पुणे – एकीकडे पुण्यात २३ एप्रिल ला लोकसभेसाठी मतदान होत असताना ,दुसरीकडे पुण्यातील पाणीवाटपाची भूमिका जाहीर करा, असे आदेश मुंबई उच्च न्यायालयाने  राज्य सरकारला दिले.या पार्श्वभूमीवर मतदान होईपर्यंत पाणी कपात भासू द्यायची नाही आणि मतदानानंतर मात्र धरणातील पाणी साठ्याचा मुद्दा उपस्थित करत पाणी कपात तर करण्यात येणार नाही ना ? असा प्रश्न नागरिकांना भेडसावू लागला आहे. आणि आता याबाबत खरोखर २२ एप्रिल ला तरी चित्र स्पष्ट होईलका हा हि मुद्दा उपस्थित होतो आहे .

पुणे महापालिकेच्या हद्दीतील वाढत्या लोकसंख्येनुसार शहराचा पाण्याचा कोटा वाढवून देणार, की यापूर्वी निश्‍चित केलेल्या कोट्यानुसारच पाणी देणार याबाबतचा निर्णय घ्यायचा असून, महाराष्ट्र जलसंपत्ती नियमन प्राधिकरणाने महापालिकेसाठी ठरवून दिलेला पाण्याचा कोटा मान्य नसल्यास महापालिकेने त्याविरोधात न्यायालयात बाजू मांडावी, असेही आदेशात म्हटले आहे.

शहराचा वाढता विस्तार आणि लोकसंख्या लक्षात घेऊन, पुण्यासाठी 18 टीएमसी पाणी मिळावे, अशी याचिका महाराष्ट्र नवनिर्माण सेनेचे योगेश खैरे आणि संतोष पाटील यांनी उच्च न्यायालयात दाखल केली होती. याशिवाय पुण्यासाठी निश्‍चित केलेल्या पाण्यापेक्षा अतिरिक्त पाणी दिले जात असल्याने ग्रामीण भागातील शेतीसाठी पाणी मिळत नसल्याची तक्रार करत एका शेतकऱ्याने उच्च न्यायालयात धाव घेतली होती. खैरे आणि पाटील यांच्या याचिकेवरील सुनावणी बुधवारी झाली.

जलसंपदा विभाग आणि पुणे महापालिका यांच्यातील पाणीवाटपाचा करार फेब्रुवारीमध्येच संपला असून, नव्याने करार करताना सध्याचा कोटा कायम ठेवला जाणार आहे, की त्यात वाढ करण्यात येणार आहे, अशी विचारणा न्यायालयाने केली. या संदर्भातील सरकारची भूमिका 22 एप्रिलपर्यंत सादर करावी, अशा सूचना न्यायालयाने बुधवारच्या सुनावणीवेळी दिल्या. मनसेच्या पदाधिकाऱ्यांच्या याचिकेसह शेतकऱ्यांच्या पाण्याच्या मागणीबाबतच्या याचिकेची सुनावणी एकत्र घेणार असल्याचेही न्यायालयाने यावेळी नमूद केले.

दरम्यान, जलसंपत्ती प्राधिकरणाने दिलेला निर्णय महापालिकेला मान्य नसेल, तर त्याविरोधात दाद मागण्याचा पर्याय खुला असल्याचे न्यायालयाने महापालिकेला सांगितले. शहराच्या 2011 च्या जनगणनेनुसार 33 लोकसंख्येसाठी आवश्‍यक 8.15 टीएमसी पाणीच शहराला देण्यात यावे, असा निर्णय प्राधिकरणाने घेतला होता. मात्र, पुण्याच्या पाण्यात कोणतीही कपात केली जाणार नाही, असे स्पष्ट करत सध्याचा दैनंदिन पाणीपुरवठा कायम राहणार असल्याचे संकेत मुख्यमंत्री देवेंद्र फडणवीस यांनी दिले होते. मात्र तरीही पाटबंधारे खात्याने तीन वेळा पुण्याचे पाणी तोडले होते.

जल न्यायाधिकरणाच्या आदेशानुसार शहराची लोकसंख्या 50 लाखांच्या पुढे असून, त्याचे सर्व पुरावे जोडून महापालिकेने पाणी कोटा वाढवून देण्याचा सविस्तर प्रस्ताव नुकताच जलसंपदा विभागाला सादर केला आहे. आचारसंहिता संपल्यानंतर त्यावर निर्णय होणे अपेक्षित असून, तत्पूर्वी पुढील सुनावणीवेळा न्यायालयाकडून काही अंतरिम आदेश दिले जाणार का, याकडे सर्वांचे लक्ष लागले आहे.

पुणे-अधिकृत परवाना असूनही अतिक्रमण विरोधी पथकाने कारवाई करून माल जप्त केल्याप्रकरणी महापालिकेच्या अतिक्रमण विभागाच्या उपायुक्तांसह निरीक्षक आणि कर्मचारी अशा एकूण सहा जणांवर दत्तवाडी पोलिस ठाण्यात दरोड्याचा गुन्हा दाखल करण्यात आला आहे. रामकृष्ण मठासमोरील हातगाडी आणि त्यावरील माल उचलून नेण्यात आला होता. संबंधित व्यावसायिकाने न्यायालयात धाव घेतल्यानंतर, न्यायालयाच्या आदेशाने दत्तवाडी पोलिस ठाण्यात गुन्हा दाखल करण्यात आला आहे.

या प्रकरणी बालाजी रघुनाथ वायकर (शिवमंदिराच्या पाठीमागे) यांनी फिर्याद दिली आहे. त्यावरून माधव केशवराव जगताप (उपायुक्त, अतिक्रमण विभाग, पुणे महापालिका), मेघा सचिन राऊत (सहायक अतिक्रमण निरीक्षक), गणेश रामचंद्र तारू, सुभाष रामचंद्र जगताप, संजय दत्तात्रय कुंभार, मंगेश गायकवाड अशी गुन्हा दाखल करण्यात आलेल्यांची नावे आहेत.

पोलिसांनी दिलेल्या माहितीनुसार, वायकर यांचा सिंहगड रस्त्यावरील रामकृष्ण मठासमोर हातगाडीवर खाद्यपदार्थ विक्रीचा व्यवसाय आहे. ३ जानेवारी २०१९ मध्ये अतिक्रमण विरोधी विभागाने कारवाईत करताना त्यांची हातगाडी व त्यावरील माल उचलून नेला. दरम्यान, वायकर यांच्याकडे हातगाडी परवाना आहे. तरीही त्यांची गाडी उचलून नेण्यात आली, असे त्यांनी दिलेल्या फिर्यादीत नमूद केले आहे. या संदर्भात त्यांनी न्यायालयात धाव घेतली होती. न्यायालयाने दिलेल्या आदेशानुसार १५८ (३) नुसार दत्तवाडी पोलिसांनी संबंधितांवर गुन्हा दाखल केला आहे.

या प्रकाराबाबत अपील केले आहे. ही तक्रार पूर्णपणे खोटी आणि अनधिकृत पथारी व्यवसायांवर कारवाई होऊ नये, यासाठी केलेली दिसते. खोट्या तक्रारींसाठी सबंधितांवर कारवाई करण्यात येणार आहे.

पुणे-बिबवेवाडी परिसरातील एका बंगल्यात चालणाऱ्या जुगार अड्डयावर गुन्हे शाखेच्या पोलिसांनी गुरुवारी दुपारी छापा टाकून २६ जणांना ताब्यात घेतले. या वेळी पोलिसांनी २७ मोबाइल आणि सहा लाख ७३ हजार ६६० रुपयाचा मुद्देमाल जप्त केला.

गुन्हे शाखेच्या पोलिसांनी ताब्यात घेतले सर्वजण परिसरातील प्रतिष्ठीत असल्याचे बोलले जात आहे. पोलिसांनी क्‍लबचा मालक योगेश किशोर नांगरे, मॅनेजर शेंडे गुंडेराव कडाजीराव यांच्यासह तेथे जुगार खेळण्यासाठी आलेल्यांना ताब्यात घेतले. गुन्हे शाखेचे सहायक आयुक्‍त भानुप्रताप बर्गे आणि पथकाने ही कारवाई केली.

बिबवेवाडी परिसरातील स्वामी समर्थनगर येथील बंगला क्रमांक २१ मध्ये एक जुगार अड्डा (क्‍लब) सुरू असल्याची माहिती भानुप्रताप बर्गे यांना मिळाली होती. त्यानुसार सहायक निरीक्षक अश्‍विनी जगताप, कर्मचारी शंकर संपते, नीलेश पालवे, सुधीर इंगळे, राहुल सकट आणि प्रमोद माळी यांच्या पथकाने क्‍लबवर छापा टाकला. या प्रकरणी बिबवेवाडी पोलिस ठाण्यात गुन्हा दाखल करण्यात आला आहे. गुन्ह्याचा पुढील तपास बिबवेवाडी पोलिस करीत आहेत.

पुणे-मुकुंद नगर भागातील रांका हॉस्पिटल चौकात पोलिसांच्या स्वारगेट पोलिसांच्या भरारी पथकानं आज २० लाखांची रोकड जप्त केली. पहाटे तीनच्या सुमारास ही कारवाई करण्यात आली. गाडीच्या डिकीमध्ये ही रक्कम लपवण्यात आली होती. जप्त रक्कम ज्या गाडीत ठेवण्यातआली होती, ती गाडी राजेश रतनचंद ओसवाल, (वय ४९) यांच्या मालकीची आहे. ओसवाल हे तेलाचे व्यापारी आहेत. दिवसभराच्या व्यवहारांतून ही रक्कम जमा झाली असल्याचं ओसवाल यांच्यातर्फे सांगण्यात आलं आहे. जप्त रक्कम स्वारगेट पोलीस ठाण्याकडं जमा करण्यात आली असून या प्रकरणी तपास सुरू आहे.

पुणे- केंद्रीय निवडणूक निरीक्षकांच्‍या उपस्थितीत जिल्‍हाधिकारी नवल किशोर राम यांनी मावळ आणि शिरुर लोकसभा मतदार संघातील निवडणुकीच्‍या तयारीचा आढावा घेतला. जिल्‍हाधिकारी कार्यालयात झालेल्‍या बैठकीस मावळ लोकसभा मतदार संघासाठीचे सर्वसाधारण निवडणूक निरीक्षक अशोक कुमार सिंग,शिरुर लोकसभा मतदार संघासाठीचे सर्वसाधारण निवडणूक निरीक्षक एस. हरीकिशोर,पोलीस ऑब्‍झर्व्‍हर आभासकुमार, मावळच्‍या निवडणूक निर्णय अधिकारी कविता द्विवेदी, शिरुरचे निवडणूक निर्णय अधिकारी रमेश काळे, पोलीस अधीक्षक संदीप पाटील, निवासी उपजिल्‍हाधिकारी डॉ. जयश्री कटारे, उप जिल्‍हा निवडणूक अधिकारी मोनिका सिंह, अतिरिक्‍त पोलीस आयुक्‍त एम.एम. रानडे, पोलीस उपायुक्‍त मितेश घट्टे, समन्‍वय अधिकारी नंदिनी आवडे, अजित रेळेकर, महेश आव्‍हाड, दिलीप गावडे आदींची प्रमुख उपस्थिती होती.

लोकसभा निवडणुकीच्‍या चौथ्‍या टप्‍प्यात मावळ आणि शिरुर लोकसभा मतदार संघाची निवडणूक होणार आहे. या निवडणुकीत वेगवेगळ्या माहिती-तंत्रज्ञान साधनांचा वापर करण्‍यात येत आहे,त्‍यानुसार निवडणुकीशी संबंधित सर्व अधिकारी-कर्मचा-यांना प्रशिक्षण देण्‍यात आले असल्याचे जिल्‍हाधिकारी राम यांनी सांगितले. दिव्‍यांग मतदारांवरही यावेळी विशेष लक्ष केंद्रीत करण्‍यात आले असून एकही मतदार सुटता कामा नये, हे लक्षात घेवून मतदान केंद्रावर आवश्‍यक त्‍या सुविधा उपलब्‍ध करुन देण्‍यात येतील, असेही त्‍यांनी सांगितले.

बैठकीत सी-व्‍हीजील अॅप, एक खिडकी योजना, टपाली मतपत्रिका, वेब कास्‍टींग, सूक्ष्‍म निरीक्षक,निवडणूक खर्च देखरेख आदींची माहिती देण्‍यात आली.

जिल्‍हा पोलीस अधीक्षक संदीप पाटील यांनी अवैध शस्‍त्रजप्‍ती, कायदा व सुव्‍यवस्‍था याबद्दलची माहिती दिली. जिल्‍ह्यातील निवडणूक तयारी उत्‍तम दिसत असून निवडणुका शांत आणि नि:पक्ष वातावरणात पार पडतील असा विश्‍वास निवडणूक निरीक्षकांनी व्‍यक्‍त केला.

पुणे : “महात्मा फुले व सावित्रीबाई फुले यांनी समानतेचा आदर्श घालून दिला. त्याच वाटेवर महात्मा गांधी (बापू) आणि कस्तुरबा गांधी (बा) यांचे सहजीवन प्रेरणादायी आहे. अखेरच्या काही दिवसांत बा आणि बापू यांच्यातील भावनिक नाते, करावासातील दिवस, कस्तुरबांचे, सहकारी महादेवभाई देसाईंचे निधन, बापूंच्या मनातील अस्वस्थता यासह अनेक गोष्टींचा दैनंदिनी स्वरूपातील आढावा आपल्याला बापू नव्याने उलगडणारा आहे,” असे प्रतिपादन ज्येष्ठ सामाजिक कार्यकर्त्या सुनीती सु. र. यांनी केले.

कस्तुरबा गांधी राष्ट्रीय स्मारक ट्रस्ट इंदोर महाराष्ट्र शाखा, सासवड आणि नगर रस्त्यावरील गांधी नॅशनल मेमोरियल सोसायटी आगाखान पॅलेस यांच्या संयुक्त विद्यमाने आयोजित पूज्य ‘बा’ अर्थात कस्तुरबा गांधी यांच्या १५० व्या जयंतीनिमित्त ‘बापूंच्या कारावासाची कहाणी’ पुस्तकाच्या प्रकाशन सोहळ्यावेळी सुनीती सु. र. बोलत होत्या. हिंदी लेखिका स्वर्गीय डॉ. सुशीला नैय्यर लिखित मूळ पुस्तकाचा मराठी अनुवाद डॉ. शोभनाताई रानडे यांनी केला आहे. आगाखान पॅलेस येथील कस्तुरबा स्मृती सभागृहात झालेल्या या सोहळ्यावेळी ट्रस्टचे माजी अध्यक्ष धीरूभाई मेहता, अध्यक्ष डॉ. करुणाकर त्रिवेदी, उपाध्यक्षा गायत्रीदास दीदी, ज्येष्ठ पत्रकार अरुण खोरे उपस्थित होते.

सुनीती सु. र. म्हणाल्या, “डॉ. सुशीला बापूंच्या सोबत होत्या. त्यामुळे बापूंचे दैनंदिन जीवन त्यांनी शब्दबद्ध केले होते. डॉ. शोभनाताईंनी समर्पक असे त्याचे मराठीत रूपांतर केले आहे. आगाखान पॅलेसमधील त्या भरलेल्या दिवसांची आठवण या पुस्तकामुळे होत आहे. त्याचबरोबर आजच्या गंभीर कालखंडात हे पुस्तक दिशा दाखवणारे ठरेल. लोकशाही वाचविण्यासाठी या पुस्तकातील मूल्ये उपयुक्त ठरतील.”

अरुण खोरे म्हणाले, “गांधी दाम्पत्याच्या शेवटच्या काळातील सहजीवन उलगडणारे हे पुस्तक आहे. आगाखान पॅलेसमधील दिवस हे भारताच्या इतिहासाला वळण देणारे होते. कस्तुरबांविषयीच्या लेखनाला लेखकांनी उशिरा सुरुवात केली. परंतु, अलीकडे चांगली पुस्तके येताहेत, ही आनंदाची बाब आहे. आजच्या गढूळ वातावरणात अशा प्रकारची पुस्तके मार्गदर्शक ठरतील.”

अध्यक्षीय भाषणात डॉ. करुणाकर त्रिवेदी म्हणाले, “गांधीजींनी आपले महत्वाचे दिवस पुण्यात आणि महाराष्ट्रात घालवले. त्यांचे कार्य नव्या पिढीला समजण्यासाठी अशी पुस्तके व्हायला हवीत. लवकरच या पुस्तकाला डिजिटल स्वरूपात आणले जाणार आहे. गांधी विचार पोहोचवण्यासाठी ट्रस्ट नियमितपणे कार्यरत आहे.”

धीरूभाई मेहता, गायत्रीदास दीदी, डॉ. शोभनाताई रानडे यांनीही मनोगते व्यक्त केली. पुस्तकनिर्मितीतील सहकार्याबद्दल हनुमंता जगनगडा, चतुराताई यांना सन्मानित करण्यात आले. कार्यक्रमाचे संयोजन शेवंताताई चव्हाण यांनी केले. आशा कुलकर्णी यांनी सूत्रसंचालन केले. गणेश धोत्रे यांनी आभार मानले.

पुणे :- भारतरत्न डॉ. बाबासाहेब आंबेडकर यांच्या १२८ व्या जयंतीदिना निमित्त दलित इंडियन चेंबर ऑफ कॉमर्स अँड इंडस्ट्रीजच्या(डिक्की) १४ व्या वर्धापन दिनाचे आयोजन करण्यात आले आहे.हा कार्यक्रम येत्या शनिवारी १३ एप्रिल रोजी सकाळी १० ते ५ या वेळेत हॉटेल लेमन ट्री येथे होणार आहे. यावेळी डिक्कीचा १४ वर्षांचा प्रवास तसेच डॉ. बाबासाहेब आंबेडकरांचे आर्थिक विचार आणि आजचे महत्त्व, चौथी औद्योगिक क्रांती आणि राज्य व केंद्र शासनाच्या विविध योजना, विविध क्षेत्रातील उपलब्ध असणाऱ्या संधी याबाबत मार्गदर्शन करण्यात येणार आहे.

या कार्यक्रमाचे उद्घाटन प्रसिद्ध उद्योजक व डिक्की महाराष्ट्राचे मेंटॉर अशोक खाडे यांच्या हस्ते होणार आहे. यावेळी डिक्कीचे संस्थापक अध्यक्ष पद्मश्री मिलिंद कांबळे, डिक्की पश्चिम विभाग उपाध्यक्ष अविनाश जगताप,डिक्की नॅशनल वुमन विंगच्या मेंटॉर सीमा कांबळे, डिक्की महाराष्ट्र प्रदेश अध्यक्ष संतोष कांबळे,डिक्की पुणे अध्यक्ष अनिल ओव्हाळे उपस्थित राहणार आहेत.हा कार्यक्रम सशुल्क असून इच्छुक सभासदांनी कार्यक्रमासाठी आवर्जून उपस्थित रहावे असे आवाहन  डिक्कीच्या वतीने करण्यात आली आहे.