पुणे-  नवनाथ शेटे स्पोर्ट्स अकादमी यांच्या तर्फे आयोजित एमएसएलटीए यांच्या मान्यतेखाली होत असलेल्या फिनआयक्यू करंडक एमएसएलटीए राज्य मानांकन 10 वर्षाखालील टेनिस स्पर्धेत मुलांच्या गटात नील केळकर, अयान शेट्टी यांनी, तर मुलींच्या गटात रित्सा कोंडकर या खेळाडूंनी मानांकित खेळाडूंवर विजय मिळवत उपांत्य फेरीत प्रवेश केला.

मेट्रोसिटी स्पोर्ट्स क्लब, आयडियल कॉलनी, कोथरूड येथील टेनिस कोर्ट येथे सुरु असलेल्या या स्पर्धेत उपांत्यपूर्व फेरीत 10 वर्षाखालील मुलांच्या गटात बिगरमानांकित पुण्याच्या नील केळकर याने अव्वल मानांकित दिवीज पाटीलचा 6-2 असा पराभव करून सनसनाटी निकालाची नोंद केली. पाचव्या मानांकित अयान शेट्टी याने तिसऱ्या मानांकित ओम वर्माचा 6-4 असा संघर्षपूर्ण पराभव करून उपांत्य फेरी गाठली. दुसऱ्या मानांकित द्रोण सुरेश याने सातव्या मानांकित आयुश पुजारीचा टायब्रेकमध्ये 6-5(5) असा पराभव केला.

मुलींच्या गटात रित्सा कोंडकर हिने अकराव्या मानांकित अनन्या दलालचा 6-0 असा पराभव केला. चौथ्या मानांकित प्रिशा शिंदे हिने पाचव्या मानांकित काव्या देशमुखचा 6-2 असा पराभव केला. दुसऱ्या मानांकित मेहक कपूरने सहाव्या मानांकित वरंदीका राजपूतवर टायब्रेकमध्ये 6-5(5) असा विजय मिळवला. तिसऱ्या मानांकित मृणाल शेळके हिने सातव्या  मानांकित ह्रितिका खपलेचा 6-3 असा पराभव करून उपांत्य फेरीत धडक मारली.

स्पर्धेचा सविस्तर निकाल: उपांत्यपूर्व फेरी: 10 वर्षाखालील मुली:
रित्सा कोंडकर वि.वि.अनन्या दलाल(11) 6-0;
प्रिशा शिंदे(4) वि.वि.काव्या देशमुख(5) 6-2;
मृणाल शेळके(3) वि.वि.ह्रितिका खपले(7) 6-3;
मेहक कपूर(2) वि.वि.वरंदीका राजपूत(6) 6-5(5);

10वर्षाखालील मुले: उपांत्यपूर्व फेरी:
नील केळकर वि.वि.दिवीज पाटील(1) 6-2;
शौनक सुवर्णा(10) वि.वि.अथर्व येलभर 6-4;
अयान शेट्टी(5)वि.वि.ओम वर्मा(3) 6-4;
द्रोण सुरेश(2) वि.वि.आयुश पुजारी(7) 6-5(5).

पुणे: पीवायसी हिंदू जिमखाना व पुणे मेट्रोपोलिटन जिल्हा टेनिस संघटना(पीएमडीटीए)तर्फे आयोजित आठव्या शशी वैद्य मेमोरियल आंतर क्लब अजिंक्यपद टेनिस स्पर्धेत प्लेट डिव्हिजन गटात पीसीएलटीए क्ले किंग्स संघाने एसपी कॉलेज 1 संघाचा 22-12 असा पराभव करून विजेतेपद संपादन केले.

पीवायसी हिंदू जिमखाना टेनिस कोर्ट येथे पार पडलेल्या या स्पर्धेत अंतिम फेरीच्या सामन्यात पीसीएलटीए क्ले किंग्स संघाने एसपी कॉलेज 1 संघाचा 22-12 असा पराभव केला.100अधिक गटात पीसीएलटीएच्या विजय खन्ना व नंदू रोकडे या जोडीने एसपी कॉलेज संघाच्या आशिष डिके व मंदार मेहेंदळे यांचा 6-1 असा तर, खुल्या गटात डॉ.राजेश मित्तल व अनंत गुप्ता यांनी एसपी कॉलेजच्या केदार पाटील व आदित्य जोशी यांचा 6-2 असा पराभव करून संघाला आघाडी मिळवून दिली. त्यानंतर 90अधिक गटात पीसीएलटीएच्या रवी जौकनीने निर्मल वाधवानीच्या साथीत एसपी कॉलेजच्या उमेश भिडे व गजानन कुलकर्णी या जोडीचा 6-3 असा पराभव करून संघाला विजयी आघाडी मिळवून दिली. खुल्या गटात पीसीएलटीएच्या प्रवीण घोडे व धर्मेश वाधवानी यांना एसपी कॉलेजच्या संतोष शहा व स्वेतल शहा या जोडीचा 4-6 असा पराभव केला. पण सामन्यात पीसीएलटीए क्ले किंग्स संघाने आपले वर्चस्व कायम राखत एसपी कॉलेज 1 संघावर 22-12 अशा फरकाने विजय मिळवला.

स्पर्धेतील विजेत्या पीसीएलटीए क्ले किंग्स संघाला करंडक व 10हजार रुपये, तर उपविजेत्या एसपी कॉलेज 1 संघाला करंडक व 5 हजार रुपये अशी पारितोषिके देण्यात आली. याशिवाय विजय खन्ना यांना उत्कृष्ट प्रौढ खेळाडू म्हणून गौरविण्यात आले.स्पर्धेचे पारितोषिक पीवायसी हिंदू जिमखानाचे अध्यक्ष डॉ.सुधीर भाटे आणि एमएसएलटीएचे मानद सचिव सुंदर अय्यर यांच्या हस्ते करण्यात आले. यावेळी क्लबच्या टेनिस विभागाचे सचिव अभिषेक ताम्हाणे, क्लबच्या क्रिकेट विभागाचे सचिव विनायक द्रविड, गिरीश करंबेळकर, सारंग लागू, कपिल खरे आदी मान्यवर उपस्थित होते.

स्पर्धेचा सविस्तर निकाल: प्लेट डिव्हीजन: उपांत्य फेरी:
पीसीएलटीए क्ले किंग्स वि.वि.लॉ कॉलेज लायन्स 22-13(100अधिक गट: नंदू रोकडे/विजय खन्ना वि.वि.केदार जाठर/श्रीकृष्णा पानसे 6-1; खुला गट: डॉ.राजेश मित्तल/अनंत गुप्ता पराभूत वि.तारख पारीख/अभिजित मराठे 4-6; 90 अधिक गट: रवी जौकनी/निर्मल वाधवानी वि.वि.शिवाजी यादव/प्रोफेसर जयभाई 6-3; खुला गट: नंदू रोकडे/गिरीश कुलकर्णी वि.वि.केतन जाठर/राहुल पंढरपुरे 6-3);

एसपी कॉलेज 1 वि.वि.महाराष्ट्र मंडळ 21-14(100अधिक गट: आशिष डिके/मंदार मेहेंदळे वि.वि.संजय सेठी/अर्जुन वाघमारे 6-1; खुला गट: आदित्य जोशी/केदार पाटील वि.वि.अभिषेक चव्हाण/रवींद्र देशमुख 6-2; 90अधिक गट: गजानन कुलकर्णी/उमेश भिडे वि.वि.कमलेश शहा/विकास बचलू 6-5(3); खुला गट: मंदार मेहेंदळे/संतोष शहा पराभूत वि.संजय सेठी/अर्पित श्रॉफ 3-6);

अंतिम फेरी:
पीसीएलटीए क्ले किंग्स वि.वि.एसपी कॉलेज 1 22-12(100अधिक गट: विजय खन्ना/नंदू रोकडे वि.वि.आशिष डिके/मंदार मेहेंदळे 6-1; खुला गट: डॉ.राजेश मित्तल/अनंत गुप्ता वि.वि.केदार पाटील/आदित्य जोशी 6-2; 90अधिक गट: रवी जौकनी/निर्मल वाधवानी वि.वि.उमेश भिडे/गजानन कुलकर्णी 6-3; खुला गट: प्रवीण घोडे/धर्मेश वाधवानी पराभूत वि.संतोष शहा/स्वेतल शहा 4-6).

पुणे : पुणे आणि बारामती लोकसभा मतदार संघातील लढतीचे चित्र सोमवारी स्पष्ट झाले असून, पुण्यात ३१, तर बारामतीत १८ उमेदवार निवडणुकीच्या रिंगणात राहणार आहेत. दोन्ही मतदारसंघात उमेदवारांची संख्या १५ पेक्षा जास्त असल्याने प्रत्येक मतदार केंद्रात इलेक्ट्रॉनिक व्होटिंग मशिनवर (ईव्हीएम) दोन बॅलेट युनिट ठेवावे लागणार आहेत. त्यानुसार पुण्यात तीन हजार ९९४, तर बारामतीत चार हजार ७४४ बॅलेट युनिटची व्यवस्था करावी लागणार आहे.

या दोन्ही मतदार संघातील उमेदवारांची अर्ज माघारीची अंतिम मुदत सोमवारी होती. पुणे लोकसभा मतदार संघातील ४३ उमेदवारांपैकी १२ उमेदवारांनी अर्ज मागे घेतले. त्यामुळे ३१ उमेदवार राहिले आहेत. बारामती लोकसभा मतदार संघात २५ उमेदवारांचे अर्ज होते. त्यापैकी सात उमेदवारांनी अर्ज मागे घेतल्याने १८ उमेदवार निवडणूक लढविणार आहेत.

‘ईव्हीएम’वर बॅलेट युनिट आणि कंट्रोल युनिट असते. यंदाची निवडणूक पारदर्शक व्हावा, यासाठी ‘व्होटर व्हेरिफायबल पेपर ऑडिट ट्रेल’ अर्थात ‘व्हीव्हीपॅट’ जोडले जाणार आहे. एका बॅलेट युनिटवर १५ उमेदवार आणि एक ‘नोटा’ असे १६ उमेदवार असतात. १५ पेक्षा जास्त उमेदवार असल्यास दोन बॅलेट युनिट ठेवावे लागतात. पुणे लोकसभा मतदार संघात १,९९७ मतदान केंद्रे असून, तेथे तीन हजार ९९४ बॅलेट युनिटची व्यवस्था करावी लागणार आहे. बारामती लोकसभा मतदार संघात दोन हजार ३७२ मतदान केंद्रे असून, प्रत्येक मतदान केंद्रात दोन याप्रमाणे चार हजार ७४४ बॅलेट युनिट असणार असल्याचे जिल्हा निवडणूक शाखेकडून सांगण्यात आले.

पुण्यात ३१, तर बारामतीत १८ उमेदवार असल्याने दोन बॅलेट युनिट ठेवले जाणार आहेत. अतिरिक्त बॅलेट युनिटची व्यवस्था केली जाणार आहे. सध्या कंट्रोल युनिट आणि व्हीव्हीपॅटची संख्या अतिरिक्त आहे. मतदानाची सर्व प्रकारची तयारी करण्यात आली आहे.

– मोनिका सिंह

उप मुख्य निवडणूक अधिकारी

————————-

पुण्यातील प्रमुख उमेदवार

गिरीश बापट (महायुती)

मोहन जोशी (महाआघाडी)

अनिल जाधव (वंचित बहुजन आघाडी)

उत्तम शिंदे (बसप)

………

बारामतीतील प्रमुख उमेदवार

कांचन कुल (महायुती)

सुप्रिया सुळे (महाआघाडी)

नवनाथ पडळकर (वंचित बहुजन आघाडी)

मंगेश वनशिव (बसप)

पुणे- उमेदवाराने निवडणूक प्रक्रियेदरम्‍यान नामनिर्देशन पत्र दाखल करण्‍यापूर्वी निवडणुकीच्‍या अनुषंगाने खर्च केला असल्‍यास तो खर्चात दाखवावा तसेच प्रचारा दरम्‍यान होणारा खर्च वेळेवर सादर करावा,असे जिल्‍हाधिकारी तथा जिल्‍हा निवडणूक अधिकारी नवल किशोर राम यांनी सांगितले. जिल्‍हाधिकारी कार्यालयात राजकीय पक्षांच्‍या बैठकीत ते बोलत होते. निवडणुकीच्‍या संदर्भात निवडणूक आयोगाच्‍या सूचना,आदर्श आचार संहिता, इलेक्‍ट्रॉनिक व्‍होटींग मशीन याबाबत या बैठकीत माहिती देण्‍यात आली. यावेळी केंद्रीय निवडणूक निरीक्षक राजीव श्रीवास्‍तव, रजत अग्रवाल, केंद्रीय खर्च निरीक्षक प्रियंका गुलाटी, निवासी उप जिल्‍हाधिकारी डॉ. जयश्री कटारे, निवडणूक खर्च व्‍यवस्‍थापनचे अजित रेळेकर, एक खिडकी योजनेचे सुहास मापारी, इव्‍हीएम व्‍यवस्‍थापनचे विजयसिंह देशमुख आणि इतर अधिकारी उपस्थित होते.

जिल्‍हाधिकारी राम यांनी उपस्थितांचे शंका निरसन केले. निवडणूक खर्च आणि सोशल मिडीयावरील प्रश्‍नांना समाधानकारक उत्‍तरे दिली. जिल्‍हाधिकारी राम म्‍हणाले, उमेदवाराकडून निवडणुकी दरम्‍यान वेळोवेळी विविध प्रकारच्‍या परवानग्‍या, परवाने घेतले जातात. त्‍या अनुषंगाने रॅली, मेळावे, रेडिओ प्रक्षेपण, व्‍हीडीओ चित्रीकरण, दूरदर्शन प्रक्षेपण, पथनाट्य, मोबाईलवरील एसएमएस, फेसबुक, सोशल मिडीयाद्वारे प्रचारयंत्रणा राबविली जाते. अशावेळी उमेदवार किंवा उमेदवारांच्‍या खर्चासाठी नेमलेल्‍या प्रतिनिधीकडून निवडणूक कार्यालयाला खर्चाची माहिती दिली जात नाही. त्‍यामुळे हिशोबामध्‍ये चूक होऊन तफावत निर्माण होते, म्‍हणून परवानगी घेतल्‍याबरोबर झालेल्‍या कार्यक्रमाच्‍या अनुषंगाने लगेच दुस-या दिवशी असा खर्च खर्चाच्‍या नोंदवहीमध्‍ये सविस्‍तरपणे नोंदविणे आवश्‍यक असल्‍याचे त्‍यांनी सांगितले.

केवळ राजकीय पक्षांच्‍या नेत्यांच्‍या सूचीतील नेत्‍यांचा (स्‍टार कॅम्‍पेनर) प्रवासावरील खर्च उमेदवाराच्‍या निवडणूक खर्चाच्‍या हिशेबामध्‍ये समाविष्‍ट करण्‍यातून सूट देता येईल, बाकी इतर सर्व खर्च उमेदवाराच्‍या निवडणूक खर्चात धरावयाचा आहे, असे स्‍पष्‍ट करुन जिल्‍हाधिकारी राम म्‍हणाले, राजकीय पक्षांनी अन्‍य अधिसंघांनी केलेले /अधिकृत केलेले अन्‍य सर्व खर्च उमेदवारांच्‍या हिशोबामध्‍ये समाविष्‍ट करणे आवश्‍यक आहे.

विजयसिंह देशमुख यांनी इव्‍हीएम, व्‍हीव्‍हीपॅट बाबतच्‍या प्रश्‍नांना तर निवडणूक खर्च व्‍यवस्‍थापनचे अजित रेळेकर यांनी खर्चविषयक प्रश्‍नांना उत्‍तरे दिली. बैठकीस विविध राजकीय पक्षाचे प्रतिनिधी आणि समन्‍वय अधिकारी उपस्थित होते.

पुणे: पीवायसी हिंदू जिमखाना व पुणे मेट्रोपोलिटन जिल्हा टेनिस संघटना(पीएमडीटीए)तर्फे आयोजित आठव्या शशी वैद्य मेमोरियल आंतर क्लब अजिंक्यपद टेनिस स्पर्धेत इलाईट डिव्हिजन गटात पीवायसी अ संघाने पीवायसी ब संघाचा 21-11 असा पराभव करून विजेतेपद संपादन केले.

पीवायसी हिंदू जिमखाना टेनिस कोर्ट येथे पार पडलेल्या या स्पर्धेत पीवायसी अ संघाने आपली विजयी मालिका कायम ठेवत सलग आठव्या वर्षी विजेतेपदाचा मान पटकावला. अंतिम फेरीच्या सामन्यात 100 अधिक गटात पीवायसी अ संघाच्या केदार शहा व डॉ.अभय जमेनिस यांना पीवायसी ब संघाच्या अनुप मिंडा व हिमांशू गोसावी यांनी 3-6 असे पराभूत केले.त्यानंतर खुल्या गटात पीवायसी अ संघाच्या अभिषेक ताम्हाणे व केतन धुमाळ यांनी  पीवायसी ब संघाच्या योगेश पंतसचिव व अमित लाटे या जोडीचा 6-3 असा पराभव करून संघाला बरोबरी साधून दिली. 90 अधिक गटात पीवायसी अ संघाच्या ऋतू कुलकर्णीने जयंत कढेच्या साथीत सारंग पाबळकर व सुंदर अय्यर यांचा 6-0 असा तर, खुल्या गटात पीवायसी अ संघाच्या केदार शहा व प्रशांत सुतार या जोडीने पीवायसी ब संघाच्या अमोघ बेहेरे व अनुप मिंडा यांचा 6-2 असा सहज पराभव करून संघाचा विजय सुकर केला.

स्पर्धेतील विजेत्या पीवायसी अ संघाला 40हजार रुपये व शशी वैद्य मेमोरियल करंडक, तर उपविजेत्या पीवायसी ब संघाला 15हजार रुपये व करंडक अशी पारितोषिके देण्यात आली. स्पर्धेचे पारितोषिक पीवायसी हिंदू जिमखानाचे अध्यक्ष डॉ.सुधीर भाटे आणि एमएसएलटीएचे मानद सचिव सुंदर अय्यर यांच्या हस्ते करण्यात आले. यावेळी क्लबच्या टेनिस विभागाचे सचिव अभिषेक ताम्हाणे, क्लबच्या क्रिकेट विभागाचे सचिव विनायक द्रविड, गिरीश करंबेळकर, सारंग लागू, कपिल खरे आदी मान्यवर उपस्थित होते.

स्पर्धेचा सविस्तर निकाल: अंतिम फेरी:
पीवायसी अ वि.वि.पीवायसी ब 21-11(100अधिक गट: केदार शहा/डॉ.अभय जमेनिस पराभूत वि.अनुप मिंडा/हिमांशू गोसावी 3-6; खुला गट: अभिषेक ताम्हाणे/केतन धुमाळ वि.वि.योगेश पंतसचिव/अमित लाटे 6-3; 90अधिक गट: ऋतू कुलकर्णी/जयंत कढे वि.वि.सारंग पाबळकर/सुंदर अय्यर 6-0; खुला गट: केदार शहा/प्रशांत सुतार वि.वि.अमोघ बेहेरे/अनुप मिंडा 6-2).