पुणे-चुरसीची लढत असलेल्या पुणे लोकसभा मतदारसंघात मतदानाचा टक्का घसरला असून, पुण्यात अंदाजे ५२ टक्के मतदान झाले. तर बारामतीमध्ये अंदाजे ६१ टक्के मतदारांनी मतदानाचा हक्क बजाविल्याने मतदानाचा टक्का वाढला आहे. पुण्यात मतदारांनी फारसा उत्साह न दाखविल्याने आणि उन्हाचा तडाखा बसल्याने त्याचा परिणाम मतदानावर झाला. गेल्या निवडणुकीपेक्षा पुण्यात दोन टक्के कमी मतदान झाले आहे. याउलट बारामतीमध्ये मतदारांनी दाखविलेल्या उत्साहामुळे सुमारे दोन टक्के मतदान वाढले आहे.

पुणे लोकसभा मतदारसंघातील मतदारांची संख्या २० लाख ७४ हजार ८६१ आहे. त्यापैकी सुमारे ५२ टक्के मतदारांनी मतदान केले. गेल्या निवडणुकीत पुण्यामध्ये नऊ लाख ९३ हजार २७८ मतदारांनी मतदान केल्यामुळे मतदानाची सरासरी ५४.२४ टक्के झाली होती. यंदा हे प्रमाण कमी झाल्याने जेमतेम ५२ टक्क्यांपर्यंत मतदान होऊ शकले. कमी झालेल्या या मतदानाचा फटका कोणाला बसणार, याबाबत उत्सुकता निर्माण झाली आहे.

बारामतीमध्ये २१ लाख १२ हजार ४०८ मतदारांपैकी सुमारे ६१ टक्के… मतदारांनी मतदान केले. या निवडणुकीत बारामतीत मतदानासाठी उत्साह होता. त्यामुळे सुमारे ६१ टक्के मतदान झाले असल्याचे जिल्हा निवडणूक शाखेकडून सांगण्यात आले.

पुण्यात निरुत्साह

पुणे लोकसभा मतदारसंघामध्ये २०१४ मध्ये ५४.२४ टक्के मतदारांनी मतदानाचा हक्क बजावला होता. यंदाच्या निवडणुकीत या मतदारसंघात सकाळी सात ते नऊ या पहिल्या दोन तासांमध्ये मतदानाचे प्रमाण कमी होते. पुण्यात अवघे ८.७१ टक्के मतदार मतदानासाठी बाहेर पडले होते. नऊनंतर दुपारी एक वाजेपर्यंत परिस्थितीत फारसा बदल झाला नव्हता. मतदानाचे प्रमाण सुमारे १२.६६ टक्के होते. दुपारी अकरा ते एक या कालावधी मतदानाचा टक्का वाढला. हे प्रमाण सुमारे २२.५८ पर्यंत गेले. दुपारी एक ते तीन या वेळेत मतदानाची सरासरी कमी होती. त्या वेळी पुण्यात निम्म्या मतदारांनीही मतदान केले नव्हते. जेमतेम ३३ टक्के मतदारांनी मतदान केले होते. सायंकाळी चारनंतर मतदानासाठी गर्दी होऊ लागली.

बारामतीत उत्साह

बारामती लोकसभा मतदारसंघामध्ये गेल्या वर्षी ५९.४१ टक्के मतदान झाले होते. बारामतीत यंदा सकाळी सात ते नऊ या कालावधीत अवघे सहा टक्के मतदान झाले होते. त्यानंतर अकरा वाजेपर्यंत हे प्रमाण १७.४६ टक्क्यांवर पोहोचले. दुपारी एकनंतर तीन वाजेपर्यंत बारामतीतील मतदानाची संख्या वाढू लागली. बारामतीमध्येही ऊन कमी झाल्यानंतर दुपारी चारनंतर मतदानासाठी मतदार बाहेर पडले. सायंकाळी सहानंतर मतदानासाठी लागलेल्या रांगांमुळे मतांची सरासरी सुमारे ६१ टक्के झाली.

सरासरी मतदान (टक्के)

मतदार संघ २०१४ २०१९

पुणे – ५४.२४ ५२

बारामती – ५९.४१ ६१

कॉंग्रेस, राष्ट्रवादी कॉंग्रेस आणि मित्र पक्ष आघाडीचे उमेदवार मोहन जोशी यांनी मंगळवार दि.
२३ एप्रिल रोजी सकाळी ८ वाजता ह्यूम मॅकहेनरी स्कूल (Hume McHenry School),
महावीर प्रतिष्ठान समोर, सॅलिस्बरी पार्क, पुणे येथे सहकुटूंब मतदान केले.

कसबा मतदार संघातील अहिल्यादेवी प्रशाला येथे सकाळी मतदान केल्यानंतर प्रसार माध्यमानी

गिरिष बापट ,सौ गिरीजा गिरीश बापट,गौरव बापट,सौ स्वरदा गौरव बापट यांचा असा घेतला फ़ोटो

पुणे, दि. 23 एप्रिल : भारतावर ब्रिटिशांनी 150 वर्षे राज्य केल्यानंतर आपल्या हजारो देशभक्त क्रांतिकारकांच्या बलिदानातून आपल्याला स्वातंत्र्य मिळाले. स्वातंत्र्य मिळाल्यानंतर स्वतंत्र भारताने संसदीय लोकशाही व्यवस्था स्वीकारताना डॉ. बाबासाहेब आंबेडकर यांच्या नेतृत्वाखाली भारतीय राज्यघटनेची निमिर्ती झाली. बाबासाहेबांनी निर्मिलेल्या राज्यघटनेने जगातील सर्वश्रेष्ठ लोकशाहीची व्यवस्था आपल्याला मिळाली.

भारतीय लोकशाहीचं अत्यंत महत्त्वपूर्ण वैशिष्ठ्य म्हणजे देशाचा सर्वसामान्य नागरिक मतदानाच्या माध्यमातून आपला लोकप्रतिनीधी निवडतो व त्यांच्यातून संपूर्ण देशाला विश्वस्त असलेले सरकार बनते. त्यामुळे मतदानाचा अधिकार हा घटनेनं आपल्याला दिलेला अत्यंत महत्त्वाचा अधिकार आहे. म्हणून सर्वांनी आवर्जून मतदान केले पाहिजे. खासदार संजय काकडे यांनी आज एसएनडीटी महाविद्यालयात पत्नी उषा काकडे यांच्यासह मतदानाचा हक्क बजावला. त्यानंतर पत्रकारांशी बोलताना खासदार काकडे यांनी हे मत व्यक्त केले.

देशाला स्वातंत्र्य मिळून 70 वर्षे झाली. आपण 17 व्या लोकसभेसाठी मतदान करतोय. मात्र, अजुनही जास्ती संख्येने भारतीय मतदार मतदान करीत नसल्याचे चित्र आहे. मतदानाची टक्केवारी वाढत नाही. हे चित्र बदलायला पाहिजे. वैयक्तिक किंवा आरोग्याच्या कारणास्तव सर्वांनाच मतदान करणे शक्य नसेलही परंतु, इतरांनी मतदानाचा हक्क बजावल्यास 99 टक्के मतदान होऊ शकते. ज्यावेळी 99 टक्के मतदान होईल त्यावेळी खऱ्या अर्थाने भारतीय लोकशाही मजबूत होईल आणि स्वातंत्र्य मिळाल्याचा आनंद आपण उपभोगू. मतदानासाठी सर्वांनी जावं आणि आपला मूलभूत अधिकार बजवावा, असे आवाहन खासदार संजय काकडे यांनी केले आहे.

भाजप ‘नंबर वन’ बनेल!
भारतीय जनता पक्ष व मित्र पक्षांना या लोकसभा निवडणुकीत देशात व राज्यात सर्वाधिक जागा मिळतील. भाजप व माननीय पंतप्रधान नरेंद्रभाई मोदींसाठी देशभर अनुकूल वातावरण असून भाजप हा क्रमांक एकचा पक्ष बनेल, असा विश्वास खासदार संजय काकडे यांनी आज व्यक्त केला.

पुणे: इंडियन गोल्फ यांच्या मान्यतेखाली आयकॉनिक पूना क्लब गोल्फ कोर्स येथे नुकत्याच पार पडलेल्या पहिल्या राष्ट्रीय गोल्फ स्पर्धेत महाराष्ट्राच्या आर्यमान सिंग याने तिसरा क्रमांक पटकावत लक्षवेधी कामगिरी केली.

प्रतिष्ठित अशा कुमार मुलांच्या गटात देशभरातून विविध वयोगटातून अव्वल कुमार गोल्फपटूंनी आपला सहभाग नोंदविला होता. तत्पूर्वी आर्यमान याने मुलांच्या क गटात दुसऱ्या क्रमांकासाठी जबरदस्त चुरस दिली होती, परंतु अखेर त्याला तिसऱ्या स्थानावर समाधान मानावे लागले. स्पर्धेच्या दुसऱ्या दिवशी पहिल्या 9 होलच्या फेरीत सर्वात कमी दोषांकांसह ही फेरी पूर्ण करताना सर्व गटांमधील सर्वोत्तम कामगिरीची त्याने नोंद  केली. या लक्षवेधी कामगिरीमुळे पदकाच्या शर्यतीत आर्यमानने तिसरा क्रमांक पटकावला असून पदकाचा मानकरी ठरलेला आर्यमान हा महाराष्ट्राचा सर्व गटांमधील एकमेव स्पर्धक ठरला आहे.

पुणे —- पुणे लोकसभा मतदारसंघातील निवडणुकीमध्ये यंदा ईव्हीएम मशीन आणि
व्हीव्ही पॅट यांचा वापर होत असून मतदाराने मतदान केल्यानंतर बटन दाबल्यानंतर व्हीव्ही पॅट
मशीनमध्ये आपण केलेले मतदान दृश्यस्वरूपात सात सेकंदापर्यंत दिसेल. प्रत्येक मतदाराने ते
पाहून खात्री करून घ्यावे मात्र आपण केलेल्या मतदानाऐवजी वेगळेच चिन्ह दिसल्यास मतदाराने
पुढीप्रमाणे कार्यवाही करावी असे आवाहन शहर काँग्रेसचे अध्यक्ष रमेश बागवे यांनी केले आहे.
निवडणूक आयोगाच्या नियम क्रमांक १३. ३८ (४९एमए) अनुसार संबंधित मतदाराने मतदान
केंद्राच्या खोलीबाहेर न पडता त्या मतदान केंद्राच्या खोलीतच उपस्थित असलेल्या अधिकाऱ्यास
भेटून त्याबाबत तक्रार करावी. तक्रार नोंदणीची पद्धत पुढीलप्रमाणे आहे —-
१) रजिस्टर ऑफ व्होटर (१७/ए) नुसार अशा मतदाराला टेस्ट व्होट करण्याचा अधिकार आहे.
२) संबधित मतदान केंद्र अधिकाऱ्याकडे याबाबत तक्रार देण्याचे फॉर्म्स उपलब्ध आहेत.
३) संबधित मतदान केंद्र अधिकाऱ्याकडे सेल्फ डिक्लेरेशन फॉर्म उपलब्ध आहेत. मतदाराने सेल्फ
डिक्लेरेशन फॉर्म भरून द्यावेत. त्यानंतरच पुढील कार्यवाहीस सुरुवात होईल. (मतदार खोलीच्या
बाहेर गेल्यास त्याची तक्रार मान्य होणार नाही)
४) मतदाराला निवडणूक अधिकाऱ्याकडून जर योग्य प्रतिसाद मिळाला नाही तर त्वरित काँग्रेस
पक्षाने स्थापन केलेल्या हेल्पलाईन नंबरवर संपर्क साधावा.
काँग्रेस पक्ष मतदाराच्या तक्रारीची योग्य ती दखल घेऊन पुढची कार्यवाही करेल असे
आवाहन शहर काँग्रेसचे अध्यक्ष रमेश बागवे यांनी केले आहे.

पुणे :  युवकांनी उद्योजकतेचा मार्ग  करिअर म्हणून निवडावा, नोकरी शोधण्यापेक्षा आपण  नोकरी देणारे  कसे होऊ शकतो यादृष्टीने मानसिकता तयार करायला हवी, असे मत भारतीय  युवा शक्ती ट्रस्टचे क्षेत्रीय अधिकारी विशाल चव्हाण यांनी व्यक्त केले, ते यशस्वी एकेडमी फॉर स्किल्सच्या  शिवाजीनगर येथील  संतमाई स्किल डेव्हलपमेंट सेंटर येथे आयोजित  ‘उद्योजकता मार्गदर्शन  परिसंवादात’ बोलत  होते.

यावेळी बोलताना  त्यांनी   उद्योजक होण्यासाठीची मानसिकता, उद्योजकतेचे  प्रशिक्षण, समुपदेशन, बँकेच्या माध्यमातून नवउद्योजकांना  २५ लाख रुपयांपर्यंतचे  विनाजामीन व विना तारण भांडवली  कर्ज  उपलब्ध करून देणे, उद्योजकांच्या  वस्तूंचे प्रदर्शन आयोजित करणे  याविषयी  सविस्तर माहिती दिली.

तर भारतीय  युवा शक्ती ट्रस्टचे  पुणे विभाग प्रमुख रोशन अहिरे यांनी बोलताना सांगितले कि, बीवायएसटी तर्फे  नवउद्योजकांना  कशाप्रकारे उद्योजक बनण्यासाठी मार्गदर्शन केले जाते याविषयी माहिती सांगितली, तसेच याआधी  ज्यांनी अशाप्रकारचे मार्गदर्शन घेतले  व जे स्वतःचा उद्योग व्यवसाय सुरु करण्यात यशस्वी होऊ शकले  अशांची माहितीही सांगितली. तसेच बीवायएसटीतर्फे उद्योग सुरु झाल्यानंतरसुद्धा आवश्यकतेनुसार ज्या बाबी शिकणे व समजून घेणे आवश्यक असते अशा नवीन बाबींचे प्रशिक्षणसुद्धा केले जाते असे सांगितले, ज्यामध्ये  जीएसटी, डिजिटल पेमेंट आदींचा  समावेश होतो.

याप्रसंगी उद्योजकता प्रशिक्षणासाठी  प्रातिनिधिक स्वरूपात  पाच विद्यार्थिनींची  निवड करण्यात आली.

यावेळी कार्यक्रमाला  यशस्वी एकेडमी फॉर स्किल्सचे संचालक संजय सिंग, संचालिका  स्मिता धुमाळ. केंद्र  समन्वयक प्राची राऊत यांच्यासह सर्व प्रशिक्षक  व विद्यार्थिनी  उपस्थित  होत्या.

प्रकृती कथक नृत्यालयातर्फे ‘धन्य’ मैफलीचे आयोजन
पुणे : परदेशी नृत्यांगनाचा भारतीय परंपरेने सादर झालेला कार्यक्रम नुकताच रसिकांना अनुभवता आला. या कथक नृत्याविष्काराद्वारे शिवस्तुती, गुरुवंदना, ‘कथक’चे खास वैशिष्ट्य असलेला नृत्याविष्कार समग्र तीन तालात पेश केला गेला. कथकमध्ये अभावानेच बघायला मिळणाऱ्या  बैठकीच्या अभिनयामध्ये ‘वर्षा ऋतू’ हे विरह गीत सादर करण्यात आले. सरगम, तरणा, गीत आणि नटवरी या चार रंगांनी नटलेला ‘चतरंग’ नृत्य आविष्कारही यावेळी झाला. मैफलीची सांगता गणेशस्तुतीने करताना नांदीच करण्यात आली.

गुरु रोहिणी भाटे व त्यांच्या ज्येष्ठ शिष्य नीलिमा अध्ये यांच्याकडे ‘कथक’ची तालीम घेतलेल्या जर्मन कथक नृत्यांगना कॅरोलिन डॅसेल आणि त्यांची शिष्या तान्जा प्रेड यांच्या कथक नृत्याविष्काराची ‘धन्य’ या मैफलीस जाणकार रसिकांची दाद मिळाली. येथील प्रकृती कथक नृत्यालयातर्फे ही मैफल आयोजित करण्यात आली होती. कॅरोलिन जर्मनीतील म्युनिच शहरात ‘धन्य कथक नृत्यालय’ संचालित करतात. युरोपात त्यांच्या कलेला नावाजले जातेच पण कथक मधील जाणकार भारतीय प्रेक्षकांसमोर त्यांच्या नृत्याविष्कारास दाद मिळावी, या हेतूने या मैफलीचे आयोजन करण्यात आले होते.

अर्पिता वैशंपायन यांनी स्वरसाथ दिली आणि अजय पराड (संवादिनी) तर आदित्य देशमुख यांनी तबला साथ केली. नीलिमा अध्ये यांनी  पढंत सादर केले. बिलासखानी तोडी रागातील सरगम ( ताल रूपक ), तराणा (झप ताल), गीत (अद्ध), नटवरी (एक ताल) पेश करण्यात आला. रसिकांची त्याला विशेष दाद मिळाली.

‘सिंधुरवदना मदनसम सुंदर’ या गणेशस्तुतीने मैफलीची सांगता करण्यात आली. या रचनेचे काव्य, संगीत आणि नृत्य गुरु रोहिणी भाटे यांचे होते. गणेशाच्या रूपाचे आणि नृत्याचे वर्णन करणारी ही नृत्यरचना सादर करताना

कॅरोलिन यांनी वठवलेले बारकावे स्तुत्य होते. त्यांचे लालित्य आणि पदन्यास दोन्ही कौतुकास पात्र होते. पाश्चात्य नृत्यांगनाचे ‘कथक’  सादरीकरण या कौतुकापोटी नव्हे तर त्यांच्या शैलीच्या विशुद्ध नृत्याकरिता कॅरोलिन यांनी रसिकांची वाहवा मिळवली.

• पहाटे तीनला ‘कथक’ साधना !

  जर्मन कथक नृत्यांगना  कॅरोलिन डॅझेल यांचा मुलगा दोन वर्षांचा असताना कथक शिकण्यासाठी त्या पुण्यात नीलिमा अध्ये त्यांच्याकडे आल्या होत्या. मात्र, त्यांच्या मुलामुळे त्यांना नृत्यसाधनेत अडथळे येत होते. त्यावर नीलिमाताईंनी तोडगा काढला. पहाटे तीन ते सहा अशी कथक तालीम त्यांनी कॅरोलिन यांच्याकडून करून घेतली. नीलिमाताईंचे ॠण व्यक्त करताना याचा आवर्जून उल्लेख  त्यांनी आपल्या मनोगतात व्यक्त केला. भारतीय कथक कलाकार, जाणकारांसमोर ध्वनिफितीऐवजी प्रत्यक्ष साथसंगतकारांसमवेत कला सादर करून त्यांची दाद मिळाल्याने विशेष आनंद वाटल्याचे कॅरोलिन यांनी आवर्जून सांगितले.