पुणे : निरंकारी सदगुरु माता सुदीक्षा जी महाराज यांच्या निर्देशानुसार मानव एकता दिनानिमित्त  संत निरंकारी चॅरिटेबल फाऊंडेशन पुणे झोन च्या वतीने संत निरंकारी सत्संग भवन, गंगाधाम मार्केटयार्ड,पुणे येथे  रक्तदान शिबीराचे आयोजन करण्यात आले होते. या मध्ये ससून रुग्णालय रक्तपेढी, यशवंतराव चव्हाण रुग्णालय रक्तपेढी,औंध रुग्णालय रक्तपेढी, कमांड हॉस्पिटल रक्तपेढी यांनी १२५८ युनिट रक्त संकलन केले.

    या रक्तदान शिबिराचे उदघाटन  डॉ.अजय चंदनवाले (अधिष्ठाता,जे.जे.हॉस्पिटल मुंबई), यू.टी.पवार (पोलीस अधीक्षक, पुनर्वसन विभाग,येरवडा),रितू छाब्रिया (मुकुल माधव फाउंडेशन), माधुरी मिसाळ (आमदार,पुणे), मुरलीधर तांबे (प्रभारी अधिष्ठाता बी.जे.मेडिकल कॉलेज),यांच्या उपस्थिती मध्ये झाले. या रक्तदान शिबिराला अनेक सामाजिक,राजकीय,शासकीय अधिकारी-पदाधिकारी यांनी आवर्जून  भेट दिली.

            मिशनद्वारे नोव्हेंबर १९८६ मध्ये पहिल्या रक्तदान शिबिराचे आयोजन करण्यात आले होते.सद्गुरु बाबा हरदेव सिंह जी महाराजांनी स्वतः रक्तदान करून या शिबिराची सुरुवात केली होती आणि संदेश दिला की ‘रक्त नाल्यामध्ये नाही तर नाड्यामध्ये वाहिले पाहिजे’.वर्ष १९८७ पासून हे शिबीर २४ एप्रिल या दिवशी मानव एकता दिवसानिमित्त आयोजित करण्यात येऊ लागले.

बाबाजींच्या या संदेशाने प्रेरित होऊन रक्तदानाला आपल्या भक्तीचे अंग बनवून श्रद्धाळू भक्त या महान अभियानामध्ये मोठ्या संख्येने योगदान देऊ लागले.

              वर्ष १९८६ पासून आतापर्यंत ६०७६ शिबिरांचे आयोजन करून १० लाखाहून अधिक युनिट रक्तदान करण्यात आले आहे.पुणे जिल्ह्याच्या विविध भागांमध्ये एप्रिल २०१८ ते मार्च २०१९ पर्यंत २२ शिबिरांचे आयोजन करून ७००७ युनिट रक्तदान करण्यात आले असून या वर्षी पुण्यामध्ये २८ शिबिरांचे आयोजन करण्यात येणार आहे.

               रक्तदान शिबिराच्या जनजागृती साठी संत निरंकारी चॅरिटेबल फाऊंडेशन चे स्वयंसेवक, तसेच सेवादल यांनी  पथनाट्य, रॅली चे आयोजन पुणे परिसरात केले होते या जागृती द्वारा प्रेरणा घेऊन समाजाच्या विविध स्थरातील जागरूक नागरिकांनी रक्तदान केले.या रक्तदान शिबिरात आलेल्या सर्व मान्यवरांचे आभार श्री.ताराचंद करमचंदानी (संत निरंकारी मंडळ, पुणे झोन इंचार्ज) यांनी केले. रक्तदान शिबीर यशस्वीरीत्या पार पाडण्यासाठी पुणे झोन मधील संयोजक, मुखी, सेवादल, संत निरंकारी चॅरिटेबल फाऊंडेशनच्या स्वयंसेवकांनी योगदान केले.

पुणे-श्री.  हनुमान जन्मोत्सवनिमित्त रास्ता पेठमधील के ई एम रुग्णालयासमोरील श्री उंटाडे मारुती मंदिराच्यावतीने महाप्रसादाचे आयोजन करण्यात आले होते . यावेळी शाहू उद्यानाजवळील संत गाडगे महाराज कार्यालयात हा महाप्रसादाचा लाभ  चार हजार भाविकांनी घेतला .

यावेळी महापूजा व आरती करण्यात आली . यावेळी श्री उंटाडे मारुती मंदिराचे अध्यक्ष सुदर्शन मुदलियार , विश्वस्त प्रदीप मुदलियार , रमेश मुदलियार , आर. एच. कृष्णन , सिंधुताई कन्हेरकर आदी मान्यवर व भाविक मोठ्या संख्येने उपस्थित होते .

यावेळी शंकुतला साळेकर , महेंद्र साळेकर , कृष्णमूर्ती पिल्ले , जितेंद्र ढमाले  , प्रा. वाल्मिक जगताप , गणेश आचार्य व माधव नाडकर्णी आदींनी विशेष परिश्रम घेतले . 

पुणे-एन.ई.एम.एस. पूर्वप्रार्थमिक शाळेतील सीनियर केजीतील मुलांचा दीक्षांत सोहळा उत्साहात पार पडला.

पूर्वप्रार्थमिक शिक्षण पूर्ण करून मुले आता प्रार्थमिक शाळेत प्रवेश करणार आहेत.या निमित्याने शाळेच्या वतीने दीक्षांत सोहळा कार्यक्रमात मुलांना पदवी प्रदान करण्यात आली.

पूर्वप्रार्थमिक विभागाच्या ईनचार्ज सौ.शिल्पा कुलकर्णी  यांनी उपस्थित पालकांचे व मान्यवरांचे स्वागत केले. कार्यक्रमासाठी सर्व विद्यार्थी दीक्षांत समारंभाच्या विशेष वेषभुषेत उपस्थित होते.

काही विद्यार्थ्यानी आपले मनोगत व्यक्त केले व काही विद्यार्थ्यानी नृत्य सादर केले. या कार्यक्रमासाठी  उपस्थित शाळा समितीच्या अध्यक्षा डॉक्टर सविता केळकर यांनी विद्यार्थ्यांना प्रमाणपत्र देऊन गौरविले.

शाळेतील शिक्षिका स्वाती मर्चट यांनी सूत्रसंचालन केले.कार्यक्रमात सर्व शिक्षिकांचा सक्रिय सहभाग होता.

पुणे : पुणे परिमंडलातील वीजग्राहकांना माहे एप्रिल/ मे महिन्याच्या देयकांसोबत अतिरिक्त सुरक्षा ठेव भरण्यासाठी स्वतंत्र देयक देण्यात येत आहेत. या सुरक्षा ठेवीच्या रकमेचा ग्राहकांनी भरणा करावा, असे आवाहन महावितरणने केले आहे.

महाराष्ट्र विद्युत नियामक आयोगाच्या निर्देशानुसार सर्व वर्गवारीतील वीजग्राहकांनी महावितरणकडे सुरक्षा ठेव जमा करणे बंधनकारक आहे. आर्थिक वर्षातील एका महिन्याच्या सरासरी एवढे देयक सुरक्षा ठेव म्हणून जमा करावे लागते. वीजग्राहकांनी मूळ सुरक्षा ठेव याआधी जमा केली असली तरी वीजदर, वीजवापर आणि पर्यायाने देयकांची रक्कम वाढलेली आहे. त्यामुळे मूळ सुरक्षा ठेव आणि गेल्या आर्थिक वर्षातील एका महिन्याचे सरासरी वीजदेयक यातील फरकाच्या रकमेचे देयक अतिरिक्त सुरक्षा ठेव म्हणून ग्राहकांना देण्यात येत आहे. वीजग्राहकांना सुरक्षा ठेवीवर कालावधीनुसार व्याज देण्याचे महाराष्ट्र विद्युत आयोगाचे निर्देश आहेत. त्यानुसार महावितरणकडून एप्रिल/ मे/ जून या महिन्यांच्या वीजदेयकांत ग्राहकांच्या सुरक्षा ठेवीवरील व्याजाची रक्कम समायोजित केली जाते.

पुणे परिमंडलातील लघुदाब वीजग्राहकांना अतिरिक्त सुरक्षा ठेवीच्या रकमेची माहिती तसेच ऑनलाईन पेमेंटची सोय महावितरणच्या अधिकृत www.mahadiscom.in या संकेतस्थळावर तसेच महावितरण मोबाईल अ‍ॅपवर उपलब्ध करून देण्यात आली आहे. अतिरिक्त सुरक्षा ठेवीच्या रकमेचा भरणा ऑनलाईन करण्यासाठी ‘मेक पेमेंट’चा पर्याय निवडल्यानंतर येणार्‍या देयकाच्या माहितीत सिक्युरिटी डिपॉझिटवर क्लीक केल्यास अतिरिक्त सुरक्षा ठेवीच्या रकमेची माहिती उपलब्ध होईल व ती रक्कम ऑनलाईनद्वारे भरता येईल.

बारामती: ऐतिहासिक रायरेश्वर पठारावर अन्‌ समुद्रसपाटीपासून सुमारे 4750 फूट उंचीवर वसलेल्या माळवाडी व धानवली (ता. भोर, जि. पुणे) या गावांना वीजपुरवठा करण्यासाठी महावितरणकडून उभारण्यात येणाऱ्या वीजयंत्रणेचे काम पूर्णत्वाकडे आहे. या गावांमध्ये सुमारे 100 वीजखांब व एक रोहित्र उभारण्याचे काम जवळपास पूर्ण झाले असून लवकरच या गावांचा वीजपुरवठा सुरु होणार आहे.

अतिदुर्गम व सह्याद्री डोंगररागांच्या कुशीत अन् घनदाट जंगल तसेच वाहतुकीची कोणतीही व्यवस्था नसलेल्या पुणे जिल्ह्यातील माळवाडी व धानवली गावांमध्ये गेल्या अडीच महिन्यांपासून विद्युतीकरणाचे काम सुरु आहे. डोंगरदऱ्या व कातळ कडा चढत वीजखांब व इतर विद्युत साहित्य अक्षरशः खांद्यावर वाहून नेत हे विद्युतीकरणाचे काम सुरु असल्याने नियोजित वेळेपेक्षा थोडा उशिर झाला आहे.

लोकसभा निवडणुकीत अतिदुर्गम रायरेश्वर पठारावरील मतदान केंद्रामुळे माळवाडी व धानवली गावे नुकतीच चर्चेत आली होती. महावितरणचे अध्यक्ष व व्यवस्थापकीय संचालक श्री. संजीव कुमार यांनी या गावांच्या विद्युतीकरणासाठी उभारण्यात येत असलेल्या वीजयंत्रणेचा आढावा घेतला व ही दोन्ही गावे लवकरच प्रकाशमान होतील असा विश्वास व्यक्त केला.

भोरपासून सुमारे 40 किलोमीटरवर अंतरावर असलेल्या या दोन्ही गावांमध्ये जाण्यासाठी कोणतीही वाहतूक व्यवस्था नाही. खोल दऱ्या, दाट झाडी, उंच सुळके व आडवळणीचा घाट अशा अत्यंत दुर्गम व 11 किलोमीटर अखंड असलेल्या रायरेश्वर पठारावर रायरी ग्रामपंचायत अंतर्गत माळवाडी हे 10 घरांचे गाव वसलेले आहे. त्यापुढे अडीच किलोमीटरवर धानवली हे स्वतंत्र ग्रामपंचायतीचे 35 घरांचे गाव आहे. रायरेश्वर पठारावरील माळवाडी येथे जाण्यासाठी 300 फूट उंचीचा कातळ कडा लोखंडी शिडीच्या सहाय्याने चढावा लागतो तर तेथून धानवली गावात जाण्यासाठी 235 फुटाचा कातळ कडा उतरावा लागतो. अशा स्थितीत वीजखांबांसह इतर विद्युत साहित्य खांद्यावर वाहून नेण्यात येत आहे.

माळवाडी व धानवली गावांसाठी जिल्हा नियोजन विकास समितीने 35 लाख रुपयांचा निधी मंजूर केला आहे. या निधीतून रायरेश्वर मंदिरापासून 50 वीजखांबांद्वारे सुमारे 3.5 किलोमीटर उच्चदाब वीजवाहिनीचे काम सुरु आहे. माळवाडी येथे 63 केव्हीए क्षमतेचे रोहित्र बसविण्यात येत आहे. माळवाडी येथून पुढे आणखी 50 वीजखांब उभे करून दोन किलोमीटरवर असलेल्या धानवली या गावाला वीजपुरवठा करण्यात येणार आहे. या दोन्ही गावांच्या विद्युतीकरणसाठी 100 वीजखांब, एक रोहित्र, 21 किलोमीटर उच्च व लघुदाबाच्या वीजवाहिन्या व इतर साहित्य हे 11 किलोमीटरच्या पायरस्त्याने व डोंगरदऱ्यातून नेण्यात येत आहे.

बारामती परिमंडलाचे मुख्य अभियंता श्री. सुनील पावडे हे या दोन्ही गावांच्या विद्युतीकरणाकडे विशेष लक्ष देत आहेत. प्रभारी अधीक्षक अभियंता श्री. केशव काळुमाळी, सासवड विभागाचे कार्यकारी अभियंता श्री. अरविंद वनमोरे यांच्यासह भोर उपविभागाचे उपकार्यकारी अभियंता श्री. सतीश चव्हाण, महावितरणचे कर्मचारी तसेच कंत्राटदार एम.आर.के इलेक्ट्रिकल्सचे कर्मचारी माळवाडी व धानवली गावांच्या विद्युतीकरणासाठी प्रयत्नांची पराकाष्ठा करीत आहेत. अत्यंत प्रतिकूल नैसर्गिक व डोंगराळ परिस्थितीत सुरु असलेले विद्युतीकरणाचे काम सध्या अंतिम टप्प्यात आहे. रोहित्र व वीजखांब उभारण्याचे काम जवळपास पूर्ण झाले आहे. ही वीजयंत्रणा पूर्ण झाल्यानंतर माळवडी व धानवली येथील 45 घरांना नवीन वीजजोडणी उपलब्ध होणार आहे.

पुणे, 24 एप्रिल: पुणे मेट्रोपॉलिटन जिल्हा टेनिस संघटना(पीएमडीटीए) व केपीआयटी यांच्या संलग्नतेने तर्फे 12 व 14 वर्षाखालील मुले व मुलींच्या गटातील पीएमडीटीए केपीआयटी कुमार चॅम्पियनशिप सिरीज 2019 स्पर्धेत 12 वर्षाखालील मुले व मुलींच्या गटात अर्जुन किर्तने व श्रावणी देशमुख यांनी व 14 वर्षाखालील मुले व मुलींच्या गटात सार्थ बनसोडे व कौशिकी समंथा यांनी विजेतेपद पटकावले.

मुकुंदनगर येथील महाराष्ट्रीय मंडळ लॉन टेनिस अकादमीच्या टेनिस कोर्टवर पार पडलेल्या या स्पर्धेत 12 वर्षाखालील मुलांच्या गटात तिस-या मानांकीत अर्जुन किर्तनेने पृथ्विराज हिरेमथचा 4-1,4-1 असा सरळ सेटमध्ये पराभव करत विजेतेपद पटकावले. अर्जून बिशप्स स्कुल, कॉम्प येथ सहावी इयत्तेत शिकत असून केदार शाहा यांच्या मार्गदर्शनाखाली बाऊंस टेनिस अकादमी येथे सराव करतो. या वर्षातील त्याचे हे पहिले विजेतेपद आहे.

12 वर्षाखालील मुलींच्या गटात बिगर मानांकीत श्रावणी देशमुखने आठव्या मानांकीत रितिका मोरेचा 4-1,4-0 असा सहज पराभव करत विजेतेपद पटकावले. श्रावणी सिंहगड स्प्रिंगडेल स्कुल येथे आठवी इयत्तेत शिकत असून धरणीधर मिश्रा व राजेंद्र देशमुख यांच्या मार्गदर्शनाखाली महाराष्ट्र मंडळ येथे सराव करते. या वर्षातील तीचे हे तिसरे विजेतेपद आहे.

14 वर्षाखालील मुलांच्या गटात चौथ्या मानांकीत सार्थ बनसोडेने दुस-या मानांकीत आदित्य राय याचा 4-1,4-2 असा पराभव करत विजेतेपदाला गवसणी घातली. सार्थ माउंट सेंट पॅट्रीक स्कुल येथे नववी इयत्तेत शिकत असून मदन गोखले यांच्या मार्गदर्शनाखाली डेक्कन जिमखाना येथे सराव करतो. त्याचे या वर्षातील हे पहिले विजेतेपद आहे.

14 वर्षाखालील मुलींच्या गटात अव्वल मानांकीत कौशिकी समंथाने सहाव्या मानांकीत अलिना शेखचा संघर्षपुर्ण लढतीत 4-1,1-4,5-4(7-5) असा टायब्रेक मध्ये पराभव करत विजेतेपद पटकावले. कौशिकी आर्मी पब्लिक स्कुल येथे आठवी इयत्तेत शिकत असून हेमंत बेंद्र यांच्या मार्गदर्शनाखाली पीवायसी हिंदू जिमखाना येथे सराव करते. तीचे हे या वर्षातील पहिले विजेतेपद आहे.

स्पर्धेतील विजेत्या व उपविजेत्या खेळाडूंना करंडक व प्रशस्तीपत्रक अशी पारितोषिके देण्यात आली. स्पर्धेचे पारितोषिक वितरण पोलिस इस्पेक्टर अशोक कदम यांच्या हस्ते करण्यात आले. यावेळी स्पर्धा संचालक धरणीधर मिश्रा यादी मान्यवर उपस्थित होते.

स्पर्धेचा सविस्तर निकाल: 12 वर्षाखालील मुले: उपांत्य फेरी:

अर्जुन किर्तने(3) वि.वि अर्जुन परदेशी 7-0

पृथ्विराज हिरेमथ वि.वि निव कोठारी 7-1

अंतिम फेरी- अर्जुन किर्तने(3) वि.वि पृथ्विराज हिरेमथ 4-1,4-1
12 वर्षाखालील मुली: उपांत्य फेरी:
रितिका मोरे(8) वि.वि मृणाल शेळके 7-2
श्रावणी देशमुख वि.वि निशिता देसाई (7)7-2
अंतिम फेरी- श्रावणी देशमुख वि.वि रितिका मोरे(8) 4-1,4-0

14 वर्षाखालील मुले: उपांत्य फेरी:
सार्थ बनसोडे(4) वि.वि अनिश रांजळकर (5) 7-3
आदित्य राय(2) वि.वि पार्थ देवरूखकर (3) 7-6(4)
अंतिम फेरी- सार्थ बनसोडे(4) वि.वि आदित्य राय(2) 4-1,4-2

14 वर्षाखालील मुली: उपांत्य फेरी:
कौशिकी समंथा(1) वि.वि सिमरन छेत्री (7) 7-2
अलिना शेख(6) वि.वि श्रृती नानजकर (4) 7-4
अंतिम फेरी- कौशिकी समंथा(1) वि.वि अलिना शेख(6) 4-1,1-4,5-4(7-5)

पुणे : “प्लास्टिक स्वस्त आणि वापरण्यास सोयीचे असल्याने त्याचा सर्रास वापर केला जातो. बंदीनंतर पुण्यासह इतर ठिकाणी प्लास्टिक मोठ्या प्रमाणात वापरले जाते. भविष्यातही प्लास्टिकचा वापर कमी होणार नाही. त्यामुळे बंदी घालण्यापेक्षा प्लास्टिक कचऱ्याचे विघटन कसे करता येईल किंवा त्याचा पुनर्वापर करण्यावर अधिक संशोधन व्हायला हवे,” असे मत डॉ. राजीव बासर्गेकर यांनी व्यक्त केले.

मराठी विज्ञान परिषद पुणे विभागातर्फे नवी पेठेतील एस. एम. जोशी सभागृहात ‘पॉलीमर आणि प्लास्टिक’ या विषयावर आयोजित व्याख्यानात डॉ. राजीव बासर्गेकर बोलत होते. यावेळी विज्ञान परिषदेचे विनय र. र., शशी भाटे यांच्यासह विज्ञानप्रेमी मोठ्या संख्येने उपस्थित होते. प्लास्टिक बंदी व त्यानंतर पुण्यातील चित्र, मानवी जीवनात प्लास्टिकचे महत्त्व अशा मुद्यांवर यावेळी चर्चा झाली.

डॉ. राजीव बासर्गेकर म्हणाले, “आजघडीला प्लास्टिकइतकी स्वस्त आणि सोयीस्कर दुसरी वस्तू बाजारात उपलब्ध नसल्याने प्लास्टिक्सचा वापर टाळला जात नाही. प्लास्टिकचे जैवविघटन होत नाही. परंतु, त्यातून दूषित पदार्थ तयार होत नाही किंवा प्रदूषणही होत नाही. प्लास्टिकचा कचरा मात्र होतो. परंतु, या कचऱ्याचा पुनर्वापर करणे शक्य आहे. त्यासाठी संशोधन, प्रशिक्षण आवश्यक आहे. पण अजूनतरी तसे संशोधन किंवा प्रशिक्षण भारतात विकसित झालेले नाही. चीन जगातील ५०% प्लास्टिक कचरा विकत घेतो आणि त्याचा पुनर्वापर करतो. आपल्याकडेही त्याप्रमाणे विघटन आणि पुनर्वापर यावर भर दिला पाहिजे.”

“सांडपाणी प्रक्रिया संयंत्रेप्रमाणे घनकचरा व्यवस्थापनाच्या यंत्रणा निर्माण करणे गरजेचे आहे. समुद्रात प्लास्टिक न जाण्यासाठी उपाययोजना करणे आवश्यक आहे. त्याचबरोबर नागरिक आणि स्थानिक स्वराज्य संस्था यांच्या जबाबदार वर्तणुकीशिवाय प्लास्टिक कचऱ्याची तात्कालीन अडचण दूर होणे अवघड आहे. त्यासाठी सर्वानी एकत्रित येत प्रयत्न करायला हवेत.”

विनय र. र. यांनी अध्यक्षीय समारोप केला. शशी भाटे यांनी प्रास्ताविक केले व आभार मानले.