पुणे :‘महाराष्ट्र कॉस्मोपॉलिटन एज्युकेशन सोसायटी’च्या वतीने छत्रपती शिवाजी महाराज जयंतीनिमित्त दहा हजार  विद्यार्थ्याचा सहभाग असलेल्या  अभिवादन मिरवणुकीचे आयोजन आझम कॅम्पस ते लाल महाल मार्गावर करण्यात आले होते .

सोमवार, दि. 19 फेब्रुवारी 2018 रोजी सकाळी साडे आठ वाजता संस्थेचे अध्यक्ष डॉ. पी.ए.इनामदार आणि डॉ एन वाय   काझी यांच्या हस्ते मिरवणुकीस प्रारंभ झाला .  मिरवणुकीचे नेतृत्व संस्थेचे सचिव लतिफ मगदूम यांनी केले . लाल महाल येथे पुष्पहार अर्पण करून सांगता झाली

पुण्यातील अल्पसंख्य, बहुजन समाजातील  दहा हजार विद्यार्थी,शिक्षक ,प्राद्यापक ,सामाजिक कार्यकर्ते यांचा सहभाग असलेली ही सर्वात मोठी शिवजयंतीदिनाची अभिवादन मिरवणूक होती  . मिरवणुकीचे हे 18 वे वर्ष होते .

आझम कॅम्पस ,पूना कॉलेज, क्वार्टर गेट,  सोन्या मारुती चौक,  मार्गे  निघालेल्या या मिरवणुकीची लाल महाल येथे  सांगता झाली . मिरवणूकीत शैक्षणिक संस्थांचे सर्व प्राचार्य, पदाधिकारी, कर्मचारी, दरबार ब्रास बॅण्डची दोन पथके, ढोल-ताशांचे लेझीम पथक, तुतारी, नगारे देखील सहभागी झाले .

‘शिवजयंती उत्सव सुरु करणारे महात्मा फुले ’ हा जिवंत देखावा मिरवणुकीत सादर करण्यात आला .कॉलेज ऑफ फार्मसी च्या विद्यार्थ्यांनी प्रा  जैन यांच्या मार्गदर्शनाखाली तो सादर केला . दरवर्षी संस्थेतर्फे छत्रपती शिवाजी महाराज, महात्मा फुले, डॉ. बाबासाहेब आंबेडकर आणि महंमद पैगंबर यांच्या जयंतीदिनी त्यांना अभिवादन करण्यासाठी भव्य मिरवणुका काढल्या जातात.

पुणे-फर्ग्युसन कनिष्ठ महाविद्यालयातील इ. १२ वी च्या विद्यार्थ्यांनी त्यांच्या निरोप समारंभाच्या अल्पोपहारासाठी ठेवलेला निधी ‘पुलवामा’ येथील हल्ल्यात शहीद झालेल्या जवानांसाठी दिला. त्या प्रसंगी SIRF (soldier independent rehabilitation foundation)च्या सुमेधा व योगेश चिंधडे यांना २५०००/- रु. चा धनादेश सुपूर्त करण्यात आला. शिक्षकांनीही व शिक्षकेतर कर्मचार्‍यांनी उस्फुर्तपणे जमा केलेली रक्कम त्यांना सुपूर्त करण्यात आली. या प्रसंगी संस्थेचे अध्यक्ष डॉ. शरद कुंटे प्राचार्य डॉ. रविंद्रसिंह परदेशी, उपप्राचार्य एन.ए. कुलकर्णी, पर्यवेक्षिका डॉ. सविता केळकर तसेच पालक शिक्षक संघाच्या रुबिना शेख व श्री. संजय रसाळ व शिक्षकांपैकी श्री. जगदीश पाटील व सौ. उज्ज्वला गोरे उपस्थित होते. सुमेधा चिंधडे यांनी या प्रसंगी विद्यार्थ्यांच्या  उस्फुर्त प्रतिसादाबद्दल त्यांना शाबासकी दिली. डॉ. शरद कुंटे याप्रसंगी म्हणाले की, आम्हाला या विद्यार्थ्यांचा अभिमान वाटतो, तर प्रायार्यांनी, विद्यार्थ्यांना उत्तम नागरिक म्हणून घडविण्याच्या यशस्वी प्रयत्नाबद्दल पालकांचे अभिनंदन केले

विक्रम काकडे शुटींग अॅकॅडमी तर्फे राष्ट्रीय शॉटगन ट्रॅप शुटींग स्पर्धेचे बालेवाडी स्टेडियम आयोजन

ऑलिंपिक, खेलरत्न व अर्जुन पुरस्कार प्राप्त सहा खेळाडू सहभागी

‘व्हीके शॉटगन कप’ साठी देशभरातील 50 नामांकित शुटर्सचा सहभाग

पुणे: विक्रम काकडे शुटींग अॅकॅडमीच्या वतीने राष्ट्रीय शॉटगन ट्रॅप शुटींग स्पर्धेचे आयोजन करण्यात आले होते. पुण्यातील बालेवाडी स्टेडियममध्ये झालेल्या ‘व्हीके शॉटगन कप’ मध्ये पुरुष गटात लक्ष्य शेरॉन ने सुवर्ण, अन्वर सुलतानने रौप्य व रियान रिझवीने कास्य पदक पटकाविले. महिला गटात सौम्या गुप्ताने सुवर्ण, शगुन चौधरीने रौप्य तर, श्रेयसी सिंगने कांस्य पदक मिळविले.

विक्रम काकडे शुटींग अॅकॅडमीच्या वतीने आयोजित ‘व्हीके शॉटगन कप’ या राष्ट्रीय शॉटगन ट्रॅप शुटींग स्पर्धेसाठी देशभरातील नामांकित 50 हून अधिक शुटर्स सहभागी झाले होते. ऑलिंपिक, कॉमनवेल्थ, एशियन चॅम्पियनशीपसह राष्ट्रीय स्पर्धेत सहभागी झालेले आणि खेलरत्न व अर्जुन पुरस्काराने सन्मानित सहा खेळाडू या स्पर्धेत सहभागी झाले होते. पुरुष गटाच्या अंतिम सामन्यात लक्ष्य शेरॉन ने 46 गुण मिळवून प्रथम क्रमांक मिळविला, दुसऱ्या क्रमांकावर राहिलेल्या अन्वर सुलतानला 39 तर, तिसऱ्या क्रमांकावरील रियान रिझवीला 33 गुण मिळाले. महिला गटात सौम्या गुप्ताला 40 गुण, शगुन चौधरीला 38 आणि श्रेयसी सिंगला 29 गुण मिळाले. त्यांनी अनुक्रमे सुवर्ण, रौप्य व कांस्य पदक पटकाविले.

स्पर्धेच्या पारितोषिक वितरण समारंभास राज्याचे अतिरिक्त पोलीस महासंचालक संजीवकुमार सिंघल, ग्रॅव्हिटस फाउंडेशनच्या संस्थापक अध्यक्षा उषा काकडे, पोलीस उपायुक्त श्रीकांत पाठक, कोमल देशमुख, मालपाणी ग्रुपचे संचालक आशिष मालपाणी, अर्जुन व खेलरत्न पुरस्कार विजेते मानवजीतसिंग संधु, अर्जुन पुरस्कार विजेते मनशेर सिंग, अन्वर सुलतान व श्रेयसी सिंग आणि ऑलिंपिक मध्ये खेळलेली पहिली महिला शगुन चौधरी उपस्थित होते.

‘व्हीके शॉटगन कप’ स्पर्धेचे उद्घाटन शनिवारी बालेवाडी येथील विक्रम काकडे शुटींग अॅकॅडमीमध्ये पार्थ पवार यांच्या हस्ते झाले. याप्रसंगी अर्जुन व खेलरत्न पुरस्कार विजेता आणि चारवेळा ऑलिंपिक खेळलेले मानवजीत सिंग संधु, अॅकॅडमीचे प्रमुख विक्रम काकडे, रोहन देशमुख आदी मान्यवर उपस्थित होते.

शुटींग अॅकॅडमीचा उपयोग देशातील शुटींग स्पर्धेतील सर्वोत्कृष्ठ खेळाडू निर्माण करण्यासाठी निश्चित होईल. सर्व सुविधांयुक्त ही अॅकॅडमी खेळाडुंसाठी उपयुक्त ठरेल. विक्रम काकडे हे क्रीडा क्षेत्रात अतिशय चांगलं काम करीत आहेत, असे पार्थ पवार यांनी उद्घाटनप्रसंगी सांगितले.

ऑलिंपिकसारख्या स्पर्धेत सुवर्ण पदक मिळविण्यासाठी देशात मुलभूत सुविधा हव्या आहेत. विक्रम काकडे शुटींग अॅकॅडमीच्या माध्यमातून खेळाडुंना चांगल्या सुविधा उपलब्ध केल्या आहेत. याप्रकारच्या स्पर्धांचा फायदा देशासाठी सर्वोत्कृष्ठ खेळाडू निर्माण करण्यासाठी निश्चित होईल, असे चारवेळा ऑलिंपिक खेळलेला अर्जुन व खेलरत्न पुरस्कार प्राप्त मानवजीत सिंग संधु यांनी यावेळी सांगितले.

या स्पर्धेमध्ये ऑलिंपिक स्पर्धा खेळलेले, खेलरत्न व अर्जुन पुरस्काराने सन्मानित झालेले सहा शुटर्स खेळाडू सहभागी झाले. देशपातळीवर प्रथमच एवढ्या मोठ्या स्तरावरील शॉटगन ट्रॅप शुटींगची स्पर्धा पुण्यात झाली. शॉटगन ट्रॅप शुटींग प्रकारात देशाला ऑलिंपिक मध्ये सुवर्ण पदक मिळवून देणारे खेळाडू घडविण्यासाठी ही अॅकॅडमी सुरु केली आहे. ऑलिंपिकसाठी खेळायला जाणाऱ्या काही खेळाडूंचा संपूर्ण खर्च अॅकॅडमीच्या वतीने करण्यात येणार आहे. त्याचप्रमाणे आर्थिकदृष्ट्या गरीब कुटुंबातील गुणवान खेळाडूंना मोफत प्रशिक्षण अॅकॅडमीतर्फे दिले जाणार आहे. खेळामध्ये जगात देशाची मान उंचावण्यासाठी आणि देशाला शुटींग स्पर्धेत जागतिक स्तरावर गौरव प्राप्त करुन देण्यासाठी आम्ही प्रयत्नशील आहोत. त्याचाच भाग म्हणून देशपातळीवर इतक्या मोठ्या स्तरावर पहिल्यांदाच अशी स्पर्धा पुण्यातील बालेवाडी क्रीडानगरीत आयोजित केली. पुण्याचे नाव क्रीडा क्षेत्रात आणखी उंचावण्याठी हा अल्पसा प्रयत्न सर्वांच्या मदतीने केला आहे, असे विक्रम काकडे यांनी यावेळी सांगितले.