पुणे-पुण्यात चार दशके राजकीय क्षेत्रात काम करताना गिरीश बापट यांना पूर्ण पाच वर्ष पालकमंत्री
पदाची संधी मिळाली होती या आधारावर ते पुण्याचा भरीव विकास करतील अशी अपेक्षा होती.
पण ही अपेक्षा पूर्ण फोल ठरली असून बापटांनी पालकमंत्री पदाची ही संधी वाया घालवली आहे
अशी टीका काँग्रेस-राष्ट्रवादी कॉंग्रेस व मित्रपक्षांच्या आघाडीचे उमेदवार मोहन जोशी यांनी केली.
आज वडगाव शेरी विधानसभा मतदार संघातील भव्य प्रचार फेरीनंतर ते बोलत होते. ते म्हणाले
की, बापट साहेबांनी पुण्याचे मूलभूत प्रश्नांकडे दुर्लक्ष केले. काल बापट साहेब मार्केट यार्ड
परिसरात गेले होते तेथील समस्यांकडे आपण लक्ष देऊ असे आश्वासन त्यांनी तेथे दिले, पण
गेल्या पाच वर्षात त्यांना तेथील एकही समस्या का सोडवता आली नाही हा मुख्य प्रश्न आहे.
पुणे शहराच्या सर्वच भागात भाजप आणि बापट यांच्या विषयी हाच प्रश्न आहे. मेट्रो मार्गी
लावली म्हणून प्रत्येक सभेत ते पाठ थोपटून घेत असले तरी पुण्याच्या मेट्रोला भाजप सरकारने
तीन वर्षे उशीर लावला त्यामुळे या प्रकल्पाचा खर्च किमान अडीच ते तीन हजार कोटींनी वाढला.
भाजपच्या या बेफिकिरीचा बोजा पुणेकरांनाच सोसावा लागणार आहे. पूर्ण एकहाती सत्ता
असतानाही भाजप पुण्यात काहीच करू न शकल्याने या पक्षाविषयी लोकांमध्ये कमालीचे नैराश्य
आहे त्याची प्रचिती या निवडणुकीत निश्चित दिसून येईल असेही जोशी म्हणाले.या रॅली मध्ये अ.
भा. कॉंग्रेस पक्षाच्या चिटणीस व महाराष्ट्राच्या सहप्रभारी सोनल पटेल या देखील सहभागी झाल्या
होत्या.

आज वडगाव शेरी विधानसभा मतदार संघातील प्रचार रॅलीची सुरवात शेकडो कार्यकर्त्यांच्या
समवेत शिवाजी पुतळा येथून झाली. प्रथम छत्रपती शिवाजी महाराजांच्या पुतळ्यास पुष्पहार
अर्पण करून या रॅली चा प्रारंभ झाला.
उमेदवार मोहन जोशी यांच्याशी हस्तांदोलन करून त्यांना शुभेच्छा देण्यासाठी जमलेल्या
नागरिकांची गर्दी होती. ही रॅली चंदन नगर – खराडी – खराडी गाव –आपले घर –
बायपास चौक – खुळेवाडी – पाण्याची टाकी – सोमनाथ नगर – गणेश नगर – साईनाथ नगर –
वडगावशेरी – कल्याणी नगर – नगर रोड – साईबाबा मंदिर येथे समाप्त झाली.
माजी आमदार बापूसाहेब पठारे, सुनील टिंगरे, सुमन पठारे, भय्यासाहेब जाधव , महेंद्र पठारे,नारायण
गलांडे, सुनील मलके, महादेव पठारे, संगीता देवकर, राजेंद्र शिरसाठ, राहुल शिरसाठ, उषा गलांडे,

संतोष गलांडे, राजेंद्र खांदवे, अरुण वाघमारे, रमेश सकट, विनय माळी, जितेंद्र गुप्ता, अॅड. रोकडे, बाबा
नायडू, शिवानी माने, विशाल मलके, सुनिता भोसले, विजय साबळे, मुकुंद गलांडे, रवींद्र गलांडे, भीमराव
गलांडे, यांसह कॉंग्रेस – राष्ट्रवादी कॉंग्रेस व मित्रपक्षांचे  कार्यकर्ते सहभागी झाले होते.

कॉंग्रेस – राष्ट्रवादी कॉंग्रेस व मित्र पक्ष आघाडीचे उमेदवार मोहन जोशी यांचा एकत्रित प्रचार करण्यासाठी
कॉंग्रेस व राष्ट्रवादीचे सर्व माजी महापौर, माजी उपमहापौर, माजी स्थायी समिती अध्यक्ष, माजी शिक्षण
मंडळ अध्यक्ष, माजी पीएमटी अध्यक्ष यांचा एकत्रित मेळावा, राष्ट्रवादी कॉंग्रेस जेष्ठ नेते व माजी
उपमहापौर उल्हास ढोले पाटील यांच्या पुढाकाराने आयोजित करण्यात आला. यामध्ये मोहन जोशी यांना
मोठ्या बहुमताने निवडून आणण्याचा निर्धार केला गेला. तसेच गुरुवार दिनांक १७ एप्रिल रोजी सकाळी
९.०० वाजता लोकमान्य टिळक पुतळा महात्मा फुले मांडई येथून हे सर्व माजी पदाधिकारी अलका टॉकीज
पर्यंत ‘भाजप हाटाओ- देश बजाव’ रॅली काढणार आहेत.

पुणे-‘गेल्या पाच वर्षातील मोदी सरकारच्या राजवटीमुळे देशाचे संविधान, तसेच
लोकशाही, धर्मनिरपेक्षता, स्वातंत्र्य, समता, बंधुभाव ही महत्वाची मूल्ये धोक्यात आली आहेत.
त्यामुळे मोदी सरकार पुन्हा सत्तेवर आल्यास ही मूल्ये टिकतील का नाही याबद्दलच शंका आहे
त्यामुळे या लोकसभा निवडणुकीत भाजपचा निर्णायक पराभव होणे आवश्यक आहे असे आवाहन
ज्येष्ठ अर्थतज्ज्ञ् आणि काँग्रेसचे माजी खासदार भालचंद्र मुणगेकर यांनी केले आहे. काँग्रेस-
राष्ट्रवादी काँग्रेस -मित्र पक्ष आणि आघाडीचे उमेदवार मोहन जोशी यांच्या प्रचारार्थ काँग्रेस भवन
येथे आयोजित करण्यात आलेल्या पत्रकारपरिषदेत मुणगेकर बोलत होते. याप्रसंगी काँग्रेसचे
प्रवक्ते व आमदार शरद रणपिसे, राष्ट्रवादीचे अंकुश काकडे, प्रदेश काँग्रेसच्या सदस्य शानी नौशाद,
दलित चळवळीतील नेते रतनलाल सोनग्रा आदी उपस्थित होते.
मोदी सरकारच्या राजवटीवर घणाघाती टीका करताना भालचंद्र मुणगेकर पुढे म्हणाले,
मोदी सरकारने सत्तेवर येण्यापूर्वी जनतेला जी आश्वासने दिली होती त्यातील एकही पाळले नाही.
लोकसभा निवडणुकीनिमित्त तयार करण्यात आलेला भाजपचा जाहीरनामा देखील पराभूत
मानसिकतेतून तयार करण्यात आल्याचे स्पष्ट दिसते. या जाहीरनाम्यात २०१४ साली दिलेली
आश्वासनेच देण्यात आली आहेत याचा अर्थ गेल्या पाच वर्षात मोदी सरकारने काय केले? हा
प्रश्न निर्माण होतो. मोदी सरकारने दोन कोटी रोजगाराचे आश्वासन दिले होते मात्र प्रत्यक्षात चार
कोटी लोकांचे रोजगार गेले आणि पाच कोटी लोक रोजगाराच्या प्रतीक्षेत आहेत असे सांगून
मुणगेकर यांनी, काळा पैसा बाहेर काढण्यासाठी लागू करण्यात आलेली नोटाबंदी म्हणजे शुद्ध
भंपकपणा होता असे सांगितले.
आर्थिक, सामाजिक, सांस्कृतिक शैक्षणिक अशा सर्व आघाड्यांवर मोदी सरकार अपयशी
झाल्याचे आकडेवारीनुसार सांगताना मुणगेकर म्हणाले, गेल्या पाच वर्षात आर्थिक तसेच
सामाजिक विषमता मोठ्या प्रमाणावर वाढली. शेतकरीवर्ग कमालीचा त्रासून गेला तर मुस्लिम
आणि दलित समाजांवर हेतुतः अत्याचार करण्यात आले. ‘मॉब लिंचिंग’सारखे जगाच्या पाठीवर
कोठेही न घडणारे प्रकार मोदी सरकारच्या राजवटीत घडले. रा. स्व. संघाच्या विचारसरणीच्या
दबावाखाली मोदी सरकार काम करते असा आरोप करून ते म्हणाले, गेल्या साठ वर्षात काँग्रेसने
काहीच केले नाही हे मोदी यांचे सातत्याने केलेले विधान म्हणजे बेजबाबदारपणाचा कळस आहे.
आतापर्यंतची देशाची प्रगती काँग्रेसनेच केली हे कोणीही नाकारू शकणार नाही. गेल्या पाच वर्षात

मोदी एकदाही पत्रकारपरिषदेला सामोरे गेले नाहीत. त्यांच्याजवळ तेवढे धैर्य नसल्यामुळेच त्यांनी
आपली 'मनकी की बात' सुरु केली असे ते म्हणाले.
काँग्रेस पक्षाच्या निवडणूक जाहीरनाम्याबत बोलताना मुणगेकर म्हणाले, काँग्रेसचा
जाहीरनामा हा जनतेचा जाहीरनामा आहे जास्तीत जास्त राज्यात जाऊन तेथील लोकांशी प्रत्यक्ष
चर्चा करून व त्यांच्या अनेक चांगल्या सूचना विचारात घेऊन हा जाहीरनामा तयार करण्यात
आला त्यामुळे लोकांच्या अपेक्षांचे त्यामध्ये दर्शन घडले आहे. आणि त्यासाठी काँग्रेस वचनबद्ध
आहे. पाच कोटी गरीब लोकांना न्यूनतम आय योजना अंतर्गत (‘न्याय’) वर्षाला ७२ हजार रुपये
देण्यासंबंधीचा काँग्रेसचा निर्णय क्रांतिकारी आहे. त्यामुळे मोदी सरकार चांगलेच कोंडीत सापडले
आहे असे सांगून ते म्हणाले, या योजनेसाठी कसा निधी उभा करावयाचा तेही काँग्रेसने निश्चित
केले आहे. हा दारिद्र्यावरचा शेवटचा घाला असेल असेही ते म्हणाले. काँग्रेसचा जाहीरनामा हा
राष्ट्रविरोधी आहे या कायदेमंत्री अरुण जेटली यांच्या आरोपाचा समाचार घेताना ते म्हणाले, जेटली
यांनी अर्थमंत्री म्हणून एक तरी चांगला कार्यक्रम पाच वर्षात जाहीर केला आहे काय? नोटाबंदी
सारखा महत्वपूर्ण निर्णय देखील या अर्थमंत्र्याला माहित नव्हता. काँग्रेसचा जाहीरनामा हा मुळीच
राष्ट्रविरोधी नाही असे स्पष्ट सांगून मुणगेकर यांनी राष्ट्रवाद, देशभक्ती ही कोण्या एका पक्षाची,
धर्माची वा जातीची मक्तेदारी नाही. तसेच निवडणुकीच्यानिमित्ताने देशाच्या जवानांच्या शौर्याचे
राजकारण केले जाऊ नये असे त्यांनी शेवटी मोदींना उद्देशून सांगितले.

पुणे: “ज्यांच्या तीन पिढ्या गेली ७० वर्षे केवळ ‘गरीबी हटाओ’चा नारा देत आहेत. त्यांनी विकासाची खोटी स्वप्न जनतेला दाखवू नयेत. देशाला शाश्वत विकासाची गरज असताना वर्षानुवर्षे सत्ता उपभोगूनही जे देशातील गरीबी हटवू शकले नाहीत ते काय विकास करणार?” असा सवाल उपस्थित करत महायुतीचे उमेदवार गिरीश बापट यांनी काँग्रेसच्या ‘गरीबी हटाओ’ घोषणेचा खरपूस समाचार घेतला.

सावित्रीबाई फुले स्मारक येथे डॉ. बाबासाहेब आंबेडकर यांच्या जयंती निमित्त अभिवादन सभा व मातंग समाज कार्यकर्ता मेळावा झाला. त्यावेळी ते बोलत होते. स्थायी समिती अध्यक्ष सुनील कांबळे, नगरसेवक गोपाळ चिंतल, स्वाती लोखंडे, हनुमंत साठे, अशोक लोखंडे, श्रीधर कसबेकर, सुषमा कांबळे, विकासभाऊ सातारकर, सुखदेव आढागळे उपस्थित होते.

बापट म्हणाले की, काँग्रेसच्या फसव्या धोरणांमुळे क्षमता असूनही देशाची प्रगती झाली नाही. निवडणूक आली की, काँग्रेस पक्षाला गरीब आठवतात. काँग्रेस गेली ५० वर्ष सत्तेत होती. तरी त्यांना गरिबांना न्याय देता आला नाही. याउलट मोदींनी गरिबांसाठी अनेक योजना आणल्या. यामध्ये पंतप्रधान आवास, उज्वला गॅस, आयुष्यमान भारत यासारख्या योजना आणून गरिबांच्या आयुष्यात नवचैतन्य आणले.

ते पुढे म्हणाले की, गरीब, मध्यमवर्गीयांना केंद्रस्थानी ठेऊन विधायक योजना आम्ही राबवल्याने खऱ्या अर्थाने अच्छे दिन आता आले आहेत. झोपडपट्टी पुर्नवसन योजना, प्रधानमंत्री आवास योजनेतून हजारो लोकांना पक्की घरे मिळत आहे.

आज पुण्यात अण्णा भाऊ साठे महामंडळामध्ये पैसे वाढवून देऊन त्या माध्यमातून अनेक गोरगरीब जनतेला व्यवसाय उपलब्ध करून देण्याचा आमचा भविष्यात प्रयत्न असणार आहे. त्याच प्रमाणे लहुजी वस्ताद यांचे ही भव्य स्मारक उभा करण्यासाठी भविष्यात आम्ही प्रयत्नशील असणार आहे. सरकार आपल्या दारी घेऊन येऊन तुम्हाला मदत करायची हा विचार घेऊन ही निवडणूक मी लढवत आहे. असे मत मी यावेळी व्यक्त केले.

भाजपने मागासवर्गीय समाजाला संधी दिली : कांबळे
स्थायी समिती अध्यक्ष सुनील कांबळे म्हणाले, भारतीय जनता पक्षावर जातीयवादी पक्ष असल्याचा आरोप विरोधी पक्षाकडून केला जातो. मात्र भारतीय जनता पक्षाने अनेक मागासवर्गीय समाजातील लोकांना संधी देऊन नेतृत्वाची संधी दिली आहे. पुणे शहरा पुरता विचार करायचा झाल्यास मातंग समाजातील 11 नगरसेवक निवडून आले आहेत.भारतीय जनता पक्ष जातपात न बघता सर्वसमावेशक विकास करतो त्यामुळे काँग्रेसच्या भूलथापांना बळी न पडता विकासाठी भाजपाला मत देण्याचे आवाहनही त्यांनी यांवेळी केले.

पुणे- पंतप्रधान नरेंद्र मोदी पठाणकोट आणि उरी हल्ल्याचे राजकारण करत असून भारतीय जनता पक्षाच्या सरकारच्या कार्यकाळात दहशतवादी हल्ले वाढल्याचा आरोप माजी न्यायमूर्ती बी. जी. कोळसे पाटील यांनी शनिवारी . ‘पुलवामा हल्ल्यात दहशतवाद्यांनी वापरलेले आरडीएक्स देशात आलेच कसे,’ असा सवालही त्यांनी केला.

शहर काँग्रेस व लोकायत संघटनेतर्फे टिळक वाड्यात ‘मोदी सरकारची पाच वर्षे’ या विषयावर व्याख्यानाचे आयोजन करण्यात आले होते. या वेळी ते बोलत होते. या प्रसंगी ‘लोकायत’चे नीरज जैन, प्रदेश काँग्रेसचे सरचिटणीस अभय छाजेड, माजी आमदार उल्हास पवार, राष्ट्रवादी काँग्रेसचे शहराध्यक्ष चेतन तुपे, महाराष्ट्र नवनिर्माण सेनेचे पालिकेतील गटनेते वसंत मोरे, किशोर शिंदे, ‘इंटक’चे सुनील शिंदे आदी उपस्थित होते. पंतप्रधान मोदींच्या चुकीच्या धोरणामुळे आणि खोट्या आकडेवारीने देशाची अर्थव्यवस्था मातीत गेली आहे. विविध प्रश्नांचा गुंता वाढत चालला आहे. त्यामुळे मोदींना पराभूत केल्याशिवाय गप्प बसणार नाही, अशी टीकाही त्यांनी केली. तत्पूर्वी, नीरज जैन यांनी मोदी सरकारच्या पाच वर्षांच्या आर्थिक कामगिरीचे विश्लेषण मांडले. भाजपला लोकशाही, समानता व धर्मनिरपेक्षता नको असून सत्तेच्या माध्यमातून संघाचा अजेंडा राबविला जात आहे. जाती-धर्मांत जाणीवपूर्वक मोठ्या प्रमाणात तेढ निर्माण केली जात आहे. दुसरीकडे विकासदर सातत्याने घटत असून अर्थव्यवस्था मोडकळीस आली आहे. त्यामुळे पाच वर्षांत भाजपने देशाची दुरवस्था केल्याचा आरोपही त्यांनी केला.