पुणे-पुणे व मालाड, मुंबई येथे भिंत कोसळून अनेक जणांचे बळी गेले. केंद्र सरकारने नुकत्याच सादर केलेल्या पेट्रोल-डिझेलवर अधिभार लावल्याने त्यांच्या दरात प्रती लिटर २.५ रूपयांची वाढ झाली आहे. राज्यात खरीपाचा हंगाम सुरू असून अद्यापही बँकानी पुरेशा प्रमाणात पीक कर्जाचे वाटप केले नाही. या सर्व विषयांमध्ये सरकारचे लक्ष वेधण्यासाठी पुणे शहर जिल्हा काँग्रेस कमिटीचे अध्यक्ष रमेश बागवे यांच्या अध्यक्षतेखाली केंद्र व राज्य सरकारच्या विरोधात जिल्हाधिकारी कार्यालय समोर धरणे आंदोलन करून निदर्शने करण्यात आली.

आपल्या भाषणात शहराध्यक्ष रमेश बागवे म्हणाले की, ‘‘मागील ५ वर्षांपासून भाजप – शिवसेनेच्या राजवटीत भ्रष्टाचाराला संरक्षण दिले जात आहे. विरोधी पक्ष, प्रसार माध्यमे आणि आर.टी.आय. कार्यकर्त्यांनी अनेकदा भ्रष्टाचार संदंर्भात ठोस पुरावे समोर आणले आहे. असे असताना सुध्दा सरकारने नेहमी भ्रष्टाचाराला क्लिनचिट देण्याची भूमिका घेतली आहे. काही दिवसांपूर्वी पुण्यात भिंत कोसळून अनेक गरीब मजूर मरण पावले. या दुर्घटनेला कारणीभूत असलेले बांधकाम व्यावसायिक, अधिकारी व ठेकेदार यांच्यावर कायद्यानुसार कठोर कारवाई करण्याची गरज आहे. या सर्वांच्या संगनमताने अशा घटना घडतात. रत्नागिरी जिल्ह्यातील तिवरे धरण फुटल्याने १९ जणांचा मृत्यू झाला. आणि ४ जण बेपत्ता आहेत. त्यापूर्वी या धरणाची डागडुगी करण्यात आली तरी सुध्दा ही घटना घडली ही बाब अत्यंत दुर्दैवी आहे. या घटनेस दोषी असलेल्यांवर कारवाई करण्यास राज्य सरकार कमालीची निष्क्रियता दाखवित आहे. राज्यात खरीप हंगाम सुरू असताना बँकांनी शेतकऱ्यांसाठी पुरेशा प्रमाणात पीक कर्जाचे वाटप केले नाही अशी तक्रार अनेक शेतकऱ्यांकडून होत आहे. सर्व बँकांकडून एन.ओ.सी. आणावी यासाठी बँकांनी शेतकऱ्यांची अक्षरश: अडवणूक सुरू केली आहे. त्यामुळे शेतकरी हवालदिल झाला आहे.

केंद्र सरकारच्या अर्थसंकल्पात पेट्रोल व डिझेलवर अधिभार लावण्यात आला आहे. या दरवाढीमुळे ग्राहकांवर व सामान्य नागरिकांवर मोठा अन्याय झाला आहे. त्यामुळे महागाई देखील वाढू लागली आहे. जनतेच्या हितासाठी केंद्र सरकारने पेट्रोल व डिझेलची दरवाढ तातडीने मागे घ्यावी अन्यथा काँग्रेस पक्षाकडून तीव्र आंदोलन करण्यात येईल.’’

यानंतर काँग्रेस पक्षाच्या शिष्टमंडळाने निवासी जिल्हाधिकारी डॉ. जयश्री कटारे यांना भेटून निवेदन सादर केले.यावेळी माजी आमदार मोहन जोशी, बाळासाहेब शिवरकर, ॲड. अभय छाजेड, कमल व्यवहारे, रविंद्र धंगेकर, अविनाश बागवे, रफिक शेख, लता राजगुरू, सुजाता शेट्टी, दत्ता बहिरट, संगिता तिवारी, सोनाली मारणे, सचिन तावरे, विशाल मलके, भुषण रानभरे, शेखर कपोते, भगवान धूमाळ, वाल्मिक जगताप, ज्ञानेश्र्वर मोझे, प्रविण करपे, सुजित यादव, सेल्वराज ॲन्थोनी, साहिल केदारी, राजेंद्र शिरसाट, उस्मान तांबोळी, राजेंद्र मगर, मुन्नाभाई शेख, राजू साठे, लुकस नायडू, विनय ढेरे, नंदा ढावरे, मीरा शिंदे, रजिया बल्लारी, ज्योती अरवेन, मिसाबा शेख, छाया जाधव, ललिता जगताप आदींसह असंख्य काँग्रेस पदाधिकारी व कार्यकर्ते या आंदोलनात सहभागी  झाले होते .

पुणे – शहराला पाणीपुरवठा करणाऱ्या धरणांपैकी एक असलेले खडकवासला धरण शंभर टक्के भरले आहे. दरम्यान, धरणातून कालव्याद्वारे 1712 क्‍युसेकने पाणी सोडण्यातआले त्यानंतर 2568 क्युसेक ने पाणी सोडले गेले.

खडकवासला प्रकल्पातील चारही धरणांच्या पाणलोट क्षेत्रात पावसाची संततधार सुरू आहे. त्यामुळे ओढे-नाले यांद्वारे धरणात पाणी जमा होत आहे. खडकवासला प्रकल्पात एकूण 10.62 टीएमसी म्हणजे 36.42 टक्के पाणीसाठा जमा झाला आहे.

खडकवासला धरणातून बुधवारी सायंकाळी 6 वाजता कालव्याद्वारे 300 क्‍युसेकने पाणी सोडण्यात आले. यानंतर आज पहाटे दोन वाजता खडकवासला धरण शंभर टक्के भरल्यामुळे सांडव्यातून 856 क्‍युसेकने विसर्ग नदीपात्रात सोडण्यात आला. त्यानंतर सकाळी सहा वाजता आणखी 856 क्‍युसेकने विसर्ग नदीपात्रात सोडण्यात आला. आता एकूण 1712 क्‍युसेक इतका विसर्ग नदीपात्रात सोडण्यात आलेला आहे. तर 9 वाजता 1712 वरून 2568 क्यूसेक पर्यंत विसर्ग करण्यात आला

पानशेत 44.40% भरले आहे तर , वरसगाव ३२.७२ टक्के भरले आहे.टेमघर १७ टक्के भरले आहे

वनराई’चा वर्धापन दिन उत्साहात साजरा…_

पुणे, दि. १० जूलै: ‘खेड्याकडे चला’ या महात्मा गांधींच्या संकल्पनेवर आधारित भव्य प्रदर्शनाचे आयोजन ‘वनराई’च्या ३३ व्या वर्धापन दिनानिमित्त करण्यात आले होते. शाश्वत ग्रामीण विकास कसा साधला जाऊ शकतो? सामुहिक शेती, शेती अवजारे, शेती पुरक व्यवसाय, याचे मार्गदर्शक फलक आलेल्या सगळ्यांचे लक्ष वेधून घेत होते. पाणलोट व्यवस्थापनाचे कार्य कसे राबविले जाते याची माहिती विद्यार्थ्यांसह नागरिकांना कळावी यासाठी भल्या मोठ्या डोगंराची प्रतिकृति तयार करण्यात आली होती. त्यामध्ये अनगड दगडी बांध, सलग समतल चर, गॅबियन बंधारा, सिमेंट नाला बंधारा,वनराई बंधारा असे विविध बंधारे कशा पद्धतीत काम करतात हे प्रदर्शन पहायला आलेल्यांना लगेच समजत होते. प्रदर्शनामध्ये प्रामुख्याने बांबूची सायकल, अपारंपारिक उर्जा उपकरण, पर्यावरण पुस्तके, हॅंड ट्रॅक्टर, इलेक्ट्रीक सायकल, घरगुती वापराच्या पर्यावरणपूरक वस्तू नागरिकांना पाहता आल्या.

यावेळी पुण्यातील विविध शाळांतील सुमारे अडिच हजार विद्यार्थ्यांनी पर्यावरण प्रदर्शनाला भेट दिली. याचबरोबर सामाजिक, राजकीय, कृषी, पत्रकारिता, उद्योग अशा विविध क्षेत्रातील मान्यवरांनी पर्यावरण प्रदर्शन आणि स्नेहमेळाव्याला आवर्जून हजेरी लावली. पुणे, सातारा, नाशिक, रायगड, रत्नागिरी, जालना अशा महाराष्ट्रातील विविध जिल्ह्यांमधील गावागावांतील कार्यकर्त्यांनी वर्धापनदिनाच्या शुभेच्छा देण्यासाठी वनराई कार्यालय परिसरात एकच गर्दी केली होती.

कृषी-ग्रामीण विकासाच्या आणि पर्यावरण संवर्धनाच्या कार्याला पाठबळ मिळावं या हेतूने ‘स्नेहमिलन आणि पर्यावरण प्रदर्शनाचे’ दरवर्षी वर्धापनदिनी आयोजन करण्यात येते. निसर्ग जाणून स्वत:चेच नव्हे तर देशाचे आणि जगाचे भविष्य वाचविण्यासाठी पर्यावरण प्रदर्शनात विशेष गोष्टी पहायला मिळल्या.

वनराईच्या प्रमुख उद्दिष्ठांनमध्ये ग्रामीण विकासाचे काम अग्रस्थानी आहे, यामध्ये प्रामुख्याने पाणलोट व्यवस्थापन, वृक्षलागवड, शाश्वत शेती, सामुहिक शेती, घनकचरा व्यवस्थापन,पशुधन विकास, शिक्षण व आरोग्यविषयक सोयी-सुविधा, महिला सक्षमिकरण व कौशल्य विकास प्रशिक्षण असे विविध उपक्रम राबविण्यात येतात. त्यामुळे यंदाच्या वर्धापन दिनी पुण्यात खेडेगावाची प्रतिकृति वनराईतर्फे साकारण्यात आली. वनराईचा गेल्या ३३ वर्षातील प्रवास यानिमित्ताने नागरिकांना पाहता आला. पुण्यातील मित्रमंडळ चौक, पर्वती येथील वनराई संस्थेच्या आवारात हे ‘खेडेगावाच्या’प्रतिकृतीतील प्रदर्शन होते.

भारतभूमी हरित आवरणाने सदैव नटलेली असावी, इथली पडीक जमीन आणि रिकामे हात सदैव उत्पादनक्षम असावेत, स्वच्छ आणि सुंदर परिसर हा इथला प्रत्येकाचा श्वास असावा, इथले जलस्त्रोत शुध्द पाण्याने नेहमीच खळाळत असावेत, आधुनिक विज्ञान-तंत्राज्ञानयुक्त साधनांचा लाभ इथल्या समाजस्तरातील शेवटच्या घटकापर्यंत व्हावा हे पद्मविभूषण डॉ. मोहन धारिया तथा अण्णा यांच स्वप्न होते. हे स्वप्न प्रत्यक्षात आणण्यासाठी केलेल्या प्रयत्नांचं संस्थात्मक रुप म्हणजे वनराई, हि वनराई येत्या १० जूलै २०१९ रोजी ३४ व्या वर्षांत पदार्पण करीत आहे.

देशातील पडीक जमिनी उत्पादनक्षम व्हाव्यात आणि देशाच्या हरित क्षेत्रात वाढ व्हावी याकरिता वनराईच्या माध्यमातून शेतकर्‍यांना आजवर २ कोटीहून अधिक बिया व रोपांचे वाटप केले, तसेच जल-मृद संवर्धनासाठी वनराई बंधा-याची चळवळ उभारली. पाणलोट व्यवस्थापनाबरोबरच चराईबंदी, कु-हाडबंदी, नशाबंदी, नसबंदी व श्रमदान हा ‘पंचसुत्री’ कार्यक्रम राबवला. ग्रामीण भागात १३ प्रशिक्षण केंद्र उभारुन शेतक-यापर्यंत आधुनिक विज्ञान-तंत्रज्ञान पोहचविले. बचत गटांद्वारे ग्रामीण महिलांना रोजगार उपलब्ध करुन दिला. लोकसहभागातून स्वच्छ, हरित, संपन्न व जलसमृद्ध गावांची निर्मिती केली. यातूनच शाश्वत ग्राम विकासाची गंगा गावागावात वाहू लागली. पश्चिम महाराष्ट्र, कोकण व मराठवाडा अशा विविध भौगोलिक पार्श्वभूमी असलेल्यागावांमध्ये शाश्वत ग्रामीण विकासाद्वारे‘शहरातून खेड्याकडे’ (Reverse Migration) घडवून आणण्यात वनराईने यश मिळवले. वनराईचे उपक्रम स्थानिक ग्रामस्थांचे गरज लक्षात घेऊन आणि ग्रामस्थांच्या सहभागातून राबविले जातात. या सर्व उपक्रामांचा आढावा ३४ व्या वर्धापन दिनानिमित्त पहावयास मिळाला असल्याची माहिती संस्थेचे अध्यक्ष रवींद्र धारिया यांनी दिली. *यावेळी भाजप प्रवक्ते माधव भंडारी, वनराई संस्थेचे विश्वस्त नितीन देसाई, कमल मोरारका, अविनाश भोसले, रोहिदास मोरे, गिरिश गांधी, गणपतराव पाटील,चंद्रकांत इंगुळकर, डॉ. रघुनाथ माशेलकर, तसेच संस्थेचे सदस्य डॉ. जयंत नारळीकर, डॉ. विजय भटकर, डॉ. विजय केळकर, डॉ. माधवराव ताकवले, डॉ. भूषण पटवर्धन, डॉ. चंद्रकांत पांडव उपस्थित होते.

पुणे : झाडाची फांदी डाेक्यात पडून एका 35 वर्षीय महिलेचा मृत्यू झाला आहे. पुण्यातील आपटे रस्त्यावर ही घटना आज दुपारी बाराच्या सुमारास घडली.विशेष म्हणजे  पोलिसांनी या मृत्युस कारणीभूत ठरल्याप्रकरणी महापालिकेवर मात्र गुन्हा दाखल केलेला नाही.

पाेलिसांनी दिलेल्या माहितीनुसार आज दुपारी 12 च्या सुमरास जयश्री जगताप (वय 35) या आपटे रस्त्यावरील संताेष बेकरीजवळ झांबल्या हाेत्या. त्यावेळी त्या ठिकाणच्या एका झाडाची कुजलेली फांदी त्यांच्या डाेक्यात काेसळली. नागरिकांनी त्यांना तात्काळ उपचारासाठी रुग्णालयात दाखल केले. परंतु डाॅक्टरांनी महिलेला मृत घाेषित केले

महिला दिव्यांग असल्याची प्राथमिक माहिती समाेर आली आहे. ज्या ठिकाणची फांदी पडली ती फांदी सुरक्षेच्या दृष्टिकाेनातून अर्धी कापण्यात आली हाेती असे प्रत्यक्षदर्शींनी सांगितले.

याप्रकरणी डेक्कन पाेलीस स्टेशनमध्ये आकस्मात मृत्यूची नाेंद करण्यात आली आहे.