पुणे :”पंतप्रधान नरेंद्र मोदी यांनी राजीव गांधी यांच्याबद्दल केलेल्या बदनामीकारक वक्तव्याचा निषेध करण्यासाठी शनिवार, ११ मे २०१९ रोजी सकाळी ११ ते १२ या वेळेत अलका टॉकीज चौकात राजीव गांधी स्मारक समितीच्या वतीने प्रतीकात्मक निदर्शने करण्यात येणार आहेत. यामध्ये इतर अनेक संघटना सहभागी होणार आहेत,” असे कॉंग्रेसचे माजी नगरसेवक ,महापालिकेतील स्थायी समितीचे माजी अध्यक्ष राजीव गांधी स्मारक समितीचे प्रमुख गोपाळ तिवारी पत्रकार परिषदेत सांगितले  भोला वांजळे, संदीप मोरे, नंदूशेठ पापळ आदी उपस्थित होते.

भ्रष्टाचाराविरोधात आवाज उठवणारे आणि केंद्र सरकार शेवटच्या नागरिकांसाठी एक रुपया पाठवते, त्यातील  पंधराच पैसे त्याला मिळतात. उर्वरीत ८५ पैसे कुठे जातात? असा स्पष्ट सवाल करीत भ्रष्टाचारी व्यवस्थेला खडेबोल सुनावणारे स्वर्गीय पंतप्रधान भारतरत्न राजीव गांधी हे पहिलेच पंतप्रधान होते. व्यवस्थेतील पारदर्शकतेसाठी संगणकीकरण आणि इंटरनेटचा वापर त्यांनी सुरु केला. त्यामुळे पंतप्रधान नरेंद्र मोदी यांनी राजीव गांधी यांच्याबाबत केलेले वक्तव्य निराधार आणि निषेधार्ह आहे. सरकारी अधिकाऱ्यांच्या अकार्यक्षमतेवर प्रामाणिकपणे बोलणाऱ्या राजीव गांधी यांच्याबाबत त्यांच्या वक्तव्याचा विपर्यास करून अशा प्रकारचे बदनामीकारक वक्तव्य करीत खोटा कांगावा करणाऱ्या नरेंद्र मोदी यांचे वक्तव्य खेदजनक आहे,” अशी टीका त्यांनी केली

गोपाळ तिवारी म्हणाले, “व्यवस्थेतील वास्तव सांगण्यासाठी राजीव गांधी यांनी ते वक्तव्य केले होते. केंद्र सरकार राज्यांमध्ये, जिल्ह्यामध्ये, जनतेच्या विकासासाठी एक रुपया पाठवते, तेव्हा ८५ पैसे शासकीय कारकून, अधिकारी, तहसीलदार, जिल्हाधिकारी या साखळीत विरतात. अनेक वरिष्ठ अधिकारी, लोकप्रतिनिधी व बेपर्वा विरोधक यांचा बऱ्याचदा वरदहस्त असतो. त्यावेळी भ्रष्टाचारावर बोलण्याची एकही विरोधी पक्षनेत्यांत धमक नव्हती. कारण तेही त्यात सामील होऊन, अधिकाऱ्यांना ब्लॅकमेलिंग करून मलाई खात असल्याची शक्यता नाकारता येत नाही. त्यामुळे राजीव गांधी यांनी जनतेला जागरूक करण्यासाठी राजधर्माचा पुरुषार्थ दाखवला. तत्कालीन स्वार्थी, स्वतःची तुंबड्या भरणाऱ्या विरोधकांनी भ्रष्टाचारावर आवाज उठवला असता, तर राजीवजींवर हे कटू सत्य मांडण्याची वेळ आली नसती.  अकार्यक्षमतेच्या मुद्यावर सरकारी अधिकाऱ्याची बडतर्फी करण्याचा कायदा आणण्याचा त्यांनी प्रामाणिक प्रयत्न केला. मात्र, याच भाजपच्या, तत्कालीन जनसंघाशी सलग्नीत भारतीय मजदूर संघाने विरोध करीत राजीवजींचा भ्रष्टाचाराला आळा घालण्याचा प्रयत्न हणून पाडला.”

“राजीवजींच्या भ्रष्टाचारविरोधी प्रयत्नांमुळे अनेकांचे भ्रष्टाचार उघड्यावर आल्याने त्यांच्या हत्येमागे काही देशांतर्गत शक्तींचा सहभाग असल्याचा संशय वाटतो. तेव्हाचे विरोधक आता सत्ताधारी बनले आहेत. भ्रष्टाचाराला खतपाणी घालण्याचे काम त्यांनी त्यावेळी केले. राजीव गांधी त्यांचा बुरखा फाडल्याने आज हे लोक राजीवजींच्या वक्तव्याची मोडतोड आणि चुकीचा अर्थ काढून मोदी खोटे आरोप करून आग ओकत आहेत. मात्र, राजीवजींच्या भूमिकेमागील वास्तव जनतेला माहित आहे. त्यामुळे पंतप्रधान नरेंद्र मोदी आणि भाजपच्या नेत्यांनी जनतेची दिशाभूल करण्याचा प्रयत्न करू नये,” असे गोपाळ तिवारी यांनी सांगितले.

पुणे-दुबईहून आलेल्या विमानातून तस्करी करून आणलेले ३१ लाख १३ हजार रुपये किंमतीचे ९५७ ग्रॅम सोन्यासह सीमा शुल्क विभागा(कस्टम) च्या पथकाने पुणे विमानतळावर एका प्रवशाला पकडले. त्याच्याकडून पकडलेले सोने हे एका पॉलिथीन पिशवीमध्ये पेस्ट अवस्थेत मिळून आले.

बाबा मिया मोमीन असे पकडलेल्याचे नाव आहे.सोमवारी सकाळी दुबईहून आलेले विमान आय़ एक्स २१२ पुणे विमानतळावर उतरले. त्यावेळी प्रवाशांच्या साहित्याची तपासणी करत असताना सीमा शुल्क (कस्टम) विभागाच्या अधिकाऱ्यांनी संशयावरून शहेजाद बाबा मिय़ा खान याची झडती घेतली. तेव्हा त्याच्याकडे एका पातळ पॉलिथीन बॅगमध्ये ठेवलेले पेस्ट च्या स्वरुपात सोने आढळून आले. पथकाने त्याच्याकडून ते सोने हस्तगत केले. त्या सोन्याची किंमत ३१ लाख १३ हजार ४४६ रुपये असून त्याचे वजन ९५७. १० ग्रॅम आहे.

सीमा शुल्क विभागाच्या अधिकाऱ्यांनी सोनं जप्त करून शेहजाद खान याच्यावर कस्टम अक्ट १९६२ च्या कलमांनुसार गुन्हा दाखल करण्यात आला आहे.

पुणे, दि. 7 :  पुणे ग्रामीण पोलीस अधीक्षक संदीप पाटील यांनी पुणे ग्रामीण जिल्ह्यामध्ये सर्व पोलीस अधिकारी, सर्व पोलीस ठाणे प्रभारी अधिकारी व सर्व बंदोबस्ताचे प्रभारी अधिकारी यांना कायदा व सुव्यवस्था राखण्यासाठी 21 मे 2019 पर्यंत मुंबई पोलीस अधिनियम 1951 च्या कलम 36 नुसार अधिकार प्रदान केले आहे.

            या अधिकारान्वये रस्त्यावरील किंवा रस्त्याने जाणाऱ्या मिरवणूकीतील किंवा जमावातील लोकांनी कशा रितीने चालावे त्यांनी वर्तणूक किंवा वागणूक कशी ठेवावी या विषयी निर्देश देणे, अशा कोणत्याही मिरवणुका या कोणत्या मार्गाने, कोणत्या वेळात काढाव्यात किंवा काढू नयेत असे मार्ग व अशा वेळा विहीत करणे, सर्व मिरवणुकीच्या व जमावांच्या प्रसंगी व उपासनेच्या वेळी व कोणत्याही रस्त्याहून किंवा सार्वजनिक जागी किंवा सार्वजनिक स्थळी गर्दी होणार असेल किंवा अडथळा होण्याचा संभव असेल अशा सर्व प्रसंगी अडथळा न होऊ देणे यासाठी योग्य ते आदेश देणे, सर्व रस्त्यावर व रस्त्यामध्ये घाट किंवा घाटावर, सर्व धक्क्यावर व धक्क्यामध्ये आणि सार्वजनिक स्नानांच्या,कपडे धुण्याच्या व उतरणेच्या जागांच्या ठिकाणी व जागामध्ये, देवालय आणि इतर सर्व सार्वजनिक स्थळी सुव्यवस्था राखणेसाठी योग्य ते आदेश देणे, कोणत्याही रस्त्यात किंवा रस्त्याजवळ ढोल, ताशे व इतर वाद्ये वाजविणेचे व गाणी गाण्याचे, शिंगे व इतर कर्णकर्कश वाद्ये वाजविणेचे विनियमन करणे व त्यावर नियंत्रण ठेवण्यासाठी योग्य ते आदेश देणे. कोणत्याही सार्वजनिक जागेत किंवा जागेजवळ किंवा कोणत्याही सार्वजनिक करमणूकीच्या ठिकाणी लोकांना उपद्रव होवू नये म्हणुन ध्वनीक्षेपकाचा (लाऊड स्पीकर) उपयोग करणेचे विनियमन करणे व त्यावर नियंत्रण ठेवणेसाठी योग्य ते आदेश देणे. सक्षम प्राधिकाऱ्यांनी या अधिनियमांची कलमे 33, 35,37 ते 40,42,43 व 45 या अन्वये दिलेल्या कोणत्याही आदेशास अधिन असलेले व त्यास पुष्टी देणारे योग्य आदेश देणे असे अधिकार प्रदान केले आहेत.

हे आदेश दिनांक 21 मे, 2019 रोजी रात्री 12 वाजेपर्यंत  लागू राहतील, असे पुणे ग्रामीण पोलीस अधीक्षक मो. सुवेज हक यांनी प्रसिध्दी पत्रकाद्वारे कळविले आहे.