बारामती: राष्ट्रवादीचे सर्वेसर्वा शरद पवार यांना दिवाळीच्या शुभेच्छा देण्यासाठी महाराष्ट्राच्या कानाकोपऱ्यातून असंख्य कार्यकर्ते आणि पदाधिकारी यांनी मोठ्या प्रमाणावर गर्दी केली होती.राज्यातील नुकत्याच झालेल्या विधानसभा निवडणुकीच्या पार्श्वभूमीवर शरद पवारांनी राज्यभरात प्रचाराचे दौरे करून राष्ट्रवादीमध्ये नवे चैतन्य निर्माण केली त्या पार्श्वभूमीवर आज भूतो ना भविष्य गर्दी पाहायला मिळाली. राज्यातील राष्ट्रवादीचे अनेक कार्यकर्ते पदाधिकारी आणि तरुण आणि आबालवृद्धांनी अलोट गर्दी शरद पवार यांच्या निवासस्थानी गोविंद बागेत केलेली आहे . देशात साजरे होणाऱ्या अनेक सणा पैकी दिवाळी हा सण मोठा मानला जातो…

पाच दिवस साजरे होणार्‍या उत्सवातील पाडव्याला विशेष महत्त्व असते. देशभरातील अनेक मान्यवर कुटुंब आपपल्यापरीने दिवाळी, पाडवा साजरा करतात. मात्र बारामतीत पवार कुटुंबियांकडून साजरा केला जाणारा पाडवा अनेक अर्थाने वेगळा व वैशिष्ट्यपूर्ण असतो. राज्यातून आलेल्या नागरिकांना सकाळी सहा वाजल्यापासूनच पवार साहेब व कुटुंबीय भेटतात. पवार कुटुंबीयांना भेटण्यासाठी रांगेत उभे असणा-या नागरिकांसाठी यावेळी ठिकठिकाणी चहा व नाष्टा सोय असते. गेल्या अनेक वर्षांपासून चालू असलेल्या परंपरेला पवार प्रेमी ही भरभरुन प्रतिसाद देतात. मात्र राज्यात आणि देशात सरकार होती त्यावेळेस आणि सत्तांतर झाल्यानंतरही प्रथमच एवढ्या प्रचंड संख्येने गर्दी बारामतीकरांना पहावयास मिळाली आहे.

मुंबई – शिवसेना आणि भाजप यांच्या मुख्यमंत्री पदावरून कुरघोडी सुरु असताना रामदास आठवले यांनी एक वक्तव्य केले आहे. शिवसेनेने आदित्य ठाकरेंसाठी उपमुख्यमंत्री पदाचा स्वीकार करावा. कारण भाजप अडीच वर्षे मुख्यमंत्री पदासाठी सहमती दर्शवेल असे मला नाही वाटत. यामुळे शिवसेनेने देवेंद्र फडणवीस यांनाच मुख्यमंत्री होऊ द्यावे असे रामदास आठवले म्हणाले. दरम्यान दोन्ही पक्षांनी अडीच-अडीच वर्षे मुख्यमंत्रीपद वाटून घ्यावे अशी शिवसेनेची मागणी आहे.

मुख्यमंत्री पदासाठी निश्चितच भाजपचा दावा

आठवले पुढे म्हणाले की, ”माझा फॉर्म्युला आहे की, भाजपा आणि शिवसेना एकत्रित यावे, कारण जनतेचा जनादेश त्यांच्यासोबत आहे. युतीला अपेक्षित जागा मिळाल्या नाहीत. मात्र सत्तास्थापनेसाठी बहुमत मिळाले आहे. मुख्यमंत्री पदासाठी निश्चितच भाजपचा दावा आहे. कारण भाजपला जास्त जागा मिळाल्या आहेत.”

पुढील चार-पाच दिवसांत निर्णय होईल

आठवले म्हणाले की, ”मी दोन्ही पक्षांशी बोलेन आणि चर्चेद्वारे या मुद्द्याचे निराकरण करण्यास सांगेन. पुढील चार-पाच दिवसांत निर्णय होईल अशी मला आशा आहे.” विधानसभेत भाजपा-शिवसेना युतीला पूर्णपणे बहुमत मिळाले आहे. भाजपचे 105 आणि शिवसेनेचे 56 आमदार निवडून आले आहेत.

जळगाव – पक्षाच्या स्थापनेपासून पक्ष वाढीसाठी लढत आहे. माझ्यावर झालेल्या सर्व आरोपाची चौकशी झाली. त्यात काहीही निष्पन्न झाले नाही. माझे तिकीट का कापले? याचे उत्तर मला मिळाले नाही. मुलीच्या विरोधात बंडखोरीच्या बाबत वारंवार बोलून काहीच कारवाई झाली नाही. तरीही मी पक्ष सोडलेला नाही. त्यामुळे मला पक्षाकडून न्याय मिळण्याची आशा आहे. अशी अपेक्षा माजी मंत्री एकनाथ खडसे यांनी सोमवारी जळगावात माध्यम प्रतिनिधींशी बोलताना व्यक्त केली. यावेळी राज्याच्या राजकारणावर परिणाम करणाऱ्या 25 गोष्टी वर पुस्तक लिहण्याचा विचार करत असल्याचे खडसे म्हणाले.

माजी मंत्री एकनाथ खडसे यांनी आज माध्यम प्रतिनिधींना जळगावातील मुक्ताई निवासस्थानी दिवाळीच्या फराळाला बोलावले होते, यावेळी त्यांनी अनौपचारिक गप्पांमध्ये विधानसभा निवडणुकीत जिल्ह्यातील भाजपचे घटलेले संख्याबळ, दोन्ही पक्षातील बंडखोरी या बाबतीत आपले मत व्यक्त केले.

पुणे –
कोथरूडकर आणि पुण्याच्या समस्या सोडवून विकास पर्व कायम ठेवण्यास मी कटिबद्ध आहे, हा निवडणूक प्रचारादरम्यान दिलेला शब्द कोथरूड विधानसभा मतदारसंघाचे आमदार आणि भारतीय जनता पक्षाचे प्रदेशाध्यक्ष चंद्रकांतदादा पाटील यांनी पाळण्याचा प्रयत्न सुरु केला आहे.
विधानसभा निवडणूक निकालानंतर मुंबईत प्रदेश स्तरावरील बैठका आणि सरकार स्थापनेच्या घडामोडींमधून आवर्जून वेळ काढत चंद्रकांत दादा पाटील यांनी आज, शनिवारी कोथरूड संपर्क कार्यालयात नागरिकांच्या भेटी घेतल्या. कोथरूडमधील विजय आणि दिवाळीच्या शुभेच्छांचा त्यांनी विनम्रपणे स्वीकार केला. पण त्याहीपेक्षा महत्त्वाचे म्हणजे नागरिकांनी सांगितलेल्या समस्यांचे तातडीने निराकरण आणि केलेल्या मागण्यांच्या पूर्ततेबाबत कार्यवाही करण्यासाठी ठोस पावले उचलली!
भारतीय जनता पक्षाच्या विधानसभा निवडणुकीतील यशाबद्दल आनंदच आहे. त्याचप्रमाणे कोथरूडसारख्या मतदारसंघातून आमदारपदी निवड झाल्याचादेखील आनंद आहे. पण सत्कार सोहळे करण्यापेक्षा नागरिकांना दिलेला शब्द पाळणे याला माझे प्राधान्य आहे. आणि त्याच दृष्टीने आजपासून कोथरूड संपर्क कार्यालयाच्या माध्यमातून कार्यवाही सुरू केली आहे, अशा शब्दात चंद्रकांत दादा पाटील यांनी भावना व्यक्त केल्या.
पक्षाची प्रदेश स्तरावरील जबाबदारी, मंत्रिमंडळातील जबाबदारी आणि आणि आमदारकीची जबाबदारी चोखपणे पार पाडण्यासाठी विविध स्तरांवर यंत्रणा कार्यान्वित करण्यात आल्या आहेत. त्याचादेखील चंद्रकांत दादा पाटील यांनी आढावा घेतला. याप्रसंगी संपर्क कार्यालयामध्ये कोथरूड, बाणेर, बालेवाडी परिसरातील संबंधित प्रभागांचे नगरसेवक उपस्थित होते. नागरिकांशी झालेल्या चर्चेदरम्यान संबंधित नगरसेवकांना चंद्रकांत दादा पाटील यांनी आवश्यक त्या सूचना देखील तातडीने दिल्या.
तत्पूर्वी नगरसेवक किरण दगडे पाटील आणि पियुषा दगडे पाटील यांनी आयोजित केलेल्या सत्कार समारंभाला चंद्रकांत दादा पाटील उपस्थित होते. पुणेकर आणि कोथरूड विधानसभा मतदारसंघातील नागरिकांच्या पाठिंब्याबद्दल त्यांनी यावेळी कृतज्ञता व्यक्त केली. पुणे आणि कोथरूडच्या विकासप्रक्रियेत समाजातील सर्व घटकांना समान न्यायाने सहभागी करून घेतले जाईल, असे आश्वासन देखील चंद्रकांत दादा पाटील यांनी यावेळी दिले.
दिवसभरामध्ये विद्यावाचस्पती शंकर अभ्यंकर यांच्यासह अनेक मान्यवरांच्या व्यक्तीकडे गाठीभेटीदेखील चंद्रकांत दादा पाटील यांनी घेतल्या.