क्रेडाई महाराष्ट्रतर्फे संपूर्ण राज्यात परिसंवाद संपन्न

पुणे :- जी. एस. टीच्या योजनेची माहिती सर्व विकसकांना तसेच चार्टर्ड अकाउंटंट, जी. एस टी कन्सलटंट यांना व्हावी यासाठी क्रेडाई महाराष्ट्र तर्फे राज्यातील वेगवेगळ्या शहरांमध्ये परिसंवादाचे आयोजन केले.

जी. एस. टी. मधील सवलतीच्या दराचा फायदा सामान्य ग्राहकास मोठ्या प्रमाणावर होत आहे. यापूर्वी १२ टक्के जी. एस. टी मुळे ग्राहकांच्या भोगवटा प्रमाणपत्र अथवा पूर्ण झालेल्या प्रकल्पामध्ये फ्लॅट बुकिंग करण्याचा कल होता मात्र नवीन नोटिफिकेशनमुळे राज्यभर बांधकाम सुरु असलेल्या प्रकल्पांमध्ये चांगल्या प्रमाणात सदनिकांची बुकिंग होईल अशी खात्री असल्याची भावना  क्रेडाई महाराष्ट्राचे अध्यक्ष राजीव परीख यांनी व्यक्त केली.

केंद्र शासनाने १ एप्रिल २०१९ पासून घर बांधणीच्या प्रकल्पाकरिता पूर्वीच्या १२ टक्के  व ८ टक्के जी. एस. टी दरावरून ५ टक्के व १ टक्के इतका दर कमी करून भरघोस सवलत देवू केली आहे. यामध्ये पूर्वीचा १२ टक्के व परवडणाऱ्या घरांकरिता ८ टक्के इतका  जी. एस टी दर असताना बांधकाम व्यावसायिकास हा इनपुट क्रेडीटमधून मिळणारी वजावट घेऊन परिणामकारक जी. एस. टी. हा ५ टक्के ते ६ टक्के इतकाच होत होता ब बहुतांश बांधकाम व्यावसायिक त्याचा फायदा फ्लॅटच्या ग्राहकास फ्लॅटच्या दरांमध्ये सवलती द्वारे देत होते. मात्र आता शासनाने सरळ ग्राहकास ५ टक्के व परवडणारी घरे अर्थात नॉन मेट्रो शहरांसाठी ज्या सदनिकांचे चटई क्षेत्र ९० चौ. मी. पेक्षा कमी व सदनिकांची एकूण किंमत ४५ लाखांच्या आत असेल तर त्याला १ टक्के  जी. एस टी दर लागू केला आहे. या जी. एस टीच्या योजनेमध्ये मात्र विकसकास इनपुट क्रेडीटची वजावट घेता येणार नाही. या नवीन योजनांची बांधकाम व्यावसायिकांना योग्य माहिती व्हावी, तसेच अंमलबजावणी मधील संभ्रमावस्था दूर व्हावी या उद्देशाने क्रेडाई महाराष्ट्र तर्फे सोलापूर, जळगाव, मालेगाव, सातारा,नाशिक,नवी मुंबई,रत्नागिरी,सावंतवाडी,अमरावती, धुळे, कोल्हापूर अशा शहरांतील स्थानिक क्रेडाईच्या सहकार्याने नजीकच्या शहरांतील बांधकाम व्यावसायिक, चार्टर्ड अकाउंटंट, जी. एस. टी. कन्सलटंट यांना एकत्र करून व्यापक परिसंवादाचे आयोजन करण्यात आले होते. यावेळी चार्टर्ड अकाउंटंट संकेत शहा, चेतन ओसवाल, पोतदार यांनी उपस्थितांचे मार्गदर्शन करून त्यांच्या शंकांचे  निरसन देखील करण्यात आले.

ज्या प्रकल्पाचे ३१ मार्च २०१९ पूर्वी बांधकाम सुरु आहे अशा प्रकल्पांकरिता या नवीन नोटीफिकेशन नुसार जी.एस.टी लावायचा की,  जुन्या पद्धतीने १२ टक्क्याप्रमाणे जी. एस. टी लावून इनपुट क्रेडीट घ्यायचे हा निर्णय घेण्यासाठी २० मे ही अंतिम मुदत जी. एस. टी कौन्सिलने ठरवून दिली होती. याबाबत निर्णय घेण्याकरीता हा परिसंवादाचा खूप फायदेशीर ठरला अशा भावना विकसकांनी व्यक्त केल्या.

इनपुट क्रेडीट वजावटीची संधी निघून गेल्याने बांधकामासाठी होणारा खर्च २५० ते ३०० रुपये प्रति चौ.फुट इतका वाढला आहे. त्यामुळे पर्यायाने बांधकाम व्यावसायिकांना फ्लॅट विक्रीच्या दरामध्ये थोडी वाढ करावी लागणार आहे.

पुणे : राजीव गांधी स्मारक समिती, मिशन राजीव आणि पुणे शहर  काँग्रेस यांच्या संयुक्त विद्यमाने देशाचे माजी पंतप्रधान स्वर्गीय भारतरत्न राजीव गांधी यांना अभिवादन करण्यात आले. काँग्रेसचे ज्येष्ठ नेते मोहन जोशी यांच्या हस्ते कात्रज येथील राजीव गांधी प्राणी संग्रहालयातील राजीव गांधी यांच्या पुतळ्यास पुष्पहार अर्पण करण्यात आला. यावेळी राजीव गांधी स्मारक समितीचे प्रमुख गोपाळ तिवारी, माजी नगरसेवक वीरेंद्र किराड, सचिन तावरे, लहुअण्णा निवंगुणे, भूषण राहाम्बरे, भोला वांजळे, नितीन पायगुडे, विवेक भरगुडे, अस्लम बागवान, सुरेश उकिरडे, महेश अंबिके, संजय अभंग, आबा जगताप आदी कार्यकर्त्यांसह उद्यान निरीक्षक राजकुमार जाधव उपस्थित होते.

मुंबई. ( प्रतिनिधी ) – मिरा भाईंदर महानगरपालिकेतील आस्थापनेवरील 538 सफाई कर्मचाऱ्यांना वारसा हक्क मिळून देण्यसाठी शासनास भाग पाडू असे प्रतिपादन महाराष्ट्र राज्य सरकारी चतुर्थ श्रेणी कर्मचारी मध्यवर्ती संघटनेचे अध्यक्ष भाऊसाहेब पठाण यांनी नगरभवन येथे केले आहे. यावेळी सरचिटणीस प्रकाश बने, सह सचिव वरेश कमाने, कोषाध्यक्ष मुंबई मार्तंड द्राक्षे, आरोग्य विभाग संघटनेचे सचिव बाबाराम कदम, राज्य राखीव पोलीस बल संघटनेचे सरचिटणीस सुभाष गोरे हे उपस्थित होते.

यावेळी पठाण म्हणाले की, सफाई कामगारांना लाड / पांगे समितीच्या शिफारस लागू असताना येथील कामगारांना का ? मिळत नाही. भारत देश लोकशाही वर चालणारा देश आहे. सर्व कर्मचाऱ्यांना एकच कायदा आहे. मग येथील कर्मचाऱ्यांना वेगळा न्याय का ? मिरा भाईंदर महानगरपालिका आस्थापनेवरील 538 सफाई कर्मचाऱ्यांना वारसा हक्क लागू करणे तसेच अनुकंपा करण्यासंदर्भात कायद्याने तसेच नियमाने देण्याबाबत महाराष्ट्र राज्य सरकारी चतुर्थ श्रेणी कर्मचारी मध्यवर्ती संघटने मार्फत प्रशासनास भाग पडेल. वेळ पडल्यास मोठे आंदोलन करून, गरज पडल्यास महाराष्ट्र शासन मंत्रालय बंद पाडू असा इशारा पठाण यांनी दिली. सफाई कामगार म्हणून सन 1993 पासून कर्मचारी काम करत आहेत, या कर्मचाऱ्यांना सन 2000 मध्ये लाड / पांगे समिती च्या शिफारस नुसार कायम करण्यात आले. अशा कर्मचाऱ्यांच्या आयुष्याची 10 – 12 वर्षे वाया जाऊ नये म्हणून ते पूर्ण भरून काढण्यासाठी त्यांना सेवा ज्येष्ठते मध्ये त्याचा लाभ मिळून देऊ. ज्या कर्मचाऱ्यांना सफाई कामगार मधून प्रमोशन करण्यात आले आहेत. 538 कर्मचारी पैकी 50 ते 60 कर्मचारी सेवा निवृत्त झाले आहेत तर 50 कर्मचारी मयत झाले आहेत. अशा कर्मचाऱ्यांच्या कुटुंबावर आज उपास मारीची वेळ आली आहे. पण कुटुंब सेवेत येण्यासाठी हक्क दर आहेत. पण प्रशासन कर्मचाऱ्यांना उंबरठे झिजवण्यास का लावते यावर आम्ही कर्मचाऱ्यांना व त्यांच्या कुटुंबियांना न्याय मिळवून देऊ असे आश्वासन पठाण यांनी दिले आहे.

मिरा भाईंदर कामगार सेनेचे युनिट अध्यक्ष गोविंद परब म्हणाले की, 538 कर्मचाऱ्यांना न्याय मिळून देण्यासाठी आम्ही सर्वजण महाराष्ट्र राज्य सरकारी चतुर्थ श्रेणी कर्मचारी मध्यवर्ती संघटनेच्या पाठीशी खंबीर पणे उभे राहू. यावेळी गोविंद परब, सचिव कैलास शेवंते, मुत्तुपांडे पेरूमल, सुनील पाटील, देवानंद पाटील, उल्हास आंग्रे, सुलेमान मुलाणी, वसंत पेंढारे, विजय म्हात्रे, सुजित घोणे, किरण पाटील आदी पदाधिकारी व कर्मचारी उपस्थित होते.

पुणे– विभागीय आयुक्‍त डॉ. दीपक म्‍हैसेकर यांनी आज भारतीय अन्‍न महामंडळाच्‍या परिसरात उभारण्‍यात आलेल्‍या मतमोजणी केंद्राची तसेच मिडीया सेंटरची भेट देऊन पहाणी केली. यावेळी त्‍यांच्‍या समवेत उपायुक्‍त प्रताप जाधव, उप जिल्‍हा निवडणूक अधिकारी मोनिका सिंह तसेच इतर अधिकारी उपस्थित होते.  जिल्‍हाधिकारी नवल किशोर राम यांनीही मतमोजणी केंद्रातील आणि मिडीया सेंटर मधील सुविधांचा आढावा घेतला. यावेळी पोलीस उपायुक्‍त मितेश घट्टे, उप विभागीय अधिकारी भाऊसाहेब गलांडे, दत्‍तात्रय कवितके, संजय देशमुख, पल्‍लवी घाटगे, विकास भालेराव तसेच इतर अधिकारी उपस्थित होते. पुणे आणि बारामती लोकसभा मतदार संघाची मतमोजणी कोरेगाव पार्क येथील भारतीय अन्‍न महामंडळाच्‍या परिसरात होणार आहे.

• पूना क्लबचे पीवायसीपुढे 213 धावांचे आव्हान

पुणे:  पीवायसी हिंदू जिमखाना यांच्या वतीने आयोजित  पीवायसी-गोल्डफिल्ड-मांडके चषक या सर्वातजुन्या व अनोख्या निमंत्रित क्रिकेट स्पर्धेत पहिल्या सामन्यात अचूक गोलंदाजी करत केडन्स संघाने क्लब ऑफ महाराष्ट्रला 166 धावांवर रोखले व त्यानंतर निखिल पराडकर(57धावा) व गणेश गायकवाड नाबाद(57धावा) यांनी शतकी भागीदारी करून 17 धावांची आघाडी राखत पहिल्या दिवशी वर्चस्व गाजवले. तर, दुसऱ्या सामन्यात ऋषिकेश मोटकर(84 धावा) व विश्वराज शिंदे(48धावा) यांनी केलेल्या फलंदाजीच्या जोरावर पूना क्लब संघाने पीवायसी संघासमोर 213 धावांचे आव्हान उभे केले.

पीवायसी हिंदू जिमखाना येथील क्रिकेट मैदानावर सुरु असलेल्या या स्पर्धेत पहिल्या डावात केडन्स संघाच्या अचूक व शिस्तबद्ध गोलंदाजीपुढे क्लब ऑफ महाराष्ट्र संघाचा डाव 30.3षटकात 166धावांवर आटोपला. 10 गडी बाद झाल्याने क्लब ऑफ महाराष्ट्रची अंतिम धावसंख्या 116 झाली. यात देवदत्त नातू 49, निकित धुमाळ 26, यश क्षीरसागर 25, नौशाद शेख 23, यांनी थोडासा प्रतिकार केला. केडन्सकडून गणेश गायकवाडने 20 धावात 3 गडी, तर सिद्देश वरगंटी(30-2), हर्षद खडीवाले(23-2), इझान सय्यद(45-2)यांनी प्रत्येकी दोन गडी बाद केले. याच्या उत्तरात केडन्स संघाने सावध सुरुवात केली. सलामीचे फलंदाज अथर्व धर्माधिकारी 20, हर्षद खडीवाले 14 हे झटपट बाद झाल्यानंतर निखिल पराडकर 82 चेंडूत 57धावा व गणेश गायकवाड 86 चेंडूत नाबाद 57धावा यांनी पाचव्या गडयासाठी 158 चेंडूत 117 धावांची करत संघाच्या डावाला आकार दिला. आजदिवसअखेर केडन्स संघाने 35 षटकात 5बाद 183धावा करून पहिल्या डावात 17 धावांची नाममात्र आघाडी घेतली. केडन्सचा उर्वरित 5 षटकांचा खेळ अजून बाकी आहे.

पीवायसी हिंदू जिमखाना मैदानावरील सामन्यात पहिल्या डावात प्रथम फलंदाजी करताना पूना क्लब संघाने 38.3षटकात 213 धावा केल्या. 10 गडी बाद झाल्याने पूना क्लबची अंतिम धावसंख्या 163झाली. पूना क्लब 19.1षटकात 7 बाद 111 असा अडचणीत असताना ऋषिकेश मोटकरने 107 चेंडूत 11 चौकारांसह 84 धावा व विश्वराज शिंदेने 77 चेंडूत 48 धावा केल्या. ऋषिकेश मोटकर व विश्वराज शिंदे यांनी आठव्या गडयासाठी 119 चेंडूत 86 धावांची भागीदारी केली. पीवायसीकडून प्रीतम पाटीलने 48धावात 3 गडी, तर यश मानेने 17 धावात 3 गडी, रोहन दामले(41-2), दिव्यांग हिंगणेकर(47-2)यांनी प्रत्येकी दोन गडी बाद करून पूना क्लबला मोठी धावसंख्या उभारण्यापासून रोखले. या आव्हानाचा पाठलाग करताना पीवायसी संघाने आज दिवसअखेर 22 षटकात 4बाद 106धावा केल्या. यात अभिषेक परमारने 89 चेंडूत नाबाद 54धावा, दिव्यांग हिंगणेकरने 22धावा, रोहन दामलेने 12धावा केल्या.पीवायसी संघाचा 18 षटकांचा खेळ अजून बाकी असून ते 107 धावांनी पिछाडीवर आहेत. अभिषेक परमार नाबाद 54 धावांवर, तर साहिल मदन नाबाद 7 धावांवर खेळत आहे.

स्पर्धेचा सविस्तर निकाल: साखळी फेरी:
पहिला डाव: क्लब ऑफ महाराष्ट्र: 30.3षटकात सर्वबाद 116धावा(166-50धावा)(देवदत्त नातू 49(63,7×4), निकित धुमाळ 26(44), यश क्षीरसागर 25(40), नौशाद शेख 23(18), गणेश गायकवाड 4.3-20-3, सिद्देश वरगंटी 6-30-2, हर्षद खडीवाले 4-23-2, इझान सय्यद 6-45-2) वि.केडन्स: 35 षटकात 5बाद 183धावा(निखिल पराडकर 57(82,4×4) गणेश गायकवाड नाबाद 57(86,6×4), अथर्व धर्माधिकारी 20, हर्षद खडीवाले 14, अजित गव्हाणे नाबाद 0, नौशाद शेख 6-30-2, निकित धुमाळ 6-26-1, प्रज्वल गुंड 5-14-1, यश क्षीरसागर 6-33-1);

पूना क्लब: 38.3षटकात सर्वबाद 163धावा(213-50धावा)(ऋषिकेश मोटकर 84(107,11×4), विश्वराज शिंदे 48(77,8×4), यश नाहर 30(34), प्रीतम पाटील 6-48-3, यश माने 3.3-17-3, रोहन दामले 8-41-2, दिव्यांग हिंगणेकर 7-47-2) वि.पीवायसी हिंदू जिमखाना: 22 षटकात 4बाद 106धावा(अभिषेक परमार नाबाद 54(89,6×4,1×6), दिव्यांग हिंगणेकर 22, रोहन दामले 12, साहिल मदन नाबाद 7, आशिष सूर्यवंशी 6-24-1, दर्शन लुंकड 4-19-1, विश्वराज शिंदे 2-6-1);

पुणे- जागतिक दर्जाच्‍या लॅब निर्मितीसाठी टेक्‍नीश आणि एमआयटीमध्ये नुकताच सामंजस्‍य करार झाला आहे. नॅनो धूळ विस्फोट होण्याच्‍या धोक्‍यांवरील प्रयोगात्‍मक तपासणीसाठी संयुक्‍तपणे प्रयोगशाळेची स्‍थापना करण्यात येणार आहे. या सामंजस्‍य करारावर टेक्‍नीशचे संचालक निलेश सकपाल आणि माईर्स एमआयटीचे संस्‍थापक अध्यक्ष प्रा. डॉ. विश्वनाथ दा. कराड यांनी स्‍वाक्षरी केली. ही संशोधन ग्रांड सर्वात मोठी म्‍हणजे जवळपास ९१.५ लाख रूपयांची आहे.
यावेळी टीपीएलचे संचालक मेधा साकपाल, टेक्‍नीशचे अक्षय आगवान व हरीश कदम तसेच एमआयटीचे प्राचार्य डॉ.एल.के.क्षीरसागर, पेट्रोलियम विभागाचे प्रमुख डॉ. समर्थ पटवर्धन, डॉ. नाईक, डॉ. पाटील व डॉ. जाधव आदी मान्‍यवर उपस्‍थित होते.
या प्रयोगशाळेत स्फोटकपणा आणि ज्वलनशीलतेसाठी चाचणी केली जाईल. त्‍यात खनन, औषध, पॉलिमर, तेल, गॅस आणि अन्न उद्योगातील विविध प्रकारचे धूळीचा समावेश आहे. प्रायोगिक डेटाच्या आधारावर, या प्रोजेक्ट अंतर्गत सुरक्षा मानकांची स्थापना करण्यासाठी गणितीय मॉडेल विकसित केले जाणार आहे. तसेच हे संशोधन आऊटपुट संरक्षण क्षेत्रासाठी अत्यंत उपयुक्त ठरेल.
विविध औद्योगिक क्षेत्रांमध्ये गुंतलेल्या धूळीचा धोका समजण्यासाठी आणि नॅनो धूळ कणांच्या विविध गुणधर्मांचे विश्लेषण करण्यासाठी संशोधन आवश्यक असल्याने, एमआयटीने तंत्रज्ञानाद्वारे डीएसटी (एसईआरबी) कडे प्रस्ताव सादर केला होता. संशोधनासाठी हे अनुदान मंजूर केले गेले आहे आणि याचा वापर एमआयटी परिसर अंतर्गत अत्याधुनिक नॅनो-डस्ट स्फोट सुविधा स्थापित करण्यासाठी केला जाईल.
हा मंजूर प्रस्ताव डीएसटी, सरकारच्या आयआरआरडी (इंडस्ट्री प्रासंगिक संबंधित आर अँड डी) योजने अंतर्गत आहे.