पुणे-नरेंद्र मोदी आणि अमित शहा यांचा भारतीय जनता पक्ष देशात जातीय आणि धार्मिक तेढ निर्माण करीत असून डॉ. बाबासाहेब आंबेडकर यांनी तयार केलेल्या संविधानाची मोडतोड करण्याचाही त्यांचा विचार आहे. भाजपचा हा विघातक मार्ग रोखण्यासाठी ‘गणराज्य चळवळीतील विविध सामाजिक संघटनांनी महाराष्ट्रात  काँग्रेस आघाडीला सक्रिय पाठिंबा देण्याचा निर्णय घेतला आहे अशी घोषणा आंबेडकरी आणि स्त्री-मुक्ती चळवळीतील ज्येष्ठ नेत्या सुषमा अंधारे यांनी
केली आहे. पुणे लोकसभा मतदारसंघातील काँग्रेस-राष्ट्रवादी काँग्रेस -मित्र पक्ष आघाडीचे उमेदवार मोहन जोशी यांच्या प्रचारार्थ काँग्रेस भवनात आज झालेल्या पत्रकारपरिषदेत त्या बोलत होत्या.
याप्रसंगी काँग्रेसचे ज्येष्ठ नेते , आमदार शरद रणपिसे,कॉंग्रेस चे ज्येष्ठ नेते प्रवीण गायकवाड, राष्ट्रवादीचे नगरसेवक सुभाष जगताप;गणराज्य चळवळीतीळ कार्यकर्ते रमेश राक्षे, अनिल हातागळे, रावसाहेब खंडांगळे, काँग्रेसमध्ये नव्याने प्रवेश केलेले सचिन तावरे आदी उपस्थित होते.
सुषमा अंधारे पुढे म्हणाल्या, गेल्या ५/६ महिन्यांपासून जनवादी चळवळी अंतर्गत महाराष्ट्रात कार्यरत असलेल्या विविध सामाजिक संघटनांच्या एकत्रीकरणाचे काम चालू आहे. त्यातूनच एकत्र आलेल्या २२ लोकशाहीवादी सामाजिक संघटनांनी काँग्रेस आघाडीला सक्रिय पाठिंबा देण्याचा निर्णय घेतला आहे. देशातील लोकशाही टिकण्यासाठी आणि संविधानाचे रक्षण करण्यासाठी हा निर्णय घेण्यात आल्याचे त्यांनी सांगितले.
याप्रसंगी रमेश राक्षे म्हणाले, चळवळीत काम करताना अनेक आव्हाने निर्माण झाली. भीमा- कोरेगाव प्रकरणात खरे आरोपी बाहेर होते मात्र आमच्याच कार्यकर्त्यांविरुद्ध गुन्हे दाखल करण्यात आले. या प्रवृत्तींविरुद्ध लढा देण्यासाठी आम्ही काँग्रेस आघाडीला पाठिंबा देण्याचा निर्णय घेतला आहे.
अनिल हातागळे म्हणाले, भाजपच्या राजवटीने मातंग समाजावर अन्यायच केला.  मातंग समाजाला वेगळे आरक्षण देण्याची मागणी भाजप सरकारने फेटाळली मात्र   शरद पवार यांनी त्याबाबत सकारात्मक विचार करण्याचे आश्वासन दिले. या निवडणुकीत भाजप-सेनेविरुद्ध रान उठविण्याचा आम्ही निर्णय घेतला असून काँग्रेस आघाडीला सक्रिय पाठिंबा देण्याचा निर्णय घेतला
आहे.

पुणे- पर्वती भागातील शिवसेनेचे सचिन तावरे यांनी मंगळवारी आपल्या समर्थकांसह काँग्रेसमध्ये प्रवेश केला . काँग्रेस भवनात दुपारी झालेल्या खास कार्यक्रमात काँग्रेसचे ज्येष्ठ नेते आणि माजी मुख्यमंत्री पृथ्वीराज चव्हाण यांच्या प्रमुख उपस्थितीत सचिन तावरे यांनी आपल्या समर्थकांसह फटाक्यांच्या निनादात काँग्रेसमध्ये प्रवेश केला. याप्रसंगी प्रदेश काँग्रेसचे प्रवक्ते, आमदार शरद रणपिसे,  पुणे लोकसभा मतदारसंघातील काँग्रेस-राष्ट्रवादी काँग्रेस -मित्र पक्ष आणि आघाडीचे उमेदवार मोहन जोशी आणि इतर पदाधिकारी उपस्थित होते.
माजी मुख्यमंत्री पृथ्वीराज चव्हाण यांनी, सचिन तावरे यांच्यासारखा उमदा, तरुण कार्यकर्ता काँग्रेसमध्ये परतल्याबद्द्दल आनंद व्यक्त केला.  मोदी यांचे ढोंगी सरकार हटवून काँग्रेसला सर्वसामान्य माणसांचे राज्य आणावयाचे आहे त्यामुळेच या निवडणुकीत मोहन जोशी यांच्यासारख्या कार्यकर्त्याला उमेदवारी देण्यात आल्याचे त्यांनी सांगितले.
प्रारंभी मोहन जोशी यांनी प्रास्ताविक करताना  शिवसेनेचे  सचिन तावरे यांच्या काँग्रेस प्रवेशाची घोषणा करून त्यांचे काँग्रेसमध्ये सहर्ष स्वागत केले. याप्रसंगी आपल्या  समर्थकांच्या उपस्थितीत  भाषण करताना सचिन तावरे म्हणाले की, गेली काही वर्षे मी दुसऱ्या पक्षात जरी असलो तरी मी मनाने काँग्रेसमध्येच होतो. मी माझी वाट चुकलो होतो. एखादे मूल आईपासून जसे दुरावते आणि आई दिसली की लगेच ते तिला बिलगते तसे माझेही झाले होते.
काँग्रेस ही माझी आई आहे म्हणून मी आज माझ्याच घरी आनंदाने परतलो आहे. काँग्रेस पक्षाचे गतवैभव पुन्हा प्राप्त करण्यासाठी मी शपथ घेऊनच या पक्षात पुन्हा आलो आहे आणि प्रत्येक दिवसागणिक काँग्रेसची सर्वांगीण प्रगती झाल्याशिवाय मी स्वस्थ बसणार नाही असे जाहीर करून तावरे म्हणाले, या लोकसभा निवडणुकीत मोहनदादा विजयी व्हावेत या एकाच प्रामाणिक इच्छेपोटी
मी काँग्रेसमध्ये आलो आणि आता मतदानाला दिवस कमी असले तरी मी आणि माझे कार्यकर्ते रात्रंदिवस कठोर मेहनत करून मोहन जोशी यांचा विजय सार्थ करून दाखवू असे त्यांनी सांगितले.
त्यानंतर काँग्रेस भवनात झालेल्या पत्रकारपरिषदेतही सचिन तावरे यांनी आपल्या घरवापसीबाबतआनंद व्यक्त करून काँग्रेस पक्ष हा केवळ एक राजकीय पक्ष नसून तो एक विचार आहे आणि हा विचार कोणी काहीही केले तरी मुळीच नष्ट होणार नाही असे ठामपणे सांगितले.

पुणे- पुण्यातील वातावरण मोहन जोशी यांना अत्यंत अनुकूल असून भाजपच्या पायाखालची वाळू सरकू लागली आहे. हे वातावरण संपूर्ण देशात असून मोदी पुन्हा पंतप्रधान होणार नाही असा विश्वास माजी मुख्यमंत्री पृथ्वीराज चव्हाण यांनी व्यक्त केला.
काँग्रेस-राष्ट्रवादी काँग्रेस आणि मित्रपक्षांचे पुणे लोकसभा मतदार संघाचे उमेदवार मोहन जोशी यांच्या प्रचारार्थ शिवदर्शन येथील साहित्य सम्राट विजय तेंडूलकर नाट्यगृहात आयोजित नागरिकांच्या मेळाव्यात ते बोलत होते. काँग्रेसचे जेष्ठ नेते उल्हास पवार, माजी उपमहापौर व नगरसेवक आबा बागुल, ज्येष्ठ नेते प्रवीण गायकवाड, पत्रकार सुरेश भटेवरा, रोहित टिळक, नंदकुमार बानगुडे, सतीश
पवार, अमित बागुल, यांसह सागर आल्हाट, द.स. पोळेकर, रमेश भंडारी, नंदकुमार कोंढाळकर, घनश्याम सावंत, प्रकाश आरणे, मामा परदेशी, स्वप्नील नाईक, जयकुमार ठोंबरे, विश्वास दिघे, शफी मामु शेख, ओमराज मारणे, शर्वरी गोतर्णे, ज्योति आरवे आदीसह शेकडो नागरिक यावेळी उपस्थित होते.
पृथ्वीराज चव्हाण म्हणाले, कॉँग्रेसच्या जाहीरनाम्यात किमान उत्पन्न हमी योजना (न्याय योजना) जाहीर झाली आहे. या योजनेच्या माध्यमातून गरीबी विरुद्धची अंतिम लढाई जाईल आणि देशातील गरीबी दूर होईल. न्याय योजना ही क्रांतिकारी योजना आहे. त्याचबरोबर शिक्षणासाठी जीडीपीच्या ६ टक्यांची तरतूद करण्याचे आश्वासन देण्यात आले आहे. तरुण पिढी घडविण्यासाठी जास्तीत जास्त शैक्षणिक सुविधा सामान्यांपर्यंत पोहचवण्यासाठी याचा उपयोग होईल. डिजिटल इंडियाची भाषा करणारे मोदी सरकारने एकही डिजिटल शाळा सुरु केली नाही. राजीव गांधी ई-लर्निंग स्कूलचा जेईई मेन्सच्या परीक्षेत प्रथम येणे ही अभिमानास्पद बाब असल्याचे त्यांनी नमूद केले.
प्रवीण गायकवाड यांनी उपस्थित नागरिकांना’अछे दिन आले का?, तुमच्या खात्यात १५ लाख रुपये जमा झाले का?, तुमची गरीबी हटली का?, गॅस, डिझेल, पेट्रोल स्वस्त झाले का?, असे प्रश्न विचारात त्यांच्याशी संवाद साधला. उपस्थित नागरिकांनी नाही..नाही असे उत्तर देत सभागृह डोक्यावर घेतले.
गायकवाड म्हणाले, हुतात्मा झालेल्या जवनांच्या नावाने मते मागणे असा प्रकार यापूर्वी कधी या देशात झाला नाही. त्यांनी असे म्हणताच नगिरिकांनी निषेध…निषेध.. अशा घोषणा दिल्या. पंतप्रधान नरेंद्र मोदी हे तीन वेळा मुख्यमंत्री झाले त्यावेळी कधीही त्यांनी गुजरातमध्ये चहावाला असल्याचे सांगितल्याचे ऐकिवात नाही. मात्र समाजमानाची मानसिकता लक्षात घेवून त्यांची चहावाला महणून प्रतिमा तयार केली गेली. जेणेकरून चहा पिताना त्यांची आठवण व्हावी. परंतु पाच वर्षे त्यांनी जनतेला फसविले आहे. त्यामुळे रोज चहा घेताना मोदींना आपल्याला सत्तेवरून घालवायचे आहे याचे स्मरण करा असे आवाहन त्यांनी केले.
मोहन जोशी म्हणाले, माझ्यासारख्या सर्वसामान्य कार्यकर्त्याला कोंग्रेस पक्षाने उमेदवारी देवून सर्वसामान्यांचा आदर केला आहे. मी नाही तर तुमच्यातील प्रत्येकजण निवडणुकीसाठी उभा आहे असे समजून काम करा. मोदी सरकारने पाच वर्षात काहीच काम केलेलं नाही. मी माझ्या वचननाम्यात जी आश्वासने दिली आहेत. त्याची पूर्तता काय झाली हे मी दरवर्षी समता भूमी येथे जावून सांगणार आहे.
या कार्यक्रमाचे संयोजक आबा बागूल यांनी आपल्या प्रास्ताविकात म्हटले की, स्व. राजीव गांधींनी १९८५ मध्ये संगणक आणण्याची घोषणा केली त्यावेळी याच भाजपने त्याला विरोध केला. आज ते डिजिटल इंडियाची भाषा करत आहेत. देशाचा आणि पुण्याचा विकास हा कोंग्रेसच्याच काळात झाला आहे. त्यामुळे या सर्व गोष्टींचा विचार करून मोहन जोशी यांना मोठ्या मताधिक्याने निवडून आणा
असे आवाहन त्यांनी केले.