शुक्रवार पेठेतील सेवा मित्र मंडळ ट्रस्टतर्फे आयोजन ; राजकीय, धार्मिक, सामाजिक क्षेत्रातील मान्यवरांचा सहभाग

पुणे:- श्री गणेश पुराण, स्वराज्याचे शिलेदार प्रेरणापर्व, गणेशोत्सव माझा, घेऊ भरारी यांसारख्या नाविन्यपूर्ण कार्यक्रमांनी सेवा ऑनलाइन महागणेशोत्सव सजणार आहे. कोरोनाच्या पार्श्वभूमीवर प्रत्यक्ष कार्यक्रम घेणे शक्य नसले, तरी देखील ऑनलाइन स्वरुपात केवळ महाराष्ट्रातच नव्हे, तर जगभरातील गणेशभक्तांकरीता अनुभविता येतील असे कार्यक्रम शुक्रवार पेठेतील सेवा मित्र मंडळ ट्रस्टतर्फे आखण्यात आले आहेत, अशी माहिती मंडळाचे अध्यक्ष रवींद्र बरीदे यांनी पत्रकार परिषदेत दिली.

पत्रकार परिषदेला वैभव वाघ, तन्मय तोडमल, विक्रांत मोहिते, अमेय थोपटे, कुणाल जाधव, गणेश सांगळे उपस्थित होते.

सेवा मित्र मंडळाचे यंदा ५५ वे वर्ष असून कोरोनाचा काळ असला, तरी देखील उत्सव तर होणारच आणि तोही ऑनलाईन पद्धतीने व्यापक स्वरुपात या संकल्पाने कार्यकर्ते कामाला लागले आहेत. पुण्यातील गणेशोत्सवाचे स्वरुप देश-विदेशात पोहोचविणारी सोशल माध्यमे वापरुन यंदाचा उत्सव साजरा होत आहे.

उत्सवाचे उद्घाटन दिनांक २२ ऑगस्ट दुपारी ४ वाजता महापौर मुरलीधर मोहोळ यांच्या हस्ते होणार आहे. उत्सवाचे मुख्य आकर्षण असलेला घेऊ भरारी – चला उद्योजक बनूयात हा कार्यक्रमात दिनांक २३ ते ३० ऑगस्ट अनुभवी तज्ज्ञ, उद्योजक, युथ आयकॉन्स तरुणाईशी दररोज सायंकाळी ७.३० वाजता संवाद साधणार आहेत. याचे उद्घाटन खासदार गिरीष बापट करणार आहेत. यामध्ये आगामी दशक शेती व्यवसायाचे, शेतक-यांचे याविषयावर अभिनेते प्रविण तरडे, उद्योजकीय व्यक्तीमत्व घडविताना या विषयावर आमदार रोहित पवार, फळ-भाजीपाला प्रक्रिया-एक नवीन संधी याविषयावर संजय ओरपे, व्यवसाय आणि मार्केटिंग याविषयावर जगभर मसालाकिंग नावाने धनंजय दातार, ब्रँड डेव्हलपमेंट याविषयावर अ‍ॅडगुरु व दिग्दर्शक रवी जाधव आणि घेऊ भरारीमध्ये खासदार अमोल कोल्हे हे देखील संवाद साधणार आहेत.

दिनांक २२ ऑगस्ट ते १ सप्टेंबर दरम्यान दररोज दुपारी ४ वाजता राष्ट्रीय कीर्तनकार चारुदत्त आफळे यांचे श्री गणेश पुराण याविषयावर कीर्तन होणार आहे. तर, गणेशोत्सव माझा या कार्यक्रमातून दिनांक २३ ते १ सप्टेंबर दरम्यान गणेशोत्सव मंडळ कार्यकर्त्यांचे मनोगत हा संवादात्मक उपक्रम दररोज दुपारी १२.३० वाजता गणेशभक्तांना घरबसल्या अनुभविता येणार आहे. संवाद कार्यक्रमाचे उद्घाटन आमदार मुक्ता टिळक करणार आहेत.

स्वराज्याचे शिलेदार प्रेरणापर्व या कार्यक्रमातून युवा शिवशाहीर सौरभ कर्डे हे स्वराज्याच्या शिलेदारांची प्रेरणाकथा दिनांक २३ ऑगस्ट ते १ सप्टेंबर दरम्यान दररोज रात्री ९ वाजता सांगणार आहेत. या उपक्रमाचे उद्घाटन पुणे मनपा स्थायी समिती अध्यक्ष हेमंत रासने करणार आहेत. या उपक्रमात युवा शिवशाहीर सौरभ कर्डे दररोज एका स्वराज्याच्या शिलेदाराची प्रेरणागाथा प्रेक्षकांसमोर मांडणार आहेत.
https://www.facebook.com/SevaMitraMandal या फेसबुक पेजवरुन हे कार्यक्रम विनामूल्य गणेशभक्तांना पाहता येणार आहेत. तरी नागरिकांना याचा लाभ घ्यावा, असे आवाहन मंडळाच्या वतीने करण्यात आले आहे.

पुणे-नगरसेविका मंजुश्री संदीप खर्डेकर यांच्या माध्यमातून प्रभाग १३ मधील लक्ष्मीनारायण नगर (श्यामाप्रसाद मुखर्जी उद्यानासमोर )१४ हॅंडसफ्री सॅनिटायझर यंत्र भेट देण्यात आले त्यावेळी श्री.खर्डेकर बोलत होते.
या प्रसंगी नगरसेवक जयंत भावे,कोथरूड मंडल अध्यक्ष पुनीत जोशी,कोथरूड मंडल महिला आघाडी अध्यक्ष हर्षदाताई फरांदे,प्रभाग अध्यक्ष राजेंद्र येडे व सोसायटीचे श्री. खंडागळे,श्री.पेटकर,श्री. तांबे श्री.पेंढारकर,श्री. हेंद्रे व इतर मान्यवर उपस्थित होते.
नगरसेविका सौ.मंजुश्री खर्डेकर यांनी आमदार चंद्रकांतदादा पाटील यांनी कोरोना काळात केलेल्या कार्याची माहिती देताना सांगितले की रोगप्रतिकारक शक्ती वाढविण्यासाठी आर्सेनिक अल्बम चे वाटप,मास्क वाटप,सॅनिटायझर स्टॅंड वाटप,गरजूंना शिधा वाटप,थर्मामीटर व थर्मल गन वाटप,७५००० ज्येष्ठांना लॉकडॉउन काळात घरपोच जेवणाचे डबे यासह चंद्रकांतदादांनी हिंजेवाडी येथे उभारलेले १०५ बेड्स चे कोव्हिड केयर सेंटर महाराष्ट्रातील एकमेवाद्वितीय असल्याचे सांगितले.
नगरसेवक जयंत भावे व कोथरूड मंडल अध्यक्ष पुनीत जोशी यांचेही यावेळी भाषण झाले.
भाजप चा प्रत्येक कार्यकर्ता आपल्या मदतीसाठी तत्पर असल्याचे या दोघांनीही सांगितले.

अजून कोरोना चे संकट संपले नसून येणाऱ्या काळात रुग्णसंख्या वाढण्याचीच भिती व्यक्त केली जात आहे ,गणेशोत्सवात विशेष काळजी घेण्याची गरज असून नागरिकांनी गाफील न राहता मास्क चा वापर करणे,दोन व्यक्तीमधे सुरक्षित अंतर ठेवणे आणि सॅनिटायझर चा वापर ( सतत हात धुणे ) करणे गरजेचे आहे असे यावेळी क्रिएटिव्ह फौंडेशनचे अध्यक्ष संदीप खर्डेकर म्हणाले.

पुणे- : शहरात सर्वत्र चांगला पाऊस झाला असून संततधार पावसामुळे नदी, नाले, ओढे व छोटी धरणे तुंडुब भरली आहेत. दक्षिण पुण्यातील नागरिकांसाठी आकर्षणबिंदू ठरलेला आंबेगाव खुर्द जांभूळवाडी तलाव पुर्ण क्षमतेने भरून वाहू लागला असून याची पाहणी करण्यासाठी प्रभाग क्रमांक ४० च्या नगरसेविका स्मिता कोंढरे यांनी तलावाला भेट दिली. यावेळी उपस्थित महिलांसमवेत कोंढरे यांच्या हस्ते मोठ्या उत्साहात तलावाचे ओटीभरण व जलपूजन करण्यात आले.

जांभूळवाडी तलाव हा आकाराने लहान असला तरी सध्या पुर्ण क्षमतेने भरल्यामुळे नागरिकांचे लक्ष वेधून घेत आहे. कोळेवाडी, जांभूळवाडीतील डोंगर भागातून वाहणारे जरे, ओढे, नाले हे तलावाचे पाणी भरण्याचे मुख्य नैसर्गिक स्त्रोत आहेत. तलाव शंभर टक्के भरल्याने तलावातील अतिरिक्त पाणी नैसर्गिकरित्या पुर्वेकडील पुलाखालून वेगाने ओढ्यात जात असल्याने आंबेगाव खुर्द, आंबेगाव बुद्रुक परिसरातून जाणारा ओढा तुंडुब भरून वाहू लागला आहे. मात्र पावसाच्या पाण्याबरोबरच उतारावरून वाहून येणारी माती व गाळ यामुळे तलावाच्या साठवणूक क्षमतेवर परिणाम झाला असून प्रदूषण सुद्धा वाढले आहे. 

या पार्श्वभूमीवर नगरसेविका स्मिता कोंढरे यांनी तलावाचे प्रदूषण कमी करण्यास प्राधान्य दिले जाणार असून आगामी काळात खासदार सुप्रिया सुळे, आमदार संजय जगताप, नगरसेवक गणेश ढोरे यांच्या माध्यमातून तलावाचे सुशोभीकरण करून तलावाचे पाणी परिसरातील नागरिकांना वापरात येईल यासाठी प्रयत्न करणार असल्याचे सांगितले.

यावेळी शालन जांभळे, मालन जांभळे, स्वाती शिरोळे, वृषाली जांभळे, अश्विनी कोंढरे, दीप्ती सुतार, पल्लवी कोंढरे, वर्षा नरसाळे, हेमा वाघमारे, मिनाबाई ओव्हाळ तसेच जनहित विकास मंचाचे संस्थापक अध्यक्ष सुधिर कोंढरे, मारुती जांभळे, विजय शिरोळे, किशोर कोंढरे, सुधिर कोंढरे, बापूराव जाधव, अमोल कोंढरे, महेंद्र कोंढरे उपस्थित होते.

पुणे- भारताचे माजी पंतप्रधान स्व. राजीव गांधी यांच्या जयंतीनिमित्त महापौर मुरलीधर मोहोळ यांनी महापालिकेतील तैलचित्रास पुष्पहार अर्पण करून अभिवादन केले तसेच सद्भावना दिनानिमित्त उपस्थित सर्वांना सद्भावना शपथ दिली.
याप्रसंगी उपमहापौर सौ. सरस्वतीताई शेंडगे,महापालिका आयुक्त श्री विक्रम कुमार,शिवाजी दौंडकर ,राजेंद्र मुठे , अनील मुळे,आदी मान्यवर उपस्थित होते

पुणे विभागातील 1 लाख 27 हजार 529 कोरोना बाधित रुग्ण बरे होऊन घरी गेले;
कोरोना बाधित 1 लाख 78 हजार 490 रुग्ण -विभागीय आयुक्त सौरभ राव

पुणे,दि. 20 :- पुणे विभागातील 1 लाख 27 हजार 529 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 1 लाख 78 हजार 490 झाली आहे. तर ॲक्टीव रुग्ण 46 हजार 199 आहे. कोरोनाबाधीत एकुण 4 हजार 762 रुग्णांचा मृत्यू झाला असून मृत्यूचे प्रमाण 2.75 टक्के आहे. पुणे विभागामध्ये बऱ्या होणा-या रुग्णांचे प्रमाण 71.4 टक्के आहे, अशी माहिती विभागीय आयुक्त सौरभ राव यांनी दिली.

पुणे जिल्हा
पुणे जिल्हयातील 1 लाख 32 हजार 293 बाधीत रुग्ण असून कोरोना बाधित 1 लाख 712 रुग्ण बरे होवून घरी गेले आहेत. ॲक्टीव रुग्ण संख्या 28 हजार 431 आहे. कोरोनाबाधित एकूण 3 हजार 150 रुग्णांचा मृत्यू झाला आहे. मृत्यूचे प्रमाण 2.38 टक्के इतके आहे. पुणे जिल्हयामध्ये बरे होणा-या रुग्णांचे प्रमाण 76.13 टक्के आहे.
सातारा जिल्हा
सातारा जिल्ह्यातील कोरोना बाधीत 8 हजार 275 रुग्ण असून 4 हजार 658 बाधित रुग्ण बरे होवून घरी गेले आहेत. ॲक्टीव रुग्ण संख्या 3 हजार 348 आहे. कोरोनाबाधित एकूण 269 रुग्णांचा मृत्यू झाला आहे.
सोलापूर जिल्हा
सोलापूर जिल्ह्यातील 14 हजार 473 कोरोना बाधीत रुग्ण असून 9 हजार 859 बाधित रुग्ण बरे होवून घरी गेले आहेत. ॲक्टीव रुग्ण संख्या 3 हजार 983 आहे. कोरोना बाधित एकूण 631 रुग्णांचा मृत्यू झाला आहे.
सांगली जिल्हा
सांगली जिल्ह्यातील कोरोना बाधीत 7 हजार 309 रुग्ण असून 3 हजार 721 बाधित रुग्ण बरे होवून घरी गेले आहेत. ॲक्टीव रुग्ण संख्या 3 हजार 339 आहे. कोरोना बाधित एकूण 249 रुग्णांचा मृत्यू झाला आहे.
कोल्हापूर जिल्हा
कोल्हापूर जिल्ह्यातील 16 हजार 140 कोरोना बाधीत रुग्ण असून 8 हजार 579 बाधित रुग्ण बरे होवून घरी गेले आहेत. ॲक्टीव रुग्ण संख्या 7 हजार 98 आहे. कोरोना बाधित एकूण 463 रुग्णांचा मृत्यू झाला आहे.
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्णांच्या संख्येच्या तुलनेत पुणे विभागात बाधीत रुग्णांच्या संख्येमध्ये एकूण 4 हजार 234 ने वाढ झाली आहे. यामध्ये पुणे जिल्ह्यात 2 हजार 724, सातारा जिल्ह्यात 346, सोलापूर जिल्ह्यात 287, सांगली जिल्ह्यात 294 तर कोल्हापूर जिल्ह्यात 583 अशी रुग्ण संख्येमध्ये वाढ झालेली आहे.

पुणे विभागातील सर्व्हेक्षण
आजपर्यत विभागामध्ये एकुण 8 लाख 53 हजार 96 नमूने तपासणीसाठी पाठविण्यात आले होते, प्राप्त अहवालांपैकी 1 लाख 78 हजार 490 नमून्यांचा अहवाल सकारात्मक (पॉझिटिव्ह) आहे.
( टिप :- दि. 19 ऑगस्ट 2020 रोजी रात्री 9.00 वा. पर्यंतच्या आकडेवारीनुसार )

पुणे -शहरात १ जुन पासून लॉकडाऊन मध्ये शिथिलता आल्याने शहरात नागरिकांची वर्दळ वाढू लागली आहे. ज्या नागरिकांकडे खाजगी वाहने नाहीत,अशा चाकरमान्यांची विशेषत: कष्टकऱ्याची गैरसोय होत आहे. त्यामुळे प्रतिबंधीत क्षेत्र आणि मध्य भागातील पेठाचा भाग सोडून पीएमपीएमएल ची सेवा सुरू करण्याच्या अनुषंगाने आज दि. २० ऑगस्ट २०२० रोजी कॉन्फरन्स हॉल, महापौर कार्यालय येथे महापौर मुरलीधर मोहोळ यांनी बैठक आयोजित केली होती.
सदर बैठकी मध्ये श्री गणेशोत्सवाच्या कालावधी मध्ये गर्दी होण्याची शक्यता असल्याने गणेशोत्सवा नंतर म्हणजेच दि. ३ सप्टेंबर २०२० रोजी पीएमपीएमएल बस सेवा सु्रू करण्याचा निर्णय एकमताने घेण्यात आला आहे.

महामंडळाकडील एकूण १३ डेपोच्या १९० मार्गांवर ४२१ बसेसचे संचालनाचे नियोजन आहे. शहरातील प्रमुख रस्ते उपनगरे येथे गर्दीचे वेळी सकाळ / सायंकाळी पीएमपीएमएल शटल सेवा सुरू करण्याचे आयोजन आहे. अधिक गर्दीच्या मार्गांना या मध्ये प्राधान्य दिले आहे. कोरोना संसर्गाच्या पार्श्वभूमीवर आसन क्षमतेच्या ५०% प्रवाशांनाच सेवा उपलब्ध करून दिली जाणार आहे. तसेच सामाजिक अंतराचे पालन करण्यासाठी बसेसमध्ये सीटवर मार्कींग पेटींग करण्यात आलेले आहे. तसेच महत्वाचे स्थानकावर वर्तुळ पेंट करण्याचे काम चालू आहे.
सदर बैठकीस पिंपरी चिंचवडच्या महापौर माई ढोरे,स्थायी समितीअध्यक्ष हेमंत रासने , पीएमपीएमएलचे संचालक शंकर पवार , सभागृह नेता धीरज घाटे , पुणे मनपा आयुक्त विक्रम कुमार, पिंपरी महापालिका आयुक्त श्रावण हर्डीकर ,अध्यक्ष तथा व्यवस्थापकीय संचालक पीएमपीएमएल राजेंद्र जगताप आदी अधिकारी उपस्थित होते.

पुणे- महाराष्ट्रातील इतर उद्योग धंद्याप्रमाणे व्यायामशाळा(जिम) या पुन्हा सुरू करण्यासाठी, तसेच व्यायामशाळेतील लॉकडाऊन काळातील वस्तू व सेवा कर, मलमत्ता कर, विज बिल आणि इतर कर पूर्णपणे माफ करण्यासाठी मुंबई उच्च न्यायालयात रिपब्लिकन पार्टी ऑफ इंडिया (आय) चे राष्ट्रीय अध्यक्ष सतीश गायकवाड आणि HRT चे मालक प्रसन्ना कांबळे यांनी अॅड तोसिफ  शेख, अॅड क्रांती सहाने, अॅड स्वप्नील गिरमे, अॅड सुरेश जाधव यांच्यामार्फत याचिका दाखल केली.
३१ जुलै २०२० रोजी केंद्र सरकारने दिलेल्या नियमावलीप्रमाणे ०५ ऑगस्ट २०२० पासून सुरू करण्यासाठी परवानगी दिली होती. पण महाराष्ट्र सरकारने केंद्र सरकारच्या नियमावलीला केराची टोपली दाखवली महाराष्ट्र सरकारने केंद्र सरकारच्या नियमाप्रमाणे दारूचे दुकान, मॉल्स, लॉज धनदांडग्यांच्या पुढे नमते घेऊन सुरू केले होते. यात वैयक्तिक आर्थिक हित जोपासले असल्याची चर्चा महाराष्ट्रात दिसून येत आहे. जवळपास चार ते पाच महिन्यापासून जिम बंद असताना देखील  मोठ्या प्रमाणात वीज बिल आल्याची तक्रार बर्‍याच जणांकडून महाराष्ट्रात करण्यात  येत आहे.
महाराष्ट्रातील जिम सुरू नसल्याने आणि त्यांना दुसरा पर्यायी उत्पन्नाचे साधन नसल्याने कित्येक जिम मालक आत्महत्या केल्याची उदाहरणे महाराष्ट्रात घडली असल्याची चर्चा आहे. जिम बंद असताना भाडे देणे शक्य नाही तसेच जीम मधील बरीच उपकरणे निकामी होण्याची शक्यता नाकारता येत नाही. त्यामुळे व्यावसायिकांचे कधीही भरून न येणारे नुकसान झाले आहे. त्यामुळे सर्व जिम व्यावसायिकांना नुकसानाचे आपत्ती निर्वाह निधी देऊन त्यांचे पुनर्वसन करावे आणि लॉकडाऊन काळातील वस्तू व सेवा कर(GST) मालमत्ताकर पूर्णपणे माफ करावे असे मागणे याचिकेमध्ये याचिकाकर्त्यांतर्फे करण्यात आली आहे.

“कोरोना संपवायचा असेल तर व्यायाम शाळा सुरू करण्याची गरज आहे त्यामुळे रोगप्रतिकारक शक्ती वाढेल”-  अॅड तोसिफ शेख

“सरकारने व्यायाम शाळा सुरू करून व्यायामशाळेतील होणारे सामाजिक आर्थिक भान जपावे त्यामुळे आरोग्य विषयक सुधारणा आपोआप होईल” –  अॅड क्रांती सहाने

“केंद्र सरकार(पश्चिम बंगाल) वेश्या व्यवसायाला परवानगी देत असेल महाराष्ट्र सरकार दारू विक्रीसाठी परवानगी देत असेल तर महाराष्ट्रामध्ये व्यायाम शाळा सुरू करण्यासाठी सरकारला परवानगी द्यायला काय अडचण आहे?”  सतीश गायकवाड