पुणे- पुणे शहर आणि विभागात कोरोनाच्या वाढत्या संसर्गाला पुण्याच्या महापौरांनी प्रशासनालाच जबाबदार धरले आहे. मात्र त्यांनी थेट आरोप न करता प्रशासनाकडेच बोटे दाखविणारी वक्तव्ये केली आहेत .खाजगी हॉस्पिटल चे ८० टक्के बेड्स ताब्यात न घेणे, खाजगी हॉस्पिटलच्या मनमानीवर कारवाई न करणे ,चाचण्यांची आणि उपचारांची क्षमता वाढविण्यासाठी आपल्या अधिकारात निर्णय घेऊन प्रयत्न न करणे अशाप्रकरचे विविध ठपके महापौरांनी अखेर अप्रत्यक्ष का होईनात प्रशासनावरच ठेवले आहेत . या शिवाय पुण्यात कोरोना रुग्णाला उपचार देण्यासाठी जे जम्बो रुग्णालय उभारायचे आहे त्यासाठी महापालिका आर्थिक विवंचनेत असतानाही जवळपास ३०० कोटी + ७५ कोटी जम्बो सेंटरला देण्यास तयार असल्याचे महापौर मुरलीधर मोहोळ यांनी स्पष्ट केले आहे. मात्र महापालिकेलाही राज्य सरकारने आर्थिक मदत केली पाहिजे अशी हि भूमिका स्पष्ट केली आहे .दरम्यान जम्बो रुग्णालयाच्या खर्चाबाबत नेमकी स्पष्ट भूमिका नसल्याचे यावरून बोलले जाणार आहे. एकीकडे रुग्णालयाला २५ टक्के देतो म्हणायचे आणि दुसरीकडे रुग्णालयाला ५० टक्के निधी देणाऱ्याच राज्य सरकारने पुन्हा मदत करावी असे म्हणायचे हि भूमिका अनेकांना दुटप्पी वाटते आहे.

श्री. मुरलीधर मोहोळ यांनी मुख्यमंत्री श्री. उद्धव ठाकरे यांच्या बैठकीत मांडलेले मुद्दे…

१) ऑक्सिजन व आयसीयू बेडस, व्हेंटिलेटरची कमतरता.
२) टेस्टिंगची क्षमता वाढविणे.
३) खाजगी हॉस्पिटलवरचे नियंत्रण.
४) महापालिकेस आर्थिक मदत.
५) मृत्यूची चौकशी करावी, त्यामधील दोष दूर करून मृत्यूदर नियंत्रणात आणावा.

खाजगी हॉस्पिटल, बेड्स आणि अवाजवी बील

• ८०% बेड्स ताब्यात घेण्याचे आदेश आहेत, मात्र कार्यवाही नाही
• बिलामध्ये नागरिकांची प्रचंड लूट असल्याच्या तक्रारी आहेत, त्यामुळे बिलांचे प्रिऑडिट करावे
• सेंट्रली बेड्स मॅनेजमेंट तातडीनं करण्यात यावे
  (ससून /मनपा /खाजगी हॉस्पिटल)
• खाजगी लॅबवर तूर्त तरी कोणतेही नियंत्रण नाही आणि प्रशासनाचा लॅबशी समन्वय नाही.
• उपजिल्हाधिकारी दर्जाचे अधिकारी नेमले आहेत, त्यांची यावर नियंत्रण आणावे

महापालिका आर्थिक स्थिती

• ४ हजार ४४३ कोटी जमा
• ३००० कोटी – महसुली / मॅन्डेटरी खर्च / पगार / मेन्टेनन्स
• १४०० – विकासकामे (६५० कोटी मागील वर्षीच्या विकासकामे)
• शिल्लक ८०० कोटी
• जवळपास ३०० कोटी + ७५ कोटी जम्बो सेंटरला
• भांडवली कामांसाठी शिल्लक ४०० कोटी राहिले, यासाठी दरवर्षी ३००० कोटींची कामे होतात.
• हा सर्व विचार करता राज्य सरकारने तातडीनं आर्थिक मदत जाहीर करावी

कोरोनाबाधित रुग्णांचा आगामी अंदाज…

• ५५ हजार होणार जुलैअखेर (अंदाज ४६ हजार इतका होता)
• आज २९ जुलै रोजी एकूण रुग्ण एकूण ५१ हजार ७३८ तर उपचार सुरू असणाऱ्या रुग्णांची संख्या १७ हजार ८६१ इतकी आहे.
  अंदाज
  १५ ऑगस्ट – एकूण १ लाख रुग्ण
  ३१ ऑगस्ट – एकूण २ लाख रुग्ण
• यामुळे बेड्सचीची कमतरता, ऑक्सिजन, आयसीयू आणि व्हेंटिलेटर बेड्स मोठ्या प्रमाणावर लागतील.
• जम्बो सेंटर उभे उभारणीपर्यंत व्यवस्थाही अपुरी, त्याची सोय तातडीनं करण्यात यावी.
• ७ हजार ऑक्सिजन बेड्स, ४ हजार ०६५ आयसीयू बेड्स आणि १ हजार ९०० व्हेंटिलेटर बेड्सची आवश्यकता असणार आहे.

मृत्यूंचे प्रमाण व अवस्था…
ससून रुग्णालयात दररोज रोज १२ मूत्यू कोरोनाव्यतिरिक्त होत आहेत, ही संख्या खाजगी हॉस्पिटलमध्ये महिन्याला ५० ते १००; म्हणजेच ढोबळपणे अधिक ४०० ते ५०० मृत्यू कोरोनाचे असतात, पण ते आकडेवारीत दर्शविले जात नाहीत.

• टेस्ट न होता हे मृत्यू होत आहेत, यात काही मृत्यू हॉस्पिटल पोहोचण्यापूर्वीचे आहेत.
• छातीच्या एक्स-रे ने अनेकांना कोरोनाचे निदान झाल्याची माहिती आहे.
• याबाबत सविस्तर चौकशी करुन भविष्यातील या मृत्युंची संख्या कमी करण्यासाठी प्राधान्याने प्रयत्न करावेत.

टेस्टिंग क्षमता वाढविणे

• NIV आणि ससूनमध्ये चाचणीची मर्यादित क्षमता असल्याने ससूनमध्ये राज्य शासनाच्या माध्यमातून चाचण्यांची क्षमता वाढवण्यासाठीची यंत्रणा उभी करणे याबाबत दोन महिने चर्चाच होत आहे, ही यंत्रणा त्वरित कार्यान्वित करण्यात यावी.

पुण्यातील विधान भवन सभागृहात पुणे जिल्ह्यातील कोविड व्यवस्थापन व नियोजनाबाबत बैठक

• मुख्यमंत्री उद्धव ठाकरे यांच्या अध्यक्षतेखाली व उपमुख्यमंत्री अजित पवार यांची प्रमुख उपस्थिती
• जिल्ह्यातील मंत्री व लोकप्रतिनिधींची उपस्थिती पुणे दि. 30 :- कोरोनाचा रुग्ण दर व मृत्यु दर कमी करण्यासाठी सर्वांनी मिळून प्रयत्न करणे गरजेचे आहे. कोरोना नियंत्रणासाठी लोकप्रतिनिधींनी शासन आणि नागरिक यांच्यातील दुवा म्हणून भूमिका बजावावी, असे आवाहन मुख्यमंत्री उद्धव ठाकरे यांनी केले.
  पुण्यातील विधान भवन सभागृहात राज्याचे मुख्यमंत्री उद्धव ठाकरे यांच्या अध्यक्षतेखाली व उपमुख्यमंत्री तथा जिल्ह्याचे पालकमंत्री अजित पवार यांच्या प्रमुख उपस्थितीत पुणे जिल्ह्यातील कोविड व्यवस्थापन व नियोजनाबाबत बैठक घेण्यात आली. बैठकीत जिल्याुखतील मंत्री महोदय व लोकप्रतिनिधीकडून सूचना जाणून घेतल्या. बैठकीला कामगार व राज्य उत्पादन शुल्क मंत्री दिलीप वळसे-पाटील, पर्यावरण मंत्री आदित्य ठाकरे, सार्वजनिक बांधकाम राज्यमंत्री दत्तात्रय भरणे, पुण्याचे महापौर मुरलीधर मोहोळ व पिंपरी-चिंचवडच्याा महापौर उषा ऊर्फ माई ढोरे, जिल्हा परिषदेच्या अध्यक्षा निर्मला पानसरे, विधानपरिषदेच्या उपसभापती निलम गोऱ्हे, खासदार सर्वश्री गिरीश बापट, श्रीरंग बारणे, वंदना चव्हाण, डॉ.अमोल कोल्हे, माजी मंत्री चंद्रकांत पाटील यांच्यासह जिल्ह्यातील लोकप्रतिनिधी तसेच राज्याचे मुख्य सचिव संजय कुमार, मुख्यमंत्री यांचे अपर मुख्य सचिव आशिषकुमार सिंह, मुख्यमंत्री यांचे प्रधान सल्लागार अजोय मेहता, आरोग्य विभागाचे प्रधान सचिव डॉ. प्रदीप व्यास, वैद्यकीय शिक्षण व औषधी द्रव्ये विभागाचे सचिव सौरभ विजय, विभागीय आयुक्त डॉ. दीपक म्हैसेकर, विशेष कार्य अधिकारी सौरभ राव, पुणे महानगरपालिका आयुक्त विक्रम कुमार, पिंपरी चिंचवड महापालिका आयुक्त श्रावण हर्डीकर, जिल्हाधिकारी नवल किशोर राम तसेच वरिष्ठ प्रशासकीय अधिकारी उपस्थित होते.
  मुख्यमंत्री उद्धव ठाकरे व उपमुख्यमंत्री अजित पवार यांनी जिल्ह्यातील कोरोना परिस्थिती जाणून घेवून लोकप्रतिनिधीच्या अडचणी व सूचना जाणून घेतल्या. यावेळी मुख्यमंत्री श्री. ठाकरे म्हणाले, कोविड 19 चा संसर्ग जिल्ह्यात किती दिवसात वाढत आहे, हे पाहून त्यादृष्टिने जिल्ह्यात उपाययोजना कराव्यात. शासकीय यंत्रणा प्रभावी होणे आवश्यक असून आरोग्य सुविधा सक्षम करावी. कोरोना रुग्णांसाठी अद्याप ठोस औषध अथवा लस उपलब्ध नसल्याचे सांगतानाच अशा परिस्थितीत प्रशासन, लोकप्रतिनिधी आणि सर्वसामान्य यांच्यात समन्वय असणे आवश्यक आहे. वाढता रुग्ण दर व मृत्यू दर कमी करणे हे आव्हान असून यासाठी लोकप्रतिनिधींच्या सहकार्याची गरज आहे, असे सांगून कोरोनाच्या आपत्कालीन परिस्थितीत नागरिकांच्या हिताचे निर्णय घेताना सर्वांनी शासनाच्या पाठीशी उभे रहावे असे आवाहनही मुख्यमंत्री श्री. ठाकरे यांनी केले.
  राज्यात व्हेंटिलेटर, पी पी ई किट, एन 95 मास्क पुरेशा प्रमाणात उपलब्ध असून गरजेनुसार त्या-त्या भागात पुरवठा करण्यात येत आहे. महापालिकांना कोरोना प्रतिबंधाच्या अनुषंगाने आर्थिक मदत देण्यात आली असून यापुढे ही मदत देण्यात येईल, असे सांगून मुख्यमंत्री उद्धव ठाकरे म्हणाले, राज्यात प्रत्येक जिल्ह्यात टास्क फोर्स बनविण्याच्या सूचना दिल्या असून त्यानुसार टास्क फोर्स निर्माण होत आहेत. यामुळे कोरोना उपाययोजनामध्ये सुसुत्रता येईल.
  व्हेंटिलेटर, पी पी ई किट, एन 95 मास्कचा पुरवठा 1 सप्टेंबर नंतरही केंद्राकडून करण्यात यावा, अशी विनंती प्रधानमंत्री महोदयांना केली असल्याचे सांगून मुख्यमंत्री श्री. ठाकरे म्हणाले, सर्व लोकप्रतिनिधींनी देखील आपआपल्या स्तरावर याबाबत विनंती करावी, जेणेकरुन राज्याला याचा लाभ होईल. कोरोना रुग्ण संख्येच्या परिस्थितीनुसार लॉकडाऊनचे नियम शिथिल करण्यात येत आहेत. तथापि, प्रतिबंधित क्षेत्रात नियमांची कडक अंमलबजावणी करण्यात येत आहे.
  तपासणी अहवाल पॉझिटिव्ह आलेले रुग्ण बऱ्याचदा रुग्णालयात जायला टाळाटाळ करतात. त्यामुळे वेळेत उपचार न मिळाल्यामुळे रुग्णांचा मृत्यू झाल्याचे आढळून येत आहे. असे होवू नये यासाठी खाजगी प्रयोगशाळांनी कोरोना अहवाल पॉझिटिव्ह असणाऱ्या रुग्णांना परस्पर तपासणी अहवाल न देता संबंधित महापालिका यंत्रणेला द्यावा, जेणेकरुन रुग्णांना वेळेत बेड उपलब्ध होईल. पुणे शहर, पिंपरी-चिंचवड शहर व पुणे जिल्ह्याचा ग्रामीण भाग यामध्ये एकसुत्रीपणा आणून सर्वांनी मिळून काम करावे, असे मुख्यमंत्री श्री. ठाकरे यांनी सांगितले.
  पुण्यात वाढत्या रुग्णांवर उपचार होण्याच्या दृष्टिने बेडची संख्या वाढविणे गरजेचे आहे. यामध्ये महानगरपालिकेने पुढाकार घ्यायला हवा. पुण्यासह नाशिक, औरंगाबाद महानगरपालिकांनीही बेडची संख्या वाढविण्यासाठी नियोजन करुन त्याप्रमाणे अंमलबजावणी करावी यासाठी राज्यशासन महापालिकांना आर्थिक मदत निश्चित देईल, असे ते म्हणाले.
  मुख्यमंत्री उद्धव ठाकरे म्हणाले, राज्यात कोरोनाच्या पहिल्या लाटेचा सामना करताना सर्वांनी दक्षता घेणे गरजेचे असून गाफील राहता कामा नये. यात लोकसहभाग महत्त्वाचा असून मास्कचा वापर, सोशल डिस्टंन्सिंग, स्वच्छतेच्या नियमांचे पालन करण्याबाबत महापालिकेने नागरिकांमध्ये जनजागृती करावी. नागरिकांची गैरसोय होवू नये तसेच उपचारापासून रुग्ण वंचित राहू नये, याची दक्षता प्रशासनाने घ्यावी. यासाठी कोरोना प्रतिबंधात्मक उपाययोजना प्रभावी राबविण्यासाठी विकेंद्रीकरण करावे.
  मुख्यमंत्री उद्धव ठाकरे म्हणाले, पुण्यात उभारण्यात येणाऱ्या जम्बो रुग्णालयाचे काम गतीने करावे. संगणकीय प्रणालीमध्ये बेड व्यवस्थापन व अन्य आवश्यक माहिती अद्ययावत ठेवावी. तसेच याचा आढावा वेळोवेळी वरिष्ठ प्रशासकीय यंत्रणेने घ्यावा. झोपडपट्टी परिसरात छोटी घरे असल्यामुळे याठिकाणी गृह अलगीकरणापेक्षा संस्थात्मक अलगीकरणांवर भर द्यावा. ऑक्सिजनचा पुरवठा न झाल्यामुळे रुग्णांचा मृत्यू होवू नये यासाठी ऑक्सिजनयुक्त रुग्णवाहिका तयार ठेवाव्यात.
  उपमुख्यमंत्री तथा जिल्ह्याचे पालकमंत्री अजित पवार यांनी कोरोना परिस्थिती नियंत्रणासाठी दर आठवड्याला पुण्यात प्रशासकीय यंत्रणेसोबत बैठका घेवून आढावा घेत असल्याचे सांगितले. त्याचबरोबर आतापर्यंत पुण्यात राबविण्यात आलेल्या उपाययोजनांची माहिती दिली. भोर तालुक्यातील भूस्खलन होत असणाऱ्या गावांचे माळीणच्या धर्तीवर पुनर्वसन करण्याच्या दृष्टिने सविस्तर प्रस्ताव शासनाकडे सादर करावा, अशा सूचना दिल्या.
  यावेळी खाजगी रुग्णायालयांच्या शुल्क आकारणीवर नियंत्रण ठेवावे,कोरोनाच्या रुग्णांना अतिदक्षता विभागातील खाटा, व्हेटिंलेटरची कमतरता भासू नये यासाठी प्रयत्न करावेत. राज्य शासनाने महापालिकेला अर्थसहाय्य करावे. ससून रुग्णालयात तपासणी क्षमता वाढवावी अशा सूचना महापौर मुरलीधर मोहोळ यांनी केल्या. महापौर उषा उर्फ माई ढोरे यांनी पिंपरीतील शासकीय रुग्णालयामध्ये चांगल्या सुविधा मिळत असल्याच्या प्रतिक्रिया रुग्णांकडून आल्याचे सांगितले.
  विधानपरिषदेच्या उपसभापती निलम गोऱ्हे म्हणाल्या, कोरोनाच्या रुग्णांना औषधे माफक दरात उपलब्ध होण्यासाठी प्रयत्न करावेत. डॅश बोर्डवरील माहिती गतीने उपलब्ध करुन द्यावी. सोसायट्यांनी कोरोना पॉझिटिव्ह रुग्णांना चांगली वागणूक द्यावी यावर प्रशासनाने नियंत्रण ठेवावे,अशा सूचना केल्या.
  खासदार सर्वश्री गिरीश बापट, श्रीरंग बारणे, वंदना चव्हाण, डॉ.अमोल कोल्हे यांच्यासह लोकप्रिनिधींनी पुणे जिल्ह्यातील कोरोना परिस्थितीची माहिती दिली, तसेच सूचना केल्या. पुण्यासाठी व्हेंटिलेटर, रुग्णवाहिका, औषधसाठा उपलब्ध करुन द्यावा. खाजगी रुग्णालयांचे बेड उपलब्धतेची माहिती अद्ययावत ठेवावी, कोविड केअर सेंटर मधील भोजनाचा दर्जा चांगला ठेवावा. प्रतिबंधात्मक नियम पाळण्याबाबत जनजागृतीवर भर द्यावा. माहिती, शिक्षण आणि संवाद यावर भर द्यावा. कोरोना तपासणीसाठी फिरते तपासणी केंद्र सुरु व्हावे, ग्रामीण रुग्णालये व प्राथमिक आरोग्य केंद्रामध्ये अद्ययावत वैद्यकीय उपकरणे व प्रशिक्षित मनुष्यबळ उपलब्ध करुन द्यावे, अशा सूचना उपस्थित लोकप्रतिनधिींनी केल्या.
  प्रारंभी विभागीय आयुक्त डॉ. दीपक म्हैसेकर यांनी पुणे जिल्ह्यातील आतापर्यंतची कोरोना बाधित रुग्णांची सद्यस्थिती, कोरोना मुक्त झालेल्या रुग्णांची संख्या, बाधित रुग्णांची क्षेत्रनिहाय माहिती, नमुना तपासणी प्रयोगशाळा आदि विषयी माहिती दिली.

पुणे- कोरोना सारख्या महामारी च्या काळात रुग्ण सेवेत अपयशी ठरत असलेल्या भाजपच्या सत्तेत स्थायी समितीचे अध्यक्ष हेमंत रासने यांनी जम्बो रुग्णालयाला पैसे देण्यास वाजविलेली नकार घंटा संतापजनक असून काम करता येत नसेल तर त्यांनी खुर्ची खाली करावी, लोकांच्या जीवाशी खेळण्या चा त्यांना अधिकार कोणी दिलेला नाही असही सणसणीत चपराक राष्ट्रवादीचे ज्येष्ठ कार्यकर्ते नितिन कदम यांनी लगावली आहे.

यासंदर्भात त्यांनी प्रसिद्धिस दिलेल्या पत्रकात म्हटले आहे की,वाढत्या कोरोनाच्या रुग्ण संख्या मुळे बेड्स कमी पडत असलेल्या पार्श्वभूमीवर पुण्यात तीन जम्बो हॉस्पिटल उभारण्याचा निर्णय घेण्यात आला. त्यासाठी महाराष्ट्र शासन 50 टक्केबरोबर पुणे महानगरपालिकेने 25 टक्के निधी देण्याबाबत निर्णय झालेला आहे. हा 25% चा पुणे मनपाचा वाटा देण्यास स्थायी समिती अध्यक्ष श्री हेमंत रासने यांनी नकार दिलेला आहे.पुण्यात रोज एक हजार ते दीड हजार कोरोणा बाधित रुग्ण वाढत आहेत. आतापर्यंतची संख्या ही पंचवीस हजाराच्या वर गेली आहेत. जवळजवळ दोन हजार पुणेकर मयत झाले आहेत. अशी गंभीर परिस्थिती असताना स्थायी समिती अध्यक्ष यांचे भूमिका अत्यंत चुकीची व संतापजनक आहे. लाखो पुणेकरांनी आपले कर्तव्य बजावत बाराशे ते पंधराशे कोटीचा मिळकत कर भरलेला आहे. त्यांचेच पैसे देण्यासाठी नकार देण्याचा स्थायी समिती अध्यक्षांना काय अधिकार आहे..! ते काय पुण्याचे सावकार आहेत का..? त्यांच्या या भूमिकेचा राष्ट्रवादी काँग्रेस पक्ष (पर्वती) तीव्र निषेध करत आहे व त्यांच्या राजीनाम्याची मागणी करीत आहे.

पुणे-

: शहरात उभारण्यात येणाऱ्या नव्या जम्बो आयसोलेशन सेंटर (हॉस्पिटल) उभे करण्यात येणार आहेत. यासाठी महापालिकेने 25 टक्के खर्च करण्याचा निर्णय उपमुख्यमंत्र्यांच्या उपस्थितीमध्ये झालेल्या बैठकीत घेण्यात आला आहे. मात्र यासाठी महापालिका पैसे देणार नाही, असे स्थायी समितीचे अध्यक्ष हेमंत रासने यांनी सांगितले आहे. त्यामुळे यावरून राज्य शासन आणि महापालिका वाद पेटण्याची चिन्हे दिसत आहेत.
कोरोना निर्मूलन आढाव्याच्या अनुषंगाने उपमुख्यमंत्री अजित पवार यांच्या अध्यक्षतेखाली सिोमवारी वभागीय आयुक्त कार्यालय बैठक झाली. या बैठकीला महापौर मुरलीधर मोहोळ, विभागीय आयुक्त डॉ. दीपक म्हैसेकर, विभागीय आयुक्त कार्यालयाचे विशेष कार्य अधिकारी सौरभ राव, जमाबंदी आयुक्त एस. चोक्कलिंगम, जिल्हाधिकारी नवल किशोर राम, पालिका आयुक्त विक्रम कुमार यांच्यासह वरिष्ठ अधिकारी उपस्थित होते.
कोरोनाचा पुढाली काळातील वाढती संख्या लक्षांत घेऊन तीन जम्बो आयसोलेशन सेंटर उभे करण्याचा निर्णय घेण्यात आला. यामध्ये तिन्ही सेंटरमध्ये ऑक्सिजन व आयसीयू बेड्स उभे करण्यात येणार आहेत. यासाठी एकूण 300 कोटी रुपयांचा निधी लागणार आहे. त्यात राज्य शासन 50, पुणे महापालिका 25, पिंपरी चिंचवड महापालिका 12.5, आणि पीएमआरडीए 12.5 टक्के निधीचा असा हिस्सा उचलणार आहेत.’

फेडरेशन ऑफ ऑल इंडिया व्यापार मंडळ ‘ चे आवाहन

पुणे :लॉक डाऊन  हा कोरोना रोखण्याचा उपाय नसल्याचे सिध्द झाल्याने सरकारने आता पुन्हा लॉक डाऊन हा पर्याय विचारात घेऊ नये, सर्वांनी मिळून सुरक्षिततेच्या उपाययोजनांवर भर देऊया , असे आवाहन  फेडरेशन ऑफ ऑल इंडिया व्यापार मंडळ ‘ चे प्रदेशाध्यक्ष  विजयसिंह डुबल यांनी पत्रकाद्वारे केले आहे. ‘ पुण्यात   उद्योजक, व्यापारी आता लॉक डॉऊन सहन करणार नाहीत, असा इशाराही त्यांनी दिला आहे.
फेडरेशनचे राष्ट्रीय अध्यक्ष जयेंद्र टण्णा   आणि राष्ट्रीय सचिव व्ही.के .बंसल यांनी डुबल यांच्याशी , तसेच राज्यातील इतर व्यापारी संघटनांशी आज लॉक डाऊन विषयावर चर्चा झाल्यावर महाराष्ट्रातील उद्योजक, व्यापाऱ्यांच्या परिस्थितीची माहिती विजयसिंह डुबल यांनी दिली.
 ‘सध्याच्या आव्हानात्मक परिस्थितीमध्ये  व्यापारी उद्योजक आणि उद्योगांचे प्रश्न सोडवण्यासाठी प्रयत्न करणे आवश्यक आहे, धीर देणे आवश्यक आहे. आणि सुरक्षिततेच्या योजनांची जनजागृती करणे आवश्यक आहे, ‘ असे विजयसिंह डुबल हे यांनी म्हटले आहे.
 ‘कोरोना साथीच्या  काळात व्यापारी, उद्योजक आणि उद्योगांना सर्व पातळीवर अडचणींना तोंड द्यावे लागत असून या अडचणी सोडवणे, सरकार दरबार चे प्रश्न सोडवणे, मनोधैर्य उंचावणे,  हे काम प्राधान्याने करणे आवश्यक आहे., पुन्हा लॉक डाऊन हा पर्याय विचारात घेऊन व्यापारी, उद्योजकांना संकटात टाकू नये, असे विजयसिंह डुबल यांनी म्हटले आहे.

पुणे-कोरोनाच्या लढाईत सामान्य नागरिकां कडून केल्या जाणाऱ्या मदतीचा आधार वाटतो आणि लढण्यासाठी उर्जा मिळते असे भावूक उद्गार महापौर मुरलीधर मोहोळ यांनी काढले.सद्यस्थितीत केली जाणारी मदत अत्यंत मौल्यवान असून त्यातूनच माणुसकीचे दर्शन घडते असेही ते म्हणाले.
प्रभाग १३ मधील महाराष्ट्र पी डब्ल्यु डी ए को.ऑ.हौसिंग सोसायटी ( भरतकुंज सोसायटी ) च्या वतीने नगरसेविका मंजुश्री खर्डेकर यांच्या माध्यमातून रुग्ण तपासणीसाठी पुणे मनपा स ७५ पल्स ऑक्सीमीटर ची भेट देण्यात आली त्यावेळी महापौर मुरलीधर मोहोळ भावनिक झाले व यासंकट काळात पुणेकर विविध माध्यमातून करत असलेल्या मदतीचा त्यांनी गौरवपूर्ण उल्लेख केला.
आम्ही सामाजिक बांधीलकीच्या जाणीवेतून ही मदत करत असून सद्यस्थितीत प्रशासनास सर्वतोपरी सहकार्य करावे व कोरोना योद्धांवरील भार कमी करावा या हेतूने सदर मदत करत असल्याचे भरतकुंज सोसायटीचे अध्यक्ष ॲड.एम एस रानडे म्हणाले.
प्राप्त परिस्थितीत सर्वाधिक मदतीची गरज ही वैद्यकीय सेवा पुरविणाऱ्या घटकास आहे व त्यातही अत्यवस्थ रुग्णांची ऑक्सीजन लेव्हल ची चाचणी महत्त्वाची असल्याने आम्ही मनपा स पल्स ऑक्सीमीटर भेट देण्याचा निर्णय घेतला असे डॉ.संजीव खुर्द यांनी सांगितले.
यावेळी भाजपचे शहर उपाध्यक्ष संदीप खर्डेकर,
भरतकुंज सोसायटीचे सचिव दिलीप थत्ते ,कोषाध्यक्ष दिलीप भट इ उपस्थित होते.