पुणे : गेल्या साडेचार वर्षांच्या कार्यकाळात ऊर्जा क्षेत्राचा कायापालट
करण्याचे काम प्रभावीपणे झाले आहे. महावितरणच्या माध्यमातून वीजयंत्रणेच्या
सक्षमीकरणासोबतच ग्राहकसेवा देखील पारदर्शक झाली आहे. त्यामुळे अभियंते आणि कर्मचाऱ्यांनी
अखंडित वीजपुरवठा व आपुलकीच्या उत्कृष्ट ग्राहकसेवेच्या जबाबदारीला सर्वोच्च प्राधान्य द्यावे,
असे आवाहन राज्याचे ऊर्जामंत्री चंद्रशेखर बावनकुळे यांनी केले.
सेनापती बापट मार्गावरील ‘प्रकाशभवन’मध्ये शुक्रवारी (दि. 26) आयोजित बैठकीत पुणे, सोलापूर,
सातारा, कोल्हापूर, सांगली जिल्ह्यातील महावितरणच्या विविध कामांचा व ग्राहकसेवेचा आढावा
ऊर्जामंत्री  बावनकुळे यांनी घेतला. यावेळी ते बोलत होते. बैठकीला महावितरणचे अध्यक्ष व
व्यवस्थापकीय संचालक श्री. संजीव कुमार, संचालक (संचालन) दिनेशचंद्र साबू, संचालक
(प्रकल्प) भालचंद्र खंडाईत, प्रभारी प्रादेशिक संचालक  सुनील पावडे उपस्थित होते.
ऊर्जामंत्री चंद्रशेखर बावनकुळे म्हणाले, की येत्या काळात राज्याची मागणी 35 हजार
मेगावॅटवर जाणार आहे. त्यासाठीच्या नियोजनानुसार वीजयंत्रणेची कामे करण्यात येत आहेत.
गेल्या साडेचार वर्षांत महावितरणसह ऊर्जाक्षेत्रात प्रभावी कामे झाली आहेत. महावितरणच्या
माध्यमातून अनेक नवीन प्रकल्प, योजनांची अंमलबजावणी झाली. तंत्रज्ञानाच्या माध्यमातून
ग्राहकसेवा व अंतर्गत प्रशासकीय कारभार पारदर्शक व ऑनलाईन झाला आहे. महावितरणचे
अध्यक्ष व व्यवस्थापकीय संचालक  संजीव कुमार व त्यांच्या टीमने उत्कृष्ट काम केले व
त्याची दखल घेऊन पंतप्रधान  नरेंद्र मोदी व मुख्यमंत्री देवेंद्र फडणवीस
यांनीही महावितरणचा गौरव केला आहे.
उर्जा क्षेत्रातील सर्व विकासकामांचा केंद्रबिंदू हा वीजग्राहकच आहे. त्याचा फायदा हा प्रत्येक
वीजग्राहकाला झाला पाहिजे. त्यामुळे सर्व वर्गवारीतील वीजग्राहकांना अखंडित वीजपुरवठा व
तत्परतेने ग्राहकसेवा उपलब्ध करून देण्यासाठी आपण बांधील आहे व ग्राहकांना आपुलकीने व
सौजन्याने वागणूक देणे सुद्धा अपेक्षीतच आहे. वीजग्राहकांचे प्रश्न समजून घेण्यासाठी दौरे
काढून संवाद साधा. वरिष्ठ अधिकाऱ्यांनी कार्यक्षेत्रात दौरे केल्यास 90 टक्के प्रश्न सुटतील.
विजेची उपलब्धता मुबलक आहे. मात्र तांत्रिक कारणांमुळे वीजपुरवठा खंडित झाल्यास तो
तत्परतेने सुरळीत केला पाहिजे. यामध्ये हेतुपुरस्सर विलंब लावू नका. नकारात्मक मानसिकतेमुळे
महावितरणची व पर्यायाने शासनाची बदनामी होते. याची जाणीव ठेऊन अभियंता व कर्मचाऱ्यांनी
ग्राहकांचे प्रश्न व समस्या सोडविण्यासाठी तत्पर राहावे, असे आवाहन ऊर्जामंत्री ना. श्री.
बावनकुळे यांनी केले. वीजसुरक्षेसाठी कायम दक्षता घ्यावी व विद्युत अपघात होणार नाही
यासाठी वेळोवेळी व तातडीने उपाययोजना करावी, असे निर्देश त्यांनी यावेळी दिले.

महावितरणचे अध्यक्ष व व्यवस्थापकीय संचालक संजीव कुमार यांनी यावेळी पुणे,
बारामती व कोल्हापूर परिमंडळातील वीजहानी, ग्राहकांच्या समस्या, अपूर्ण कामे, महावितरणच्या
विविध योजना व प्रकल्पांचा आढावा घेतला. महावितरणने सर्वच ग्राहकसेवा ऑनलाइन केल्या
आहेत. त्याच जलदगतीने कार्यालयीन कामकाज करा. विनाकारण व हेतुपुरस्सर त्रास
वीजग्राहकांना त्रास देण्याचा प्रयत्न होत असल्यास त्याची गंभीर दखल घेतली जाईल. तसेच
वीजपुरवठा वारंवार खंडित होण्याची व वितरण हानीची जबाबदारी ही संबंधीत अभियंते व त्यांच्या
वरिष्ठांवर निश्चित होणार आहे, असे श्री. संजीव कुमार यांनी स्पष्ट केले. यावेळी महावितरणचे
विविध योजना, प्रकल्प व ग्राहकसेवांबाबत संचालक (संचालन) दिनेशचंद्र साबू, संचालक
(प्रकल्प) श्री. भालचंद्र खंडाईत यांनी आढावा घेतला. या बैठकीला मुख्य अभियंता श्री. अनिल
भोसले (कोल्हापूर), श्री. सचिन तालेवार (पुणे) यांच्यासहर पुणे प्रादेशिक विभागातील अधीक्षक
अभियंते, कार्यकारी अभियंता व अधिकारी उपस्थित होते.

पुणे : पर्यावरण संवर्धनासाठी गेली १४ वर्षे कार्यरत असलेल्या लायन्स क्लब ऑफ पुणे इकोफ्रेंड्सच्या अध्यक्षपदी सुहास कुलकर्णी यांची निवड करण्यात आली आहे. कल्पना भालेराव यांची उपाध्यक्षपदी, अरुण कुलकर्णी यांची सचिवपदी, तर महादप्पा अंदुरे यांची खजिनदारपदी निवड करण्यात आली. एमजेएफ लायन सुनिल चेकर यांनी नवनियुक्त पदाधिकाऱ्यांना शपथ दिली. यावेळी इकोफ्रेंड्स क्लबचे संस्थापक अध्यक्ष अनिल मंद्रुपकर, रिजनल चेअरपर्सन डॉ. विलास कुलकर्णी, ऍड. बिपीन पाटोळे, शंतनु पेंढारकर, रमेश पसरीजा ,योगेश कदम, गणेश अनेराव यांच्यासह क्लबचे सर्व सदस्य उपस्थित होते.

सध्या असलेला पाणीटंचाईचा प्रश्न लक्षात घेऊन जलसंवर्धनाचा प्रकल्प हाती घेण्यात आला आहे. त्यासाठी शाळा-महाविद्यालये, कार्यालये, सोसायट्यांमधून सेमिनार्स, रॅली, व्याख्याने आयोजित करून पाणीबचतीचा जागृती केली जाणार आहे. याशिवाय, वृक्षारोपण, ऑक्सिजन पार्कची निर्मिती, स्वच्छ स्वागेट बसस्थानक, स्वच्छ पुणे शहर, पर्यावरण शिक्षणासाठी कॅच देम यंग हा उपक्रम, वेदर मॉनिटरिंग स्टेशन आणि किचन गार्डनींग असे नाविन्यपूर्ण उपक्रम क्लबच्या वतीने आगामी वर्षात राबविण्यात येणार असल्याचे सुहास कुलकर्णी यांनी सांगितले.

पुणे-माहिती अधिकार कायद्यात बदल करण्याच्या केंद्र सरकारच्या कृतीवर आक्षेप नोंदविण्यासाठी  अमित बागुल मित्रपरिवाराने  राळेगणसिद्धी येथे ज्येष्ठ समाजसेवक अण्णा हजारे यांची भेट घेऊन  आरटीआय कायद्यात  होणारा  बदल रोखण्यासाठी  जनआंदोलनात सक्रिय होण्याची ग्वाही दिली.
अमित बागुल आणि त्यांच्या मित्रपरिवाराने ज्येष्ठ समाजसेवक अण्णा हजारे यांची भेट घेऊन निवेदन दिले.
केंद्र सरकारने माहिती अधिकारात केलेल्या बदल्यामुळे या कायद्याला धोका निर्माण झाला आहे . आपल्या पुढाकारातून जनतेला  हा महत्वाचा अधिकार  मिळाला ;पण हे  सरकार ते हिरावून घेत आहे. एकप्रकारे हुकूमशाहीकडे या सरकारची वाटचाल असल्याचे  केंद्र सरकारने माहिती अधिकारात केलेल्या बदल्यामुळे अधोरेखित झाले आहे. या कृत्याचा जाब देशवासीय नक्कीच विचारतील,आपण फक्त निर्देश द्यावेत. देशातील युवक आणि  जनता रस्त्यावर  उतरून या सरकारला जाब विचारल्याशिवाय राहणार नाही. असेही यावेळी भेट घेऊन सांगितले . याबाबत अमित बागुल म्हणाले कि,  माहिती अधिकार कायद्यात बदल करणे ही अत्यंत चिंतेची बाब आहे. हा कायदा बराच विचार-विनिमय करून तयार करण्यात आला होता तसेच संसदेत तो एकमताने मंजूर झाला होता. मात्र, आता त्यात बदल होऊन तो संपण्याच्या मार्गावर आहे. यातील बदलांमुळे सरकारला विविध सरकारी संस्थांमध्ये माहिती आयुक्तांच्या नियुक्तया त्याच्या अटी, त्यांचा कार्यकाळ आणि वेतन-भत्ते यावर निर्णय घेण्याचा अधिकार मिळणार आहे. माहिती अधिकार २००५ नुसार, मुख्य माहिती आयुक्त आणि माहिती आयुक्तांचे वेतन, नियुक्त्यांची नियमावली तसेच भत्ते हे मुख्य निवडणूक आयुक्त आणि निवडणूक आयुक्तांच्या समान आहेत. त्यामुळे या कायद्यात बदल करून सरकार माहिती आयुक्तांना त्यांच्या अधिकारांपासून वंचित करण्याचा प्रयत्न करीत आहे. असा विविध सामाजिक स्थरातून सूर निघत असून  त्यानुसार आम्ही ज्येष्ठ समाजसेवक अण्णा हजारे यांची भेट घेऊन जनआंदोलन घेतल्यास त्यामध्ये सर्व युवक सहभागी होतील असेही अमित बागुल यांनी स्पष्ट केले. यावेळी त्यांच्या समवेत विश्वास दिघे , जयकुमार ठोंबरे , संतोष गेळे , महेश ढवळे , संतोष पवार , सागर आरोळे,धनंजय कांबळे, अभिजित गायकवाड, इम्तियाज तांबोळी अभिषेक बागुल,भाऊ दोडके,सतीश कांबळे आदी उपस्थित  होते.

पुणे : “देशभक्ती दाखवण्यासाठी सैन्यात जाणे आवश्यक नाही, तर तुम्ही एक चांगले नागरिक म्हणून समाजात वावरा. ज्या क्षेत्रात कार्य करत आहात, त्यातून देशाच्या प्रगतीला आपला हातभार लागेल, यासाठी प्रयत्न करा.  तीही एक प्रकारे देशसेवाच होईल. सैनिक सीमेवर देशाचे संरक्षण करतील आणि आपण देशहिताचे, मूल्यसंवर्धनाचे काम करून देशभक्ती जागवूया,” असे प्रतिपादन राष्ट्रपतीपदक प्राप्त ग्रुप कॅप्टन (निवृत्त) अश्वनी भाकू यांनी केले. सूर्यदत्ता ग्रुप ऑफ इन्स्टिट्यूटच्या बावधन कॅम्पसमध्ये ‘कारगिल विजय दिवस’ साजरा करण्यात आला. त्यावेळी भाकू बोलत होते.

विद्यार्थ्यांमध्ये देशभक्ती जागृत व्हावी आणि देशाविषयी प्रेम निर्माण व्हावे, यासाठी सूर्यदत्ता संस्थेकडून विविध उपक्रम राबविले जातात. २६ जुलै १९९९ रोजी भारताने पाकिस्तानवर विजय मिळवत कारगिल जिंकले. त्यानिमित्ताने २६ जुलै रोजी कारगिल विजय दिवस साजरा केला जातो. भारतीय सैन्याला मानवंदना देण्यासाठी विदयार्थ्यांनी सैनिकांचा पोशाख परिधान करून ‘कंधे से मिलते हैं कंधे’ या गाण्यावर नृत्य सादर केले आणि उपस्थितांचे मने जिंकली. डॉ. संजय चोरडिया यांच्या नेतृत्वाखाली प्रगती करत असलेल्या सूर्यदत्ता ग्रुप ऑफ इन्स्टिट्यूटकडून युद्धात वीरमरण आलेल्या ५२७ बहादुर जवानांना आदरांजली वाहण्यात आली. यावेळी अश्वनी भाकू यांनी कारगिल युद्धामधील त्यांच्या आठवणी सांगितल्या. यावेळी कारगिल युद्धातील थरारक अनुभव सांगत कॅप्टन सौरभ कलिया, कॅप्टन अनुज नायर, ग्रेनेडीयर योगेंद्र सिंह यादव, लेफ़्टनंट मनोज पांडे आणि कॅप्टन विक्रम बत्रा यांच्यासारख्या शूरवीरांच्या आठवणी सांगताना प्रेक्षागृहात उपस्थितांचे डोळे पाणावले.

डॉ. संजय चोरडिया म्हणाले, “देशभक्ती आपल्या आयुष्याचा एक भाग असावी. संरक्षण दल आणि पोलिस क्षेत्रातील उल्लेखनीय योगदान देणाऱ्या व्यक्ती सूर्यदत्ता ग्रुपमध्ये येऊन विद्यार्थ्यांशी संवाद साधतात. त्यामुळे विद्यार्थ्यांमध्ये देशभक्तीची भावना रुजण्याबरोबरच त्यांच्या कार्याची ओळख होते. ऑल इंडिया अँटी टेररिस्ट फ्रंटचे अध्यक्ष एम.एस. बिट्टा यांनी अनेकदा विद्यार्थ्यांना मार्गदर्शन केले आहे. सैनिकांच्या कुटुंबीयांप्रती आदरभाव व्यक्त करण्याबरोबरच त्यांच्यासाठी आम्ही सामाजिक बांधिलकीच्या भावनेतून अनेक उपक्रम राबवतो. वीरनारी आणि वीरांना सन्मानित करण्यासह सैनिकांच्या पाल्यास शिष्यवृत्ती योजना आम्ही राबवित असतो.”

पुणे : ‘फेडरेशन ऑफ इंडियन चेंबर ऑफ कॉमर्स अँड इंडस्ट्री’ची (फिक्की) महिला शाखा असलेल्या ‘फिक्की लेडीज ऑर्गनायझेशन’ अर्थात ‘फ्लो’ या संस्थेच्या वतीने वृक्षरोपण करण्यात आले. पुणे शुद्ध हवेचे ठिकाण व्हावे, याकरिता शहर आणि परिसरालगतच्या भागात संस्थेच्या वतीने वृक्षारोपण सप्ताह साजरा करण्यात आला. या उपक्रमाला ‘ट्री पब्लिक फाऊंडेशन’चे सहकार्य लाभले. विविध प्रकारची शेकडो झाडे या सप्ताहादरम्यान लावण्यात आली. वाढते शहरीकरण, पर्यावरणातील बदल, मोठया प्रमाववर होणारी वृक्षतोड, जंगलांचे घटते प्रमाण, पक्ष्यांचे स्थलांतरण यामुळे पर्यावरणावर विपरीत परिणाम होत आहेत. त्यासाठी मोठया संख्येत वृक्षारोपण होणे गरजेचे आहे, हीच बाब लक्षात घेऊन शहर हरीत तसेच पर्यावरणपूरक व्हावे, यासाठी संस्थेच्या वतीने नियमित उपक्रम राबविले जात आहेत, असे ‘फ्लो’च्या अध्यक्षा रितू छाब्रिया म्हणाल्या.

पुणे: विख्यात वन्यजीवन प्रेमी आणि पर्यावरणीय कार्यकर्ते बिट्टू सहगल यांनी ‘किड्स फॉर टायगर्स’ या शैक्षणिक उपक्रमाची स्थापना 2000 मध्ये केली. भारतातील ग्रामीण आणि शहरी मुलांसाठी निसर्गातून भटकंती, विविध  उत्सव आणि कार्यशाळा आयोजित करण्यातून हा उपक्रम सुरू झाला. सुरुवातीस नवी दिल्ली, मुंबई, कोलकाता आणि बंगळूरसारख्या शहरांमधून सादर होणारा ‘किड्स फॉर टायगर्स’ उपक्रम आता अन्य शहरे व गावांमधील 10 लाखांहून अधिक मुलांपर्यंत पोहोचत आहे.

‘किड्स फॉर टायगर्स’ हा उपक्रम कल्याणी स्कूलमध्येही सुरू करण्यात आला आहे. गेल्या दि. 23 जुलै रोजी या शाळेत पर्यावरण क्षेत्रातील नामवंत व तज्ज्ञांच्या उपस्थितीत या उपक्रमाचे उद्घाटन करण्यात आले.

या कार्यक्रमास दीपक दलाल, बिट्टू सहगल, डॉ. परवेश पंड्या, बिक्रम ग्रेवाल आणि मधु भटनागर यांची उपस्थिती लाभली. प्रेक्षकांमध्ये इतर शाळांचे शिक्षक व प्राचार्य, तसेच वरिष्ठ वर्गातील विद्यार्थ्यांचा समावेश होता.

प्रख्यात बाल कथाकार, निसर्गप्रेमी व भटकंती करण्यात रमणारे दीपक दलाल हे या कार्यक्रमात प्रमुख पाहुणे होते. शिक्षक आणि विद्यार्थ्यांच्या सहकार्याने शाळा कसे बदल घडवून आणू शकेल, यावर त्यांनी प्रेक्षकांना मार्गदर्शन केले. गेटा थर्नबर्ग यांच्या क्रांतिकारी भाषणातून एक उद्धृत मजकूर त्यांनी वाचला व हवामान बदलाशी संबंधित लढा देण्यासाठी तत्काळ हालचाली करायला हव्यात, असे समजावून दिले.

यानंतर डॉ. परवेश पंड्या आणि बिट्टू सहगल यांनी एका दृकश्राव्य स्वरुपाच्या कार्यक्रमाचे सादरीकरण केले. ‘निसर्गाचे म्हणणे एेका’, या विषयावरील या कार्यक्रमाने सर्वांचे लक्ष वेधून घेतले.

बिक्रम ग्रेवाल यांनी नंतर प्रेक्षकांना भारतातील विविध पक्षी व प्राणी यांच्या प्रजातींची झलक दाखवली. त्यांनी नागालँडच्या काही पर्यावरणीय कार्यकर्त्यांच्या कार्याचे प्रदर्शन केले. अमूर फाल्कन, या एका स्थलांतर करीत येणाऱ्या पक्षाची शिकार थांबवण्यासाठी हे कार्यकर्ते प्रयत्न करीत आहेत.

पृथ्वीचे दर सेकंदाला काही प्रमाणात नुकसान करणाऱ्या पर्यावरणविषयक संकटांबद्दल मधू भटनागर यांनी आपल्या भाषणात चिंता व्यक्त करीत, या संकटांना सामोरे जाण्याची गरज व्यक्त केली. कल्याणी स्कूलमध्येही त्या पर्यावरणशास्त्र शिकवीत असतात.

या सर्व सादरीकरणांनंतर प्रश्नोत्तरांचा कार्यक्रम घेण्यात आला. उत्साही प्रेक्षकांद्वारे विचारण्यात आलेल्या प्रश्नांची उत्तरे पाहुण्यांनी दिली.

वाघ या प्राण्याला नामशेष होण्यापासून वाचविण्यासाठी काही प्रयत्न करायला हवेत, असा संदेश घेऊन तशा निवेदनावर अतिथी व प्रेक्षकांनी स्वाक्षऱ्या केल्या व या कार्यक्रमाचा समारोप झाला.

• २६ वर्षापासून असलेल्या ट्यूमर मध्ये आढळले कॅन्सरचे विषाणू
• डॉक्टरांच्या १७ तासाच्या शर्तीच्या प्रयात्नानंतर मिळाली अडीच किलोच्या ट्यूमर पासून मुक्तता

पुणे-४७ वर्षीय भाग्यश्री मांगले यांचा २६ वर्ष पासून असलेला छाती व खांद्याच्या मधील ट्यूमर काढण्यात ज्युपिटर हॉस्पिटल मधील डॉक्टरांना यश मिळाले आहे. अतिशय दुर्मिळ आणि अनोखी शस्त्रक्रिया यावेळी भाग्याशी यांच्या वर करण्यात आली. खांदा आणि छातीच्या मध्ये आलेल्या ट्यूमर कडे अनेक वर्ष भाग्याशी यांनी दुर्लक्ष केले त्यामुळे त्याचे रुपांतर कर्करोगाच्या ट्यूमर मध्ये झाले.

मुळच्या रोहा, जिल्हा रायगडच्या असणाऱ्या भाग्याशी मांगले या पुण्यातील ज्युपिटर हॉस्पिटल, बाणेर येथे उजव्या हाताचे दुखणे व अर्धांगवायूच्या उपचारासाठी हॉस्पिटल मध्ये आल्या होत्या. यावेळी डॉक्टरांच्या असे निदर्शनास आले की त्यांच्या छाती व खांद्याच्या मध्ये २० सेंटीमीटर एवढा मोठा ट्यूमर आहे. हा ट्यूमर त्यांना १९९३ साला पासून असून तो कमी करण्यासाठी त्यांनी काही शस्त्रक्रिया देखील केल्या होत्या मात्र त्या अयशस्वी ठरल्या. त्यांनी एलोपॅथिक व आयुर्वेदिक उपचार केले तसेच काही ढोंगी डॉक्टरांच्या उपचारामध्ये त्या ट्यूमर वर गोंदवून देखील घेतले होते, मात्र कोणताही गुण आला नाही. आता तो ट्यूमर एवढा मोठा झाला होता की त्यामुळे श्वासनलिका दबली जाऊन त्यांना श्वासोच्छवास घेणे अशक्य होत होते. तसेच उजव्या हाताकडे जाणाऱ्या सर्व रक्त वाहिन्या देखील दाबल्या गेल्या होत्या व हात निकामी झाला होता.

यावर ज्युपिटर हॉस्पिटल मधील ओन्कोलॉजिस्ट आणि लॅपरोस्कोपिक सर्जन डॉ. आशिष पोखरकर म्हणाले की “ अडीच किलोचा हा ट्यूमर खांद्या व छातीच्या अवघड अशा भागात पसरला होता. तो काढण्यासाठी रुग्णाचे कॉलर हाड व छातीचे स्नायू कापावे लागले. तसेच हा ट्यूमर तेथील नसांमध्ये गेला होता. या शस्त्रक्रिये दरम्यान आमची पहिली प्राथमिकता रक्तवाहिन्या वाचवणे व त्याच वेळी कॉलर हाडाचे पुनर्निर्माण करणे ही होती. १७ तास चाललेली ही शस्त्रक्रिया अनोखी असून यात ज्युपिटर हॉस्पिटल मधील अनेक तज्ञांचे योगदान आहे.“

यावेळी ज्युपिटर हॉस्पिटलचे प्लॅस्टिक सर्जन डॉ. राहुल दलाल म्हणाले कि “ ही पुण्यातील नव्हे तर भारतातील दुर्मिळ केस आहे. पुण्यातील अनेक दिग्गज डॉक्टरांनी ही शस्त्रक्रिया करण्यास नकार दिला होता मात्र ज्युपिटर हॉस्पिटलने ही शस्त्रक्रिया यशस्वीरित्या पार पडली. आता रुग्णाची प्रकृती चिंताजन नसून त्यांना घरी देखील सोडण्यात आले आहे.”

या शस्त्रक्रिये मध्ये ओन्कोलॉजिस्ट आणि लॅपरोस्कोपिक सर्जन डॉ. आशिष पोखरकर, प्लॅस्टिक सर्जन डॉ. राहुल दलाल, भूलतज्ञ डॉ. ब्रिश्निक भट्टाचार्य तसेच डॉ. परितोषा दलाल व डॉ. अमित पाटील यांचा देखील समावेश होता.