पुणे, ता. ९ ः शालेय स्तरावर विद्यार्थ्यांना किमान एकतरी व्यावसायिक कौशल्य विकसित करता यावे या उद्देशाने डेक्कन एज्युकेशन सोसायटीच्या (डीईएस) वतीने सहा खासगी आयटीआय सुरू करणार असल्याची घोषणा सोसायटीच्या नियामक मंडळ व परिषदेचे अध्यक्ष डॉ. शरद कुंटे यांनी केली.
डीईएसच्या संस्थापक दिनानिमित्त आयोजित करण्यात आलेल्या गुणवंत विद्यार्थ्यांच्या सत्कार समारंभात डॉ. कुंटे अध्यक्षस्थानावरून बोलत होते. वरिष्ठ अधिव्या‘याता ऍड विद्याधर शिंत्रे प्रमुख पाहुणे म्हणून उपस्थित होते. सोसायटीचे उपाध्यक्ष महेश आठवले, कार्यवाह डॉ. श्रीकृष्ण कानेटकर, नवलमल ङ्गिरोदिया विधी महाविद्यालयाच्या व्यवस्थापन समितीचे अध्यक्ष  ऍड. नितीन आपटे, प्राचार्या डॉ. रोहिणी होनप यांची व्यासपीठावर उपस्थिती होती.
डॉ. कुंटे पुढे म्हणाले, ‘नवीन शैक्षणिक धोरणाचा आराखडा नुकताच जाहीर झाला आहे. त्यावर चर्चा ही सुरू आहेत. आराखड्यात नमूद केलेल्या विविध विषयांवर डीईएसने खूप आधीपासून तयारी सुरू केली आहे. बेरोजगारीचे वाढते प्रमाण लक्षात घेऊन स्वतःच्या पायावर उभे राहाता येईल अशाप्रकारच्या व्यावसायिक अभ्यासक‘मांची समाजाकडून मागणी होत आहे. समाजाच्या संस्थेकडून असलेल्या अपेक्षा पूर्ण करण्यासाठी विविध योजना सुरू करणार आहोत.’
ऍड शिंत्रे म्हणाले, ‘आपण प्रयत्न केला तर यश मिळते. परंतु ते दर वेळेला मिळेलच असे नाही. परंतु अपयशाने खचून जाण्याची आवश्यकता नाही. अपयश पचविण्याची शक्ती तेवढीच महत्त्वाची असते.’
कार्यवाह डॉ. श्रीकृष्ण कानेटकर यांनी अहवाल वाचन केले. डॉ. रोहिणी होनप यांनी स्वागत व प्रास्ताविक केले. डॉ. जगदीश लांजेकर यांनी गुणवंत विद्यार्थ्यांच्या यादीचे वाचन केले. डॉ. अनघा बलदोटा यांनी सूत्रसंचालन केले. डॉ. प्रताप साळुंके यांनी आभार मानले.

पुणे, दिनांक 9- जिल्‍ह्यातील पूर परिस्थितीमुळे बाधित झालेल्‍या नागरिकांना मदत करतांना शंभर टक्‍के पंचनामे पूर्ण होण्‍याची वाट न पहाता, जसे पंचनामे होतील तशी लगेच मदत देण्‍यात यावी, असे स्‍पष्‍ट आदेश जिल्‍हाधिकारी नवल किशोर राम यांनी दिले. जिल्‍हाधिकारी कार्यालयात आयोजित बैठकीत ते बोलत होते. यावेळी अपर जिल्‍हाधिकारी रमेश काळे, निवासी उपजिल्‍हाधिकारी डॉ. जयश्री कटारे यांच्‍यासह इतर अधिकारी उपस्थित होते.

जिल्‍हाधिकारी राम म्‍हणाले, जिल्‍ह्यातील शहरी आणि ग्रामीण भागामध्‍ये झालेल्‍या अतिवृष्‍टीमुळे पुराचे पाणी शहरी व ग्रामीण भागामध्‍ये पसरले होते. या पूर परिस्थितीमुळे बाधित झालेल्‍या कुटुंबियांना विशेष दराने मदत देण्‍यात येणार आहे. ही मदत देतांना पंचनामे झाले की लगेच देण्‍यात यावी.

पूर परिस्थिती आणि त्‍यावरील व्‍यवस्‍थापनाबाबत अधिका-यांची नियुक्‍ती करण्‍यात आली असून त्‍यांनी आपापली जबाबदारी पार पाडावी अशाही सूचना त्‍यांनी दिल्‍या. आपापल्‍या विभागातील भविष्‍यकालीन पूरबाधित होऊ शकणा-या गावांची यादी तयार करणे, तेथील नागरिकांना सुरक्षितस्‍थळी हलवणे आदीबाबत योग्‍य ती दक्षता घेणे तसेच या काळात कोणीही मुख्‍यालय सोडून जावू नये, असेही त्‍यांनी स्‍पष्‍ट केले.

बाधित पूल, पाण्‍याखाली गेलेले पूल, बंद असलेले रस्‍ते, त्‍याबाबतची सद्यस्थिती, दूरसंवाद यंत्रणाची पर्यायी व्‍यवस्‍था, वीजपुरवठा, पूरग्रस्‍त भागात वैद्यकीय पथक, वैद्यकीय सुविधा, औषध फवारणी, औषध पुरवठा, परिसर स्‍वच्‍छता, स्‍वच्‍छ आणि शुध्‍द पिण्‍याच्‍या पाण्‍याची सोय याबाबत अद्ययावत माहिती ठेवून आवश्‍यक ती कार्यवाही करण्‍याचे आदेश जिल्‍हाधिकारी नवल किशोर राम यांनी दिले.

सांगलीतील पूरग्रस्तांसाठी पाण्‍याच्‍या बाटल्‍या आणि बिस्‍कीटे रवाना

पुणे सांगली आणि कोल्‍हापूर येथील पूरग्रस्‍तांसाठी स्‍वच्‍छ पिण्‍याचे पाणी आणि ‘रेडी टू इट’ असे खाद्यपदार्थ पाठविण्‍याचे आवाहन जिल्‍हाधिकारी नवल किशोर राम यांनी केले. यासाठी जिल्‍हाधिकारी कार्यालयात कोल्‍हापूर आणि सांगली साठी स्‍वतंत्र मदत कक्ष स्‍थापन करण्‍यात आले आहेत. जिल्‍हाधिकारी राम यांनी केलेल्‍या आवाहनाला प्रतिसाद म्‍हणून शिरुर येथून सांगलीतील पूरग्रस्तांसाठी 12 हजार लिटर पाण्याच्या बाटल्या (एक ट्रक) आणि बिस्कीटांचे पुडे (एक ट्रक) रवाना करण्यात आले. यासाठी उपविभागीय अधिकारी भाऊसाहेब गलांडे तसेच त्‍यांच्‍या सहका-यांनी पुढाकार घेतला.या दोन्‍ही ट्रकना विभागीय आयुक्तांच्या परवानगीने टोलमधून सूट देण्यात आली आहे.

पुणे दि.09:- पुणे जिल्हयातील मुळा, मुठा व इंद्रायणी नद्यांना आलेल्या पुरामुळे पुणे, पिंपरी-चिंचवड शहरांमध्ये पुरस्थिती निर्माण झाली आहे. त्यामुळे नदीकाठी असलेल्या पुणे शहरा मधील जुनी सांगवी, दापोडी , पिंपरी, रावेत, रहाटणी, वाकड, आदर्शनगर, शांतीनगर, कामगार पुतळा, पाटील इस्टेट, खिलारे वस्ती इत्यादी परिसरातील पुराने बाधित झालेल्या सुमारे 1685 कुटुंबांचे तर अप्पर तहसिलदार, पिंपरी-चिंचवड यांनी जिल्हाधिकारी नवल किशोर राम यांच्याकडे सादर केलेल्या अहवालानुसार 2227 कुटुंबांचे स्थानिक पातळीवर स्थलांतर करण्यात आलेले आहे. ही संख्या आणखी वाढण्याची शक्यता आहे.
या आपत्तीग्रस्तांना मोफत धान्याचा पुरवठा करण्याबाबत आढावा बैठकीचे आयोजन करण्यात आले होते. यावेळी जिल्हाधिकारी नवल किशोर राम यांनी वितरणाचा आढावा घेवून तात्काळ धान्यपुरवठा करण्याचे आदेश दिले. या आढावा बैठकीस अतिरिक्त जिल्हाधिकारी रमेश काळे, निवासी उप जिल्हाधिकारी डॉ.जयश्री कटारे व संबंधित विभागाचे अधिकारी उपस्थित होते.
शासनाच्या दिनांक 8 मार्च व 7 ऑगस्ट 2019 च्या शासननिर्णय व पत्रानुसार 10 किलो गहू व 10 किलो तांदळाचा मोफत पुरवठा करण्याबाबत सूचना देण्यात आलेल्या आहेत. त्यानुषंगाने माहे ऑगस्ट 2019 मधील मंजूर अन्नसुरक्षा नियतनातून वाटप करुन शिल्लक राहिलेल्या नियतनातून परिमंडळ अधिकारी यांच्याकडून प्राप्त बाधित कुटूंबाच्या यादीनुसार व दुकानदार निहाय दिनांक 5 ऑगस्ट 2019 च्या आदेशाप्रमाणे पुणे शहर व पिंपरी-चिंचवड, भोसरी इ. बाधित ठिकाणच्या परवानाधारक दुकानांमधून या मोफत धान्यांचे वितरण करण्याची कार्यवाही सुरु करण्यात आली असल्याची माहिती अन्नधान्य वितरण अधिकारी अस्मिता मोरे यांनी दिली.

पुणे- पुण्‍याचे जिल्हाधिकारी नवल किशोर राम यांनी सांगली व कोल्हापूरमधील पूरग्रस्तांना मदत करण्‍यासाठी तातडीने कक्ष उभारून आवश्यक ती कार्यवाही करण्‍यासाठी वरिष्ठ महसूल अधिका-यांना सूचना दिल्या. त्यानुसार जिल्हाधिकारी कार्यालयात स्वतंत्र कक्ष स्थापन करण्यात आले आहेत. नागरिकांनी पूरग्रस्तांना मदत म्हणून पाण्याच्या बाटल्या, बिस्कीट पुडे, मेणबत्त्या, टॉर्च, नवीन शाली, नवीन ब्‍लँकेट, नवीन चटई, रेडी टू इट असे खाद्यपदार्थ द्यावेत, असे आवाहन जिल्हाधिकारी राम यांनी केले. कक्षाकडे जमा होणारी मदत विभागीय आयुक्‍त कार्यालयातील मदत केंद्राशी समन्‍वय साधून पुरग्रस्‍तांकडे पाठविण्‍यात येईल, असे सांगून जिल्‍हाधिकारी राम यांनी मुख्यमंत्री सहायता निधीलाही नागरिकांनी उत्स्फूर्तपणे आर्थिक मदत करावी, असे आवाहन केले.

जिल्‍हाधिकारी कार्यालयात जिल्‍ह्यातील पूरस्थितीचा आढावाही घेण्‍यात आला. यावेळी अपर जिल्‍हाधिकारी रमेश काळे, निवासी उपजिल्‍हाधिकारी डॉ. जयश्री कटारे तसेच इतर अधिकारी उपस्थित होते.

पुणे जिल्हाधिकारी कार्यालयात सांगली आणि कोल्हापूर पूरग्रस्तांसाठी स्थापन करण्यात आलेल्या मदत कक्षातील अधिकारी पुढील प्रमाणे आहेत. कोल्हापूर जिल्ह्यासाठी -समन्वय अधिकारी – अजय पवार (उपजिल्हाधिकारी) -मोबाईल 8856801705, श्रीमती आरती भोसले (उपजिल्हाधिकारी) – 9822332298, श्रीमती नीता शिंदे (उपजिल्हाधिकारी) – 9421118446 आणि सांगली जिल्ह्यासाठी समन्वय अधिकारी – भारत वाघमारे (उपजिल्हाधिकारी) – 9850791111, श्रीमती सुरेखा माने (उपजिल्हाधिकारी) – 7775905315, रवी कोळगे (स्‍वी. सा.) मो. 9511251475.

सांगली आणि कोल्हापूर पूरग्रस्तांसाठी मदत करू इच्छिणाऱ्या नागरिकांनी या अधिका-यांशी संपर्क साधावा, असे आवाहनही जिल्हाधिकारी नवल किशोर राम यांनी आवाहन केले आहे.

पुणे, दिनांक 9- सांगली व कोल्हापूर जिल्ह्यात पूरपरिस्थिती गंभीर झाल्याने अनेक कुटुंबाचे संसार उद्धवस्त झाल्यामुळे त्याठिकाणी मदतीचा ओघ अनेक ठिकाणाहून सुरू झाला आहे. उपजिल्‍हाधिकारी सुरेखा माने यांनीही मदत करुन माणुसकीचा प्रत्‍यय दिला आहे.

याबाबत अधिक माहिती अशी की, माण तालुक्यात तहसीलदार पदावर कार्यरत असताना जलसंधारणाचे काम उल्लेखनीयरित्या केल्याने उपजिल्हाधिकारी श्रीमती सुरेखा माने यांना अहिल्याबाई होळकर पुरस्काराने नुकतेच गौरविण्यात आले होते, त्यांनी पुरस्काराची सर्व रक्कम पुरग्रस्तांसाठी देऊन संवेदनशीलतेचा प्रत्यय दिला. मदतीचा धनादेश सुरेखा माने यांनी जिल्‍हाधिकारी नवल किशोर राम यांच्‍याकडे सुपूर्द केला. यावेळी अपर जिल्‍हाधिकारी रमेश काळे उपस्थित होते.

पुण्‍याचे जिल्हाधिकारी नवल किशोर राम यांनी सुद्धा सांगली व कोल्हापूर मधील पूरग्रस्तांना मदत करण्‍यासाठी तातडीने कक्ष उभारून आवश्यक ती कार्यवाही करण्‍यासाठी वरिष्ठ महसूल अधिका-यांना सूचना दिल्या. तसेच पुणे जिल्ह्यातील पूरपरिस्थिती चा आढावा घेऊन विविध विषयासंदर्भात तातडीने जिल्हा स्तरावर समन्वय अधिका-यांच्‍या नियुक्त्या करून कामाला सुरुवात देखील केली आहे. बैठकीत जिल्हाधिकारी कार्यालयातील उपस्थित महसूल अधिका-यांनीही पुरग्रस्तांसाठी एक दिवसाचे वेतन देण्याचे जाहीर केले.

याप्रसंगी निवासी उपजिल्हाधिकारी डॉ. जयश्री कटारे, भूसंपादन उपजिल्हाधिकारी समीक्षा चंद्रकार व अन्य उपजिल्हाधिकारी, तहसीलदार उपस्थित होते.

पुणे, 9 ऑगस्ट 2019 : येत्या शनिवारी, 10 ऑगस्ट व रविवार 11 ऑगस्ट रोजी रॉयल वेस्टर्न इंडिया टर्फ क्लब (आरडब्लूआयटीसी) यांच्या तर्फे अश्वशर्यतींच्या यंदाच्या मौसमातील दोन अत्यंत रोमांचकारी शर्यतीचे आयोजन करण्यात आले असून द ईव्ह चॅम्पियन ट्रॉफी आणि टर्फ क्लब ट्रॉफी या दर्जेदार शर्यतींमध्ये एकाहून एक सरस अश्वामधील चुरस अनुभवण्याची संधी मिळणार आहे.

यातील शनिवारी होणार्‍या पहिल्या रंगतदार शर्यतीत द ईव्ह चॅम्पियन ट्रॉफी जिंकण्यासाठी प्रशिक्षित केलेल्या अश्वांमधील झुंज पाहता येणार आहे. ही शर्यत शनिवारी, 10 ऑगस्ट रोजी दुपारी 1.30 वाजता सुरु होणार असून ही प्रतिष्ठेची शर्यत 15 फेब्रुवारी 1941 रोजी सर्वप्रथम सर व्हिक्टर ससून यांच्या हस्ते सुरु करण्यात आली होती. या शर्यतीत अत्यंत उच्च कामगिरीचा इतिहास असणार्‍या 4 वर्षे वयाच्या अश्वाचा सहभाग असून अश्वशर्यतींच्या विश्वात या रेसला महत्व आहे.

रविवारी होणार्‍या टर्फ क्लब ट्रॉफी या दुसर्‍या शर्यतीतही दर्जेदार अश्व आणि उत्तम जॉकी यात झुंज रंगणार आहे. रविवार 11 ऑगस्ट रोजी दुपारी 1.30 वाजता सुरु होणार्‍या टर्फ क्लब ट्रॉफी या मोठा इतिहास असलेल्या शर्यतीतही उत्तम रितीने प्रशिक्षित केलेल्या अश्वांमध्ये चुरस रंगणार आहे. सर्वप्रथम मुंबई येथे 1947 मध्ये टर्फ क्लब कप या नावाने सुरु झालेली शर्यत अखेरच्या टप्प्यातील स्प्रिंटसाठी महत्वाची मानली जाते. 1400 मीटर अंतराच्या या शर्यतीला विशेष ग्रेडच्या शर्यतीचा दर्जा देण्यात आला आहे.