोलिस आयुक्तांना प्रकार समजला आणि त्यांनी या संपूर्ण प्रकरणाची चौकशी सुरू केली. गुन्हे शाखेच्या अधिकाऱ्यांनी या घटनेची तपासणी करण्यासाठी सर्व सीसीटीव्ही तपासले. त्यातून ही मटण पार्टी झाल्याचे धक्कादायक सत्य समोर आले.

पोलिस सह आयुक्त रंजन कुमार शर्मा यांनी ही यानंतर पोलिस अधिकारी आणि कर्मचाऱ्यांवर कारवाई केली आहे. तर गुंड गजा मारणेला ढाब्यावर भेटलेल्या सतीश शिळीमकर, विशाल धुमाळ तसेच बाळकृष्ण उर्फ पांड्या मोहिते यांच्यावर सुद्धा गुन्हा दाखल केला आहे.