उस्मानाबादच्या जाहीर सभेत शरद पवारांनी मोदींना दिले प्रत्युत्तर…

उमरगा– आम्ही छत्रपती शिवाजी महाराजांच्या मातीतून आलो आहोत. कुणाची कळ काढत नाही परंतु कुणी कळ काढली तर जागा दाखवल्याशिवाय राहत नाही असा इशारा राष्ट्रवादी काँग्रेसचे राष्ट्रीय अध्यक्ष शरद पवार यांनी नरेंद्र मोदी यांना दिला. उस्मानाबादचे उमेदवार राणा जगजितसिंह पाटील यांच्या प्रचारार्थ जाहीर सभेत शरद पवार यांनी मोदींवर तोफ डागतानाच त्यांनी केलेल्या टिकेलाही चोख प्रत्युत्तर दिले.

पंतप्रधान मोदी मला विचारतात की, संरक्षण खाते तुमच्याकडे असताना तुम्ही काय केले. तुमच्या कार्यकाळात देशावर जेवढे हल्ले झाले तेवढे हल्ले आम्ही होवू दिले नाही असेही शरद पवार यांनी स्पष्ट केले.उस्मानाबाद मतदारसंघाचे महाआघाडीचे उमेदवार राणा जगजितसिंह यांच्या प्रचारासाठी सर्व पुरोगामी विचारांचे नेते आज व्यासपीठावर एकवटले होते.

गेली अनेक वर्षे डॉ. पद्मसिंह पाटील यांनी उस्मानाबाद जिल्ह्यात काम केले आहे. हा भाग नेहमीच पाण्यापासून वंचित होता. अशा डॉक्टरसाहेबांकडे पाटबंधारे विभागाची जबाबदारी आली आणि आपल्या अधिकाराच्या माध्यमातून डॉक्टर साहेबांनी इथल्या पाण्याचा प्रश्न सोडवण्याचा प्रयत्न केला. त्यानंतर राणा जगजितसिंह यांनी ती जबाबदारी घेतली. लोकांनी आमदारकीच्या माध्यमातून उस्मानाबाद जिल्ह्यात राणा जगजितसिंह यांना सत्ता दिली आणि या सत्तेचा उपयोग राणा यांनी जिल्ह्याचा विकास गतिमान करण्यासाठी केला असे उदगारही शरद पवार यांनी काढले.

मी असेन किंवा शिवराज पाटील चाकुरकर असतील आम्ही देशासाठी अतोनात काम केले. आता वेळ आली आहे तरुणांनी पुढे येण्याची. त्यामुळेच आम्ही राणा जगजितसिंह यांचे नाव निवडले. मला खात्री आहे राणा जगजितसिंह योग्यप्रकारे उस्मानाबादचे प्रतिनिधित्व लोकसभेत करतील त्यामुळे तुम्ही त्यांच्या पाठिशी खंबीर उभे रहा असे आवाहन शरद पवार यांनी केले.

लातूरमध्ये भूकंप झाला त्यावेळी परिस्थिती बिकट होती मात्र केंद्रसरकार आमच्या पाठिशी उभे होते म्हणून आम्हाला संकटावर मात करता आली. या सगळ्यात शिवराज पाटील यांची भूमिका महत्त्वाची होती. लातूरकडून विलासराव मदतीला धावून आले होते. त्यामुळे या भागाला पुन्हा कणखर नेतृत्वाची गरज आहे असेही शरद पवार म्हणाले.

महाआघाडीने यावेळी सर्वच मतदारसंघात तरुण उमेदवार दिले आहेत. आम्ही जाणीवपूर्वक तरुणांची निवड केली आहे अशी पक्षाची स्पष्ट भूमिकाही शरद पवार यांनी मांडली.

गेली पाच वर्षे भाजपचे राज्य आहे. दिलेले राज्य लोकांसाठी वापरायचे असते पण ते गेल्या पाच वर्षात झाले नाही. ७० वर्षात देशात काहीच विकास झाला नाही असे मोदी बोलत आहेत. ७० वर्षात अटलबिहारी वाजपेयी ही पंतप्रधान होते मग अटलबिहारी वाजपेयी यांनीही काम केले नाही असे मोदींना म्हणायचे आहे का ? असा सवालही शरद पवार यांनी उपस्थित केला.

पंतप्रधान नरेंद्र मोदी यांना फक्त नेहरू आणि गांधी घराण्यावर टीका करायला जमतं. खरंतर मोदींना इतिहासच माहिती नाही. स्वातंत्र्य चळवळीत नेहरूंनी ९ वर्षे तुरुंगात घालवली, स्वातंत्र्य मिळाल्यानंतर जग पातळीवर पाठिंबा मिळवला आणि भारताला महाशक्ती बनवण्यास सक्षम असे काम केले.लालबहादूर शास्त्री यांच्या कणखर नेतृत्वाने पाकिस्तानला धडा शिकवला, इंदिरा गांधी यांनी अनेक ठोस निर्णय घेतले. त्यांनी इतिहास घडवला नाही तर भूगोल बदलून टाकला, राजीव गांधी यांनी भारतात तंत्रज्ञान आणले, फोन, इंटरनेट आणले हे काँग्रेसचे कर्तृत्व आहे असेही शरद पवार यांनी आपल्या भाषणात सांगितले.

आताचे पंतप्रधान लष्कराच्या कामगिरीवर स्वतःचा प्रचार करत आहेत. या सरकारला कुलभूषण जाधव यांना अजूनही सोडवता आले नाही. कुठे गेली ५६ इंचाची छाती ? असा संतप्त सवालही शरद पवार यांनी केला.

या जाहीर सभेत उस्मानाबादचे उमेदवार आमदार राणा जगजितसिंह यांनीही आपले विचार जनसमुदायासमोर मांडले.

१८ एप्रिलला मतदान आहे यावेळी आपल्या समस्या मार्गी लावणारा, केंद्राच्या योजना आणणारा नेता आपल्याला आणायचा आहे.पाच वर्षापुर्वीचे दिवस आठवा प्रत्येक गोष्टीचे आश्वासन देण्याशिवाय या सरकारने वेगळे काहीही केले नाही. नोटाबंदी, जीएसटीमुळे तरुणांचे रोजगार सुटले अनेक संकट ओढवली असल्याचे राणा जगजितसिंह पाटील म्हणाले.

आपल्या जिल्ह्यात जे काही प्रकल्प आले ते सर्व कॉंग्रेस राष्ट्रवादीच्या प्रयत्नातून पुर्ण करण्यात आले. असाच प्रयत्न करुन आपल्या जिल्ह्यासाठी कृष्णा मराठवाडा प्रकल्प पुढे आणून पुर्ण करायचा ध्यास मी घेतला आहे. मागील पाच वर्ष हा प्रकल्प केवळ रखडून ठेवण्याचे काम झाले असल्याचा आरोपही राणा जगजितसिंह पाटील यांनी केला.

माझ्या राजकीय वाटचालीत पवार साहेबांनी माझ्यावर अनेक जबाबदारी टाकल्या त्या पेलवत मी आपल्या भागात अनेक कामे पूर्ण करण्यात यशस्वी झालो असल्याचेही राणा जगजितसिंह पाटील यांनी सांगितले.

जिल्ह्यात बेरोजगारीचे प्रमाण वाढले आहे यासाठी २५०० एकरवर एमआयडीसी करण्याचा प्रयत्न आपण केला. मात्र मागील पाच वर्षांत सत्तारूढ पुढाऱ्यांनी एक बैठक देखील घेतली नाही. आज शेतकऱ्यांचे प्रश्न कोण मांडतोय याकडेच लोकांचे लक्ष आहे. आपण सत्तेत असताना शेतकऱ्यांसाठी कर्जमाफीसोबत एक ना अनेक योजना राबवल्या. हे काम राष्ट्रवादी कॉंग्रसनेच केल आहे असेही राणा जगजितसिंह पाटील म्हणाले.

सभेत राष्ट्रवादी काँग्रेसच्या महिला प्रदेशाध्यक्षा चित्रा वाघ, युवती प्रदेशाध्यक्षा कुमारी सक्षणा सलगर यांनीही आपले विचार मांडले.

पुणे : पुणे लोकसभा मतदारसंघातील भाजपचे उमेदवार गिरीश बापट यांच्या संपत्तीत गेल्या पाच वर्षांत आजच्या बाजारमूल्यांनुसार सुमारे दोन कोटी 15 लाख रुपयांनी वाढ झाली आहे. त्यांच्याकडे सध्या एकूण
सव्वापाच कोटी रुपयांची स्थावर आणि जंगम मालमत्ता आहे.

जिल्ह्याचे पालकमंत्री आणि अन्न व नागरी पुरवठामंत्री बापट यंदा लोकसभेची निवडणूक लढवीत आहेत. त्यांनी पाच वर्षांपूर्वी विधानसभा निवडणूक लढविली. होती. त्यावेळी उमेदवारी अर्जासोबत दिलेल्या शपथपत्रानुसार त्यांची एकूण संपत्ती सुमारे 3 कोटी 10 लाख 71 हजार रुपये इतकी होती. लोकसभा निवडणुकीसाठी मंगळवारी उमेदवारी अर्ज दाखल केला.

बापट यांनी सादर केलेल्या प्रतिज्ञापत्रानुसार त्यांच्याकडे रोख रक्कम अवघी ७५ हजार रुपयांची असून, पत्नीकडे फक्त २६ हजार रुपये आहेत. बापट यांच्या विविध १५ बँकांमध्ये मुदत ठेवी असून, या मुदत ठेवींची रक्कम ५२ लाख २७ हजार ९३४ रुपये आहे. विविध बचत खात्यांमध्ये त्यांच्या नावावर ३२ लाख २१ हजार १८७ रुपये आहेत. त्यांनी शेअर्समध्ये १८ हजार ३२० रुपयांची गुंतवणूक केली आहे.

पोस्ट खात्यामध्ये त्यांच्या नावावर १३ लाख ६८ हजार ६१८ रुपयांची रक्कम आहे. बापट यांच्या नावावर चार वाहने असून त्यामध्ये १९८३ या वर्षातील मर्सडिज मोटार असून, त्याची किंमत दोन लाख ३० हजार रुपये आहे. २०११ मधील पजेरो ही कार असून, तिची किंमत १८ लाख रुपये आहेत. त्यांच्याकडे १९७७ मधील बजाज स्कूटर असून त्याची किंमत एक हजार रुपये दाखविण्यात आली आहे. बापट यांच्याकडे एक लाख ३३ हजार रुपयांचे सोने आहे.

बापट यांना अमरावतील चांदूररेल्वे तालुक्यातील सावंगी मग्रापूर येथे वारसाहक्काने मिळालेली जमीन आहे. या गावामध्ये त्यांनी एक हेक्‍टर १९ गुंठे जागा २०१४ मध्ये खरेदी केली आहे. मावळमधील तळेगाव दाभाडे येथे त्यांच्या नावावर जागा असून, त्या जागेची बाजारमूल्यानुसार किंमत १६ लाख १३ हजार रुपये आहे. या ठिकाणी २००३ मध्ये १५ गुंठे जागा खरेदी केली असून, त्याची किंमत ३५ लाख ४० हजार रुपये आहे. बापट यांच्या नावावर शनिवार पेठमध्ये तीन सदनिका आहेत. बिबवेवाडी येथे एक सदनिका असून त्याची किंमत ७६ लाख २३ हजार रुपये आहे. अंधेरी येथे राजयोग सोसायटीमध्ये एक सदनिका असून त्याची बाजारमूल्यानुसार किंमत एक कोटी २८ लाख ६३ हजार रुपये दाखविण्यात आली आहे.
बापट यांच्या पत्नीकडे १४ बँकांमध्ये १५ लाख २१ हजार रुपयांच्या मुदत ठेवी आहेत. सहा बचत खात्यांमध्ये सुमारे १६ लाख रुपये आहेत. याशिवाय ३५ हजार ७०० रुपयांचे शेअर्स असून, एलआयसी आणि पोस्ट खात्यामध्ये पाच लाख ७० हजार ९०० रुपयांच्या ठेवी आहेत.

बापट यांच्या प्रतिज्ञापत्रानुसार-
पाच कोटी २६ लाख रुपये – स्थावर आणि जंगम मालमत्ता
५३ लाख ५४ हजार रुपये – पत्नीच्या नावावरील मालमत्ता
विविध १५ बँकांमध्ये मुदत ठेवी.
नावावर चार वाहने.
शनिवार पेठेत तीन सदनिका. बिबवेवाडी आणि अंधेरीमध्ये प्रत्येकी एक सदनिका.

पुणे : विधान परिषदेतील माजी आमदार आणि लोकसभा निवडणुकीतील काँग्रेस-राष्ट्रवादी काँग्रेस आघाडीचे उमेदवार मोहन जोशी यांची कौटुंबिक संपत्ती सुमारे पावणेसात कोटी रुपये आहे. लोकसभा निवडणुकीसाठी जोशी यांनी दिलेल्या शपथपत्रात कौटुंबिक संपत्तीचा उल्लेख केला आहे.

जोशी यांच्याकडे जंगम मालमत्ता 67 लाख 47 हजार रुपये असून, त्यांच्यापत्नीच्या नावे 26 लाख 72 हजार रुपये इतकी आहे. त्यामध्ये दागिने, वाहन,बँकेतील बचत खात्यातील रक्‍कम यांचा समावेश आहे. जोशी यांच्याकडे एक लाख 72 हजार 380 रुपयांची रोकड तर, पत्नीकडे एक लाख 44 हजारांची रोकड आहे.

बँकेमधील बचत खात्यात एकूण आठ लाख 85 हजार रुपये तर, पत्नीच्या नावे दोन लाख 66 हजार रुपये आहेत. वाहनांच्या ताफ्यात टोयाटो इनोव्हा आणि क्रेस्टा या दोन गाड्या आहेत. सध्या बाजारभावानुसार त्यांची किंमत सुमारे 25 लाख रुपये आहे. त्यांच्याकडे 127 ग्रॅम सोन्याचे दागिने असून, त्याची किंमत 3 लाख 61 हजार रुपये आहे. त्यांच्या पत्नीकडे 440 ग्रॅम सोन्याचे दागिने असून, त्याची किंमत सुमारे 13 लाख 61 हजार रुपये इतकी आहे. जोशी यांची कौटुंबिक स्थावर मालमत्ता सुमारे पाच कोटी 80 लाख रुपये इतकी आहे. त्यात मुळशी तालुक्‍यात अर्धा एकर जमीन असून, त्याचे बाजारभावानुसार मूल्य सात लाख रुपये आहे. याशिवाय, पुण्यातील शुक्रवार पेठ आणि मुंबईतील अंधेरी येथे दोन सदनिका आहेत. त्यांचे मूल्य सुमारे एक कोटी 53 लाख रुपये आहे. तर, पत्नीच्या नावे सोपानबाग येथील सदनिकेची किंमत सुमारे 3 कोटी 40 लाख रुपये आहे.

पार्थ, सुनेत्रा पवारांकडून घेतली ५५ लाखांची उसनी रक्कम; प्रतिज्ञापत्रात नमूद

पुणे-बारामती लोकसभा मतदार संघातील राष्ट्रवादी काँग्रेस-काँग्रेस आघाडीच्या उमेदवार विद्यमान खासदार सुप्रिया सुळे यांचे कुटुंबीय अब्जाधीश असून, सुळे कुटुंबाची एकूण संपत्ती सुमारे १६५ कोटी ४२ लाख ८९ हजार रुपयांच्या घरात पोहोचली आहे. मागील लोकसभा निवडणुकीच्या तुलनेत त्यांच्या उत्पन्नात ३२ कोटी रुपयांची भर पडली आहे. सुळे कुटुंबीयांचे वार्षिक उत्पन्न सरासरी ६.४१ कोटी रुपये असूनही त्यांनी आपले बंधू आणि माजी उपमुख्यमंत्री अजित पवार यांच्या पत्नी सुनेत्रा आणि मावळ लोकसभा मतदारसंघातील राष्ट्रवादी काँग्रेसचे उमेदवार पार्थ पवार यांच्याकडून ५५ लाख रुपये उसने घेतले आहेत.

संपत्तीची विभागणी पुढील प्रमाणे –

(एकूण संपत्ती – १६५.४२ कोटी)

 ५८.७८ कोटी-सुप्रियांची संपत्ती

 ९३.५३ कोटी-सदानंद सुळे

८.९२ कोटी-रेवती सुळे

 ४.१८ कोटी-विजय सुळे

सुळे यांनी उमेदवारी अर्ज भरताना दाखल केलेल्या प्रतिज्ञापत्रावरून ही बाब स्पष्ट झाली आहे. सुप्रिया यांच्यासह त्यांचे पती सदानंद सुळे, मुलगी रेवती आणी मुलगा विजय या चौघांच्या नावावरील एकूण संपत्ती १६५.४२ कोटी रुपये आहे. सुप्रिया यांच्या नावावर ५८ कोटी ७८ लाख ७५ हजार रुपये, सदानंद सुळे यांच्या नावावर ९३ कोटी ५३ लाख ९२ हजार रुपये, मुलगी रेवती हिच्या नावावर आठ कोटी ९२ लाख आठ हजार रुपये आणि मुलगा विजयच्या नावावर चार कोटी १८ लाख १३ हजार रुपयांची संपत्ती दाखविण्यात आली आहे.

मागील लोकसभा निवडणुकीत सुळे कुटुंबाच्या नावावर १३३.३६ कोटी रुपयांची मालमत्ता होती. त्यामध्ये सुप्रिया सुळे यांची स्थावर आणि जंगम मालमत्ता एकूण ४६ कोटी नऊ लाख ५८ हजार रुपये होती. सदानंद सुळे यांच्याकडे ८४ कोटी ४५ लाख ५० हजार रुपये, रेवतीच्या नावावर एक कोटी ४३ लाख ३० हजार आणि विजयच्या नावावर एक कोटी ४६ लाख ९६ हजार रुपये दाखविण्यात आले होते. याचाच अर्थ सुळे कुटुंबीयांच्या संपत्तीत गेल्या पाच वर्षांत सुमारे ३२ कोटी रुपयांची भर पडली आहे. सुप्रिया आणि सदानंद सुळे यांच्याकडे अनुक्रमे ~ २८ हजार ७७० आणि ~ २३ हजार ५० रुपये रोख रक्कम आहे. सुप्रिया यांच्याकडे दोन कोटी ८३ लाख २० हजार रुपयांच्या मुदत ठेवी असून, त्यांनी समभागांमध्ये सात कोटी ७७ लाख रुपयांची गुंतवणूक केली आहे. या शिवाय राष्ट्रीय बचत योजना आणि पोस्टाच्या योजनांमध्ये सुमारे सात लाख १३ हजार ५०० रुपये गुंतविले आहेत.

सुळे यांच्याकडे ५२ लाख ५४ हजार रुपयांचे सोने, दोन लाख ६७ हजार रुपयांची चांदी आणि एक कोटी ६९ लाख रुपयांचे हिरे आहेत. त्यांच्या नावावर बारामती तालुक्‍यात माळेगाव आणि ढेकळवाडी येथे जमीन असून, त्यांची किंमत एक कोटी तीन लाख सहा हजार रुपये आहे. मुंबई आणि पुण्यात (कोरेगाव पार्क) येथे फ्लॅट आहेत. या स्थावर मालमत्तेची किंमत १८ कोटी ४० लाख रुपये आहे. आश्चर्याची बाब म्हणजे १६५ कोटींची संपत्ती असणाऱ्या सुळे कुटुंबीयांच्या नावावर एकही वाहन नसल्याचेही प्रतिज्ञापत्रात नमूद करण्यात आले आहे. सदानंद यांच्याकडे ८३ कोटी ९६ लाख २४ हजार रुपयांची जंगम मालमत्ता आहे. त्यामध्ये ९५ लाख रुपयांच्या मुदत ठेवी आहेत. त्यांच्याकडे एक कोटी ८५ लाख रुपयांचे सोने, चांदी आणि हिरे आहेत. त्यांच्या नावावर जमीन नसून, पुण्यात मोदीबाग येथे फ्लॅट आहे. या फ्लॅटची किंमत चार कोटी १५ लाख रुपये आहे.

पार्थ, सुनेत्रा पवारांकडून उसनी रक्कम

सुळे कुटुंबाने पार्थ पवार यांच्याकडून २० लाख रुपये, तर सुनेत्रा पवार यांच्याकडून ३५ लाख रुपये घेतले आहेत. त्यांच्यावर अन्य कोणत्याही संस्थेचे कर्ज नसल्याचे स्पष्ट करण्यात आले आहे.

कंपन्यांना दिली सुळे दाम्पत्याने कर्जे

सुळे दाम्पत्याने भागीदारी संस्था आणि कंपन्यांना कर्जे दिली आहेत. त्यामध्ये सुप्रिया सुळे यांनी सहा कोटी ७६ लाख रुपयांची, सदानंद यांनी ३८ कोटी ३७ लाख ११ हजार रुपयांची कर्जे दिली आहेत.

विदेशी बँकांमध्येही गुंतवणूक

सुळे यांनी सुमारे दोन कोटी १४ लाख २८ हजार रुपये विदेशी बँकांमध्ये गुंतविले आहेत. त्यांचे पती सदानंद यांनीही तीन कोटी ५८ लाख ५८ हजार रुपयांची गुंतवणूक विदेशी बँकांमध्ये केली आहे.

पुणे – बारामती भाजपचे उमेदवार कांचन कुल यांच्याकडे स्थावर व जंगम मिळून 1 कोटी 87 लाख रुपयांची मालमत्ता आहे. तर त्यांचे पती आमदार राहुल कुल यांच्याकडे स्थावर व जंगम अशी एकूण 2 कोटी 57 लाख रुपयांची मालमत्ता आहे.

उमेदवारी अर्जासोबत जोडलेल्या प्रतिज्ञापत्रात ही मालमत्ता नमूद करण्यात आली असून उत्पनाचे स्रोत शेती असल्याचे नमूद केले आहे. कांचन कुल यांच्याकडे रोख रक्कम 50 हजार रुपये तर पती राहुल कुल यांच्याकडे 1 लाख 20 हजार रुपयांची रोख रक्कम आहे. कांचन कुल यांच्याकडे 3 लाख 97 हजार रुपयांच्या मुदतठेवी; तर 21 हजार रुपयांचे शेअर्स आहेत. एलआयसीमध्ये 5 लाख 50 रुपयांची रक्‍कम आहे. त्यांच्याकडे 2015 मध्ये खरेदी केलेली इनोव्हा कार असून त्याची किंमत 15 लाख रुपये इतकी आहे. तर 18 लाख रुपयांचे 550 ग्रॅम सोने तर साडेतीन किलो चांदी आहे. 44 लाख 70 हजार रुपयांची जंगम मालमत्ता आहे. राहू ता. दौंड येथे शेतजमीन आहे. येरवडा येथे 1 हजार 170 चौरस फुटांची सदनिका असून सध्या त्याचे मूल्य 82 लाख 23 हजार रुपये इतके आहे. या स्थावर मालमत्तेची एकूण किंमत 1 कोटी 42 हजार रुपये इतकी आहे. तसेच, कांचन कुल यांनी पीक कर्ज आणि वाहन कर्ज घेतले असून एकूण 6 लाख 90 हजार रुपयांचे कर्ज त्यांच्या नावावर आहे.

त्यांचे पती राहुल कुल यांच्याकडे 24 लाख 41 हजार रुपयांच्या मुदतठेवी आहेत. तसेच, 1 लाख 12 हजार रुपयांचे शेअर्स असून एलआयसीमध्ये 14 लाख 57 हजार रुपयांची गुंतवणूक आहे. कुल यांच्याकडेही इनोव्हा कार आहे. 225 ग्रॅम सोने असून त्याची किंमत 7 लाख 38 हजार रुपये इतकी असून दीड किलो चांदी आहे. राहुल कुल यांच्याकडे 67 लाख 42 हजार रुपयांची जंगम मालमत्ता आहे. स्थावर मालमत्तेमध्ये राहू 3 हेक्‍टर जमीन असून येथेच 21 हजार चौरस फूटांचे बांधकाम आहे. राहुल यांच्यावर 15 लाख 59 हजार रुपयांचे कर्ज आहे.

पुणे : गेल्या काही वर्ष भारतीय जनता पक्षातून सामाजिक कार्यात सक्रिय असलेल्या अनिल जाधव यांना वंचित बहुजन आघाडीकडून पुणे लोकसभा मतदार संघासाठी तिकीट देण्यात आले आहे. बुधवारी त्यांनी मोठी रॅली काढून आपला उमेदवारी अर्ज दाखल केला.

वंचित बहुजन आघाडीचे मार्गदर्शक भीमराव आंबेडकर यांच्या नेतृत्वाखाली ढोल ताशांच्या गजरात फुले वाडा ते जिल्हाधिकारी कार्यालयापर्यंत मिरवणूक काढण्यात आली.’एमआयएम’चे शहराध्यक्ष लियाकत खान ,भारिपचे शहराध्यक्ष अतुल बहुले, वसंत साळवे आदी सहभागी झाले होते. भारिप बहुजन महासंघ,’एमआयएम’सह वंचित बहुजन आघाडीतील घटक पक्षांचे कार्यकर्तेही मिरवणुकीत सहभागी होते. जिल्हाधिकारी कार्यालयात जाधव यांनी उमेदवारी अर्ज दाखल केला. या वेळी ‘एमआयएम’च्या नगरसेविका आणि गटनेत्या अश्विनी लांडगे, अतुल बहुले, लियाकत खान, अंजुम इनामदार आदी उपस्थित होते. ‘काँग्रेस आणि भाजपा दोन्ही एकाच नाण्याच्या बाजू असून, त्यामुळेच पुण्याचा विकास योग्य पद्धतीने झालेला नाही. वाहतूक, पाणी, कचरा आणि शिक्षण या शहराच्या प्रमुख गरजा आहेत. परंतु, आजपर्यंत भाजप आणि काँग्रेस ,राष्ट्रवादी या मूळ गरजा पूर्ण करू शकले नाहीत. हे काम आम्ही करू. प्रकाश आंबेडकर यांच्या विचारांद्वारे आघाडी नव्या विकासाची दृष्टी देईल. देशात आणि राज्यात अत्यंत उपेक्षित समाजाला उमेदवारी देऊन आघाडीने नवा इतिहास घडवला आहे. त्यामुळे परिवर्तन अटळ आहे,’असे जाधव यांनी सांगितले.

जाधव हे भाजपचे पिंपरी-चिंचवडमधील आमदार लक्ष्मण जगताप यांच्या अत्यंत जवळची व्यक्ती मानली जात. जाधव हे भाजपचे सदस्य नसले तरी त्यांनी पक्षाच्या अनेक उपक्रमांत सहभाग घेतला होता. गेल्या 15 वर्षांपासून ते सामाजिक कार्य करीत आहेत. त्यांची राज्य सरकारच्या जिल्हा जेल समितीच्या सदस्यपदी नियुक्ती करण्यात आली होती. दरम्यान 6 महिन्यांपूर्वी त्यांनी या सर्व पदांचा राजीनामा दिला आहे.

युवक असल्याने पंतप्रधान नरेंद्र मोदी यांच्या विचारांना प्रेरित होऊन ते भाजपचे काम करू लागले. मात्र आपला केवळ सत्तेसाठी वापर करण्यात येत आहे. सत्तेत जाण्याची वेळ येते तेव्हा प्रस्थापित एकत्र येऊन बहुजनांना डावलतात हे त्यांच्या लक्षात आले. त्यामुळे त्यांनी वंचित आघाडीचे नेते ऍड. प्रकाश आंबेडकर यांना भेटून पुण्यातून उमेदवारी देण्याची मागणी केली होती, अशी माहिती वंचित आघाडीकडून देण्यात आली.