शाहीर हिंगे लोककला प्रबोधिनी च्या वतीने कै.शाहीर रत्न किसनराव हिंगे स्मृतिदिन

पुणे : ग्रामीण भागात पोवाडा, गवळण, लावणी असे प्रकार जपण्याचे काम होत आहे. मात्र शहरामध्ये ही संस्कृती रुजत नव्हती. ती संस्कृती शहरात रुजविण्याचे काम करण्याची गरज आहे. लोककला हा आपल्या संस्कृतीचा आरसा असून ही कला जोपासायला हवी, असे मत ज्येष्ठ बँकिंग तज्ञ विद्याधर अनास्कर यांनी व्यक्त केले.

शाहीर हिंगे लोककला प्रबोधिनी तर्फे कै.शाहीररत्न किसनराव हिंगे यांच्या २७ व्या स्मृतीदिनानिमित्त हिंगे यांचे सहकारी ढोलकी वादक विनायक वाघचौरे यांचा सन्मान व शाहिरी निनाद या अंकाचा प्रकाशन सोहळा घोले रस्त्यावरील पं. जवाहरलाल नेहरु सांस्कृतिक भवन येथे पार पडला. यावेळी संस्कार भारतीचे अखिल भारतीय लोककला संयोजक निरंजन पंडा, सरसेनापती हंबीरराव मोहिते यांचे वंशज विक्रमसिंह मोहिते, डेक्कन एज्युकेशन सोसायटीचे सदस्य मिलिंद कांबळे, आचार्य शाहीर हेमंतराजे मावळे आदी व्यासपीठावर उपस्थित होते. पोवाडा प्रशिक्षण वर्गाच्या समारोपाच्या निमित्ताने विद्यार्थ्यांना प्रमाणपत्र देखील वितरित करण्यात आले.

निरंजन पंडा म्हणाले, भारतीय वाड्.मयात लोक या शब्दाचा व्यापक अर्थ आहे. त्यामुळे लोक कलांना खूप महत्व आहे. फोक नाही, तर लोककला ही आपली आहे. समुद्र आणि आकाश याला जसा दुसरा शब्द नाही, त्याप्रमाणे लोककलांना दुसरा शब्द नाही. आपली संस्कृती जीवंत राहण्यामागे लोककलांचे मोठे योगदान आहे. भारतीय कला या सामान्य व्यक्तीला देवत्वाकडे नेणा-या कला आहेत.

विक्रमसिंह मोहिते म्हणाले, काव्यमय चरित्र सांगण्याच्या अनेक पद्धती भारतामध्ये आहेत. मात्र, महाराष्ट्रात पोवाडयाच्या माध्यमातून चरित्र सांगितले जाते. पोवाडयाच्या माध्यमातून लोककला जपण्याचे कार्य अखंडपणे सुरू आहे. तरी देखील अनेक विषय अजूनही शाहिरीमध्ये गुंफणे गरजेचे आहे. पूर्वी या कलेला राजाश्रय होता. स्वातंत्र्यानंतर यात खंड पडला असून प्रबोधिनी सारख्या संस्था हे जपण्याचे कार्य करीत आहेत.

प्रबोधिनीचे अध्यक्ष आचार्य शाहीर हेमंत मावळे म्हणाले, महाराष्ट्र शाहिर परिषद ही संघटना हिंगे यांच्या ४० व्या वाढदिवसाला व शाहिर हिंगे लोककला प्रबोधिनीची स्थापना त्यांच्या ६१ व्या वाढदिवशी झाली. एकाच व्यक्तीच्या वाढदिवशी अशा संस्था स्थापन होणे आणि आजपर्यंत कार्यरत असणे ही एकमेव घटना आहे. त्यामुळे महाराष्ट्राच्या शाहिरी परंपरेत त्यांचे नाव व कार्य कधीही विस्मृतीत जाणार नाही, असेही त्यांनी सांगितले.

विद्याधर अनास्कर यांनी आपल्या मातोश्रींच्या स्मरणार्थ रु. ५१,०००/- निधी शाहिरी भवन गुरुकुलासाठी दिला. यावेळी प्रशिक्षण वर्गातील विद्यार्थ्यांनी पोवाडा सादरीकरण केले. शाहीर गणेश टोकेकर व सहका-यांचा नमन तुज शाहीरा हा पोवाडयाचा कार्यक्रम देखील झाला. अक्षदा इनामदार हिने सूत्रसंचालन केले. प्रा.संगीता मावळे यांनी प्रास्ताविक केले. डॉ. मृणालिनी दुसाने यांनी आभार प्रदर्शन केले.

पुणे :नारायण पेठ येथील नीलकंठ ज्वेलर्समध्ये सेल्समन तरुणाने अफरातफर करून सुमारे साडेचार कोटींच्या सोन्याची चोरी केल्याचा आरोप करण्यात आला आहे. याबाबत विश्रामबाग पोलिस ठाण्यात गुन्ह्या दाखल करण्यात आला आहे.
प्रतिक नगरकर (वय ३५ वर्ष, रा. सुतारदारा, कोथरुड) असे गुन्हा दाखल झालेल्या सेल्समनचे नाव आहे. याबाबत नितीन इरप्पा डांगे (वय ३७ वर्ष, रा. सांगवी) यांनी विश्रामबाग पोलीस ठाण्यात तक्रार दिली आहे.

पोलिसांनी दिलेल्या माहितीनुसार, नितीन डांगे हे नीलकंठ ज्वेलर्स प्रायव्हेट लिमिटेडमध्ये मॅनेजर म्हणून कामास आहे. आरोपी नगरकर हा नारायण पेठ येथील नीलकंठ ज्वेलर्स या सोन्याच्या प्रसिद्ध दुकानात सेल्समन म्हणून काम करत आहे. नीलकंठ ज्वेलर्स येथे नगरकरकडे अंगठी, कॉईन आणि वेडणी च्या काउंटरची जबाबदारी होती. १ एप्रिल ते २६ मे २०२५ या कालावधीत त्याने अफरातफर करून तब्बल ४ कोटी ५८ लाखांच्या सोन्याची चोरी केली आहे. हा चोरीचा प्रकार उघडकीस आल्यानंतर नीलकंठ ज्वेलर्सच्या मॅनेजरने विश्रामबाग पोलीस ठाण्यात त्याच्याविरुद्ध फिर्याद दिली आहे. पोलिसांकडून सीसीटीव्ही चित्रीकरण तपासले जात आहे. पोलीस उपनिरीक्षक मनोज बरुरे अधिक तपास करीत आहेत.

फिर्यादीत दिलेल्या माहितीनुसार, प्रतिक नगरकर (वय ३५ वर्ष, रा. सुतारदारा, कोथरुड) याने ४ कोटी ५८ लाख १३ हजार ६७९ रुपयांचे ४ हजार ६८९ ग्रॅम २४ कॅरेट सोन्याची चोरी केली. यामध्ये २ हजार २६२ ग्रॅम वजनाच्या १८० वेडणी (२ कोटी २१ लाख ६ हजार ५७९ रुपये) आणि २,४२६ ग्रॅम वजनाचे ९४ कॉईन्स (२ कोटी ३७ लाख ७ हजार १०० रुपये) याचा समावेश आहे.

पुणे

पुणे महापालिकेचे 38 वे आयुक्त म्हणून नवलकिशोर राम यांनी आज पदभार स्वीकारला. त्याबद्दल राज्याचे उच्च व तंत्रशिक्षण मंत्री चंद्रकांतदादा पाटील यांनी आज अभिनंदन करुन शुभेच्छा दिल्या. महापालिका क्षेत्राच्या सर्वसमावेशक विकासासोबत; समस्या सोडविण्यासाठी सकारात्मक धोरण ठेवण्याबाबत सूचित केले.

यावेळी महापालिकेचे अतिरिक्त आयुक्त पृथ्वीराज बी., ओमप्रकाश दिवटे, भाजप पुणे शहर अध्यक्ष धीरज घाटे, आ. भीमराव तापकीर, हेमंत रासने, माजी नगरसेवक गणेश बिडकर, श्रीनाथ भिमाले, वर्षाताई तापकीर, दीपक पोटे, गणेश कळमकर, राहुल भंडारे, रविंद्र साळेगावकर, महेश पुंडे, सुभाष जंगले, प्रमोद कोंढरे,आदी उपस्थित होते.

पुणे- दस मे बस अशी घोषणा करत निवडणुका लढवलेल्या भाजपने आता महापालिका निवडणुका तोंडावर येताच प्रशासनाला हाताशी धरून पीएमपीएमएल बस ची भाडेवाढ केली असून निवडणुका जवळ येताच ती मागे घेऊन लोकांची सहानुभूती मिळविण्याचे राजकीय षड्यंत्र भाजपा खेळत असल्याचा आरोप उद्धव बाळासाहेब ठाकरे यांच्या शिवसेनेचे पुणे शहर प्रमुख संजय मोरे आणि माजी नगरसेवक प्रशांत बधे यांनी केला आहे. लोकांना मूर्ख समजून ते खेळत असलेल्या या राजकीय चाली लोकच हाणून पाडतील , हेल्मेट सक्ती साठी भाजपने भाजपच्या विद्यमान खासदारांनी आंदोलने केल्याचे लोकांना आठवत असेल आणि त्यानंतर राज्यात , केंद्रात सक्ती असतानाही अजूनही लोक हेल्मेट सक्ती साठीची दंड वसुली बिनबोभाट सहन करत आली आहे . या सर्व गोष्टींचा विचार महापालिका निवडणुकीत लोकांनी करावा असे मोरे आणि बधे यांनी म्हटले आहे.

त्यांनी पुढे असेही म्हटले आहे कि,’पुणे महानगरपालिका व पिंपरी चिंचवड महानगरपालिका यांच्या अंतर्गत असलेल्या पीएमपीएमएलच्या मार्फत बस सेवा पुरवण्यात येते कमीत कमी पैशांमध्ये सार्वजनिक वाहतूक पुरवणे हा उद्देश आहे परंतु अनेक वेळेस भाडेवाढ करण्यात आली. आता ही दरवाढ दुपटीने करण्यात आली आहे ही बेकायदेशीर, पुणेकरांना त्रास देणारी दरवाढ आहे. याचा पुणे शहर शिवसेनेच्या वतीने तीव्र निषेध करीत आहोत.

अनेक वर्ष पुणे महानगरपालिका व पिंपरी चिंचवड महानगरपालिकेमध्ये भाजपाची एक हाती सत्ता आहे भाजपाच्या अनेक नेत्यांनी पुणे शहरातील व पिंपरी चिंचवड शहरातील सार्वजनिक वाहतूक कमी दरात देण्याचे आश्वासन दिले. भाजपच्या राजकीय रणनितीप्रमाणे खोटी आश्वासन भाजपाने दिली. त्या खोट्या आश्वासनाला पुणेकर व पिंपरी चिंचवड नागरिक फसले गेले. त्यांना मते दिली व ठरल्याप्रमाणे त्यांनी मत मिळाल्यानंतर आश्वासन पूर्ण केली नाहीत. याची अनेक उदाहरणे आहेत उदाहरणार्थ दस मे बस ही योजना मागील सार्वत्रिक निवडणुकीसाठी भाजपाकडून देण्यात आली होती. निवडणुका जिंकल्या आणि आश्वासनांचा विसर भाजपाला पडला.
भाजप सत्ताधारी असल्याकारणाने पी एम पी एम एल चा वापर राजकारणासाठी करत आहे. आज भाजप पी एम पी एम एल ची भाडेवाढ करत आहे. त्याच्यातले काही नेते जसे भाजपाचे प्रवक्ते संदीप खर्डेकर त्याला विरोध करत आहेत. सत्ता तुमची, निर्णय तुमचा, विरोधहि तुमचाच असं होत नाही. संदीप खर्डेकर विरोध करण्यापेक्षा तुमच्या भाजपाचे राष्ट्रीय नेते केंद्रीय राज्यमंत्री ना मुरलीधरजी मोहोळ व महाराष्ट्र राज्याचे कॅबिनेट मंत्री चंद्रकांतदादा पाटील यांनी मतासाठी काय षडयंत्र केले याचा जाब विचारण्याची हिंमत असेल तर विचारा, अन्यथा नोटंकी बंद करा.
पी एम पी एम एल ची भाडेवाढ करण्याची गरज नाही तर त्याच्यामध्ये होत असलेला भ्रष्टाचार थांबवण्याची गरज आहे. हे आपल्या सर्व राष्ट्रीय, राज्यस्तरीय व स्थानिक नेतृत्वाला माहित आहे.
पी एम पी एम एल चे स्वतःचे आगार कॉन्ट्रॅक्टर वापरतात व सर्व सुख सुविधाचा वापर मोफत केला जातो. तसेच सी इ आर टी च्या गाड्यांचा गाईडलाईनचा भंग करून कॉन्ट्रॅक्टरच्या जास्तीत जास्त गाड्या चालवल्या जातात व कमीत कमी गाड्या पी एम पी एम एल च्या चालवल्या जातात. त्यामुळे कॉन्ट्रॅक्टरची व त्यांच्या जवळच्या हितचिंतकांची अधिकाऱ्यांची घर भरली जातात. याची माहिती आपल्या सर्व नेत्यांना आहे. याबाबतची भूमिका भाजपाने स्पष्ट करावी. आपल्या काही चाणक्य नेत्यांची मतांसाठी राजकीय रणनीतीचा भाग म्हणून पी एम पी एम एल त्वरित भाडेवाढ करायची व पुणे महानगरपालिका व पिंपरी चिंचवड महानगरपालिका निवडणुका घोषित झाल्या की भाडेवाढ कमी करायची व नवनवीन योजना सुरू करण्याची ही रणनीती आहे का याचेही स्पष्टीकरण भाजपाने द्यावे. आता निवडणुका जवळ आल्यामुळे पुणेकरांना व पिंपरी चिंचवड करांना कसे फसवायचे कसे खोटे आश्वासन द्यायचे व निवडणुकीपर्यंत कशा मोठमोठ्या योजना द्यायच्या हा षड्यंत्राचा भाग आहे हे पुणेकर व पिंपरी चिंचवड नागरिक समजतात कारण ही पहिली वेळ नसून असे अनेक वेळा झाले आहे.असेही मोरे आणि बधे यांनी म्हटले आहे.

बंधुता दिनानिमित्त सातव्या विश्वबंधुता काव्यमहोत्सवाचे उद्घाटन

पुणे: “पहलगाम घटनेच्या निमित्ताने हिंदू-मुस्लिम द्वेषाचे राजकरण करण्याचा प्रयत्न काहींनी केला. मात्र, सामान्य माणूस आणि काश्मिरी जनतेने त्यांचा हा डाव हणून पाडला. आरक्षण, आर्थिक विषमता, जातीवाद यातून समाजात फूट पाडण्याचे काम होत असताना बंधुतेच्या भावनेतून आपलेपणाने माणूस जोडायला हवा,” असे प्रतिपादन ज्येष्ठ समाजवादी विचारवंत प्रा. सुभाष वारे यांनी केले. समाजामध्ये बंधुता व समतेचा विचार पेरण्याचे काम बंधुता परिवाराकडून होत असल्याचे गौरवोद्गारही प्रा. वारे यांनी काढले.

विश्वबंधुता साहित्य परिषद, रयत शिक्षण संस्थेचे औंध येथील डॉ. बाबासाहेब आंबेडकर महाविद्यालय व काषाय प्रकाशन यांच्या संयुक्त विद्यमाने विश्वबंधुता दिनाच्या निमित्ताने आयोजित सातव्या बंधुता काव्यमहोत्सवाचे उद्घाटन सोहळ्यात प्रा. सुभाष वारे बोलत होते. नवी पेठेतील एस. एम. जोशी सभागृहात झालेल्या सोहळ्यात काव्यमहोत्सवाचे अध्यक्ष ज्येष्ठ गझलकार सिराज शिकलगार, बंधुताचार्य प्रकाश रोकडे, मंदाकिनी रोकडे, स्वागताध्यक्ष प्रा. भारती जाधव, निमंत्रक प्राचार्य डॉ. अरुण आंधळे, प्रा. चंद्रकांत वानखेडे, कवयित्री संगीता झिंजुरके आदी उपस्थित होते.

यावेळी सिराज शिकलगार लिखित ‘गझल प्रकाश’ गझलसंग्रहाचे, ‘भारत: विश्वबंधुतेचे तीर्थक्षेत्र’ साहित्यकृतीचे प्रकाशन झाले. अरुण पुराणिक (पुणे), प्रभाकर शेळके (जालना), राजू आठवले (अकोला), पालवी पतंगे (मुंबई), तुकाराम कांबळे (नांदेड) सरला कापसे (वर्धा), राजश्री मराठे (हैद्राबाद), राजेश नागूलवार (वर्धा), मनीषा गोरे (सोलापूर), हृदयमानव अशोक (पुणे), प्रतिभा विभुते (पुणे) यांना बंधुता काव्यप्रतिभा पुरस्कार प्रदान करण्यात आला.

प्रा. सुभाष वारे म्हणाले, “चळवळीत ‘विचार पेरा कृती उगवेल’ हा सिद्धांत अतिशय महत्त्वाचा आहे. सकारात्मक, शाश्वत काम व्हायचे असेल, तर ध्येयासक्त होऊन सदोदित प्रयत्नशील रहायला हवे. बाबासाहेबांनी बंधुता व समता या दोन मूल्यांची कमतरता असल्याची खंत संविधान सभेत व्यक्त केली होती. मात्र त्यांच्या या विचारांना पुढे घेऊन जात बंधुता परिवार माणसाला माणूस जोडत आहे. समता ही समाजाच्या भल्यासाठी हवी. आज मुस्लिमांना व्हिलन ठरवण्याचे काम होतेय. ‘ऑपरेशन सिंदूर’नंतरही खरे गुन्हेगार मोकाट आहेत. समाज घडायचा असेल, तर पुस्तक वाचायला हवीत. मुस्लिम धर्मातही चांगला माणूस घडण्यासाठी काही सुधारणा, प्रबोधन आवश्यक आहे.”

अध्यक्षीय भाषणात सिराज शिकलगार म्हणाले, “कवी हा कवितेच्या माध्यमातून समाजातील व्यथा मांडत असतो. शब्दांमध्ये समाजात बदल करण्याची ताकद असते. मराठी भाषेला नुकताच अभिजात भाषेचा दर्जा मिळाला. मराठी भाषेतील साहित्य हे समकालीन कालखंडात लिहले गेलेले असते. त्यामुळे त्यावर सद्यपरिस्थितीनुसार आकलन करणे योग्य नाही. प्रमाण भाषेचा वापर करून लिखान व्हायला हवे. परंतु भाषेची मोडतोड, मराठी भाषेचे विद्रुपीकरण होऊ नये. परभाषेच्या नादात उचलेगिरी केली जाते. त्यामुळे लिखाणात चुकीच्या शब्दांचा वापर होऊन मराठी भाषेचा ऱ्हास होण्याची भीती असते.

बंधुताचार्य प्रकाश रोकडे म्हणाले, “बंधुता चळवळीत प्रेमाचे अंतःकरण असलेल्या अनेकांची साथ मिळाली. गेल्या पन्नास वर्षात माणुसकी जपण्याचे काम करता आल्याचे समाधान आहे. समृद्ध, प्रामाणिक माणूस म्हणून प्रत्येकाने बंधुतेचा विचार पेरला पाहिजे. आज युद्धजन्य परिस्थितीत बुद्धाच्या, बंधुतेच्या विचारांची समाजाला गरज आहे.”

प्रा. भारती जाधव यांनी स्वागत केले. डॉ. अरुण आंधळे यांनी प्रास्ताविक केले. संगीता झिंजुरके यांनी सूत्रसंचालन केले. प्रा. चंद्रकांत वानखेडे यांनी आभार मानले.

पुणे- शहरभर असलेले रस्ते , खोदलेले रस्ते येत्या ७ जून पर्यंत चकाचक आणि ठकाठक करा . कोणतेही कारण चालणार नाही, आणि हा पावसाला पूर्ण झाल्यावर हिवाळ्यातच या संदर्भातील ठेकेदारांची बिले काढा असे स्पष्ट निर्देश आज अतिरिक्त महापालिका आयुक्त (वि)ओमप्रकाश दिवटे यांनी येथे दिले.

पावसाळ्यापूर्वी मनपाच्या विविध विभागांना त्यांच्याकडील कामकाजासाठी रस्ते खोदाईची परवानगी देण्यात आली आहे . संबंधित विभागाच्या सर्व मुख्य अभियंता, अधिक्षक अभियंता, कार्यकारी अभियंता , उप अभियंता व कनिष्ठ अभियंता यांचे समवेत आज अतिरिक्त महापालिका आयुक्त (वि)ओमप्रकाश दिवटे यांनी आढावा बैठक घेतली.या बैठकीस मुख्य अभियंता ( पथ ) अनिरूध्द पावसकर , मुख्य अभियंता ( मलनि:सारण) .जगदीश खानोरे , मुख्य अभियंता ( विद्युत )श्रीमती मनिषा शेकटकर, मुख्य अभियंता ( पाणीपुरवठा ) नंदकिशोर जगताप तसेच संबंधित विभागाचे अधिक्षक अभियंता, कार्यकारी अभियंता , उप अभियंता व कनिष्ठ अभियंता उपस्थित होते.
सदर बैठकीमध्ये सर्व संबंधित विभागांच्या पथ विभागाकडुन दिलेल्या रस्ते खोदाई परवानगीच्या सर्व ठिकाणच्या तसेच प्रमुख रस्त्यावरील ठिकाणांचा आढावा घेण्यात आला. काही अपवाद वगळता बहुतांश विभागांचे काम झालेले असून रस्ते पूर्ववत करण्याचे काम सुरू आहे , या सर्व खोदलेल्या रस्त्यांचे पर्नपृष्ठीकरण आवश्यकता भासल्यास जास्त मनुष्यबळ वापरून दिनांक ७ जून २०२५ पर्यंत पूर्ण करण्याचे आदेश अतिरिक्त महापालिका आयुक्त (वि) यांनी दिले.
पुर्नपृष्ठीकरण करताना कामे गुणवत्तापूर्वक करण्याबाबत संबंधित म.न.पा. कनिष्ठ अभियंते यांचे प्रशिक्षण आयोजित करावे व त्यांच्या उपस्थितीत हि कामे करून घ्यावी. तसेच त्या कामांची देयके पावसाळा पूर्ण होईपर्यंत अदा करण्यात येऊ नये. आपत्ती निवारण संदर्भातील करावयाची खोदाई आणि कामाच्या संदर्भात पथ विभागाच्या अधिकाऱ्यांशी योग्य समन्वय ठेवण्यात येऊन काम करावे अशा सूचना अतिरिक्त महापालिका आयुक्त (वि) यांनी अधिकाऱ्यांना दिल्या.

ना. चंद्रकांतदादा पाटील यांची ग्वाही

मुठा खोऱ्यातील मुलींच्या शिक्षणासाठी बसचे लोकार्पण

पुणे

मुळशी हा अतिशय समृद्ध तालुका आहे. तालुक्याचे रंगवले जाणारे चित्र अतिशय चुकीचं आहे. त्यामुळे हे चित्र बदलण्यासाठी महिलांना आर्थिक सक्षम बनवणे गरजेचे आहे. त्यामुळे खोऱ्यातील महिलांनी एकत्रित येऊन एखादा उद्योग सुरु केल्यास त्यासाठी सर्वतोपरी मदत करण्याची ग्वाही राज्याचे उच्च व तंत्रशिक्षण मंत्री चंद्रकांतदादा पाटील यांनी आज दिली.

नामदार चंद्रकांतदादा पाटील यांच्या प्रयत्नातून मुठा खोऱ्यातील दुर्गम भागातील मुली आणि शालेय विद्यार्थ्यांना ने-आण करण्यासाठी बस उपलब्ध करून देण्यात आली. त्याचे लोकार्पण ना‌. पाटील यांच्या हस्ते झाले. यावेळी ते बोलत होते.

यावेळी म्हसोबा ट्रस्टच्या अध्यक्षा मधुराताई भेलके, सचिव उमाताई माने, भाजपा पुणे शहर सरचिटणीस प्रमोद कोंढरे, खरवडे गावचे सरपंच शंकरराव मारणे, दिनेश जोगावडे, माऊली ढेबे, राहुल मारणे, हभप रामचंद्र भरेकर, एन. डी. मारणे यांच्या सह इतर मान्यवर उपस्थित होते.

ना. चंद्रकांतदादा पाटील म्हणाले की, मुळशी तालुका अतिशय समृद्ध तालुका आहे. देशाचे लोकप्रिय पंतप्रधान माननीय नरेंद्र मोदीजी यांनी लखपती दिदी उपक्रमाअंतर्गत; देशातील ग्रामीण भागातील महिलांना उद्योग होण्यासाठी प्रोत्साहन दिले आहे.मुळशी तालुक्याचे चित्र बदलण्यासाठी महिला आर्थिकदृष्ट्या सक्षम झाल्या पाहिजेत. त्यामुळे मुठा खोऱ्यातील महिलांनी एकत्रित येऊन एखादा उद्योग सुरु करण्याची तयारी दर्शवल्यास; त्यांना उद्योग उभारण्यासाठी सर्वतोपरी मदत करण्याची ग्वाही यावेळी दिली.

ते पुढे म्हणाले की, एमपीएससी-युपीएससीतील आपला टक्का वाढविण्यासाठी शासन प्रयत्नशील आहे. त्यासाठी सारथी, पार्टी, महाज्योती सारख्या संस्थांच्या माध्यमातून यूपीएससीची तयारी करणाऱ्यांना फेलोशीप दिली जाते. त्यामुळे तालुक्यातील मुलं-मुलींनी एमपीएससी-युपीएससी सारख्या स्पर्धा परिक्षांकडे वळले पाहिजे. त्यासाठी आवश्यक मदत करु, असेही त्यांनी यावेळी आश्वस्त केले‌.

दरम्यान, यावेळी नामदार चंद्रकांतदादा पाटील यांच्या हस्ते तालुक्यातील दुर्गम भागातील गरजू मुलींना शिक्षणासाठी शिष्यवृत्ती देण्यात आली.