पुणे, दि. 4: महाराष्ट्र शासन सामाजिक न्याय व विशेष सहाय्य विभागामार्फत चालविण्यात येणाऱ्या डॉ. बाबासाहेब आंबेडकर मागासवर्गीय मुलांचे शासकीय वसतिगृह, इंदापूर येथे २०२५-२६ या शैक्षणिक वर्षाकरीता इ. 8 वी व पुढील शिक्षण घेत असलेल्या अनुसूचित जाती, अनुसूचित जमाती, विमुक्त जाती व भटक्या जमाती, इतर मागासवर्गीय, विशेष मागास प्रवर्ग, अनाथ व शारीरिकदृष्ट्या दिव्यांग आदी प्रवर्गातील विद्यार्थ्यांसाठी प्रवेश प्रक्रिया सुरु झाली असून इच्छुक मुलांनी प्रवेश घेण्याचे आवाहन करण्यात आले आहे.

शासकीय वसतिगृहातील प्रवेशित विद्यार्थ्यांना विनामुल्य भोजन, निवासाची व्यवस्था असून क्रमिक पुस्तके, शैक्षणिक साहित्य, गणवेश, शैक्षणिक सहल रक्कम इत्यादी करिता शासनाने ठरवून दिलेल्या आर्थिक मर्यादेपर्यंतची रक्कम व दरमहा रु. 500/- निर्वाह भत्ता विद्यार्थ्यांच्या बँक खात्यामध्ये जमा करण्यात येतो.
वसतिगृह प्रवेशासाठी विद्यार्थ्याची मागील वर्षाची गुणपत्रिका, जातीचा दाखला, पालकांचे सक्षम प्राधिकारी यांनी दिलेले उत्पन्नाचे प्रमाणपत्र, महाविद्यालयात शिकत असलेला बोनाफाईड दाखल, आधार कार्ड, रहिवासी प्रमाणपत्र आदी कागदपत्रासह ऑनलाइन अर्ज https://hmas.mahait.org या संकेतस्थळावर करणे आवयक आहे. अधिक माहितीसाठी गृहपाल, डॉ. बाबासाहेब आंबेडकर मागासवर्गीय मुलांचे शासकीय वसतिगृह, दूधगंगा दुधडेअरी समोर, जुना अकलूज-पुणे बायपास, इंदापूर, जि. पुणे येथे संपर्क साधावा, असे आवाहन गृहपालांनी केले आहे.

पुणे– एमआयटी आर्ट, डिझाईन अँड टेक्नॉलॉजी विद्यापीठाच्या यांत्रिकी अभियांत्रिकी विभागातून 2024 मध्ये पदवी प्राप्त केलेल्या तुषारा थुम्मलापल्ली यांनी भारतीय नौसेनेत पायलट म्हणून गौरवशाली नियुक्ती मिळवली आहे. हा क्षण विद्यापीठासाठी अत्यंत अभिमानाचा असून, देशभरातील तरुण अभियंत्यांसाठी प्रेरणादायी ठरतो आहे.

फक्त 23 वर्षांच्या वयात तुषारा यांनी नौदलाच्या विशेष पायलट गटात स्थान मिळवले आहे. अभियंता ते सैन्य अधिकारी असा त्यांचा प्रवास शैक्षणिक गुणवत्ता, निर्धार आणि राष्ट्रसेवेच्या प्रति कटिबद्धतेचे प्रतीक आहे. यांत्रिकी विभागातील प्राध्यापकांनुसार, तुषारा यांनी शिक्षण काळात नेहमीच उत्कृष्ट शैक्षणिक आणि नेतृत्वगुण दाखवले. तांत्रिक प्रकल्पांमध्ये आणि विभागीय उपक्रमांमध्ये त्यांचा सक्रीय सहभाग होता. “पहिल्याच दिवशीपासून तुषारामध्ये अधिकारी म्हणून लागणारे शिस्तप्रियता, चिकाटी आणि प्रेरणा स्पष्टपणे दिसून येत होती. भारतीय नौसेनेत तिच्या या नव्या प्रवासास सुरुवात होत असताना, तिची प्रेरणादायी कहाणी विशेषतः तरुण विद्यार्थिनींना संरक्षण आणि वैमानिक क्षेत्रात करिअर करण्यासाठी प्रेरणा देईल”, असे यांत्रिकी विभागातील प्राध्यापकांनी म्हटले आहे.

तुषाराच्या या कामगिरीनंतर माईर्स एमआयटी शिक्षण समुहाचे संस्थापक अध्यक्ष विश्वधर्मी प्रा.डाॅ.विश्वनाथ दा.कराड, कार्याध्यक्ष प्रा.डाॅ.मंगेश कराड, कार्यकारी संचालक प्रा. डाॅ.सुनीता कराड, कुलगुरू प्रा.डाॅ.राजेश एस., प्र.कुलगुरू डाॅ.रामचंद्र पुजेरी, डाॅ.मोहित दुबे, कुलसचिव डाॅ.महेश चोपडे, विभागाचे संचालक डाॅ.विरेंद्र शेटे, अधिष्ठाता डाॅ.सुदर्शन सानप यांनी त्यांचे अभिनंदन केले आहे. 

“एमआयटी एडीटी विद्यापीठाने मला केवळ अभियंता म्हणून घडवले नाही, तर आयुष्यातील आव्हानांना सामोरे जाण्यास तयार केले. येथे मिळालेले प्रत्येक शिक्षण, अनुभव माझ्या जडणघडणीसाठी मोलाचे ठरले. विद्यापीठाच्या यांत्रिकी अभियांत्रिकी विभागाने माझ्या तांत्रिक प्रावीण्यासोबतच धोरणात्मक विचारक्षमतेच्या विकासातही महत्त्वाची भूमिका बजावली.”

–  तुषारा थुम्मलापल्ली, पायलट, भारतीय नौसेना

पुणे, दि. 4: महाराष्ट्र शासन सामाजिक न्याय व विशेष सहाय्य विभागामार्फत चालविण्यात येणाऱ्या डॉ. बाबासाहेब आंबेडकर मागासवर्गीय मुलांचे शासकीय वसतिगृह चांडोली (ता. खेड) येथे २०२५-२६ या शैक्षणिक वर्षाकरीता इ. 8 वी व पुढील शिक्षण घेत असलेल्या अनुसूचित जाती, अनुसूचित जमाती, विमुक्त जाती व भटक्या जमाती, इतर मागासवर्गीय, विशेष मागास प्रवर्ग, अनाथ व शारीरिकदृष्ट्या दिव्यांग आदी प्रवर्गातील विद्यार्थ्यांसाठी प्रवेश प्रक्रिया सुरु झाली असून इच्छुक मुलांनी प्रवेश घेण्याचे आवाहन करण्यात आले आहे.

शासकीय वसतिगृहातील प्रवेशित विद्यार्थ्यांना विनामुल्य भोजन, निवासाची व्यवस्था असून स्टेशनरी साहित्य, अंथरुण व पांघरुण दरमहा रुपये 500/- निर्वाह भत्ता अदा करण्यात येतो. शिवाय विद्यार्थ्यांकरिता अद्यावत ग्रंथालय व संगणक कक्ष आदी सुविधा येथे उपलब्ध आहेत.

वसतिगृह प्रवेश प्रक्रिया https://hmas.mahait.org या संकेतस्थळावर ऑनलाईन पद्धतीने होणार आहेत. अधिक माहितीसाठी अधीक्षक, डॉ. बाबासाहेब आंबेडकर मागासवर्गीय मुलांचे शासकीय वसतिगृह चांडोली ता. खेड, जि. पुणे येथे संपर्क साधावा , असे आवाहन वसतिगृहाच्या अधीक्षकांनी केले आहे

पुणे- येथील सिंबायोसिस कॉलेजमध्ये प्रवेशाच्या नावाने फसविणारा कुणाल कुमार आपल्या पत्नीसह थायलंडला पळून जातानाच पुणे पोलिसांनी पकडला

या संदर्भात पोलिसांनी सांगितले कि,’ सिम्बायोसीस या संस्थेचा लोगो असलेल्या संस्थेच्या इमारतीचा फोटो वापरुन वेबपेज वरुन सिम्बायोसीस संस्थेची वेबसाईट असल्याचे भासवुन सिम्बायोसीस या संस्थेमध्ये अॅडमिशन करुन देणे बाबत्त ऑनलाईन खोटी जाहीरात करुन विदयार्थ्यांना सिम्बायोसीस मध्ये अॅडमीशनचे खोटे आमीष दाखवून कॉलेज फी व्यतिरीक्त लाखो रुपयाची मागणी करुन त्यांची फसवणूक करण्याचा प्रयत्न करीत असलेल्या दिव्या, आकाश यादव, कुणाल कुमार या परराज्यातील इसमांविरुध्द दि.०२/०४/२०२५ रोजी डेक्कन पोलीस स्टेशन येथे गुन्हा नोद करण्यात आला होता.
सदर गुन्हा दाखल झाल्यापासुन दिव्या, आकाश यादव, कुणाल कुमार हे तिनही आरोपी फरार झाले होते. अंगली पदार्थ विरोधी पथकातील अधिकारी यांनी दोन ते तिन वेळा सदर आरोपींचा दिल्ली, हरीयाना या राज्यात जावुन शोध घेतला परंतु ते पोलीसांच्या हातावर तुरी देवुन पळुन जाण्यात यशस्वी होत होते. त्यानंतर तपास अधिकारी यांनी दाखल गुन्हयातील आरोपी यांचे लुक ऑऊट नोटीस जारी करुन त्यांचा दिल्ली, हरीयाना तसेच महाराष्ट्रभर कसोशीने शोध सुरु केला होता. यातील आरोपी नामे कुमार कुणाल बिरेंद्रकुमार विद्यार्थी, वय-३० वर्षे मुळ राज्य-बिहार याचा पुर्व गुन्हेगारी इतिहासाची माहिती घेतली असता, त्याचेविरुध्द सन-२०२१ मध्ये सायबर पोलीस स्टेशन, पुणे शहर येथे गु.र.नं ४६/२०२१, भा.द. वि. कलम ४१९, ४२०, १२० ब, २०१, ३४ सह आय. टी. अॅक्ट कलम ४३ (अ) (एफ) (जी) (आय), ६६ (सी), ६६ (डी) या गुन्हयात तो आरोपी असल्याचे निष्पन्न झालेले होते. सदर आरोपी याने मा.सत्र न्यायालय, पुणे येथे अटकपूर्व जामीन मिळण्याकरिता दिलेला अर्ज देखील मा.न्यायालयाने फेटाळलेला होता व सदर गुन्हयातुनही तो अद्यापपर्यंत फरार असल्याची माहिती समोर आली. आरोपी हा फसवणुक करणारा सराईत गुन्हेगार असल्याने त्याचा पुणे, मुंबई, दिल्ली येथे शोध घेणे कामी पोलीसांचे पथके तयार करण्यात आलेली होती.
त्यानंतर दि.३१/०५/२०२५ रोजी आरोपी कुणालकुमार बिरेद्रकुमार विद्यार्थी, हा त्याचे पत्नीसह थायलंड देशात कोलकत्ता विमानतळ येथुन जाणार असल्याबाबत खात्रीशीर माहिती मिळाल्याने गुन्हे शाखेकडील एक पथक तात्काळ कोलकत्ता येथे जावुन कोलकत्ता विमानतळ येथे सापळा लावुन त्यास ताब्यात घेण्यात आले आहे. नमुद आरोपी कुमार कुणाल बिरेद्रकुमार विद्यार्थी, यास दाखल गुन्हयात अटक करुन मा. न्यायालयात हजर केले असता त्याची दि.०५/०६/२०२५ रोजी पर्यंत पोलीस कस्टडी रिमांड घेण्यात आली असुन दाखल गुन्हयाचा अधिक तपास पोलीस निरीक्षक उल्हास कदम अंमली पदार्थ विरोधी पथक १ गुन्हे शाखा हे करीत आहे.
सदरची कारवाई ही अपर पोलीस आयुक्त, गुन्हे पुणे शहर पंकज देशमुख, पोलीस उप आयुक्त, गुन्हे पुणे शहर निखील पिंगळे, सहा पो आयुक्त, गुन्हे-१ पुणे शहर गणेश इंगळे यांचे मार्गदर्शना खाली अंमली पदार्थ विरोधी पथक, १ गुन्हे शाखा पुणे शहर कडील वरिष्ठ पोलीस निरीक्षक उल्हास कदम, सहा पोलीस निरीक्षक अनिकेत पोटे, पोलीस अंमलदार प्रविण उत्तेकर, दत्ताराम जाधव, संदिप शिर्के, विशाल दळवी, मारुती पारधी, संदेश काकडे, यांनी केली आहे.

श्री बहिरोबा देव ट्रस्ट, श्री काळभैरवनाथ मंदिर कसबा पेठ तर्फे आयोजन

पुणे : कसबा पेठेतील पुण्याचे प्राचीन ग्रामदैवत व क्षेत्रपाल श्री काळभैरवनाथ मंदिरात चंदनउटी सोहळ्याचे आयोजन करण्यात आले होते.  मोगऱ्याच्या फुलांची आकर्षक आरास करून मंदिर सुशोभित करण्यात आले. श्री काळभैरवनाथ हे पुण्याचे जागृत ग्रामदैवत असून भैरवनाथ मंदिराचे गर्भगृह आणि मध्यगृह हेमाडपंथी बांधणीचे आहे. 

श्री बहिरोबा देव ट्रस्ट, श्री काळभैरवनाथ मंदिर कसबा पेठ तर्फे मंदिरात चंदन उटी सोहळा आणि मोगऱ्याच्या फुलांची सजावट करण्यात आली. मंदिराचे व्यवस्थापन आजपर्यंत लडकत घराण्याकडे असून वर्षभरात विविध उत्सव केले जातात. अखिल भारतीय वारकरी संप्रदाय तर्फे भजन कीर्तनाचा कार्यक्रम देखील यानिमित्ताने मंदिरात पार पडला. 

कसबे पुणे ही बाराशे वर्षांपूर्वीची पुण्यातील वस्ती. याठिकाणी मुल:, मुक्ता आणि नाग या तीन नद्यांचा पवित्र त्रिवेणी संगम आहे. गाव तेथे मारुती आणि भैरवनाथाचे मंदिर ही आपल्याकडील परंपरा आहे. अशा कसबा पेठेतील पुण्याचे प्राचीन ग्रामदैवत व क्षेत्रपाल श्री काळभैरवनाथ मंदिरात चंदन उटी सोहळ्याला भाविकांनी मोठी गर्दी केली. 

ज्येष्ठ नागरिक स्नेह मेळावा उत्साहात संपन्न

पुणे –कोथरूड मधील ज्येष्ठ नागरिकांसाठी निसर्ग छाया हा उपक्रम सुरू केला होता. मात्र, अल्पवधीत हा उपक्रम अतिशय लोकप्रिय झाला. राज्यातील विविध ठिकाणच्या ज्येष्ठ नागरिकांकडून या उपक्रमाबाबत विचारणा होत होती. त्यामुळे या उपक्रमाचा प्रतिसाद पाहता, कोथरुडसह इतरांनाही याचा लाभ घेता येईल, अशी घोषणा राज्याचे उच्च व तंत्रशिक्षण मंत्री आणि कोथरुडचे आमदार चंद्रकांतदादा पाटील यांनी व्यक्त केली.

ना. चंद्रकांतदादा पाटील यांच्या पुढाकारातून ज्येष्ठ नागरिकांसाठी सुरू केलेल्या निसर्ग छाया उपक्रमाने लाभार्थ्यांचा दहा हजारचा टप्पा नुकताच पूर्ण केला. त्या अनुषंगाने कोथरुड मधील पंडित फार्म येथे स्नेह मेळाव्याचे आयोजन करण्यात आले होते. यावेळी ते बोलत होते.

यावेळी व्यासपीठावर ना. पाटील यांच्या पत्नी अंजली पाटील, निसर्गछाया उपक्रमाचे संयोजक मंदार देवगावकर, अमृता देगावकर, नवचैतन्य हास्य योगचे मकरंद टिल्लू, उद्योजिका स्मिता पाटील, भाजपा कोथरूड मंडल दक्षिणचे माजी अध्यक्ष डॉ संदीप बुटाला यांच्या सह इतर मान्यवर उपस्थित होते.

नामदार चंद्रकांतदादा पाटील म्हणाले की, कोथरुड मधील ज्येष्ठ नागरिकांना लांबचा प्रवास शक्य नसल्याने सहलीचा आनंद लुटता यावा; यासाठी दीड वर्षापूर्वी कोथरुडपासून काही अंतरावर असलेल्या भूगाव येथे निसर्गरम्य ठिकाणी निसर्ग छाया हा उपक्रम सुरू केला. हा उपक्रम सुरू करताना, एवढा अभूतपूर्व प्रतिसाद मिळेल, असा विचार केला नव्हता. मात्र पुण्यासह, रत्नागिरी वगैरे अनेक जिल्ह्यांतूनही यासाठी चौकशी होत होती. कोथरुड मधील या उपक्रमाच्या अभूतपूर्व प्रतिसादामुळे याची क्षमता देखील वाढविली आहे. त्यामुळे आता कोथरुडसह इतर ठिकाणच्या ज्येष्ठांना याचा लाभ घेता यावा; यासाठी हा उपक्रम सर्वांसाठी खुला करण्यात येत असल्याची घोषणा त्यांनी यावेळी केली.

ते पुढे म्हणाले की, कोथरुड मतदारसंघात विविध २२ लोकोपयोगी प्रकल्प सुरू आहेत. याचे प्रकटीकरण आणि सर्वांना याची माहिती व्हावी, एकत्रिकरण व्हावे, या उद्देशाने प्रयत्न सुरू आहे, यासंदर्भात संबंधितांना सूचना दिल्या होत्या. यातील ज्येष्ठ नागरिकांचा निसर्ग छाया उपक्रमाने दहा हजार लाभार्थ्यांचा टप्पा ओलांडला आहे. त्यामुळे या सर्व नागरिकांना एकत्रित करुन; मनसोक्त आनंद लुटता यावा; यासाठी आजचा सस्नेह मेळावा होत आहे. आजच्या या मेळाव्याला देखील ज्येष्ठ नागरिकांचा अभूतपूर्व प्रतिसाद पाहून अतिशय आनंद होतो, अशी भावना व्यक्त केली.

दरम्यान, या निमित्ताने विविध सांस्कृतिक कार्यक्रमांचे आयोजन करण्यात आले होते. दिवसभर आयोजित या मेळाव्याचा ज्येष्ठ नागरिकांनी मनसोक्त आनंद लुटला.

पुणे: वडगावशेरी विधानसभा मतदारसंघातील येरवडा परिसरात तलाठी कार्यालय पुन्हा लवकरच सुरू करण्यात येणार आहे. मागील आठवड्यात आमदार बापूसाहेब पठारे यांनी जिल्हाधिकारी जितेंद्र डुडी यांच्याकडे यासंदर्भात निवेदनाद्वारे मागणी केली होती. जिल्हा प्रशासनाने सकारात्मक प्रतिसाद दिला असून कार्यालय लवकरच कार्यान्वित होत असल्याचे पुणे शहर तहसिलदार यांनी सांगितले आहे.

येरवडा, फुलेनगर, महाराष्ट्र हाउसिंग बोर्ड, विश्रांतवाडी, कल्याणीनगर व परिसरात आज रोजी लाखो नागरिक वास्तव्यास आहेत. महसूल व इतर शासकीय कामांसाठी तलाठी कार्यालयातून मिळणारे दाखले व इतर कागद घेण्यासाठी नागरिकांना खडकमाळ आळी येथील तलाठी कार्यालयात जावे लागत होते.

पठारे म्हणाले की, “येरवडा व आजूबाजूच्या परिसरातील नागरिकांची मागणी अतिशय योग्य होती. लोकप्रतिनिधी म्हणून नागरिकांच्या अडचणी प्रशासनापर्यंत पोहोचवणे व त्या सोडवण्यासाठी प्रयत्न करणे हे माझे कर्तव्य आहे. तलाठी कार्यालय सुरू झाल्यास नागरिकांना त्यांच्या जवळच शासकीय सेवा मिळणार आहेत, ही समाधानाची गोष्ट आहे”, असे मत व्यक्त करत त्यांनी जिल्हा प्रशासन व जिल्हाधिकारी यांचे आभार व्यक्त केले.

येरवडा परिसरातील नागरिकांनी देखील या निर्णयाचे स्वागत केले असून, स्थानिक पातळीवर या कार्यालय सुरू झाल्याने मोठा फायदा होईल, असे सांगितले जात आहे.

पुणे : स्त्री सन्मान व तिचे स्वतंत्र अस्तित्व यासाठी स्व.नानाराव ढोबळे हे सत्तरच्या दशकात जागरूक होते त्यातूनच “भारतीय स्त्रीशक्ती जागरण” या संघटनेचा प्रारंभ झाला असे उद्गार राष्ट्रीय स्वयंसेवक संघाचे पश्चिम महाराष्ट्र प्रांत वैचारिक समूह प्रमुख दिलीप क्षीरसागर यांनी येथे बोलताना काढले.

भारतीय स्त्रीशक्ती जागरण यांच्या वतीने आयोजित “एकता” मासिकाच्या ज्येष्ठ संघ प्रचारक स्व.नानाराव ढोबळे विशेषांकाच्या प्रकाशन समारंभात प्रमुख वक्ते म्हणून बोलताना ते पुढे म्हणाले की,
त्या काळात विवाह करताना मुलींच्या पसंतीला अग्रक्रम द्यावा यासाठी नानाराव आग्रही होते. स्त्रीच्या शक्तीची जाणीव तिला स्वतःला करून देणे, त्याचबरोबर स्त्रियांचे प्रश्न केवळ त्यांचे नसून ते स्त्री- पुरुष दोघांचे असतात असे नानारावांचे प्रतिपादन होते.संघ परिवारातील महिला कार्यकर्त्यांनी एकत्र येऊन महिलांच्या प्रश्नांसंबंधी चर्चा व उपक्रम सुरू करावे यासाठी “महिला समन्वय” या मंचाचा प्रारंभ त्यांच्या प्रेरणेने झाला.

नानाराव यांच्या जीवन कार्याचा आढावा घेताना ते म्हणाले की, संघकार्याच्या विस्तारासाठी पूर्ण वेळ प्रचारक म्हणून काम करताना नानाराव यांनी संवेदनशील मन व त्याला कल्पकतेची जोड यातून धुळे जिल्ह्यातील जनजाती बांधवांच्या सहकारी शेतीच्या प्रकल्पाद्वारे त्यांना स्वावलंबी बनवले.

दृष्टि स्त्री अध्ययन केंद्राच्या संस्थापक कार्यवाह अंजलीताईं देशपांडे यांच्या हस्ते विशेषांकाचे प्रकाशन झाले. त्यांनी नानाराव ढोबळे यांच्या कार्याबद्दल मनोगत व्यक्त केले.
“एकता” मासिकाच्या संपादक रुपाली भुसारी यांनी मनोगत व्यक्त केले.

स्त्री शक्ति जागरण च्या पहिल्या कार्यकारिणीतील कोषाध्यक्ष विनया मेहेंदळे आणि मा. अलका जोगळेकर (डोंबिवली) यांनी नानांच्या आठवणी सांगितल्या.

स्वागतगीत संध्या कुलकर्णी आणि गीता कुंभोजकर यांनी गायले. प्रास्ताविक अध्यक्ष किर्ती देशपांडे आणि आभार प्रदर्शन सचिव सुनिती पारुंडेकर यांनी केले. कार्यक्रमाचे सूत्रसंचलन संध्या देशपांडे,
या कार्यक्रमास मोठ्या संख्येने महिला कार्यकर्त्या उपस्थित होत्या.