नागपूर १८ जून :  राज्याच्या भविष्यातील ऊर्जेची मागणी पूर्ण करण्यासाठी महानिर्मिती आणि एनटीपीसी यांच्या संयुक्त प्रयत्नातून २५०० मेगावॅटचा सौर  ऊर्जा प्रकल्प राबविण्याचा निर्णय घेण्यात आला आहे. या प्रकल्पासाठी  योग्य जागा शोधण्याच्या सूचना राज्याचे ऊर्जा मंत्री डॉ.नितीन राऊत यांनी आज येथे विद्युत भवन नागपूर येथून व्ही.सी.द्वारे आयोजित बैठकीत दिल्या.
ऊर्जामंत्री डॉ. राऊत यांनी महानिर्मिती आणि महाऊर्जाच्या अधिकाऱ्यांशी संवाद  साधताना पुढे सांगितले कि, एनटीपीसीने हा वीज प्रकल्प तयार करण्यासाठी उत्सुकता दाखवली आहे. महानिर्मितीने प्रकल्पासाठी आवश्यक असणाऱ्या जागेचा शोध घेऊन याचा सविस्तर अहवाल सादर करावा.
राज्याला हरित ऊर्जेसंदर्भात स्वयंपूर्ण करण्यासाठी महानिर्मिती, महावितरण महापारेषण आणि वीज नियामक आयोग यांनी समन्वयातून  एकत्रित प्रयत्न केले पाहिजेत.  सौर ऊर्जा, पवन ऊर्जा, घन कचऱ्यापासून वीज निर्मिती यासारख्या हरित ऊर्जा प्रकल्पाकडे सर्वानी गांभीर्याने बघण्याची गरज असल्याचे मत त्यांनी व्यक्त केले. 
सौर आणि पवन ऊर्जेचा संयुक्त प्रकल्प होऊ शकतो काय यावर देखील वीज क्षेत्रातील तज्ज्ञानी विचार करण्याचे निर्देश उपस्थित अधिकाऱ्यांना दिले.
अमरावती जिल्ह्यातील गव्हाणकुंड येथील १६ मेगावॅटच्या सौर ऊर्जा  प्रकल्पाची माहिती त्यांनी यावेळी घेतली. या प्रकल्पाचे काम आता अंतिम टप्यात असून लवकरच यातून वीजनिर्मिती सुरु होईल अशी माहिती महानिर्मितीतर्फे  डॉ. राऊत यांना देण्यात आली.
नंदुरबार जिल्ह्यातील दोंडाईचा येथे २५० मेगावॅटच्या सौर ऊर्जा प्रकल्पाचा आढावा त्यांनी घेतला. या प्रकल्पासाठी जागा अधिग्रहित झाली असून निविदा प्रक्रिया पूर्ण करून प्रत्यक्ष प्रकल्पाच्या कामाला लवकर सुरुवात करावी, अशी सूचना त्यांनी अधिकाऱ्याना दिल्या.
या बैठकीस प्रधान सचिव(ऊर्जा) दिनेश वाघमारे, महानिर्मितीच्या व्यवस्थापकीय संचालिका शैला ए, महावितरणचे संचालक (वाणिज्य) सतीश चव्हाण, महानिर्मितीचे संचालक (प्रकल्प) थंगपांडियन , हाय पॉवर कमिटीचे अनिल नगरारे, मुख्य अभियंता प्रकाश खंडारे, राजकुमार तासकर, मिलिंद नातू, राजेश पाटील, नागपूर प्रभारी प्रादेशिक संचालक महावितरण सुहास रंगारी आदी मान्यवर प्रामुख्याने उपस्थित होते.

न्यूयॉर्क : करोना या जागतिक महामारीवरून मागील काही दिवसांपासून अमेरिकेने चीनला आरोपीच्या पिंजऱ्यात उभे केले आहे. आंतरराष्ट्रीय स्तरावर चीनविरोधान वातावरण निर्माण झाल्यानंतर आता एक धक्कादायक बातमी समोर आली आहे. डोनाल्ड ट्रम्प यांचे माजी राष्ट्रीय सुरक्षा सल्लागार जॉन बोल्टन यांच्या पुस्तकातून छपाईपूर्वीच एक धक्कादायक माहिती समोर आली आहे. बोल्टन यांनी आपल्या या पुस्तकातून चीन आणि अमेरिकेच्या संबंधांविषयी गौप्यस्फोट केला आहे. तसेच अमेरिकेत २०२० मध्ये होणाऱ्या निवडणुकांसाठी ट्रम्प यांनी चीनकडे मदत मागितल्याचाही दावा केला आहे. त्यांच्या या दाव्यामुळे आंतरराष्ट्रीय स्तरावरच गोंधळाचे वातावरण तयार झाले आहे.

आंतरराष्ट्रीय स्तरावरील काही नामांकित इंग्रजी वर्तमानपत्रात बोल्टन यांच्या पुस्तकातील काही भाग प्रकाशित करण्यात आला आहे. ट्रम्प यांनी गेल्या वर्षी जूनमध्ये जपानच्या ओसोका येथे जी -२० शिखर परिषदेदरम्यान चीनचे राष्ट्राध्यक्ष शी. जिनपिंग यांची भेट घेतली होती. तेव्हा त्यांनी अमेरिकेच्या राष्ट्राध्यक्षपदाच्या निवडणुकीबद्दल त्यांच्याशी चर्चा केली. तसेच चीनची आर्थिक क्षमता कशाप्रकारे अमेरिकेतील निवडणूक प्रचारावर प्रभाव टाकू शकते, यावर त्याच्यात चर्चा झाली. तसेच जिनपिंग यांच्याकडे ट्रम्प यांनी निवडणूक जिंकवण्याचे आवाहनही केल्याचा दावा बोल्टन यांनी केला आहे.

ट्रम्प यांनी अमेरिकेतील शेतकर्‍यांचे महत्त्वावर चर्चेदरम्यान जोर दिला आणि चीनने सोयाबीन आणि गहू खरेदी केल्याने अमेरिकेच्या अध्यक्षपदाच्या निवडणुकीवर कसा परिणाम होऊ शकतो, यावरही भाष्य केले. ट्रम्प यांनी चीनबरोबर व्यापार युद्ध संपविण्याची आणि पश्चिम चीनमधील उइगर मुस्लिमांसाठी शिबिर सुरू करण्याची ऑफर दिली होती, असा दावा बोल्टन यांनी आपल्या पुस्तकात केला आहे.

दुसरीकडे बुधवारी अमेरिकेने चीनमधील उइगर मुस्लिमांविरूद्ध चीनविरोधात कारवाई करणारे विधेयक मंजूर केले. त्याअंतर्गत त्यांच्या देखरेख ठेवणाऱ्या आणि त्यांना नजरकैद केंद्रात ठेवणाऱ्या अधिकाऱ्यांवर बंदी घालण्यात येणार आहे. चीनविरोधात उचलण्यात आलेले हे मोठे पाऊल असल्याचे म्हटले जात आहे. अमेरिकेचे परराष्ट्र मंत्री माईक पॉम्पिओ हे हवाईमध्ये चीनच्या अधिकाऱ्याची भेट घेण्यासाठी गेले असतानाच हे पाऊल उचलण्यात आले आहे.

चीनचे सरकारी वृत्तपत्र ग्लोबल टाईम्सने पाकिस्तान आणि नेपाळ चीनसोबत असल्याचा सांगण्याचा प्रयत्न केला

बीजिंग. गलवान खोऱ्यात लष्करांच्या चकमकीनंतर चीनने पुन्हा एकदा एका सरकारी वृत्तपत्राच्या माध्यमातून भारतावर दबाव आणण्याचा प्रयत्न केला. चिनी सरकारचे मुखपत्र माउथपीस ग्लोबल टाइम्सनुसार, एलएसीवर तनाव वाढला तर भारताला चीन व्यतिरिक्त पाकिस्तान आणि नेपाळ सेनेचा दबाव सहन करावा लागेल. याचा अर्थ भारत-चीन सीमेवर बिघडलेल्या परिस्थितीत पाकिस्तान आणि नेपाळ चीनला पाठिंबा देऊ शकतात.

सोमवारी रात्री लडाखच्या गलवान खोऱ्यात भारत आणि चीनच्या सैनिकांत झडप झाली होती. यामध्ये भारताचे 20 जवान शहीद झाले होते. दरम्यान चीनचे 43 सैनिक मारले गेले किंवा जखमी झाल्याचा दावा रिपोर्ट्समध्ये करण्यात आला आहे.

मानसिक दबाव निर्माण करण्याचे षड्यंत्र

ग्लोबल टाईम्स हे चीनमधील सत्ताधारी कम्युनिस्ट पक्षाचे मुखपत्र आहे. त्यातील लेख चीन सरकारच्या मतानुसार असतात. हे वृत्तपत्र अनेक दिवसांपासून भारताला धमकावणारे लेख प्रकाशित करत आहे. वृत्तपत्राने शांघाय अकॅडमी ऑफ सोशल सायन्सच्या संशोधक फेल हू झियोंग यांचा एक लेख प्रसिद्ध केला आहे. यामध्ये झियोंगने म्हटले की, “सध्या भारताचा चीन व्यतिरिक्त पाकिस्तान आणि नेपाळसोबत सीमा वाद सुरू आहे. पाकिस्तान आणि चीनचे जवळचे संबंध आहेत. नेपाळही आमची सहयोगी आहे. दोन्ही देश चीनच्या वन बेल्ट रोड प्रकल्पाचा भाग आहेत.”

भारताकडे इतकी सैन्य ताकद नाही

झियोंग पुढे म्हणतात, ” भारताने सीमेवर तणाव वाढवल्यास तीन मोर्चांवर लष्करी दबावाचा सामना करावा लागेल. या दबावाला सामोरे जाण्याची ताकद भारताच्या सैन्याकडे नाही. भारताचा दारुण पराभव होऊ शकतो.” झियोंगनुसार, चीन एलएसी बदलू इच्छित नाही. गलवान खोऱ्यात जे काही घडले त्याला भारतीय सैन्यच जबाबदार आहे असा आरोपही त्यांनी केला. कारण, भारतीय सैन्यानेच चिनी सैनिकांना चिथावले होते.

भारताने चौकशी करावी

लेखात पुढे म्हटले की, “गलवान खोऱ्यासारख्या घटना भविष्यात पुन्हा घडणार नाहीत हे भारताने ठरवायला हवे. भारत सरकारने या प्रकरणाची चौकशी करावी. जबाबदार लोकांना कठोर शिक्षा द्यावी.” या वृत्तपत्राने चीनमधील लष्करी तज्ञाचे एक विधानही प्रसिद्ध केले आहे. परंतु त्यांचे नाव सांगितले नाही. या विधानानुसार, चीनने आपल्या मृत किंवा जखमी झालेल्या सैनिकांची संख्या किंवा नाव यासाठी प्रसिद्ध केले नाही कारण यामुळे तणाव आणखी वाढू शकतो.

 15 जूनला चिनी राष्ट्राध्यक्षांना वाढदिवसाची भेट देण्यासाठी चिनी लष्कराची  नीच कुरापत 

गलवान खोऱ्यात १५ जून रोजी जेव्हा चिनी सैनिक विश्वासघातकीपणे भारतीय सैनिकांना घेरून कौर्य करत होते, तेव्हा चीनमध्ये राष्ट्राध्यक्ष शी जिनपिंग यांच्या वाढदिवसाचा समारंभ सुरू होता. पीएलएचे हे कृत्य म्हणजे जिनपिंग यांच्या वाढदिवसाची भेट असल्याचे भारतीय लष्करी सूत्र सांगताहेत. शहिदांच्या शरीरावरील जखमा याचा पुरावा आहेत. २० शहिदांपैकी १६ जणांच्या शरीरावर काठ्या आणि दगडाचे वार यांच्या खोलवर जखमा आहेत. चार जवानांचा मृत्यू शिखरावरून पडल्याने झाला. मात्र त्यांना धक्का दिला की या झटापटीत ते वरून पडले हे अद्याप स्पष्ट झालेले नाही. सुमारे १५ हजार फूट उंचीवर हा हिंसाचार जेथे झाला तेथे खूपच कमी जागा आहे. ज्या सीमा चौकीवर आक्षेप नोंदवण्यासाठी कमांडिंग ऑफिसर कर्नल बी. संतोष गेले होते. तेथे चिंचोळी वाट खाली जाते. तेथून चिनी सैनिक या चौकीतून तंबू परत नेताना दिसले होते. मात्र, कर्नल संतोष यांची तुकडी पोहोचल्यानंतर पीएलएने पवित्रा बदलला आणि त्यांना घरून मारण्यास सुरुवात केली. सूत्रांनुसार, मंगळ‌वारी हेलिकॉप्टरने चिन्यांनी जखमी सैनिकांना बाहेर काढले. येथून ४६ स्ट्रेचर जाताना दिसले. मात्र, यापैकी किती जखमी आणि किती मृतदेह होते हे अद्याप स्पष्ट झालेले नाही.

चिनी कुरापतीच्या विरोधात बुधवारी देशभर संताप उसळला. माजी लष्करी अधिकाऱ्यांनी चिनी दूतावासासमोर निदर्शने केली. गलवान खोऱ्यात शहीद जवानांना बुधवारी लेहच्या लष्करी रुग्णालयात श्रद्धांजली वाहण्यात आली. येथून पार्थिव मूळ गावी नेण्यात आले.

खोटारडेपणा : चिनी परराष्ट्रमंत्री म्हणाले, चकमक चीनच्या हद्दीत

चिनी परराष्ट्रमंत्री वांग यी यांनी १५ जूनच्या घटनेबद्दल म्हटले आहे की, “दोन्ही सैनिकांत जेथे चकमक झाली तो भाग चीनच्या नियंत्रणात आहे. भारतीय लष्कर एलएसी ओलांडून तेथे पोहाचले.’ मात्र, चीनचा खोटारडेपणा १६ जूनच्या सॅटेलाइट इमेजमधून दिसला. १६ जूनला सायंकाळच्या या छायाचित्रात चिनी सैनिक भारतीय हद्दीत दिसत आहेत. म्हणजे घटनेच्या दुसऱ्या दिवशीही घुसखोर तेथेच होते.

भारत-चीनच्या परराष्ट्रमंत्र्यांची फोनवर चर्चा, पुढे तणाव वाढू नये या मुद्द्यावर एकमत :

परराष्ट्रमंत्री एस. जयशंकर यांनी बुधवारी चिनी परराष्ट्रमंत्री वांग यी यांच्याशी फोनवर चर्चा केली. हा तणाव वाढवणारी कारवाई करण्याऐवजी शांतता प्रस्थापित व्हावी म्हणून प्रयत्न करण्यावर दोघांत एकमत झाले. जयशंकर यांनी या वेळी गलवान खोऱ्यातील घटनेबद्दल तीव्र आक्षेप नोंदवला. ते म्हणाले, तणाव कमी करण्यासाठी ६ जूनला लष्करी अधिकाऱ्यांच्या बैठकीत जवान हटवण्यावर एकमत झाले होते. मात्र, चिनी सैनिक भारतीय हद्दीत तंबू उभारण्यासाठी हट्टाला पेटले होते. यावरून वाद झाला.

बीकेसी टप्पा २, ठाणे येथील कोरोना रुग्णालयांचे मुख्यमंत्र्यांच्या हस्ते ई-लोकार्पण

मुंबई,: कोरोनाच्या उपाययोजनांसाठी आरोग्य सुविधांची उभारणी करताना मुंबईत मोकळ्या मैदानावरील क्षेत्रीय रुग्णालयात अतिदक्षता विभागाचे (आयसीयू) बेड्स निर्माण करण्याची किमया यंत्रणांनी केली आहे. महाराष्ट्राने देशासमोर अभिनव अशी यशोगाथा मांडली आहे, असे गौरवोद्गार मुख्यमंत्री उद्धव ठाकरे यांनी आज येथे काढले.

मुंबई महानगर प्रदेश विकास प्राधिकरण (एमएमआरडीए) यांच्या वतीने बीकेसी मैदानावर दुसऱ्या टप्प्यात उभारण्यात आलेल्या कोरोना रुग्णालयाचा हस्तांतरण कार्यक्रम आणि ठाणे येथे उभारण्यात आलेल्या १००० खाटांचे कोरोना रुग्णालयाचा ई-लोकार्पण सोहळा मुख्यमंत्र्यांच्या हस्ते करण्यात आला. त्यावेळी ते बोलत होते. यावेळी व्हीडिओ कॉन्फरन्सिंगच्या माध्यमातून नगरविकास मंत्री एकनाथ शिंदे, एमएमआरडीएचे महानगर आयुक्त आर. ए. राजीव, मुंबई महापालिका आयुक्त आय. एस. चहल आदी मान्यवर सहभागी झाले होते.

मुख्यमंत्री श्री. ठाकरे यावेळी म्हणाले, बीकेसी मैदान आणि ठाणे येथे ही दोन्ही रुग्णालये युद्ध पातळीवर उभारण्यात आली आहेत, याचा मला अभिमान आहे. कोरोनाच्या उपाययोजनांमध्ये महाराष्ट्र जगाच्या मागे नाही तर पुढे आहे. गेल्या दोन महिन्यांच्या कालावधीत मुंबईसह राज्यात काही लाख खाटा उपचारासाठी निर्माण केल्या गेल्या ही मोठी गोष्ट आहे.  

मुंबईमध्ये मोकळ्या मैदानांवर १० ते १५ दिवसांच्या कालावधीत १००० खाटांचे सर्व सुविधायुक्त रुग्णालयांची निर्मिती होते ही कामगिरी थक्क करणारी आहे. देशात अन्यत्र कुठेही अशा प्रकारच्या मोकळ्या मैदानावरील रुग्णालयात आयसीयूची सुविधा उपलब्ध नाही. महाराष्ट्राने केलेल्या कामगिरीची सचित्र माहिती आपण पंतप्रधानांशी संवाद साधताना देऊ, अशी ग्वाही यावेळी मुख्यमंत्र्यांनी दिली. राज्यात डॉक्टर्स, नर्स हे कोरोना योद्धे लढताहेत त्यांना आयुधं म्हणून ह्या आरोग्य सुविधा असल्याचे त्यांनी सांगितले.

आपण रुग्णालये आरोग्य सुविधा निर्माण करीत आहोत मात्र त्याचा वापर करण्याची वेळ कुणावरही येऊ नये, अशी प्रार्थना मुख्यमंत्र्यांनी यावेळी केली. दाट लोकवस्तीत राहणाऱ्या ५५ वर्षांवरील व्यक्तींची तपासणी केली जात आहे. त्यांच्या रक्तातील ऑक्सिजनचे प्रमाण मोजले जात आहे, जेणेकरुन अशा व्यक्तींना कोरोनाच्या प्रादुर्भावापासून वेळीच रोखणे शक्य होईल. ट्रॅकिंग, ट्रेसिंगचा मालेगाव आणि धारावीमध्ये यशस्वी झालेल्या प्रयोगाचा उल्लेखही मुख्यमंत्र्यांनी यावेळी केला.

मुख्यमंत्री मदत निधीसाठी एका ८५ वर्षींय महिला डॉक्टरांनी आज सकाळी धनादेश सुपूर्द केला असे सांगताना त्या महिला म्हणजे एमएमआरडीएचे महानगर आयुक्त श्री. राजीव यांच्या मातोश्री असल्याचा उल्लेख मुख्यमंत्र्यांनी केला आणि त्यांना मनापासून नमस्कार करतो, अशी भावनाही त्यांनी यावेळी व्यक्त केली.

असे आहे बीकेसीवरील टप्पा २ रुग्णालय

साधारणत: एक महिन्याभरापूर्वी बीकेसी येथील मैदानावर १००० खाटांचे रुग्णालय उभारण्यात आले. त्याच ठिकाणी दुसऱ्या टप्प्यात अतिरिक्त १२०० खाटांचे आयसीयू, डायलेसिसीच सुविधा असलेले रुग्णालय उभारण्यात आले. त्याचा आज हस्तांतरण सोहळा झालाय हे रुग्णालय आज मुंबई महापालिकेला हस्तांतरित करण्यात आले.  येथे १०८ बेड्स आयसीयूचे असून १२ बेड्स डायलेसिससाठी आहेत. तर ४०६ बेड्स विना ऑक्सिजन आणि ३९२ बेड्स ऑक्सिजन सुविधायुक्त आहेत.

डेडिकेटेड कोविड हेल्थ सेंटरमध्ये मुंबई महानगरपालिकेकडून रुग्णांना उपचारासाठी दाखल करण्यात येत असून सद्यस्थितीत ५०० पेक्षा अधिक रुग्ण सदर हेल्थ सेंटरमध्ये उपचार घेत आहेत. मागील काही दिवसांपासून दर दिवशी सुमारे ३० रुग्ण निरोगी होऊन घरी परतत आहेत.  डेडीकेटेड कोविड हॉस्पिटल (फेज-२) येथे व्हेंटिलेटर मशीन (३०), डायलिसिस मशीन (१८), आय. सी. सी. यु. बेल्स (५) फंक्शन मोटराईझड बेड (१०८), पेशंट वॉर्मर, सिटीस्कॅन मशीन, आर. ओ. सिस्टीम (१२५० LPH ), क्वारंटाईन बेड्स, ऑक्सीजन पाईप लाईनचे कनेक्शन, नॉईसलेस सक्शन, पोर्टेबल एक्स-रे मशीन, ई.सी.जी. मशीन, पल्स ऑक्सिमीटर, कम्प्युटर रॅडिओलॉजी सोल्युशन्स अशा प्रकारचे वैद्यकीय उपकरणे आहेत.

२४ दिवसांमध्ये रुग्णालयाची उभारणी-नगरविकास मंत्री एकनाथ शिंदे

ठाणे कोरोना रुग्णालयाच्या उद्घाटनप्रसंगी पालकमंत्री व नगरविकासमंत्री एकनाथ शिंदे म्हणाले, अवघ्या २४ दिवसांमध्ये या रुग्णालयाची उभारणी करण्यात आली आहे. बाळकुम-साकेत येथे १०२४ बेड्सचे तळ अधिक १० मजल्यांचे हे रुग्णालय आहे. आयसीयू बेड, डायलिसीस, प्रयोगशाळा, सीटीस्कॅन, एक्सरे आदी सर्व सुविधा याठिकाणी करण्यात आल्या आहेत. याकामासाठी एमएमआरडीएसह १९ विकासकांनी योगदान दिले असल्याचे त्यांनी सांगितले. कल्याण-डोंबिवली, बदलापूर, भिवंडी येथे अशा प्रकारे रुग्णालये उभारणीचे काम सुरू असल्याचे श्री. शिंदे यांनी सांगितले.

या हॉस्पिटलमुळे ठाणेकरांसाठी मोठी सुविधा झाली आहे. त्यातील ५०० बेड्स हे सेंट्रल ऑक्सिजनची सुविधा असलेले आहेत. यातील ७६ बेड्स हे आयसीयूचे असून १० बेडस डायलेसिस रूग्णांसाठी तर १० बेड्स ट्राएजसाठी ठेवण्यात आलेले आहेत. विशेष म्हणजे येथे रुग्णांवर मोफत उपचार केले जाणार आहेत. आवश्यकता वाटल्यास या रुग्णालयामध्ये अतिरिक्त ३०० बेड्स निर्माण करता येऊ शकतात, असेही श्री. शिंदे यांनी सांगितले.

उपसरपंचांच्या खात्यावर पहिल्यांदाच १५.७२ कोटी रुपये जमा

मुंबई,: राज्यातील ग्रामपंचायतींच्या सरपंचांबरोबर आता उपसरपंचांनाही दरमहा मानधन देण्यात येणार आहे, आतापर्यंत फक्त सरपंचांना मानधन देण्यात येत होते, त्यात उपसरपंचांचा समावेश नव्हता. पण आता सरपंचांप्रमाणे उपसरपंचांनाही मानधन सुरु करण्यात आले असून पहिल्या टप्प्यात १५.७२ कोटी रुपयांची रक्कम उपसरपंचांच्या बँक खात्यांवर जमा करण्यात आली आहे, अशी माहिती ग्रामविकासमंत्री श्री. हसन मुश्रीफ यांनी दिली.

राज्यातील गावांच्या विकासासाठी सरपंचांबरोबर उपसरपंचांचेही मोठे योगदान असते. सध्या राज्यातील सरपंचांना दरमहा मानधन मिळत आहे. पण गावाच्या विकासासाठी असलेले उपसरपंचांचे योगदान लक्षात घेऊन त्यांनाही मानधन देण्याचा निर्णय घेण्यात आला होता. परंतु काही तांत्रिक कारणास्तव आतापर्यंत त्यांना मानधन अदा करण्यात आले नव्हते. आता यासंदर्भातील लेखाशिर्ष तयार करणे, मानधन ऑनलाईन अदा करण्याची कार्यप्रणाली तयार करणे आदी सर्व प्रक्रिया पार पाडून एकूण ८ महिन्यांचे एकत्रित मानधन उपसरपंचांच्या खात्यावर जमा करण्यात आले आहे, यासाठी एकूण १५.७२ कोटी रुपये अदा करण्यात आले आहेत, असे ग्रामविकासमंत्री श्री. मुश्रीफ यांनी सांगितले.

राज्यात सुमारे २८ हजार ग्रामपंचायती असून त्यातील ऑनलाईन प्रक्रिया पूर्ण केलेल्या २४ हजार ४८५ ग्रामपंचायतींच्या उपसरपंचांच्या खात्यावर सध्या मानधन जमा झाले आहे. उर्वरित उपसरपंचांच्या खात्यावर मानधन जमा करण्याची कार्यवाही सुरु असून ती लवकरच पूर्ण केली जाईल, असेही ग्रामविकासमंत्र्यांनी सांगितले.

उपसरपंचांना मिळणार ‘इतके’ मानधन

· २००० पर्यंत लोकसंख्या असलेल्या ग्रामपंचायतींच्या उपसरपंचांना दरमहा १००० रुपये

· २००१ ते ८००० पर्यंत लोकसंख्या असलेल्या ग्रामपंचायतींच्या उपसरपंचांना दरमहा १५०० रुपये

· ८००१ पेक्षा जास्त लोकसंख्या असलेल्या ग्रामपंचायतींच्या उपसरपंचांना दरमहा २००० रुपये

सरपंचांनाही मिळाले प्रलंबित मानधन

दरम्यान, राज्यातील सरपंचांचे मानधन नोव्हेंबर २०१९ पासून प्रलंबित राहिले होते. हे मानधन तातडीने अदा करण्यात यावे, अशा सूचना विभागास दिल्या होत्या. त्यानुसार कार्यवाही करुन विभागामार्फत प्रलंबित मानधनापोटी सरपंचांच्या खात्यावर नुकतेच २२ कोटी रुपये जमा करण्यात आले आहेत, अशी माहितीही ग्रामविकासमंत्री श्री. मुश्रीफ यांनी दिली.

वीजमीटरचे रिडींग घेण्यासाठी कर्मचाऱ्यांना सहकार्य करा

महावितरणचे वीजग्राहकांना आवाहन

पुणे, : महावितरणच्या ग्राहकांना योग्य वीजवापराचे अचूक वीजबिल देण्यासाठी मीटरचे रिडींग घेण्याची प्रक्रिया सुरु करण्यात आली आहे. कोणाच्याही संपर्कात न येता घराबाहेर असलेल्या वीजमीटरचे रिडींग घेण्यासाठी कर्मचाऱ्यांना वीजग्राहकांनी सहकार्य करावे, असे आवाहन महावितरणकडून करण्यात आले आहे.

पुणे जिल्ह्यातील शहर व ग्रामीणमध्ये स्थानिक प्रशासनाने परवानगी दिलेल्या भागामध्ये आणि कोरोना प्रतिबंधीत क्षेत्र (कन्टेंटमेंट एरिआ) वगळून वीजग्राहकांकडील मीटरचे रिडींग घेण्यात येत आहे. संबंधीत एजन्सीजच्या कर्मचाऱ्यांनी मीटर रिडींग घेताना हॅण्डग्लोव्हज, मास्क, सॅनिटाजर तसेच फिजिकल डिस्टन्सिंगच्या नियमाचे काटेकोरपणे पालन करण्याच्या सूचना देण्यात आल्या आहेत.

रिडींग घेणाऱ्या कर्मचाऱ्यांचा रिडींग घेताना कोणाशीही संपर्क येत नाही. सर्व मीटर ग्राहकांच्या घराबाहेर असल्याने तसेच अपार्टमेंटमध्ये वीजमीटरची तळमजल्यावर स्वतंत्र खोली असल्याने रिडींगसाठी घरात किंवा इमारतीमध्ये जाण्याची गरज नाही. मीटर रिडींगची प्रक्रिया महावितरणच्या मोबाईल अॅपद्वारे होत आहे. मोबाईलद्वारे एका मीटर रिडींगचा फोटो काढणे व रिडींग घेणे यासाठी केवळ 8 ते 10 सेकंदाचा कालावधी लागतो. मीटर रिडींग घेणारे कर्मचारी हे कोरोनाच्या पार्श्वभूमिवर वैयक्तिक व सार्वजनिक आरोग्यविषयक दक्षता घेऊनच मीटर रिडींग घेत आहेत. एकच कर्मचारी कोणाच्याही संपर्कात न येता रिडींग घेत आहे.

कोरोना विषाणूच्या प्रादुर्भावामुळे लॉकडाऊनच्या कालावधीत मीटर रिडींग घेण्याचे तात्पुरते थांबविण्यात आले होते. गेल्या मार्च महिन्यानंतर आता जूनमध्ये स्थानिक प्रशासनाची परवानगी मिळालेल्या भागात आणि कोरोना प्रतिबंधित क्षेत्र वगळून मीटर रिडींग घेण्यात येत आहे. लॉकडाऊनच्या कालावधीत मीटर रिडींग उपलब्ध होऊ न शकल्याने वीजग्राहकांना त्यांच्या वीजवापरानुसार सरासरी वीजबिल देण्यात आले. आता जूनमध्ये घेतलेल्या प्रत्यक्ष रिडींगद्वारे गेल्या दोन ते अडीच महिन्यांच्या कालावधीमधील अचूक वीजवापरानुसार वीजबिल दुरुस्त करण्यात येत आहे. तसेच बिलांची रक्कम भरल्यास त्याचे योग्य समायोजन करण्यात येत आहे.

ज्या भागातील ग्राहकांच्या वीजमीटरचे रिडींग घेण्यासाठी स्थानिक प्रशासनाची परवानगी मिळाली आहे मात्र कर्मचाऱ्यांना रिडींग घेण्यासाठी सोसायटीत प्रवेश नाकारला जात असेल तर तेथील वीजग्राहकांना पुन्हा सरासरी वीजबिले जाण्याची शक्यता आहे. तसेच अचूक बिलासाठी पुन्हा पुढील महिन्यातील मीटर रिडींगसाठी प्रतीक्षा करावी लागेल. त्यामुळे मीटर रिडींग घेणाऱ्या कर्मचाऱ्यांना सहकार्य करावे, असे आवाहन महावितरणकडून करण्यात आले आहे.