पुणे:- केंद्र शासनाने सुरु केलेल्या विविध योजनांच्या अंमलबजावणीमध्ये येणाऱ्या अडचणींवर चर्चा करुन मार्ग काढणे हा ‘दिशा’ समितीचा उद्देश असून, यामुळे विकासाचा वेग वाढला असल्याचे मत केंद्रीय मनुष्यबळ विकास मंत्री प्रकाश जावडेकर यांनी आज येथे व्यक्त केले.

जिल्हा विकास समन्वय व संनियंत्रण समितीची बैठक येथील विधान भवन सभागृहात केंद्रीय मनुष्यबळ विकास मंत्री प्रकाश जावडेकर यांच्या अध्यक्षतेखाली पार पडली, त्यावेळी ते बोलत होते. बैठकीला सामाजिक न्याय राज्यमंत्री दिलीप कांबळे, महापौर मुक्ता टिळक, जिल्हा परिषद अध्यक्ष विश्वासराव देवकाते, खा. शिवाजीराव आढळराव पाटील, खा.अनिल शिरोळे, खा.अमर साबळे, आ.बाबुराव पाचर्णे,आ.भिमराव तापकीर, आ.माधुरी मिसाळ, आ.शरद सोनवणे, महानगरपालिका आयुक्त सौरभ राव, जिल्हाधिकारी नवल किशोर राम, जिल्हा परिषद मुख्य कार्यकारी अधिकारी सूरज मांढरे, सहायक जिल्हाधिकारी आयुष प्रसाद, जिल्हा ग्रामीण विकास यंत्रणेचे प्रकल्प संचालक चंद्रकांत सोनवणे उपस्थित होते.

यावेळी श्री. प्रकाश जावडेकर म्हणाले, येणाऱ्या काळात दर महिन्याला दिशा समितीची बैठक घेऊन योजनांच्या अंमलबजावणीचा आढावा घेण्यात येईल. यामुळे योजनांच्या अंमलबजाणीतील अडथळे दूर होऊन, योजनांना गती मिळेल. सुमारे 40 ते 50 योजनांची अंमलबजावणी स्थानिकस्तरावर करण्यात येते. यातील सर्वच योजना महत्वाच्या असून, काही निवडक योजनांचा आढावा प्राधान्याने घेण्यात येईल. पुणे शहराच्या अवतीभवती मोठया प्रमाणावर नागरी वस्ती झाल्यामुळे, सक्षम सार्वजनिक वाहतूक व्यवस्थेची मोठया प्रमाणात गरज निर्माण झाली आहे. त्यामुळे सर्व बाजूंनी मेट्रो प्रकल्पाचा विस्तार करण्याची मागणी होत आहे. दिशा समितीमधील लोकप्रतिनिधींच्या सहभागामुळे योजना राबविणाऱ्या विभागांमध्ये उत्तरदायित्व निर्माण होऊन पारदर्शकता वाढण्यास मदत होईल, असेही ते म्हणाले.

शहरात राबविण्यात येणारा मेट्रो रेल्वे प्रकल्प, जायकाच्या मदतीने सुरु असलेला मुळा-मुठा नदी सुधार प्रकल्प, विमानतळ विस्तारीकरण, राष्ट्रीय महामार्गातर्फे हाती घेण्यात आलेला रस्ता दर्जा सुधार प्रकल्प, मुद्रा योजना, प्रधानमंत्री आवास योजना इत्यादी योजनांच्या प्रगतीचा आढावा घेऊन, मनुष्यबळ विकास मंत्री प्रकाश जावडेकर यांनी अधिकाऱ्यांशी संवाद साधला. खा.शिवाजीराव आढळराव पाटील, खा.अनिल शिरोळे, खा.अमर साबळे यांनी चर्चेमध्ये सहभाग घेतला.

बैठकीला महसूल, जिल्हा परिषद, सार्वजनिक बांधकाम विभाग व अन्य विभागांचे अधिकारी मोठया संख्येने उपस्थित होते.

पुणे: जागतिक कीर्तीचे संगणक तज्ज्ञ, परम १००० या भारताच्या पहिल्या महासंगणकाचे जनक, नालंदा विश्‍वविद्यालयाचे कुलपती, इंडिया इंटरनॅशनल मल्टिव्हसिर्टीचे संस्थापक कुलपती व संतवृत्तीचे शास्त्रज्ञ पद्मभूषण डॉ. विजय पांडुरंग भटकर यांच्या ७३ व्या वाढदिवसानिमित्त एमआयटी वर्ल्ड पीस युनिव्हर्सिटीतर्फे विजयसंध्या या संगीतमय कार्यक्रमाचे आयोजन करण्यात आले आहे. हा कार्यक्रम बुधवार, दि. १७ ऑक्टोबर २०१८ ( खंडेनवमी ) रोजी सायं. ५.१५ वा. कोथरूड येथील माईर्स एमआयटीच्या संत ज्ञानेश्‍वर सभागृह येथे होणार आहे.
यांच प्रसंगी डॉ. विजय भटकर यांच्या वाढदिवसानिमित्त त्यांचा जाहीर सत्कार होणार आहे. या समारंभासाठी एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ विश्‍वनाथ दा. कराड हे प्रमुख पाहुणे म्हणून उपस्थित राहणार आहेत. अध्यक्षस्थानी सिंबायोसिसचे संस्थापक अध्यक्ष डॉ.एस.बी.मुजुमदार हे असतील. वरील समारंभासाठी जास्तीत जास्त लोकांनी सहभागी व्हावे असे आवाहन शारदा ज्ञान पीठ्मचे संस्थापक पं.वसन्त अनन्त गाडगीळ यांनी केले आहे.

पर्यटनाचा निर्णय रद्द करण्यासाठी झारखंड सरकारच्या विरोधात जैनसमाजाचा पुण्यात मूकमोर्चा

पुणे: झारखंड राज्यातील समेध शिखरजी या जैन धर्मियांच्या पवित्र तीर्थस्थळाच्या संरक्षणार्थ आज पुणे येथे जैन समाजाच्या वतीने विशाल मुकमोर्चा काढण्यात आला होता. या मोर्चात पुण्यातील जैन बांधव मोठ्या सहभागी झाले होते. या मोर्च्यात हजारो जैन बांधव सहभागी झाले होते. झारखंड सरकारने सेध शिखरजीवर होणारे पर्यटन रद्द करावे या मागणीसाठी जिल्हाधिकाऱ्यांना निवेदन दिले.

मूकमोर्चामध्ये प.पू. आचार्य युगभूषणजी म.सा., प.पू. पुलक सागरजी म.सा., प.पू. भावदर्शन सुरिश्वरजी म.सा., साध्वी सुधा म.सा., अॅड. एस के जैन, अचल जैन, मिलिंद फडे, फत्तेचंद रांका, शर्मिला ओसवाल, अभय छाजेड, बाळासाहेब ओसवाल, राजेंद्र बाठिया, शरद शहा, नितीन जैन, दिलीप मेहता, राजेश घीवाला, जितेंद्र दोषी, रमेश राठोड, राजु ओसवाल, भारत सुराणा आदी मान्यवर उपस्थित होते.

झारखंड सरकारने समेध शिखरजी येथे पर्यटन सुरु करण्याचा निर्णय घेतल्याने त्याठिकाणी मांस, मटन दारु, रेस्टॉरंट सुरु होत आहेत. समेध शिखरजी येथे जैन धर्माच्या 24 तीर्थकरांपैकी 20 तीर्थंकरांचे निर्वाण झाले आहे. या तीर्थक्षेत्रावर हेलिपॅड बनविण्यात आले आहे. ते हेलिपॅड पर्यटनक्षेत्रासाठी तयार करण्यात आले असेल तर त्याला आमचा पूर्णपणे विरोध आहे. आणि जर ते संरक्षणार्थ असेल तर त्याला आमचा विरोध नाही. पर्यटनाच्या निर्णयामुळे या पवित्र स्थानाचे पावित्र्य धोक्यात आल्याने जैन समाजात तीव्र असंतोष निर्माण झाला आहे. त्यामुळे हा विशाल मूकमोर्चा काढण्यात आला आहे. असेही जैन बांधवांकडून सांगण्यात आले. यावेळी जैन समाजाच्या वतीने निवासी जिल्हाधिकारी डॉ. जयश्री कटारे यांना निवेदन देण्यात आले. या मोर्च्यात तरुणाईही मोठ्या संख्येने सहभागी झाली होती.

पुणे-पुणे महानगर प्रदेश विकास प्राधिकरणाच्यावतीने (पीएमआरडीए) महाळुंगे-माणद्वारे विकसित
केल्या जाणाऱ्या पायाभूत सुविधा विकास कामे ठरविण्यासाठी नगररचना योजना क्र.१च्या पुणे, बालेवाडी मिटकॉन येथे
दि.१६ ऑक्टोबरला मंगळवारी सकाळी १०.०० वाजता कार्यशाळा आयोजित करण्यात आली आहे.
पीएमआरडीएच्यावतीने महाळुंगे-माण येथे तब्बल ७०० एकरमध्ये नगररचना योजनेद्वारे काम चालू आहे. मागील एक
वर्षांमध्ये जमीन धारकासोबत राहून प्लांनिग स्कीमचे काम चालू आहे. महाळुंगे-माण टीपीस्कीममध्ये ५० टक्के जमीन
मूळ मालकाकडे, तर १० टक्के मोकळ्या जागांसाठी, १८ टक्के पायाभूत सुविधासाठी, ५ टक्के अॅमीनिटी स्पेससाठी याचा
वापर केला जाणार आहे. तर १२ टक्के जागा या नगर विकास रचनेतून पीएमआरडीएला मिळणार आहेत.
दि.१९/९/२०१८ रोजी पीएमआरडीएने प्रारूप नगर रचना योजनेस मंजुरी दिली आहे. ही प्रारूप नगररचना योजना
अंतिम करण्यासाठी राज्यसरकारकडून लवाद म्हणून धनंजय खोत यांची नियुक्ती करण्यात आली आहे.
महाळुंगे हायटेक सिटीमध्ये पायाभूत सुविधा निर्माण करण्यासाठी पीएमआरडीए सुमारे ६०० कोटी रुपये गुंतवणूक
करणार आहे. सध्या या भागात रस्ते व प्लॉटचे मार्किंग व मोजणी सुरु आहे. यामध्ये परदेशी कंपन्या देखील गुंतवणूक
करणार आहेत. त्यामुळे रोजगारात वाढ होऊन नक्कीच विकासाला हातभार लागणार आहे. प्रामुख्याने महाळुंगे-माणमध्ये
पायाभूत सुविधेसह वीज, पाणी, रस्ते आदी सोयीसुविधा सर्वांना उपलब्ध करून दिल्या जाणार आहेत.
महाळुंगे-माण नगर रचना योजनेचे ठिकाण हिंजवडी आयटीपार्क शेजारी असल्याने या टाऊनशीपमध्ये सुद्धा माहिती व
तंत्रज्ञान क्षेत्रातील कंपन्या, रहिवाशी तसेच वाणिज्यीक क्षेत्र विकास करण्यासाठी खूप मोठी संधी आहे. त्यामुळे
पीएमआरडीएने पहिल्या नगररचना योजनेमध्ये महाळुंगे हायटेक सिटी स्थापन करण्याचे ठरविले आहे.
पायभूत सुविधांमधील होणाऱ्या कामांची माहिती जमीन मालकांना देऊन त्यांचेकडून सूचना प्राप्त करण्यासाठी उद्या दि.
१६ ऑक्टोबर रोजी कार्यशाळेचे आयोजन करण्यात आले आहे, तरी सर्व जमीन धारकांनी कार्यशाळेला उपस्थित राहावे
असे आवाहन महानगर आयुक्त किरण गित्ते यांनी केले आहे.

पुणे-कर्वे रस्त्यावरील वाहतूक कोंडी सोडविण्यासाठी नळ स्टॉप चौकात दुमजली पूल व करिष्मा चौकात उड्डाण पूल बांधण्याच्या कामास लवकरच सुरुवात करण्यात येईल तसेच मेट्रोचे काम ही वेगात सुरु असून याद्वारे कोथरुडकरांची लवकरच रोजच्या वाहतूक कोंडीतून सुटका होईल असे महापौर मुक्ता टिळक व मुरलीधर मोहोळ यांनी स्पष्ट केले.कोथरूड नवरात्र महोत्सवात नागरिकांशी संवाद साधताना त्यांनी ही ग्वाही दिली.विविध सांस्कृतिक कार्यक्रमांद्वारे सतत कार्यरत राहणारे क्रिएटिव्ह फाउंडेशन चे अध्यक्ष संदीप खर्डेकर व नगरसेविका मंजुश्री खर्डेकर यांनी समाजकार्याचा आदर्श घडविला असल्याचे ही ते म्हणाले.पुणेकरांच्या सर्व समस्या सोडविण्यासाठी आम्ही कटिबद्ध असून पुढील चार वर्षात बहुतांश प्रकल्प मार्गी लागले असतील असेही महापौर मुक्ता टिळक यांनी आवर्जून सांगितले.

पुणे-थकल्या, भागल्या जिवांचे आयुष्यभर मनोरंजन करणार्‍या, वृद्ध लावणी कलाकरांना सेवाधन, निवृत्ती वेतन सरकारने द्यावे आणि रसिकांनी या कलेला दाद द्यावी असे आवाहन लावणी महोत्सवाच्या उद्घाटनाच्या वेळी सिक्कीमचे माजी राज्यपाल श्रीनिवास पाटील यांनी केले.

पुणे नवरात्रौ महोत्सवातील लावणी महोत्सवाचे उद्घाटन श्रीनिवास पाटील यांच्या हस्ते श्री गणेश कला क्रीडा रंगमंच येथे नारळ वाढवून झाले. यावेळी काँग्रेसचे ज्येष्ठ नेते, माजी आमदार उल्हास पवार, नवरात्रौ महोत्सवाचे अध्यक्ष आबा बागुल मंचावर उपस्थित होते. दुपारी 12 ते रात्री 12 असा हा लावणी महोत्सव दरवर्षी संपूर्ण महाराष्ट्रात चर्चेचा विषय बनला आहे. दरम्यान केंद्रीय सामाजिक न्याय राज्य मंत्री रामदास आठवले आणि अभिनेत्री श्वेता शिंदे यांनी या लावणी महोत्सवाला भेट दिली. आठवले यांनी आपल्या शीघ्र कवितेने उपस्थितांची मने जिंकली आणि आपल्या कवितेतून आबा बागुल यांना शुभकामना दिल्या. नवरात्रौ महोत्सवाच्या माध्यमातून आबांनी सांस्कृतिक कार्यक्रमातून वैचारिक दिशा दिली आहे अशा शब्दात कौतुक केले. आंबेडकरी चळवळीचा कार्यकर्ता म्हणूनही मी त्यांना शुभेच्छा देतो. निवडणुकीच्या राजकारणात आपण वेगळे असतो पण, भारतीय म्हणून आपण एक आहोत त्यामुळे माझे या व्यासपीठावर येण्याचा वेगळा अर्थ काढू नये असे ते म्हणाले.

उद्घाटनपर बोलताना श्रीनिवास पाटील म्हणाले, लावणी म्हणजे सौंदर्य, नजाकत, ठेका धरायला लावणारी कला. लावणी म्हणजे लवण. लवण म्हणजे मीठ. आपल्या जेवणात मिठाचे जे महत्व आहे तेच आपल्या जगण्यात लावणीचे आहे. त्या लावणीच्या झटक्यात जगण्याची प्रेरणा मिळते. लावणी कलावंत आयुष्यभर रसिकांचे मनोरंजन करीत असतात. त्या कलावंतांच्या वृद्धापकाळी त्यांचे आयुष्य समाधानात व्यतित व्हावे यासाठी सरकारने त्यांच्या वृद्धापकाळची सोय करावी. याबाबत सरकारचा काही योजनांचा विचार चालू आहे. आता त्या योजना प्रत्यक्षात येण्यासाठी प्रयत्न करायला हवेत. रसिकांनीही या कलावंत मुलींचा योग्य तो सन्मान राखायला हवा, असेही यावेळी बोलताना पाटील म्हणाले.

लावणी ही महाराष्ट्राची लोककला. रसिकांनी ती जपलेली आहे म्हणून ती जिवंत आहे. या कलेला उत्तेजन देण्यासाठी या उत्सवात आम्ही लावणी महोत्सव गेली 23 वर्षे साद करीत आहोत, असे प्रास्तविकात बोलताना पुणे नवरात्रौ महोत्सवाचे संयोजक अंध्यक्ष नगरसेवक व माजी उपमहापौर आबा बागुल यांनी सांगितले.

अमित बागुल आणि नंदू बानगुडे यांच्या हस्ते शाल आणि पुष्पगुच्छ देऊन श्रीनिवास पाटील यांचा आणि उल्हास पवार यांचा सत्कार करण्यात आला. केंद्रीय सामाजिक न्याय राज्य मंत्री रामदास आठवले यांचा सत्कार आबा बागुल यांच्या हस्ते शाल, पुष्पगुच्छ देवून आणि अभिनेत्री श्वेता शिंदेचा सत्कार रामदास आठवले यांच्या हस्ते झाला. विकी खन्ना, अमित बागुल, नंदकुमार बानगुडे, घनश्याम सावंत, नंदकुमार कोंढाळकर, रमेश भंडारी, माजी नगरसेवक विजय मोहिते, अभिषेक बागुल, रिपब्लीकन पक्षाचे बाळासाहेब जानराव, अशोक कांबळे, असित गांगुर्डे, मंदार जोशी, आयुब शेख आदी यावेळी उपस्थित होते.

गण गौळणीने लावणीच्या सादरीकरणाला सुरवात झाली. नंतर या रावजी बसा भाऊजी, बाई मी लाडाची कैरी पाडाची, मला आमदार झाल्यासारख वाटत गं, तुमच्या पुढ्यात कुटतेय मी ज्वानीचा मसाला, पिकल्या पानाचा देठ कि हो हिरवा अशा एकापेक्षा एक ठसकेबाज लावण्या सादर करण्यात आल्या. बुगडी माझी सांडली गं, तुझ्या उसाला लागलं कोल्हा, आई मला नेसव शालू नवा या जून्या लावण्यांनी वेळी सार्‍या गणेश कला रंगमंच येथे टाळ्यांचा गगनभेदी कडकडाट झाला.

लावणी महोत्सवातील महासंग्राम या कार्यक्रमात ’पाहुणं फक्त तुमच्यासाठी’, ’लावणी धमाका’, ’तुमच्यासाठी कायपण’, ’छत्तीस नखरेवाली’, ’ढोलकीच्या तालावर’ या शिर्षकाखाली वेगवेगळ्या लावणी संस्थांनी ठसकेबाज लावण्या सादर केल्या या महोत्सवला प्रचंड गर्दी होती. महिलांचा सहभाग त्यात लक्षणीय होता.