पुणे,दि. 7: सार्वजनिक आरोग्य विभागाच्या आदेशानुसार ऑक्सिजन उत्पादकांनी एकूण उत्पादनाच्या 80 टक्के ऑक्सिजन वैद्यकीय उपचारासाठी तर 20 टक्के ऑक्सिजन औद्योगिक उत्पादनासाठी उपलब्ध करुन द्यावा, अशा सूचना जिल्हाधिकारी डॉ. राजेश देशमुख यांनी केल्या.

जिल्हाधिकारी कार्यालयात आज जिल्हाधिकारी डॉ. राजेश देशमुख यांच्या अध्यक्षतेखाली ऑक्सिजन उत्पादक व ऑक्सिजन सिलेंडर भरणारे उत्पादक व पुरवठादारांसोबत बैठक घेण्यात आली, त्यावेळी त्यांनी या सूचना केल्या. बैठकीला जिल्हा परिषदेचे मुख्य कार्यकारी अधिकारी आयुष प्रसाद, निवासी उपजिल्हाधिकारी डॉ.जयश्री कटारे, अन्न, औषध, प्रशासन विभागाचे सहआयुक्त सुरेश पाटील, औषध निरीक्षक प्रमोद पाटील, सहाय्यक आयुक्त शाम प्रतापराव, उद्योग विभागाचे सहसंचालक सदाशिव सुरवसे, जिल्हा उद्योग केंद्राचे सरव्यवस्थापक पी.डी. रेंदाळकर, जिल्हा शल्य चिकित्सक डॉ. अशोक नांदापूरकर आदी उपस्थित होते.

डॉ.देशमुख म्हणाले, पुणे जिल्ह्यात कोरोना बाधित रुग्णांची संख्या वाढत चालली आहे. अशा परिस्थितीत रुग्णालयांकडून ऑक्सिजनची मागणी वाढत आहे. गंभीर रुग्णांवर उपचार करताना ऑक्सिजनची कमतरता भासू नये, यासाठी उत्पादकांनी पुरेशा प्रमाणात व वेळेत ऑक्सिजनचा पुरवठा करावा.
प्रत्येकाचा जीव बहुमूल्य असून प्रत्येक जीव वाचवणं महत्वाचं आहे. सध्या कोरोना परिस्थिती कठीण असली तरी ऑक्सिजन उत्पादक कंपन्या व सिलेंडर भरणाऱ्या घटकांनी लोकसेवेच्या भावनेतून योग्य ते नियोजन करुन आपापली जबाबदारी काटेकोरपणे पार पाडावी, असेही जिल्हाधिकारी डॉ देशमुख यांनी सांगितले.

ऑक्सिजन सिलेंडर भरणाऱ्या उत्पादकांशी संवाद साधून डॉ.देशमुख म्हणाले, ऑक्सिजन सिलेंडर भरणाऱ्या उत्पादकांनी त्यांच्याकडे भरण्यात आलेले सिलेंडर केवळ वैद्यकीय उपचारासाठी वितरीत करावेत. रुग्णालय व ऑक्सिजन सिलेंडर भरणाऱ्या छोट्या उत्पादकांपर्यंत टँकर जलदगतीने पोहोचवण्यासाठी द्रवरुपातील ऑक्सिजन टँकरच्या वाहतूक वितरणादरम्यानच्या त्रुटी उत्पादकांनी दूर कराव्यात व पुरवठा सुरळीत होण्यासाठी नियोजन करावे.

यावेळी ऑक्सिजन उत्पादक कंपन्यांचे प्रमुख, ऑक्सिजन सिलेंडर भरणारे उत्पादक व पुरवठादारांनी जाणवणाऱ्या अडचणी मांडल्या. रुग्णालयांना पुरेसा ऑक्सिजन पुरवठा होण्यासाठी प्रयत्न करण्याबरोबरच प्रशासनाला सहकार्य करण्याचे आश्वासनही उपस्थितांनी दिले.

पुणे, – पुणे, पिंपरी-चिंचवड शहर व पुणे जिल्ह्यातील ग्रामीण भागात कोरोना विषाणूचा संसर्ग वाढत असल्यामुळे जिल्ह्यात कोरोनाबाधित रुग्णांची संख्या सर्वाधिक आहे. कोरोनाच्या संकट काळात कोरोनाबाधित रुग्णांची आर्थिक पिळवणूक होवू नये यासाठी मानवतेच्या भावनेने सर्वांनी मिळून मदत करण्याच्या दृष्टीने जिल्ह्यात महात्मा ज्योतिबा फुले जन आरोग्य योजनेची प्रभावी अंमलबजावणी करावी, अशी सूचना जिल्हाधिकारी डॉ राजेश देशमुख यांनी केली. तसेच या योजनेअंतर्गत जास्तीत जास्त पात्र लाभार्थ्यांना लाभ देण्याची कार्यवाही करावी, असेही यावेळी जिल्हाधिकारी डॉ देशमुख यांनी आवाहन केले.
जिल्हाधिकारी कार्यालयात जिल्हाधिकारी डॉ राजेश देशमुख यांच्या अध्यक्षतेखाली महात्मा ज्योतिबा फुले जन आरोग्य योजनेबाबत पुणे आणि पिंपरी-चिंचवड महानगरपालिका तसेच जिल्ह्यातील ग्रामीण भागातील रुग्णालयांच्या प्रतिनिधींसोबत दूरदृश्य प्रणालीद्वारे आढावा बैठक घेवून संवाद साधला. या बैठकीला जिल्हा शल्य चिकित्सक डॉ. अशोक नांदापूरकर, महात्मा ज्योतिबा फुले आरोग्य योजनेचे विभागीय समन्वयक डॉ अमोल म्हस्के, जिल्हा समन्वयक डॉ सागर पाटील, डॉ प्रिती लोखंडे, एम.डी. इंडियाचे प्रतिनिधी अविनाश बागडे उपस्थित होते.
प्रारंभी जिल्हाधिकारी डॉ देशमुख यांनी जिल्हा शल्य चिकित्सक डॉ‌ नांदापूरकर यांच्या समवेत महात्मा ज्योतिबा फुले जन आरोग्य योजनेच्या जिल्ह्यात अमंलबजावणीच्या अनुषंगाने रुग्णालयांच्या प्रतिनिधींकडून येणाऱ्या समस्या जाणून घेतल्या. जिल्हाधिकारी डॉ. देशमुख म्हणाले, महात्मा ज्योतिबा फुले जन आरोग्य योजनेअंतर्गत कोरोनाच्या काळात पुणे महानगरपालिकेच्या क्षेत्रातील रुग्णालयांनी २ हजार ६०९, पिंपरी-चिंचवड महानगरपालिकेच्या क्षेत्रातील रुग्णालयांनी २ हजार ३१, पुणे जिल्ह्यतील ग्रामीण भागातील रुग्णालयांनी ६८७ असे एकूण ५ हजार ३२७ रुग्णांला लाभ देण्यात आलेला आहे. यातून असे निदर्शनात येते की, काही रुग्णालयांनी या योजनेअंतर्गत जास्तीत जास्त लाभार्थ्यांना लाभ दिलेला आहे, ही निश्चितच समाधानकारक बाब आहे. परंतु काही रुग्णालये पात्र लाभार्थ्यांना अपेक्षित लाभ देण्यामध्ये कमी पडलेले आहेत. त्यामुळे आपण सर्वांनी याप्रकरणी गांभीर्याने व संवेदनशीलतेने लक्ष घालून परिस्थिती सुधारावी, कोरोना बाधित रुग्णाला मदत करावी, या योजनेच्या प्रभावी अंमलबजावणी करण्यासाठी महसूल विभाग, जिल्हा परिषदेतील कर्मचारी तसेच आरोग्य मित्र यांच्या समन्वयाने रुग्णालयांनी काम करावे. ही योजना सर्व लोकप्रतिनिधींमार्फत सर्व नागरिकांपर्यत पोहचवावी, अशा सूचना जिल्हाधिकारी डॉ. देशमुख यांनी दिल्या. रुग्णालयांच्या प्रलंबित देयकाच्या अनुषंगाने जिल्हा परिषदेचे मुख्य कार्यकारी अधिकारी यांच्याशी चर्चा करुन पुढील निर्णय घेण्यात येईल असेही यावेळी स्पष्ट केले.
महात्मा ज्योतिबा फुले जन आरोग्य योजनेच्या प्रभावी अंमलबजावणी करिता रुग्णालयांकडून सहकार्य करण्यात येईल, असे आश्वासन यावेळी रुग्णालयांच्या प्रतिनिधींकडून देण्यात आले.

• कोरोनातून बरे झालेल्या रुग्णांनी अधिक प्रमाणत प्लाझ्मा दान करावे असे आवाहन नगरसेवक किरण दगडे पाटील यांनी केले आहे.

पुणे – बावधन येथे सर्व सुविधायुक्त ५० बेडच्या मोफत कोविड केअर सेंटरचे भारतीय जनता पक्षाचे प्रदेशाध्यक्ष आमदार चंद्रकांत पाटील यांच्या उद्घाटन करण्यात आले. बावधन च्या सरपंच पियुषा किरण दगडे पाटील , नगरसेवक किरण दगडे पाटील यांच्या सहकार्यातून हे कोविड केअर सेंटर चालवले जाणार असल्याने समाजसेवेचे एक उत्तम उदाहरण ठरणार असल्याचे यावेळी चंद्रकांतदादांनी सांगितले. या कोविड केअर सेंटरमध्ये २४ तास २ डॉक्टर व २ नर्स असणार आहेत. तर २ ऑक्सिजन सिलेंडर उपलब्ध असून रुग्णांना मास्क, सॅनिटायझर दोन वेळचे जेवण, नाष्टा, चहा, प्रतिकारशक्ती वाढवणारा काढा अशा सर्व सुविधा देण्यात येणार आहे. तर रुग्णांसाठी बेड, मॅट्रेसेस, बेडशीट, पिलोव्ह, वाफ घ्यायचे भांडे, गरम पाण्याचे भांडे, कोलगेट, ब्रश, टॉवेल, पाणी बॉटल्स, टीश् पेपर, तेल अशा सर्व दैनंदिन वापराच्या वस्तूही पुरवल्या जाणार आहेत. ही सर्व व्यवस्था मोफत केली असून त्याचा भार सरपंच पियुषा किरण दगडे पाटील व नगरसेवक किरण दगडे पाटील यांनी उचलला आहे.
   कोरोनाच्या महामारीमुळं सर्वसामान्यांचे हाल झाले असताना गोरगरिब जनतेला मोठी झळ बसली आहे. त्यातच कोरोना आजारावर उपचार घेण्यासाठी रुग्णांना भरमसाठ पैसै मोजावे लागत आहेत. त्यामुळे गोरगरिब रुग्णांची सोय होण्यासाठी समाजसेवेचं एक पाऊल म्हणून या कोविड केअर सेंटरच्या माध्यमातून छोटासा प्रयत्न केला आहे.तसेच कोरोनातून बरे झालेल्या रुग्णांना अधिक प्रमाणत प्लाझ्मा दान करण्याचे आवाहन नगरसेवक किरण दगडे पाटील यांनी केले आहे.

पुणे- कोरोना रोगाचा प्रादुर्भाव बघता पुणे महानगरपालिकेने कायमस्वरूपी अद्ययावत चाचणी प्रयोगशाळा उभारणे ही आता शहराची आणि काळाची गरज बनली आहे. आणि याच करता नायडू हॉस्पिटल च्या आवरामध्ये पुणे महानगरपालिकेच्या वतीने करोना चाचणी प्रयोगशाळा कायमस्वरूपी उभी करण्यात यावी. अशी मागणी नगरसेवक आणि स्थायी समिती चे माजी अध्यक्ष विशाल तांबे यांनी केली आहे .

या संदर्भात त्यांनी म्हटले आहे कि , शहर मार्च महिन्यापासून कोरोनाच्या प्रदूर्भावाने ग्रस्त आहे. आजमितीस देशातील सर्वात जास्त  कोरोनाग्रस्तांची संख्या ही पुणे शहरात आहे. महानगरपालिकेच्या वतीने सातत्याने रुग्णांची चाचणी करण्याचे प्रयत्न केले जात आहेत.यामध्ये आरटीपीसीआर आणि अँटिजिन रॅपिड स्वब टेस्ट या दोन प्रकारच्या चाचण्या केल्या जातात. यापैकी आरटीपीसीआर टेस्ट रिपोर्ट हे बीजे मेडिकल कॉलेज किंवा एन.आय.व्ही किंवा आय.सी.एम.आर यांच्याकडून पुणे महानगरपालिकेस दिले जातात. गेले अनेक दिवस शहरात वाढणाऱ्या रुग्ण संख्येच्या पटीत यापुढील काळात  प्रयोगशाळांकडून रिपोर्ट मिळण्याकरता उशीर होत आहे. किंबहुना ते मिळण्याकरता किमान दोन ते तीन दिवसांचा कालावधी आजमितीस लागत आहे. रोगाचा प्रादुर्भाव बघता पुणे महानगरपालिकेने कायमस्वरूपी अद्ययावत चाचणी प्रयोगशाळा उभारणे ही आता शहराची आणि काळाची गरज बनली आहे. आणि याच करता नायडू हॉस्पिटल च्या आवरामध्ये पुणे महानगरपालिकेच्या वतीने करोना चाचणी प्रयोगशाळा कायमस्वरूपी उभी करण्यात यावी.ज्यामुळे वाढणाऱ्या रोगाचा प्रादुर्भाव बघता मोठ्या प्रमाणात आरटीपीसीआर टेस्टिंग करणे हे महानगरपालिकेला शक्य होणार आहे, आणि या टेस्टिंग मुळे स्वतःच्या प्रयोगशाळेचा उपयोग लवकरात लवकर टेस्ट रिपोर्ट देण्यासाठी होणार आहे. परिणामी शहरांमधला कोरोनाचा प्रादुर्भाव रोखण्यासाठी यामुळे निश्‍चितपणे हातभार लागणार आहे. म्हणून पुणे महानगरपालिकेच्या वतीने कायमस्वरूपी स्वतःच्या मालकीची प्रयोगशाळा लवकरात लवकर सुरू करण्यात यावी

पुणे विभागातील 2 लाख 7 हजार 393 कोरोना बाधित रुग्ण बरे होऊन घरी गेले,
विभागात कोरोना बाधित 2 लाख 77 हजार 911 रुग्ण
-विभागीय आयुक्त सौरभ राव

पुणे, :- पुणे विभागातील 2 लाख 7 हजार 393 कोरोना बाधित रुग्ण बरे होऊन घरी गेले असून विभागात कोरोना बाधीत रुग्णांची संख्या 2 लाख 77 हजार 911 झाली आहे. तर ॲक्टीव रुग्ण संख्या 63 हजार 209 इतकी आहे. कोरोनाबाधीत एकुण 7 हजार 309 रुग्णांचा मृत्यू झाला असून मृत्यूचे प्रमाण 2.63 टक्के आहे. पुणे विभागामध्ये बऱ्या होणा-या रुग्णांचे प्रमाण 74.63 टक्के आहे, अशी माहिती विभागीय आयुक्त सौरभ राव यांनी दिली.
पुणे जिल्हा
पुणे जिल्हयातील कोरोना बाधीत एकूण 1 लाख 93 हजार 13 रुग्णांपैकी 1 लाख 53 हजार 936 रुग्ण बरे होवून घरी गेले आहेत. ॲक्टीव रुग्ण संख्या 34 हजार 613 आहे. कोरोनाबाधित एकूण 4 हजार 464 रुग्णांचा मृत्यू झाला आहे. मृत्यूचे प्रमाण 2.31 टक्के इतके आहे तर बरे होणा-या रुग्णांचे प्रमाण 79.75 टक्के आहे.
सातारा जिल्हा
सातारा जिल्हयातील कोरोना बाधीत एकूण 18 हजार 490 रुग्णांपैकी 10 हजार 777 रुग्ण बरे होवून घरी गेले आहेत. ॲक्टीव रुग्ण संख्या 7 हजार 225 आहे. कोरोनाबाधित एकूण 488 रुग्णांचा मृत्यू झाला आहे.
सोलापूर जिल्हा
सोलापूर जिल्हयातील कोरोना बाधीत एकूण 20 हजार 704 रुग्णांपैकी 15 हजार 164 रुग्ण बरे होवून घरी गेले आहेत. ॲक्टीव रुग्ण संख्या 4 हजार 718 आहे. कोरोनाबाधित एकूण 822 रुग्णांचा मृत्यू झाला आहे.
सांगली जिल्हा
सांगली जिल्हयातील कोरोना बाधीत एकूण 17 हजार 25 रुग्णांपैकी 9 हजार 65 रुग्ण बरे होवून घरी गेले आहेत. ॲक्टीव रुग्ण संख्या 7 हजार 300 आहे. कोरोनाबाधित एकूण 660 रुग्णांचा मृत्यू झाला आहे
कोल्हापूर जिल्हा
कोल्हापूर जिल्हयातील कोरोना बाधीत एकूण 28 हजार 679 रुग्णांपैकी 18 हजार 451 रुग्ण बरे होवून घरी गेले आहेत. ॲक्टीव रुग्ण संख्या 9 हजार 353 आहे. कोरोनाबाधित एकूण 875 रुग्णांचा मृत्यू झाला आहे
कालच्या रुग्णसंख्येच्या तुलनेत आज झालेली वाढ
कालच्या बाधीत रुग्ण संख्येच्या तुलनेत पुणे विभागात बाधीत रुग्णांच्या संख्येमध्ये एकूण 7 हजार 615 ने वाढ झाली आहे. यामध्ये पुणे जिल्ह्यात 4 हजार 447, सातारा जिल्ह्यात 827 , सोलापूर जिल्ह्यात 534 , सांगली जिल्ह्यात 763 तर कोल्हापूर जिल्ह्यात 1 हजार 44 अशी रुग्ण संख्येमध्ये वाढ झालेली आहे.
पुणे विभागातील सर्व्हेक्षण
आजपर्यत विभागामध्ये एकुण 12 लाख 95 हजार 493 नमून्याचा तपासणी अहवाल प्राप्त झाला. प्राप्त अहवालांपैकी 2 लाख 77 हजार 911 नमून्यांचा अहवाल सकारात्मक (पॉझिटिव्ह) आहे.

( टिप :- दि. 6 सप्टेंबर 2020 रोजी रात्री 9.00 वा. पर्यंतच्या आकडेवारीनुसार )

पुणे- शहर आणि देशभर स्वछतेला प्राधान्य देणारे केंद्र आणि राज्य सरकारचे धोरण असताना ,संपूर्ण शहरात स्वच्छतागृहांची प्रचंड मोठ्ठ्या स्वरूपात कमतरता स्पष्ट दिसत असताना महिला बाल कल्याण समितीने आजवर गेल्या वर्षभरातअसंख्य सुलभ शौचालये पाडण्याचे प्रस्ताव मंजूर केल्याचा धक्कादायक आरोप केला जातो असून आता ९ सप्टेंबर रोजी होणाऱ्या पहिल्या पाक्षिक सभेत नगरसेवक राजेश बराटे यांनी 2 सुलभ शौचालये पाडण्याचे प्रस्ताव दिले आहेत . सुलभ शौचालये हि रस्त्यावरून येणाऱ्या जाणाऱ्या नागरिकांच्या सोयी साठी केली असताना हि शोचालये पाडण्यासाठी मात्र त्यांनी आता घरोघरी शौचालये आहेत . यांची गरज नाही असे कारण देऊन हा प्रस्ताव दिला आहे. मात्र घराबाहेर पडलेल्या नागरिकांनी शु आणि सु कुठे करायची ? हा प्रश्न पुण्याच्या महापालिकेने कायमच अनुत्तरीत ठेवला आहे.

प्रभाग क्रमांक ३१ मधील गोसावी वस्ती आकाश मित्र मंडळ तसेच याच प्रभागातील विकास मित्र मंडळ येथील सुलभ शोचालये पाडण्यासाठी 2 प्रस्ताव नगरसेवक बराटे यांनी दिले आहेत . या शौचालयांचा आजूबाजूच्या लोकांकडून गैरवापर होतो . रात्रीच्या वेळी मद्यपी कडून त्याचा गैरवापर होतो .आणि येथून जवळ असलेल्या बिजले चौक आणि मावळे आळी चौकात सुलभ शौचालये आहेत त्यांचा मात्र व्यवस्थित वापर होतो .प्रत्येकाच्या घरी शोचालये देखील आहेत त्यामुळे यांची गरजा उरलेली नाही ती पाडावीत असे या प्रस्तावात म्हटले आहे.

हिल व्ह्यू पार्क ,कार डेपो येथील शौचालय पाडण्याचा प्रस्ताव अतिरिक्त आयुक्त महापालिका यांनी दिला आहे . त्याबाबत जागा पाहणी करण्याचा निर्णय गेल्या सभेत घेण्यात आला होता . हा प्रस्ताव हि आता पुन्हा या सभेत मान्यतेसाठी येतो आहे.

शौचालये पाडण्यामागचे गूढ

खरे तर शहरातील काही शौचालयांचा गैरवापर काही समाज कंटक करीत असतात याबाबतची माहिती अनेकांना असते पण त्यावर कारवाई करण्यास आणि शौचालये स्वच्छ ठेवण्यास कोणीही पुढे येताना दिसत नाही .

तर काही शौचालये गरज असताना गैरवापर नसताना,योग्य वापर असताना हि केवळ आजू बाजूच्या कोणाच्या तरी इमारतीच्या आड येतात ,दुकानांची किंमत कमी करतात अशी शौचालये महापालिकेत कोणाला तरी हाताशी धरून पाडण्याचा घाट घालण्यात येतो किंवा महापालिकेशी संबधित लोक बेनामी बिल्डर असतात ते हि अशी कारस्थाने करतात . वास्तविक पाहता लाईट , स्वच्छता, ठेवून ये जा करणाऱ्या स्त्री -पुरुषांना स्वच्छता गृहांची नितांत गरज पुण्यात आहे .

या पार्श्वभूमीवर आजवर या समितीत येणारे असे प्रस्ताव कायम संशयाच्या भोवऱ्यात कोणाच्या हित संबधातून येत असतात असा आजवर कायम आरोप होत आलेला आहे.

पुणे,  : धोकादायक वीजयंत्रणेची माहिती किंवा तक्रारी व्हॉटस् अॅपद्वारे पाठविण्याचे आवाहन महावितरणकडून करण्यात आल्यानंतर सोमवार (दि. 7)पर्यंत पुणे प्रादेशिक विभागात 200 ठिकाणच्या वीजयंत्रणेची सुरक्षेच्या दृष्टीने योग्य दुरुस्ती करण्यात आली आहे. यामध्ये पुणे परिमंडलातील 58 तक्रारींचा समावेश आहे. महावितरणकडून वीजसुरक्षेसाठी सुरु करण्यात आलेल्या उपक्रमाचे सर्वत्र स्वागत होत आहे.

शहरी व ग्रामीण भागातील वीजतारा तुटणे, झोल पडणे किंवा जमीनीवर लोंबकळणे, फ्यूज पेट्या व फिडर पिलरचे दरवाजे तुटणे किंवा नसणे, खोदाईमुळे भूमिगत केबल उघड्यावर पडणे, रोहित्रांचे कुंपण उघडे असणे अशा वीजसुरक्षेला धोका निर्माण करणाऱ्या यंत्रणेची माहिती देण्यासाठी किंवा तक्रार करण्यासाठी पुणे परिमंडल अंतर्गत पुणे व पिंपरी चिंचवड शहरासह हवेली तालुका तसेच मुळशी, वेल्हे, मावळ, खेड, जुन्नर व आंबेगाव तालुक्यांसाठी 7875767123 व्हॉटस् अॅप मोबाईल क्रमांक उपलब्ध करून देण्यात आला आहे.

पुणे परिमंडलात व्हॉटस् अॅपद्वारे आतापर्यंत 88 ठिकाणी वीजयंत्रणा धोकादायक असल्याची माहिती प्राप्त झाली. महावितरणच्या संबंधीत कार्यालयांकडून 58 ठिकाणचे दुरुस्ती कामे तातडीने पूर्ण करण्यात आले आहेत. उर्वरित 30 ठिकाणी वरिष्ठ कार्यालयांची मंजुरी किंवा शिफ्टींगची गरज परंतु जागेची अडचण आदींमुळे सध्या कार्यवाही सुरु आहे. वीज वितरण यंत्रणेतील धोके कमी करण्यासाठी व्हॉटस् अॅप क्रमांकावर माहिती देण्याच्या उपक्रमाला नागरिकांनी प्रतिसाद देऊन सहकार्य करावे, असे आवाहन महावितरणचे पुणे प्रादेशिक संचालक (प्र.) श्री. अंकुश नाळे यांनी केले आहे.

व्हॉटस् अॅपच्या मोबाईल क्रमांकावर फक्त वीजवितरण यंत्रणेपासून धोका असल्याची फोटोसह माहिती / तक्रारी स्वीकारण्यात येणार आहेत. या मोबाईल क्रमांकावर नागरिकांना कॉल करू नये. फक्त धोकादायक यंत्रणेचे स्थळ संपूर्ण पत्यासह किंवा गुगल लोकेशनसह द्यावे. तसेच ज्या नागरिकांकडे व्हॉटस् अॅप नाहीत त्यांनी ‘एसएमएस’द्वारे पत्त्यासह माहिती दिल्यास त्याचेही निराकरण करण्यात येणार आहे. यासोबतच अशा तक्रारींसाठी महावितरणच्या टोल फ्री क्रमांकावर थेट संपर्क साधून माहिती देता येईल.

पुणे परिमंडलाच्या 7875767123 या व्हॉटस् अॅप क्रमांकावर प्राप्त झालेली धोकादायक यंत्रणेची फोटोसह माहिती किंवा तक्रार तात्काळ संबंधीत विभागीय व उपविभागीय कार्यालयात पाठविण्यात येत आहे. तसेच यंत्रणेची दुरुस्ती झाल्यानंतरचे छायाचित्र पाठवून संबंधीत तक्रारकर्त्यांना कळविण्यात येत आहे. या उपक्रमाचे अनेक ग्राहकांनी स्वागत केले असून तक्रारींनुसार दुरुस्ती कामे लगेचच पूर्ण केल्याबाबतव्हॉटस् अॅपवर समाधान व्यक्त करीत आहेत.