पंढरपूर, दि. 13 : राज्यात कोरोना बाधितांच्या संख्येत दिवसेंदिवस  वाढ होत आहे. कोरोनाचा प्रभाव रोखण्यासाठी प्रशासनाकडून विविध उपाययोजना करण्यात आल्या आहेत. सोलापूर  शहरात तसेच पंढरपूर तालुक्याच्या आजुबाजूला कोरोनाचे रुग्ण सापडत आहेत. पंरतू  पंढरपूर तालुका कोरोनामुक्त ठेवण्यासाठी येथील प्रशासकीय अधिकाऱ्यांनी केलेल्या योग्य नियोजन, कडक अंमलबजावणी तसेच समन्वय आणि नियमांचे काटेकोर पालनकरुन ‘पंढरपूर पॅटर्न’ तयार केला आहे.

पंढरपूर तालुका कोरोनामुक्त ठेवण्यात प्रांताधिकारी सचिन ढोले, उपविभागीय पोलीस अधिकारी डॉ.सागर कवडे, तहसिलदार वैशाली वाघमारे, गटविकास अधिकारी रविकिरण घोडके, नगरपालिकेचे मुख्याधिकारी अनिकेत मानोरकर, तालुका वैद्यकीय अधिकारी एकनाथ बोधले यांनी केलेल्या काटेकोर नियोजनाला व प्रयत्नांना यश आले आहे. त्यांनी गाव आणि वॉर्ड पातळीवर राबवलेल्या पंचसूत्रींमुळे पंढरपूर तालुका आतापर्यंत ‘कोरोना मुक्त’ राहिला आहे.

कोरोनाचा प्रादुर्भाव रोखण्यासाठी शासनाकडून संचार बंदी लागू करण्यात आली. तालुका प्रशासनाने सुरुवातीपासून नागरिकांना घरातून बाहेर पडू नये असे आवाहन केले. जीवनावश्यक वस्तू, किराणा माल, भाजीपाला घरपोच करण्याची व्यवस्था केली. शहरात व ग्रामीण भागात  मोकाट फिरणाऱ्या नागरिकांवर पोलिसांनी कारवाई केली. तसेच शहरात व तालुक्यातील  गावांमध्ये विविध ठिकाणी निर्जंतुकिकरण केले.  घरोघरी वैद्यकीय तपासणी आणि त्यानंतर सारीची माहिती गोळा केली. तसेच घरोघरी थर्मल चाचणी केली. ज्यावेळस इतर शहरात रुग्ण वाढत होते त्यावेळेस तालुक्यातील प्रशासनाने या सर्व बाबी अतिशय तातडीने आणि नियोजनबद्ध कार्यक्रम राबवून पूर्ण केल्या. शहरात तीन दिवसांचा जनता कर्फ्यू पुकारला होता त्याला नागरिकांनी साथ देत पूर्णपणे यशस्वी झाला.

कोरोनाचा संसर्ग रोखण्यासाठी ग्रामीण ग्रामस्तरीय समितीची स्थापना  करण्यात आली. या समितीमध्ये सरपंच, पोलीस पाटील, तलाठी, ग्रामसेवक, आरोग्य सेवक, अंगणवाडी सेविका तसेच आशा वर्कर यांचा समावेश करण्यात आला. या समितीकडून  बाहेरून येणाऱ्या व्यक्तींची माहिती संकलित करण्यात आली.  जीवनाश्यक वस्तू पुरवठा, आरोग्य सुविधा समितीमार्फत घरपोच देण्यात आल्या. अनेक ठिकाणी वस्तू खरेदीसाठी ऑनलाईन सुविधेचा वापर करण्यात आला. त्यामुळे नागरीक आपोआप घरातच थांबले. तसेच तालुक्यातील सुमारे 70 गावांनी तीन दिवसांचा जनता कर्फ्यू पूर्णपणे पाळला होता.

संचारबंदीच्या कालावधीत पोलीस प्रशासनाने तालुका आणि शहरात येणारे रस्ते बंद केले. चेक नाके उभारून २४ तास तपासणी केली.  तसेच मॉर्निंगवॉक करणारे नागरीक, विनाकारण फिरणारे नागरीक यांच्यावर मोठ्या प्रमाणात कारवाई करण्यात आली त्याचबरोबर  गर्दी होणाऱ्या ठिकाणांवर ड्रोन कॅमेऱ्याद्वारे गर्दीवर नियंत्रण ठेवण्यात आले.

नगरपालिकेमार्फत शहरात विविध  ठिकाणी फवारणी करुन निर्जंतुकीरण करण्यात आले.  शहातील प्रत्येक वार्डात वार्डस्तरीय समितीची स्थापना करण्यात आली.  त्याद्वारे शहरात येणाऱ्या प्रत्येक नागरिकांची माहिती वॉर्डस्तरीय समितीकडून संकलित करण्यात आली. शहरातील सुमारे 90 हजार नागरिकांचे आतापर्यंत थर्मल स्क्रींनिग करण्यात आले. बाहेरुन येणाऱ्या नागरिकांचे 14 दिवस होम क्वारंटाईन बंधनकारक करण्यात आले.

कोरोना संसर्गाचा प्रादुर्भाव रोखण्यासाठी विविध उपाययोजना करीत असतानाच  ग्रामीण भागाचे अर्थकारण सुरळीत ठेवण्यासाठी गावांतील गरजा गावातच भागविण्यात येतील, अशी व्यवस्था निर्माण करण्यात आली. शहरात मोठ्या प्रमाणात जीवनाश्यक वस्तू, दूध, भाजीपाला, आरोग्य सुविधा सुरळीत राहण्यासाठी विशेष प्रयत्न करण्यात आले.

कोराना मुक्तीसाठी तालुका प्रशासनाची पंचसुत्री….

•       पंढरपूर शहरातील व तालुक्यातील प्रत्येक नारिकांची आरोग्य तपासणी.

•       परराज्यातून तसेच परजिल्ह्यातून येणाऱ्या नागरिकांची माहिती शहरातील वॉर्डस्तरीय समितीकडून तर ग्रामीण भागातील ग्रामस्तरीय समितीकडून संकलित.

•       परराज्यातून तसेच परजिल्ह्यातून येणाऱ्या प्रत्येक नागरिकांचे 14 दिवसांचे होम क्वारंटाईन बंधनकारक.

•       तालुक्यात व शहरात बाहेरुन येणाऱ्या वाहनांचे सॅनिटाझिंग तसेच वाहनचालकांची आरोग्य तपासणी.

•       पोलीस प्रशासनाकडून चेक नाक्यावर वाहनांची व नागरिकांची कडक तपासणी.

000000

निर्णयाची अंमलबजावणी 15 मे पासून – आयुक्त कांतीलाल उमाप यांची माहिती

मुंबई, दि. 13 : कोविड -19 चा संसर्ग जगभरासह देशात आणि राज्यात वाढला असल्याने 22 मार्च 2020 पासून देशात लॉकडाऊन जाहीर करण्यात आला आहे. लॉक डाऊनमुळे अत्यावश्यक वस्तुखेरीज सर्व दुकाने बंद ठेवण्यात आली होती. मात्र 4 मे 2020 पासून किरकोळ मद्यविक्रीची दुकाने सुरु करण्याचा निर्णय घेण्यात आला होता. परंतू काही ठिकाणी मद्यविक्रीच्या दुकानात गर्दी होऊन सोशल डिस्टन्सिंग नियमाचे पालन न झाल्याचे निदर्शनास आले. गर्दी टाळणे, संपर्क टाळणे व संसर्ग टाळणे या भूमिकेतूनच घरपोच मद्यसेवा करण्याबाबत निर्णय घेण्यात आला आहे. या निर्णयाची अंमलबजावणी 15 मे 2020 रोजी सकाळी 10 वाजल्यानंतर करण्यात येणार असल्याची माहिती राज्य उत्पादन शुल्क आयुक्त कांतीलाल उमाप यांनी दिली.

सदर निर्णय राज्य शासनाने महाराष्ट्र दारुबंदी कायदा, 1949 मधील कलम 139 अन्वये विशेष अधिकारात घरपोच मद्यसेवा देण्याबाबतचा आदेश 11 मे 2020 रोजी निर्गमित केला आहे.या आदेशाबाबत क्षेत्रिय स्तरावरील अधिकाऱ्यांना याबाबत करावयाच्या कारावाईबाबत आदेश देण्यात आले आहेत. घरपोच मद्यसेवा आदेशाची अंमलबजावणी 14 मे 2020 पासून सकाळी 10 वाजल्यानंतर करण्यात येणार होती. परंतू क्षेत्रिय स्तरावरील अधिकाऱ्यांकडून सदर आदेशाप्रमाणे अंमलबजावणी करण्यासाठी डिलिव्हरी बॉय मिळविणे, त्यांची वैद्यकीय तपासणी करणे, ओळखपत्र देणे इत्यादी प्राथमिक तयारीसाठी आणखी एक दिवस आवश्यक असल्याने या आदेशाची अंमलबजावणी 15 मे 2020 रोजी सकाळी 10 वाजल्यापासून करण्यात येणार आहे.

घरपोच मद्यसेवा ही सोय ज्या जिल्ह्यात मद्यविक्री सुरु आहे त्या जिल्ह्यात आणि संबधित जिल्हाधिकारी यांनी मद्यविक्री करीता ज्या वेळा, दिवस आणि क्षेत्र निर्धारित केलेले आहे त्यातच सदर सोय उपलब्ध होऊ शकते.

0000

• देशातील सर्वात मोठे केअर सेंटर

• महापालिकेचे सुक्ष्म नियोजन प्रत्यक्ष अमलात

नागपूर, दि.13 : नागपूर महापालिकेने राधास्वामी सत्संग न्यास संस्थेच्या सहकार्याने कळमेश्वर मार्गावरील येरला येथील आश्रमाच्या परिसरात सुमारे पाच हजार बेडचे नियोजन असलेले सर्व सोयींनी युक्त ‘कोव्हिड केअर सेंटर’ उभारले आहे. अशा प्रकारचे इतक्या मोठ्या क्षमतेचे व एवढ्या कमी कालावधीत तयार होणारे हे देशातील पहिले ‘कोव्हिड केअर सेंटर’ ठरू शकते.

या सेंटरला आज पालकमंत्री डॉ.नितीन राऊत यांनी भेट देऊन पाहणी केली.  विभागीय आयुक्त डॉ.संजीवकुमार, पोलीस आयुक्त डॉ.भूषणकुमार उपाध्याय, महानगरपालिका आयुक्त तुकाराम मुंडे, जिल्हाधिकारी रविंद्र ठाकरे, पोलीस अधीक्षक ग्रामीण राकेश ओला  व इंदिरा गांधी वैद्यकीय महाविद्यालयाचे अधिष्ठाता डॉ.अजय केवलीया यावेळी उपस्थित होते.

कोरोना’ विषाणूच्या प्रतिबंधाच्या दृष्टीने पुढील काही दिवस महत्त्वाचे आहेत. नागपुरात सारे काही सध्या नियंत्रणात असले तरी भविष्यात उद्भवणाऱ्या कुठल्याही परिस्थितीशी दोन हात करता यावे, यासाठी नागपूर महापालिकेने सूक्ष्मनियोजन करून हे ‘कोविड केअर सेंटर’ उभारले असल्याची माहिती आयुक्त मुंडे यांनी दिली.

सध्या नागपुरात विविध ठिकाणी सुमारे 42 विलगीकरण कक्ष उभारण्यात आले आहे. क्षमतेच्या दृष्टीने आणि त्यामध्ये विलगीकरण करण्यात आलेल्या नागरिकांच्या संख्येच्या तुलनेत ते आता अपुरे पडण्याची शक्यता आहे. भविष्यात कोविड रुग्ण संख्येत वाढ झाल्यास त्यांची योग्य सोय अशा ठिकाणी व्हावी, त्यांच्यावर तेथेच उपचार करता यावे, यादृष्टीने मनपाने ‘कोव्हिड केअर सेंटर’ची संकल्पना मांडली. या संकल्पनेला राधास्वामी सत्संग न्यासने सहकार्य करीत उपचार कालावधीसाठी जागा उपलब्ध करून दिली. केवळ जागाच उपलब्ध करून दिली नाही तर या सेंटरसाठी आवश्यक त्या सर्व सोयी उपलब्ध करून देण्याची तयारी दर्शविली.

मॅटींग, बॅरिकेटींग, कम्पार्टमेंट, साईडिंग, डोम या सर्व व्यवस्था संस्थेने उपलब्ध करून दिल्या. इतकेच नव्हे तर शुद्ध पिण्याचे पाणी आणि रुग्णांसाठी सात्विक भोजन आदी व्यवस्था सुद्धा संस्थेने केली आहे. डॉक्टर तसेच आरोग्य कर्मचारी, बेड, चादर, उशी, भोजनासाठी ट्रे व अन्य काही व्यवस्था नागपूर महापालिकेतर्फे करण्यात आली आहे. एकूणच केंद्र शासन आणि राज्य सरकारने ‘कोविड केअर सेंटर’बाबत ठरवून दिलेल्या सर्व मार्गदर्शक तत्वांचे पालन करूनच हे ‘कोव्हिड केअर सेंटर’ उभारण्यात आले आहे. या सेंटरला भेट देऊन संपूर्ण व्यवस्थेची पालकमंत्र्यांनी पाहणी केली. महापालिकेने अल्पावधित उभारलेल्या या व्यवस्थेबद्दल आयुक्त मुंडे यांची त्यांनी प्रशंसा केली.

‘कोव्हिड केअर सेंटर’मध्ये सद्यस्थितीत 500 बेड तयार करण्यात आले असून गरजेनुसार ती पुढे वाढविण्यात येणार आहे. येथे महिला आणि पुरुष रुग्णांसाठी स्वतंत्र बेड आणि प्रसाधनगृहांची व्यवस्था आहे. प्रत्येक बेडला क्रमांक देण्यात आले असून तोच रुग्ण क्रमांक राहील. प्रत्येक 100 बेडच्या मागे 20 डॉक्टर, वैद्यकीय चमू आणि इतर कर्मचाऱ्यांची टिम कार्यरत असणार आहे. डिस्टन्सिगच्या नियमांची काटेकोर अंमलबजावणीसह ‘कोव्हिड केअर सेंटर’मध्ये उत्तम व्यवस्था करण्यात आली आहे.

विलगीकरण केलेल्या रुग्णांसाठी आवश्यक ती सर्व वैद्यकीय व्यवस्था येथे करण्यात आली आहे. त्यांचे तापमान तपासणी, रक्त तपासणीही येथे केली जाणार आहे. याशिवाय रुग्णांचे येथे स्वॅब घेण्यात येईल. स्वॅबच्या अहवालानंतर रुग्ण जर पॉझिटिव्ह असेल आणि प्रकृती अतिगंभीर असेल तरच त्याची रवानगी रुग्णालयातील कोव्हिड वॉर्डात करण्यात येईल. मात्र पॉझिटिव्ह असतानाही जर प्रकृती गंभीर नसेल, सहज उपचार शक्य असतील तर त्याला तेथेच अन्य कक्षात स्थलांतरित केले जाईल. रुग्णांसोबतच या ठिकाणी वैद्यकीय अधिकारी, कर्मचारी, पोलीस अधिकारी, कर्मचाऱ्यांच्या राहण्याची व्यवस्था करण्यात आली आहे. इंसिडंट कमांडर व अधीक्षक अभियंता श्वेता बॅनर्जी यांना या सेंटरची जबाबदारी देण्यात आली आहे.

0000

५४ कोटी ७५ लाख रुपयांचा निधी जिल्हाधिकाऱ्यांकडे वर्ग

मुंबई, दिनांक १३ : लॉकडाऊन कालावधीत परराज्यातील स्थलांतरीत मजुरांना त्यांच्या राज्यात पाठवण्यासाठी तसेच इतर राज्यात महाराष्ट्रातील स्थलांतरीत कामगार, मजूर अडकले आहेत त्यांना पुन्हा महाराष्ट्रात आणण्यासाठी अशा मजुरांच्या श्रमिक रेल्वे तिकिटाचे शुल्क मुख्यमंत्री सहाय्यता निधीतून भरण्यास मुख्यमंत्री उद्धव ठाकरे यांनी मान्यता दिली होती. त्यानुसार या ३६ जिल्ह्यांना ५४ कोटी ७५ लाख ४७ हजार ७० रुपयांचा निधी देण्यात आला असून तो संबंधित जिल्हाधिकाऱ्यांच्या खात्यात वर्ग करण्यात आला आहे.

कोविड १९ च्या साथीमुळे लॉकडाऊन जाहीर झाले आणि महाराष्ट्रात इतर राज्यातील कामगार आणि  मजूर अडकले. तसेच महाराष्ट्रातील कामगार आणि स्थलांतरीत मजुरही इतर राज्यांमध्ये अडकले आहेत. त्यांना या निर्णयाने मोठा दिलासा मिळेल. सचिव आपत्ती व्यवस्थापन व मदत व पुनर्वसन विभाग यांनी  दिलेल्या जिल्हाधिकाऱ्यांच्या  यादीप्रमाणे मुख्यमंत्री सहाय्यता निधीतील रकमांचे अर्थसहाय्य मंजूर करण्यात आले आहे. या निधीचा वापर केवळ ज्या कारणासाठी वितरित करण्यात आला आहे त्यासाठीच करता येणार आहे हे ही स्पष्ट करण्यात आले आहे.

जिल्ह्याना देण्यात आलेला निधी असा:

अक्र       जिल्हा           प्रदान केलेली  रक्कम

1           मुंबई शहर         12,96,00,000

2           मुंबई उपनगर     10,00,00,000

3            ठाणे                  4,80,00,000

4            रायगड              2,50,00,000

5            रत्नागिरी            1,50,00,000

6             पालघर              3,00,00,000

7             सिंधुदूर्ग             1,00,00,000

8             नाशिक                40,00,000

9             धुळे                     25,00,000

10           नंदुरबार               25,00,000

11           जळगांव              20,00,000

12           अहमदनगर         20,00,000

13            पुणे                 8,00,00,000

14           सातारा                95,81,270

15           सांगली               30,00,000

16           सोलापूर              50,00,000

17           कोल्हापूर          1,25,91,400

18           औरंगाबाद           80,00,000

19            जालना              50,00,000

20            बीड                   30,00,000

21            परभणी              50,00,000

22            हिंगोली                 6,00,000

23             नांदेड                20,00,000

24             उस्मानाबाद        20,00,000

25              लातूर               60,00,000

26             अमरावती          30,00,000

27               अकोला           12,74,400

28                वाशिम            10,00,000

29                बुलढाणा          20,00,000

30                यवतमाळ         35,00,000

31                 नागपूर         1,20,00,000

32                 वर्धा                30,00,000

33                 गोंदिया            25,00,000

34                 भंडारा             24,00,000

35                  चंद्रपूर             30,00,000

36                   गडचिरोली      15,00,000

………………………………………………….

कूण रूपये                54,75,47,070