पुणे-जागतिक पर्यावरण दिनाचे औचित्य साधून सह्याद्रीच्या पर्वतरांगांमधून १०० जलाशयांची निर्मिती करण्याचा संकल्प एमआयटी वर्ल्ड पीस युनिव्हर्सिटीचे संस्थापक अध्यक्ष प्रा. डॉ. विश्‍वनाथ दा. कराड यांनी जाहीर केला आहे.
यंदाच्या वर्षी महाराष्ट्र दाहक दुष्काळाचा अनुभव घेत आहे. महाराष्ट्रातील सर्वच धरणातील साठा आता जवळजवळ संपण्याच्या मार्गावर आहे. आणखी दोन महिने पाऊस पडला नाही, तर महाराष्ट्राची स्थिती अतिशय भयावह होण्याची शक्यता आहे. या पार्श्‍वभूमीवर महाराष्ट्रातील पर्वतरांगाचा आणि त्यामुळे निर्माण झालेल्या दर्‍याखोर्‍यांचा उपयोग करून, कृत्रिम जलाशये निर्माण केल्यास राज्याच्या दृष्टीने ते अतिशय लाभदायक ठरू शकेल आणि मुख्य म्हणजे आपला पुणे जिल्हा हा तलावांचा / जलाशयांचा जिल्हा (Lake District) म्हणून उदयास येईल, याचा विचार आणि गरज लक्षात घेऊन एमआयटी वर्ल्ड पीस युनिव्हर्सिटीने या विषयातील तज्ञ, महाराष्ट्र शासनाच्या तसेच जनसामान्यांच्या सहभागाने सदरील प्रकल्पाचा संकल्प सोडला आहे.
या महत्त्वाकांक्षी प्रकल्पांतर्गत हिंदवी स्वराज्याची राजधानी म्हणून ओळखल्या जाणार्‍या रायगड किल्ल्याच्या पायथ्याशी छत्रपती शिवरायांच्या नावाने, तर सिंहगडाच्या पायथ्याशी नरवीर तानाजीच्या नावाने हे भव्य व सुंदर तलाव बांधण्याचा संकल्प केला आहे.
या प्रकल्पासाठी एका विशेष समितीची स्थापना करण्यात येणार आहे. त्यामध्ये जलतज्ञ डॉ. दिनकरराव मोरे, तेर संस्थेचे अध्यक्ष आणि पर्यावरण क्षेत्रातील नोबेल विजेते डॉ. राजेंद्र शेंडे, जलतज्ञ श्री. शरद मांडे, एमआयटी वर्ल्ड पीस युनिव्हर्सिटीचे कार्याध्यक्ष प्रा. राहुल कराड, जागतिक आरोग्य संघटनेचे सल्लागार डॉ. चंद्रकांत पांडव आणि स्थापत्त्य अभियांत्रिकी तज्ञ डॉ. मंगेश तु. कराड यांच्यासहित अनेक जलतज्ञ आणि पर्यावरण तज्ञांचा या समितीमध्ये समावेश असणार आहे.
येत्या १५ ऑगस्ट – स्वातंत्र्यदिनाचे औचित्य साधून, या विषयातील तज्ञ मंडळींशी आणि महाराष्ट्र शासनाच्या संबंधित अधिकार्‍यांशी चर्चा करून या प्रकल्पाबाबतचा प्राथमिक प्रारूप आराखडा जाहीर करण्यात येणार आहे.

पुणे: टोकियो, जपान येथे जी२० आंतरपंथीय परिषद (G20 Interfaith Forum) दि.७ जून ते ९ जून २०१९ या कालावधीत संपन्न होणार आहे. या परिषदेत सहभागी होण्यासाठी, आयोजकांच्या खास निमंत्रणावरून एमआयटी वर्ल्ड पीस युनिव्हर्सिटी, पुणे भारतचे संस्थापक अध्यक्ष प्रा.डॉ. विश्‍वनाथ दा. कराड यांच्या अध्यक्षतेखाली शिष्टमंडळ आज रवाना होणार आहे.
या शिष्टमंडळात एमआयटी वर्ल्ड पीस युनिव्हर्सिटीचे कार्याध्यक्ष प्रा.राहुल विश्‍वनाथ कराड, नागपूर विद्यापीठाचे माजी कुलगुरू डॉ. एस.एन.पठाण , मिटसॉटचे प्रकल्प संचालक प्रा.डॉ. मिलिंद पांडे, एमआयटी डब्ल्यूपीयूचे प्रोव्होस्ट प्रा.डॉ. आर.एम.चिटणीस, रूपमेक इलेक्ट्रिकल्स प्रा.लि.चे अध्यक्ष व उद्योजक श्री. नानिक रूपानी यांचा समावेश आहे.
या परिषदेमध्ये एमआयटी वर्ल्ड पीस युनिव्हर्सिटीचे संस्थापक अध्यक्ष व युनेस्को अध्यासन प्रमुख प्रा.डॉ. विश्‍वनाथ दा. कराड हे विज्ञान आणि अध्यात्माच्या समन्वयाने वैश्‍विक मुल्याधिष्ठित शिक्षण पध्दतीच्या माध्यमातून जगात शांतता नांदेल, या विषयावर बीजभाषण देणार आहेत.
या परिषदेत प्रा.राहुल विश्‍वनाथ कराड हे शैक्षणिक आव्हाने – दुर्लक्षित धार्मिक परिमाण आणि २०२० च्या दिशेने वाटचाल या दोन विषयांवर आपले विचार मांडणार आहेत.
या जपान भेटीदरम्यान एमआयटी वर्ल्ड पीस युनिव्हर्सिटीचे शिष्टमंडळ जपान, टोकियो येथे असलेल्या  रेन्कोजी मंदिरातील नेताजी सुभाषचंद्र बोस यांच्या जतन केलेल्या अस्थीच्या पवित्र स्थळाला देखील भेट देणार आहे. तसेच, जपान येथील मराठी मंडळ व सोका गाकाई विद्यापीठालाही भेट देणार आहेत.

पर्यावरणदिनी माय अर्थ फाउंडेशन व भरारी प्रतिषठान चा उपक्रम

पुणे-महिलांना त्यांच्या मासिक पाळीमध्ये आपल्या आरोग्याची काळजी घेता यावी आणि पर्यावरणाचे रक्षण व्हावे अशा हेतुने तयार करण्यात आलेल्या पर्यावरणपूरक व चांगल्या दर्जाचे सॅनिटरी नॅपकीन चे वाटप जागतिक पर्यावरण दिनाच्या निमित्ताने करण्यात आले. माय अर्थ फाउंडेशन आणि भरारी प्रतिष्ठान यांच्या वतीने पर्वती येथील जनता वसाहतीत हा कार्यक्रम आयोजित करण्यात आला होता.

पावसाळ्यात गटारे तुंबून पूर स्थिती निर्माण होण्यात प्लास्टिक पिशव्यांसोबतच सॅनिटरी नॅपकीनही कारणीभूत ठरलेली आहेत. या सॅनिटरी नॅपकीनचे विघटन होत नसल्याने नाल्यामध्ये व गटारांमध्ये ते अडकले जातात व पूरस्थिती निर्माण होते. यामुळे पर्यावरणपूरक असलेल्या सॅनिटरी नॅपकीनचा वापर वाढावा आणि महिलांच्या आरोग्याबरोबरच आपल्या पर्यावरणाचेही रक्षण व्हावे या हेतुने बनविण्यात आलेल्या या पर्यावरणपूरक सॅनिटरी नॅपकीनचे वाटप करण्यात आले, असे माय अर्थ फाउंडेशनचे अध्यक्ष अनंत घरत यांनी यावेळी दिली.

या कार्यक्रमास माय अर्थ फाउंडेशनचे अध्यक्ष अनंत घरत, भरारी प्रतिष्ठानच्या अध्यक्षा संध्या बोम्मणा, लेडी फ्रेशचे संस्थापक नितीन हरहरे व मनीषा हरहरे, पुणे जिल्हा रिटेल व्यापारी संघाचे अध्यक्ष सचिन निवंगुणे, क्रांतिज्योती सावित्रीबाई फुले मंचच्या अध्यक्षा सोहनी डांगे, कचरा व्यवस्थापन मार्गदर्शक ललित राठी, महापालिकेच्या दातार आदी मान्यवर उपस्थित होते.

महिलांनी स्वतःच्या आरोग्याची काळजी घेण्याबरोबरच पर्यावरणपूरक नॅपकिन्स वापरावेत, असे लेडी फ्रेश चे संस्थापक नितीन हरहरे यांनी सांगितले

सॅनिटरी नॅपकीनच्या विघटनासाठी इन्सुलेटर!
सध्या वापरात असलेल्या सॅनिटरी नॅपकीनचे विघटन अथवा त्याची विल्हेवाट लावण्याची व्यवस्था नाही. त्यामुळे गटारातून जाणारे सॅनिटरी नॅपकीन अडकून गटारे तुंबतात व परिणामी पूरस्थिती निमाण होण्याची शक्यता होते. परंतु, आम्ही महापालिकेला सोबत घेऊन सॅनिटरी नॅपकीनचे विघटन करणाऱ्या व त्यांची विल्हेवाट लावणारे इन्सुलेटर बसविण्याचे काम हाती घेतोय. यामुळे सॅनिटरी नॅपकीनचे विघटन होईल आणि पर्यावरणाचं रक्षण होण्यासाठी हा उपक्रम उपयुक्त ठरेल, असेही अनंत घरत यांनी यावेळी सांगितले.

पुणे – महाराष्‍ट्र शासनाचे मुखपत्र असलेल्‍या लोकराज्‍य मासिकाच्‍या वाचक अभियानामध्‍ये उत्‍कृष्‍ट काम केल्‍याबद्दल जिल्‍हा माहिती अधिकारी राजेंद्र सरग यांचा माहिती व जनसंपर्क महासंचालनालयाचे महासंचालक ब्रिजेश सिंग यांनी सत्‍कार केला.पुण्‍यात झालेल्‍या या कार्यक्रमास संचालक सुरेश वांदिले, अजय अंबेकर आणि शिवाजी मानकर उपस्थित होते.

~प्रदूषणमुक्त पर्यावरण उपक्रमांतर्गत दैनंदिन पुढाकार~

पुणे:पर्यावरणविषयक प्रश्न सोडवण्यासाठी जाणीवपूर्वक कृती करणार्‍या बँक ऑफ महाराष्ट्रतर्फे जागतिक पर्यावरण दिनाच्या औचित्याने वृक्षरोपणाद्वारे वायु प्रदूषण रोखण्यासाठी वृक्षारोपणाचा संकल्प केला आहे. देशभरातील बँकेच्या सर्वाच्या सर्व 1832 शाखांद्वारेही मोहीम राबवली जाणार असून बँकेच्या पुणे स्थित मुख्यालयापासून याचा प्रारंभ केला जाईल.

सार्वजनिक क्षेत्रातील प्रमुख बँकांमधील एक, बँक ऑफ महाराष्ट्र पर्यावरणाला आपण काही देणे लागतो आहोत या विश्वासाने कार्यकृती करत असून जागतिक पर्यावरण दिनाच्या निमित्ताने एक संधी चालून आली असल्याचे मानते. जागतिक आरोग्य संघटनेच्या अहवालानुसार दरवर्षी जवळपास 4.2 मिलियन मृत्यू वायु प्रदूषणांमुळे झालेले आहेत.  एव्हड्या मोठ्या संख्येने मृत्यू होत असतानादेखील जेथे हवेची गुणवत्ता जागतिक आरोग्य संघटनेच्या मार्गदर्शक तत्वांच्या प्रमाणापेक्षा अधिक आहे अशा ठिकाणी जगाची 91 % लोकसंख्या रहात आहे.

बँक ऑफ महाराष्ट्रचे कार्यकारी संचालक श्री ए. सी. राउत यांनी बँकेच्या मुख्यालय परिसरात वृक्षारोपण केले.  यावेळी बोलताना श्री राऊत म्हणाले की, बँक कर्मचार्‍यांनी असा स्वच्छ आणि हरित वसुंधरा असा संकल्प केला असून त्यांचा प्रयत्न हा केवळ एका दिवसापुरता मर्यादित राहणार नाहीत, तो कायमस्वरूपी केला जाईल. ते पुढे म्हणाले की, वृक्षारोपणाव्यतिरिक्त नियमितपणे स्वत:चे वाहन न वापरता सार्वजनिक वाहनव्यवस्थेचा वापर करणे अथवा कार्यालयास येण्यासाठी एकत्रित वाहनाचा वापर करणे यासह आपल्या निवासाजवळील रिकाम्या जागेमध्ये वृक्षारोपण करणे आणि कचर्‍याची योग्य विल्हेवाट लावणे अशा कार्यकृती करून आपण आपला प्रत्येक दिवस प्रदूषणमुक्त भविष्य बनविण्यासाठी अंशदान देऊया.

गोयल गंगा फौंडेशनच्या वतीने पर्यावरण दिन साजरा 

पुणे :-  दिवसेंदिवस पर्यावरणाचा समतोल बिघडत असून मोठय़ा प्रमाणावर होत असलेली वृक्षतोड, जंगलांचा नाश या बाबी त्यासाठी कारणीभूत आहेत. पर्यावरणाच्या बिघडलेल्या समतोलामुळे अनियमित पर्जन्यमान, भयानक उष्णता अशा संकटांना तोंड देणे भाग पडत आहे. यावर प्रभावीपणे मात करायची असल्यास काळाची गरज ओळखून पर्यावरणाचा समतोल राखण्यासाठी मोठय़ा प्रमाणावर वृक्षारोपण व त्याचे संवर्धन करणे आवश्यक आहे  अशी भावना गोयल गंगा फौंडेशनचे विश्वस्त जयप्रकाश गोयल यांनी व्यक्त केली. बावधन मधील गंगा लिजंड येथे आज पर्यावरण दिन साजरा करण्यात आला त्यावेळी ते बोलत होते.

गोयल गंगा फौंडेशनच्या वतीने प्रत्येकवर्षी  पर्यावरणदिनानिमित्त असंख्य रोपांचे वृक्षारोपण करण्यात येते. यावर्षी देखील बऱ्याच रोपांचे वृक्षारोपण करण्यात आले. याप्रसंगी फौंडेशनचे विश्वस्त जयप्रकाश गोयल, अमित गोयल, नगरसेवक किरण दगडे पाटील,मुख्य अभियंता कुमार बर्डे,सीईओ किरण कुमार देवी याप्रसंगी उपस्थित होते.

ते पुढे म्हणाले कि, वनसंपदेवर मनुष्याची बरीच कामे अवलंबून असून वृक्षांचे रोपण व संवर्धन होणे महत्त्वाचे आहे.राष्ट्रीय कर्तव्य म्हणून प्रत्येकाने  वृक्षारोपणाच्या या मोहिमेत सहभागी व्हावे, अशी अपेक्षाही त्यांनी व्यक्त केली.

अमित गोयल म्हणाले कि, पृथ्वीचे संरक्षण व पर्यावरण वाचवण्याची जबाबदारी समाजातील प्रत्येक घटकाने यांना पार पाडायची असते. पर्यावरणाचे संरक्षण व त्याप्रती जागरूकता निर्माण करण्याचे महत्वाचे कार्य पार पाडावे ही आज प्रत्येकाची जबाबदारी बनली पाहिजे. ती आपण निभावली तर उद्याचे आपले भवितव्य उज्ज्वल असेल हे लक्षात  ठेवायला हवे.

पुणे : “विनायक पालेकर यांच्यासारखे अनेक दानशूर माणसे समाजात आहेत. न मागताही चांगल्या कामासाठी लाखो रुपयांची देणगी त्यांनी दिली. निरपेक्ष भावनेने दान करणाऱ्या दानशूर व्यक्तींमुळेच समाजकार्य उभे राहते. त्यातून माणुसकीचा धागा विणला जातो,” असे मत वंचित विकास संस्थेचे संस्थापक प्रा. विलास चाफेकर यांनी व्यक्त केले.

पुणे : राजकारणातील प्रगतीसाठी नव्हे तर केंद्रातून जास्तीत जास्त निधी आणून पुण्याचा सर्वांगीण विकास करण्यासाठी मी लोकसभेत गेलो आहे.

नगरसेवक, आमदार आणि मंत्री म्हणून पुण्याच्या विकासासाठी प्रयत्नशील राहिलो. यातून काही प्रश्न मार्गी लावले पण आणखी बरंच करायचं आहे. त्यासाठी खासदार म्हणून माझी जबाबदारी वाढली असल्याची मत पुण्याचे नवनिर्वाचित खासदार गिरीश बापट यांनी व्यक्त केले. नुकत्याच झालेल्या लोकसभेच्या निवडणुकीत विजय प्राप्त केल्यानंतर आज त्यांनी आपल्या आमदार आणि मंत्री पदाचा राजीनामा मुख्यमंत्री देवेंद्र फडणवीस तसेच विधानसभा अध्यक्ष हरिभाऊ बागडे यांच्याकडे दिला.  

पुणे महानगरपालिकेत तीन वेळा नगरसेवक,स्थायी समितीचे अध्यक्ष, कसबा पेठ मतदार संघाचे पाच वेळा अशी यशस्वी कारकीर्द बापट यांची होती. विधानसभा निवडणुकीनंतर  राज्य सरकार मध्ये अन्न व नागरी पुरवठा, ग्राहक संरक्षण, अन्न व औषध प्रशासन, संसदीय कार्यमंत्री म्हणून त्यांनी काम पाहिले.

 यावेळी बोलताना खासदार बापट म्हणाले, पुण्याच्या सर्वांगीण विकासाठी पालकमंत्री म्हणून पीएमआरडीएची स्थापना, पुण्याच्या विकास आराखडयास मंजुरी, पुणे मेट्रो, नवीन आंतरराष्ट्रीय विमानतळ, लोहगाव विमानतळाचा विस्तार,हिंजवडी आयटी पार्क मधील वाहतूक कोंडी सोडवण्यासाठी पर्यायी मार्गांची निर्मिती, जायका प्रकल्प, २४ तास पाणीपुरवठा,  मुंढवा जॅकवेल प्रकल्पाचे  पुनरूज्जीवन असे अनेक विकासाचे प्रकल्प शासन स्तरावर मार्गी लावण्याचा प्रयत्न केला. पंतप्रधानाच्या हस्ते पुणे मेट्रोचे पहिल्या टप्याचे उदघाटन झाल्यानंतर हिंजवडी ते शिवाजीनगर अशा दुसऱ्या टप्यालाही केंद्र सरकारकडून मंजुरी मिळवण्यासाठी प्रयत्न केले. या मार्गाचे काम ही आत्ता सुरु झाले आहे. रिंग रोडची निर्मीतीतून शहरातील  वाहतूक कोंडीवर कायम स्वरूपी तोडगा काढण्यासाठी प्रयत्नशील आहे. अन्न व नागरी पुरवठा मंत्री म्हणून या विभागात अनेक समाजपयोगी निर्णय घेतले. समाजातील सर्वसामान्य घटकांना योग्य दरात अन्न धान्याचा सार्वजनिक वितरण व्यवस्थेमार्फत पुरवठा करण्याचे काम या विभागामार्फत होते. गेल्या वर्षी पासून सक्षम सार्वजनिक वितरण प्रणालीचा वापर करून ई पॉस व्दारे धान्य वितरण करण्यात येत  आहे. राज्यातील  १४ जिल्हयात शेतकऱ्यांना कमी दरात रेशन दुकानात अन्न धान्य उपलब्ध करण्यात येत आहे. नवीन गोदाम धोरण, व्दारपोच योजना, अन्न व औषध पध्दती मध्ये सुलभता व कालबध्दता आणली. माझ्या कार्यकाळात अन्न परवाना नोंदणी मध्ये राज्य प्रथम क्रमांकावर राहिले. अन्न व औषध भेसळी करीता कडक प्रावधानाची तरतुद करताना यापूर्वीची  ६ महिन्यांची  शिक्षा बदलून आजन्म कारावासाच्या शिक्षेची तरतुद केली. अशा विविध योजना मी मंत्री असताना कार्यान्वीत केल्या.

 बापट पुढे म्हणाले, पुण्यातील लोकांनी माझ्यावर टाकलेल्या विश्वास, सहकार्यामुळे पुण्याचा विकासाला चालना देवू शकलो. पुण्यातील विविध विकासाच्या प्रश्नाबाबत लोकसभेमध्ये पाठपुरावा करून केंद्र शासनाकडून जास्तीत जास्त विकास निधी मिळविण्याचे उद्दिष्ट माझ्या समोर असल्याचे ही त्यांनी सांगितले.